საყვირებით აჭარის მთავრობასთან – გრძელდება საპროტესტო აქცია „დავიბრუნოთ ქვეყანა“ 

„ჩვენ არ ვიშლებით, ღამეც აქ ვიქნებით“, – ამბობს საპროტესტო აქციის მონაწილე, ხათუნა ბერიძე. იგი სამოქალაქო მოძრაობა „ალტერნატივას“ ხელმძღვანელია. სამოქალაქო ორგანიზაციების წევრები საპროტესტო აქციისთვის ამ საღამოსთვისაც ემზადებიან. მათ მთელი დღის განმავლობაში საყვირებით ხმაური არ შეუწყვეტიათ მთავრობის სახლთან.

აჭარის მთავრობის სახლის წინ ისევ გაშლილია სამი კარავიც. ხათუნა ბერიძის თქმით, ისინი დაშლას არ აპირებენ, ვიდრე ხელისუფლება დაპირებას არ შეასრულებს და ქვეყანაში პროპორციული სისტემით არჩევნები არ ჩატარდება.

საპროტესტო აქციები თბილისსა და ბათუმში მას შემდეგ დაიწყო, როცა პარლამენტმა უარი თქვა კანონპროექტის მიღებაზე, რომლითაც 2020 წლის საპარლამენტო არჩევნები პროპორციული სისტემით უნდა ჩატარებულიყო.

ხათუნა ბერიძის თქმით, მათთან ერთად ღამეს ათევენ პოლიციელებიც: „4-5 მანქანა არის ყოველთვის. ისინი მორიგეობით გადმოდიან და დგანან მთავრობის სახლის წინ“, – გვითხრა ხათუნა ბერიძემ.

დღეს ბათუმის საქალაქო სასამართლომ ამ აქციის მონაწილე ოთხი პირი 1500-1500 ლარით დააჯარიმა. ისინი პოლიციამ 15 ნოემბერს დააკავა.

ჯარიმა 1500-1500 ლარი – ბათუმში საპროტესტო აქციის მონაწილეების სასამართლო პროცესი