საქართველოს ენერგეტიკისა და წყალმომარაგების მარეგულირებელი ეროვნული კომისიის [სემეკი] ინფორმაციით, წყალმომარაგების ქსელზე მიერთების საფასური მოქალაქეებისთვის მუნიციპალიტეტებში 100 ლარით მცირდება და 400 ლარი იქნება. ცვლილება არ შეეხება თვითმმართველ ქალაქებს, სადაც მიერთების საფასური იგივე, ანუ 500 ლარი დარჩება.
როგორც სემეკში „ბათუმელებს“ განუმარტეს, ცვლილებების პაკეტი ჯერ კიდევ განხილვაშია, თუმცა არსებითი ცვლილება ტარიფებთან დაკავშირებით, მოსალოდნელი არ არის.
ამასთანავე, კომპანია ვალდებული იქნება, მომხმარებლის მოთხოვნის შემთხვევაში, მიერთების საფასური 2 წელზე გადაუნაწილოს.
„საქართველოს ენერგეტიკისა და წყალმომარაგების მარეგულირებელი ეროვნული კომისია განიხილავს პაკეტს, რომელიც მუნიციპალიტეტებში ქსელზე მიერთების საფასურს 100 ლარით შეამცირებს. ცვლილება არ შეეხება აბონენტად დარეგისტრირებას“, – გვეუბნებიან სმკ-ში.
„ბათუმის წყალში“ აცხადებენ, რომ აბონენტად რეგისტრაცია 100 ლარი ღირს და ცვლილება არ იგეგმება.
სემეკის ინფორმაციით, მიერთების საფასურის შემცირებაა დაგეგმილი იმ მსხვილი მომხმარებლებისთვისაც, რომლებიც საჭიროებენ დიდი დიამეტრის მილსადენებს. „100 და 150 მილიმეტრიან წყალარინების მილსადენებზე მიერთების მოქმედ საფასურებს შორის აქამდე დიდი სხვაობა იყო, რაც, რიგ შემთხვევაში, სადავო ხდებოდა. შესაბამისად, ეს სხვაობა დაბალანსდება წყალარინების დიდი დიამეტრის მილსადენების მიერთების საფასურის შემცირებით. მაგალითისათვის, პროექტით, 150 მმ წყალარინების მილის მიერთება [დღეს მოქმედი საფასურია 11 500 ლარი] თვითმმართველი ქალაქებისთვის დაახლოებით 39%-ით მცირდება [გახდება 7 000 ლარი], ხოლო სხვა მუნიციპალიტეტებისთვის 57%-ით [გახდება 5 000 ლარი]“, – აცხადებენ სემეკში.
——–
თვითმმართველი ქალაქებისთვის [თბილისი, რუსთავი, ქუთაისი, ფოთი, ბათუმი], 2020 წლის იანვრიდან, ბუნებრივი აირის გამანაწილებელ ქსელზე მიერთების საფასური გაორმაგდა და მოქალაქე 400 ლარის ნაცვლად, 800 ლარს გადაიხდის.
