Batumelebi

„არც ერთი ლარი, არც ერთი თეთრი სესხი წელს არ აგვიღია“ – განაცხადა ირაკლი ღარიბაშვილმა 2021 წლის 26 ივლისს. 26 ივლისის შემდეგ „ბათუმელების“ მიერ ფინანსთა სამინისტროდან გამოთხოვილი ინფორმაციების დამუშავება ცხდყოფს, რომ პრემიერი ტყუის, რადგან 2021 წლის მაისიდან ივლისამდე პერიოდში საქართველოს მთავრობამ 2 ახალი სასესხო ხელშეკრულება გააფორმა.

ლარი და თეთრი სახელმწიფოს სესხად ნამდვილად არ აუღია. მთავრობამ ღარიბაშვილის პრემიერობის დროს, ზემოთ აღნიშნული 2 ახალი სასესხო ხელშეკრულებით, IBRD-ისგან დამატებით ჯამში 113 700 000 ევრო ისესხა.

[checklist]

• 2021 წლის 17 მაისს გაფორმდა –  საქართველოსა და რეკონსტრუქციისა და განვითარების საერთაშორისო ბანკს (IBRD) შორის სასესხო შეთანხმება (საქართველოს მიკრო, მცირე და საშუალო ზომის საწარმოების დახმარებისა და აღდგენის პროექტი) – 85 მილიონ ევროზე.

[/checklist]

პროექტის მიზანია მიკრო, მცირე და საშუალო ზომის საწარმოების დახმარება, მათ შორის, ციფრული გადახდებისა და ფინანსური ინფრასტრუქტურის განახლების უზრუნველყოფის გზით.

[checklist]

• 2021 წლის 9 ივნისს კი გაფორმდა –  რეკონსტრუქციისა და განვითარების საერთაშორისო ბანკს (IBRD) და საქართველოსა შორის სასესხო შეთანხმება (COVID-19-ის წინააღმდეგ სწრაფი რეაგირების პროექტის დამატებითი დაფინანსება) – 28 700 000 ევროზე.

[/checklist]

ამ სესხის დანიშნულებაა: COVID-19-ის ვაქცინის დანერგვის ეროვნული გეგმის განსახორციელება.

• 2021 წლის 21 მაისს გაფორმდა – ამერიკის შეერთებულ შტატებსა და საქართველოს შორის განვითარების მიზნის შესახებ საგრანტო შეთანხმება (საქართველოს მდგრადი განვითარების ხელშეწყობისათვის 1. გარე საზიანო გავლენების მიმართ მდგრადობის გაძლიერება; 2. მოქალაქისადმი ანგარიშვალდებული მმართველობის გაძლიერება დემოკრატიული მიღწევების განსამტკიცებლად და 3. ეკონომიკური ზრდის შედეგად ინკლუზიური, მაღალანაზღაურებადი და მაღალხარისხიანი დასაქმების შესაძლებლობების შექმნა) – 66 960 382 აშშ დოლარზე.

საგრანტო შეთანხმების მიზანია საქართველოს მდგრადი განვითარების ხელშეწყობა, გარე საზიანო გავლენების მიმართ მდგრადობის გაძლიერებისა და ეკონომიკური ზრდის შედეგად ინკლუზიური, მაღალანაზღაურებადი და მაღალხარისხიანი დასაქმების შესაძლებლობების შექმნის საშუალებით, ასევე მოქალაქისადმი ანგარიშვალდებული მმართველობის გაძლიერებითა და დემოკრატიული მიღწევების განმტკიცებით.

• 2021 წლის 24 ივნისს გაფორმდა – რეკონსტრუქციის საკრედიტო ბანკსა (KfW) და საქართველოს შორის საგრანტო შეთანხმება „ბიომრავალფეროვნება და მდგრადი ადგილობრივი განვითარება საქართველოში“ – 23 737 626 ევროზე.

ეს საგრანტო შეთანხმება გაფორმდა არსებული და ახალი დაცული ტერიტორიების დასახმარებლად, ასევე აჭარის ავტონომიურ რესპუბლიკაში მდგრადი სატყეო მეურნეობის დასაარსებლად, რაც მოიცავს ადგილობრივ სატყეო ოფისებს, მოსაზღვრე თემების სოციალურ-ეკონომიკურ განვითარებასა და განმახორციელებელი კონსულტანტების მომსახურებას.

2021 წლის ახალ სესხებსა და გრანტებზე ინფორმაცია „ბათუმელებმა“ საქართველოს ფინანსთა სამინისტროდან ოფიციალურად დაახლოებით 1 თვის წინ გამოითხოვა, პასუხი კი დღეს, 27 აგვისტოს მივიღეთ.

სასესხო ხელშეკრულებებისა და საგრანტო შეთანხმებების გარდა, მთავრობა სწორედ წელს გახდა იძულებული ძველი ევრობონდების დასაფარად ახალი ევრობონდები გამოეშვა, ანუ 1,7 მილიარდი ლარის სესხი/ვალი აეღო. ევრობონდები, ობლიგაციები და სხვა ფასიანი ქაღალდები სწორედ ვალის აღების ფორმებია.

ფინანსთა სამინისტროს ინფორმაციით, ახალი ევრობონდების გამოშვება 2021 წლის 15-21 აპრილს განხორციელდა. საქმე იმაშია, რომ ადრე გამოშვებული 500 მილიონი აშშ დოლარის ევრობონდები საქართველოს 2021 წლის აპრილში უნდა დაეფარა. სახელმწიფო ამ ვალის დაფარვას მიმდინარე წელს გეგმავდა, თუმცა, საბოლოოდ იძულებული გახდა ძველი ვალი ახალი ვალით დაეფარა.

პრემიერის თქმით, „ჩვენ მოგვეცა საშუალება, რომ მილიარდზე მეტით გაგვეზარდა ბიუჯეტი“, რასაც ის მიმდინარე წელს ეკონომიკის ზრდას უკავშირებს: „12% ზრდა გვაქვს პრაქტიკულად პირველ 6 თვეში“.

2021 წლის სახელმწიფო ბიუჯეტში ცვლილებები 22 ივლისს შევიდა.

ცვლილებაშესულ და გაზრდილ ბიუჯეტში გაწერილი 19,4 მილიარდი ლარიდან კი, ჯამში 5,2 მილიარდი ლარი, სწორედ სახელმწიფოს მიერ სხვადასხვა დროს გაფორმებული ხელშეკრულებების საფუძველზე აღებული სესხია. აქედან:

• ევრობონდის რეფინანსირებისთვის – 1 მილიარდ 713 მილიონ 200 ათასი ლარი;

ასევე, სხვადასხვა პროგრამებისა და პროექტების დასაფინანსებლად:

• საფრანგეთის განვითარების სააგენტოდან (AFD) მისაღები სახსრები – 172 მილიონი ლარი;
• გერმანიის რეკონსტრუქციის საკრედიტო ბანკიდან (KfW) მისაღები სახსრები – 229 მილიონი ლარი;
• COVID-19-ის პანდემიის კონტექსტში სოციალური უსაფრთხოების პროგრამის ფარგლებში გერმანიის რეკონსტრუქციის საკრედიტო ბანკიდან (KfW) მისაღები სახსრები – 57 მილიონი ლარი;
• აზიის განვითარების ბანკიდან (ADB) მისაღები სახსრები – 1 მილიარდ 427 მილიონი ლარი;
• ევროკავშირიდან (EU) მისაღები სახსრები – 286 მილიონი ლარი;
• საერთაშორისო საფინანსო ორგანიზაციებისა და უცხო ქვეყნების მთავრობების მიერ საქართველოს მთავრობისთვის გამოსაყოფი გრძელვადიანი საინვესტიციო, შეღავათიანი კრედიტები – 1 მილიარდ 389 მილიონ 800 ათასი ლარი.

გარდა ამისა, 2021 წელს, სახელმწიფო ბიუჯეტიდან სხადასხვა ღონისძიება, ჯამში 49 მილიონ 480 ათასი ლარის უცხოური გრანტითაც დაფინანსდება.

სესხები[კრედიტები]:

537,78 მილიონი [USD] აშშ დოლარი [აქედან ევრობონდები – 500 მილიონი აშშ დოლარი],
518,87 მილიონი [EUR] ევრო,
0,03 მილიონი [KWD] ქუვეითური დინარი,
84,16 მილიონი [SDR] ინტერნაციონალური ვალუტა – ნასესხობის სპეციალური უფლებები;

გრანტები:

1,67 მილიონი [EUR] ევრო,
9,29 მილიონი [USD] აშშ დოლარი.

ამავე თემაზე:

ექსპრემიერმა გიორგი გახარიამ  25 აგვისტოს თავისი პარტიის გუნდი წარადგინა ბათუმის საკრებულოში მოსახვედრად.

პარტია „საქართველოსთვის“ პროპორციული სიის პირველ ნომრად ჭადრაკის დიდოსტატ ნინო ბაციაშვილს ასახელებს. თვითმმართველობის არჩევნებზე  ბაციაშვილი ბათუმის საკრებულოში მოსახვედრად იყრის კენჭს.

• როგორ აღმოჩნდით პარტიაში „საქართველოსთვის“ და რამ გიბიძგათ ჭადრაკიდან პოლიტიკისკენ?

მთელი ცხოვრება ჭადრაკს ვთამაშობ და ამ საქმის პროფესიონალი ვარ. აქამდე არ მქონია არასდროს გეგმაში პარტიული საქმიანობა. ბათუმის საჭადრაკო კლუბიდან მომიწია წამოსვლა, ეს კლუბი სამჯერ გახდა ევროპის ჩემპიონი, სამჯერ მივიღე ოქროს მედალი და ყოველთვის შესანიშნავად ვთამაშობდი, მაგრამ შარშან შეიქმნა პრობლემები, რის შემდეგაც დავტოვე საჭადრაკო კლუბი.

შევხვდი ბათუმის მაშინდელს მერს [ლაშა კომახიძეს] და, სამწუხაროდ, არაფერი გამოვიდა, პრობლემა ვერ გადაწყდა. გამიკვირდა ისიც, რომ არავინ შემეხმიანა ბათუმიდან დასახმარებლად, ასეთი შემოთავაზებები არ ყოფილა [2020 წლის დასაწყისში ნინო ბაციაშვილმა საჭადრაკო კლუბს კონტრაქტის პირობების შეცვლა სთხოვა, მწვრთნელისა და სახელფასო დაფინანსების გაზრდის გათვალისწინებით].

