შსს-ს სპეცრაზმმა თბილისში მშვიდობიანი აქცია დაშალა


დღეს, 18 ნოემბერს, შინაგან საქმეთა  სამინისტრომ დაშალა საქართველოს პარლამენტის წინ მიმდინარე მშვიდობიანი აქცია. შსს-მ აქციის მონაწილეების წინააღმდეგ სპეცრაზმი გამოიყვანა. დაშლისას გამოიყენეს წყლის ჭავლიც.

საპროტესტო გამოსვლები თბილისში მას შემდეგ დაიწყო, რაც პარლამენტმა 14 ნოემბერს პირველი მოსმენით ჩააგდო კანონპროექტი, რომლითაც 2020 წლის საპარლამენტი არჩევნები პროპორციული სისტემით უნდა ჩატარებულიყო. რუსთაველის გამზირზე მყოფი მოქალაქეები მშვიდობიანი პროტესტით ითხოვდნენ ხელისუფლებისგან ამ დანაპირების შესრულებას.

გუშინ, 17 ნოემბერს გამართული მასშტაბური საპროტესტო აქციის შემდეგ, მოქალაქეებმა საქართველოს პარლამენტის პიკეტირება გადაწყვიტეს. შედეგად, 18 ნოემბერს პარლამენტის შენობაში ვერ შევიდნენ დეპუტატები. თუმცა, მუშაობაში ხელი არ შეშლია პარლამენტის ადმინისტრაციაში მომუშავეებს და პოლიციელებს.

ბოლო მონაცემებით [18:00 საათი] დაკავებულია აქციის საორგანიზაციო ჯგუფის წევრები. მათ შორის ზუკა ბერძენიშვილი, გიგა მაქარაშვილი, ზურაბ ჯაფარიძე და სხვები.

სახალხო დამცველმა, მოქალაქეების მიერ საქართველოს პარლამენტის პიკეტირებაზე კომენტარისას თქვა, რომ მართალია ქმედება უკანონოა, მაგრამ „უფრო დიდი უკანონობა ის მგონია, ხალხს უთხრა, ვისაც მხარს დაუჭერ, იმას პარლამენტში არ შევუშვებო, პარტიებს უთხრა, იმ რაოდენობით არ შეგიშვებ პარლამენტში, რა მხარდაჭერაც გაქვსო და, შესაბამისად, როდესაც ოპოზიციას, ახალ პოლიტიკურ ძალებს არ აძლევ პარლამენტში შესვლის შესაძლებლობას, არც ისინი შეგიშვებენ პარლამენტში,“ –  განმარტა ეკა ლომჯარიამ.

ნეტგაზეთის მასალების სხვა გამოცემებში გადაბეჭდვის წესი
ავტორი