Batumelebi

ნათია ზოიძე, აჭარის ტელევიზიისა და რადიოს დირექტორის მოვალეობის შემსრულებელი: 

„გოგა კოხრეიძემ საბუთები შემოიტანა, მიუხედავდ იმისა, რომ მან სასამართლოს მიმართა და ამტკიცებდა, რომ აჭარის ტელევიზიის არჩეული დირექტორია. ახლა ისევ ცდის ბედს, რადგან ეს მოკლე გზაა გახდეს დირექტორი.

სად ხართ ის ხალხი, იმედი რომ გქონდათ ორი წელი გაგრძელდებაო სასამართლო დავა?

ხელისუფლებამ დადო სცენარი, ჩვენ გავშიფრეთ ამ სცენარით რომ წავიდოდნენ, ელჩებს გავუზიარეთ ჩვენი ვარაუდები, წერილიც გამოვაქვეყნეთ, არსამთავრობო ორგანიზაციების, პროფესიული წრეების წარმომადგენლებსაც შვხვდით.

ხელისუფლების წარმომადგენლები გვიკიჟინებდნენ: შეთქმულებების თეორიებში ღრმად მიდიხართო.

მრჩეველთა საბჭომ სასწრაფოდ ჩანიშნა სხდომა პარასკევს, მოკლედ  არ არის გამორიცხული 21 ნოემბერს ტელევიზიის დირექტორის პოსტი ჩააბარონ ბატონ კოხრეიძეს.

ბატონმა კოხრეიძემ იცრუა: თქვა, რომ ბეჟან გობაძე (საბჭოს ყოფილი წევრი) იქ დასეირნებდა და პროცესში არ მონაწილეობდაო, ნაცარი მოგვაყარა თვალებში, ჩვენც, სასამართლოსაც, საზოგადოებასაც.

ბატონებო და ქალბატონებო! მიზანი არ ამართლებს საშუალებას, არ ღირს სავარძელი იმად, რომ შეიძლება თქვა ტყუილი, მორალის ამბავია ეს და უნდა გესმოდეს, რომ საზოგადოებრივი მაუწყებლის ხელმძღვანელის თანმდებობა უნდა დაიკავო. აქ კი ნდობა და რეპუტაცია გადამწყვეტი ფაქტორია.

მოგიწოდებთ ყველას, ვისი გამოცდილებაც იძლევა საშუალებას, მიიღეთ ტელევიზიის დირექტორის კონკურსში მონაწილეობა. ერთი დღე დარჩა, რაც ბევრი მით უკეთესი, გამოგვყევით ბოლომდე, ლუსტრაციის დროა!“

___________

წყარო: ფეისბუქი

18 ნოემბერს, ქუთაისის სააპელაციო სასამართლომ გააუქმა ბათუმის საქალაქო სასამართლოს გადაწყვეტილება, რომლითაც საზოგადოებრივი მაუწყებლის „აჭარის ტელევიზიის და რადიოს“ დირექტორის შესარჩევი კონკურსი გიორგი კოხრეიძის სარჩელის საფუძველზე ამ დრომდე შეჩერებული იყო მოსამართლე კობა გოცირიძის გადაწყვეტილებით. გოგა კოხრეიძე მიიჩნევდა, რომ „აჭარის ტელევიზიის“ არჩეული დირექტორი თვითონაა და ამიტომ იჩივლა სასამართლოში.

გიორგი კოხრეიძემ „აჭარის ტელევიზიის“ დირექტორობის პირველ ორ კონკურსში ვერც ერთი ხმა მიიღო, მესამედ გამოცხადებულ კონკურსში კი – 2 ხმა. საბჭომ მესამედ გამოცხადებული კონკურსიც ჩაშლილად გამოაცხადა მრჩეველთა საბჭოს რეგლამენტის საფუძველზე, რომელიც დირექტორის ასარჩევად 2+1 ხმის საჭიროებას ადგენს. გიორგი კოხრეიძე მიიჩნევდა, რომ საბჭოს ერთი წევრი – ბეჟან გობაძე სხდომას ესწრებოდა, როგორც გარედან გარედან მაყურებელი, სხდომაში მონაწილე სამი წევრიდან ორმა კი, მას მხარი დაუჭირა.

სასამართლოს 18 ნოემბრის განჩინების მიხედვით, გიორგი კოხრეიძის სარჩელის განხილვა ბათუმის საქალაქო სასამართლოში გაგრძელდება, სადაც უნდა დადგინდეს, არის თუ არა იგი არჩეული დირექტორი, მანამდე კი, მრჩეველთა საბჭოს უკვე ახალი შემადგენლობას ტელევიზიის ახალი დირექტორი უნდა შეერჩია, თუმცა, აჭარის ტელევიზიისა და რადიოს დირექტორის მოვალეობის შემსრულებლის, ნათია ზოიძის ფეისბუქზე განცხადების თანახმად, გოგა კოხრეიძემ ისევ შეიტანა საბუთები დირექტორის კონკურსში მონაწილეობის მისაღებად.

მეუფე იაკობი, ბოდბელი მთავარეპისკოპოსი:

„ჩვენ ოკუპაციას არ შევეგუებით. ჩვენი ბრძოლის ფორმა იქნება მშვიდობიანი და ცივილიზებული. დიდი იმედი გვაქვს, რომ ევროპელი და ამერიკელი სტრატეგიული პარტნიორები დაგვეხმარებიან. ვიცით ეს ხანგრძლივი პროცესია. მე აფხაზეთის ომის მონაწილე ვარ. ძალიან ბევრი მეგობარი დავკარგე. ყოველთვის ვუთანაგრძნობდი აფხაზ ხალხს, რადგან ეს არ იყო ჩვენი და აფხაზების ომი, ეს იყო რუსეთ-საქართველოს ომი, რომელსაც მოჰყვა საქართველოს დიდი ტერიტორიების ოკუპაცია.

