მოსამართლე გიორგი გრატიაშვილმა 6 წლით თავისუფლების აღკვეთა მიუსაჯა ჯუმბერ ბ.-ს, მას გაუპატიურებას ედავებოდა გამოძიება. შემთხვევა გასული წლის აპრილში, ქობულეთის პლაჟზე მოხდა.
დაზარალებულის ჩვენების მიხედვით, ის პლაჟზე მაშინ გააუპატიურეს, როცა ადრე დილით თოლიების გადასაღებად გავიდა. საქმის მასალების მიხედვით, თავდამსხმელს ჯერ დაზარალებულად ცნობილი ქალის ქმარმა სცემა და შემდეგ მიმართეს პოლიციას. დაზარალებულმა ქალმა მოსამართლეს უთხრა, რომ საცხოვრებლად ქობულეთში რამდენიმე წლის წინ ჩამოვიდა, როცა აქ დაოჯახდა. ის მეუღლესთან და შვილთან ერთად ცხოვრობს.
„..სანაპიროსთან შესასვლელ კიბეზე ორი უცნობი მამაკაცი იჯდა. მათგან ერთ-ერთმა მამაკაცმა (კერძოდ ბრალდებულმა ჯ.ბ.-მ) სხვანაირად, გამომწვევად შემხედა, რაც ძალიან არ მესიამოვნა. გვერდიდან მოვუარე მამაკაცებს და ისე გავაგრძელე გზა სანაპიროს მიმართულებით… უკან მოვიხედე, დავრწმუნდი, რომ არავინ მომყვებოდა და გავაგრძელე გზა მდინარე კინტრიშის და ზღვის შესართავთან, სადაც თოლიები იკრიბებიან და იქ შესაძლებელი იყო კარგი ფოტოების გადაღება.
იმ დღეს თოლიები ვერ ვნახე, უკან დავბრუნდი, შორიდან დავინახე ჯებირზე ჩემსკენ მომავალი იგივე მამაკაცი,“ – აღწერა ქალმა. მისი თქმით, კაცმა მას სცემა კიდეც და გაუპატიურებამდე მოკვლითაც დაემუქრა.
„მითხრა, რომ მკვლელობისთვის იხდიდა სასჯელს და ახალი გამოსული იყო ციხიდან,“ – დასძინა ქალმა. გაუპატიურების დროს კი, ქალმა კაცის ვინაობაც გაიგო – კაცს პირადობის მოწმობა ძირს დაუვარდა.
„…მაშინვე თავი გვერდით მივატრიალე, რომ თავდამსხმელი არ მიმხვდარიყო, რომ მისი ვინაობა შევიტყვე… გამახსენდა ტელევიზორიდან გაგონილი ამერიკელი ოჯახის სმიტების ამბავი, როდესაც მთელი ოჯახი ამოხოცეს, ქალი გააუპატიურეს და შემდეგ მოკლეს. მეგონა, ეს დამნაშავეც ასე მოიქცეოდა და მთავრდებოდა ჩემი სიცოცხლე, მაგრამ მან საუბარი დამიწყო, მითხრა, რომ მომკლავდა, თუკი ვინმეს ამის შესახებ ვეტყოდი… მან ზუსტად მითხრა სახლიც, სადაც ვცხოვრობ. მივხვდი, ეს პირი საშიში იყო არა მხოლოდ ჩემთვის, არამედ ჩემი ოჯახისთვის, შვილისთვის, ქმრისთვის… დამნაშავის დამშვიდების მიზნით ვუთხარი, რომ არავის არაფერს მოვუყვებოდი,“ – თქვა ქალმა.
სხვაგვარად აღწერა მომხდარი ბრალდებულმა – ჯუმბერ ბ.-მ მოსამართლეს უთხრა, რომ მართლაც შეხვდა ქალს პლაჟზე, „რომელსაც წინააღმდეგობა არ გაუწევია და კოცნის შემდეგ უთქმელად დათანხმდა სექსს…“ მოსამართლე განაჩენში წერს, რომ ბრალდებულის ჩვენება არადამაჯერებელია. საქმეში იყო ექსპერტიზის დასკვნებიც, რომლის მიხედვითაც ქალას სხვადასხვა სიმძიმის დაზიანებები ჰქონდა.
თავდამსხმელს მსხვერპლი სახლამდე მიუცილებია და ქალისთვის ტელეფონის ნომერიც გამოურთმევია.
„…სკაიპით ველაპარაკებოდი დედას ამერიკაში, როცა დარეკა ნომრიდან… შიშისგან კანკალი დავიწყე, მეუღლის რჩევით ვუპასუხე ტელეფონს. მითხრა, ისევ უნდა შემხვდეო… როცა მასთან შესახვედრად წავედი, ჩემი ქმარი ის გამომყვა უკან, რომ თავდამსხმელი ვერ მიმხვდარიყო, მან ისევ რამდენჯერმე დამირეკა და მიმითითა, შემეცვალა მარშრუტი… როგორც კი მივუახლოვდით, ის გაიქცა. მეუღლე გაქცეულს გაეკიდა… მერე ის დაბრუნდა, მითხრა, რომ დასაჯა დამანაშავე და ახლა დარეკავდა პოლიციაში,“ – მოუყვა ქალი მოსამართლეს.
ამომრჩეველთა მარკირებისათვის ულტრაიისფერი უხილავი სითხის შესაძენად ცენტრალურმა საარჩევნო კომისიამ ტენდერი გამოაცხადა. სატენდერო თანხა 150 ათასი ლარია.
ტენდერის პირობის მიხედვით, „სითხე ხელზე დასხურების შემდეგ არ უნდა ტოვებდეს ხილულ კვალს, ხოლო ულტრაიისფერი ნათურის დანათებით 24 საათის განმავლობაში შესაძლებელი უნდა იყოს მისი კვალის დანახვა;
სითხე უნდა იყოს 200 მლ პლასტიკის ბოთლში სპრეი თავსახურით [15 000 ბოთლი]. ბოთლზე დატანილი უნდა იყოს სტიკერი, სადაც მითითებული იქნება გამოყენების წესები. ვარგისიანობის ვადა კი, მიწოდებიდან არანაკლებ 6 თვე“.
პარალელურად, ცესკო აცხადებს, რომ „საქართველოს საარჩევნო ადმინისტრაციის თანამშრომლებში ვირუსის გავრცელების პრევენციისა და ჯანმრთელობის დაცვის უზრუნველსაყოფად, აუცილებელია განხორციელდეს სხვადასხვა ქმედითი ზომები ჯანდაცვის მსოფლიო ორგანიზაციის მიერ დადგენილი რეკომენდაციების შესაბამისად“.
აქედან გამომდინარე, ცესკო, ტენდერის გარეშე შეისყიდის:
ერთჯერად პირბადეებს (სამშრიანი) – 10 000 ცალი;
ერთჯერად ხელთათმანებს (ლატექსი, M ზომა) – 10 000 ცალი;
ერთჯერად ხელთათმანებს (ლატექსი, L ზომა) – 10 000 ცალი;
ხელის სადეზინფექციო ხსნარს (500მლ, საპნის თავსახურით) – 200 ცალი;
ხელის სადეზინფექციო ხსნარს (200მლ, სპრეის თავსახურით) – 500 ცალი;
ხელის სადეზინფექციო ხსნარს (5ლიტრი, ჩვეულებრივი თავსახურით) – 50 ცალი;
ზედაპირების სადეზინფექციო ხსნარს (5 ლიტრი, ჩვეულებრივი თავსახურით) – 10 ცალი;
დისტანციურ თერმომეტრს – 4 ცალი.
ცესკოს შესყიდვების სააგენტოდან გამარტივებულ შესყიდვაზე თანხმობა მიღებული აქვს, თუმცა, თანხა მითითებული არ არის.
საარჩევნო კომისია ტენდერის გარეშე 755 ათას ლარის დახარჯვას გეგმავს სხვადასხვა საარჩევნო ოლქში შენობების რემონტისთვისაც.
„2020 წლის ოქტომბერში გასამართი საპარლამენტო არჩევნების სათანადო დონეზე ორგანიზებისთვის საჭიროა ცესკოს ბალანსზე რიცხულ 37 ადმინისტრაციულ შენობაში აუცილებელი სარემონტო სამუშაოების ჩატარება და ინფრასტრუქტურის განახლება. სარემონტო სამუშაოები უნდა დასრულდეს არაუგვიანეს 2020 წლის 15 აგვისტომდე“, – აღნიშნულია ცესკოს განაცხადში შესყიდვების გვერდზე.
ამ ობიექტების მდებარეობა და სამუშაოებისთვის საჭირო საორიენტაციო ფასები:
შესყიდვების სააგენტომ დღეს, 19 ივნისს, ცესკოს ინფორმაციის დაზუსტება მოსთხოვა.
„გთხოვთ, ერთი სამუშაო დღის ვადაში დააზუსტოთ რამ გამოიწვია ღონისძიების შეზღუდულ ვადაში ჩატარების აუცილებლობა და რატომ ვერ იქნებოდა შესყიდვები წინასწარ დაგეგმილი, ასევე, რატომ გამოიწვევს ღონისძიების ჩატარებასთან დაკავშირებული შესყიდვის ობიექტების ელექტრონული ტენდერის მეშვეობით შესყიდვა ამ ღონისძიების არსებითი შეფერხებით ჩატარებას, ჩაშლას ან/და მისი უწყვეტად ჩატარების ხელშეშლას. ამასთან, გთხოვთ, დააზუსტოთ, აღნიშნული სამუშაოების შესასყიდად თქვენს მიერ გამოცხადებული ელექტრონული ტენდერების ნომრები“, – მიწერეს ცესკოს შესყიდვების სააგენტოდან.
საქართველოს ცენტრალურმა საარჩევნო მიმდინარე წლის დასაწყისში გაანაწილა ის თანხა, რაც სახელმწიფომ 2020 წლის პარლამენტის არჩევნებისთვის გამოყო. ცესკოს მიხედვით, პარლამენტის არჩევნებისთვის სულ 42 760 652 ლარი დაიხარჯება:
ზაფხულის დაწყების მიუხედავად, მთის კურორტებზე დამსვენებლები ჯერ მცირე რაოდენობით არიან. მთაში განთავსებული კოტეჯები და საოჯახო სასტუმროები კი გაქირავებას და პირველ სტუმრებს ელიან.
კურორტ „ბეშუმის“ ხელმძღვანელი ამბობს, რომ მათ ყველა წესი დაიცვეს, რაც კორონავირუსის გამო ჯანდაცვის სამინისტრომ განსაზღვრა. კოტეჯებიც შესაბამისად აღჭურვეს ყველა საჭირო ინვენტარით.
„იყვნენ მოსულები, შეგვამოწმეს და ველოდებით პასუხს. როგორც კი სტატუსს მოგვანიჭებენ, მაშინვე დავიწყებთ ტურისტების მიღებას,“ – ამბობს „ბათუმელებთან“ თემურ ქედელიძე, კურორტ „ბეშუმის“ ხელმძღვანელი.
კურორტ „ბეშუმის“ საკუთრებაში 30 კოტეჯია. კოტეჯში ღამისთევის ფასი ერთ ადამიანზე 35 ლარია. იმისათვის, რომ კოტეჯი დაიქირაოთ, მინიმუმ სამი ადამიანი მაინც უნდა იყოთ. „კოტეჯი ოჯახებზეა გათვლილი და ერთი ადამიანის დასვენება დღეში 35 ლარი ღირს. 3 წლამდე ბავშვებისთვის უფასოა, ხოლო 10 წლამდე ბავშვებისთვის მოქმედებს 25 %-იანი ფასდაკლება. 35 ლარი ეღირება 20 ივლისამდე. 20 ივლისიდან 10 აგვისტომდე 40 ლარამდე გაიზრდება, 10 აგვისტოს შემდეგ კი ისევ 35 ლარი გახდება. კოტეჯის დაქირავების საფასურში შედის დღეში სამჯერადი კვება,“ – გვითხრა თემურ ქედელიძემ.
ბეშუმი ფოტო: თამარ ნერგაძე/ბათუმელები
გარდა ამისა, ბეშუმში არის კერძო კოტეჯებიც. ერთ-ერთი კოტეჯის მფლობელი თამაზ შანთაძე ამბობს, რომ სტუმრებს კეთილმოწყობილ საცხოვრებელს ახვედრებს.
„კეთილმოწყობილი კოტეჯი მაქვს. ექვს ადამიანზე გათვლილი. ერთი ღამის ფასი 100 ლარია. თუმცა ივლისის მეორე ნახევრიდან, როცა ტურისტი მოიმატებს, ფასს, სავარაუდოდ, 150 ლარამდე გავზრდით. ასევე გვაქვს სასტუმრო, სადაც ერთ ადამიანზე ერთი ღამის ფასი 60 ლარია,“ – ამბობს თამაზ შანთაძე.
საკმაოდ მაღალია გურიაში მდებარე კურორტ „ბახმაროში“ დასვენების ფასი. ერთი კოტეჯის დაქირავების ფასი თვეში 400 ლარიდან იწყება და 3000 დოლარამდე ადის.
კურორტ „ბახმაროს“ დირექტორი დავით საჯაია „ბათუმელებთან“ ამბობს, რომ 400 ლარიან კოტეჯში დამსვენებელს მხოლოდ პირველადი საყოფაცხოვრებო ნივთები დახვდება – საწოლი, სკამი, მაგიდა.
რაც შეეხება 1000 დოლარი და მეტი თანხის ღირებულების კოტეჯებს, კეთილმოწყობილია, ყველა საყოფაცხოვრებო ტექნიკით აღჭურვილი და ოჯახებისთვისაა განკუთვნილი.
ქართველ დედოფალთა ცხოვრება საქართველოს ისტორიის მემატიანეებთან ხშირად მხოლოდ მეფეზე დაქორწინების, დაბადება-გარდაცვალების თარიღების ხსენებით, შვილების რაოდენობის აღნიშვნით შემოიფარგლება და მათი როლი მხოლოდ გაფანტულ ცნობებშია მოცემული არასრულყოფილად. დედოფალთა ცხოვრების სრული სურათის აღსადგენად კი ამ ცნობების ერთად შეკრება და აღდგენაა საჭირო.
ისტორიის მეცნიერებათა მაგისტრი, მაია მასურაშვილი მიიჩნევს, რომ დედოფლის ინსტიტუტი ისტორიკოსების მიერ თითქმის შეუსწავლელია, რადგან მემატიანებიის ყურადღების ცენტრში ძირითადად მეფეები იყვნენ, რომლებიც ომობდნენ, ლაშქრობდნენ და დედოფლები მათ ჩრდილქვეშ ექცეოდნენ, მათ შორის ისინიც, რომლებიც საზოგადოებრივად მნიშვნელოვან საქმიანობას ეწეოდნენ.
„მკვლევარები უფრო პოლიტიკურ ისტორიას სწავლობენ, დიპლომატიის ისტორიას, საბრძოლო სტრატეგიებს, ეკონომიკურ ასპექტებს. ბოლო პერიოდის ისტორიული კვლევების ტენდენციაა ეკონომიკის ისტორიის დამუშავება, მაგრამ დედოფლებთან დაკავშირებული საკითხები ბუნდოვანია“, – ამბობს მკვლევარი. მისი კვლევის მიზანი სწორედ ისტორიიდან გამქრალი დედოფლები და მათთან დაკავშირებული ისტორიული მოვლენებია. ერთ-ერთი ასეთი დედოფალი მართა-მარიამ ალანელია, რომლის შესახებაც ქართულ ისტორიოგრაფიაში ცნობები ძალიან მწირია. მაია მასურიშვილის კვლევა მარიამ ალანელს ეხება. ბაგრატიონთა შთამომავალს, რომელმაც სრულიად მარტო აღმოაჩინა უცხოეთში საკუთარი ძლევამოსილება, ორჯერ გახდა ბიზანტიის დედოფალი და იმპერატორების წინააღმდე შეთქმულებების მთავარი მონაწილეც იყო.
ბიზანტიის იმპერიის ორგზის დედოფალი – მარიამ ალანელი, ბაგრატიონი
იმპერატორი მიხეილ VII და დედოფალი მარიამ ალანელი ხახულის კარედზე
მართა – მარიამ ბაგრატიონის ქორწინებამდელი სახელია, ის ძალიან პატარა მოხვდა პირველად ბიზანტიაში 1056 წელს. იმპერიის დედოფალმა თეოდორამ გადაწყვიტა პატარა მარიამი ეშვილებინა და მამამისს, ბაგრატ IV-ს ბავშვის ბიზანტიაში დატოვება სთხოვა. სინამდვილეში მარიამი იმპერიის მძევალი იყო, თუმცა თეოდორამ ის საკუთარი შვილივით შეიყვარა.
პირველად იმპერატორ მიხეილ VII დუკაზე დაქორწინდა, გახდა თუ არა დედოფალი, აქტიურად ჩაება პოლიტიკურ ცხოვრებაში. აკონტროლებდა თითქმის მთელი იმპერიის ბიუჯეტს, რაც თითქმის ყველაფერის კონტროლს ნიშნავდა: მონეტების მოჭრას, ქსოვილების შემოტანას, ეკონომიკის სხვადასხვა დარგის განვითარება მის ხელში იყო.
ბიზანტიის იმპერატორი თეოდორა
ქორწინებიდან მალევე გახდა ცხადი, რომ მიხეილ VII დუკა ბიზანტიის იმპერიის საკმაოდ უუნარო მმართველი იყო, რომელმაც იმპერიისთვის ვერაფერი გააკეთა, არ ჰგავდა მამამისს, კონსტანტინე მეათე მონომახს, რომელმაც ბიზანტიის თითქმის დაცემული იმპერია აღამაღლა და განვითარების ახალი პერსპექტივებიც დაუსახა.
მარიამს მიაჩნდა, რომ მიხეილ VII დუკას არ შეეფერებოდა იმპერიის მმართველობა და თავად მიიღო მონაწილეობა იმპერატორის ტახტიდან ჩამოგდებაში 1078 წელს.
