ხელვაჩაურის მუნიციპალიტეტის მერმა მოსახლეობის წინაშე 2019 წელს გაწეული საქმიანობის შესახებ ანგარიში წარადგინა. საჯარო შეხვედრა ხელვაჩაურის კულტურის ცენტრში გაიმართა. ჯუმბერ ვარდმანიძემ დეტალურად ისაუბრა იმ პროექტებზე, რომელიც მერიამ ამ პერიოდში განახორციელა.
მერის თქმით, 2019 წელს პრიორიტეტს წარმოადგენდა ინფრასტრუქტურის განვითარება – მიმდინარე წელს დაგეგმილი 147 პროექტიდან 130 უკვე დასრულდა ხოლო 17 ჯერ კიდევ პროცესშია.
ჯუმბერ ვარდმანიძის ანგარიში საზოგადოებას
მიმდინარე წელს მნიშვნელოვნად გაუმჯობესდა საგზაო ინფრასტრუქტურა, მერიის მიერ ჯამში 65 კილომეტრამდე შიდა სასოფლო გზა მოწესრიგდა მოეწყო 17 ერთეული ფერდსამაგრი კედელი და დამცავი გაბიონი. წყალმომარაგების მიმართულებით 12 ახალი პროექტის განხორციელებით შესაძლებელი გახდა დამატებით 1 365 ოჯახის სუფთა სასმელი წყლით მომარაგება. მოეწყო 7 სკვერი და 6 მინი სტადიონი. განხორციელდა გარე განათების მოწყობის 16 პროექტი და შესაძლებელი გახდა 25 კილომეტრამდე ადგილობრივი მნიშვნელობის გზის განათება. მუნიციპალიტეტის ტერიტორიაზე ჯამში 50 ერთეული საზოგადოებრივი ტრანსპორტის მოსაცდელი მოეწყო.
ჯუმბერ ვარდმანიძის ანგარიში საზოგადოებას
აქტიურად ხორციელდება სოფლის მხარდაჭერის პროგრამა, რომლის ბიუჯეტიც ხელვაჩაურში 968 000 ლარია. მიმდინარეობს მე-4 სოციალური სახლის მშენებლობა კაპრეშუმში, პროექტის განხორციელებით 39 ეკომიგრანტი დაკმაყოფილდება საცხოვრებელი ბინებით.
მნიშვნელოვანი იყო სოციალური და ჯანდაცვის პროგრამების გაფართოება. ასევე, განათლების, კულტურის, სპორტისა და ახალგაზრდობის მიმართულებით განხორციელებული პროექტები, ახალი პროგრამები ბუნებრივი რესურსებისა და აგრარული საკითხების კუთხით.
მერმა დადებითად შეაფასა მუნიციპალური ორგანიზაციების მუშაობა და მადლობა გადაუხადა მერიის ყველა სამსახურს ნაყოფიერი მუშაობისათვის.
,,ჩვენ ვცდილობდით ყველა პროექტი და პროგრამა მაქსიმალურად მოგვერგო მოსახლეობის საჭიროებებზე, მომალ წელს უფრო საინტერესო და მასშტაბური პროექტებით წარვსდგებით’’ აღნიშნა მერმა.
