ბათუმის საბავშვო ბაღების გაერთიანების ადმინისტრაციის ინფორმაციით, სასწავლო პროცესი ქალაქის 32-ივე ბაღში ორშაბათიდან, 17 იანვრიდან სრულად განახლდება.
„ბაღები მზადყოფნაშია, როგორც კვების, ასევე სანიტარული კუთხითაც“ – გვითხრეს ბაღების გაერთიანებაში.
გაერთიანების დირექტორის, დავით დიასამიძის თქმით, „უწყებათაშორისი საბჭოს რეკომენდაციებს ვეყრდნობით და ამ რეკომენდაციების სრული დაცვით განახლდება პროცესი ყველა საბავშვო ბაღში. თუ კორონავირუსის შემთხვევა დაფიქსირდება და იქნება ამისი საშუალება, სააღმზრდელო პროცესს ლოკალურად იმ ჯგუფებში შევაჩერებთ დროებით, სადაც გამოვლინდება ვირუსის შემთხვევა. თუ მასშტაბურ სახეს მიიღებს, მაშინ, ეპიდემიოლოგიური ვითარებიდან გამომდინარე, შესაბამისად ვიმოქმედებთ“.
—
17 იანვრიდან სწავლება განახლდება სკოლებშიც.
კორონავირუსული პანდემიიდან გამომდინარე, განათლების სამინისტრომ ახალ სემესტრშიც დაუშვა დისტანციურად სწავლის შესაძლებლობა. დისტანციურად სწავლის მსურველებმა კი რეგისტრაცია წინასწარ უნდა გაიარონ.
ამ თემაზე ვრცლად ნახეთ ბმულზე:
სკოლებში სწავლება 17 იანვარს განახლდება – დისტანციური სწავლება ამ სემესტრშიც დაუშვეს