მინდა იცოდეთ, რომ საქართველოს მოსახლეობის უდიდესი ნაწილი თავს ევროპელად მიიჩნევს და ევროპისკენ მივისწრაფვით და არა დამპყრობლისკენ. ეს არასდროს მოხდება. ჩვენი საფლავები მოსპეს აფხაზეთში და აღარ გვაქვს შესაძლებლობა ჩავიდეთ. არ გვეძლევა საშუალება მოვილოცოთ ჩვენი სალოცავები. ძალიან დიდი მადლობელი ვიქნებით ყველა, თუ დაგვეხმარებით. ჩვენ ისტორიული სამართლიანობის აღდგენას ვითხოვთ.

….ჩვენი და რუსეთის ურთიერთობები გაყინულია. არც ფიქრობენ ჩვენთან დალაპარაკებას. ჩვენი მიწა იყო და არის ისტორიული. რუსეთმა არა ზევიდან, არამედ როგორც პარტნიორს ისე უნდა გვიყუროს. ამ საკითხში ჩვენი ჩართულობა კარგი იქნება. დიდ მადლობას მოგახსენეთ, რომ ყოველთვის აღიარებთ საქართველოს ტერიტორიულ მთლიანობას. ეს ძალიან კარგია. უკრაინაზე ხშირად არის ლაპარაკი და ხშირად საქართველოს საკითხი გამოტოვებულია. გთხოვთ, გაითვალისწინოთ და ყველგან უკრაინასთან ერთად ახსენოთ საქართველო. ჩვენც მშვიდობიანაც გვინდა გადაწყდეს. ისე, რასაც უფალი დაუშვებს, ჩვენ მზად ყველაფრისთვის ვართ.“

19 ნოემბერს ევროპარლამენტში გაიხსნა სემინარი, რომლის  მთავარი თემაა ეკლესიის როლი მშვიდობის აღდგენისა და კონფლიქტების მოგვარების საკითხში. სემინარზე ბოდბელი მთავარეპისკოპოსის გამოსვლის ტექსტს “იმედინიუსი” ავრცელებს. 

შემოსავლების სამსახურის ცნობით, სარფის საბაჟოზე, ეჭვის საფუძველზე, მებაჟე ოფიცრებმა საქართველოს მოქალაქის ლ.გ.-ს ფიზიკური დათვალიერების შედეგად, 4 864 ლარის ღირებულების არადეკლარირებული ოქროს საიუველირო  (59,75 გრამი) ნაკეთობები გამოავლინეს.

საქართველოს საბაჟო კოდექსის 168-ე მუხლის I ნაწილის შესაბამისად, კანონდამრღვევ მოქალაქეს, სანქციის სახით, ფულადი ჯარიმა, 4 864 ლარის ოდენობით შეეფარდა.

„ბათუმის ავტოტრანსპორტის“ ინფორმაციით, ქალაქში 8 ახალი ელექტროავტობუსის შემოყვანასთან დაკავშირებით, გათვალისწინებულია 25 მძღოლისა და 5 ინჟინრის გადამზადება. ახალ ავტობუსებს ბათუმში 2020 წლის აპრილის თვეში ელოდებიან, თუმცა ამ დრომდე არ არის გადაწყვეტილი, თუ რომელ ხაზზე ივლიან ეს ელექტროავტობუსები. გადაწყვეტილი არ არის ავტობუსების ფერიც.

„გვინდა მოვიცვათ უფრო  ქალაქის შუაგული. ესაა, ვთქვათ, ბაგრატიონის, ლერმონტოვის, ხიმშიაშვილის, ჯავახიშვილის, გორგილაძის ქუჩები. ელექტროავტობუსების მოძრაობა არ არის დაგეგმილი რუსთაველის ქუჩაზე, ასევე მახინჯაურის, სარფის, აეროპორტის მიმართულებით“ – გვითხრეს „ბათუმის ავტოტრანსპორტში“.

„ბათუმის ავტოტრანსპორტის“ ინფორმაციით:

[checklist]

• „ელექტრობუსი დაიტენება ბოლო გაჩერებებზე. ელექტრობუსს შეუძლია გაიაროს დატენვის გარეშე დაახლოებით 25 კილომეტრი. დატენვა დარჩენილი 30%-დან – 80%-მდე ელემენტის მუხტით ხდება 6-8 წუთში. ყოველი ბრუნის შემდეგ მოხდება სწრაფი დატენვა;
• ელექტროავტობუსის დატენვის ყოველდღიური ხარჯი თითქმის 10-ჯერ დაბალია ვიდრე დიზელის საწვავზე მომუშავე ავტობუსების;
• ვადა ელექტრო აკუმულატორებზე 10 წელი. სამუშაო რესურსი ელექტრობუსის – 12 წელი;
• ელექტრობუსი დაიტევს 75 მგზავრს და აქვს 18 დასაჯდომი ადგილი“.

[/checklist]

„ავტოტრანსპორტში“ აცხადებენ, რომ „ასეთი ძვირადღირებული მუნიციპალური ავტობუსი ბათუმში ჯერ არ ყოფილა, მაგრამ ეს ძალიან ეკონომიური და ეკოლოგიურად სუფთა ტრანსპორტია“. ელექტროავტობუსები ბათუმში ბელარუსიიდან შემოვა.

„ელექტრობუსი იქნება დაბალძირიანი, კლიმატ კონტროლით [რაც არის მნიშნელოვანი ბათუმისთვის ზაფხულში და ზამთარში). ყველა ელექტრობუსშია – ინფორმაციული ეკრანი. მგზავრების უსაფრთხოებისთვის, ასევე ანტი-ვანდალური ზომებისთვის ყველა ელექტრობუსში იქნება ვიდეოკონტროლის სისტემა, მძღოლის მონიტორზე იქნება გამოყვანილი ვიდეო თვალით დაფიქსირებული სურათი სალონიდან. ყველა ელექტრობუსი არის აღჭურვილი პანდუსით“ – აცხადებს „ბათუმის ავტოტრანსპორტი“.

ბათუმის მერიის ინფორმაციით,  ელექტროავტობუსების პროექტისთვის 3 მილიონ 777 ათასი ევრო [სესხი და გრანტი] დაიხარჯება. ამ თანხაში შედის ელექტროავტობუსების დასამუხტი აპარატურაც.

ბოლო პერიოდში ბათუმის ავტოპარკი დიზელზე მომუშავე 40 ავტობუსით განახლდა. ელექტროავტობუსების მიღების შემდეგაც, ბათუმის ავტოპარკს განახლება მაინც დასჭირდება, თუმცა საჭირო ფინანსები ჯერ გამოყოფილი არ არის.

ამ თემაზე:

2019 წელს აჭარაში ტუბერკულოზის 210 ახალი შემთხვევაა დარეგისტრირებული. რეგიონების მიხედვით, ყველაზე მაღალი მაჩვენებლი აჭარაში, სამეგრელოსა და თბილისშია.

ნულოვანი ტუბერკულოზის ინიციატივის პროექტის ფარგლებში, აჭარის საზოგადოებრივი ჯანდაცვის ცენტრში სამუშაო ვიზიტით იმყოფება საერთაშორისო ექსპერტი ტომას ნიკოლსონი, რომელიც პროექტის ეფექტურობასა და მობილური ჯგუფების ტექნიკური აღჭურვილობის გაუმჯობესების საკითხებზე მუშაობს.

საზოგადოებრივი ჯანდაცვის ცენტრის დირექტორის მოადგილე, პროექტის კოორდინატორის,  ნონა ეფაძის თქმით, პროექტი, რომლის მიზანია ტუბერკულოზის მაჩვენებლის შემცირება მინიმუმამდე, 2018 წლის აგვისტოში ამოქმედდა. პროექტის მიზანია ასევე მკურნალობაში ჩართული პირების კონტროლზე აყვანა, იმისთვის რომ ბოლომდე მიიყვანონ მკურნალობა. ასევე, გამოვლენაზე მუშაობა.

„პროექტის ამუშავების  საფუძველი იყო ტუბერკულოზის მაჩვენებლის ზრდა. 2018 წელს ტუბერკულოზის მაჩვენებელი 2 606-მდე იყო გაზრდილი,  მათ შორის 1 926 ახალი შემთხვევა გამოვლინდა. 2019 წელს კი 210 ახალი შემთხვევაა დარეგისტრირებული. ამ ყველაფრის მიუხედავად, ტუბერკულოზის კლების ტენდენცია გვაქვს“-გვეუბნება ნონა ეფაძე.

„საერთო შემთხვევების 20-30 პროცენტი დაუსრულებელი მკურნალობაა, ამიტომ ამ კუთხით მიდის მუშაობა და ვიმსჯელებთ იმაზე, როგორ გავაუმჯობესოთ ეს. ასევე მობილური ჯგუფის აღჭურვა. სწორედ ამ პროექტის ძლიერი და სუსტი მხარეების გამოვლენაზე მუშაობს ტომ ნიკოლსონი ჩვენთან. ასევე შედეგებზეც იყო საუბარი. რა თქმა უნდა, რეკომენდაციებიც იქნება“.

ნონა ეფაძის თქმით, ტუბერკულოზის გამოვლენის ერთ-ერთი ხელშემშლელი არის ის, რომ საეჭვო პაციენტი, რომელსაც რეკომენდაცია ეძლევა რომ მივიდეს ფთიზიატრიულ სამსახურში, არ მიდის, რის გამოც დიაგნოზის დადასტურებაც ვერ ხერხრდება: „ამ რგოლის გაუმჯობესებაზე გვაქვს საუბარი ექსპერტთან“.

ტუბერკულოზი ყველაზე მეტად გავრცელებულია 25-იდან 55 წლამდე ასაკის ადამიანებში. გავრცელება კაცებში უფრო მეტია ვიდრე ქალებში. ტუბერკულოზის სკრინინგსა და მკურნალობას სახელმწიფო მთლიანად აფიანანსებს.

მთავარი ფოტო: ნონა ეფაძე/აჭარის საზოგადოებრივი ჯანდაცვა.

ხულოს მუნიციპალიტეტის სოფელ დიდ რიყეთში, ტყეში ხანძარია. საგანგებო სიტაუციების სამსახურის ინფორმაციით, ცეცხლი გაუჩნდა ტყის ქვედა საფარს.

„ცეცხლის ღია კერა არ არის, ესაა მხრჩოლავი დაკვამლიანება, სიტუაცია კონტროლს სრულად ექვემდებარება, მოსახლეობაზე გადასვლის საფრთხე არ არის“ – უთხრეს „ბათუმელებს“ საგანგებო სიტუაციათა მართვის სამსახურში.

