Batumelebi

საქართველოს გენერალურმა პროკურატურამ არასრულწლოვნის შრომითი ტრეფიკინგის ფაქტზე პ.მ-ს ბრალდება წარუდგინა.

პროკურატურის ცნობით, ბრალდებული 12 წლის შვილს, 2009 წელს დაბადებულ ნ.მ,-ს 2015 წლიდან 2021 წლის იანვრის ჩათვლით უწევდა შრომით ექსპლუატაციას, იგი შვილს ფიზიკური ძალადობით, ფსიქოლოგიური ზეწოლით აიძულებდა თბილისის ქუჩებში მოწყალების მიღების თხოვნას და სხვადასხვა ნივთის გაყიდვას.

ამასთან, მშობელმა შვილს სავალდებულოდ დაუწესა მისთვის ყოველ დღე 50 ლარის მიტანა, მოთხოვნის შეუსრულებლობის შემთხვევაში კი შვილზე ძალადობდა ფიზიკურად და ფსიქოლოგიურად. პროკურატურის ცნობით, არასრულწლოვნის მიერ აღნიშნული გზით შეგროვებულ თანხას მშობელი თავად ისაკუთრებდა და განკარგავდა.

„პ.მ-მ აღიარა ჩადენილი დანაშაული და თავი დამნაშავედ ცნო წარდგენილ ბრალდებაში,“ – წერს პროკურატურა.

პ.მ-ს ბრალდება წარედგინა საქართველოს სისხლის სამართლის კოდექსის 143-ე სეკუნდა მუხლის მე-2 ნაწილის „ბ“ ქვეპუნქტით და მე-3 ნაწილის „ბ“ და „ე“ ქვეპუნქტებით არასრულწლოვნით ვაჭრობა (ტრეფიკინგი), არასრულწლოვნის გადაბირება ექსპლუატაციის მიზნით, დამნაშავისათვის წინასწარი შეცნობით მასზე მატერიალურად და სხვაგვარად დამოკიდებულის მიმართ, ჩადენილი იძულებით, ჯანმრთელობისათვის საშიში ძალადობით და ასეთი ძალადობის გამოყენების მუქარით, რაც სასჯელის სახით 14-დან 17 წლამდე თავისუფლების აღკვეთას ითვალისწინებს.

ბრალდებულს სხვა სისხლის სამართლის საქმეზე წარმოებული გამოძიების ფარგლებში შეფარდებული აქვს პატიმრობა. შესაბამისად, პროკურატურა თბილისის საქალაქო სასამართლოს კანონით დადგენილ ვადაში მიმართავს შუამდგომლობით წინასასამართლო სხდომის თარიღის განსაზღვრის შესახებ.

ბათუმში, მეჯინისწყლის დასახლებაში, სამი მსუბუქი ავტომანქანა შეეჯახა ერთმანეთს. ავტოსაგზაო შემთხვევის შედეგად არავინ დაშავებულა.

შინაგან საქმეთა სამინისტროს ინფორმაციით, დაწყებულია ადმინისტრაციული საქმისწარმოება.

ქუთაისის ცენტრალურ მოედანზე მდინარე რიონის ხეობაში ნამახვანი ჰესის მშენებლობის წინააღმდეგ საპროტესტო აქცია იმართება. ათასობით ადამიანი ქალაქის  ცენტრალურ მოედანზეა შეკრებილი და მთავრობისგან ითხოვს, შეაჩეროს ჰესის მშენებლობა.

აქციის ერთ-ერთმა ორგანიზატორმა, ვარლამ გოლეთიანმა, აქციაზე სიტყვით გამოსვლისას თქვა, რომ თუკი კომპანია “ენკა რინიუებლზი”, რომელიც რიონის ხეობაში ჰესის მოსამზადებელ სამუშაოებს აწარმოებს, ორი კვირის ვადაში არ დატოვებს რიონის ხეობას, მოსახლეობა ქალაქ ქუთაისის პიკეტირებას მოაწყობს.

„ჩვენი მიზანი არის ის, რომ ხეობა, რომელიც არის ჩვენი, ყველას საკუთრება, ისე გადასცეს ინვესტორს, რომ ხალხმა არაფერი იცოდა. თუ ეს არის მნიშვნელოვანი ქვეყნისთვის, თუ არის მნიშვნელოვანი ენერგოდამოუკიდებლობისათვის, რატომ დაუმალეს ხალხს? “- დასვა კითხვა ვარლამ გოლეთიანმა.

მან საპროტესტო აქციის მონაწილეთა მოთხოვნები გაახმოვანა. ხეობის მცხოვრებლები ითხოვენ შეაჩეროს სამუშაოები და დატოვოს რიონის ხეობა კომპანია “ენკა რინიუებლზმა”.

„ორი კვირის ვადაში დავთქვამთ ფართომასშტაბიან შეკრებას, როგორც  დღეს ვართ. ჩვენ მოვაწყობთ ქალაქის პიკეტირებას. დავაყენებთ მანქანებს და წავალთ სახლებში. ნუ გვაიძულებენ ამას, ვერ გადაგვაჭარბებენ ძალით. იმიტომ, რომ უკვე ბევრი ვართ და უკვე გვაქვს ჩვენ ამის შესაძლებლობა,” – თქვა ვარლამ გოლეთიანმა აქციაზე სიტყვით გამოსვლისას.

ქუთაისში დღეს, 28 თებერვალს, ნამახვან ჰესის წინააღმდეგ საპროტესტო აქცია იმართება. ქუთაისის მთავარ მოედანზე  ათასობით ადამიანია შეკრებილი ჰესის მშენებლობის  გასაპროტესტებლად.

რა შენდება მდინარე რიონის ხეობაში

მდინარე რიონის ხეობაში ნამახვანი ჰესების კასკადის მშენებლობაა დაგეგმილი. ადგილობრივი მოსახლეობის ნაწილი აღნიშნულს ეწინააღმდეგება და 3 თვეზე მეტია ხეობაში აქციებს მართავს.

ამჟამად ხეობაში ჰესის მშენებლობის მოსამზადებელი სამუშაოები მიმდინარეობს. 10 თებერვალს, ადამიანის უფლებების დაცვისა და მონიტორინგის ცენტრზე დაყრდნობით, „ნეტგაზეთი“ წერდა, რომ არსებული დოკუმენტებით, კომპანია „ენკა რინიუებლზს“ 2020 წლის 21 სექტემბრის შემდეგ აღარ აქვს არც მოსამზადებელი და არც მიწის სამუშაოების ჩატარების უფლება. საპირისპიროს ამტკიცებს კომპანია.

აქვს თუ არა შპს “ენკა რინიუებლზს” 2020 წლის 21 სექტემბრიდან, ქვემო ნამახვანის ჰიდროელექტროსადგურზე მოსამზადებელი ტიპისა და მიწის სამუშაოების შესრულების უფლება? – ამ კითხვით და  შესაბამისი დოკუმენტაციის მოწოდების მოთხოვნით „ნეტგაზეთმა“ 10 თებერვალს მიმართა ტექნიკური და სამშენებლო ზედამხედველობის სააგენტოს. 18 დღეა სააგენტოს წარმომადგენელი გვეუბნება, რომ „წერილი უკვე მზადაა და ელოდებიან ხელმძღვანელი პირის მიერ დადასტურებას“.

28 თებერვლის მონაცემებით, „ნეტგაზეთს“ არ მიუღია მოთხოვნილი ინფორმაცია.

ათ დღეზე მეტია ბათუმში ზღვაში დაკარგულ ახალგაზრდა მამაკაცს ეძებენ. დაკარგული კაცის ოჯახის ახლობლები ითხოვენ, რომ სამაშველო სამსახურმა ძებნის მასშტაბები გააფართოოს.

“როგორც გავარკვიეთ, თავდაცვის სამინისტროს ჰყავს ისეთი მაშველები, რომლებსაც შეუძლიათ სიღრმეში ჩასვლა და იქ მოძებნა. ახლა რაც კეთდება, კეთდება ზედაპირულად და ჩვენც ვხედავთ, რომ არ აქვთ სხვა რესურსი,”- ამბობს “ბათუმელებთან” დაკარგული მამაკაცის დეიდაშვილი პაატა სიჭინავა.

საგანგებო სიტუაციების მართვის სამსახურში კი აცხადებენ, რომ დაკარგული მამაკაცის საპოვნელად „ყველაფერს აკეთებენ“.

„17 თებერვლიდან მოყოლებული ყველა შესაძლო საშუალებით ვეძებთ როგორც ნაპირზე, ასევე წყალში. ეძებენ მყვინთავები. ვეძებთ დრონით. უწყვეტ რეჟიმში ვეძებთ  როგორც ამინდი და ზღვა იძლევა საშუალებას. სხვადასხვა დღეს სხვადასხვა რაოდენობის მაშველია ჩართული ძებნის ოპერაციაში,“ – უთხრეს „ბათუმელებს“ საგანგებო სიტუაციების მართვის პრესსამსახურში.

არსებული ინფორმაციით,  ახალგაზრდა კაცი ზღვაში 17 თებერვალს შევიდა და გაუჩინარდა.

საქართველოს პარლამენტის დეპუტატი ანზორ ბოლქვაძე პანდემიის გამო დაწესებული შეზღუდვების ფონზე წვეულებას მართავს. გართობის ამსახველი ვიდეო გუშინ, 27 თებერვალს გვიან ღამით გავრცელდა. წვეულების ერთ-ერთ მონაწილეს ფეისბუქ ლაივი ჰქონდა ჩართული. ვიდეოს ორიგინალი ამჟამად სოციალურ ქსელში აღარ იძებნება, თუმცა მისი ჩაწერა ენმ-ის წევრმა, ხელვაჩაურის რაიონული ორგანიზაციის თავმჯდომარემ, მიშა ბოლქვაძემ მოასწრო და გაავრცელა კიდეც.

“22:10 საათზე ჰქონდა ანზორ ბოლქვაძის ნათესავს ლაივი ჩართული. როცა უკვე კომენდანტის  საათი დაწყებულია. ჩამიგდეს ვიდეო და ჩაწერა მოვასწარი, სანამ წაშლიდნენ. კადრში ყველა არ ჩანს, მაგრამ ჩემი ინფორმაციით 30-მდე ადამიანი იყო ამ წვეულებაზე.