მარიამ ალანელის მამა, ბაგრატ IV
მიხეილ დუკა აიძულეს ბერად აღკვეცილიყო და იმპერატორად ნიკიფორე III ბოტანიატე გამოაცხადეს. ბიზანტიის ახალმა მმართველმა იცოდა, რომ დიდი ალბათობით გადატრიალებას ხალხის პროტესტი მოჰყვებოდა, მაგრამ თუ მარიამ ალანელს შეირთავდა ცოლად, ხალხი დამშვიდდებოდა – ბიზანტიაში მარიამს დიდი ნდობა ჰქონდა. დედოფალმა ნიკიფორეს მხოლოდ იმ შემთხვევაში აღუთქვა ცოლობა, თუ ის ტახტის მემკვიდრედ მის ვაჟს, კონსტანტინე პორფიროგენეტს გამოაცხადებდა, რომელიც კონსტანტინე VII დუკასგან ჰყავდა, ნიკიფორემ პირობა დადო, მაგრამ აღარ შეასრულა.
მოტყუებული დედოფლის რისხვა
იმედგაცრუებულმა და განრისხებულმა დედოფალმა ზუსტად სამი წლის შემდეგ შური იძია ნიკიფორეზე, მიემხრო მის მოწინააღმდეგე ძმებ კომნენოსებს, რომლებიც შეთქმულებას ამზადებდნენ და 1081 წელს ნიკიფორე III ბოტანიატეც გადმოაგდეს იმპერატორის ტახტიდან. ბიზანტიის იმპერატორი ალექსი კომნენოსი ხდება. ამჯერად მას სთხოვს მარიამი, რომ მისი შვილი თანაიმპერატორად გამოაცხადონ. ალექსიმ მარიამის შვილი, კონსტანტინე პორფიროგენეტი საკუთარ ქალიშვილზე, ანაზე დააქორწინა და მართლაც მიიწვია თანამმართველად 1081-1092 წლებში. თუმცა მალევე გააშორეს ცოლს, ჩამოაშორეს ტახტს და სამეფოდანაც გააძევეს. მარიამ ალანელმა, რომელიც მთელი ცხოვრება შვილისთვის ტახტის შესანარჩუნებლად იბრძოდა, ალექსი კომნენოსის წინააღმდეგაც სცადა შეთქმულების მოწყობა 1094 წელს, მაგრამ ამჯერად დამარცხდა.
1096 წელს კი ალექსანდრე პორფიროგენეტი გარდაიცვალა – მარიამის ბრძოლებმა აზრი დაკარგა და ბოლოს მონაზვნად აღიკვეცა.
ყველა ბიზანტიური წყარო დედოფალს დადებითად ახასიათებს და ხაზს უსვამენ მის სიმამაცეს მთელი ცხოვრების განმავლობაში შვილისთვის ტახტის შესანარჩუნებლად.
შვილის გარდაცვალების შემდეგ მარიამ ალანელი დუკების გვარის ერთადერთი მემკვიდრე იყო. ჰქონდა უზარმაზარი მამულები, კავშირები და დარჩა დიდძალი სიმდიდრე.
მარიამი გავლენიან და პატივსაცემ ადამიანად რჩებოდა მას შემდეგაც, რაც დედოფალი აღარ იყო და ჩამოშორებული იყო პოლიტიკას. ბულგარელი ეპისკოპოსი მიმოწერისას მაგალითად უხდის ბოდიშს, რომ ვერ ჩავიდა მასთან და ჰპირდება, რომ საქმე, რომელიც დაიწყეს, აუცილებლად გაგრძელდება. ეს ხდება პერიოდში, როცა ეპისკოპოსი იმპერატორის შემდეგ მეორე პირად ითვლებოდა. მის მობოდიშებას ვერავინ დაიმსახურებდა, რომ არა დედოფლის მიმართ უზომო პატივისცემა.
მარიამ ალანელი ეკლესია-მონასტრების დიდი მფარველი იყო. შეძლებისდაგვარად უუქმებდა ან უმცირებდა მათ გადასახადებს, ეხმარებოდა საგანმანათლებლო საქმიანობაში.
მარიამ ალანელი და საქართველო
არსებობს მოსაზრება, რომ სწორედ მარიამ ალანელმა შთააგონა ძმისშვილს, დავით IV აღმაშენებელს, რუის-ურბნისის კრების ჩატარება და სამღვდელოების ურჩობის ალაგმვა. ამ დროისთვის მარიამს უკვე ბიზანტიის ორი იმპერატორის ტახტიდან ჩამოგდების გამოცდილება ჰქონდა. ცნობილია, რომ დავით აღმაშენებელს ძალიან უყვარდა მამიდა და მისი გარდაცვალებაც უზომოდ განიცადა.
მარიამ ალანელი ესწრებოდა რუის-ურბნისის კრებას, კრების ჩანაწერში დამსწრეთა შორის მოხსენიებულია ავგუსტა მარიას სახელით.
XI-XII საუკუნეებში ბიზანტიაში ბრწყინვალედ იყო განვითარებული ოქრომჭედლობა, ხატწერა, მშენებლობა, მონეტების მოჭრა-დამუშავება და ა.შ.
გელათის აკადემიაშიც ის დარგები ისწავლება, რაც პოპულარულია ბიზანტიის იმპერიაში, წერილ-გუჯრებიდან ჩანს, რომ გელათის აკადემიიდან ჩასულ ქართველ სტუდენტებს მარიამ დედოფალი დიდ დახმარებას უწევდა ბიზანტიაში საქმე რომ ესწავლათ. არსებობდა საქართველო-ბიზანტიას შორის ერთგვარი მემორანდუმი სტუდენტების წარგზავნის შესახებ. არსებობს მოსაზრება, რომ მარიამის ხელიც ურევია გელათის აკადემიის მშენებლობაში თუ არა, აკადემიის იდეოლოგიის და კონცეფციის განსაზღვრაში მაინც.
ქართულ ისტორიოგრაფიაში მარიამის შესახებ ასე თუ ისე მწყობრი ცნობები დაცულია მხოლოდ გიორგი მცირეს მიერ აღწერილ გიორგი მთაწმინდელის ცხოვრებაში. ძირითად ცნობებს კი მაინც ბიზანტიელი ისტორიკოსები გვაწვდიან. ძირითადად ერთ-ერთი პირველი ისტორიკოსი ქალის, ანა კომნენეს ჩანაწერებშია აღწერილი მარიამი. არამხოლოდ მისი საქმიანობა და ცხოვრებისეული ფაქტები, არამედ მისი ხასიათი და გარეგნული იერსახეც.
მცირე ცნობებს გვაწვდის ასევე მემატიანე მიქაელ ფსელოსი. ქართული ისტორიოგრაფიის ფურცლებიდან საუკუნეების განმავლობაში იყო გამქრალი ქართული წარმომავლობის ბიზანტიის დედოფლის შესახებ ცნობები. ბოლო დროს თანდათან გაიზარდა მკვლევართა ინტერესი მარიამ ალანელის მიმართ. თუ ბიზანტიის დედოფალი უზარმაზარ იმპერიაში მთელი ცხოვრების მანძილზე იბრძოდა საკუთარი და შვილის ღირსების აღსადგენად, როსტომ ხანის მეუღლე, ასევე მარიამი, გვარად დადიანი, სრულიად უუფლებო და ჩაგრულ დედოფლად ჩაეწერა საქართველოს ისტორიაში.
მარიამ დადიანი – ერთი დედოფლის სამი ქორწინება იძულებით
მარიამ დადიანი, კასტელის ნახატი
„დედოფალმან მარიამ შეამკო ეკლესიანი შესამოსლითა ხატითა, ჯუარითა და წირვის იარაღითა, ნაკერითა მარგალიტითა და თუალითა. და ედვა ამა დედოფალსა პატივი დიდი ყაენისაგან და ყოველთა საქართველოსა კაცთაგან და ქალთაგან, მთავართა და დიდებულთაგან, იყო ყოვლითურთ შემკული კეთილითა, რომლისა მსგავსი თამარ მეფისა შემდგომად არღარავინ…“ ასე ახასიათებს ქართლის ცხოვრება კიდევ ერთ მარიამს, ამჯერად დედოფალ მარიამ დადიანს.
მარიამ დედოფლის ძალისხმევით აღდგა და შეკეთდა რუისის სამონასტრო კომპლექსი, თბილისის კარის ეკლესია, ბოლნისის სიონი, სვეტიცხოვლი და სხვა ეკლესია-მონასტრები. „ქართლის ცხოვრების“ ერთ-ერთი ნუსხა მისი თაოსნობით გადაწერეს, ამ ხელნაწერს მარიამისეული ნუსხის სახელით ვიცნობთ.
საზოგადოებრივმა საქმეებმა, განათლებამ, სიმდიდრემ, მოპოვებულმა ავტორიტეტმა – ვერაფერმა დაიცვა მარიამ დედოფალი შუა საუკუნეების პატრიარქალურ საზოგადოებაში ნათესავი კაცების მსხვერპლად, იარაღად რომ არ ქცეულიყო. მისი ნების საწინააღმდეგოდ სამჯერ დააქორწინეს პოლიტიკური მიზნებისთვის.
XVII საუკუნის 20-იან წლებში იმერეთის მეფე გიორგი III (1604-1639) იყო, გურიის მთავარი – მამია გურიელი (1600-1625), ხოლო სამეგრელოს მთავარი – ლევან დადიანი (1611-1657). სტაბილური პოლიტიკური მდგომარეობა დაიძაბა მას შემდეგ, რაც გიორგი III-ის ვაჟი ალექსანდრე ღალატის გამო გაეყარა მამია გურიელის ქალიშვილს, რის შემდეგაც გურიელი ლევან დადიანთან პოლიტიკურ კავშირს ამჯობინებს. დადიანსაც თავის მხრივ იმერეთის სამეფოსგან დამოუკიდებლობა სურს და თავის ნახევარდას, 16 წლის მარიამ დადიანს მამია გურიელის ვაჟზე, სვიმონზე აქორწინებს 1621 წელს.
სვიმონმა 1625 წელს საკუთარი მამა, მამია გურიელი მოკლა, რის გამოც ლევანსა და სვიმონს შორის ურთიერთობა დაიძაბა. ლევანმა მამის მკვლელს მარიამის ,,უკან დაბრუნება“ მოსთხოვა, რაზეც სვიმონმა უარით უპასუხა. ლევანმა სვიმონის წინააღმდეგ გაილაშქრა და მარიამი მის შვილ ოტიასთან ერთად წაიყვანა სამეგრელოში.
ქართლის დედოფალი მარიამ დადიანი და მისი ძე ოტია გურიელი
მეორედ მარიამი როსტომ ხანზე დააქორწინეს. ქართულ სამეფო-სამთავროებს შორის თანდათან ორი ურთიერთდაპირისპირებული ბანაკი შეიქმნა: ერთ მხარეს იყო სამეგრელოს მთავარი ლევან II დადიანი და ქართლის მეფე როსტომ-ხანი, მეორე ბანაკს ეკუთვნოდა იმერეთის მეფე გიორგი III, კახეთის მეფე თეიმურაზ I და აფხაზეთის მთავარი სეტემან შერვაშიძე.
პოლიტიკური კავშირები ქორწინებით განამტკიცეს როსტომ ხანმა და ლევან დადიანმა.
დიდი ბჭობა გაიმართა, ვინ უნდა გამხდარიყო საქართველოს დედოფალი და ,,შექმნეს ვაზირობა, დაიწყეს რჩევა, ეძებეს სამოყვროთ ლევან დადიანი და გაუგზავნეს მოციქულები და საქართველოს სადედოფლოთ და მისი მარიამ, დედათა შიგან ნაქები. სათხოვნელად მოციქულები წავიდეს და იმათაც იამა და მოსცეს“, – წერს მემატიანე გორგიჯანიძე. ქორწილის ზუსტი თარიღი უცნობია, ვარაუდობენ რომ 1633 -35 წლებში უნდა მომხდარიყო ეს ამბები.
,,იამა და მოსცეს“ – მემატიანე ისე წერს მარიამზე, როგორც ნივთის თხოვნისას მიცემაზე დაწერდა. ძველ ქართულში ,,ქალი მისცა“ და ,,ოქრო მისცა“ – ერთნაირად ითქმის, რაც შემთხვევითი არ არის. ნივთებისა და ქალების შემთხვევაში ერთი და იგივე ზმნის გამოყენება ზუსტად ასახავს ეპოქის დამოკიდებულებას ქალის, თუნდაც დედოფლის როგორც ნების, უფლების, აზრის არმქონე არსებისადმი.
მარიამს არ სურდა როსტომზე დაქორწინება და არც მის ცოლობას აპირებდა. ჟან შარდენის მოგზაურობის წიგნის ერთ-ერთი შენიშვნის მიხედვით, რომელიც მზია მგალობლიშვილს ეკუთვნის, შარდენი წერდა, რომ ლევან დადიანმა იძულებით, ,,გუემით’’ მისცა ცოლად მარიამი როსტომს.
მარიამს აზრი მოტყუებით შეაცვლევინეს, მღვდელმა როსტომის ქრისტიანულად მონათვლის სცენა გაითამაშა მოსაჩვენებლად, რის შემდეგაც როსტომმა მარიამი შეირთო ცოლად.
როსტომ ხანის და მარიამის ქორწინებით არამხოლოდ სამეგრელოს სამთავროსა და ქართლის სამეფოს პოლიტიკურ-დიპლომატიური ურთიერთობა უნდა განმტკიცებულიყო, ამ კავშირს მნიშვნელოვანი როლი უნდა ეთამაშა ასევე ირანსა და სამეგრელოს შორის დიპლომატიურ ურთიერთობაშიც. როსტომ ხანი ქორწინებიდან მალევე გარდაიცვალა. რის შემდეგაც დედოფალმა მარიამმა ყაენის მიწვევა მიიღო კარზე, დედოფალმა უარი თქვა. იცოდა შაჰ აბას II-მ, რომ მარიამი ლამაზი ქალი იყო და გადაწყვიტა მისი დაქორწინება ვახტანგ V შაჰნავაზზე. მარიამის ძმა ლევან დადიანი ცოცხალი აღარ იყო, დედოფალის ბედ-იღბალი შაჰ აბას II-ის ხელში გადავიდა.
მემატიანის ცნობით, 40 დღეს გრძლდებოდა მარიამისა და შაჰნავაზ V-ის ქორწილი. აღსანიშანვია, რომ არც შაჰნავაზისთვის იყო ეს ბედნიერი კავშირი, მარიამის მსგავსად. ქართლის ცხოვრების მიხედვით, მას ამ დროს უკვე ჰყავდა ცოლად „ასული ყაფლანისა, სახელით როდამ (გვარად ბარათაშვილი), ქალი ფრიად პატიოსანი და შემკული ყოველივე საქმითა კეთილითა, სრული სწავლითა სამხთოთა და საეროა, შუენიერი და პირის-წყალი დედათა“, მაგრამ როცა ყაენმა მეფეს მარიამ დედოფლის შერთვა უბრაძანა, უარი ვერ უთხრა და მის ნებას დაჰყვა.
კვლევაში ,,მარიამ დადიანი – პოლიტიკური ქორწინება გვიან შუა საუკუნეების საქართველოში“ განხილულია მარიამ დედოფლის პოლიტიკური, ნაძალადევი ქორწინებების მოტივები იმდროინდელი ისტორიული რეალიების ფონზე.
ამავე კვლევის მიხედვით, შუა საუკუნეებში დაქორწინებისა თუ გაყრის ინიციატორები ყოველთვის კაცები იყვნენ, ქალის დაქვემდებარებული მდგომარეობა პატრიარქალურ საზოგადოებაში კარგად ჩანს უცხოელი მოგზაურების ცნობებშიც. „არიან ისეთებიც, რომელთაც სამი, ოთხი, ცოლი ჰყავთ ერთ ჭერქვეშ. ზოგს კი ცოლები სხვადასხვა ადგილას ჰყავთ, რათა, სადაც არ წავლენ, ცოლი იქ დახვდეთ“, – წერს ჟან შარდენი მოგზაურობის ჩანაწერებში. ლამბერტის ცნობით კი, რამდენიმე ცოლის ყოლის უფლება ჰქონდა სამღვდელოებასაც: „ეპისკოპოსის ღირსებას ის უპირატესობა აქვს, რომ შეუძლიათ აშკარად იყოლიონ სამი თუ ოთხი ცოლი“.
მარიამ დედოფლის შესახებ კვლევის მიხედვით, XVII საუკუნის საქართველოში რთული სოციალურ-ეკონომიკური და პოლიტიკური ვითარების ფონზე ერთგვარი „სენი“ იყო ქალებისა და ბავშვების ტყვედ გაყიდვაც, ქალზე ძალადობის იარაღად ხშირად კაცები, როგორც გადაწყვეტილების მიმღებები, პოლიტიკურ ქორწინებას იყენებდნენ. ქალს „პატრონი“ განუსაზღვრავდა როგორ და ვისთან ეცხოვრა.
„მარიამ დადიანის სამი პოლიტიკური ქორწინება ძალადობის, პოლიტიკური თამაშის მაგალითად და გვიან შუა საუკუნეების ქართული კულტურული დამოკიდებულებების მახასიათებლად წარმოგვიდგება“, – წერია კვლევაში.
მარიამ დადიანი (ნაქარგი გამოსახულება შესრულებული მისი დაკვეთით დამზადებულ გარდამოხსნაზე, XVII ს.)
შპს „სმარტ ჰაუსი“ ბათუმის ცენტრალურ უბანში, ფარნავაზ მეფისა და ლერმონტოვის ქუჩების გადაკვეთაში მრავალბინიან სახლს აშენებს, კომპანიის 70 პროცენტის მფლობელი აჭარის უმაღლესი საბჭოს წევრის გიორგი მანველიძის ოჯახია. ოფიციალურად სამშენებლო კომპანიას დეპუტატის ძმის – ბექა მანველიძის ცოლი, ლანა აბალოიძე ფლობს. გიორგი მანველიძის ქონებრივი დეკლარაციის მიხედვით, გასულ წელს მას ძმამ 35 000 ლარი აჩუქა.