ხულოში ხანძრის ჩასაქრობად მეხანძრე-მაშველების სამი ჯგუფი მუშაობს.

ბოლო ორი დღის განმავლობაში ეს საქართველოს რეგიონებში, ტყეებში ხანძრის გაჩენის მეოთხე შემთხვევაა.

______________

ფოტოზე: ხანძარი მარტვილის მუნიციპალიტეტში, სოფელ სალხინოს მიმდებარედ, ტყეში. ფოტო: საგანგებო სიტუაციების მართვის სამსახური

ბათუმისა და ლაზეთის ეპარქიის მიტროპოლიტი, დიმიტრი შიოლაშვილი საკუთარ ფეისბუქის გვერდზე აქვეყნებს ფოტოს წარწერით – „თავისუფლება ვაჟა ექიმს, რუსეთი ოკუპანტია“.

მიტროპოლიტი დიმიტრი შიოლაშვილი შეუერთდა კამპანიას – „თავისუფლება ვაჟა ექიმს“.

რუსმა სამხედროებმა ექიმი ვაჟა გაფრინდაშვილი 9 ნოემბერს დააკავეს. ქართველი ექიმი საქართველოს ორთოპედ-ტრავმატოლოგთა საზოგადოების პრეზიდენტია.

ცხინვალის КГБ [უშიშროების სამსახური] ცნობით, დაკავებული ქართველი ექიმი ვაჟა გაფრინდაშვილი, სამხედრო ექიმისა და საქართველოს შეიარაღებული ძალების სამხედრო-სამედიცინო სამსახურის კაპიტნის რანგში 2008 წლის აგვისტოს მოვლენებში მონაწილეობდა.

“გაფრინდაშვილის მიმართ რუსეთის ფედერაციის სისხლის სამართლის კოდექსის 322-ე მუხლით [საზღვრის უკანონო კვეთა] დაიწყო გამოძიება. დადგენილია, რომ საქართველოს მოქალაქემ განზრახ გადაკვეთა რესპუბლიკის სახელმწიფო საზღვარი”, – ნათქვამია სამხრეთ ოსეთის დე ფაქტო უშიშროების კომიტეტის განცხადებაში.

საქართველოს პარლამენტში შევიდა კანონპროექტი, რომელიც 25 წლამდე ასაკის პირების სათამაშო ბიზნესში ჩართვას აკრძალავს.

ცვლილება „ლატარიების, აზარტული და მომგებიანი თამაშობების მოწყობის შესახებ“ საქართველოს კანონში შედის. შესაბამისი კანონპროექტით პარლამენტს 10-მა დეპუტატმა მიმართა. კანონპროექტის ავტორი დეპუტატი ლევან გოგიჩაიშვილია.

კანონპროექტის მიხედვით, 25 წლამდე ასაკის საქართველოს მოქალაქეს და 18 წლამდე უცხო ქვეყნის მოქალაქის/მოქალაქეობის არმქონე პირს არ ექნება უფლება სათამაშო ბიზნესში ჩაერთოს. ცვლილებამდე ასაკობრივი ზღვარი 21 წელი იყო.

გარდა ამისა, ცვლილების თანახმად, შეიქმნება თამაშზე დამოკიდებულ პირთა სია, სადაც მოთამაშეს ექნება შესაძლებლობა თავისი განცხადების საფუძველზე მოითხოვოს დამოკიდებულ პირთა სიაში საკუთარი მონაცემების შეტანა. ასევე, მოთამაშის  ოჯახის წევრს ექნება უფლება სასამართლოს წესით მოითხოვოს თამაშდამოკიდებული პირის მონაცემების რეესტრში შეტანა.

თამაშზე დამოკიდებულ პირთა სიას აწარმოებს შემოსავლების სამსახური და სიაში მოქალაქე 3 წლის განმავლობაში იქნება შეტანილი. ასევე, ნებართვის მფლობელი ვალდებულია მოთამაშის ობიექტზე დაშვებამდე ან სისტემურ-ელექტრონული ფორმით თამაშში მონაწილეობამდე, გადაამოწმოს პირი შესაბამის რეესტრში და მისი არსებობის შემთხვევაში არ დაუშვას დამოკიდებული პირის სათამაშოდ დაშვება.

კანონპროექტის მიხედვით, ყველა სათამაშო ბიზნესის დაწესებულებას ექნება ვალდებულება, სათამაშოდ დაშვებამდე პირს მოსთხოვოს პირადობის დამადასტურებელი დოკუმენტი და გადაამოწმოს ის დამოკიდებულ პირთა სიაში. კანონის ამოქმედების შემდეგ, არასრულწლოვან პირთა თამაშში ჩართულობისგან დასაცავად, გაუქმდება ყველა ონლაინ რეგისტრირებული მომხმარებლის ანგარიში და სავალდებულო გახდება მათი ხელახალი რეგისტრაცია, შესაბამისი იდენტიფიკაციის შემდეგ.

განმარტებითი ბარათის მიხედვით, კანონპროექტის შემუშავების მიზეზია კანონში არსებული ხარვეზების გასწორების აუცილებლობა, არასრულწლოვანთა ჩართულობა, მძიმე სოციალური ფონი და ფულის გათეთრებასთან დაკავშირებული რისკები.

კანონის მესამე პუნქტში შედის ცვლილება, რომელიც უშუალოდ სათამაშო ბიზნესის მფლობელებს ეხება.