მინდა ვთქვა რომ ის, რაც ხდება, არის ორმაგი სტანდარტი. ჩვენ გვქონდა ფართომასშტაბიანი აქცია დედაქალაქში. ადამიანებს გზაში დაუზიანდათ ავტომობილი და კომენდანტის საათის დაწყებამდე 144-ზე და 112-ზე, სად არ დავრეკეთ, მაგრამ ამ ხალხს არ მისცეს ბათუმში წამოსვლის უფლება. ქუთაისში, დილის ხუთ საათამდე იყვნენ ავტობანზე გაჩერებულები, გაყინეს ხალხი იქ. ეს არის ორმაგი სტანდარტი. პარლამენტის წევრი არღვევს ყველანაირ კანონს, მოქალაქეებს, რომლებსაც ავტომობილი დაუზიანდათ და ამის გამო დააგვიანდათ, არ აძლევ გადაადგილების უფლებას და ტოვებ ქუჩაში,” – ამბობს მიშა ბოლქვაძე “ბათუმელებთან”.

“ბათუმელები” დილიდან ცდილობს ანზორ ბოლქვაძესთან დაკავშირებას. არაერთი ზარის თუ შეტყობინების მიუხედავად, ხელვაჩაური-ქედა-შუახევი-ხულოს მაჟორიტარი დეპუტატი კომენდანტის საათის დროს წვეულების გამართვის შესახებ განმარტებას არ აკეთებს.

განახლება:

სტატიის გამოქვეყნებიდან რამდენიმე საათის შემდეგ ანზორ ბოლქვაძე “ბათუმელებს”  დაუკავშირდა. მან გვითხრა, რომ “ტელეფონი გაუფუჭდა და ამიტომ ვერ შეძლო დილით კომენტარის გაკეთება”. ანზორ ბოლქვაძის მტკიცებით, წვეულების ამსახველი ვიდეო 27 თებერვალს გადაღებული არ არის. “სოციალურ ქსელში ვიღაცამ გასული წლის ვიდეო გამოაქვეყნა,” – გვითხრა მან.

ვიდეო სოციალურ ქსელში მოქალაქე ნანა ვარშანიძემ გამოაქვეყნა. ვიდეოში ისმის ფრაზა “ლაივში ვართ”. ანზორ ბოლქვაძემ დაგვიდასტურა, რომ ნანა ვარშანიძე ნამდვილად მისი ოჯახის ახლობელია. “ბათუმელებმა” ქართული ოცნების დეპუტატს ჰკითხა, მაშინ, როცა ვიდეო ფეისბუქ ლაივში გადაიცემოდა, რის საფუძველზე ამტკიცებს, რომ გასულ წელსაა გადაღებული.

“არ ვიცი მე რა გადიოდა, სად გადიოდა. ჩემს ოჯახში რა გადავიხადე კარგად ვიცი. გასულ წელს ჰქონდა შვილიშვილს დაბადების დღე და გადავუხადე. წელს თავისთავად ვერ გადავუხდიდი,” – გვითხრა ანზორ ბოლქვაძემ.

ვიდეო, რომელიც სოციალურ ქსელში ნანა ვარშანიძემ გაავრცელა, ამჟამად მიუწვდომელია. მართალია, ანზორ ბოლქვაძე ამტკიცებს, რომ ვიდეო გასული წლისაა, მაგრამ ეს ვიდეო ნანა ვარშანიძის ფეისბუქგვერდზე გასული წლის ვიდეოებში არ იძებნება.

ენმ-ს წევრი მიშა ბოლქვაძე, რომელმაც წვეულების ამსახველი ვიდეო 27 თებერვალს გაავრცელა, ამბობს, რომ მოქალაქე ნანა ვარშანიძეს წვეულება ფეისბუქ ლაივში ჰქონდა ჩართული. ძველი ვიდეოს ფეისბუქ ლაივით გამოქვეყნება კი ტექნიკურად შეუძლებელია.

დღეს, 27 თებერვალს, ჟურნალისტებმა სოლიდარობის აქცია გამართეს და ტელეკომპანია “ფორმულას” სპეცეთერში საჯაროდ მოაწერეს ხელი მანიფესტს, რომლითაც ითხოვენ ქვეყანაში დაცული იყოს სიტყვისა და გამოხატვის თავისუფლება. მედია და სამოქალაქო საზოგადოება ითხოვს, ხელისუფლებამ უზრუნველყოს ჟურნალისტებზე თავდასხმების სწრაფი გამოძიება  და შეწყვიტონ მედიის წარმომადგენლების წინააღმდეგ წამოწყებული პოლიტიკურად მოტივირებული საქმეები.

“ბათუმელები” უერთდება მანიფესტის მოთხოვნებს.

მანიფესტის სრული ტექსტი

2020-21 წლებში საქართველოში მედიაგარემო  ძალიან დამძიმდა. გახშირდა ჟურნალისტებზე სიტყვიერი თუ ფიზიკური თავდასხმები. სახელმწიფო არ  უზრუნველყოფს ჟურნალისტების უსაფრთხოებას.

მმართველი პარტიის მაღალჩინოსნები სიძულვილის ენით, აგრესიით და ბოიკოტით პასუხობენ მედიის კრიტიკულ კითხვებს. სახელმწიფო პროპაგანდის მანქანა კრიტიკულ მედიას პოლიტიკურ ოპონენტებად ნათლავს და მათ მიმართ შეუწყნარებლობას უწყობს ხელს.

