დიდთოვლობის გამო მაღალმთიანი აჭარის სოფლებში გადაადგილება შეზღუდულია. ამ დროისთვის თოვლის საფარი ხულოს მაღალ სოფლებში სამ მეტრს აღწევს, შუახევში კი – ორ მეტრს.
„ენერგო პრო-ჯორჯიას“ ინფორმაციით, ამ დროისთვის ელეტროენერგია შუახევსა და ქედაში 9 სოფელს არ მიეწოდება.
„ხულოს არ აქვს ელექტროენერგიის მიწოდების პრობლემა, თუმცა შუახევსა და ქედაში გამორთულია რამდენიმე სოფელი.
ქედაში ელექტროენერგია არ მიეწოდება: ცხმორისისა და მერისის ადმინისტრაციულ ერთეულებს, ზვარეს ნაწილს და სოფელ ვარჯანისს. შუახევში კი ელექტროენერგიის გარეშეა დარჩენილი სოფლები: ოლადაური, დღვანი, უჩამბა, ჭვანის ხეობა და ოქროპილაურის ნაწილი,“- გვითხრეს ენერგოკომპანიაში.
როგორც ხულოს მერის მოადგილე ნადიმ ვასაძე „ბათუმელებთან“ ამბობს, ამ დროისთვის მიმდინარეობს ცენტრალური გზების გაწმენდა. „რამდენიმე თემში მისასვლელი გზა გაწმენდილია, ღორჯომის მიმართულებითაც იწმინდება გზები, თუმცა ბოლომდე ჯერ არ არის დაერთებული. დანისპარაული-გოდერძის მიმართულებით გახსნილია გზა, წუხელ მთელი ღამის განმავლობაში მუშაობდა ტექნიკა, ამ დროისთვის მხოლოდ მაღალი გამავლობის მანქანებით არის შესაძლებელი გადაადგილება. ძირითადად ცენტრალური გზების გაწმენდა მიმდინარეობს, შიდა გზები ჯერ არ არის ყველგან გაწმენდილი.
თუ რაიმე გამოუვალი ვითარებაა, ამ შემთხვევაში შეუძლიათ გამოიძახონ სამაშველო და ისინი დაეხმარებიან გადაადგილებაში,“ – ამბობს ნადიმ ვასაძე.
შუახევის მერიის ინფორმაციით, სოფლების მიმართულებით გზების გაწმენდის სამუშაოები მიმდინარეობს. „მერიაში საგანგებო შტაბი 24-საათიან რეჟიმში მუშაობს და მოქმედებს ცხელი ხაზი 08 000 000 08“ – გვითხრეს შუახევის მერიაში.