ნებართვის გამცემი ორგანო ვალდებული იქნება ნებართვის გაცემამდე გამოიკვლიოს ნებართვის მაძიებელი ბენეფიციარი პირი და მისი კაპიტალი. შესაბამისად, სათამაშო ბიზნესის ყველა ნებართვის (გარდა წამახალისებელი გათამაშებისა) მოთხოვნისას, პირი, რომელსაც სათამაშო ბიზნესში ჩართვა სურს, ვალდებული იქნება წარადგინოს ინფორმაცია ბენეფიციარი მესაკუთრეების ნასამართლობის შესახებ. ხოლო, ტოტალიზატორის, სამორინეს და სათამაშო აპარატების სალონის მოწყობის ნებართვის გაცემისას სანებართვო მოსაკრებლის გადასახდელად საჭირო იქნება ფულადი სახსრების წარმოშობის დამადასტურებელი დოკუმენტი.

ამავე თემაზე:

პროპორციული საარჩევნო სისტემის კანონპროექტის ჩავარდნის შემდეგ თბილისში მიმდინარე მოვლენებით უცხოური მედიაც დაინტერესდა.

მაგალითად, გუშინ New York Times-მა გამოაქვეყნა სტატია სათაურით “ქართული პოლიცია აპირებს დაშალოს მასობრივი პროტესტი თბილისში”. სტატიაში ასევე ნათქვამია, რომ პროტესტი გამოიწვია “ქართული ოცნების” მხრიდან ივნისში აღებული პირობების შეუსრულებლობამ.

მოვლენებს გამოეხმაურა ასევე Euronews: “პოლიცია საქართველოში აპატიმრებს მომიტინგეებს, რომლებიც მოითხოვდნენ ნაადრევი არჩევნების ჩატარებას”.

Euronews ასე წერს, რომ სააგენტო როიტერსის ჟურნალისტმა დაინახა ორი პოლიციელი მომიტინგეებს შორის, რომლებმაც ცრემლსადენი გაზი გაუშვეს, თუმცა მოგვიანებით პოლიციამ უარყო ცრემლსადენი გაზის გამოყენება.

თავად Reuters ორი დღის წინ გამოეხმაურა თბილისში მიმდინარე საპროტესტო მოვლენებს. სააგენტო წერს: “ათობით ათასი ადამიანი იკრიბება თბილისში ვადამდელი არჩევნების მოთხოვნით”.

” ქვეყნის ყველა მნიშვნელოვანი ოპოზიციური პარტია გაერთიანდა მოთხოვნით, ჩატარდეს ვადამდელი არჩევნები პროპორციული სისტემით, რათა გადადგეს არსებული მთავრობა და დაინიშნოს დროებითი.”

ასევე გუშინ რადიო თავისუფლება ევროპამ ფოტორეპორტაჟი გამოაქვეყნა თბილისში მიმდინარე აქციიდან: “საქართველოში მომიტინგეების წინააღმდეგ წყლის ჭავლის მანქანა გამოიყენეს” – წერს Radio Free Europe / Radio Liberty

თბილისი ნიუ იორკული მედიის – Bloomberg-ის ობიექტივშიც მოექცა: “პოლიცია საარჩევნო რეფორმების მოთხოვნით გარეთ გამოსული მომიტინგეების წინააღმდეგ”. Bloomberg-ი წერს, რომ პოლიციამ წყლის ჭავლის გამოყენებით გაათავისუფლა პარლამენტის შესასვლელები და აიღო კარვები ქუჩიდან.

ფრანგულმა მაუწყებელმა – France24 გუშინ დაწერა, რომ “ამერიკა და ევროკავშირი მხარს უჭერს მომიტინგეებს პარლამენტის წინ”. მათ მოიყვანეს ამერიკის საელჩოს განცხადება, სადაც წერია: “არსებული ვითარების გათვალისწინებით, უნდა ვიმუშაოთ იმაზე, რომ აღდგეს ნდობა მთავრობას, პოლიტიკურ მხარეებსა და სამოქალაქო საზოგადოებას შორის. რათა შევძლოთ წინსვლა.”

მთავარი ფოტო: ირაკლი გედენიძე

ინფორმაციის თავისუფლების განვითარების ინსტიტუტი (IDFI) აქვეყნებს ინფორმაციას ათონელზე პრეზიდენტის რეზიდენციის ანტიკვარული და თანამედროვე ნივთებით კეთილმოწყობის ხარჯების შესახებ.

IDFI-ს თანახმად, საქართველოს პრეზიდენტის ათონელის რეზიდენციის კეთილმოწყობისთვის, ადმინისტრაციის მიერ შერჩეული ანტიკვარული და თანამედროვე ავეჯის, სანათი საშულებების და ინტერიერის სხვადასხვა აქსესუარის შესყიდვისთვის სარეზერვო ფონდიდან გამოიყო 2 800 000 ლარი.