თუმცა უნდა აღვნიშნო, რომ ყოველთვის ვგრძნობდი რიგითი ბათუმელებისგან მხარდაჭერას. წელს კი ვგეგმავდი ქვეყანა დამეტოვებინა, მქონდა ბევრი შემოთავაზება ევროპის სხვადასხვა ქვეყნიდან და ზუსტად ამ დროს გამოჩნდა შემოთავაზება პარტიიდან „საქართველოსთვის“. გადავწყვიტე დავთანხმებოდი მათ წინადადებას და მეცადა საკუთარი ქალაქისთვის გამეკეთებინა რაღაც. გადავწყვიტე საკუთარი წვლილი შევიტანო ჩემი ქალაქის განვითარებაში და საკრებულოს საშუალებით რაღაც საკითხების გადაწყვეტაში მივიღო მონაწილეობა.

• როგორ ხედავთ საკუთარ თავს საკრებულოში, ისევ აქტიურად ითამაშებთ ჭადრაკს და შეუთავსებთ ერთმანეთს სპორტს და საკრებულოში მუშაობას?

ცხადია, ვრჩები აქტიურ მოჭადრაკედ. პოლიტიკურ საკითხებში ჯერ კარგად გარკვეული არ ვარ, მაგრამ ვეცდები საკრებულოში მუშაობას უაღრესი პასუხისმგებლობით მოვეკიდო და მივიღო მონაწილეობა გადაწყვეტილებების მიღებაში, რაც ჩემზე იქნება დამოკიდებული.

• რა არის თქვენი დაკვირვებით ბათუმში მთავარი პრობლემა, რაც დაუყოვნებლივ ჩარევას საჭიროებს?

ჩემთვის, როგორც ერთი მოქალაქისთვის, ბათუმში მთავარი პრობლემა მწვანე ზონების ნაკლებობა და ცუდი ეკოლოგიური გარემოა. პრიორიტეტია ბათუმის ბულვარის გადარჩენა იმ ფორმით მაინც, რაც შემოგვრჩა და შექმნა საერთოდაც ახალი, მწვანე რეკრეაციული ზონების.

კარგი იქნება თუ კიდევ უფრო არ დავაზიანებთ ბათუმის ბულვარს, სანაპირო ზოლმა შეინარჩუნოს ის სახე, რაც ახლა აქვს.

• გულისხმობთ იმასაც, რომ თქვენთვის მიუღებელია ბათუმის ბულვარში მაღალსართულიანი მშენებლობები? ვგულისხმობ კომპანია „ამბასადორის“ 16-სართულიანი მშენებლობას ბულვარში, რასაც დიდი ხანია აპროტესტებს მოსახლეობა.

ეს ძალიან რთული საკითხია, ასე კონკრეტულად რომელიმე მშენებლობას არ ვგულისხმობ, მაღალსართულიანი კორპუსების მშენებლობა ბულვარში არ შეიძლება. რაც აშენებულია ვეღარაფერს ვუზამთ, მაგრამ ახალი მშენებლობები ბულვარში, ვფიქრობ, აღარ შეიძლება, უნდა შევინარჩუნოთ ბულვარი ისეთ სივრცედ მაინც, როგორიც ახლა გვაქვს.

• რას შეცვლიდით ბათუმის სამშენებლო პოლიტიკაში?

ამ საკითხებშიც ვერკვევი ჯერჯერობით. რა თქმა უნდა, ბევრი ახალი მშენებლობაა ქალაქში და ეს ბათუმელებისთვის დიდი პრობლემაა. უნდა იყოს რაღაც ერთიანი გეგმა, საერთო წესები, რაზეც შევთანხმდებით და დავიცავთ.

• გახარიამ ბათუმის მერობის კანდიდატად ირაკლი მიქელაძე წარადგინა და აღნიშნა, რომ ის მერობის ღირსეული კანდიდატია, რომელიც მან გერმანიაში აღმოაჩინა. მიქელაძეს უკავშირდება სკანდალი, როცა ის ბათუმის საკრებულოს თავმჯდომარის მოადგილე იყო, ცხოვრობდა ამ დროს გერმანიაში ოჯახით და იღებდა პრემიას, ხელფასს, საწვავისა და ტელეფონის ხარჯები. რა აზრის ხართ, თქვენი პარტიის მიერ მერობის კანდიდატად ირაკლი მიქელაძის წარდგენაზე?

ვიცი, რომ ირაკლი გერმანიაში ცხოვრობდა და ჩამოიყვანეს, დააბრუნეს როგორც მერობის ღირსეული კანდიდატი. კითხვები ალბათ უფრო მას უნდა დაუსვათ. მე ამ სკანდალზე არაფერი ვიცოდი. როგორც იცით, პოლიტიკაში ახლა ვერკვევი და ეს ამბავი, სიმართლე გითხრათ, არ მახსოვს.

• ასევე შუახევის მერობის კანდიდატად პარტიისგან „საქართველოსთვის“ დასახელდა შალვა გოგიტიძე, რომელიც ასლან აბაშიძის მმართველობის დროს ლტოლვილთა და განსახლების მინისტრი იყო. უხერხულობას არ გიქმნით ის ფაქტი, რომ ასლან აბაშიძის მთავრობის მინისტრთან ერთად მოგიწევთ ერთ პარტიაში ყოფნა?

ყველას წარსულზე მე ვერ ვილაპარაკებ, თავად უნდა გასცენ ალბათ კითხვებს პასუხები. მე მინდა, უბრალოდ, ქალაქისთვის კარგი საქმე გავაკეთო და ამ მიზნით ვიყრი კენჭს ბათუმის საკრებულოში.

• 2019 წლის 20 ივნისის პროტესტისას გახარიას მინისტრობის პირობებში სპეცრაზმელები აქციის მონაწილეებს თვალში დამიზნებით ესროდნენ, სცემდნენ აქციის მონაწილეებს. როგორ ხედავთ თქვენ ამ პერიოდს?

მეც ვიყავი 20 ივნისის აქციაზე, რადგან, როგორც ყველა ქართველისთვის, ჩემთვისაც მიუღებელი იყო რუსი გავრილოვის პარლამენტში ვიზიტი და ხალხის ასე აბუჩად აგდება. ძალიან რთული ასატანი იყო ეს. მაგრამ შემდეგ, ძალიან სამწუხაროდ განვითარდა მოვლენები აქციაზე, რაც აღარ უნდა განმეორდეს. გახარია ამ კითხვებზე პასუხის გაცემას არასდროს არიდებს თავს.

• არასასურველი მოვლენების განვითარებაში გულისხმობთ აქციის მონაწილეების მხრიდან პარლამენტში შეჭრის მცდელობას თუ სპეცრაზმელების მიერ დამიზნებით სროლებს?

ყოველმხრივ სამწუხარო მოვლენები განვითარდა აქციაზე, ყოველმხრივ. მე მალე წამოვედი ამ აქციიდან, მაგრამ შემდეგ ცუდად განვითარდა მოვლენები. არაკეთილსინდისიერი პოლიტიკოსები ძალაუფლების მოპოვებისთვის ცდილობენ გამოეყენებინათ ხალხის გულწრფელი პროტესტი და ეს ძალიან ცუდია.

• მეჩეთის საკითხზეც მინდა გკითხოთ. სასამართლოს ორმა ინსტანციამ დისკრიმინაციად მიიჩნია მუსლიმი თემის მიმართ ბათუმის მერიის დამოკიდებულება „ბათუმის ახალი მეჩეთის საქმეზე“. როგორია თქვენი დამოკიდებულება, რას ფიქრობთ ბათუმში ახალი მეჩეთის მშენებლობაზე?

რა გადაწყვეტილებასაც მიიღებს სასამართლო ის უნდა აღსრულდეს, მიუხედავად იმისა, მოსწონს ეს ვინმეს თუ არა. ჩვენი მიზანი სამართლებრივი სახელმწიფოს შენებაა. შესაბამისად, ყველა უნდა დაემორჩილოს სასამართლოს გადაწყვეტილებას.

ხელვაჩაურის მერობის კანდიდატის „ერთიანი ნაციონალური მოძრაობიდან“, მიშა ბოლქვაძის საარჩევნო ბანერი მოიპარეს. ინფორმაცია „ბათუმელებს“ ბანერის მოპარვის შესახებ თავად კანდიდატმა დაუდასტურა.

„ხელვაჩაურში, სოფელ შარაბიძეებში, ვარშალომიძეების გადასახვევთან, იყო ბანერი გამოკრული. ორი ვიდეოსათვალთვალო კამერაა, ამ კამერებს შსს აკონტროლებს. პრაქტიკულად ვიდეოკამერის ძირშივე, იმ ბოძზე მოიპარეს ეს ბანერი.

წინა არჩევნებზე არაერთი ფაქტი იყო მსგავსი – დაჭრა, მოპარვა, ჩამოხევა, ჩამოგლეჯა. აი, ეს არის იმ ცხრაწლიანი მმართველობის შედეგი, რაც დანერგა „ქურდულმა ოცნებამ“ – ბოროტება, დაპირისპირება, მათ არ გააჩნიათ და არ აქვთ იმის სურვილი პროდასავლურად, როგორც ცივილიზებულ ქვეყნებში ხდება, არჩევნები ისე ჩაატარონ,“ – უთხრა „ბათუმელებს“ მიშა ბოლქვაძემ.

მიშა ბოლქვაძის თქმით, აპირებს პოლიციას მიმართოს, თუმცა ბანერის ქურდების დაკავების იმედი არ აქვს.

„ახლა მივდივარ პოლიციაში, ვაპირებ საჩივრის შეტანას. მაგრამ შარშანდელი ფაქტები რაც იყო, არც ერთი არაა გამოძიებული. ათეულობით ფაქტი იყო შარშან. არც ახლა მაქვს იმის იმედი, რომ გამოიძიებენ,“ – ამბობს ხელვაჩაურის მერობის კანდიდატი.

—————————–

საქართველოში თვითმმართველობის არჩევნები 2 ოქტომბერსაა დანიშნული.

ბათუმის „დინამოს“ გენერალური დირექტორი, ყოფილი ფეხბურთელი ასლან ბალაძე შესაძლოა ბათუმის საკრებულოს წევრი გახდეს. ის „ქართული ოცნების“ სიის პირველი ნომერია თვითმმართველობის არჩევნებზე. როგორ წარმოუდგენია საკრებულოში მუშაობა და იქნება თუ არა კრიტიკული განსხვავებული პოზიციის შემთხვევაში? – ამ საკითხებზე ბალაძე „ბათუმელებთან“ საუბრობს.

• ბატონო ასლან, რატომ გადაწყვიტეთ, რომ ფეხბურთიდან პოლიტიკაში წახვიდეთ. რა იყო თქვენი მთავარი მოტივაცია?