პოლიტიკურად პოლარიზებულ საზოგადოებაში მედიისადმი ასეთი დამოკიდებულება ახალისებს მორიგ თავდასხმებს. მიმდინარეობს პოლიტიკურად მოტივირებული სამართალწარმოება მედიის წარმომადგენლების წინააღმდეგ. მაუწყებლობის მარეგულირებელი ორგანო პოლიტიზებულია და ცენზურის დაწესებას ცდილობს,

ჩვენ, მედიისა და სამოქალაქო საზოგადოების წარმომადგენლები მოვუწოდებთ გადაწყვეტილების მიმღებ უმაღლესი რანგის პირებს, საქართველოს პრემიერ-მინისტრს, პარლამენტის წევრებს, პარტია „ქართული ოცნების“ თავმჯდომარეს:

• უზრუნველყონ ჟურნალისტებზე თავდასხმების სწრაფი გამოძიება და საზოგადოების ინფორმირება
• შეწყვიტონ მედიის წარმომადგენლების წინააღმდეგ წამოწყებული პოლიტიკურად მოტივირებული საქმეები
• შეწყვიტონ აგრესიული რიტორიკა და სიძულვილის წახალისება მედიის წარმომადგენლების მიმართ
• შეწყვიტონ კრიტიკული მედიის ბოიკოტი და აღადგინონ მედიასთან საქმიანი ურთიერთობის რეჟიმი
• შეწყვიტონ კომუნიკაციების მარეგულირებელი კომისიის გამოყენება პოლიტიკური მიზნით

ვფიქრობთ, ამ მოთხოვნების შესრულება ხელს შეუწყობს საზოგადოებაში პოლარიზაციის შემცირებას, განმუხტავს დაძაბულობას და გააუმჯობესებს მედიაგარემოს.

მანიფესტზე ხელის მოსაწერად გადადით ბმულზე.

სხალთის ეპისკოპოსი სპირიდონი კრიტიკულად განწყობილ ტელევიზიებს “სატანის მიკროფონს” უწოდებს და იმედოვნებს, რომ ისინი “მოექცევიან”.

„საქართველოზე არის შემოტევა, საშინელი. ბოროტი ძალების, ბნელი ძალების. თქვენც ხედავთ ახლა რა ხდება ხომ? ლანძღავენ და აგინებენ ეკლესიას. პატრიარქს აუგად იხსენიებენ. კაცმა, რომელმაც  საქართველო ფეხზე წამოაყენა, პირჯვრის გადაწერა ასწავლა ქართველ ხალხს და დაცემული აღადგინა.

და ეს ტელევიზიები… რომელია მაგი ახლა… მთავარი არხი რომ ჰქვიათ, ტვ პირველი და ფორმულა და კიდევ ზოგიერთები. ეს არის სატანის მიკროფონი რა… ამიტომ ვევედროთ დედა ღვთისმშობელს, რომ მოიქცნენ ისინიც, მოტრიალდნენ,“ – თქვა ეპისკოპოსმა ქადაგებაში, რომელიც 25 თებერვლით თარიღდება. სხალთის ეპისკოპოსი ერთ-ერთ გავლენიან სასულიერო პირად ითვლება.

ეპისკოპოს სპირიდონის განცხადება დროში ემთხვევა ჟურნალისტ ვახო სანაიაზე მომხდარ თავდასხმას. ვახო სანაიას 25 თებერვალს მეუღლის და მცირეწლოვანი შვილის თვალწინ ფიზიკურად გაუსწორდნენ. სანაიას თქმით, მას თავს დაესხნენ მისი პროფესიული საქმიანობის და კრიტიკული განწყობის გამო.

ჟურნალისტზე თავდასხმის შემდეგ საუბარი დაიწყო იმაზე, რომ პოლიტიკურად პოლარიზებულ საზოგადოებაში ხელისუფლების თუ სხვადასხვა ჯგუფის მიერ წარმოებული რიტორიკა ახალისებს ძალადობას. აღსანიშნავია, რომ ბოლო დროს ჟურნალისტებზე არაერთი თავდასხმა მოხდა, თუმცა ჯერ არცერთი ფაქტი არაა გამოძიებული.

„გაგვიშვეს ალბათ დამსახურების გამო,“ – ამბობს „ბათუმელებთან“ მანანა ცინცაძე. ის ერთ-ერთია მათ შორის, ვინც ხელვაჩაურის კულტურის ცენტრში მუშაობდა და უმუშევარი დარჩა. მანანა ცინცაძე თითქმის 30 წელი „აგროვებდა სოფელ-სოფელ მარგალიტებს“, როგორც ამას თავად აღნიშნავს და მის პერიოდში შეიქმნა ანსამბლი „ათძალიც“…  ხელვაჩაურის ხელოვნების და კულტურის ცენტრში ფოლკლორის და კლუბებთან ურთიერთობების განყოფილებები გააუქმეს და მის ნაცვლად ტურიზმის, ასევე მონიტორინგის განყოფილებები შექმნეს.

მონიტორინგის სამსახურის უფროსად დალი ბურჭულაძე დანიშნეს, ის ხელვაჩაურის საოლქო საარჩევნო კომისიის თავმჯდომარის, ომარ ვარშანიძის ცოლია. ამავე სამსახურში დასაქმდა კობა თევზაძეც. ის ხელვაჩაურის ყოფილი გამგებლისა და დღეს მოქმედი უმაღლესი საბჭოს წევრის, ნადიმ ვარშანიძის მძღოლად მუშაობდა.

საკადრო ცვლილებები ხელვაჩაურის კულტურის ცენტრში ახლა არ დაწყებულა [ეს უწყება ხელვაჩაურის მერიის მიერ დაფუძნებული ააიპ-ია]. მანამდე ცენტრის დირექტორად პროფესიით ეკოლოგი ნინო ფაღავა დანიშნეს, მის მოადგილედ კი ყოფილი პოლიციელი – ჯუმბერ ზოიძე.

