ბათუმის ცენტრალურ პარკში მელიქიშვილის ქუჩიდან ბილიკით ვეღარ შეხვალთ – ბილიკი გადაღობილია რკინის კონსტრუქციით, რომელიც კაფე „ცეროდენამ“ მოაწყო. „ცეროდენას“ წინა წლებშიც ჰქონდა აქ ღია კაფე, თუმცა ბილიკზე გასასვლელს არ ხერგავდა.
არის თუ არა გაცემული ნებართვა და რატომ გაიცა მსგავსი ნებართვა? – ამ კითხვით ბათუმის მერიის პრესცენტრს გუშინ საღამოს მივმართეთ, თუმცა ამ დრომდე პასუხი არ მიგვიღია.
„არ მიგვიღია ნებართვა,“ – გვითხრა თენგიზ ქოქოლაძემ. იგი კაფე „ცეროდენას“ მფლობელია. თენგიზ ქოქოლაძის განმარტებით, რკინის კონსტრუქცია არასწორად მოაწყვეს ხელოსნებმა და დემონტაჟი უკვე დაიწყო.
„მე არ ვიყავი ადგილზე და ვერ მივაქციე ყურადღება, მოვშლით დღესვე… რაც იყო ღია ნაწილი, იგივე დარჩება,“ – უთხრა „ბათუმელებს“ თენგიზ ქოქოლაძემ.
შენიშვნა: ინფორმაციის გამოქვეყნების შემდეგ ბათუმის მერიიდან დაგვიკავშირდნენ და გვითხრეს, რომ მუნიციპალურმა ინსპექციამ კომპანიას გონივრული ვადა მისცა რკინის კონსტრუქციის დემონტაჟისთვის.