სიახლეები ყოველთვის კარგია ცხოვრებაში. მთელი ცხოვრება სპორტს ვემსახურებოდი. ძალიან დიდი პატივია ჩემთვის ეს შემოთავაზება და მოულოდნელიც იყო. ყველანაირად ვეცდები, რომ როგორც სპორტში, ასევე პოლიტიკაში გავატარო ის პრინციპულობა, არ დავაკლო არაფერი ჩვენს საქმიანობას იმიტომ, რომ ჩემი სპორტში მოღვაწეობა იყო წარმატებული და ისეთი წარმატებული მინდა ვიყო პოლიტიკაშიც, ამიტომ ეს დიდი გამოწვევაა ჩემთვის. მაქსიმუმს გავაკეთებ ბათუმისთვის.

• როგორ წარმოგიდგენიათ თქვენი მაქსიმუმი თვითმმართველობაში – შეგიძლიათ, რომ დაგვისახელოთ საკითხები, თემები, რაზეც იმუშავებთ?

ყველა ის პრობლემა, რაც იქნება ბათუმში, ყველა საკითხში მექნება ჩართულობა. არავის არ დავემალები, ვინც მიცნობს ბათუმში და ჩემთან ურთიერთობს, იცის, რომ რადგან პირველი ნომერი ვარ, რაღაც სხვანაირად წარმოვჩნდე. ჩემი მიზანი იქნება ყველა პრობლემის ახლოს მიტანა და მოსმენა, ასე წარმომიდგენია ჩემი თავი.

რადგან ეს ნაბიჯი გადავდგი, ბევრი არ მიფიქრია, სხვათა შორის, რადგან საკმაო გამოცდილება მაქვს ცხოვრებაში და ვიცი, როგორ უნდა მოვიქცე და როგორი კომუნიკაცია უნდა მქონდეს ხალხთან. ასე, რომ ჩვეულებრივი ცხოვრებით გავაგრძელებ.

• მთლად ჩვეულებრივი ცხოვრება არ მოგიწევთ, რადგან სიის პირველი ნომერი ხართ, შესაძლოა საკრებულოს თავმჯდომარეც გახდეთ. თვითმმართველობის კოდექსი უნდა შეისწავლოთ, გაერკვეთ კანონმდებლობაში, ბევრი წესი, რეგულაცია გექნებათ შესასწავლი. ხართ ამ ყველაფრისთვის მზად?

მერე რა. თქვენ ფეხბურთის თამაში იოლი გგონიათ? ასე შევისწავლი ყველაფერს. საკმაო ნიჭი გამაჩნია იმისთვის, რომ ყველაფერი ავითვისო და ვისწავლო, რაც საჭიროა. მაგის პრობლემა არ მექნება. მარტო სპორტსმენი არ ვიყავი, ხელმძღვანელადაც მიმუშავია, მინდვრის გარეთაც ბევრი საქმე მაქვს გაკეთებული.

საკრებულოს თავმჯდომარეობას რაც შეეხება, ამას დრო გვიჩვენებს. მე მომზადებული ვარ ყველანაირად, ჩემი სახელი არ მაძლევს იმის უფლებას, რომ მოვდუნდე.

• მოდით დავკონკრეტდეთ მაინც, რადგან თქვენს თითოეულ სიტყვას და განცხადებას უფრო მეტი ყურადღებით დააკვირდება ამიერიდან საზოგადოება. რას ფიქრობთ ბულვარში მიმდინარე მშენებლობაზე, მისაღებია თუ არა?

ჩემი პირადი პოზიცია ამაზე იქნება მაშინ, როცა შევალ საკრებულოში. მერე ვილაპარაკოთ ამ თემაზე.

• თუ არ ისაუბრებთ ამ საკითხებზე, ისე ვინ მოგცემთ ხმას?

ყველა ის კითხვა, რომელიც მტკივნეული იქნება ბათუმის და ბათუმელებისთვის, ყოველთვის ვიქნები იქ პრინციპული.

• თქვენ თქვით, რომ ყველაფრისთვის ხართ მზად, ამიტომ კონკრეტულ კითხვებსაც უნდა უპასუხოთ.

მე ბულვარში ვარ თითქმის გაზრდილი. აქ იყო ჩვენი სტადიონიც და ძველ ბულვარში მაქვს გატარებული ჩემი ცხოვრების ნაწილი. ასე, რომ არის რაღაც თემები, რომლებიც უნდა გადაიხედოს.

• რომელია გადასახედი თემა?

მოსაწონი მე მგონი არ იქნება ისეთი მშენებლობები, რომლებიც ბულვარს, ასე რომ ვთქვათ, დახურავს. ის მშენებლობა, რომელიც არ წაადგება ბულვარს და იქნება მიუღებელი, ყოველთვის ყველა ვიქნებით მაგის წინააღმდეგი.

• 16-სართულიანი ცათამბჯენის მშენებლობასაც ეხება ეს?

გადასახედი თემები არის ძალიან ბევრი და რა უნდა აშენდეს ან არ აშენდეს ამ დეტალებში ვერ შევალ. კიდევ ერთხელ ვამბობ, რაც იქნება მისაღები ბათუმელებისთვის, იმას დავუჭერ მხარს ყოველთვის.

• სასამართლომ ბათუმის მერიას უთხრა, რომ დისკრიმინაციულად ექცევა მუსლიმ თემს, როცა მათ მეჩეთის აშენების უფლებას არ აძლევს. თქვენ რას ფიქრობთ – აქვთ მუსლიმებს უფლება აიშენონ ბათუმში მეჩეთი?

ეს თავისთავად ცხადია, რომ ძალიან სერიოზული თემაა. ჩვენ ყველა დიდ პატივს ვცემთ მუსლიმ თემს და ეს თემაც ვიცი, გამიგია და მომისმენია. ეს საკითხიც იქნება ძალიან სერიოზულად მოსასმენი, ყველა მხარეს უნდა მოვუსმინოთ და რომელიც იქნება მისაღები და უმრავლესობაში, ცხადია, ამას ყველაფერს ექნება… აქ არის ბევრი საკითხი იურიდიული თუ სხვა, რომელიც უნდა ვნახო, განვიხილოთ.

სასამართლო როგორც იტყვის და განიხილავს, აქედან გამომდინარე იქნება. უნდა დავემორჩილოთ სასამართლოს. მე, როგორც ყოველთვის, მხარს დავუჭერ სიმართლეს და ვიქნები პრინციპული ყველა საკითხის მიმართ.

• წარმატებული სპორტსმენები საქართველოში არც თუ ეფექტური პოლიტიკოსები ხდებიან. თქვენი აზრით, რატომ მიდიან ოლიმპიური თუ მსოფლიო ჩემპიონები პოლიტიკაში და არ რჩებიან სპორტში, არ ზრუნავენ მის განვითარებაზე?

პოლიტიკაში თუ სპორტსმენები მივიდნენ, ძალიან კარგია, რადგან ჩვენც გვაქვს კარგი შეხედულებები. რატომ არის ცუდი, რომ კახა კალაძე პოლიტიკაშია.

• 5 ივლისის ამბებზე მინდა გკითხოთ, როცა ძალადობრივი ჯგუფები გამოვიდნენ და ჟურნალისტებს სცემეს. თქვენ რას ფიქრობთ ამაზე?

რა თქმა უნდა, არ არის მოსაწონი ეს. ჩემთვის ეს მიუღებელია. როგორ უნდა აწიო ხელი ადამიანზე. ვინც არ უნდა იყოს, იქნება ის ჟურნალისტი თუ სხვა მოქალაქე, მასზე ძალადობა მიუღებელი იქნება ჩემთვის ყოველთვის. ამაზე ორი აზრი არ არსებობს.

• ხშირად მმართველი პარტიის წევრებს უზღუდავენ საკუთარი აზრის თავისუფლად გამოხატვას, ან ნაკარნახები ფრაზებით ელაპარაკებიან საზოგადოებას, არ აქვთ უფლება პრესსამსახურთან შეთანხმების გარეშე ეკონტაქტონ მედიას და ასე შემდეგ. რამდენად კომფორტული იქნება ასეთ გარემოში მუშაობა თქვენთვის?

ჩვენს გუნდში ყოველთვის იქნება განხილვები. მე პირადად ვაპირებ, რომ ჩემი პოზიციები ყოველთვის დავაფიქსირო გუნდთან და მაქსიმალურად ვეცდები, რომ ერთობლიობაში, გუნდთან ერთად გავიტანოთ ესა თუ ის საკითხი. მე ყოველთვის ვიქნები სწორი აზრის დამცველი და მაქვს უნარი, რომ კრიტიკულიც ვიყო.

სპორტიც გუნდური თამაშია და ჩვენ ასე ვწყვეტთ ხოლმე საკითხებს. ვფიქრობ, არ გვექნება ამ მხრივ პრობლემა.

„რა დრო დაგვჭირდება საქართველოს მოსახლეობის სრულად ასაცრელად, თუ ვაქცინაცია ამავე ტემპით გაგრძელდება როგორც ახლა მიდის?” – ჰკითხეს დაავადებათა კონტროლის ეროვნული ცენტრის ხელმძღვანელს ამირან გამყრელიძეს, დღეს, 27 აგვისტოს, სპეციალურად გამართულ ვებინარზე.

გამყრელიძის ინფორმაციით აგვისტოში დღეში საშუალოდ 23 ათასი აცრა კეთდება. ვაქცინაციის გეგმით კი, წელს სულ ცოტა მოზრდილი მოსახლეობის 60% უნდა აიცრას, რაც მილიონ შვიდასი ათასი ადამიანია.

„სამიზნე მილიონ შვიდასი ათასი ადამიანის ორჯერადი აცრა ეს არის 3 მილიონ ოთხასი ათასი აცრა. მილიონ ასი ათასი აცრა ჩვენ უკვე ჩატარებული გვაქვს, ამიტომ ამ ტემპით [საშუალოდ 23 ათასი აცრით დღეში] წლის ბოლომდე 3 მილიონ რვაასი ათასი აცრა იქნება გაკეთებული – სამიზნეზე 400 ათასით მეტი, რაც კარგი მაჩვენებელია,“ – აღნიშნა ამირან გამყრელიძემ.

საქართველოში სულ ორი მილიონ შვიდასი ათასი მოზრდილი ცხოვრობს.

„თუ ყველა ავიცრებით, იქნება ძალიან კარგი შედეგი. ახლა ვმუშაობთ და ველოდებით სხვადასხვა გადაწყვეტილებას ჯანმრთელობის მსოფლიო ორგანიზაციიდან, შეიძლება ფაიზერი და მოდერნა გაუკეთდეთ 12 წლიდან მოზარდებს და ამ შემთხვევაში მოგვემატება კიდევ 200-250 ათასი მოზარდი. ასეთ შემთხვევაში, თუ დღევანდელი ტემპით წავედით, წლის მიზანსაც ვასრულებთ და სასურველზე მეტიც გვეყოლება აცრილი,“ – ამბობს ამირან გამყრელიძე.

