ავტომანქანა „პობედა“ აჭარის ფინანსთა და ეკონომიკის სამინისტრომ აუქციონზე 9 ათას ლარად გაყიდა. სამინისტროს მიერ გამოცხადებული აუქციონი 2023 წლის 15 აგვისტოს დასრულდა.
ელექტრონული აუქციონის პორტალის მიხედვით, ვაჭრობაში სამი პირი მონაწილეობდა, ავტომანქანა კი მე-20 ბიჯით გაიყიდა.
„პობედის“ საწყისი გასაყიდი ფასი 5 ათასი ლარი, ხოლო ბიჯი – 200 ლარი იყო.
აუქციონში გამარჯვებულმა საბოლოო თანხა – 9 ათასი ლარი, აუქციონის ჩატარებიდან 30 დღეში უნდა გადაიხადოს. მხოლოდ ამის შემდეგ გადაეცემა მას საკუთრებაში აუქციონზე შეძენილი ქონება.
„პობედა“, რომელიც გაიყიდა, ბათუმის საქალაქო სასამართლოს 2022 წლის 17 მაისის გადაწყვეტილებით, „უპატრონოდ იქნა ცნობილი და აჭარის ავტონომიურ რესპუბლიკას გადაეცა საკუთრებაში“.
„სატრანსპორტო საშუალებაში არსებული ძრავა (LJ 38864) წარმოადგენს არა „გაზ 20“-ის, არამედ სხვა მარკა-მოდელის სატრანსპორტო საშუალების ძრავას. ავტომანქანა არის არამუშა მდგომარეობაში, არ იქოქება და ძრავა არ მუშაობს“, – აღნიშნული იყო აუქციონის განაცხადში.
ამავე თემაზე:
შავი „პაბედა“ და რუხი „პიკაპი“ – აჭარის ქონება აუქციონზე იყიდება