ფარნავაზ მეფისა და ლერმონტოვის ქუჩების გადაკვეთაზე ახალი პროექტის დასაწყებად კომპანიამ რამდენიმე კერძო სახლი დაანგრია და ახალი მრავალბინიანი კორპუსის მშენებლობა წამოიწყო. ამ დროისთვის საძირკვლის გათხრის სამუშაოები მიმდინარეობს. პროექტი საკმაოდ მასშტაბურია. ის იმითაცაა გამორჩეული, რომ სამ მხარეს ღიობები აქვს, რაც კომპანიას აქ ბინების სარფიანად გაყიდვის შესაძლებლობას მისცემს. საიტზე განთავსებული ინფორმაციით, ამ დროისთვის, როცა ჯერ კიდევ შენობის საძირკველი არ არის დასრულებული, კვადრატული მეტრის ფასი 600 დოლარია.
მერიის ინფორმაციით, კომპანიას 14-სართულიანი კორპუსის მშენებლობაზე აქვს ნებართვა, თუმცა 16 სართულის აშენებას გეგმავს – ყოველ შემთხვევაში ასეთი ინფორმაცია აქვს გამოქვეყნებული კომპანიას საკუთარ ფეისბუქის გვერდზე და ამდენივე სართული დავთვალეთ პროექტის რენდერზეც.
პროექტის რენდერი
კომპანიისვე ინფორმაციით, პროექტი მონაწილეობს სახელმწიფო პროგრამაში – “ბათუმი ბარაკების გარეშე”. ეს იმას ნიშნავს, რომ დეველოპერს, რომელიც ბათუმში ბარაკული დასახლების ათვისებით დაინტერესდება, მთავრობა ბანკში ფინანსურ თავდებობას, მშენებლობის სანებართვო დოკუმენტების მოპოვებისას კი, გამარტივებულ პირობებს ჰპირდება. ეს პირობები ე.წ. K2 კოეფიციენტის გაზრდასაც ითვალისწინებს, რაც პროექტის სიმაღლეში გაზრდას გულისხმობს.
ბათუმის ცენტრში, თუნდაც ფარნავაზ მეფის ქუჩაზე, ერთი კვადრატული ბინის ფასი 600-1000 დოლარია. ქალაქის ცენტრში, თუნდაც მოსახლეობასთან მოლაპარაკება და მაღლივი კორპუსების მშენებლობა, სამთავრობო პროგრამის დაწყებამდეც, ბევრ კომპანიას აინტერესებდა. ამიტომაც, „ბათუმელებს“ პროგრამის დაანონსებისთანავე ჰქონდა კითხვა, რატომ ჩადგა მთავრობა ინვესტორსა და მოქალაქეებს შორის, მაშინ, როცა ბათუმის ცენტრალური ადგილების ათვისებაზე ინვესტორები ისედაც ერთმანეთს ეცილებოდნენ? მაშინ გვიპასუხეს, რომ „მთავრობა კერძო პირებს შორის მოლაპარაკებებში არ ჩაერეოდა.“ წლების შემდეგ კი ცნობილი გახდა ბევრ შემთხვევაზე, როცა ქალაქში მშენებლობების ინტერესები ჩინოვნიკების ახლობლებს ჰქონდათ და ახლაც აქვთ. თანამდებობიდან წასული ჩინოვნიკების უმეტესობა კი ახლა მშენებელია, ან სამშენებლო კომპანიაში მუშაობს.
შპს „სმარტ ჰაუსის“ 70 პროცენტის მფლობელი ლანა აბალოიძე სამშენებლო ბიზნესში ერთი წლის წინ გამოჩნდა. იგივე შეიძლება ითქვას კომპანიის 30 პროცენტის მფლობელზე თამთა ვერძაძეზეც, ის ბექა თვალაძის მეუღლეა, რომელიც რამდენიმე სამშენებლო კომპანიის დირექტორად ფიქსირდება.
ბექა თვალაძე „მარდი კონსტრაქშენის“ დირექტორი იყო 2016 წელს, კომპანია „სმარტ ჰაუსიც“ თავის დროზე, 2016 წელს სწორედ „მარდი ჰოლდინგმა“ დააფუძნა და მისი ასივე პროცენტი ამ კომპანიას ეკუთვნოდა. 2018 წელს, კომპანიის ჯერ 50, შემდეგ კი ასივე პროცენტის მფლობელი რამინ ბალაძე გახდა. გასული წლის დეკემბრიდან კი, შპს „სმარტ ჰაუსის“ ასივე პროცენტის მფლობელი და კომპანიის დირექტორი ლანა აბალოიძე გახდა, შემდეგ კი კომპანიის 30 პროცენტი თამთა ვერძაძეზე გააფორმეს.
შპს „სმარტ ჰაუსზე“ მშენებლობის ნებართვა გასული წლის სექტემბერშია გაცემული, ამავე ნებართვის მიხედვით სახლი 2022 წელს უნდა ჩაბარდეს მერიას.
ჩვენ კომპანიის ფეისბუქის გვერდზე მითითებულ ნომერზე რამდენჯერმე დავრეკეთ და ლანა აბალოიძესთან დაკავშირება ვთხოვეთ. გვინდოდა მისთვის გვეკითხა, სამშენებლო ბიზნესით გამოჩენიდან ერთი წლის შემდეგ, რა სახსრებით შეძლო მან მასშტაბური მშენებლობის წამოწყება. გასაუბრება გვინდოდა გიორგი მანველიძესთანაც, თუმცა დეპუტატმა არც სატელეფონო ზარებზე გვიპასუხა და არც sms შეტყობინების შემდეგ გამოგვეხმაურა.
მანველიძეების ოჯახის სამშენებლო ბიზნესზე მაშინაც იყო საუბარი, როცა დეპუტატ გიორგი მანველიძის მამა, ბაგრატ მანველიძე ბათუმის ვიცე-მერად მუშაობდა, თუმცა ვიცე-მერი ბათუმის ცენტრში ჯინჭარაძის ქუჩაზე წამოწყებული კორპუსის მშენებლობასთან კავშირს მაშინაც უარყოფდა, მაშინ მან „ბათუმელებს“ განუმარტა, რომ ის აქ მამისეულ ადგილს ფლობდა, ტერიტორია ინვესტორმა აითვისა და თავად არაფერ შუაშია.
ბაგრატ მანველიძე საჯარო სექტორში აღარ მუშაობს, უმაღლესი საბჭოს წევრი გიორგი მანველიძე კი ცოტა ხნის წინ „ქართული ოცნების“ ბათუმის საარჩევნო შტაბის ხელმძღვანელად დანიშნეს.
მოსამართლე კობა გოცირიძემ უარი უთხრა კაცს სარჩელის დაკმაყოფილებაზე, რომლითაც იგი მის წინააღმდეგ შემაკავებელი ორდერის გამოცემას უკანონოდ მიიჩნევდა. ლევან ვ.-ს ორდერი პოლიციელებმა აპრილის ბოლოს გამოუწერეს, როცა ოჯახის მეზობელმა პოლიციაში დარეკა და თქვა, რომ „სახლიდან ქალის და მამაკაცის ყვირილი არ წყდება, ხოლო ქალი პოლიციის შველას ითხოვს“.
„ინსპექტორ-გამომძიებლის მიერ გამოცემული შემაკავებელი ორდერი უკანონოა როგორც ფაქტობრივი, ისე სამართლებრივი თვალსაზრისით. ორდერი გამოიცა იმგვარად, რომ ინსპექტორ-გამომძიებელმა არც კი გამოიკვლია საქმისათვის მნიშვნელობის მქონე გარემოებები, არ შეისწავლა ჯეროვნად შეტყობინების შინაარსი და არ დაადგინა ის გარემოება, რეალურად ჰქონდა თუ არა ადგილი რაიმე სახის ძალადობის ფაქტს,“ – მიიჩნევდა მოსარჩელე.
მოსარჩელის მტკიცებით სიტყვიერი შელაპარაკება სესხის გამო ჰქონდათ. „შესაბამისად, ეს საკითხი არ შეიძლება განხილულ იქნას ძალადობის შემთხვევად და ორდერის გამოცემის საფუძვლად,“ – დასძინა მოსარჩელემ.
პოლიციელმა კი, რომელმაც შემაკავებელი ორდერი გამოსცა, მოსამართლეს უთხრა, რომ ქალი ნაცემი იყო.
„უმნიშვნელოვანესი იყო ის გარემოებაც, რომ საგამოძიებო სამსახურში გამოკითხვის დროს რ.-ს სახის არეში აღენიშნებოდა ძალადობის აშკარა კვალი და თვალნათლივ ჩანდა, რომ დაზიანება რამდენიმე საათის წინ იყო მიყენებული,“ – თქვა პოლიციელმა და ხაზი გაუსვა იმასაც, რომ როცა ის შემთხვევის ადგილზე, ღამით მივიდა, იქ წყვილის გარდა არავინ იყო.
ახალგაზრდა წყვილი ბათუმში, ნაქირავებ ბინაში ცხოვრობდა. ისინი რეგისტრირებულ ქორწინებაში არ იყვნენ.
შემაკავებელი ორდერის დროს აკრძალულია მსხვერპლთან ნებისმიერი სახის კომუნიკაცია, ასევე ფიზიკურად მიახლოვება.
საქართველოში საგანგებო მდგომარეობის პერიოდში დაწესებული აკრძალვების დარღვევის გამო გამოწერილი ჯარიმის გადახდის დროის ათვლა საგანგებო მდგომარეობის გაუქმებისთანავე, 22 მაისიდან დაიწყო. დადგენილების თანახმად, მოქალაქეებს ან უნდა გაესაჩივრებინათ ეს ჯარიმა, ან ერთი თვის ვადაში უნდა გადაიხადონ დაკისრებული თანხა.
კომენდანტის საათის ამოქმედებიდან მის გაუქმებამდე შს სამინისტროს მიერ გამოწერილი ჯარიმების ოდენობა, ჯამში, 23 მილიონ 955 ათასზე მეტი ლარია. ამ პერიოდში პოლიციამ სულ 7 985 ფიზიკური და იურიდიული პირი დააჯარიმა. 21 ივნისიდან ანუ ორი დღის შემდეგ ამ ჯარიმების გადახდის ვადა იწურება. შესაბამისად, ყოველ გადაუხდელ ჯარიმაზე იძულებითი აღსრულების პროცედურა დაიწყება.
რა მოხდება იმ შემთხვევაში, თუ პირი ჯარიმას არ გადაიხდის და არც გაასაჩივრებს მას? – ამ და სხვა კითხვებზე გვპასუხობს საიას აჭარის ფილიალის ხელმძღვანელი პაატა დიასამიძე.
პაატა, რომ განგვიმარტოთ, როგორია პროცედურა, რა ვადებში მოუწევთ დაჯარიმებულებს ამ თანხის გადახდა, მათ, ვინც გაასაჩივრა და ვისაც არ გაუსაჩივრებია?
სამართალდარღვევის ოქმებზე, რომლებიც დგებოდა კომენდანტის საათის დროს დაწესებული რეგულაციების დარღვევის გამო, ადმინისტრაციული საჩივრის წარდგენის ვადები იყო შეჩერებული. საგანგებო მდგომარეობის გაუქმების შემდგომ, აღდგა ეს ვადები. ეს ნიშნავს იმას, რომ დროის ათვლა დაიწყო – გასაჩივრების ათდღიანი ვადაა. ამ ათი დღის ვადაში უნდა შეეტანათ საჩივარი, რამდენიმე ადამიანს ჩვენც დავეხმარეთ და საჩივარი შევატანინეთ ადმინისტრაციულ ორგანოში, ეს საჩივრები განხილვის ეტაპზეა. ჩვენ მიერ წარდგენილ საჩივრებზე, ჯერჯერობით არც ერთზე გადაწყვეტილება არ მიუღია ადმინისტრაციულ ორგანოს, არც დაკმაყოფილების და არც უარის თქმის შესახებ.
რა ელით მათ, ვინც ვერ მოახერხა დაჯარიმების გასაჩივრება?
ვადის ათვლა დაიწყო საგანგებო მდგომარეობის დასრულების შემდგომ სამართალდარღვევათა კოდექსის შესაბამისად. თუ დაჯარიმებულმა არ გაასაჩივრა, ასეთ შემთხვევაში 30 დღის ვადაში ვალდებულია გადაიხადოს [ჯარიმა]. თუ არ გადაიხდის, ეს იმას ნიშნავს, რომ დაიწყება იძულებითი აღსრულება. ამოიწერება სააღსრულებლო ფურცელი და მოქალქეს მიუვა შეტყობინება ნებაყოფლობით გადახდაზე. თუ არ გადაიხდის, დაიწყება იძულებითი ღონისძიებები მის წინააღმდეგ, ყადაღა დაედაბა მის ანგარიშებს ან ქონებას და იქედან ჩამოეჭრება თანხა.
გაორმაგებას ან საურავის დარიცხვას ხომ არ ითვალისწინებს ამ შემთხვევაში კანონი?
მუხლი, რომლის საფუძველზეც არის შედგენილი სამართალდარღვევის ოქმი, არ ითვალისწინებს საურავის დარიცხვას: გამოცემული იყო პრეზიდენტის დეკრეტი და დეკრეტის საფუძველზე იყო გამოცემული მთავრობის დადგენილება, რომელიც ზღუდავდა გარკვეულ უფლებებს და დეკრეტშივე იყო მითითებული, რა სახის სანქციას ითვალისწინებს დარღვევა, განმეორების შემთხვევაში ეს გადადის სისხლის სამართლებრივ პასუხისმგებლობაში.
გასაჩივრება აჩერებს საქმის წარმოებას – სანამ საჩივარს განიხილავს ადმინისტრაციული ორგანო ან სასამართლო, ამ პერიოდში მოქალაქე არ არის ვალდებული, რომ გადაიხადოს [ჯარიმა]. თუ ადმინისტრაციულ საჩივარს დააკმაყოფილებს უწყება, მოქალაქეს ჯარიმა აღარ ექნება გადასახდელი, თუ არ დააკმაყოფილებს, უკვე იქედან უნდა გადაიხადოს. ამ შემთხვევაში ოქმი დარღვევაზე საპატრულო პოლიციას აქვს შედგენილი, თუ არ დააკმაყოფილა საჩივარი შინაგან საქმეთა სამინისტრომ, უკვე აითვლება ვადები, რა ვადაშიც უნდა გადაიხადოს დაჯარიმებულმა.
როგორია საიას არგუმენტები, როცა კონკრეტული მოქალაქეების ჯარიმებს ასაჩივრებს?
საქმეებს ინდივიდუალურად ვუდგებით, ჩვენ გვქონდა შემთხვევა, როცა სამართლებრივად პრობლემური იყო აქტი. ძირითადად აქცენტს ვაკეთებთ იმაზე, რომ პოლიცია არსებითად არ იკვლევდა ფაქტობრივ გარემოებებს – უფლებამოსილი პირი, რომელიც ადგენდა ამ ოქმს, არ იკვლევდა რატომ ჩადიოდა პირი ამა თუ იმ სამართალდარღვევას. გვქონდა ასეთი შემთხვევა, როცა მოქალაქე გადაადგილდებოდა ბათუმის ტერიტორიაზე და მას საზღვრის დარღვევა ჩაუთვალეს. მას დარღვევად ჩაუწერეს ბათუმის ტერიტორიის დატოვება. სინამდვილეში მას ბათუმი დატოვებული არ ჰქონდა.
გასაჩივრებული გვაქვს ასევე ჯარიმა, როცა მოქალაქეს წამლის ყიდვა უნდოდა და პოლიციის ერთი ეკიპაჟისგან მას ჰქონდა ამაზე ნებართვა, მეორემ კი ჯარიმა დაუწერა. ამ შემთხვევაში პოლიციელების მხრიდან ძალადობასაც ჰქონდა ადგილი. ჩვენ გვაინტერესებს, რატომ არ გადასცა ერთმა ეკიპაჟმა მეორეს ინფორმაცია. მოქალაქემ უთხრა მათ, რომ მეორე ეკიპაჟიდან ნებართვა ჰქონდა აღებული. არც გაითვალისწინეს და არც იმ ეკიპაჟს დაურეკეს. მათ კომუნიკაცია აქვთ და შეეძლოთ გადამცემი საშუალებით გადაეცათ ამის შესახებ.
რამდენი საჩივარი დაწერეთ?
50-ზე მეტია, ვინც ჩვენ მოგვმართა. შესაძლოა სხვებმაც გაასაჩივრეს, სხვა იურისტებს მიმართეს, ან არიან ისეთებიც, რომლებიც თვითონ დაიცავენ თავს და იურისტისთვის მიმართვა არ სჭირდებათ.
პაატა დიასამიძე, იურისტი, საიას აჭარის ფილიალის თავმჯდომარე
18 ივნისს გამოვლენილი კორონავირუსის 5 ახალი შემთხვევიდან 4 სატვირთო მანქანის მძღოლია – ამის შესახებ თბილისის ინფექციური საავადმყოფოს კლინიკურმა ხელმძღვანელმა მარინა ეზუგბაიამ განაცხადა.
რა წესები მოქმედებს სატვირთო ავტომანქანების მძღოლებისთვის საქართველოს საზღვარზე, ვინ აკონტროლებს ქვეყნის ტერიტორიაზე შემოსულ მძღოლებს, მათ გადაადგილებას და რამდენადაა დაცული სხვა მოქალაქე ამ გზით შემოტანილი/იმპორტირებული ახალი კორონავირუსისგან?