„თებერვალში აღარ გაგვიგრძელეს ხელშეკრულება, მანამდე ხან 3 თვით გვიფორმებდნენ, ხან – 6 თვით… მე 1991 წლიდან ვმუშაობდი ჯერ კირნათის კლუბში, სამი წლის შემდეგ კი, მეთოდისტად გადმოვედი კულტურის ცენტრში. 25 წელი იქნება, რაც შეიქმნა ფოლკლორის განყოფილება და მე ვხელმძღვანელობდი. მუსიკოსების ოჯახიდან ვარ, ჩემი დაც – ციური ცინცაძე კლუბებთან ურთიერთობის განყოფილებას ხელმძღვანელობდა, ისიც გაუშვეს… არაფერი აუხსნიათ, რატომ გაგვათავისუფლეს. გვითხრეს, რომ ახალი განყოფილებები შეიქმნა – მონიტორინგის და ტურიზმის, ჩვენი შტატები გაუქმდა და იქ გადაიტანეს… სასამართლოში წასვლას არ ვაპირებ, თუ არ ვჭირდები, არც მე მინდა,“ – გვიყვება მანანა ცინცაძე.

მანანა ცინცაძეს მოსაყოლი ბევრი აქვს, როგორ აგროვებდა სოფლებში დავიწყების პირას მისულ სიმღერებს, გამოთქმებს, ისტორიებს, ზეპირსიტყვიერების ნიმუშებს… მანანა ცინცაძე თვეში ხელფასის სახით ხელზე  360 ლარს იღებდა.

მანანა და ციური ცინცაძეებთან ერთად უმუშევარი დარჩა ბიბლიოთეკარი ნანა დიდმანიძე, ასევე პრესსამსახურის უფროსი – ნატალია ფუტკარაძე. შტატი არ გაუქმებულა, მაგრამ სამსახურიდან დაითხოვეს ქორეოგრაფიული ანსამბლის სამხატვრო ხელმძღვანელი – ლაშა მაღრაძე.

„წერილობით განმარტებას ველოდები სამსახურიდან გათავისუფლებაზე. ჩემთვის უცნობია, რატომ გამიშვეს,“ – გვიპასუხა ლაშა მაღრაძემ. მას სხვა დეტალებზე საუბარი ამ ეტაპზე არ სურს. ის არ გამორიცხავს, რომ სასამართლოში იდავოს.

„დირექტორი ყველაფერზე გვპასუხობს, მე არ ვიცი, ზემდგომებმა გადაწყვიტესო. ეს არის პასუხი?  200 ადამიანი გყავდეს თანამშრომელი და ზემდგომებმა გადაწყვიტეს როგორ შეიძლება, ეს რას ნიშნავს?“ – კითხულობს ლამზირა აფაქიძე. ის სამსახურიდან არავის გაუშვია, თუმცა კულტურის ცენტრის სამხატვრო ხელმძღვანელის პოზიცია პროტესტის ნიშნად თავად დატოვა.

„გაუქმდა ისეთი განყოფილებები, რომელიც არ უნდა გაუქმებულიყო. გაუგებარია მიზეზი, რის გამო გააუქმეს ეს შტატები, ან ქორეოგრაფიული ანსამბლის ხელმძღვანელი რატომ გაუშვეს? ის „ერისიონის“ ყოფილი მოცეკვავეა… მეც რომ არ მომადგნენ, გამოვასწარი, ალბათ, არ ვიცი,“ – აღნიშნა „ბათუმელებთან“ ლამზირა აფაქიძემ.

ლამზირა აფაქიძე ამბობს, რომ უხელფასოდ მუშაობდა „ათძალის“ ხელმძღვანელად და ეს პოზიციაც დატოვა. ის აპროტესტებს იმასაც, რომ კულტურის ცენტრის დირექტორი პროფესიით ეკოლოგია, ხოლო მოადგილე ყოფილი პოლიციელი.

„არანაირი კონკურსი არ ჩაუტარებიათ არასდროს,“ – დასძინა ლამზირა აფაქიძემ.

„ბათუმელების“ კითხვებს არ უპასუხა ხელვაჩაურის ხელოვნების და კულტურის ცენტრის ხელმძღვანელმა ნინო ფაღავამ. მას შემდეგ, რაც სატელეფონო საუბრის დროს მან ჩვენი კითხვა მოისმინა, გვითხრა, რომ ჩვენი ხმა არ ესმის. მან ჩვენს სატელეფონო შეტყობინებებიც უპასუხოდ დატოვა.

„ნინო ფაღავა ძალიან კარგად უძღვება თავის სფეროს, როგორც მენეჯერი,“ – ამ ფრაზით ცდილობს კულტურის ცენტრის მენეჯმენტის დაცვას ხელვაჩაურის მერის მოადგილე, არჩილ ბარამიძე. ის მერიაში ხელოვნების მიმართულებას კურირებს და კომენტარი ვთხოვეთ.

არჩილ ბარამიძე განმარტავს, რომ რეორგანიზაცია „მიზნების უკეთესად მიღწევის“ გამო ჩატარდა.