მისი განმარტებით, რაც მეტი ადამიანი აიცრება, მით უფრო მეტად ძლიერი კოლექტიური იმუნიტეტი გამომუშავდება ქვეყანაში კორონავირუსზე და „ახალ წელს ძველებურად შევხვდებით“.

დღეს, 27 აგვისტოს, ბათუმის კათოლიკური ეკლესიის დიაკონი თენგიზ პარმაქსიზიშვილი კოვიდით გარდაიცვალა. ის ბათუმში „მედცენტრში“ იყო მოთავსებული.

დიაკონის გარდაცვალების შესახებ ოფიციალური ინფორმაცია გაავრცელა საქართველოს კათოლიკურმა ეკლესიამ.

„ლათინ კათოლიკეთა კავკასიის სამოციქულო ადმინისტრაცია მწუხარებით იუწყება, რომ გარდაიცვალა ბათუმის სულიწმიდის სამრევლოს დიაკონი თენგიზ პარმაქსიზიშვილი.

კვირადღეს, 29 აგვისტოს, 10.00 საათიდან მისი ნეშტი დასვენებულ იქნება ბათუმის ეკლესიაში, 12.00 საათზე წმიდა წირვას აღავლენს  ეპისკოპოსი მეუფე ჯუზეპე პაზოტო“, – ნათქვამია განცხადებაში.

ბოლო 24 საათში ქვეყანაში 73 ადამიანი გარდაიცვალა კორონავირუსით, მათ შორის აჭარაში 11 ადამიანია გარდაცვლილი.

დაავადებათა კონტროლის ეროვნული ცენტრის ხელმძღვანელს ამირან გამყრელიძეს დღეს გამართულ ვებინარზე ჰკითხეს, აპირებს თუ არა NCDC  რაიმე კამპანიის ჩატარებას ეთნიკური უმცირესობებით დასახლებულ თემებში, სადაც ხალხი ინფორმაციას ქართულ ენაზე ვერ იღებს.

„ჩვენ გაეროს ბავშვთა ფონდი სერიოზულად გვეხმარება. [ვაქცინაციის] ყველაზე დაბალი მაჩვენებელი გვაქვს სამცხე-ჯავახეთსა და ქვემო ქართლში, გასაგები მიზეზების გამო.

რადგან ეს ეთნიკური უმცირესობები ყველაზე მეტი აქ არიან. ამიტომ მათთან მიმდინარეობს ინტენსიური მუშაობა და აქ სერიოზულად გვეხმარება გაეროს ბავშვთა ფონდი. მაგრამ მეტი მუშაობა გვჭირდება,“ – განაცხადა ამირან გამყრელიძემ.

საგანგებო სიტუაციების მართვის სამსახურის განცხადებით, მომდევნო რამდენიმე დღის განმავლობაში მთელი საქართველოს მასშტაბით მოსალოდნელია ტემპერატურის მკვეთრი მატება.

„ასევე გარკვეულ რაიონებში მოსალოდნელია ძლიერი ქარი, რის გამოც, იზრდება  ტყისა და მინდვრის ხანძრის გაჩენის რისკი.  საგანგებო სიტუაციების მართვის სამსახური მოგიწოდებთ, გამოიჩინოთ მაღალი სამოქალაქო პასუხისმგებლობა, არ დაანთოთ ცეცხლი სასოფლო სამეურნეო სავარგულებზე, ტყის ან ველის სიახლოვეს და არ დატოვოთ ცეცხლის კერები უყურადღებოდ. გასათვალისწინებელია, რომ საყოფაცხოვრებო ნარჩენებს თვითაალება შეუძლიათ, შესაბამისად,ნუ დაანაგვიანებთ გარემოს. -“ ნათქვამია განცხადებაში.

საგანგებო სიტუაციების სამსახური მოუწოდებს მოსახლეობას, რომ დაკვამლიანების ან  ცეცხლის  შემჩნევის შემთხვევაში დაუყოვნებლივ დარეკონ 112-ში.

ფოთის მერობის კანდიდატად ბექა ვაჭარაძის წარდგენისას, პრემიერ-მინისტრმა ირაკლი ღარიბაშვილმა ოპოზიციონერ კანდიდატს გიგი უგულავას გარყვნილი და კორუმპირებული უწოდა.

„ჩვენ დღეს კიდევ ვდგავართ არჩევანის წინაშე. ფოთი ირჩევს ახალგაზრდა, გაურყვნელ, პატიოსან ადამიანს, რომელიც მოემსახურება თავის ფოთს და თავის ფოთელებს. მეორეს მხრივ არის კორუმპირებული, მართლაც დეგრადირებული პოლიტიკოსი, მარგინალიზებული გიგი უგულავა.

მე ძალიან მაინტერესებს რა უნდა ამ ადამიანს ფოთში? რატომ მოდის? კაცი, რომელიც არის ცნობილი ძარცვით და თანამედროვე ისტორიაში ყველაზე დიდი კორუფციონერია,“ – იკითხა ირაკლი ღარიბაშვილმა.

უგულავას ლანძღვის დასრულების შემდეგ პრემიერმა ფოთელებს მიმართა და უთხრა, რომ არჩევანის გაკეთება მარტივია.

„მთავრობა ყველაფერს გააკეთებს იმისთვის, რომ ყველა ის ხარვეზი, თუ რაიმე იყო ბოლო წლების განმავლობაში, მაქსიმალურად დროულად იქნეს გამოსწორებული. ამას შეძლებს ბექა. მაქსიმალური მხარდაჭერა ექნება ცენტრალური მთავრობისგან. ყველა იმ ხარვეზს, ყველა იმ შეცდომას თუ რაიმე იყო ბოლო წლების განმავლობაში, თუ რაიმე ძალისხმევა დავაკელით ჩვენ, აუცილებლად ძალიან მოკლე დროში გამოვასწორებთ. ვინაიდან ფოთი იმსახურებს უკეთესს. ფოთი იმსახურებს უფრო დიდი ტეპმებით განვითარებას,“ – განაცხადა პრემიერმა.

მერობის კანდიდატის წარდგენაზე სიტყვით გამოვიდა რეგიონული განვითარებისა და ინფრასტრუქტურის მინისტრი ირაკლი ქარსელაძე, რომელმაც ფოთელებს წყალმომარაგებისა და კანალიზაციის ჩავარდნილი პროექტის გამო ბოდიში მოუხადა.

„დღეს როცა მე აქ გამოვდივარ, ის თავის დროზე დროულად დანახული და დაწყებული აუცილებელი პროექტი, რომელიც 170 მილიონ ლარზე მეტ ინვესტიციას მოიცავს, მთლიანად ფოთის წყალმომარაგებას და წყალარინებას უზრუნველყოფს, სამწუხაროდ სხვადასხვა მიზეზების გამო გაჭიანურდა.

მნიშვნელობა არ აქვს მიზეზი რა არის, იმიტომ, რომ თქვენთვის შედეგი არის მთავარი. მე წარმოვადგენ იმ უწყებას, რომელიც ამ შედეგის მიღწევაზეა პასუხისმგებელი. ამიტომ ბოდიშს გიხდით იმ უხერხულობისთვის, იმ დაგვიანებისთვის, რომელიც დღემდე არის,“ – თქვა ირაკლი ქარსელაძემ.

მინისტრის თქმით უკვე გაფორმდა ხელშეკრულება კონტრაქტორ კომპანიასთან, რომელმაც აიღო ვალდებულება, რომ ერთი წლის ვადაში დაასრულებს ფოთის წყალმომარაგებისა და კანალიზაციის პროექტს.

___

საქართველოში 2 ოქტომბერს ადგილობრივი თვითმმართველობის არჩევნები იმართება.

ჯანდაცვის მინისტრი, ეკატერინე ტიკარაძე ამბობს, რომ მომდევნო ორი კვირის განმავლობაში კორონავირუსით გარდაცვალების კლების ტენდენციას არ ელოდება.

„ინფექციის გავრცელების კუთხით შემცირების ტენდენცია ბოლო დღეებში ფიქსირდება, თუმცა ეს არ ნიშნავს, რომ ჩვენ შეიძლება გვქონდეს ლეტალობის ტენდენციის კლების მოლოდინი.

ჩვენ მაქსიმალურად გვყავს გაძლიერებული კლინიკური ჯგუფი, მარინა ეზუგბაია, თენგიზ ცერცვაძე და ინეზა სულამანიძე მუდმივად იმყოფებიან კლინიკებში, მათ აქვთ გაწერილი გრაფიკი და კვლავ აზუსტებენ მკურნალობის ხარისხის იმ სტანდარტებს, რომელიც არის პროტოკოლით დადგენილი.

გვაქვს მოლოდინი, რომ ლეტალობის ის მაჩვენებელი, რომელიც საქართველოს მსოფლიოსგან გამოარჩევს და არის 1.32, შევძლებთ, რომ გავაუმჯობესოთ, რის შემდეგადაც არაერთი სიცოცხლის გადარჩენა მოხდება. თუმცა შემდგომი ორი კვირის მანძილზე ჩვენი მოლოდინი არის ნეგატიური, არ ველით გარდაცვალების კლებას“, – ამბობს ეკატერინე ტიკარაძე.

ბოლო დღეებში კორონავირუსით კლინიკებში 60-79 ადამიანი იღუპება. ტიკარაძის თქმით, ეს ტენდენცია მომდევნო დღეებშიც გაგრძელდება.

___

ბოლო 24 საათის მონაცემებით, ხელოვნური სუნთქვის აპარატზე იმყოფება 369 პირი, აქედან 40 აჭარაში, 213 – თბილისში.

ჯამში მძიმე მდგომარეობაშია 1584 პაციენტი.

დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, საქართველოს ნაყიდი ჰქონდა 600 ათასი დოზა „სინოფარმი“ და ეს დოზა ამოიწურა. შესაბამისად, „სინოფარმის“ პირველ დოზაზე რეგისტრაცია შეიზღუდა, „ველოდებით „სინოფარმის“ შემდეგ პარტიას.

ქვეყანამ იყიდა 600 ათასი დოზა. ეს 600 ათასი დოზა საკმარისია 300 ათასი ადამიანის ორჯერადად აცრისთვის. ამიტომ გადადებულია ეს 300 ათასი დოზა, ვინც მეორეჯერ იცრება. ეს შენახულია ყველასთვის და პირველ აცრაზე სადღაც ავედით 270 ათასზე და პლუს, ვისაც დაჯავშნილი აქვს.