საქართველოში მოქმედი წესების მიხედვით, საზღვარზე მძღოლებს უტარდებათ თერმოსკრინინგი. თუ უცხო ქვეყნის მოქალაქე მძღოლს დაუფიქსირდა მაღალი ტემპერატურა, მას ქვეყანაში არ შემოუშვებენ; საქართველოს მოქალაქე მძღოლი კი, თუ მას აქვს მაღალი ტემპერატურა, გადაჰყავთ ცხელების ცენტრში, სადაც გრძელდება მისი გამოკვლევა კორონავირუსზე.
თუ მძღოლს საზღვარზე შემოსვლისას არ დაუფიქსირდა ტემპერატურა, ის ექვემდებარება ახალ კორონავირუსზე სწრაფ მარტივ ტესტირებას ანტიგენსა და ანტისხეულზე სპეციალურ სამედიცინო პუნქტში.
მაგალითად, სარფიდან შემოსული მძღოლი, თუ მას არ აქვს საზღვარზე შემოსვლისას მაღალი ტემპერატურა, ავტოსატრანსპორტო საშუალებასთან ერთად გადაჰყავთ გაფორმების ეკონომიკურ ზონა „ბათუმის“ საბაჟო კონტროლის ზონაში, სადაც სამედიცინო პერსონალი მძღოლს ახალ კორონავირუსზე სწრაფ და მარტივ ტესტირებას ჩაუტარებს ანტიგენსა და ანტისხეულზე.
შემოსავლების სამსახურში „ბათუმელებს“ უთხრეს, რომ თუ ტესტირების შედეგად არ გამოვლინდა ახალი კორონავირუსით ინფიცირება, მძღოლი ტოვებს გაფორმების ეკონომიკურ ზონას. თუმცა, მოქმედი წესების მიხედვით, მძღოლი ტესტირების მომენტიდან 14 დღის განმავლობაში ექვემდებარება ყოველ 72 საათში ერთხელ ახალ ტესტირებას [სწრაფი მარტივი ტექნოლოგიით ანტიგენსა და ანტისხეულზე] შესაბამის სამედიცინო დაწესებულებაში.
ამ ახალი ტესტირებ[ებ]ის საფასური კი უნდა გადაიხადოს თავად მძღოლმა, მისმა დამსაქმებელმა, შესაბამისმა იმპორტიორმა/ექსპორტიორმა ან სხვა დაინტერესებულმა პირმა [ერთ-ერთი დამსაქმებლის ინფორმაციით, ტესტირებაში 20 ლარი გადაიხადა].
იმ შემთხვევაში, თუ მძღოლი უარს განაცხადებს სწრაფ მარტივ ტესტირებაზე, ის გადაჰყავთ 14-დღიან სავალდებულო კარანტინში.
მძღოლს, რომელსაც საზღვარზე ტემპერატურა, ხოლო ტესტირებით კორონავირუსი არ დაუფიქსირდა, მაგრამ ტესტირებიდან 72 საათის განმავლობაში ტოვებს საქართველოს ტერიტორიას [შემდეგი საერთაშორისო გადაზიდვის განხორციელების მიზნით], მას არ მოეთხოვება ხელახალი ტესტირება.
„ბათუმელები“ დაინტერესდა:
ქვეყანაში შემოსული მძღოლი 14 დღის განმავლობაში [როცა მას ევალება ყოველ 72 საათში ჩაიტაროს ახალი ტესტირება] თავისუფლად გადაადგილდება თუ არა საქართველოს ტერიტორიაზე – ანუ აქვს თუ არა მას შეხება სხვა მოქალაქეებთან?
თავისუფლად გადაადგილდებიან თუ არა 72 საათის განმავლობაში ის მძღოლებიც, რომლებმაც ამ პერიოდში უნდა დატოვონ ქვეყანა ტვირთის გადაზიდვის მიზნით?
ასევე, თავისუფლად გადაადგილდებიან თუ არა ტრანზიტად მოძრავი ავტომობილების მძღოლები?
ზემოთ აღნიშნულ კითხვებზე პასუხის მისაღებად „ბათუმელები“ სახმელეთო ტრანსპორტის სააგენტოს დაუკავშირდა, საიდანაც ეკონომიკის სამინისტროში გადაგვამისამართეს. ამ სამინისტროში გადაგვამისამართა მთავრობამაც. ეკონომიკის სამინისტროდან კი ამ დრომდე პასუხი ვერ მივიღეთ.
„ბათუმელები“ დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალურ დირექტორს, ამირან გამყრელიძეს დაუკავშირდა. მძღოლი, რომელსაც არ დაუდასტურდება კორონავირუსი, „მიდის თვითიზოლაციაში და თუ 72 საათში არ ტოვებს ქვეყანას, 14 დღის განმავლობაში ყოველ 3 დღეში უნდა გაიკეთოს ტესტი“, – მოგვწერა ამირან გამყრელიძემ.
საერთაშორისო სატვირთო გადაზიდვების განმახორციელებელი ავტოსატრანსპორტო საშუალებების მძღოლების [გარდა ტრანზიტისა] ეპიდემიოლოგიური კონტროლისა და კარანტინის წესები დამტკიცებულია საქართველოს ეკონომიკის, ჯანდაცვისა და ფინანსთა მინისტრების ერთობლივი ბრძანებით და ის 2020 წლის 15 ივლისამდე მოქმედებს.
ეს წესები არ ვრცელდება საქართველოს ტერიტორიაზე ტრანზიტულად მოძრავი სატვირთო ავტოსატრანსპორტო საშუალებების მძღოლებზე. სატრანზიტო მძღოლები, რომლებსაც ტესტირებით არ აღმოაჩნდებათ კორონავირუსი, აგრძელებენ გზას მომდევნო პუნქტამდე შეუჩერებლივ. ისინი ვალდებულნი არიან მარშრუტი [გაჩერებები] შეუთანხმონ სახმელეთო ტრანსპორტის სააგენტოს და ამასთან, შეზღუდულ ვადებში [24 საათში] დატოვონ საქართველოს ტერიტორია.
[toggle title=”მძღოლების ეპიდკონტროლისა და კარანტინის წესები დეტალურად ნახეთ აქ:“]
საქართველოში შემოსვლისას მძღოლები ექვემდებარებიან თერმულ სკრინინგს. ტემპერატურის დაფიქსირების შემთხვევაში უცხო ქვეყნის მოქალაქეობის მქონე მძღოლი არ დაიშვება საქართველოს ტერიტორიაზე, ხოლო საქართველოს მოქალაქეობის მქონე მძღოლი გადაყვანილ იქნება შესაბამის ცხელების ცენტრში, სადაც განხორციელდება მისი სპეციფიკური ლაბორატორიული პოლიმერაზული ჯაჭვური რეაქციის (PCR) ტექნოლოგიით ახალ კორონავირუსზე ტესტირების მიზნით, შესაბამისი ბიოლოგიური მასალის აღება. აღნიშნული მძღოლი ტესტირების პასუხის მიღებამდე დროებით განთავსებულია ცხელების ცენტრში.
საბაჟო გამშვებ პუნქტზე (გარდა „სარფისა“) შემოსვლის შემდეგ, თუ თერმული სკრინინგის შედეგად არ დაფიქსირდა ტემპერატურა, მძღოლი ექვემდებარება ახალ კორონავირუსზე სწრაფ მარტივ ტესტირებას ანტიგენზე და ანტისხეულზე შესაბამისი სამედიცინო პერსონალის მიერ სპეციალურ სამედიცინო პუნქტში.
საბაჟო გამშვებ პუნქტ „სარფიდან“ შემოსული მძღოლი კი, თუ მას თერმული სკრინინგის შედეგად არ დაუფიქსირდა ტემპერატურა, ავტოსატრანსპორტო საშუალებასთან ერთად გადაყვანილი იქნება 12 კილომეტრის რადიუსში განთავსებულ გაფორმების ეკონომიკურ ზონა „ბათუმის“ საბაჟო კონტროლის ზონაში, სადაც შესაბამისი სამედიცინო პერსონალის მიერ განხორციელდება მძღოლის ახალ კორონავირუსზე სწრაფი მარტივი ტესტირება ანტიგენსა და ანტისხეულზე.
თუ არ გამოვლინდა ახალი კორონავირუსით ინფიცირების შემთხვევა, საჭიროებისამებრ, მძღოლის გადაყვანას ცხელების ცენტრიდან მის სატვირთო სატრანსპორტო საშუალებამდე განახორციელებს სსიპ – სახმელეთო ტრანსპორტის სააგენტო.
თუ ტესტირების შედეგად არ გამოვლინდა ახალი კორონავირუსით ინფიცირების შემთხვევა, აღნიშნული ტესტირების მომენტიდან საქართველოს მოქალაქეობის მქონე მძღოლი ექვემდებარება ყოველ 72 საათში ერთხელ ახალ ტესტირებას [სწრაფი მარტივი ტექნოლოგიით ანტიგენზე და ანტისხეულზე] შესაბამის სამედიცინო დაწესებულებაში, საქართველოში შემოსვლიდან 14 კალენდარული დღის განმავლობაში, გარდა: ა] იმ შემთხვევისა, როდესაც მძღოლი უარს აცხადებს სწრაფ მარტივ ტესტირებაზე; ბ] იმ შემთხვევისა, როდესაც მძღოლი უკანასკნელი შესაბამისი ტესტირებიდან 72 საათის განმავლობაში დატოვებს საქართველოს ტერიტორიას, შემდეგი საერთაშორისო გადაზიდვის განხორციელების მიზნით.
სწრაფი მარტივი ტესტირების შედეგად ახალი კორონავირუსის დადასტურების შემთხვევაში, განხორციელდება საქართველოს მოქალაქეობის მქონე მძღოლის სპეციფიკური ლაბორატორიული პოლიმერაზული ჯაჭვური რეაქციის (PCR) ტექნოლოგიით ახალ კორონავირუსზე ტესტირების მიზნით, შესაბამისი ბიოლოგიური მასალის აღება. აღნიშნული მძღოლი ტესტირების პასუხის მიღებამდე დროებით განთავსებულია ცხელების ცენტრში. აღნიშნული ტესტირების შედეგად უარყოფითი პასუხის მიღების მომენტიდან, 72-საათიანი ვადის ათვლა დაიწყება თავიდან.
ტესტირებისათვის შესაბამისი მომსახურების საფასურის გადახდას უზრუნველყოფს თავად მძღოლი, მისი დამსაქმებელი, შესაბამისი იმპორტიორი/ექსპორტიორი ან სხვა დაინტერესებული პირი.
თუ საქართველოს მოქალაქეობის მქონე მძღოლი უარს აცხადებს ტესტირებაზე, ამ შემთხვევაში აღნიშნული მძღოლი დაექვემდებარება საკარანტინო სივრცეში განთავსებას საქართველოში შემოსვლიდან 14 კალენდარული დღის განმავლობაში, საქართველოს კანონმდებლობით დადგენილი წესის შესაბამისად. აღნიშნული მძღოლი ვალდებულია მისი უარის თაობაზე შეატყობინოს სსიპ – სახმელეთო ტრანსპორტის სააგენტოს, რომელიც მძღოლს განუსაზღვრავს შესაბამის საკარანტინო სივრცეს და იქ გამოცხადებისთვის აუცილებელ გონივრულ ვადას, პირის ფაქტობრივი საცხოვრებელი მისამართის ან მისი ფაქტობრივი ადგილსამყოფლის გათვალისწინებით, რომელიც საერთო ჯამში არ უნდა აღემატებოდეს მძღოლის უკანასკნელი შესაბამისი ტესტირებიდან 72 საათს.
საქართველოს ტურიზმის ეროვნული ადმინისტრაცია ვალდებულია სახმელეთო ტრანსპორტის სააგენტოს მიაწოდოს ინფორმაცია საკარანტინო სივრცეების (შესაბამისი სასტუმროების), მათ შორის, ადგილების რაოდენობის თაობაზე.
სახმელეთო ტრანსპორტის სააგენტოს უფლება აქვს, შესაბამისი გაუთვალისწინებელი ან სხვა ობიექტური გარემოებების არსებობისას, ცალკეულ შემთხვევებში საქართველოს მოქალაქეობის მქონე მძღოლებს განუსაზღვროს ამ მუხლით გათვალისწინებული ვადებისგან განსხვავებული ვადები, რომლის შესახებ ინფორმაცია აღირიცხება შესაბამის პროგრამულ მოდულში.
ტესტირების შესახებ ინფორმაციას სამედიცინო დაწესებულება ასახავს შესაბამის პროგრამულ მოდულში.
შენიშვნა:
საქართველოს სახმელეთო სახელმწიფო საზღვრის მონაკვეთის საბაჟო გამშვებ პუნქტთან განთავსებულ M2, M3, N2 და N3 კატეგორიის ავტოსატრანსპორტო საშუალებების (ცალკე, ნახევარმისაბმელით ან მისაბმელით) ავტოსადგომებზე შესაბამისი სატრანსპორტო საშუალების გაჩერების შემდგომ, დაუშვებელია (გარდა იმ შემთხვევისა, როდესაც აღნიშნული ავტოსადგომის ტერიტორიის დატოვება ხორციელდება საქართველოს ტერიტორიიდან დადგენილი წესით გასვლის მიზნით) აღნიშნული ავტოსადგომის ტერიტორიის დატოვება იმ მძღოლის მხრიდან, რომელსაც განსაზღვრული აქვს შესაბამისი ვადა.
უცხო ქვეყნის მოქალაქეობის მქონე მძღოლის დამატებითი ეპიდემიოლოგიური კონტროლი
უცხო ქვეყნის მოქალაქეობის მქონე მძღოლი, ასევე შესაბამისი ტვირთის მფლობელი, ექსპორტიორი, იმპორტიორი ვალდებულია, დროულად განახორციელოს შესაბამისი სატრანსპორტო/ლოჯისტიკური ოპერაციები და პროცედურები, რათა საქართველოს ტერიტორიის დატოვება მოხდეს „ახალი კორონავირუსით გამოწვეული დაავადების შემთხვევებზე ოპერატიული რეაგირების გეგმით“ დადგენილ ვადებში.
უცხო ქვეყნის მოქალაქეობის მქონე მძღოლი, რომელსაც არ დაუდასტურდა ახალი კორონავირუსით ინფიცირების შემთხვევა, შესაბამის იმპორტიორს ან ექსპორტიორს წარუდგენს ინფორმაციას ამ წესების შესაბამისად, ჩატარებული ტესტირებ(ებ)ისა და საქართველოს ტერიტორიაზე შემოსვლის დროის თაობაზე.
თუ საქართველოში საქონლის შემოტანისა და ჩამოტვირთვის შემდეგ სატვირთო ავტოსატრანსპორტო საშუალება დაიტვირთება საქართველოდან საქონლის გატანის მიზნით, აგრეთვე, უცხო ქვეყნის მოქალაქის მიერ სატვირთო ავტოსატრანსპორტო საშუალების გადაადგილების სხვა შემთხვევებში (გარდა ტრანზიტისა), მძღოლი ვალდებულია უზრუნველყოს ახალ კორონავირუსზე ტესტირება (სწრაფი მარტივი) შესაბამის სამედიცინო დაწესებულებაში, მისი უკანასკნელი შესაბამისი ტესტირებიდან ყოველ 72 საათში ერთხელ (გარდა იმ შემთხვევისა, როდესაც მძღოლი უკანასკნელი შესაბამისი ტესტირებიდან 72 საათის განმავლობაში დატოვებს საქართველოს ტერიტორიას).
ამ შემთხვევაში ახალ კორონავირუსზე ტესტირებისათვის შესაბამისი მომსახურების საფასურის გადახდას უზრუნველყოფს თავად მძღოლი, შესაბამისი იმპორტიორი/ექსპორტიორი ან სხვა დაინტერესებული პირი.
სპეციალური სამედიცინო პუნქტები და ცხელების ცენტრი
„სპეციალური სამედიცინო პუნქტი“ – საბაჟო გამშვებ პუნქტზე, საზღვაო ნავსადგურში ან საბაჟო კონტროლის ზონაში განთავსებული დროებითი სამედიცინო პუნქტი, სადაც განთავსებულია ახალ კორონავირუსზე სწრაფი მარტივი ტესტირების სათანადოდ ჩასატარებლად (ანტიგენზე და ანტისხეულზე) ყველა საჭირო აღჭურვილობა. სპეციალური სამედიცინო პუნქტები, მათ შორის, განთავსდება შემდეგ საბაჟო გამშვებ პუნქტებში: „წითელი ხიდი“, „ყაზბეგი“, „სადახლო-საავტომობილო“, „სარფი“, „ნინოწმინდა“, „კარწახი“, „ვალე“ და ლაგოდეხი“. აგრეთვე აღნიშნული პუნქტები განთავსდება ფოთის და ბათუმის საზღვაო ნავსადგურებში.
„ცხელების ცენტრი“ – „იზოლაციისა და კარანტინის წესების დამტკიცების შესახებ“ საქართველოს მთავრობის დადგენილებით დამტკიცებული „იზოლაციისა და კარანტინის წესებით“ გათვალისწინებული შესაბამისი სამედიცინო დაწესებულება.
ამ წესების შესაბამისად, სპეციალურ სამედიცინო პუნქტში მძღოლის სწრაფ მარტივ ტესტირებას განახორციელებს სსიპ – შემოსავლების სამსახურის შესაბამისი კვალიფიკაციის მქონე უფლებამოსილი პირი, რომელსაც გავლილი აქვს სათანადო გადამზადება.
სპეციალურ სამედიცინო პუნქტებში სწრაფი მარტივი ტესტირების განმახორციელებელ უფლებამოსილ პირთა რაოდენობას განსაზღვრავს სსიპ – შემოსავლების სამსახური საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან შეთანხმებით.
სპეციალური სამედიცინო პუნქტების უზრუნველყოფას სწრაფი მარტივი ტესტირების ჩასატარებლად საჭირო საშუალებებით, მათ შორის, პირადი დაცვის აღჭურვილობით და დისტანციური თერმომეტრებით, ახორციელებს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო.