„მონიტორინგი სჭირდება, როცა, მაგალითად, კლუბებში დაგეგმილია რეპეტიციები, ასევე ანსამბლები გრაფიკის მიხედვით შეიკრიბონ, რა ტარდება, რა – არა. ამას სჭირდება მონიტორინგი, ეს ჩვეულებრივი ამბავია,“ – გვიპასუხა არჩილ ბარამიძემ.

კულტურის ცენტრის მონიტორინგის სამსახურის უფროსად დალი-ანა ბურჭულაძე დანიშნეს. ის ხელვაჩაურის საოლქო საარჩევნო კომისიის თავმჯდომარის – ომარ ვარშანიძის ცოლია. ამ თემაზე ჩვენთან სასაუბროდ დალი ბურჭულაძემ ვერ მოიცალა, არჩილ ბარამიძემ კი გვითხრა, რომ საერთოდ არ იცის, ვინაა დალი ბურჭულაძის ქმარი.

„დალი ბურჭულაძე ვისი მეუღლეა, არ ვიცი. მე ვიცი ის, რომ დიდი ხანია ჩვენი თანამშრომელია და მუშაობდა ბიბლიოთეკაში. ეს ვიცი მე,“ – ამბობს არჩილ ბარამიძე. ის ნეპოტიზმს ამ და სხვა საკადრო ცვლილებებში გამორიცხავს, მაგალითად, კობა თევზაძის შემთხვევაში, რომელიც ნადიმ ვარშანიძის მძღოლად მუშაობდა. კობა თევზაძეც მონიტორინგის სამსახურში იმუშავებს.

„ვაკანსია იყო, დაწერა განცხადება და დასაქმდა, ის ნადიმ ვარშანიძის მძღოლი იყო, როცა ნადიმი ხელვაჩაურის გამგებელი იყო,“ – დასძინა არჩილ ბარამიძემ.

ხელვაჩაურის მერიაში პრობლემას არ ხედავენ იმაში, რომ ამ ადამიანების შესარჩევად კონკურსი არ გამართულა. უხერხულობას არც ის ამბავი უქმნით, რომ კულტურის ცენტრის დირექტორი ეკოლოგია, მოადგილე – ყოფილი პოლიციელი. კითხვის პასუხად ხელვაჩაურის მერის მოადგილემ გაიხსენა, რომ კიდევ ერთი მოადგილე „პროფესიონალია კულტურის მიმართულებით“.

„არის კიდევ მოადგილე – ზვიად თურმანიძე, გეცოდინებათ, ის არის პროფესიონალი კულტურის ნაწილში… ეს არაა საჯარო სამსახური, რომ კონკურსის ჩატარების ვალდებულება გვქონდეს. დარწმუნებული ვარ, ვინც შერჩეული მყავს ამ ეტაპზე, ძალიან კარგია,“ – მიიჩნევს არჩილ ბარამიძე.

ხელვაჩაურის მერის მოადგილეს ვკითხეთ მთავარი ქორეოგრაფის – ლაშა მაღრაძის გათავისუფლებაზეც.

„ვერ მივიღეთ ანსამბლში ის, რაც უნდა მიგვეღო სხვა მუნიციპალიტეტებთან შედარებით, მაგალითად, ხულოსთან, ქედასთან, შუახევთან, შედარებით. გვინდა, უკეთესი იყოს, ხელვაჩაურიც რომ წარმოჩინდეს,“ – დაასრულა არჩილ ბარამიძემ.

მეექვსე კლასში იყო, როცა სწავლა მიატოვებინეს, შემდეგ კი 14 წლის ასაკში 14 წლით უფროს კაცზე გაათხოვეს. უთხრეს, რომ ქმარი უპატრონებდა. სწორედ აქედან დაიწყო ირმას ტრაგიკული ცხოვრება. 29 წლის ირმას ახლა 4 შვილი ჰყავს და ქმართან თანაცხოვრების მძიმე წლებზე გვიყვება.

ნარკოტიკზე დამოკიდებული ქმარი ჯერ მას სცემდა, შემდეგ კი, როცა ბავშვები გაჩნდნენ, ბავშვებსაც უსწორდებოდა ფიზიკურად. ქმარი მუდმივად სთხოვდა ცოლს ფულს, აიძულებდა, რომ ეშოვა – ყველა გზით.

14 წელი „ტყვეობაში“

„ადრე, როცა ჩემზე ძალადობდა, ვითმენდი, თუმცა როცა შვილების ცემაზე გადავიდა, აღარ მოვუთმინე და პოლიციას მივმართე. იცით, რამდენჯერ იყო დაკავებული? დაიჭერდნენ, შემდეგ მოვიდოდნენ ნათესავები და მეუბნებოდნენ – ირმა გამოიყვანე, ბავშვებს მამა სჭირდებათ, ხომ იცი ჩვენი ადათ-წესები, რას იტყვის ხალხი, როგორ გაზრდი ბავშვებს“, მიუხედავად იმისა, რომ იცოდნენ როგორი მამა იყო, როგორ ძალადობდა მათზეც“.

ირმა ამბობს, რომ მაშინ პატარა გოგო იყო და რასაც უფროსები ეტყოდნენ, ის მიაჩნდა სიმართლედ. „არავინ მეხმარებოდა, არავინ მასწავლიდა გზას“, – გვეუბნება ის. ამიტომ, ისიც ნათესავების დაჟინებული თხოვნის შემდეგ მიდიოდა სასამართლოში და ქმრის წინააღმდეგ ჩვენებას აღარ აძლევდა. 