მინდა განვმარტო, მხოლოდ პირველ დოზაზე და ჩაუწერლად მისვლა შეიზღუდა. ვისაც პირველი აცრა აქვს დაჯავშნილი, ყველა აიცრება. მეორე აცრა ვისაც აქვს დაჯავშნილი, შეუძლია ჯავშნის გარეშე მივიდეს და აიცრება მეორე აცრაზე.

ვისაც ჩინური ვაქცინა უნდა, მათ ვთავაზობთ აიცრან „სინოვაკით“, იგივე დამცველობითი უნარი აქვს. „სინოვაკზე“ აცრა უკვე 100 ათასზეა ასული“.

___

ბოლო 24 საათში საქართველოში კოვიდით 73 ადამიანი დაიღუპა, მათ შორის 11 აჭარაში. ჯანდაცვის მინისტრის განმარტებით, შემდეგი ორი კვირის განმავლობაში ლეტალობის მაჩვენებლის კლება მოსალოდნელი არ არის.

დღეს, 27 აგვისტოს, დაავადებათა კონტროლის ეროვნული ცენტრის ხელმძღვანელმა ჟურნალისტებთან საუბრის დროს პანდემიის პერიოდში ორსული ქალების გარდაცვალების შესახებაც ისაუბრა.

კითხვაზე, თუ რატომ იღუპებიან კორონავირისით დაავადებული ორსული ქალები და ხომ არ იგეგმება ორსულთა მკურნალობის პროტოკოლში რაიმე ცვლილება, გამყრელიძე ამბობს, რომ ორსულთა გარდაცვალების პრევენციის ერთადერთი გზა არის აცრა.

„პრევენცია არის ერთადერთი, ორსულები უნდა აიცრან. პანდემიის განმავლობაში, თუ არ ვცდები, სულ 13 ორსულია გარდაცვლილი.

პროტოკოლში იგეგმება თუ არა ცვლილება, ვერ გეტყვით, თუმცა სერიოზულად მუშაობს მეან-გინეკოლოგთა ასოციაცია და ჩართულია დაავადებათა კონტროლის ცენტრიც,“- ამბობს გამყრელიძე.

გუშინ 26 წლის ორსული ქალი გარდაიცვალა ქუთაისში, დღეს კი, როგორც ვრცელდება ინფორმაცია, თბილისში, ბოკერიას კლინიკაში, გარდაიცვალა კოვიდით ინფიცირებული 19 წლის ქალი.

საქართველოს ჯანდაცვის მინისტრი ეკატერინე ტიკარაძემ კორონავირუსით ორსულების გარდაცვალების გახშირებულ ფაქტებზე მედიასთან კომენტარი გააკეთა. მინისტრის თქმით, ხშირ შემთხვევაში კოვიდინფიცირებული ორსულების საავადმყოფოში გადაყვანა გვიან ხდება.

მინისტრს ჟურნალისტებმა კითხვა დღეს მომხდარ ფაქტთან დაკავშირებითაც დაუსვეს. 27 აგვისტოს დილას თბილისში, ერთ-ერთ კლინიკაში, 19 წლის ქალი მშობიარობის შემდეგ გარდაიცვალა. ის კოვიდინფიცირებული იყო.

“მე ყოველთვის ვერიდები ხოლმე კონკრეტულად პაციენტებზე საუბარს, იმიტომ, რომ თითოეული პაციენტის ესეთი მძიმე გამოსავალი ეს არის არამხოლოდ ოჯახის ტრაგედია, არამედ მთელი ქვეყნის ტრაგედია. თუმცა ჩვენ ამ გართულებებს ვაკვირდებით სამედიცინო და სტატისტიკურ ჭრილში. ჩართული არის გინეკოლოგთა ასოციაცია, რათა მათ დადონ ის კონკრეტული დასკვნები, რაც არის გარკვეული მიზეზი იმის, თუ რატომ გვაქვს ბოლო პერიოდში გახშირებული ლეტალური შემთხვევები ორსულების კომპონენტში.

თუმცა აქვე აუცილებლად უნდა დავძინოთ, რომ ეს არის რიგ შემთხვევაში დაგვიანებული სტაციონარიზაცია, გუშინ, მაგალითად, ერთ-ერთი ორსულის სამეგრელოს რეგიონიდან საავადმყოფოში გადმოყვანა იქნა საჭირო, თუმცა ამ ორსულს დარეკილი არ ჰქონდა 112-ზე, მაგრამ სამაგიეროდ პოსტი ედო ფეისბუქზე და კარგია, რომ ჩვენი საზოგადოებასთან ურთიერთობის სამსახური აკვირდება ყველა იმ ჯგუფს, რომელიც აქტიურია ფეისბუქზე, ჩვენ ვიღებთ აქედან დამატებით ინფორმაციებს. ის პაციენტები, რომლებიც არ მიმართავენ არც ექიმს და არც 112-ს და არჩევენ სოციალური მედიით კომუნიკაციას, აქტიურად ვცდილობთ ამ კუთხითაც სამინისტრო და სასწრაფო გადაუდებელი დახმარება იყოს ყურადღებით,” – განაცხადა ჯანდაცვის მინისტრმა.

ჟურნალისტების კითხვაზე, იგეგმება თუ არა კოვიდინფიცირებული ორსულების მკურნალობის პროტოკოლის ცვლილება, ჯანდაცვის მინისტრმა თქვა, რომ ამ საკითხის გადასაწყვეტად გინეკოლოგთა ასოციაციის დასკვნას ელოდება.

“ამასთან დაკავშირებით იმსჯელებენ გინეკოლოგთა ასოციაციაში, ისინი დადებენ დასკვნას და შესაბამისად ჩვენ შევიტანთ ყველა იმ საჭირო ცვლილებას, რომელიც საჭირო იქნება,” – განაცხადა ეკატერინე ტიკარაძემ.

27 აგვისტოს დილის მონაცემებით ბოლო 24 საათში საქართველოში კორონავირუსის 4 031 ახალი შემთხვევა დადასტურდა. ამავე პერიოდში ვირუსით გარდაიცვალა 73 ადამიანი.

ამ დროისთვის, stopcov.ge-ზე გამოქვეყნებული მონაცემებით, საქართველოში კოვიდსტატისტიკა ასეთია:

• მათ შორის გამოჯანმრთელებული – 473 502 , ბოლო 24 საათში – 4 585
• მათ შორის გარდაცვლილი – 7 101 , ბოლო 24 საათში – 73
• ბოლო 24 საათში ჩატარებული კვლევა ტესტით – 42 744, მათ შორის ანტიგენის სწრაფი ტესტით – 25 358, PCR ტესტით – 17 386
• დადებითობის მაჩვენებელი: დღიური – 9,43%, ბოლო 14 დღის – 10,7%, ბოლო 7 დღის – 10,4%
• სულ ჩატარდა – 1 095 069 აცრა, დღიურად აცრილია – 26 418
• კარანტინის რეჟიმში – 130
• სტაციონარში მეთვალყურეობის ქვეშ – 7 493
• კლინიკურ სასტუმროში მყოფი პირები – 3 205

დღეს ქვეყანაში გამოვლენილი ინფიცირების 4 031 ახალი შემთხვევიდან: თბილისში გამოვლენილია 1 639 შემთხვევა, აჭარაში – 449, იმერეთში – 493, ქვემო ქართლში – 247, შიდა ქართლში – 222, გურიაში – 127, სამეგრელო – ზემო სვანეთში – 294, კახეთში – 343, მცხეთა-მთიანეთში – 83, სამცხე-ჯავახეთში -100, რაჭა-ლეჩხუმსა და ქვემო სვანეთში – 34.

ამ ეტაპზე ინფიცირების მიმდინარე აქტიური შემთხვევაა 55 573, მათგან 7 493 ადამიანი მკურნალობს საავადმყოფოში, მათ შორის, თბილისის საავადმყოფოებში – 3 189, აჭარაში – 1 011, იმერეთში – 1 184.
ამ ეტაპზე მძიმე პაციენტია 1 584, მათ შორის, თბილისში – 669, აჭარაში – 161, იმერეთში – 343. ხელოვნური სუნთქვის აპარატზე იმყოფება 369 პირი,  მათგან თბილისში – 213, აჭარაში – 40, იმერეთში – 27.

44 875 პირი ვირუსის მკურნალობის კურსს გადის საცხოვრებელ ბინაზე.

22 წლის რაშან ზიადალიევი მარნეულში ცხოვრობს და თანამოაზრეებთან ერთად აქტიურად არის ჩაბმული ანტივაქსერულ კამპანიაში. ახალგაზრდები ცდილობენ პანდემიის პერიოდში სწორი ინფორმაცია მიაწოდონ მოსახლეობას კორონავირუსის საწინააღმედგო ვაქცინებთან დაკავშირებით. ისინი ამ გზით ცდილობენ გაუმკლავდნენ მითებს ვაქცინის შესახებ.

„სამოქალაქო ჩართულობისა და აქტივიზმის ცენტრი“ ორი წელია, რაც დაფუძნდა მარნეულში და პანდემიის პირველი დღიდანვე აქტიურად ვიყავით ჩართული მოსახლეობის ინფორმირებაში.

როგორც ვიცით, ეთნიკური უმცირესობებით დასახლებულ რეგიონებში მოსახლეობის საკმაოდ დიდი ნაწილი ვერ ფლობს სახელმწიფო ენას. საჭიროა დროულად მივაწოდოთ ამ ადამიანებს  სწორი ინფორმაცია, რომ აიცრან და დაიცვან რეგულაციები“, – ამბობს რაშან ზიადალიევი „ბათუმელებთან“.

რაშანი ამბობს, რომ  ახალგაზრდებმა შექმნეს მოხალისეების ჯგუფი, რომელიც უშუალოდაა ჩართული სხვადასხვა აქტივობაში. მათ შორის ეხმარებიან შეჭირვებულ ოჯახებს პანდემიაში.

„დიდი პრობლემა ქვემო ქართლის რეგიონში ის, რომ ძალიან გავრცელებულია მითები ვაქცინებთან დაკავშირებით. ძირითადად რუსულ წყაროებს ეცნობიან ადამიანები და ბევრს სჯერა, რომ აცრის შემდეგ ბევრი ადამიანი გარდაიცვალა.

რა თქმა უნდა, ეს არის დეზინფორმაცია და მოსახლეობას უნდა დავეხმაროთ სწორი, სანდო ინფორმაციის მიღებაში. ასეთ დროს ძალიან მნიშვნელოვანია უშუალოდ მათთან საუბარიც.

