ნეტგაზეთი • RU

გამყრელიძე ორსულების გარდაცვალებაზე – პრევენცია არის ერთადერთი, ორსულები უნდა აიცრან

დღეს, 27 აგვისტოს, დაავადებათა კონტროლის ეროვნული ცენტრის ხელმძღვანელმა ჟურნალისტებთან საუბრის დროს პანდემიის პერიოდში ორსული ქალების გარდაცვალების შესახებაც ისაუბრა.

კითხვაზე, თუ რატომ იღუპებიან კორონავირისით დაავადებული ორსული ქალები და ხომ არ იგეგმება ორსულთა მკურნალობის პროტოკოლში რაიმე ცვლილება, გამყრელიძე ამბობს, რომ ორსულთა გარდაცვალების პრევენციის ერთადერთი გზა არის აცრა.

„პრევენცია არის ერთადერთი, ორსულები უნდა აიცრან. პანდემიის განმავლობაში, თუ არ ვცდები, სულ 13 ორსულია გარდაცვლილი.

პროტოკოლში იგეგმება თუ არა ცვლილება, ვერ გეტყვით, თუმცა სერიოზულად მუშაობს მეან-გინეკოლოგთა ასოციაცია და ჩართულია დაავადებათა კონტროლის ცენტრიც,“- ამბობს გამყრელიძე.

გუშინ 26 წლის ორსული ქალი გარდაიცვალა ქუთაისში, დღეს კი, როგორც ვრცელდება ინფორმაცია, თბილისში, ბოკერიას კლინიკაში, გარდაიცვალა კოვიდით ინფიცირებული 19 წლის ქალი.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com