ირმასა და მისი შვილების ცხოვრებაში ძალადობა არ სრულდებოდა. ორი წელი შვილებთან ერთად თავშესაფარშიც გაატარა, თუმცა შემდეგ ისევ ქმართან დაბრუნდა. „მარწმუნებდა, რომ ყველაფერს  ნანობდა, შემირიგდი და ყველაფერს შევცვლი, საცხოვრებლადაც ცალკე გადავალთო. მეც დავუჯერე. მართლა გადავედით ცალკე საცხოვრებლად, ოღონდ ცუდი ბინა იყო, ნესტიანი სარდაფი. გაუსაძლისი პირობები იყო, არც საკვები გვქონდა, არც სხვა რამ. ცივი ოთახები … ქმარი ისევ აგრძელებდა ჩემ ცემას და ზეწოლას, რომ მისთვის ფული მეშოვა.

დამლაგებლად ვმუშაობდი ერთ-ერთ რესტორანში, ყველაფერს მას ვაძლევდი, მაგრამ მაინც ითხოვდა. სოციალური დახმარება რომ დაუნიშნეს ბავშვებს, უფლებამოსილ პირად მე გავაფორმებინე თავი, რადგან ვიცოდი, რომ თუ მეუღლე აიღებდა, ჩემი შვილები ისევ მშივრები იქნებოდნენ.

როგორც კი სოციალური მუშაკები კარებიდან გავიდნენ, მაშინვე მცემა, დანა ამოიღო და სახეზე დამისვა. იმ სარდაფში 14 დღე ჯაჭვით ვყავდი დაბმული, ოთახის კარებთან ეძინა, რომ არ გავქცეულიყავი“, – ჰყვება ირმა და ცრემლები სდის.

ბოლოს ირმა მეზობლებმა გამოიყვანეს ჩაკეტილი სარდაფიდან. საუბარს რამდენჯერმე წყვეტს, უჭირს წარსულის გახსენება. ამბობს, რომ 14 წელი ტყვეობაში იცხოვრა, ფიზიკურ, მორალურ დამცირებასა და წნეხში.

ძალადობა მცირეწლოვან ბავშვებზე

ოჯახის წევრების, ახლობელ-ნათესავების ზეწოლის მიუხედავად, ქალმა საკუთარ თავში იპოვა ძალა და ქმარს დაშორდა. თუმცა ის მაინც არ წყვეტდა ყოფილი ცოლის შევიწროებას. ირმა გვიყვება, რომ ერთ დღეს, როცა ის სამუშაოზე იყო, კაცმა გაიგო, რომ სოციალური დახმარება დაირიცხა და ბავშვებს სახლში მიაკითხა. ბავშვები კარს არ უღებდნენ, თუმცა შემდეგ მაინც დაითანხმა.

გვაჩვენებს 13 წლის გოგონას ხელს, რომელსაც ამჩნევია ძალადობის კვალი. „სცემა. ქამრის რკინის ნაწილი ხორცში ისე ჩაერჭო, ახლაც დაღად აჩნია“, – ამბობს დედა.

ის კიდევ ერთ მძიმე ისტორიას იხსენებს: „სამუშაოზე ვიყავი, უფროსმა გოგონამ გამოასწრო და შემატყობინა, რომ მამამ ბავშვები საშინლად სცემა, დასისხლიანებულები დამხვდნენ. მაშინვე პოლიციას მივმართე. დაიჭირეს და ახლაც ციხეშია. მემუქრებოდა იქიდანაც, ამიტომ ტელეფონის ნომრები გამოვცვალე“.

ყოფილმა ქმარმა 55 ჭრილობა მომაყენა

ის გვაჩვენებს ხელებს, რომლებზეც უამრავი ნაჭრილობევი აქვს, სახეზე, ტუჩის კუთხიდან, დიდი ზომის ნაჭრილობევი ეწყება, რომელიც ნიკაპს ქვემოთ გრძელდება. ჭრილობა ისე შეხორცდა, ექიმის გამოძახების უფლება არ მისცა ქმარმა.

„დამცინოდა კიდეც, წებოს დაგასხამ და შეხორცდებაო. მთელ სხეულზე 55 ჭრილობა მაქვს“, – გვეუბნება ირმა და ხელს გვაჩვენებს, სადაც ასევე ემჩნევა ნაიარევი. ერთ მხარეს რომ დამარტყა დანა, მეორე მხარეს გამოვიდაო – ამბობს.

ფეხზე მიყენებული ჭრილობა კი იმდენად დიდი იყო, რომ ირმას ოპერაცია დასჭირდა. ირმა  ძალადობის ისეთ დეტალებზე გვიყვება, რომლის გააზრება და მასზე საჯაროდ საუბარი წარმოუდგენლად მძიმეა.

„ვდუმდი, რადგან პატარა, დაუცველი ვიყავი. დუმდნენ ჩემი მშობლებიც. ყველა ხედავდა როგორ ვიტანჯებოდი, თუმცა მხარას არავინ მიჭერდა. მეუბნებოდნენ, რომ ჩვენს კულტურაში არ შეიძლება ქალი ქმრის გარეშე ცხოვრობდეს… ახლა აღარ გავჩუმდები, ბოლომდე ვიბრძოლებ და არ გავჩუმდები“, – გვეუბნება ირმა.