სულ გაიხარჯა 2 174 783 ლარი, საიდანაც 1 199 558 ლარი მოხმარდა ანტიკვარული ავეჯის და ინტერიერის აქსესუარების შეძენას, 255 000 ლარი მათ რესტავრაციას, ხოლო 720 225 ლარი – თანამედროვე ავეჯის, სანათი საშუალებების და ფარდების შესყიდვას;

სულ შესყიდულია 47 ოქმის მიხედვით შეფასებული ანტიკვარული ნივთები, მათ შორის: 10 გარნიტური/სამეული, 7 ბული/ბიურო მარკეტრი, 7 ჭაღი, 5 მაგიდა, 3 ბუხრის საათი, 3 სარკე, 3 შანდალი, 2 ხალიჩა და სხვა;

ათონელის რეზიდენციისთვის შესყიდულ ანტიკვარულ ნივთებს შორის ყველაზე ძვირადღირებულია რუსეთის საიმპერატორო ქარხანაში დამზადებული XIX საუკუნის ჭაღი – 59 000 აშშ დოლარი. ოთხ ანტიკვარულ ჭაღში ჯამში 133 410 აშშ დოლარი / 391 112 ლარი დაიხარჯა.

IDFI-ს თანახმად, შეძენილ ანტიკვარულ ნივთებს შორის, ვხდებით სხვადასხვა ძვირადღირებულ ინტერიერის აქსესუარებს. მაგალითად, 8 500 აშშ დოლარად შესყიდულია შვიდი ირანული ფერწერული ტილო, 4 310 აშშ დოლარად – ირანული მამლის ფიგურების წყვილი, 3 წყვილი შანდალი – თითოეულის ფასი 3000 დან 8000 აშშ დოლარამდე, 3 ბუხრის საათი – თითოეულის ფასი 7000 დან 18 000 აშშ დოლარამდე, შუა აზიური ორი ხალიჩა – თითოეულის საწყისი ფასი 5000 დან 7000 აშშ დოლარამდე და სხვა.

შესყიდულ ანტიკვარულ ნივთებს შორის არცერთი არ არის ქართული წარმომავლობის. 25 ერთეულზე მითითებულია ევროპული წარმომავლობა, 11 ერთეული – ფრანგული, 6 ერთეული – რუსული, 3 ერთეული ირანული, ხოლო 2 ერთეული – შუა აზიური.

პრეზიდენტის რეზიდენციის კეთილმოწყობისთვის ანტიკვარული ნივთების გარდა, ტენდერის გარეშე დამატებით შესყიდულია 111 ერთეული სხვადასხვა ტიპის თანამედროვე ავეჯი (1 ბიბლიოთეკის კედელი, 2 ტახტი, 13 მაგიდა, 60 სკამი/სავარძელი, 22 კონსოლი, 5 ტუმბო/დესაო, 8 პედესტალი);

შესყიდული 17 თანამედროვე ჭაღიდან თითოეულის ფასი 1900-დან 6 000 ლარამდე მერყეობს, 38 ტორშერიდან თითოეულის ფასი – 300-დან 4 000 ლარამდე, 49 ბრიდან – თითოეულის ფასი – 700- დან 2700 ლარამდე, 9 მაგიდის ლამპიდან – თითოეულის ფასი 1100-დან 1 500 ლარამდე, 7 ნათურა – თითოეულის ფასი 41,9 ევრო.

IDFI მიიჩნევს რომ, მსგავსი შინაარსის შესყიდვებისთვის სარეზერვო ფონდიდან თანხის გამოყოფა, მნიშვნელოვნად ეწინააღმდეგება სარეზერვო ფონდის განკარგვის მთავარ პრინციპს, რაც თანხების გაუთვალისწინებელი შემთხვევებისთვის გამოყოფას გულისხმობს, ხოლო  ბაზრის სათანადო შესწავლის და კონკურენციის  არ არსებობის პირობებში განხორციელებული სოლიდური ღირებულების შესყიდვები, მნიშვნელოვნად ზრდის საბიუჯეტო სახსრების არარაციონალური განკარგვის რისკებს.

„პრეზიდენტის რეზიდენციისათვის ანტიკვარული ნივთების შესყიდვის პროცესის და ცალკეული ნივთების ფასი (მაგალითად, 59 000 აშშ დოლარად შესყიდული ჭაღი, 13 800 აშშ დოლარად შესყიდული სამეული მაგიდით და ა.შ. ) საეჭვოს ხდის პრეზიდენტის ადმინისტრაციის პოზიციას ანტიკვარული ნივთების  შესყიდვით გარკვეული ეკონომიის გაკეთებასთან დაკავშირებით. ასევე, ეჭვქვეშ აყენებს  საქართველოს ხელისუფლების განცხადებებს, საბიუჯეტო სახსრების დაზოგვის მოტივით პრეზიდენტის რეზიდენციის ადგილმდებარეობის საჭირო ცვლილებასთან დაკავშირებით.

ამასთან, საბიუჯეტო სახსრებით პრეზიდენტის რეზიდენციის მაღალ ფასიანი ანტიკვარული ნივთებით კეთილმოწყობა, ვერ ჩაითვლება საზოგადოებისათვის და მომავალი თაობებისთვის კულტურული ფასეულობების შენარჩუნების ოპტიმალურ  გადაწყვეტილებად და  პრეზიდენტის ადმინისტრაციის შესატყვის საქმიანობად. ინსტიტუტი მიიჩნევს რომ, ამგვარი ღონისძიებებისათვის სახელმწიფო ბიუჯეტიდან სახსრები უნდა გამოეყოს იმ სახელმწიფო ინსტიტუტებს (მაგალითად ეროვნულ მუზეუმი) რომელთა უშუალო კომპეტენციაა კულტურულ მემკვიდრეობაზე ზრუნვა და  სამუზეუმო ექსპონატების  გადარჩენა-ხელმისაწვდომობის უზრუნველყოფა.