პასუხისმგებლობა
იმ შემთხვევაში, თუ საქართველოს მოქალაქეობის მქონე მძღოლი დაარღვევს ამ წესების დადგენილ ვადებსა და მოთხოვნებს, აღნიშნულის თაობაზე სახმელეთო ტრანსპორტის სააგენტო ან შემოსავლების სამსახური ინფორმაციას აწვდის საქართველოს შინაგან საქმეთა სამინისტროს, რის საფუძველზეც საქართველოს მოქალაქეობის მქონე მძღოლი დაჯარიმდება საქართველოს კანონმდებლობით დადგენილი წესის შესაბამისად.
სამართალდამრღვევი პირი დამატებით ექვემდებარება სწრაფ მარტივ ტესტირებას შესაბამის სამედიცინო დაწესებულებაში.
ამ წესების დარღვევისთვის გათვალისწინებულია პასუხისმგებლობა საქართველოს კანონმდებლობის შესაბამისად.
საბაჟო კონტროლის ზონაში დარღვევის გამოვლენის შემთხვევაში, შესაბამისი პირისათვის ადმინისტრაციული სახდელის დადებას ახორციელებს შემოსავლების სამსახურის უფლებამოსილი პირი.
[/toggle]
19 ივნისის მონაცემებით საქართველოში:
კორონავირუსის დადასტურებული შემთხვევა არის სულ – 895, მათგან გამოჯანმრთელებულია – 741, გარდაიცვალა – 14;
თურქეთის მილი მეჯლისის ოპოზიციონერი დეპუტატის, აჰმეთ კაიას განცხადებას, რომლის მიხედვითაც, თურქ მძღოლებს, რომლებსაც საქართველოს გავლით, რუსეთისა და ყაზახეთის მიმართულებით ტვირთები გადააქვთ, საქართველოს საბაჟოებზე 1000-დან 2000-მდე დოლარს სძალავენ, შემოსავლების სამსახური განცხადებით ეხმაურება.
“ბათუმელები” შემოსავლები სამსახურის განცხადებას უცვლელად გთავაზობთ:
“ფინანსთა სამინისტროს შემოსავლების სამსახური სრული პასუხისმგებლობით აცხადებს, რომ აღნიშნული ინფორმაცია არ შეესაბამება სიმართლეს.
საბაჟო კონტროლი, მათ შორის, საქონლისა და სატრანსპორტო საშუალების დათვალიერება ეფუძნება მონაცემთა ავტომატიზებული დამუშავების გამოყენებას და ხორციელდება ეროვნულ, რეგიონულ და საერთაშორისო დონეზე შემუშავებული რისკის კრიტერიუმების საფუძვლებზე.
აქვე აღვნიშნავთ, რომ პანდემიის მიუხედავად, საერთაშორისო სატვირთო გადაზიდვების განმახორციელებელ კომპანიებსა და ავტოსატრანსპორტო საშუალებების მძღოლებს გადაადგილებისას რაიმე სახის პრობლემები არ შექმნიათ. საქართველოს საბაჟო საზღვარზე მათი გადაადგილება 24-საათიან რეჟიმში, შესაბამისი პროტოკოლის დაცვით, შეუფერხებლად მიმდინარეობს.
ამასთან, მიმდინარე წლის მარტი-მაისის პერიოდში თურქეთიდან საქართველოს გავლით ტრანზიტულად გაიარა 25 000-ზე მეტმა ავტოტრანსპორტო საშუალებამ, რომელთაგან სპეციფიკურ საბაჟო კონტროლს დაექვემდებარა მხოლოდ 109 მანქანა, რაც მთლიანი ოდენობის 0,4 %-ია. ამასთან, განვმარტავთ, რომ კონტროლს დაქვემდებარებული 109 მანქანიდან უმეტესმა ნაწილმა, საქართველოს ტერიტორია დატოვა 1-4 დღის განმავლობაში და არა 10-15 დღისა, როგორც ეს მეჯლისის დეპუტატის განცხადებაშია აღნიშნული.
შემოსავლების სამსახური აქტიურად არის ჩართული თურქეთის მხარესთან საზღვრის კვეთასთან დაკავშირებული საკითხების მონიტორინგის პროცესში და ყოველი ახალი რეგულაციის შესახებ ოპერატიულად ხდება ინფორმაციის გაზიარება. სწორედ ამის დასტურია, მიმდინარე წლის 12 ივნისს ფინანსთა სამინისტროს შემოსავლების სამსახურის უფროსის ლევან კაკავასა და თურქეთის რესპუბლიკის ვაჭრობის მინისტრის მოადგილის რიზა თუნა თურაგაის შორის ვიდეოკონფერენციის ფორმატში გამართული შეხვედრა. მხარეები მომავალშიც გააგრძელებენ აქტიურ კომუნიკაციას ამ მიმართულებით,”- ნათქვამია შემოსავლების სამსახურის განცხადებაში.
თურქეთის მილი მეჯლისის ოპოზიციონერი დეპუტატი, აჰმეთ კაია აცხადებს, რომ თურქ მძღოლებს, რომლებსაც საქართველოს გავლით, რუსეთისა და ყაზახეთის მიმართულებით ტვირთები გადააქვთ, საქართველოს საბაჟოებზე 1000-დან 2000-მდე დოლარს სძალავენ.
ოპოზიციონერი დეპუტატი თურქეთის ხელისუფლებას მიმართავს, დაინტერესდეს მძღოლების ამ პრობლემით.
მისივე თქმით, ასეთ რთულ პერიოდში ამ თანხის გადახდა გადამზიდავ კომპანიებს რთულ მდგომარეობაში აყენებს.
საგანგებო ბრიფინგზე დეპუტატმა ახსნა თანხის გამოძალვის „პროცედურა“: „თუ ფულს არ გადაუხდიან რა ხდება? 10-15 დღის განმავლობაში წითელ ზოლში გადაჰყავთ [მანქანები] თითქოსდა შემოწმების მიზნით. 1000-2000 დოლარის გადახდის შემთხვევაში, მძღოლებს დაუყოვნებლივ ატარებენ. ამ ვითარებაში, კომპანიებს დიდი ზარალი ადგებათ“.
დეპუტატმა ჟურნალისტებს ასევე აჩვენა ვიდეო, რომლის მიხედვითაც, ერთ-ერთი კომპანიის წარმომადგენელი თბილისში რეკავს საბაჟოზე ტვირთის გატარების თხოვნით და ღიად სთხოვენ ქრთამის სახით 1000 დოლარის გადახდას. „თუ კარგოს ტვირთია, მაშინ 1200 დოლარი“, – ისმის ჩანაწერში.
დეპუტატმა კიდევ უფრო რადიკალური პოსტი გამოაქვეყნა საკუთარი ფეისბუქის გვერდზე და საქართველოს საბაჟოების მებაჟეებს „ბანდიტები“ უწოდა.
„საქართველოს გავლით რუსეთსა და ყაზახეთში მიმავალ თურქული ტრაილერების მძღოლებს ქართველი საბაჟო ბანდები თანხას სძალავენ. რადგან 1000-2000 დოლარის გადახდის მსურველი არავინაა, მათ ისე ექცევიან, როგორც კონტრაბანდისტებს და სთხოვენ დაცალონ ტვირთები შემოწმების მიზნით. ამ გზით ისინი ატარებენ დაშინების პოლიტიკას. ჩვენ მოვუწოდებთ ხელისუფლების წარმომადგენლებს, ყურადღება მიაქციონ თურქ გადამზიდავებს “, – წერს თურქეთის მილი მეჯლისის დეპუტატი, აჰმეთ კაია.
„ბათუმელები“ კომენტარისთვის დაუკავშირდა საქართველოს შემოსავლების სამსახურს. ვკითხეთ ფლობდნენ თუ არა ინფორმაციას შესაძლო ქრთამის აღებაზე.
ასევე დავინტერესდით, ხომ არ არის მოკვლევა ან გამოძიება დაწყებული.
შემოსავლების სამსახურიდან პასუხს ამ დრომდე ველოდებით და მიღების შემთხვევაში აქვე შემოგთავაზებთ.
_____
ორი თვის წინ „ბათუმელებმა“ გადამზიდავების პრობლემების თემაზე ჟურნალისტური გამოძიება გამოაქვეყნა. მაშინ საქართველოში მოქმედი გადამზიდავი კომპანიების წარმომადგენლები ამბობდნენ, რომ მათ ტვირთებს გაფორმების ეკონომიკურ ზონაში [გეზ] ხელოვნურად აფერხებდა შემოსავლების სამსახური.
გადამზიდავები ყვებოდნენ, რომ სარფის საბაჟოზე ტვირთების გასატარებლად სოლიდურ თანხას სძალავდნენ.
ბათუმიდან ქუთაისის ინფექციურ საავადმყოფოში კორონავირუსით დაინფიცირებული ქალი გადაიყვანეს.
აჭარის ჯანდაცვის სამინისტროს პრესსამსახურის ინფორმაციით, ქალს თურქეთში მოგზაურობის ისტორია აქვს და იგი კარანტინში იმყოფებოდა.
„პირი ბათუმში შემოვიდა, ერთი დღე იყო კარანტინში, აღენიშნებოდა სიმპტომები, გადმოიყვანეს ცხელების ცენტრში, ანალიზის პირველი პასუხი იყო საეჭვო, გადაამოწმეს ანალიზის პასუხი ხელახლა ქუთაისში და რადგან ქალი არ არის აჭარის მკვიდრი, მისივე სურვილით, გადაიყვანეს ქუთაისში. იგი კარანტინში იმყოფებოდა და კონტაქტი არავისთან ჰქონია,“ – გვითხრეს სამინისტროში.
კითხვაზე, რატომ გადაიყვანეს პაციენტი ქუთაისში და ხომ არ უკავშირდება ეს ტურისტულ სეზონზე აჭარის ე.წ. მწვანე ზონად შენარჩუნების მცდელობას, სამინისტროში გვითხრეს, რომ ასე არ არის, გადაყვანა ამ შემთხვევაში მოხდა პაციენტის სურვილით, რეგიონში კი არის კლინიკა, ცხელების ცენტრები და ქოვიდის მართვის გამოცდილება.
საქართველოს კულტურული მარშრუტებისთვის შეიქმნა პირველი მობილური უფასო აპლიკაცია Cultural Routes Georgia, რომელიც ხელმისაწვდომია როგორც Android, ისე iOS პლატფორმებისთვის.
აპლიკაციაზე დატანილია ევროპის საბჭოსა და კულტურის სამინისტროს მიერ სერტიფიცირებული მარშრუტები.
ევროპული მარშრუტები:
[checklist]
ღვინის მარშრუტი
ებრაული მემკვიდრეობის ევროპული მარშრუტი
პრეისტორიული კლდის ხელოვნების ევროპული მარშრუტი
ისტორიული თერმული ქალაქების ევროპული მარშრუტი
[/checklist]
ლოკალური მარშრუტები:
[checklist]
ალექსანდრე დიუმას კვალდაკვალ
გერმანული დასახლებები საქართველოში
[/checklist]
ახალი სერტიფიცირებული მარშრუტები:
[checklist]
დედაქალაქიდან დედაქალაქამდე
წმინდა ანდრია პირველწოდებულის გზა
[/checklist]
ოფიციალური ინფორმაციით, ამ მარშრუტებს უახლოეს პერიოდში ორი ახალი სერტიფიცირებული მარშრუტი დაემატება.
„მარშრუტების მიზანია ევროპულ ღირებულებებსა და ფუნდამენტურ პრინციპებზე დაყრდნობით შექმნას და ხელი შეუწყოს ადგილობრივი და საერთაშორისო კულტურული მარშრუტების განვითარებას, საქართველოს ინტეგრირებას ტრანსნაციონალურ მარშრუტებში.
ლოკალური კულტურული მარშრუტები, 2019 წლიდან, სამინისტროსთან არსებული „კულტურული მარშრუტების სტრატეგიული განვითარებისა და სერტიფიცირების საბჭოს“ მიერ კონკურსის წესით ვლინდება და მისი მიზანია საქართველოს მრავალფეროვანი კულტურის წარმოჩენა,“- ნათქვამია განათლებისა და კულტურის სამინისტროს მიერ გავრცელებულ ინფორმაციაში.
ამავე წყაროს ცნობით, ევროპის საბჭოს კულტურული მარშრუტების პროგრამა მოიცავს 38 სერტიფიცირებულ მარშრუტს, რომლებიც კვეთს 57 ქვეყანასა და 1500-ზე მეტ ქალაქს.
საქართველო „ევროპის საბჭოს კულტურული მარშრუტების გაფართოებული წილობრივი შეთანხმების“ 27-ე წევრი სახელმწიფო 2016 წელს გახდა.
ბათუმის მუნიციპალური ინსპექციის მიერ მოწოდებული ინფორმაციით, ბათუმში მუნიციპალური ავტობუსები 32 000-ჯერ, სამარშრუტო მიკროავტობუსები კი 25 000-ჯერ შეამოწმეს. ამ შემოწმების შედეგად 2200 მოქალაქეს პირბადის გარეშე მგზავრობისათვის საზოგადოებრივი ტრანსპორტი დაატოვებინეს, 110 პირი კი უბილეთო მგზავრობისთვის დააჯარიმეს.
Covid19-ის ის პრევენციის კონტროლი ბათუმში მუნიციპალურ ინსპექციას ევალება. კონტროლს სხვადასხვა მიმართულებით ინსპექციის სხვადასხვა სამსახურის და განყოფილების თანამშროლები ახორციელებენ. წესების შესაბამისად, ტრანსპორტში მოქალაქე პირბადის გარეშე არ უნდა ავიდეს.
პირბადის ტარების წესის დარღვევისთვის ფიზიკური პირი 20 ლარით ჯარიმდება, იურიდიული პირი კი – 500 ლარით.
ამასთან, საზოგადოებრივი ტრანსპორტით, მათ შორის, მეტროთი გადაადგილებისას, პირბადის ტარების წესის დარღვევა გამოიწვევს მგზავრის ან მძღოლის დაჯარიმებას 20 ლარით; იგივე წესი ვრცელდება ტაქსებზეც (M1 კატეგორიაზე).
თუმცა სანქციის დაწესების მიუხედავად დარღვევებს ადგილი მაინც აქვს.
რაც შეეხება სხვა მიმართულებებს, ინსპექციის ინფორმაციით, ბათუმში შეამოწმეს 207 სასტუმრო და 260 ესთეტიკური ცენტრი ჯანმოს მიერ მოწოდებული COVID19-ის რეკომენდაციების შესაბამისად.
ბათუმში, მამია ვარშანიძის ქუჩაზე გაჩერებულ სატვირთო მანქანას ცეცხლი გაუჩნდა. „ბათუმელების“ ინფორმაციით, ამ დროისთვის ხანძარი ლოკალიზებულია და არავინ დაშავებულა.
ადგილზე მობილიზებული იყო სახანძრო სამაშველო სამსახური და პოლიცია.
მთავარი ფოტო: კადრი TV 25-ის მიერ გავრცელებული ვიდეომასალიდან
საქართველოში, 19 ივნისის მონაცემით, ბოლო 24 საათში კორონავირუსის 2 ახალი შემთხვევა გამოვლინდა, გამოჯანმრთელდა კიდევ 2 პაციენტი. კოვიდცენტრებში ამჟამად 140 პაციენტი მკურნალობს.
თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ორი ახალი შემთხვევიდან ერთი ინფიცირებულის კონტაქტია, ერთი კი – შემოტანილი შემთხვევა.
სულ საქართველოში კორონავირუსის 895 შემთხვევა დადასტურდა, აქედან 741 გამოჯანმრთელდა, ხოლო 14 გარდაიცვალა.
______________________
ფოტოზე: ლუგარის საზოგადოებრივი ჯანმრთელობის კვლევითი ცენტრის სამედიცინო პერსონალი. წყარო: nplg.gov.ge
Google პერიოდულად აახლებს მსოფლიოს სატელიტურ რუკებს. ბათუმის ბოლო რუკა Google -მა 2020 წლის 18 ივნისს განაახლა, პირველი კი 2004 წელს გადაიღო. იხილეთ, როგორ იცვლებოდა ქალაქი წლების განმავლობაში Google Map-ის მონაცემებით.
შპს „რივიერა ბათუმის“ პროექტი ანბანის კოშკის მიმდებარე ტერიტორიაზე ხუთი ცათამბჯენის მშენებლობას ითვალისწინებს. მათ შორის ერთის მშენებლობაზე ნებართვა უკვე გაცემულია.
რა წერია „რივიერა ბათუმის“ კვლევაში და რაც მთავარია – რატომ აპროტესტებს ქალაქის მოსახლეობა 5 კოშკის მშენებლობას – წაიკითხეთ აქ.
გმირთა ხეივანი – ბათუმის გმირთა ხეივნის ირგვლივ, რომელიც ბაგრატიონისა და შერიფ ხიმშიაშვილის ქუჩებს შორის, დაახლოებით 1,5 კმ-ის სიგრძეზეა გაშენებული, წლების განმავლობაში გამწვანებაზე გაცილებით სწრაფად და ინტენსიურად კორპუსები და ბეტონის კონსტრუქციები იზრდება. ვრცლად წაიკითხეთ აქ.
“ლუჟკოვის სახლი” – კომპანია „ალიანს სიტიმ“ ბათუმში, ზღვის პირას, ე.წ. „ლუჟკოვის სახლის” დემონტაჟი 2019 წელს დაიწყო. ბათუმში, რუსთაველის ქუჩის გაგრძელებაზე, ე.წ. „ლუჟკოვის სახლის“ ნაცვლად, კომპანია „ალიანს სიტი“ სამი ცათამბჯენის აშენებას გეგმავს. ვრცლად ამ თემაზე წაიკითხეთ – აქ.
გარემოს დაცვის მსოფლიო ფონდის [WWF] ინფორმაციით, კავკასიის სამუხის ველზე, ქურციკების, [იგივე ჯეირანი] ნაშიერები, ლიკლიკები გამოჩნდნენ. ორგანიზაციის ინფორმაციით, საქართველოს ტერიტორიაზე ქურციკების მეექვსე თაობა დაიბადა, რაც წინგადადგმული ნაბიჯია საქართველოში ამ სახეობის სრულფასოვანი პოპულაციის აღდგენისათვის.