ირმა ამბობს, რომ არ დაუშვებს იგივე გზა გაიარონ მისმა შვილებმა, რაც მან გაიარა 14 წლის განმავლობაში. „როცა ჩემი უფროსი გოგონა წამოიზარდა, ქმრის ნათესავი მოვიდა და მის გათხოვებაზე ჩამომიგდო ლაპარაკი. უარით გავისტუმრე, არ დავუშვებ, რომ ჩემი გოგონებიც მოძველებული ადათ-წესების გამო 14 წლისები გაათხოვონ, ბიჭსაც და გოგონებსაც მივცემ უკეთეს ცხოვრებას, განათლებას“, – ამბობს დედა.

4 ბავშვი განათლების და სკოლის გარეშე

ყოფილი ქმრის და მისი ოჯახის წევრების მხრიდან ზეწოლა რომ აერიდებინა, ირმა 4 მცირეწლოვან შვილთან ერთად თბილისიდან ბათუმში გადმოვიდა საცხოვრებლად. ნაქირავებ ბინაში არიან, თუმცა ამბობენ, რომ მშვიდად და იმედიანად გრძნობენ თავს, რადგან აღარ მოუწევთ შიშის ქვეშ ცხოვრება. მათი ერთადერთი შემოსავალი სოციალური დახმარებაა, რომელსაც სახელმწიფოსგან იღებენ. პანდემიის განმავლობაში ბავშვები მთლიანად მოწყდნენ სკოლას, რადგან მძიმე ფსიქოლოგიური და ფიზიკური ტანჯვის გარდა, ბავშვებს სოციალური ყოფაც მძიმე ჰქონდათ.

დედას მხოლოდ ერთი ტელეფონი აქვს და იმასაც ეკრანი აქვს გატეხილი. „ამ ტელეფონით 4 ბავშვს როგორ ვასწავლიდი ონლაინ, იცოდნენ სკოლაში, რომ არ გვქონდა საშუალება, მაგრამ არაფერი“, – გვეუბნება ირმა.

სასწავლო პროცესი მთელ ქვეყანაში თითქმის ერთი თვეა რაც განახლდა, თუმცა ირმას 4 ბავშვი ისევ სკოლის გარეშეა. „ვერ დამყავს, რადგან ფეხსაცმელი არ აქვთ, ჩანთა, კალამი, რვეული, არაფერი არ აქვთ“, – გვეუბნება დედა.

როგორც დედა გვეუბნება, წლების განავლობაში ძალადობაგამოვლილ ბავშვებთან ფსიქოლოგს არ უმუშავია. ირმა ამბობს, რომ იყო შემოთავაზება, თუმცა ვერ მოახერხა. „სადღაც გლდანში უნდა ევლოთ ბავშვებს, გზის ფული არ გვქონდა, მერე პანდემია დაიწყო და აღარ გამოვიდა“- ამბობს ირმა.

ძალადობაგამოვლილი დედა და ბავშვები ბათუმში ახალი ცხოვრების დაწყებას ცდილობენ. ფიქრობენ, რომ სწორედ ბათუმია ის ქალაქი, სადაც მას და მის შვილებს მხარდაჭერის ხელს გაუწვდიან. „წავალ, სამუშაოს მოვძებნი, ყველაფერს ვიზამ, ოღონდ ჩემი შვილების გვერდით ვიყო და ისინი დავიცვა. კარგი განათლება მივცე, რომ არ იყვნენ სხვებზე დამოკიდებული და აღარ მოუწიოთ ძალადობის და შიშის ქვეშ ცხოვრება“, – გვეუბნება 29 წლის ირმა შამოიანი.

________________________________________

ქობულეთის მუნიციპალიტეტის საკრებულომ  „ერთიანი ნაციონალური მოძრაობიდან“ ორ წევრს,  ბონდო თედორაძესa და მამული სურმანიძეს უფლებამოსილება შეუწყვიტა.

გადაწყვეტილება საკრებულოს უმრავლესობამ დღეს, 26 თებერვალს, რიგგარეშე სხდომაზე მიიღო. წინააღმდეგი მხოლოდ ორი წევრი იყო ასევე ოპოზიციის ფრაქციიდან.

საკრებულოს წევრების უფლებამოსილების შეწყვეტის მიზეზად 6 თვის განმავლობაში მათი საკრებულოს საქმიანობაში მონაწილეობის არმიღება და სხდომებზე გამოუცხადებლობა დაასახელეს. ასეთ შემთხვევაში საკრებულოს წევრის მიმართ უფლებამოსილების შეწყვეტის პროცედურის დაწყებას თვითმმართველობის კოდექსი ითვალისწინებს.

თვითმმართველობის კოდექსით, მუნიციპალიტეტის საკრებულოს წევრს უფლებამოსილება ვადამდე ადრე შეიძლება შეუწყდეს, თუ ის ზედიზედ 6 თვის განმავლობაში არასაპატიო მიზეზით არ მონაწილეობს მუნიციპალიტეტის საკრებულოს მუშაობაში.

ოპოზიციური ფრაქციის წევრ მერაბ ცინცაბაძის თქმით, ამ გადაწყვეტილებას არ ეთანმებიან და აუცილებლად გაასაჩივრებენ:

„სხდომაზე მიუსვლელობა არ ნიშნავს, რომ ისინი საკრებულოს საქმიანობაში არ მონაწილეობდნენ, ჩვენ დავამტკიცებთ, რომ არასწორი გადაწყვეტილება მიიღეს,“ – განაცხადა მერაბ ცინცაბაძემ.