საბიუჯეტო სახსრების არამიზნობრივი განკარგვის თვალსაზრისით განსაკუთრებული რისკის მატარებელია, ტენდერის გარეშე 720 225 ლარი ღირებულების თანამედროვე ავეჯის, სანათი საშულებების და ფარდების  შესყიდვა.

IDFI მოუწოდებს სახელმწიფო აუდიტის სამსახურს, დეტალურად შეისწავლოს სარეზერვო ფონდიდან პრეზიდენტის რეზიდენციის კეთილმოწყობისათვის გამოყოფილი თანხების  განკარგვის მიზნობრიობა და ხარჯთეფექტურობა“ – აღნიშნულია ორგანიზაციის მიერ გავრცელებულ ინფორმაციაში.

პრემიერ გიორგი გახარიას განცხადებით, ის, რაც გუშინ განხორციელდა საპოლიციო ძალების მხრიდან რუსთაველის ქუჩაზე, როცა საპროტესტო აქცია დაშალა სპეცრაზმმა, იყო კანონიერი. გახარიას თქმით, საკანონმდებლო ორგანოსთან რაც ხდებოდა, იყო უკანონობა.

„ან საბედნიეროდ, ან სამწუხაროდ ეს შეკითხვა – ვინ გასცა ბრძანება, რაღაც მეორდება. ადრე ის, რაც ხდებოდა, იყო ჩემი პასუხისმგებლობა, როგორც შინაგან საქმეთა მინისტრის, დღეს ჩემი პასუხისმგებლობაა, როგორც პრემიერ-მინისტრის. სხვაობა ამაში საერთოდ არაფერი არ არის“. [„ადრეში“ იგულისხმება 20 ივნისისი მოვლენები, როდესაც სპეცრაზმა სასტიკად დაარბია საპროტესტო აქცია. მაშინ დაშავდა არაერთი ადამიანი, ორმა კი თვალი დაკარგა. გიორგი გახარია მაშინ შს მინისტრი იყო – ავტ.]

გიორგი გახარიას თქმით, ქვეყანაში გამოხატვის თავისუფლება კანონის ფარგლებში არის სრულად დაცული: „თქვენ გახსოვთ ყველას, რომ რამოდენიმე დღის განმავლობაში ეს გამოხატვის თავისუფლება გრძელდებოდა ყველანაირი პრობლემების გარეშე. მაგრამ მას შემდგომ რაც, რამოდენიმე უპასუხისმგებლო პოლიტიკოსმა მოუწოდა მოქალაქეებს ბლოკირებისკენ ჯერ ქუჩების  და ბარიკადები იყო აღმართული ქუჩებზე, შემდგომ იყო ბლოკირებული პარლამენტის შენობა, ბლოკირების შემდგომ, ღამის განმავლობაში პარლამენტი ვერ ფუნქციონირებდა, ფაქტიურად თავს დაესხნენ დეპუტატებს, რა თქმა უნდა, ასეთ შემთხვევაში პოლიციამ და მთავრობამ მიიღო გადაწყვეტილება, რომლის სრული უფლება ჰქონდა – უკანონო აქციის, სახელმწიფო ინსტიტუტის უკანონო ბლოკირების ქმედების შეწყვეტის შესახებ, რაც გააკეთა აბსოლუტურად კანონის ფარგლებში და კიდევ ერთხელ ხაზგასმით აღვნიშნავ – შემდგომშიც უპასუხისმგებლო პოლიტიკოსების მიერ მსგავსი ქმედებების შემდგომ სახელმწიფო და პოლიცია იმოქმედებს სრულად კანონის ფარგლებში და გააკეთებს იგივეს.

გასვლითი სხდომის გარეშე გადაკეტილი ქუჩები, გარდა იმის, რომ ეს ჩვენ ბევრ მოქალაქეს უქმნის სერიოზულ პრობლემას, აი ეს ცეცხლი და ბარიკადები აღმართული თბილისის ქუჩებში არი აბსოლუტურად მიუღებელი.

პოლიტიკურ პროცესები უნდა მიმდინარეობდეს პარლამენტში, მედიაში, საარჩევნო ურნასთან ან უნდა მიმდინარეობდეს კანონის ფარგლებში გამოხატვის უფლების გათვალისწინებით. გამოხატვის უფლება ამ ქვეყანაში ყველასთვის არის თავისუფალი და არავინ არსად არ წავა არანაირი სხდომის ჩასატარებლად“.

გუშინ საპოლიციო ძალებმა თბილისში, რუსთაველის ქუჩაზე მიმდინარე საპროტესტო აქცია სპეცრაზმის ჩართულობით დაშალეს. დაკავებულია რამდენიმე ადამიანი. საავადმყოფოში მოხვედრილი ორი სამი პირიდან ორი დღესაც სამედიცინო დაწესებულებაში რჩება.

მოქალაქეები აპროტესტებდნენ ბიძინა ივანიშვილის მიერ გაცემული პირობის შეუსრულებლობას –  20 ივნისის მოვლენების შემდეგ მმართველი პარტიის ლიდერმა განაცხადა, რომ 2020 წლის არჩევნები ქვეყანაში ჩატარდებოდა პროპორციული სისტემით. საპარლამენტო უმრავლესობამ ეს ცვლილება 14 ნოემბერს ჩააგდო.

მესტიის მუნიციპალიტეტში, სოფელ ცხუმარის მახლობლად გაჩენილი ტყის ხანძრის ქრობის პროცესში დამატებით 90-მდე მეხანძრე-მაშველი ჩაერთო.