ქურციკი წითელ წიგნშია შეტანილი. განსაკუთრებით მკვეთრად შემცირდა მათი გავრცელება XX საუკუნის დასაწყისში ტერიტორიების სასოფლო-სამეურნეო მიზნით ათვისების გამო.
ფოტო: WWF
ქურციკის ბუნებრივ ადგილსამყოფელზე ცხვრის ფარები ძოვენ მასიურად, რამაც მათი რაოდენობის შემცირება განაპირობა გარკვეულწილად.
ბუნების დაცვის მსოფლიო ფონდი – WWF Georgia ქურციკების აღდგენის პროექტს ახორციელებს. ფონდში მიიჩნევენ, რომ შედეგები იმედის მომცემია, მაგრამ საჭიროა გაგრძელდეს მუშაობა, მონიტორინგი და მოსახლეობის ცნობიერების ამაღლება, რომ ხელშემშლელმა ფაქტორებმა სახეობის გამრავლებას არ შეუშალოს ხელი.
რატომ არ დასვეს დეპუტატებმა კითხვა აჭარის ტელევიზიიდან ჟურნალისტების გათავისუფლებაზე, რომლებმაც სასამართლოს მიმართეს და პროკურატურასაც იმ მოტივით, რომ ჟურნალისტებს დევნიან? – ვკითხეთ უმაღლესი საბჭოს ფრაქცია „ქართული ოცნება – მაჟორიტარების“ თავმჯდომარეს, ილია ვერძაძეს. იგი წლების განმავლობაში პროფესიული კავშირების აჭარის ორგანიზაციის ხელმძღვანელი იყო.
დღეს, 18 ივნისს, აჭარის ტელევიზიის მრჩეველთა საბჭოს თავმჯდომარემ უმაღლეს საბჭოს ანგარიში ჩააბარა.
„მე მუდმივად ადამიანის უფლებებს ვიცავ. ვინ გითხრათ, რომ არა მაქვს კითხვები? შენ რომ გინდა, ისეთი რეაქცია უნდა მქონდეს? მე მაქვს ისეთი რეაქცია, როგორიც მაქვს,“ – გვიპასუხა დეპუტატმა. ილია ვერძაძეს ვთხოვეთ, ეთქვა საკუთარი პოზიციის შესახებ, რადგან ანგარიშის მოსმენის დროს მას არ დაუსვამს კითხვა აჭარის ტელევიზიიდან თანამშრომლების გაშვებაზე, რასაც „რეპორტიორები საზღვრებს გარეშე“ პოლიტიკურ ზეწოლად აფასებს.
„თანამშრომლების დანიშვნასა და გათავისუფლებაზე პრეროგატივა ვისაც აქვს, ის წყვეტს ამ საკითხებს,“ – გვითხრა ილია ვერძაძემ. ვიდრე იგი სხდომათა დარბაზს დაუბრუნდებოდა, ვუთხარით, რომ ამის შესახებ საზოგადოებამაც იცის, ხოლო კითხვა უპასუხოდ რჩება: რატომ არ სვამს კითხვას პროფკავშირების ყოფილი ხელმძღვანელი ადამიანების სამსახურიდან გაშვებაზე.
„დასმულია ეს კითხვები… ჩემგან რატომ უნდა მოისმინოთ? პრობლემა იცით რა არის? ისე თუ არ ვფიქრობ, როგორც თქვენ… ჩემი პოზიცია არის ის, რომ ადამიანის უფლებები უნდა იყოს დაცული კანონის შესაბამისად,“ – აღნიშნა ილია ვერძაძემ. მან სხდომათა დარბაზში დაბრუნების მიზეზით აღარ უპასუხა კიდევ ერთ კითხვას: „თქვენი აზრით, არის დაცული ჟურნალისტების უფლებები, რომლებიც აჭარის ტელევიზიის რედაქციას ჩამოაშორეს?“
აჭარის მაღალმთიან მუნიციპალიტეტებში სეტყვამ 21 სოფელი დააზარალა. დაახლოებით 200-ზე მეტ ოჯახს, სასოფლო-სამეურნეო ნარგავები და ნათესები გაუნადგურა. ხულოში, გუშინ და დღეს, 3 ადმინისტრაციული ერთეულის 15 სოფელი დაისეტყვა.
„ბათუმელებს“ ხულოს მუნიციპალიტეტის სოფელ მთისუბნიდან დაუკავშირდა ნანა შაინიძე, რომელმაც თქვა, რომ სეტყვისგან მიყენებული ზარალი ძალიან დიდია. „ყველაფერი განადგურებულია. ყურადღებას არავინ გვაქცევს. როცა თხილვანის სეტყვის ვიდეო ვნახე თქვენს გამოცემაში, გადავწყვიტე, რომ მომეწერა. იქნება ჩვენთან არსებული მდგომარეობაც ნახონ და დაგვეხმარონ“, – ამბობს ნანა შაინიძე.
„ბათუმელები“ ხულოს მერიასაც დაუკავშირდა. როგორც ხულოს მერი, ვახტანგ ბერიძე ამბობს, შექმნილია კომისია, რომელიც სეტყვისგან გამოწვეულ ზარალს დაადგენს.
„ზუსტად რამდენია ზარალი, ვერ გეტყვით, სეტყვამ ზოგიერთ ოჯახს მთლიანად გაუნადგურა ნარგავები, ზოგან კი ნაწილობრივ დაზიანდა. ამიტომ, კომისია დაახლოებით 2-3 დღე იმუშავებს და შემდეგ განვიხილავთ კომპენსაციის საკითხს“, – ამბობს ვახტანგ ბერიძე.
სეტყვამ 15 ივნისს 6 სოფელი დააზარალა შუახევსა და ქედაშიც. ქედის მერის ინფორმაციით, დანდალოში, ხარაულაში, ტაკიძეებსა და ჯალაბაშვილებში მოსავალი 130-მდე ოჯახს გაუნადგურდა.
შუახევის მუნიციპალიტეტში კი ორ სოფელში – ტაკიძეებსა და ცივაძეებში დაახლოებით 60 ოჯახს მიაყენა სეტყვამ ზიანი.
18 მარტის მონაცემებით, აჭარაში კოვიდუსაფრთხოებაზე შემოწმება გაიარა 39 სასტუმრომ. აჭარაში სულ 393 სასტუმროა. ჩვენ ვესაუბრეთ ბათუმში, ქობულეთსა და ხელვაჩაურში რამდენიმე სასტუმროს წარმომადგენელს, ვინც უკვე გაიარა შემოწმება. მათი განცხადებით, დამატებითი მოთხოვნები სასტუმროს ხარჯებს აძვირებს, თუმცა შესრულებადია.
ბათუმში, სასტუმრო „ლონდონის“ მენეჯერი მარიამ შაქარიშვილი ამბობს, რომ დადგენილი რეკომენდაციები შესრულებადია, თუმცა, თუ არ გაიხსნება საჰაერო სივრცე და ვერ მიიღებენ ვიზიტორებს, ეს ძალიან რთულად აისახება სასტუმროს შემოსავლებზე.
„ბევრი დეტალია, რაც ახალია სასტუმროებისთვის, მათ შორის სტიკერების განთავსება, დეზობარიერები, დამცავი მინები, ხსნარები და ა.შ. თუმცა ეს ყველაფერი შესრულებადია. უნდა ვაწარმოოთ სტუმრის ჟურნალები, პერსონალი უნდა დავატრენინგოთ, ამ ყველაფრის აღრიცხვა, რა თქმა უნდა, რუტინას ზრდის, მაგრამ მთავარია ვიზიტორები შემოვიდნენ“, – ამბობს მარიამ შაქარიშვილი.
სასტუმრო საერთაშორისო ვიზიტორებს იღებდა უკრაინიდან, ყაზახეთიდან, ბალტიისპირეთის ქვეყნებიდან და პოლონეთიდან. „თუ ამ ქვეყნებში აღდგენა მიმოსვლა, ძალიან კარგი იქნება და ცოტათი მაინც დაეხმარება ტურიზმს“.
სასტუმრო „კიპარისი“ ქობულეთში მდებარეობს. სასტუმროს წარმომადგენელი თამარ ღვინიაშვილიც მიიჩნევს, რომ რეკომენდაციები, რომელიც ჯანდაცვის სამინისტრომ დააწესა, შესრულებადია, თუმცა სასტუმროს ხარჯებს გარკვეულწილად ზრდის.
„ვიზიტორების რიგი არ გვადგას, მაგრამ თუ იქნება სეზონი აქტიური, სტუმრების მიღება საკმაოდ გართულდება, რადგან გაიზარდა სტუმრის ნომრიდან გასვლის და ახალი ვიზიტორის შემოსვლას შორის საათები. თუკი აქამდე ერთი საათი ან საათ-ნახევარი საკმარისი იყო, ახლა ეს დრო 4 საათამდე იზრდება. ამიტომ, დიდი შუალედების გამო, თითქმის მთელი დღე იკარგება“, – ამბობს თამარ ღვინიაშვილი.
მისი თქმით, აუცილებელი მოთხოვნაა დეზობარიერი, დაიცავი დისტანცია და ა.შ. სტიკერების განთავსება. ასევე ის წესები, რომელიც უნდა დაიცვან ვიზიტორებმა სასტუმროს სხვადასხვა სივრცეში ყოფნისას, იქნება ეს საერთო სარგებლობის სველი წერტილები, აუზები თუ სხვა.
რეკომენდაციის მიხედვით, სასადილო ოთახში, ერთ მაგიდასთან მხოლოდ 6 ადამიანი უნდა იყოს განთავსებული. „მეშვიდე პირის ყოფნა, გამონაკლისის სახით იმ შემთხვევაშია დასაშვები, თუ პატარა ბავშვია“, – ამბობს ღვინიაშვილი.
სასტუმროში ამ დროისთვის მხოლოდ რამდენიმე ადგილობრივი ვიზიტორი იმყოფება. როგორც ღვინიაშვილი ამბობს, მათი ძირითადი სტუმრები აქამდე რუსი ტურისტები იყვნენ.
„ამ დროს საკმაოდ აქტიური პერიოდი გვქონდა წინა წლებში, ახლა მხოლოდ ორი ჯავშანი გვაქვს ესტონეთიდან ივლისისთვის“, – ამბობს ღვინიაშვილი.
სასტუმრო „მონტანა“ სარფში მდებარეობს. როგორც სასტუმროს დირექტორი ირაკლი ბასილაძე ამბობს, ძირითადად რუს ტურისტებს მასპინძლობდნენ, პანდემიის გამო კი, ახალ ბაზრებზე მას შემდეგ დაიწყებენ მუშაობას, როცა დაზუსტებით იქნება ცნობილი, რომელ ქვეყნებთან ექნება საქართველოს მიმოსვლა.
„ამჟამად რამდენიმე ადგილობრივი ვიზიტორი გვყავს სასტუმროში, ფასები დაახლოებით 20-30 პროცენტით შევამცირეთ, რადგან ადგილობრივი ვიზიტორი ნაკლებად შემოსავლიანია, თუმცა საბოლოოდ რა ფასი იქნება, ჯერ ვერ ვიტყვით. ვიზიტორმა ალბათ ყოველთვის უნდა გადაამოწმოს ფასი დაჯავშნამდე“, – ამბობს ირაკლი ბასილაძე.
მისი თქმით, რეკომენდაციები შესრულებადია, თუმცა ახალი მოთხოვნები მაინც ზრდის სასტუმროს ხარჯებს.
„ვიზიტორს სასტუმროში შემოსვლისას მოეთხოვება პირბადეს ტარება, თუ არ აქვს, ადგილზე ვაწვდით, ცენტრალურ მისაღებში ხელებს დაიმუშავებს ანტიბაქტერიული ხსნარით. პროტოკოლის მიხედვით, ვიზიტორს ეზოშიც უნდა ეკეთოს პირბადე“, – ამბობს ბასილაძე.
ახალი კორონავირუსით გამოწვეული ინფექციის თავიდან აცილების მიზნით, ჯანდაცვის სამინისტრომ შეიმუშავა გარკვეული რეკომენდაციები სასტუმროებია და სხვა ტურისტული ობიექტებისთვის. იმ შემთხვევაში, თუკი ტურისტული ობიექტები ვერ დააკმაყოფილებენ ამ რეკომენდაციებს, მათ ვიზიტორების მიღების უფლება არ ექნებათ.
რეკომენდაცია ითვალისწინებს, რომ სასტუმროში შესვლისას ვიზიტორმა აუცილებლად უნდა გაიაროს დეზობარიერი, თერმოსკრინინგი, უნდა ეკეთოს პირბადე და დაიმუშაოს ხელები ანტიბაქტერიული ხსნარით.
სასტუმროს პერსონალი კი აღჭურვილი უნდა იყოს დამცავი ფარით, ხალათით, ხელთათმანით და თმის დამცავი.
განსაკუთრებული მოთხოვნები: ვინაიდან სასტუმროში ვიზიტორებს პირველადი კონტაქტი აქვთ სასტუმროს მიმღების თანამშრომლებთან, თითოეული დასაქმებული უნდა აღიჭურვოს სამედიცინო ნიღბით, ასევე მიმღების მაგიდასთან დამატებით დამონტაჟდეს დროებით გამჭვირვალე ტიპის ბარიერი, რათა მაქსიმალურად იქნას აცილებული წვეთოვანი გზით ინფიცირების რისკი.
დასუფთავებაზე პასუხისმგებელმა პერსონალმა თავი უნდა აარიდოს მჭიდრო კონტაქტს სტუმრებთან. მათ უნდა ეკეთოთ ხელთათმანი დალაგების დროს, მოხსნის შემდეგ ჩაიტარონ ხელის ჰიგიენა (წყლითა და საპნით დაბანა, ან დამუშავება სპირტის შემცველი ხელის სადეზინფექციო ხსნარით.
თვალსაჩინო ადგილას უნდა იყოს განთავსებული ინფორმაცია COVID 19-ის პრევენციული ღონისძიებების შესახებ. შესაძლებელია ვიდეო, აუდიო ტექნიკის გამოყენებაც.
საერთო სივრცეში დღეში სამჯერ უნდა დამუშავდეს ზედაპირები სადეზინფექციო საშუალებებით.
დაუშვებელია ორ სართულიანი საწოლების გამოყენება. საერთო გამოყენების სველი წერტილებით სარგებლობისას, ყოველი გამოყენების შემდგომ საჭიროა მისი დეზინფექცია.
კოვიდ 19-ისგან დასაცავი რეკომენდაციები სრული ჩამონათვალი, როგორც ტურისტულ ობიექტებს, ასევე დაინტერესებულ პირებს, შეუძლიათ ნახონ ჯანდაცვის სამინისტროს ვებგვერდზე.
როგორც აჭარის ტურიზმის დეპარტამენტში „ბათუმელებს“ უთხრეს, სასტუმროების მონიტორინგი გრძელდება და იმ შემთხვევაში, თუკი ტურისტული ობიექტი ამ რეკომენდაციის დაკმაყოფილების გარეშე მიიღებს ვიზიტორს, დაჯარიმდება.
ჯანდაცვის სამინისტროს გარდა, მონიტორინგში ჩართულია ბათუმის მუნიციპალური ინსპექციაც. მათი ინფორმაციით, 5 ივნისიდან დღემდე ბათუმში 207 ტურისტული ობიექტი შეამოწმეს. „სულ შესამოწმებელია 700-მდე ობიექტი“.
„თხოვნა იქნება, რომ ამ ადამიანების ანგარიში არ დაიჯეროთ და თავად გადაამოწმოთ.. 2019 წელს რა ხდებოდა, არავის აინტერესებს, უკვე აღარ დარჩა სივრცე კრიტიკული კითხვებისთვის,” – ანგარიშის მოსმენის დაწყებამდე ასე მიმართა აჭარის უმაღლეს საბჭოს აჭარის ტელევიზიიდან გაშვებულმა ერთ-ერთმა ჟურნალისტმა, ალტერნატიული პროფკავშირის ხელმძღვანელმა მალხაზ რეხვიაშვილმა და სხდომა დაწყებამდე დატოვა.
დღეს, 18 ივნისს, აჭარის უმაღლეს საბჭოს აჭარის ტელევიზიის მრჩეველთა საბჭოს თავმჯდომარემ გიგა ჩხარტიშვილმა ანგარიში ჩააბარა.
გიგა ჩხარტიშვილმა აჭარის ტელევიზიის 2019 წლის მონაცემები მიმოიხილა. ტელევიზიის მრჩეველთა საბჭოს ინფორმაციით, წინა მენეჯმენტის დროს მაყურებლის რაოდენობამ იკლო, ახლა კი, ეს მაჩვენებელი მზარდია. მრჩეველთა საბჭოს თავმჯდომარე საერთოდ არ შეხებია ტელევიზიაში დღეს არსებულ პრობლემებს – სასამართლოში შეტანილ 10-ზე მეტ სარჩელს, ჟურნალისტების დევნას და კრიტიკულად განწყობილი ჟურნალისტების ჩამოშორებას, რაზეც საერთაშორისო ორგანიზაციებიც საუბრობენ.
„ასეთი სუსტი მოხსენება აქამდე არ მომისმენია, თქვენ ფორმალურ დონეზეც კი არ ახსენეთ პრობლემა… თქვენ გახდით საბჭოს თავმჯდომარე მას შემდეგ, როცა წინა დირექტორი გადააყენეთ და წინა დირექტორთან პრეტენზია გქონდათ პრიორიტეტების შეუსრულებლობაზე. ამ ანგარიშში საერთოდ არ ახსენეთ პრიორიტეტი…“ – თქვა ასმათ დიასამიძემ. ის „ნაციონალურ მოძრაობას” წარმოადგენს აჭარის უმაღლეს საბჭოში.