დეზინფორმაციის წინააღმდეგ ბრძოლის ერთ-ერთი საუკეთესო გზა არის პირადი მაგალითი. მაგალითად, როცა მე ავიცერი, მეკითხებოდნენ – „რაშან როგორ გრძნობ თავს?“ როცა დაინახეს, რომ კარგად ვიყავი, სხვებსაც გაუჩნდათ სურვილი აცრილიყვნენ.

ძალიან მალე ვიწყებთ ახალ პროექტს, რომლის ფარგლებში დაგეგმილი გვაქვს ვიდეოების გადაღება ცნობილი ადამიანების მონაწილეობით, ვინც აიცრა.

გვინდა, რომ ნახონ ეს ვიდეოები და დარწმუნდნენ, რომ ვაქცინაცია არის უსაფრთხო. გვინდა კლინიკებში აცრის პროცესიც გადავიღოთ, რომ მეტი ნდობა გაჩნდეს ვაქცინაციის მიმართ“, – გვეუბნება რაშანი.

აქტივისტი ახალგაზრდები რადიოგადაცემებსაც გეგმავენ ვაქცინაციასთან დაკავშირებით. ფიქრობენ, რომ სოციალურ ქსელებში ადვილად ვრცელდება ყალბი ინფორმაცია და ამის საპიროსპიროდ ალტერნატიული წყაროებიც უნდა არსებობდეს, რომ ადამიანები არ იმსხვერპლოს დეზინფორმაციამ.

„ანტიდასავლური პროპაგანდაც აქტიურად მუშაობს. ამბობენ, რომ ვაქცინა ამერიკელებისაა და რომ მილიარდელები გახდნენ ვაქცინების გაყიდვით, რომ სპეციალურად შექმნეს ვირუსი და ასე შემდეგ. ძალიან დაბალი მაჩვენებელია ვაქცინაციის მარნეულში, ახალგაზრდებში ნაკლებად, მაგრამ ასაკოვნებში უფროა სკეპტიციზმი, ამიტომ ცნობიერების ამაღლების მიზნით ძალიან მნიშვნელოვანია, როგორც ჩვენი, ახალგაზრდების აქტიურობა, ასევე კანდიდატების, ქალაქის მერის, საჯარო მოხელეების, ბისზნესმენების, რომ უფრო მეტი ნდობა გაჩნდეს ვაქცინების მიმართ და უფრო მეტად დაიცვან ადამიანებმა უსაფრთხოების წესები“, – გვეუბნება რაშანი.

რაც შეეხება რეგულაციებს, მისი თქმით, მოსახლეობა ტრანსპორტის შემთხვევაში უფრო იცავს წესებს, მაგალითად, უფრო მეტად ატარებენ ადამიანები პირბადეს, თუმცა საჯარო სივრცეებში რეგულაციებს ნაკლებად იცავენ.

„ტარდება ქორწილებიც და მასობრივი ღონისძიებებიც. რადგან საარჩევნო წელია ერიდებიან ჯარიმებს, თუმცა არც ამ ჯარიმების ეშინია უკვე მოსახლეობას, რადგან დავინახეთ, რომ წინა წელს დაწერილი ჯარიმები ყველას ჩამოაწერეს.

რაც შეეხება ანტივაქსერულ განწყობებს, სამედიცინო პერსონალში არ შემინიშნავს, როცა ავიცერი, ვნახე, რომ პოზიტიურად  იყო განგაწნყობილი ექიმი, პედაგოგებიც აქტიურად არიან ჩართული ვაქცინაციის კამპანიაში, თუმცა არის ცალკეული საწინააღმდეგო შემთხვევებიც“.

რაშანი ამბობს, რომ ცნობიერების გაზრდის მიზნით აპირებენ, ქალაქის ცენტრში ვაქცინაციის წამახალისებელი დიდი ბანერიც განათავსონ.

„პირდაპირ საუბარიც ძალიან მნიშვნელოვანია ასეთ დროს, თუმცა პანდემიის გამო კარდაკარ სიარულს მაინც ვერიდებით და ვცდილობთ დისტანციურად ვიაქტიუროთ“, – ამბობს რაშანი.

დღეს, 26 აგვისტოს, პარტია „ევროპულმა საქართველომ“ საზოგადოებას გააცნო იმ პირთა ვინაობა, ვინც პარტიის სახელით 2 ოქტომბერს დაგეგმილ თვითმმართველობის  არჩევნებში ბათუმის საკრებულოში მოსახვედრად იბრძოლებს. პარტიული სიის პრეზენტაცია ბათუმში გაიმართა და მას პარტიის პოლიტსაბჭოს მდივანი გიგი წერეთელი უძღვებოდა.

ბათუმის საკრებულოს თავმჯდომარეობის კანდიდატი, რომელზეც გაერთიანებული ოპოზიცია შეთანხმდა, 2021 წლის თვითმმართველობის არჩევნებზე ექიმი ვახტანგ კალოიანი იქნება. ვახტანგ კალოიანი ასევე იქნება „ევროპული საქართველოს“ სიის პირველი ნომერი ბათუმში.

„ჩემთვის დიდი პატივია ვიყო მაჟორიტარობის კანდიდატი ძველი ბათუმი-რუსთაველის ოლქში და ვიყო ერთ-ერთი ყველაზე ევროპული და თვითმმართველი ქალაქის საკრებულოს თავმჯდომარეობის კანდიდატი. ჩვენ არ გვჭირდება ცვლილებები ცვლილებებისთვის. ჩვენ გვჭირდება ცვლილება, რომლითაც სარგებელს ნახავს თითოეული ჩვენი მოქალაქე,“ – თქვა წარდგენისას ვახტანგ კალოიანმა.

„ევროპული საქართველოს“ პარტიული სია ბათუმის საკრებულოში ასე გამოიყურება:

1. ბადრი გორგაძე

2.ნონა რომანაძე

3.გიორგი ქამადაძე

4.ნინო ხარჩილავა

5.ვასო ჩხარტიშვილი

6.გიორგი ვაშაყმაძე

7.ნანა მიქელაძე

8.გიორგი ბეჟანიძე

9.მედეა გოგრაჭაძე

10.თამაზ გორგაძე

11.სალომე ხიმშიაშვილი

12.ზაირა დავითაძე

“ევროპული საქართველოს” კანდიდატების წარდგენას ესწრებოდა ბათუმის მერობის კანდიდატი გიორგი კირთაძე „ერთიანი ნაციონალური მოძრაობიდან“.

ბათუმში 7 სამაჟორიტარო ოლქია. ყველა ოლქში გაერთიანებულ ოპოზიციას საერთო კანდიდატი ჰყავს. ესენი არიან:

1. ვახტანგ კალოიანი, „ევროპული საქართველო“ – ძველი ბათუმის დასახლება
2. ბექა დიასამიძე, „სტრატეგია აღმაშენებელი“ –  კახაბრის, სამრეწველო და აღმაშენებლის ერთეულები
3. ნაზი ფუტკარაძე, „ერთიანი ნაციონალური მოძრაობა“ –  ჩაქვი, განთიადი, მწვანე კონცხი, ბარცხანა
4. გენო თებიძე, „ლელო საქართველოსთვის“ – ხიმშიაშვილის დასახლება
5. ნოდარ დუმბაძე, „ერთიანი ნაციონალური მოძრაობა“ – ჭაობის დასახლება
6. დიმიტრი დარჩია, „დროა – ელენე ხოშტარია“ – მანთაშევისა და ბონის დასახლება
7. ნუგზარ ფუტკარაძე, „ერთიანი ნაციონალური მოძრაობა“ – ადლია, ანგისის დასახლება

დასავლეთ საქართველოს მუფთის ყოფილი მრჩეველი და აქტივისტი თემურ გორგაძე „გირჩი – მეტი თავისუფლებას“ სიის პირველი ნომერია ბათუმის საკრებულოში. რას გეგმავს თემურ გორგაძე გამარჯვების შემთხვევაში და როგორ ხედავს ქალაქის მომავალს. პროპორციულ სიაში ამ პარტიას ბათუმში 3 ადამიანი ჰყავს. მერობის კანდიდატი კი გიორგი ფუტკარაძეა. „ბათუმელები“ საკუთარი პლიტიკური გეგმების შესახებ ამჯერად ინტერვიუს გთავაზობთ თემურ გორგაძესთან.

• ბატონო თემურ, თქვენ ბათუმში აქამდე გიცნობდნენ როგორც მუფთის მრჩეველს და აქტივისტს მეჩეთის მშენებლობის საკითხებში. ამ სფეროს ჩამოშორდით, თუ ისევ აპირებთ ამ მიმართულებით მუშაობას?

მარტო სასულიერო და პოლიტიკური არა, სხვა აქტივობებიც მქონდა. ვმუშაობდი არასამთავრობო ორგანიზაციებში, მქონდა ჩემი სატელევიზიო გადაცემაც. ერთადერთი, რაც შეიცვალა არის ის, რომ მუსლიმთა სამმართველოში აღარ ვმუშაობ. ახლა დამერქვა პოლიტიკოსი, თუმცა ჯერ კარგად ვერ ვირგებ ამ ამპლუას.

• რადგან რელიგიური ორგანიზაციის წარმომადგენელი იყავით, კონსერვატორული შეხედულებები უფრო უნდა გქონოდათ თითქოს, ყოველ შემთხვევაში, ასეთია სტერეოტიპული აღქმები. რატომ „გირჩი – მეტი თავისუფლება“, რა კონკრეტული თანხვედრა გაქვთ ამ პარტიასთან?

ის, რომ თუ რელიგიური ხარ, მაინც და მაინც კონსერვატორი უნდა იყო, არასწორია და არ მესმის ამის, რადგან მე ასეთი ვიყავი მაშინაც, როცა არ ვიყავი პარტიაში. სულ მჯეროდა იმის, რომ ადამიანი არის თავისუფალი არსება და, შესაბამისად, ყველაფერი, რასაც აკეთებს, არის მისი თავისუფალი ნებიდან გამომდინარე.

მე ვარ მუსლიმი, მაგრამ მე თუ რელიგიური გაგებით ცოდვას ჩავიდენ, ამის გამო ვერავინ დამსჯის. ამის სასჯელი არის იმქვეყნად და მე, როგორც რიგით ადამიანს, მგონია, რომ ამ ქვეყანაზე ცოდვის ჩადენის უფლებაც უნდა მქონდეს. ჩემთვის ეს არის თავისუფლება. როდესაც გაქვს იმის კეთების უფლება, რაც გინდა. ეს არის ჩემთვის თავისუფლება.