ტყის ქვედა საფარს გაუჩნდა. მეხანძრე-მაშველები ადგილზე ძლიერი დაკვამლიანების, უამინდობის და რთული რელიეფის მიუხედავად, უწყვეტ რეჟიმში მუშაობენ.

საგანგებო სიტუაციების მართვის სამსახურის ცნობით, ამ დროისთვის ხანძრის დასახლებულ ტერიტორიაზე გავრცელების საფრთხე არ არსებობს და სიტუაცია კონტროლს ექვემდებარება.

აჭარის უმაღლესი საბჭოს წევრი, ფრაქცია „ერთიანი ნაციონალური მოძრაობის“ თავმჯდომარე, ელგუჯა ბაგრატიონი პოლიციამ დააკავა. ინფორმაციას მისი ფრაქციის წევრი, უმაღლესი საბჭოს დეპუტატი გია აბულაძე ადასტურებს, რომელიც ელგუჯა ბაგრატიონთან ერთად აქციაზე იმყოფებოდა.

კონკრეტულად რა მიზეზით დააკავეს ელგუჯა ბაგრატიონი, ამის შესახებ გია აბულაძეს ინფორმაცია არ აქვს.

ელგუჯა ბაგრატიონის დაკავებამდე რამდენიმე წუთით ადრე შინაგან საქმეთა სამინისტრომ გაავრცელა ინფორმაცია პარლამენტთან დაკავებულების შესახებ. სამინიტროს ცნობით, პარლამენტის შენობასთან მიმდინარე აქციის დროს ადმინისტრაციულ სამართალდარღვევათა კოდექსით გათვალისწინებული დარღვევისთვის პოლიციამ 18 პირი დააკავა.

აღნიშნული პირები საქართველოს ადმინისტრაციულ სამართალდარღვევათა კოდექსის 173-ე (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) და 166-ე (ხულიგნობა) მუხლებით გათვალისწინებული სამართალდარღვევისთვის არიან დაკავებული.

როგორც შსს აცხადებს, საკანონმდებლო ორგანოს შენობის მიმდებარე ქუჩებსა და რუსთველის გამზირზე მიმდინარეობს დასუფთავების სამუშაოები და საავტომობილო მოძრაობა უახლოეს პერიოდში აღდგება.

უწყების ცნობით, შინაგან საქმეთა სამინისტროს დანაყოფები, საზოგადოებრივი უსაფრთხოებისა და მართლწესრიგის დაცვის მიზნით, რუსთაველის გამზირზე რჩებიან.

ნეტგაზეთის ინფორმაციით, დაკავებულთა შორის არიან აქციის მონაწილეები: ზუკა ბერძენიშვილი, გიგა მაქარაშვილი, ზურაბ ჯაფარიძე და სხვები.

წითელი ჯვრის საერთაშორისო კომიტეტმა ცხინვალში გატაცებული ექიმი ვაჟა გაფრინდაშვილი მოინახულა. როგორც ორგანიზაციის მიერ გავრცელებულ  განცხადებაში ვკითხულობთ, ვაჟა გაფრინდაშვილის ოჯახი წითელ ჯვარს 14 ნოემბერს დაუკავშირდა.

„წითელმა ჯვარმა საერთაშორისო ჰუმანიტარული მანდატის ფარგლებში მოითხოვა ციხეში მისი მონახულების შესაძლებლობა. წითელი ჯვრის დელეგატებმა გაფრინდაშვილი დღეს მოინახულეს. ვიზიტის დროს  ვაჟა გაფრინდაშვილს გადაეცა ოჯახის წერილი, რაზეც მან წერილობითვე უპასუხა“, – ნათქვამია გავრცელებულ განცხადებაში.

წითელი ჯვრის ინფორმაციით, თავისუფლების აღკვეთის ადგილებში წითელი ჯვრის ვიზიტების შესახებ ინფორმაცია კონფიდენციალური და „ორმხრივი დიალოგის ფარგლებში განიხილება დაკავებაზე პასუხისმგებელ მხარესთან დაკავებული პირებისა და მათი ოჯახების საუკეთესო ინტერესების გათვალისწინებით“.

ამავე თემაზე:

https://netgazeti.ge/news/405651/

სპედანიშნულების რაზმებმა თბილისში, პარლამენტის შენობასთან აქციის დაშლა დაიწყეს.

ოპერაციის დაწყებამდე პოლიციამ აქციის მონაწილეებს 30 წუთი მისცა დასაშლელად, თუმცა აქციის მონაწილეები არ დაშლილან. აქციის მონაწილეები აწეული ხელებით შეხვდნენ სპეცრაზმის გამოჩენას.

პარლამენტთან ისმის გამაფრთიხლებელი სიგნალები და მოწოდებები: დაიშალოს აქცია, წინააღმდეგ შემთხვევაში გამოყენებული იქნება კანონით გათვალისწინებული ღონისძიებები.

აქციის დასაშლელად უკვე რამდენჯერმე გამოიყენეს წყლის ჭავლი.

ოპოზიციურმა პარტიებმა პარლამენტის ყველა შესასვლელი 17 ნოემბრის აქციის დროს ჩაკეტეს. ისინი ამბობენ, რომ მათ მოთხოვნების შესრულებამდე დეპუტატებს საკანონმდებლო ორგანოში არ შეუშვებენ. პიკეტირების გამო დღეს ვერ ჩატარდა ერთ-ერთი კომიტეტისა და ბიუროს სხდომები.

ოპოზიცია მთავრობის გადადგომასა და არჩევნების ვადამდე, პროპორციული სისტემით ჩატარებას ითხოვს.