ასმათ დიასამიძეს უმაღლესი საბჭოს თავმჯდომარემ, დავით გაბაიძემ შეაწყვეტინა გამოსვლა.
“ეს თხრობითი წინადადებაა, ქალბატონო ასმათ, კითხვა უნდა დასვათ,” – გაღიმება სცადა დავით გაბაიძემ.
“არა, ძახილის ნიშანია აქ, კითხვა არ იქნება. თქვენ ვერ ასრულებთ თქვენს მოვალეობას,” – გაცხარდა ასმათ დიასამიძე, ტელევიზიის მრჩეველთა საბჭოს თავმჯდომარეს გახედა და იქვე კითხვაც დასვა: “რა არ მოგწონთ ბატონი კოხრეიძის მუშაობაში?”
„ნდობა გამოცხადებულია ავანსად,” – თქვა გიგა ჩხარტიშვილმა. მისი თქმით, ჯერ აჭარის ტელევიზიის დირექტორის შესაფასებლად კონკრეტული პერიოდი არ არის გასული.
ასმათ დიასამიძეს ასევე ჰქონდა კითხვა ჟურნალისტ გიორგი გაბუნიას შესაძლო ლიკვიდაციის თემის გაუშუქებლობაზე.
„ახსნა-განმარტება არის რედაქტორის მიერ დაწერილი, ტექნიკური ხარვეზი იყო,“ – თქვა გიგა ჩხარტიშვილმა.
ტელევიზიისა და რადიოს დირექტორზე, გიორგი კოხრეიძეზე და ტელევიზიაში დღეს არსებული პრობლემების ნაცვლად გიგა ჩხარტიშვილმა არჩია ტელევიზიის წინა დირექტორის – ნათია კაპანაძის კრიტიკა, ასევე – ბრალდებები, მაგალითად, საბიუჯეტო სახსრების არამიზნობრივ ხარჯვაზე, რაც აუდიტის დასკვნით იმპიჩმენტის გამოცხადების დროს არ დასტურდებოდა.
“პრობლემა არ იყო მხოლოდ პრიორიტეტების შეუსრულებლობა, იყო ყურებადობის პრობლემა, საბიუჯეტო სახსრების არამიზნობრივი ხარჯვა…”- გიგა ჩხარტიშვილმა ვრცელი ჩამონათვალი წარმოადგინა და ამ გზით მან მოახერხა არ ეპასუხა მთავარ კითხვაზე – რატომ ვერ სრულდება პრიორიტეტები დღეს?
კითხვა გაუჩნდა დამოუკიდებელი დეპუტატს, მერაბ ბლადაძესაც. მას გიგა ჩხარტიშვილის გამოსვლამ თავისი ბავშვობის წლები გაახსენა, როცა მოწინავე მცელავი გახდა და ერთხელაც კომკავშირის სხდომას დაასწრეს.
„მსგავსი სიტყვები კომკავშირის სხდომაზე ისმოდა… თქვენ რა გააკეთეთ ასეთი, რომ მოსვლისთანავე ხელფასები გაიზარდეთ? ჩვენს ხელფასებს რომ აშუქებთ, ის გვითხარით, თქვენ რაში ხარჯავთ ამხელა ფულს?” – იკითხა დეპუტატმა.
„კომკავშირის სხდომაც დამაბრალა ბატონმა მერაბმა. ვერ გამოგყვებით მაგაში… მე მგონი, საკმაოდ თვითკრიტიკული ვიყავი,”- აღნიშნა გიგა ჩხარტიშვილმა.
“ირონიული სახით ნუ მესაუბრებით, ხალხის რჩეული ვარ მე,”- რეპლიკა ჰქონდა მერაბ ბლადაძესაც.
გიგა ჩხარტიშვილმა განმარტა, რომ საკანონმდებლო ჩარჩოს ფარგლებში მოქმედებდა, როცა მრჩეველთა საბჭოს ხელფასები გაიზარდადა „თანხა რჩებოდა აუთვისებელი“.
ტელევიზიის ფულის ხარჯვაზე სიუჟეტები მოითხოვა დავით ბაციკაძემაც. არც მან დამალა უკმაყოფილება, რომ აჭარის ტელევიზია ამდენ დროს უთმობს უმაღლესი საბჭოს ფულის ხარჯვას.
„აი, ხომ ხედავთ, უმრავლესობაც უკმაყოფილოა,” – შეუმჩნეველი არ დარჩა ბაციკაძის პოზიცია ტელევიზიის მრჩეველთა საბჭოს თავმჯდომარეს.
კითხვები ჰქონდათ უმრავლესობის დეპუტატებს, მაგალითად, ლადო მგალობლიშვილმა იკითხა, რამდენად არსებობს შესაძლებლობა, რომ ტელევიზიის რეიტინგი გაიზარდოს?
მიმდინარე პრობლემებზე აქცენტი უმრავლესობიდან მხოლოდ დეპუტატ ცოტნე ანანიძეს ჰქონდა. იგი დაინტერესდა, რით ხსნის მრჩეველთა საბჭოს თავმჯდომარე საერთაშორისო ორგანიზაციების, მათ შორის, ორგანიზაციის – “რეპორტიორები საზღვრებს გარეშე”, მწვავე და კრიტიკულ შეფასებებს.
„საკითხის შესწავლა მეორე მხარესთან არ მოუხდენიათ… უნდა ეკითხათ ჩემთვისაც,” – თქვა გიგა ჩხარტიშვილმა. პრაქტიკულად მან დეპუტატების დარწმუნება სცადა იმაში, რომ საერთაშორისო და ავტორიტეტულმა ორგანიზაციამ მუშაობა არ იცის და შესწავლის გარეშე აკეთებს განცხადებებს.
დეპუტატებს არ ჩაუთვლიათ საჭიროდ, დამატებითი კითხვები დაესვათ მრჩეველთა საბჭოს თავმჯდომარისთვის.
„თქვენ მიაწოდეთ ინფორმაცია?“ – მხოლოდ ეს იკითხა ცოტნე ანანიძემ.
„შეფასებები უკვე გაკეთებული იყო,“ – მიუგო დეპუტატს ბორდის თავმჯდომარემ.
საბჭოს დღევანდელ სხდომაზე გაისმა ტაშიც. სხდომას ესწრებოდა მოძრაობა -“მე მიყვარს ბათუმის” წევრი, შოთა ცაავა, რომელმაც ირონიის ნიშნად ტაში დავით თედორაძეს დაუკრა. თედორაძე დამოუკიდებელი დეპუტატია და თქვა, რომ ნათია კაპანაძის დირექტორობის შემდეგ “ტელევიზია დადებითისკენ წავიდა”. სიტყვიერი შელაპარაკების შემდეგ შოთა ცაავას დარბაზი დაატოვებინეს.
ბათუმის შემოვლითი ახალი გზის 13-კილომეტრიანი მონაკვეთის მშენებლობა, კონტრაქტით, 2020 წლის აგვისტოში უნდა დასრულებულიყო, თუმცა, ეს ვადა გადაიწევს. საქართველოს საავტომობილო გზების დეპარტამენტში „ბათუმელებს“ სამუშაოების დასრულების კონკრეტული თარიღი ვერ დაუსახელეს.
„გზის მშენებლობის პროცესში გარკვეული შეფერხებები გამოიწვია პანდემიამ და საზღვრების ჩაკეტვამ. ამ დროისთვისაც მობილიზებულია თურქეთის მხარეს საჭირო ტექნიკა და საზღვრის გახსნას ელოდებიან“, – გვითხრეს დეპარტამენტში.
საგანგებო მდგომარეობის პერიოდში საქართველოს მთავრობა აცხადებდა, რომ ინფრასტრუქტურული პროექტები არ შეჩერდებოდა. „სამუშაოები ამ გზაზე არ შეჩერებულა, თუმცა, გარკვეული პრობლემა შექმნა იმან, რომ ინჟინრები, სპეციალისტები ვერ შემოვიდნენ საქართველოში თურქეთიდან, აქ მარტო ტექნიკაზე არ არის საუბარი.“
დეპარტამენტის ინფორმაციით, ამ ეტაპზე, სამშენებლო სამუშაოები 17 ხიდზე და 4 გვირაბზე მიმდინარეობს. პროექტის ფარგლებში აშენდება 2-ზოლიანი ასფალტ-ბეტონის გზა, 19 სახიდე გადასასვლელი, 4 სატრანსპორტო კვანძი, 5 გვირაბი და 57 წყალგამტარი მილი. ახალი შემოვლითი გზა გაივლის: მახინჯაურს [ჩაქვი-მახინჯაურის გვირაბიდან], განთიადს, კაპრეშუმს, სალიბაურს, ფერიას, მახვილაურსა და ხელვაჩაურს [ფრიდონ ხალვაშის გამზირამდე].
პროექტს, აზიის განვითარების ბანკი (ADB) და აზიის ინფრასტრუქტურის საინვესტიციო ბანკი (AIIB) აფინანსებს. პროექტის სახელშეკრულებო ღირებულება 329 630 734 ლარია. გზას თურქული კომპანია „POLAT YOL & MAPA“ აშენებს.
ფრიდონ ხალვაშის გამზირის მიმდებარე ტერიტორიიდან, ბათუმის შემოვლითი გზა უნდა გაგრძელდეს სარფამდე [თურქეთის საზღვრამდე], რისთვისაც იგეგმება ახალი ხიდის აშენება მდინარე ჭოროხზე.
ბათუმი-სარფის ახალი გზის მშენებლობის გამო განსახლების სამოქმედო გეგმის დოკუმენტაციის დამუშავება დაწყებულია. აღნიშნული გზის შენებლობა 2021 წელს უნდა დაიწყოს. ახალი გზის მშენებლობისთვის საჭიროა გარემოზე ზემოქმედების შეფასების [გზშ] მომზადებაც. დეპარტამენტის ინფორმაციით, სამუშაოები ამ კუთხითაც მიმდინარეობს.
ბათუმის შემოვლითი გზის მშენებლობა / ხედი ფერიის მთიდან / 16 ივნისი, 2020 წელიბათუმის შემოვლითი გზის მშენებლობა / ხედი ფერიის მთიდან / 16 ივნისი, 2020 წელი
აჭარის ტელევიზიისა და რადიოს ალტერნატიული პროფკავშირების თავმჯდომარემ მალხაზ რეხვიაშვილმა, დღეს, 18 ივნისს, აჭარის უმაღლეს საბჭოს მიმართა, არ დაიჯერონ აჭარის ტელევიზიისა და რადიოს მრჩეველთა საბჭოს მიერ მომზადებული ანგარიშის.
მრჩეველთა საბჭო დღეს აჭარის უმაღლეს საბჭოში ანგარიშს წარადგენს.
„ამ ადამიანებს არა აქვთ არანაირი მორალური უფლება ილაპარაკონ რა ხდებოდა 2019 წელს. არავის არ აინტერესებს 2019 წელს რა ხდებოდა და ამათ ანგარიშში რა უწერიათ, მნიშვნელოვანია, რომ მაუწყებელში აღარ დარჩა სივრცე კრიტიკული კითხვებისთვის, კრიტიკული სიუჟეტებისთვის და ამაზე მეტყველებს ისიც, რომ გიორგი გაბუნიას შესახებ სიუჟეტი არ გავიდა რამდენიმე დღის წინ მხოლოდ ორ ტელევიზიაში, თქვენ თვითონ გამოიცნობთ, რომელი იყო ეს ორი ტელევიზია, აჭარის ტელევიზია და … გასაგებია, არ ვიტყვი ჩემს კოლეგებზე არაფერ ცუდს.
ჩემი თხოვნა და მოსაზრება იქნება [მესმის, რომ ამის უფლებაც არა მაქვს და მადლობა, რომ მომეცით ამ სიტყვის თქმის უფლება], რომ ამ ადამიანების ანგარიში უბრალოდ არ დაიჯეროთ, ბევრი კითხვაა, რომ ამათი მოქმედებები არის ხელისუფლებასთან კავშირში, თუ ეს ასე არ არის და თუ მართლა ხელისუფლების მიერ არ იმართება ის პროცესი, რაც ხდება აჭარის ტელევიზიაში, მე იმედი მაქვს, რომ უმაღლესი საბჭოს რეაგირება ამას მოჰყვება პოლიტიკურ დონეზე. მინიმუმ 26 ივნისს, 18 საათზე გელოდებით აჭარის ტელევიზიის წინ აქციაზე,“ – განაცხადა მალხაზ რეხვიაშვილმა.
საზოგადოებრივი მაუწყებლის აჭარის ტელევიზიიდან და რადიოდან გადაცემა „ჰეშთეგის“ წამყვანი, ალტერნატიული პროფკავშირის თავმჯდომარე მალხაზ რეხვიაშვილი 11 მაისს გაუშვეს. მისი სამსახურიდან გათავისუფლების მიზეზი 21 აპრილს ფეისბუქზე დაწერილი სტატუსი გახდა, რომლითაც მან თავის კოლეგას, თეონა თურმანიძეს მხარი დაუჭირა. რეხვიაშვილმა აჭარის საზოგადოებრივი მაუწყებლის წინააღმდეგ ბათუმის საქალაქო სასამართლოს მიმართა.
დღესვე, ჟურნალისტებთან საუბრისას, მალხაზ რეხვიაშვილმა აღნიშნა, რომ ანგარიშის მოსმენა უმაღლეს საბჭოში ფორმალობაა.
„უმაღლეს საბჭოს პოლიტიკური რეაგირება უნდა მოეხდინა იმაზე, რა ხდება მაუწყებელში. თუ თვლიან, რომ პრობლემა არ არის არაფერი, გასაგებია, ისედაც გვაქვს ეჭვები, რომ მათი დავალებით ხდება ეს და თუ თვლიან, რომ პრობლემა არის, რაც მაუწყებელში ხდება, მაშინ ამ ანგარიშამდე ამაზე უნდა მოთხოვონ პასუხი. მრჩეველთა საბჭოს პასუხისმგებლობის საკითხი უნდა დადგეს“ – ამბობს მალხაზ რეხვიაშვილი.
აჭარის ტელევიზიისა და რადიოს ამჟამინდელი და ყოფილი თანამშრომლების ნაწილი მიიჩნევს, რომ ტელევიზიის მრჩეველთა საბჭო ძირითადად პროსახელისუფლებო კადრებითაა დაკომპლექტებული და საბჭო მხარს უჭერს მაუწყებლის დირექტორის, გიორგი კოხრეიძის გადაწყვეტილებებს, რომელმაც მოსვლის დღიდან არაერთი ჟურნალისტი და რედაქტორი ჩამოაშორა სარედაქციო პოლიტიკას. მაუწყებლის თანამშრომელთა ნაწილი, მათ შორის ალტერნატიული პროფკავშირიც, მიიჩნევს, რომ აჭარის ტელევიზია და რადიო კარგავს სარედაქციო დამოუკიდებლობას და მიმდინარეობს არხის პროსახელისუფლეობო ტელევიზიად გადაკეთება.
ძლიერი წვიმისა და სეტყვის გამო განვითარებულმა ღვარცოფმა ხულოს მუნიციპალიტეტში, სოფელ ქვედა თხილვანაში, სოფლის გზები დააზიანა. დაისეტყვა ნათესები.
„სეტყვა იყო, ნახევარი საათი. გზები და ნათესები დაზიანდა. ხეობაში არსებული მდინარე ადიდდა. სეტყვას იმდენი ზიანი არ მოუყენებია, რამდენიც ღვარცოფმა, რომელმაც ნათესები წალეკა,” – უთხრა „ბათუმელებს“ ქვედა თხილვანას მცხოვრებმა თეიმურაზ ქამადაძემ.
ძლიერმა სეტყვამ გუშინ, 17 ივნისს, ხულოს მუნიციპალიტეტის ორ სოფელში – ვერნებსა და ფუშრუკაულში დააზიანა ნათესები.
“კონსულმა მითხრა, რომ მიმდინარეობს ექსტრადაციის პროცესი, მაგრამ მე ეს არ მაკმაყოფილებს. მე მჭირდება დოკუმენტი, რაც დაადასტურებს იმას, რომ ექსტრადაციის პროცესი ნამდვილად მიმდინარეობს. მე ასეთი დოკუმენტი არც თურქეთიდან მაქვს, არც საქართველოდან,” – უთხრა ჟურნალისტებს ირინა გორაძემ, რომელიც დღეს, 18 ივნისს, თურქეთის კონსულს შეხვდა.
ლავასოღლის ოჯახის წევრებს ჯერ არ აქვთ გადაწყვეტილი, რა ფორმით გააგრძელებენ საპროტესტო აქციას. თურქეთის საკონსულოსთან 15 ადამიანი ისევ შიმშილობს.
მინდია ლავასოღლის ახლობლებმა თურქეთის კონსულთან შესახვედრად საპროტესტო აქცია 16 ივნისს გამართეს. აქციის მონაწილეებმა დააანონსეს აქცია სახალხო დამცველის ოფისთანაც.
ქურდული სამყაროს წევრობისთვის გასამართლებული მინდია ლავასოღლის მხარდასაჭერად საპროტესტო აქციებს ბათუმში პირველი ივნისიდან მართავენ. აქციის მონაწილეების განცხადებით, დღემდე 15 ადამიანი შიმშილობს, სამ მათგანს კი პირი აქვს ამოკერილი.
ლავასოღლის მხარდასაჭერი აქციის მონაწილეები 10 ივნისიდან თურქეთის საკონსულოსთან გადავიდნენ. მანამდე, 8 ივნისს, გენპროკურატურის წარმომადგენლები ლავასოღლის ოჯახის წევრებსა და ადვოკატებს შეხვდნენ, თუმცა ამ შეხვედრაზე ექსტრადირების შესახებ კონკრეტული არაფერი გარკვეულა. პროკურატურაში ამ დრომდე ოფიციალურად არ განუმარტავთ, რის გამო ვერ ხერხდება მინდია ლავასოღლის ექსტრადირება.
