Batumelebi | აჭარის ტელევიზიიდან ჟურნალისტი, ალტერნატიული პროფკავშირის თავმჯდომარე გაუშვეს აჭარის ტელევიზიიდან ჟურნალისტი, ალტერნატიული პროფკავშირის თავმჯდომარე გაუშვეს – Batumelebi
RU | GE  

აჭარის ტელევიზიიდან ჟურნალისტი, ალტერნატიული პროფკავშირის თავმჯდომარე გაუშვეს

საზოგადოებრივი მაუწყებლის აჭარის ტელევიზიიდან და რადიოდან გადაცემა „ჰეშთეგის“ წამყვანი, ალტერნატიული პროფკავშირის თავმჯდომარე მალხაზ რეხვიაშვილი გაუშვეს. რეხვიაშვილს გათავისუფლების ბრძანება დღეს, 11 მაისს ჩაბარდა.

როგორც მალხაზ რეხვიაშვილი ამბობს, მისი სამსახურიდან გათავისუფლების მიზეზი 21 აპრილს ფეისბუქზე დაწერილი სტატუსი გახდა, რომლითაც მან თავის კოლეგას, თეონა თურმანიძეს მხარი დაუჭირა.

„21 აპრილის პოსტის გამო გამიშვა, რომელიც თეონა თურმანიძის შესახებ დავწერე, ბრძანება ჩამაბარა დაახლოებით 15 წუთის წინ. დამირეკა, მობრძანდით, წერილია თქვენს სახელზეო. მოვედი და დამახვედრა ბრძანება, რომ 21 აპრილის პოსტი იყო ცილისწამება და მე მოვახდინე მაუწყებლის დისკრედიტაცია და შევულახე რეპუტაცია. ამის გამო მომთხოვეს მე უარყოფის გავრცელება და ეს უარყოფა არ გავავრცელე, გავავრცელე საჯარო წერილი, გემახსოვრებათ, ჰოდა, ამის შემდეგ არ მოვაყოლე რეაგირება გამიშვეს სამსახურიდან დღეს,“ – უთხრა „ბათუმელებს“ მალხაზ რეხვიაშვილმა.

მისივე თქმით, ის აპირებს დირექტორის ბრძანება სასამართლოში გაასაჩივროს. გარდა ამისა, მალხაზ რეხვიაშვილი პროკურატურასაც მიმართავს.

„პროკურატურაში შევიტან საჩივარს, იმიტომ, რომ ეს არ არის შრომითი დავა მხოლოდ, ეს არის სისხლის სამართლის კოდექსის დარღვევა. ამ ბრძანებით მან პროფესიული კავშირის თავმჯდომარე გაუშვა სამსახურიდან, გაუშვა კრიტიკული პოზიციის  გამო ფეისბუქზე. ჩემი ქმედება დაცულია საქართველოს კონსტიტუციით და კანონით პროფესიული კავშირების შესახებ. დირექტორმა დაარღვია ეს კანონები და შესაბამისად მივმართავ პროკურატურას იმიტომ, რომ ასეთ საქციელებზე ნორმალურ დემოკრატიულ ქვეყანაში ციხეში სვამენ და იმედი გვაქვს, რომ ჩვენ ოდნავ დემოკრატია მაინც გვაქვს,“ –  ამბობს მალხაზ რეხვიაშვილი.

როცა ფბ-პოსტის გამო ჟურნალისტს სჯიან და საინფორმაციოს უფროსს არა – აჭარა TV

 

 

ნეტგაზეთის მასალების სხვა გამოცემებში გადაბეჭდვის წესი
ავტორი