„გირჩამდეც“ მჯეროდა ამის, ჩემთან, ხულოში, მეძახდნენ  მეტსახელს – „არ შემეხო, არ შეგეხები“. ასე მჯერა მე ცხოვრებაში, რომ ერთმანეთის საქმეში არ უნდა ჩავერიოთ.

• თქვენი სხვა რომელი ღირებულებებია „გირჩის“ ღირებულებებთან თანხვედრაში?

ზოგადად, „გირჩი“, რატომღაც მხოლოდ ნარკოპოლიტიკასთან ასოცირდება. მე მაინც ვიტყვი, რომ ერთადერთი პარტია ვართ საქართველოში, რომელიც ამბობს, რომ თავდაცვის ბიუჯეტი უნდა იყოს მშპ-ზე მიბმული, უნდა იყოს მშპ-ს მინიმუმ 5 პროცენტი, რაც დღევანდელი თავდაცვის ბიუჯეტს გააორმაგებდა.

ასევე, თუ სწორად მახსოვს, სადღაც საქართველოს უძრავ-მოძრავი აქტივების 67 პროცენტი სახელმწიფო საკუთრებაშია. ერთადერთი პარტიაა „გირჩი“, ვინც სწავლობს და საუბრობს ამ თემაზე და პროგრამაშიც გვაქვს გაწერილი. ეს სახელმწიფო აქტივები, რომელსაც სახელმწიფო კრუხივით აზის, შემდეგ კი 1 ლარად გადასცემენ საკუთარ საძმაკაცოს და სანათესაოს,  უნდა გახდეს პროტესტის საგანი.

• საკრებულოში თუ შეხვალთ, რა იქნება თქვენი მთავარი საკითხები ქალაქთან, მის განვითარებასთან დაკავშირებით, იქნებ გვითხრათ ამაზე თქვენი აზრი, თუ როგორ ხედავთ ამ თემებს?

ვინც ამბობს, რომ საკრებულოში შევალ და ამას და იმას ვიზამო, ტყუილია და არ მჯერა ასეთი ხალხის.

• აბა, რისთვის შედიხართ?

ბოლო თვეებია, რაც ჩემი საქმიანობის ძალიან დიდი ნაწილი მერიის ვებგვერდის შესწავლას დავუთმე. მაგალითად, 2021 წლის ბიუჯეტის პროექტი რომ უდევთ, იმავე ფაილში 4-5 ადგილზე წერია 2020-ში. ადამიანებმა, რომლებმაც ეს ბიუჯეტი გააკეთეს, არც წაიკითხეს, აიღეს წინა პროექტი, ჩააკოპირეს შიგნით რაღაც ციფრები და დაამტკიცეს.

მე თუ ვიქნები საკრებულოში, ყოველთვის წავიკითხავ ბიუჯეტს. შესწავლის დროს ვაკეთებდი შედარებას, თუ რამდენი ადამიანია სხვადასხვა ქალაქის მერიაში დასაქმებული. მაგალითად, ბათუმის მერიას 2622 ადამიანი ჰყავს დასაქმებული და ამდენ ადამიანს ვუხდით ხელფასს ბიუჯეტიდან, მაშინ, როცა თბილისის მერიაში 3 900-მდე პირია დასაქმებული.

ბათუმში 153 ათასი ადამიანი ვცხოვრობთ, ქუთაისში  – 147 ათასი. ჩვენ 2622 დასაქმებული გვყავს მერიაში, ქუთაისს კი – 340 დასაქმებული.

• საკრებულოს დონეზე ამ პოლიტიკის შეცვლა შესაძლებელია?

ბუნებრივია. როდესაც ბიუჯეტი შემოვა საკრებულოში, მე ამ საკითხზე მექნება რეაგირება და ვიტყვი, რომ ეს იდიოტობაა. მერიაში „ოცნებას“ პარტიული აქტივი ჰყავს ჩაყრილი და ამათ ვუხდით ჩვენ ფულს. 2020 წლის ბიუჯეტი შემცირდა, დასაქმებულების რაოდენობა კი არა. 2021 წლის ბიუჯეტიც შემცირებულია, თუმცა დასაქმებულთა რაოდენობა გაიზარდა. მოიყვანეს აქტივისტები და დაასაქმეს, რომ არჩევნები მოიგონ.

როცა ბიუჯეტი დეტალურად წავიკითხე, სადღაც 30 მლნ-მდე ლარი იფლანგება, რომელიც შეიძლება ეფექტურად და ნორმალურად დახარჯო.

• რა არის კიდევ ამ ქალაქში შესაცვლელი, როგორი უნდა იყოს მშენებლობების, ინფრასტრუქტურის პოლიტიკა, კულტურული მემკვიდრეობა, რეკრეაციული ზონები – რა პოზიცია გექნებათ ამ საკითხებზე?

პირველ რიგში, რეალური თვითმმართველობაა საჭირო. ჩვენ ხომ ვიცით, ვისი დანიშნულია დღევანდელი ბათუმის მერი? ეს ხომ არ არის თვითმმართველობა.

ასევე, ბათუმს თავისი ქონების განკარგვის უფლება რეალურად რომ არ აქვს, ესეც ხომ ვიცით? არ შეიძლება რეგიონში ფული იკრიბებოდეს, მიდიოდეს ცენტრალურ ბიუჯეტში და შემდეგ თბილისი წყვეტდეს, ვის რამდენი მოგვცეს ან მოგვცეს თუ არა საერთოდ. ესეც არ არის რეალური თვითმმართველობა. როგორც ხდება გერმანიაში, ამერიკაში, ასე უნდა იმართებოდეს თვითმმართველობა.

მაგალითად, ამერიკაში ადგილობრივი მოსახლეობა ირჩევს თავის შერიფებს, ჩვენთან კი შს მინისტრს ნიშნავს ბიძინა და შემდეგ ის ნიშნავს ბათუმის პოლიციის უფროსს. ეს არ არის თვითმმართველობა.

ის, რომ ქალაქში მიწების, ქონების გადაცემა ხდება ფეშქაშად პარტიულ შემწირველებზე, ესეც არასწორია. განაშენიანებას რაც შეეხება, ეს არ არის საკითხი, რაშიც მე კარგად ვერკვევი, მაგრამ ვხედავთ ერთ რამეს, რომ რეგულაციების დაცვას მოითხოვენ პატარა მშენებლობებისგან, მაგრამ მსხვილ მშენებლებს, რომლებიც „ოცნების“ შემწირველები არიან, სულ ფეხებზე ჰკიდიათ კანონი და რეგულაცია.

საერთოდ, როცა რამეს აშენებ, თუკი ვინმეს აზიანებს, იქნება ეს მეზობლები თუ იერსახე, ჩრდილი ადგება ვინმეს საცხოვრებელს თუ სხვა რაიმე ზიანი, ამაზე სასამართლომ უნდა იმსჯელოს.

როგორი სახლი უნდა ავაშენოთ და რა ფორმის, ვფიქრობ, ეს იმ კონკრეტულ უბანს უნდა შეუთანხმო და არა მერიას, რომელიც მხოლოდ ფულს აკეთებს ასეთი პროექტებისგან.

• ბულვარზე, რეკრეაციულ ზონებზე რას ფიქრობთ? 

ჩემი აზრით, პრობლემა არის იმაში, როცა ჩვენს საერთო საკუთრებას აძლევენ თავიანთ მხარდამჭერებს და მეგობრებს ფეშქაშად. მაშინ უნდა გავაპროტესტოთ, როცა ეს ხდება. თუ ვიღაც კეთილსინდისიერი მყიდველია, რას ააშენებს კერძო საკუთრებაში, ამის კონტროლის მომხრე არ ვარ.

რაც შეეხება ინფრასტრუქტურას, ამ ქალაქში მეტ-ნაკლებად მოწესრიგებულია, თუმცა არის ადგილები, სადაც მოსაწესრიგებელია. მაგალითად, ბარცხანის დასახლებისკენ ყველაფერი გადათხრილია, ქალაქის შემოსასვლელში ორი ხიდი გვაქვს და ორივე გადაკეტილია, რის გამო საცობებია ტურისტულ სეზონზე და გადაჭედილია გზები.

• მეჩეთის მშენებლობაზე მინდა გკითხოთ. როგორც ვიცით, ბათუმში ახალი მეჩეთის მშენებლობის ნებართვის გაცემაზე მერია უარს ეუბნება მუსლიმებს. საკრებულოში ყოფნის შემთხვევაში რა შეგიძლიათ ამ პროცესს შესძინოთ?

სავარაუდოდ, ვერაფერს შეცვლის ერთი თემურ გორგაძე საკრებულოში ამ მიმართულებით, მაგრამ მე რაც შემიძლია და რასაც აქამდე ვაკეთებდი, იმას გავაკეთებ. შემიძლია საჯაროდ, ხმამაღლა ვილაპარაკო ამ საკითხზე სხდომებზე.

ამ ქვეყანაში მეჩეთის მშენებლობა პოლიტიკური საკითხია, რადგან ყველა ხელისუფლება, ყველა პოლიტიკური პარტია, არამარტო ახლანდელი, ცდილობს რაღაცნაირად დომინანტ რელიგიურ ჯგუფს ეკეკლუცოს, რომ მისგან ხმები წამოიღოს. სანამ დომინანტი ჯგუფის მოსყიდვა რელიგიური უმცირესობის დაჩაგვრის ხარჯზე ხდება, ეს საკითხი არ მოგვარდება.

მე შემიძლია საჯაროდ, სხდომებზე, მედიაში, ვიყვირო. ბოლომდე გულწრფელი რომ ვიყო გეტყვით, რომ მომხრე ვიყავი და ახლაც ვარ იმის, რომ საინიციატივო ჯგუფმა ახალი მეჩეთის მშენებლობა ახლავე დაიწყოს და ფეხზე დავიკიდოთ მერიაც და მაგათი პროექტიც.

• ეს ხომ კანონის წინააღმდეგ მოქმედებას ნიშნავს?

სად არის კანონი და სამართალი? ჩვენ ხომ ფორმალურად ყველა ეტაპი გავიარეთ, სამი წელი ხომ მარტო სასამართლოს ველოდეთ, სასამართლოც ხომ მოვიგეთ, მეტი რა შეგვიძლია ვქნათ. კანონის და სამართლის წინააღმდეგ იმ მეჩეთის ტერიტორიაზე 9 ეკლესიაა აშენებული, მათ შორის ნაწილი სახელმწიფო საკუთრებაზეა, იმათ კანონი არ ეხება?

რადგან ამ საკითხში არ გვაქვს სახელმწიფო, არ გვაქვს სასამართლო, ისე უნდა მოვიქცეთ, როგორც სახელმწიფო გვექცევა. სხვა გამოსავალი მითხარით მაშინ. ჩვენ სამართალი არ გვაქვს.