მინდია ლავასოღლის ქურდული სამყაროს წევრობის მუხლით 2018 წელს 12 წლით თავისუფლების აღკვეთა მიუსაჯეს. განაჩენის გამოტანის დროს იგი საქართველოში არ იმყოფებოდა. მინდია ლავასოღლის ოჯახის წევრებს ეჭვი აქვთ, რომ საქართველოს ხელისუფლებას არ სურს მინდია ლავასოღლის ქართულ ციხეში გადმოყვანა. მათივე თქმით, მინდია ლავასოღლი მიწიდან ოთხი სართულის ქვემოთ გადაიყვანეს და მისი ჯანმრთელობის მდგომარეობა განსაკუთრებით დამძიმდა.
„ბათუმის წყლის“ ინფორმაციით, 19 ივნისს, 24:00 საათიდან 20 ივნისის 8:00 საათამდე, ტექნიკური სამუშაოების გამო ბათუმის რამდენიმე ქუჩაზე წყალმომარაგება შეწყდება.
ეს ქუჩებია:
გუდიაშვილის ქუჩა
მალაზონიას ქუჩა
გორდეზიანის ქუჩა
კაჭარავას ქუჩა
გენერალ ასლან აბაშიძის ქუჩა – აბუსერიძის ქუჩიდან ბაგრატიონის ქუჩამდე
ბაგრატიონის ქუჩა – ჯავახიშვილის ქუჩიდან აღმაშენებლის ქუჩამდე
„ბათუმის წყალი“ აბონენტებს აფრთხილებს, რომ წყალმომარაგების მიწოდების აღდგენის შემდეგ, „შესაძლოა სარემონტო სამუშაოების გამო, წყალი იყოს მცირედით ამღვრეული, რაც გამოწვეულია მილზე არსებული ჯანმრთელობისთვის უსაფრთხო მინერალების ჩამორეცხვით. გთხოვთ, წყლის მიწოდების აღდენის შემდეგ, ონკანი გააღეთ და წყალი ადინეთ რამდენიმე წუთით, შესაძლო ამღვრეული წყლის გამოშვების მიზნით”.
გორგილაძის ქუჩაზე იქნება ცალმხრივი მოძრაობა ბარათაშვილიდან ჯავახიშვილის ქუჩამდე მონაკვეთში;
ცალმხრივი მოძრაობა იქნება ჭავჭავაძის ქუჩაზე 26 მაისის ქუჩიდან გრიბოედოვის ქუჩამდე [ავტომანქანები იმოძრავებენ ამავე მიმართულებით];
ცალმხრივი გახდება მოძრაობა პუშკინის ქუჩაზე, ლორიას ქუჩიდან 26 მაისის ქუჩამდე მონაკვეთში, ამავე მიმართულებით;
გრიბოედოვის ქუჩა კი, ცალმხრივი გახდება ჭავჭავაძის ქუჩიდან რუსთაველის ქუჩამდე მონაკვეთში და მოძრაობა მხოლოდ ამ მიმართულებით იქნება;
გრიბოედოვისა და რუსთაველის კვეთაში გაიხსნება გზაგამყოფი და გრიბოედოვის ქუჩიდან ავტომობილებს საშუალება ექნებათ, იმოძრაონ რუსთაველის ქუჩაზე, როგორც მარჯვნივ – დელფინარიუმის მიმართულებით, ასევე მარცხნივ – ახალი ბულვარის მიმართულებით;
გორგასლის ქუჩაზე კი, დღეს არსებული ცალმხრივი მოძრაობა [ბარათაშვილიდან გრიბოედოვის მიმართულებით] მთლიანად შეიცვლება და ამ ქუჩაზე მოძრაობა საპირისპირო მიმართულებით იქნება – გრიბოედოვის ქუჩის მხრიდან ბარათაშვილის მიმართულებით.
სილქნეტი მობილური ქსელის აბონენტებს სთავაზობს 25%-იან ფასდაკლებას სამედიცინო ციფრულ პლატფორმა REDMED-ით მიღებულ მომსახურებაზე, რომელიც მოიცავს დისტანციურ, აუდიო და ვიდეოკონსულტაციებს აპლიკაციის ან ვებგვერდის მეშვეობით. აღნიშნული ფასდაკლება სილქნეტის აბონენტებისთვის REDMED-თან პარტნიორობის ფარგლებში განხორციელდა.
REDMED-ი პირველი ქართული სამედიცინო სერვისების ციფრული პლატფორმაა, რომელიც ამარტივებს სამედიცინო სერვისების მიღების პროცესს. აპლიკაციისა და ვებგვერდის დახმარებით თქვენ შეძლებთ მოძებნოთ, შეარჩიოთ, დაუკავშირდეთ სასურველ ექიმს და მიიღოთ დისტანციური კონსულტაცია აუდიო/ვიდეოზარის სახით.
პროექტის ფარგლებში, სილქნეტის მობილური ქსელის მომხმარებლებს ფასდაკლების გააქტიურება შეუძლიათ კოდით *025#. 17 ივლისის ჩათვლით ფასდაკლების გააქტიურება უფასოა სილქნეტის მობილური ქსელის იმ აბონენტებისთვის, რომლებიც აქტივაციის მომენტში 10, 25 ან 35- ლარიანი პაკეტი „მეტით“ ან კონვერგენტული შეთავაზებით სარგებლობენ.*
სილქნეტის აბონენტები და მათი ოჯახის წევრები შეუზღუდავი რაოდენობით მიიღებენ სამედიცინო დისტანციურ მომსახურებაზე 25% ფასდაკლებას, 20-ზე მეტი სხვადასხვა მიმართულების ექიმის აუდიო და ვიდეოკონსულტაციაზე.
*ყველა სხვა აბონენტისთვის ფასდაკლების 30 დღით გააქტიურების ფასი 5 ლარია.
როგორც ცნობილია, მალე ბათუმს ახალი Drive In კინოთეატრი შეემატება. შპს „სტადიონისა“ და „ახალგაზრდობის რეგიონული ცენტრის“ ერთობლივი პროექტის შესახებ შპს „სტადიონის“ დირექტორი ჯაბა სურმანიძე საუბრობს.
ბატონო ჯაბა, რას წარმოადგენს Drive In კინოთეატრი?
55 მ2 ზზომის ეკრანი ბათუმის ახალ საფეხბურთო სტადიონზე განთავსდება. თანამედროვე ტექნოლოგიის რადიო სიხშირე საშუალებას მისცემს მაყურებლებს 300 მ რადიუსის მანძილზე მიიღონ ხმა და უყურონ პოპულარულ ფილმებს ავტომობილიდან, ასევე გარე გახმოვანების სისტემა გვაძლევს საშუალებას პარკინგ სივრციდან ვუყუროთ ფილმებს.
ვინ არის პროქტის ფინანსური მხარდამჭერი?
პროექტის ფინანსური მხარდამჭერი შპს „სტადიონია“. კომპანიას აქვს საკმარისი რესური მსგავსი ინოვაციური და გამორჩეული პროექტი დააფინანსოს და ახალი სერვისი შესთავაზოს მოქალაქეებს. პროექტზე მუშაობა დაწყებულია და შესაბამისად ძალიან მალე აღნიშნული სერვისი ხელმისაწვდომი იქნება საფეხბურთო სტადიონზე.
რას მოუტანს ქალაქს აღნიშნული პროექტი?
მსგავსი პროექტები დიდი პოპულარობით სარგებლობს მსოფლიოს სხვადასხვა ქვეყანაში. განსაკუთრებით მიმზიდველი და მოთხოვნადია პანდემიის პერიოდში მგავსი სერვისი. ამავდროულად ბათუმს, როგორც ტურისტულ ქალაქს კიდევ ერთი მიზიდულობის ცენტრი გაუჩნდება და არაერთ სტუმარსა თუ ადგილობრივ მოქალაქეს უმასპინძლებს.
უკვე ცნობილია საკონსტიტუციო სასამართლოს თავმჯდომარეობის ორი კანდიდატი – მერაბ ტურავა და ირინე იმერლიშვილი. პლენუმი საბოლოო გადაწყვეტილებას სავარაუდოდ მომავალ კვირაში მიიღებს.
„თეორიული შესაძლებლობა არსებობს უფრო,“ – გვიპასუხა საკონსტიტუციო სასამართლოს მოსამართლე ირინე იმერლიშვილმა, როცა მას ვკითხეთ, რამდენად შეიძლება მიიღოს მოსამართლეების მხარდაჭერა. ხუთმა მოსამართლემ კანდიდატად მერაბ ტურავა დაასახელა. ეს მოსამართლეები არიან: ევა გოცირიძე, მანანა კობახიძე, ხვიჩა კიკილაშვილი, ვასილ როინიშვილი და თავად მერაბ ტურავა.
ირინე იმერლიშვილი კი კანდიდატად დაასახელეს: თეიმურაზ ტუღუშმა, გიორგი კვერეჩხილაძემ, თამაზ ცაბუტაშვილმა.
საკონსტიტუციო სასამართლოს თავმჯდომარის პოზიცია 15 ივნისიდან არის თავისუფალი, როცა ზაზა თავაძეს მოსამართლის უფლებამოსილება ამოეწურა. გუშინ, 17 ივნისს, საკონსტიტუციო სასამართლოს ახალმა მოსამართლემ ვასილ როინიშვილმა ფიცი დადო.
როგორია პოლიტიკური გავლენა, როცა საქმე საკონსტიტუციო სასამართლოს თავმჯდომარის არჩევას ეხება? – ვკითხეთ ირინე იმერლიშვილს.
„ამ თემაზე ჩემი კომენტარი უხერხულია, რადგან გარდა იმისა, რომ ვარ კანდიდატი, ვარ მოსამართლე. ამის ანალიზი და კომენტარები აჯობებს გააკეთონ სხვებმა: პოლიტიკოსებმა და არასამთავრობო ორგანიზაციებმა, რომლებიც საკმაოდ აქტიურად არიან ჩართულები ჩვენს სფეროში… მოსამართლის პირველი რიგის ვალდებულება არის ის, რომ იყოს თავისუფალი პოლიტიკური გავლენებისგან,“ – აღნიშნა ირინე იმერლიშვილმა.
რატომ იყო მნიშვნელოვანი კანდიდატობა, თუკი შანსები მხოლოდ თეორიულია? – მოსამართლე ირინე იმერლიშვილი მიიჩნევს, რომ მნიშვნელოვანია განსხვავებული აზრის დაფიქსირება და „ალტერნატივის შექმნა“.
ირინე იმერლიშვილი მიიჩნევს, რომ მისი უპირატესობა მერაბ ტურავასთან მიმართებით ძირითადად საორგანიზაციო საკითხებში გამოცდილებაა.
„ეს ჩვენი სასამართლოსთვის დამახასიათებელია, ეს სწორია და ეს ძალიან იშვიათია სამწუხაროდ საერთო სასამართლოებში,“ – დასძინა ირინე იმერლიშვილმა.
ყაზახეთის რესპუბლიკის ყოფილ პრეზიდენტს, ნურსულთან ნაზარბაევს, Covid19 დაუდასტურდა. ინფორმაციას ამის შესახებ რუსული მედია ავრცელებს ნაზარბაევის პრესმდივნის ტვიტერზე გამოქვეყნებული განცხადების საფუძველზე.
მედიის ცნობით, ნაზარბაევი ამჟამად თვითიზოლაციაში იმყოფება.
ყაზახეთში კორონავირუსით დაინფიცირდა ყაზახეთის პარლამენტის სპიკერი და ჯანდაცვის მინისტრი, რის შემდეგაც ქვეყნის პრემიერ-მინისტრმა ასკარ მამინმა და რამდენიმე მინისტრმა მიიღეს თვითიზოლაციის გადაწყვეტილება.
ჯონ ჰოპკინსის უნივერსიტეტის მონაცემებით, ყაზახეთში დადასტურებულია კორონავირუსის 15 877 შემთხვევა, გარდაიცვალა 97 ადამიანი.
საქართველოში, 18 ივნისის მონაცემებით, კორონავირუსის 893 შემთხვევაა დადასტურებული, თუმცა ამ შემთხვევებიდან 739 პაციენტი უკვე განიკურნა, 14 პაციენტია გარდაცვლილი კორონავირუსული ინფექციით.
ბოლო 24 საათში საქართველოში კიდევ 8 პაციენტი გამოჯანმრთელდა და ამჟამად ქოვიდცენტრებში 140 პაციენტს მკურნალობენ კორონავირუსზე.
საქართველოში კორონავირუსის პირველი შემთხვევა 26 თებერვალს დადასტურდა. ერთ დღეში ინფიცირების ყველაზე მეტი, 34 შემთხვევა 17 აპრილს გამოვლინდა.
ბოლო მონაცემებით კარანტინის რეჟიმში იმყოფება 2710 ადამიანი, სტაციონარში მეთვალყურეობის ქვეშ – 267.
ამ დროისათვის „მწვანე“, კორონავირუსისგან თავისუფალი ზონაა აჭარა, სადაც კორონავირუსის ახალი შემთხვევა 30 აპრილის შემდეგ არ გამოვლენილა.
ორგანიზაცია „თავისუფალ ჟურნალისტთა სახლი“ 14-დან 18-წლამდე ახალგაზრდებისთვის აცხადებს ფოტოკონკურსს – „გაიცანი ჩემი სოფელი“. ნამუშევრების გადაღება შესაძლებელია მობილური ტელეფონითაც. პროექტის ფარგლებში გამოვლინდება 10 გამარჯვებული, რომლებსაც პრიზებს გადასცემენ.
კონკურსში მონაწილემ 2020 წლის 15 ივლისამდე, ელფოსტაზე: batumiijh@gmail.com უნდა გააგზავნოს ფოტომასალა მოკლე აღწერით და პირადი მონაცემები: სახელი, გვარი, ასაკი, სკოლის დასახელება და საკონტაქტო ნომერი.
„თუ ხარ 14-დან 18-წლამდე ახალგაზრდა, გადაიღე და გაგვაცანი აჭარის სხვადასხვა მუნიციპალიტეტის სოფელი. ფოტოკოლაჟის საშუალებით ასახე და წარმოაჩინე რომელიმე ღირსშესანიშნაობა, თან დაურთე მოკლე აღწერა, მისი ისტორიული მნიშვნელობის შესახებ. ღირსშესანიშნაობად შეიძლება ჩაითვალოს: სოფლის ხიდი ან ჩანჩქერი; უძველესი ციხე, ეკლესია ან მეჩეთი; მუზეუმი ან კულტურული მემკვიდრეობის ძეგლი და სხვა,“ – აღნიშნულია ორგანიზაციის განცხადებაში.
„თავისუფალ ჟურნალისტთა სახლი“ უზრუნველყოფს მოკლე აღწერის თარგმნას ინგლისურ ენაზე.
გამარჯვებულის შერჩევისას ყურადღება მიექცევა ორიგინალურ ნამუშევარს. დაცული უნდა იყოს საავტორო უფლებები. დაუშვებელია სხვისი ნამუშევრის მითვისება.
უპირატესობა მიენიჭება ფოტოებს, რომლებიც წარმოაჩენენ სხვადასხვა სოფელში არსებულ, თუმცა აქამდე უცნობ ღირსშესანიშნაობებს.
ხულოს მუნიციპალიტეტში, კურორტ გოდერძიზე, აჭარის ფინანსთა და ეკონომიკის სამინისტრო მიწის ხუთ ნაკვეთს ყიდის კოტეჯების განთავსების პირობით. სამინისტრომ ელექტრონული აუქციონები უკვე გამოაცხადა. აუქციონის პირობის მიხედვით, მომავალმა მესაკუთრეებმა ამ ნაკვეთებზე კოტეჯები უნდა განათავსონ.
აუქციონზე გასაყიდად გამოტანილი თითოეული ნაკვეთის ფართობი 429 კვ.მ-დან 637 კვ.მ-დეა. გაყიდვის საწყისი ფასიც, შესაბამისად, 83 ათასიდან 123 ათასამდე ლარი.
ხუთივე ნაკვეთზე კოტეჯის ტიპის შენობა-ნაგებობების ექსპლუატაციაში გაშვება/ამოქმედება უნდა განხორციელდეს არაუგვიანეს 2022 წლის 30 ნოემბრისა.
თითოეული ქონების შეძენის შემთხვევაში, მყიდველს ევალება არანაკლებ 300 000 ლარის ინვესტიციის განხორციელება.
აუქციონები დაწყებულია და 2020 წლის 1-ელ ივლისს დასრულდება.
კურორტ გოდერძიზე მიწის ნაკვეთები კოტეჯების დადგმის პირობით აუქციონზე იყიდება/გამყიდველი აჭარის ფინანსთა და ეკონომიკის სამინისტროა / ფოტო აუქციონიდან
გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 18 ივნისის 21 საათიდან 19 ივნისის 21 საათამდე აჭარაში მოსალოდნელია დროგამოშვებით ღრუბლიანობის მომატება, ღამით – ზოგან, დღისით კი უმეტეს რაიონებში იწვიმებს.
იქროლებს ცვალებადი მიმართულების ქარი 10-15 მეტრი წამში.
ამინდის ტემპერატურა სანაპირო და შიდამთიან რაიონებში იქნება:
დღისით: 25 – 30 გრადუსი
ღამით: 15 – 20 გრადუსი
მაღალ მთაში მოსალოდნელია:
დღისით: 15 -20 გრადუსი
ღამით: 10-15 გრადუსი
ზღვის წყლის ტემპერატურა უკვე 22 გრადუსია.
მომდევნო 2 დღეს, 20-22 ივნისს, ზოგან მოსალოდნელია წვიმა.
![რივიერა 2004-2020 [Google Earth]](https://i.ytimg.com/vi/XQSqVaMaG-E/hqdefault.jpg)
!["ლუჟკოვის სახლი" 2004-2020 [Google Earth]](https://i.ytimg.com/vi/673k8E21VSM/hqdefault.jpg)
![ბათუმი 2004-2020 [Google Earth]](https://i.ytimg.com/vi/rFRXZ6Un2e4/hqdefault.jpg)
