„კაცი ჩამოვიდა მოსკოვიდან“ – რა პრეტენზიები აქვს ღარიბაშვილს გახარიასთან

საქართველოს პრემიერ-მინისტრმა ირაკლი ღარიბაშვილმა დღეს სამეგრელოში ყოფინისას ჟურნალისტების შეკითხვებს უპასუხა. ღარიბაშვილმა ექსპრემიერ გიორგი გახარიას ისევ „სახელმწიფოს და გუნდის მოღალატე“ უწოდა.

„კაცი იყო ჯერ ბიზნესომბუდსმენი. დავიწყოთ იმიდან, რომ 2012 წელს მას არანაირი მონაწილეობა არ მიუღია. ჩამოვიდა მოსკოვიდან, შემდეგ ერთ-ერთი ადამიანის რეკომენდაციით მოხვდა მთავრობაში, დაინიშნა ბიზნესომბუდსმენად, შემდეგ გახდა ეკონომიკის მინისტრი, შემდეგ – შინაგან საქმეთა მინისტრი, შემდეგ – პრემიერ-მინისტრი. მთელი გუნდი და პარტიის დამფუძნებელი, ბატონი ბიძინა ივანიშვილი სრულ ნდობას უცხადებდა ამ ადამიანს. ისე, როგორც მთელი გუნდი იმიტომ, რომ ძალიან ბევრი შეცდომა იქნა დაშვებული მისი მართველობის დროს, ძალიან მძიმე შედეგებით დასრულდა…

ძალიან ბევრი თუნდაც იმ კლუბების წარუმატებელი ოპერაცია, შემდეგ პანკისის წარუმატებელი ოპერაცია, შემდეგ გავრილოვის ღამის მართვა და ასე შედეგ… რაშიც „ქართულმა ოცნებამ“ ძალიან მაღალი პოლიტიკური ფასი გადაიხადა და ეს ყველაფერი მოხდა ჩვენს ხარჯზე და ჩვენი მოქალაქეების ხარჯზე.

ამის შემდეგ მთელი გუნდი მას გადაეფარა, შეინარჩუნა, გვერდში დაუდგა, პანდემიის დროს მთელი მთავრობა ჩართული იყო მაქსიმალურად და მას ვაძლიერებდით მთელი საპარლამენტო გუნდი და მთელი პარტია და ერთ-ერთი კრიტიკული დრო როცა დადგა ჩვენს ქვეყანაში და ჩვენი გუნდის ფარგლებში, მან, პირდაპირ უნდა ითქვას, რომ და ამას სახელი დაარქვა პარტიის დამფუძნებელმა, მან ღალატი ჩაიდინა სახელმწიფოს და ჩვენი გუნდის წინაშე“.