ჩოლოქში ადამიანმა სამი ინსტანციის სასამართლო მოიგო და იუსტიციის სახლი მაინც არ ურეგისტრირებს მიწას. მეჩეთთან მიმართებაშიც ეგ არის საკითხი, რომ სასამართლო არ გვაქვს, არც სახელმწიფო არ გვაქვს და ჩემი ნება რომ იყოს, ხვალვე დავიწყებდი მეჩეთის მშენებლობას.

• თუ ყველაფერი პოლიტიკურ ნებაზეა დამოკიდებული, მაშინ რა აზრი აქვს საკრებულოში თქვენს ყოფნას, რატომ უნდა მოგცეთ ხმა ამომრჩეველმა?

ყველაფერი პოლიტიკური ნებაა მეჩეთთან მიმართებაში. ამომრჩეველს კი ვეუბნები, რომ თუ საკრებულოში მოვხვდები, ყველა ამ არასწორ ნაბიჯზე, ბიუჯეტის არასწორ  ხარჯვაზე, პარტიულ და ნეპოტისტურ დასაქმებებზე და მსგავს საკითხებზე მექნება მკვეთრი და მწვავე პოზიცია. შევეცდები, მაქსიმალურად ნაკლები ამოვიღოთ ადამიანებისგან და მეტი ფული დავუტოვოთ მოქალაქეებს. გავაკონტროლოთ ბიუჯეტის ხარჯვა.

აჭარის ჯანდაცვის სამინისტროს ინფორმაციით, 26 აგვისტოდან კორონავირუსის საწინააღმდეგო ვაქცინაცია მაღალმთიანი აჭარის სოფლებშიც იქნება შესაძლებელი.

„ხულოს, შუახევის, ქედის, ხელვაჩაურისა და ქობულეთის მუნიციპალიტეტების სოფლებში ამცრელი ბრიგადები თემის საექიმო ამბულატორიებში ვაქცინაციას სისტემატურად ჩაატარებენ.

გასვლითი ბრიგადების ვიზიტების მიზანია იმუნიზაციის გეოგრაფიული არეალის გაზრდა და მაქსიმალური მოცვა, ასევე მოწყვლადი ჯგუფებისთვის სერვისის ხელმისაწვდომობა“, – აცხადებს აჭარის ჯანდაცვის სამინისტრო.

როგორც ჯანდაცვის სამინისტროში „ბათუმელებმა“ დააზუსტა, ამცრელი ბრიგადები ეტაპობრივად გადაინაცვლებენ სოფლებსა და თემებში. „ამის შესახებ მოსახლეობა წინასწარ იქნება ინფორმირებული და ყველა მსურველი აიცრება“, – გვითხრეს ჯანდაცვაში.

მოსახლეობას შესაძლებლობა ექნება სურვილის მიხედვით აიცრას „სინოფარმის“, „სინოვაკისა“ და „ფაიზერის“ ვაქცინით.

სამინისტროს ინფორმაციით, დღეს, 26 აგვისტოს, ვაქცინაცია ხიხაძირის თემში ჩატარდა. ამ დროისთვის აჭარაში სულ 127 850 ვაქცინაა გამოყენებული, მათგან 37 727 ორი დოზითაა აცრილი.

სტატისტიკის ეროვნული სააგენტოს ინფორმაციით, აჭარაში 354 905 ადამიანი ცხოვრობს.

„ზოგადად, დელტა შტამი უფრო სწრაფად ვრცელდება ორსულებში იმუნური სტატუსიდან გამომდინარე და ასევე შედარებით მძიმე მიმდინარეობა შესაძლოა გამოიწვიოს ორსულებში,” – განაცხადა საქართველოს ჯანდაცვის მინისტრის მოადგილემ, თამარ გაბუნიამ ჟურნალისტებთან საუბრისას.

მისივე თქმით, სწორედ ამიტომ მნიშვნელოვანია პრევენციული ზომების გატარება და თუ ორსული დაინფიცირდა, ძალიან სწრაფად მოხდეს შესაბამისი რეაგირება.

„უფრო ეს უკავშირდება იმ ბიოლოგიურ მახასიათებლებს, რაც, ზოგადად, ორსულობის პერიოდში ორგანიზმს აქვს და ამ შტამის ქცევას. საბედნიეროდ, პირველი ტალღის პერიოდში და ეს ორიგინალური, საწყისი შტამი რაც იყო კორონავირუსის, მსგავსი ტიპის რეაქციებს არ იწვევდა და მინიმალური იყო ორსულების ინფიცირების შემთხვევები. ასევე გარდაცვალებაც. თუმცა ამ შემთხვევაში დელტა შტამი მეტი აგრესიულობით ხასიათდება, განსაკუთრებით ორსულებთან მიმართებაში,” – განაცხადა მინისტრის მოადგილემ.

მინისტრის მოადგილის  განცხადებით, ზუსტი მონაცემი რამდენი ორსული გარდაიცვალა, ჯერ არ აქვთ.

„ორსულების გარდაცვალების აუდიტს ატარებს დაავადებათა კონტროლის ცენტრი იმისთვის, რომ ეს სტატისტიკური მონაცემი გვქონდეს,” – განმარტა გაბუნიამ.

ჯანდაცვის მინისტრის მოადგილის განმარტებით, შეიქმნება ახალი სერვისი ორსულთათვის, კერძოდ, საინფორმაციო ცხელ ხაზზე: 1522 დაემატება მეან-გინეკოლოგების  მომსახურება.

„ორსულებში დელტა შტამი ნამდვილად უფრო დიდი რისკის მატარებელია, ვიდრე სხვა პირებში. ამდენად ორსულებისთვის პირველ რიგში უაღრესად მნიშვნელოვანია პრევენცია, აცრა. ფაიზერით აცრა შესაძლებელია და მიმდინარეობს. ასევე სოციალური დისტანციის დაცვა და პირბადის გამოყენება. ახლა რაც შეეხება სამედიცინო სერვისის მიწოდების ნაწილს. ორსულებისთვის სპეციალური კონსულტაციის გაწევისთვის 1522-ს მიმდინარე დღეებში დაემატება მეან-გინეკოლოგების სერვისი. მათ ტრენინგი  ჩაუტარდათ. ისინი ოჯახის ექიმებთან ერთად გასცემენ რეკომენდაციებს. საუბარია მსუბუქ ორსულებზე, რომლებიც იმყოფებიან ბინაზე.

ბინაზე მყოფი პირებისთვის ჩვენ ისედაც ვახორციელებთ ლაბორატორიულ გამოკვლევებს, ამ პროგრამაში ჩაერთვება მეორე-მესამე დონის პენინატალური დაწესებულებები, ამბულატორიული სპეციალიზებული სერვისისთვის, რათა ორსული, რომელიც საჭიროებს მეთვალყურეობას კოვიდინფექციის გამო, მივიდეს არა სტანდარტულ საავადმყოფოში, არამედ მივიდეს სპეციალიზებულ კლინიკაში და მიიღოს სპეციალისტის მომსახურება ადგილზე. ძალიან მოკლე ხანში ეს კომპონენტი ამოქმედდება.

მობილიზებულია ჰოსპიტალური საწოლები ორსულებისთვის. ოდნავ მაინც, თუ ამისი საჭიროება არსებობს, ჩვენ არ უნდა დაველოდოთ მდგომარეობის დამძიმებას და ორსული უნდა იყოს სამედიცინო დაკვირვების ქვეშ. ამ კუთხით რაიმე დეფიციტი არ არის. ორსულს თუ სჭირდება ჰოსპიტალური მართვა, ის ჰოსპიტალში მოხვდება. დაახლოებით 120 საწოლია მობილიზებული თბილისში, 50 საწოლია ქუთაისში, სხვა რეგიონებშიც არის შესაძლებლობა ორსულს ჰოსპიტალური მეთვალყურეობა გაეწიოს,” – განაცხადა თამარ გაბუნიამ.

დღეს ბათუმში 100 წლის ზექიე დოლიძე აიცრა. როგორც თავად ამბობს, 100 წელი 17 მაისს შეუსრულდა. ზექიემ „ბათუმელებს“ უთხრა, რომ აცრის გადაწყვეტილება თავად მიიღო.

„ზოგმა მითხრა არ უნდა, ზოგმა მითხრა – უნდა, გაიკეთე. მე ჩემი სურვილით მოვედი. იკეთებს [ვაქცინას] ხალხი და მეც გავიკეთებ, ცუდი რაა ამაში. მოქალაქეებს ვურჩევ გაიკეთონ ვაქცინა. აიცრან და დაცული იქნებიან. იკეთებს ხალხი. რატომ ეშინიათ? რაა საშიში, მე მიკვირს,“ – გვითხრა ზექიე დოლიძემ.

ზექიეს ოჯახის ექიმის, ნანა მიქელაძის თქმით, 100 წლის ქალი აცრას დიდი ხანი გეგმავდა.

„მე ვარ მისი ოჯახის ექიმი. მითხრა: „ნანა, ვაქცინის გაკეთება მინდაო. საჭიროა, ჯანმრთელი რომ ვიყო და გავიკეთებო.

მე ვუთხარი, ჩვენ გვყავს ბრიგადა, რომელიც სამინისტრომ შექმნა. სახლშიც აკითხავენ ასაკოვან ან შეზღუდული უნარების მქონე პაციენტებს-მეთქი. ვაპირებდი დამერეგისტრირებინა და გამეშვა ამცრელი ბრიგადა, მაგრამ მომასწრო და თავად მოვიდა აცრის გასაკეთებლად,“ – ამბობს ნანა მიქელაძე.

100 წლის ზექიე დოლიძე ბათუმის რუსთაველის უნივერსიტეტში მივიდა ასაცრელად. აქ ვაქცინაცია რეგისტრაციის გარეშე ტარდება ყველა ვაქცინით, რომელიც საქართველოშია, გარდა „ასტრაზენაკასი“.

ზექიე ამბობს, რომ ყველა მოქალაქე ვალდებულია აიცრას და ასე შეიტანოს თავისი წვლილი პანდემიის დამარცხებაში.

26 აგვისტოს დილის მდგომარეობით აჭარაში ბოლო 24 საათის განმავლობაში კორონავირუსის 494 ახალი შემთხვევა დადასტურდა.

ამ დროისთვის აჭარის კლინიკებში 1 024 ინფიცირებული მკურნალობს, აქედან 163 მძიმე პაციენტია. 34 პაციენტი კი მართვით სუნთქვაზეა.

კოვიდსასტუმროში მოთავსებულია 1 270 პაციენტი.

ამ დროისთვის აჭარაში 7 790 პირია თვითიზოლაციაში.