საქართველომ 2021 წლის აპრილში 500 მილიონი აშშ დოლარის ევრობონდები უნდა დაფაროს. სახელმწიფო ამ ვალის დაფარვას მიმდინარე წელს გეგმავდა, თუმცა საბოლოოდ გადაწყდა, რომ ძველი ვალი ახალი ვალით დაიფაროს, ანუ სახელმწიფომ ახალი ევრობონდები უნდა გამოუშვას.
ევრობონდები 2011 წელსაა გამოშვებული. 2011 წლის აპრილში საქართველოს მთავრობამ 500 მლნ. აშშ დოლარის მოცულობის 10-წლიანი ობლიგაციების ემისია განახორციელა ევროპის ბაზრებზე. მთავრობამ მაშინ ამ გზით გადაფარა 2008 წლის ევროობლიგაციები 417 მლნ აშშ დოლარის ოდენობით, ხოლო საგარეო ვალი 83 მლნ დოლარით გაიზარდა.
2021 წელს დასაფარავი სუვერენული ევრობონდის რეფინანსირებისათვის სახელმწიფო ბიუჯეტში გათვალისწინებულია ახალი ევრობონდის გამოშვება 1,6 მილიარდი [1 656 850 000] ლარის ფარგლებში. თუმცა ბიუჯეტი 2020 წლის 29 დეკემბერს დამტკიცდა, დღევანდელი, 2021 წლის 11 აპრილის ოფიციალური გაცვლითი კურსით კი, 500 აშშ დოლარი 1,7 მილიარდზე მეტი ლარი ღირს.
ევრობონდები, ობლიგაციები და სხვა ფასიანი ქაღალდები ვალის აღების ფორმებია, რომლებიც გამოშვებული აქვს როგორც სახელმწიფოს, ისე ნავთობის კორპორაციას და სხვა სახელმწიფო კომპანიებს.
2021 წელს სახელმწიფო საგარეო ვალის მომსახურებისთვის ჯამში 2,76 მილიარდი ლარის დახარჯვას გეგმავს.
ბიუჯეტის მიხედვით, საქართველოს სახელმწიფო ვალის საპროგნოზო ზღვრული მოცულობა 2021 წლის ბოლოსთვის 27,7 მილიარდი ლარი უნდა იყოს. ეროვნული ბანკის მონაცემებით კი, სახელმწიფო საგარეო ვალმა 2021 წლის პირველი იანვრისთვის 9.7 მლრდ აშშ დოლარი, ანუ 31.9 მილიარდი ლარი შეადგინა.
ამ თემაზე:
საქართველოს მთლიანი საგარეო ვალი 18.3 მილიარდი აშშ დოლარია – სები
