ბათუმი,მთავარი,მთიანი აჭარა,სიახლეები

ხულოში სასწრაფოს ახალ შენობას აშენებენ – დაიხარჯება 289 000 ლარი

17.01.2022 • 1618
ხულოში სასწრაფოს ახალ შენობას აშენებენ – დაიხარჯება 289 000 ლარი

დაბა ხულოში სასწრაფო სამედიცინო დახმარების სამსახურისთვის ახალ შენობას ააშენებენ. მუნიციპალიტეტს ახალი შენობის ასაშენებლად საჭირო თანხა აჭარის ბიუჯეტიდან სპეციალური ტრანსფერის სახით გადაეცა.

ხულოს მერიაში „ბათუმელებს“ უთხრეს, რომ სასწრაფო სამედიცინო სამსახური დღეს ხულოს საავადმყოფოს შენობაშია განთავსებული. ახალი შენობა კი, დაბა ხულოში, სელიმ ხიმშიაშვილის ქუჩაზე, ყოფილი საავადმყოფოს მიმდებარე ტერიტორიაზე აშენდება, სადაც ძველი ავტოფარეხებია, რომლებსაც დაანგრევენ.

საწყის ეტაპზე ახალი შენობა მუნიციპალიტეტის საკუთრებაში იქნება, თუმცა სამომავლოდ გადაეცემა თუ არა ის საგანგებო სიტუაციების კოორდინაციისა და გადაუდებელი დახმარების ცენტრს საკუთრებაში, უცნობია.

ადგილი ძველი ფარეხებით, სადაც სასწრაფო დახმარების ცენტრის ახალი შენობა უნდა აშენდეს [ზემოთ] და ცენტრის ახალი შენობის რენდერი [ქვემოთ]/პროექტიდან

ხულოს მუნიციპალიტეტმა „საგანგებო სიტუაციების კოორდინაციისა და გადაუდებელი სამედიცინო დახმარების ცენტრის შენობის“ მშენებლობაზე ტენდერი უკვე გამოაცხადა. სატენდერო თანხა 289 407 ლარია.

ტენდერს თან ახლავს პროექტი, რომლის მიხედვითაც ახალი, ერთსართულიანი შენობა აშენდება.

„პროექტის მიზანია მოეწყოს დანიშნულების შესაბამისი ახალი თანამედროვე შენობა, შესაბამისი კაბინეტებით და სათავსოებით, საკვანძოებით, მათ შორის, შშმ პირთათვის. დაგეგმილია ეზოს კეთილმოწყობა, ლითონის ღობე, ხიმშიაშვილის ქუჩიდან მოეწყობა საავტომობილო პარკინგი“, – აღნიშნულია პროექტში.

წინადადებების მიღება ტენდერში 30 იანვარს დაიწყება და 4 თებერვალს დასრულდება. მშენებლობა 2022 წლის პირველი აპრილიდან უნდა დაიწყოს და 200 დღეში დასრულდეს.

სელიმ ხიმშიაშვილის ქუჩა ხულოში / ადგილი [მარცხნივ], სადაც სასწრაფო სამედიცინო ცენტრის ახალი შენობა აშენდება.

გადაბეჭდვის წესი


ასევე: