ბათუმის ახალი, მუნიციპალური ინსპექციის ბიუჯეტი 3.4 მილიონი იქნება და 110 პირი დასაქმდება – პროექტი


2020 წლის ბიუჯეტის მიხედვით, ბათუმის ახალი ა(ა)იპის ბიუჯეტი 3 მილიონ 444 000 ლარი იქნება. აქედან 1 მილიონ 460 000 ლარი ხელფასებისთვის გაითვალისწინეს. მერიის საფინანსო საბიუჯეტო პოლიტიკის სამსახურის უფროსის, ედნარ ნატარიძის განმარტებით,  ნაწილობრივ ამასაც უკავშირდება მომავალი წლის ბიუჯეტის სახელფასო გრაფაში თანხის გაზრდა.

ამავე პროექტის მიხედვით, მუნიციპალურ ინსპექციაში 110 პირი დასაქმდება. როგორც ა(ა)იპის შექმნასთან დაკავშირებულ დოკუმენტებშია განმარტებული, მერია ამ ორგანიზაციაში გააერთიანებს ყველა საზედამხედველო სამსახურს, რომელიც ამ დრომდე მერიის სხვადასხვა სამსახურებსა და სამმართველოებშია გადანაწილებული.

პროექტის მიხედვით, ახალი ა(ა)იპის საქონლით მომსახურების ხარჯებში 1 მილიონ 460 000 ლარი გაითვალისწინეს.

როგორც განმარტეს, ახალი საზედამხედველო ფუნქციების ერთ ორგანიზაციაში გაერთიანება მერიას ეფექტური მუშაობისთვის სჭირდება. პროექტის განმარტებითი ბარათში წერია იმის შესახებაც, რომ ახალი აიპის შექმნასთან ერთად საზედამხედველო მიმართულებით საშტატო ნუსხა გაიზრდება.  საუბარია ასევე ახალი ა(ა)იპის ტექნიკით აღჭურვის აუცილებლობაზეც.

ამ დრომდე მერიის საზედამხედველო სამსახურების მიმართ უკმაყოფილებას ბათუმში ხშირად გამოთქვამენ, სამსახურებში კი მუდმივად ამტკიცებენ, რომ კარგად მუშაობენ და პრობლემა მხოლოდ აღსრულებაა.

რა შედეგი შეიძლება ჰქონდეს ახალი აიპის შექმნას, საშტატო ნუსხის გაზრდას და დამატებითი ხარჯების გაღებას, თუ აღსრულების პრობლემა ისევ დღის წესრიგში დარჩება?  – საკითხის საკრებულოს სხდომაზე წარდგენისას მერიის აპარატის უფროსმა, ნუკრი დეკანაძემ თქვა, რომ  სხვადასხვა სამსახურში გადანაწილებული საზედამხედველო ფუნქციების გაერთიანებითა და „ერთიანი მძლავრი სამსახურის“ შექმნით ეფექტური შედეგის მიღწევას შეძლებენ.

ამავე თემაზე:

ბათუმის მერია მუნიციპალურ ინსპექციას აფუძნებს – გაიზრდება საშტატო ნუსხა და ხარჯები

 

ნეტგაზეთის მასალების სხვა გამოცემებში გადაბეჭდვის წესი
ავტორი