Batumelebi

3 მილიონი ევრო შეღავათიანი სესხი ევროპის რეკონსტრუქციის ბანკისგან (“EBRD~) და 5,4 მილიონი ევრო გრანტი საერთაშორისო ორგანიზაცია „SIDA“ – სგან აჭარის მთავრობამ ნარჩენების მართვის პროექტის განხორციელების მიზნით მიიღო. პროექტი აჭარაში თანამედროვე სტანდარტების შესაბამისი ნაგავსაყარის მოწყობასა და ბათუმსა და ქობულეთში არსებული არასტანდარტული ნაგავსაყარების კონსერვაციას ითვალისწინებს.

საერთაშორისო ორგანიზაციებთან ნაგავსაყარის მშენებლობის დაფინანსებაზე მოლაპარაკება აჭარის მთავრობამ 2010 წლიდან დაიწყო, თუმცა პროექტის განხორციელება დროში გაიწელა. აჭარის მთავრობამ სპეციალური კომისიის შექმნის მიუხედავად საპროექტო დოკუმენტაციის შემუშავება ვერ შეძლო _ შესაბამისად, სესხის სახით გამოყოფილი სამი მილიონი ევროდან თანხა საერთოდ არ აუთვისებია.

ორგანიზაციასთან დადებული ხელშეკრულების თანახმად, მიმღები ვალდებულია სესხის აუთვისებელ ნაწილზე თანხის 0,5 პროცენტი გადაიხადოს წლიურად.  შესაბამისად, ამის გამო აჭარის მთავრობამ 2011-2012 წლებში 84 ათასი ლარი გადაიხადა. სახელმწიფო აუდიტის სამსახურს ეს ყველაფერი 2012 წლის ანგარიშში აქვს აღწერილი. აუდიტორი თავის დასკვნაში წერს, რომ ეს ხარჯი შესაბამისი სტრუქტურების არაეფექტური მუშაობით იყო გამოწვეული და თანხა ბიუჯეტიდან არამიზნობრივად დაიხარჯა.

ახალი ხელისუფლების მოსვლის შემდეგ, მყარი ნარჩენების მართვის პროექტის მართვა შესაბამისი სამთავრობო კომისიის ხელმძღვანელს – აჭარის ფინანსთა და ეკონომიკის მინისტრს – დავით ბალაძეს ჩააბარეს. სამინისტროს ვებგვერდზე გამოქვეყნებული ინფორმაციით, მინისტრი გასული წლის 8 აპრილს, კომისიის სხვა წევრებთან ერთად, პროექტის დამფინანსებლებსა და საკონსულტაციო ორგანიზაციებს შეხვდა. შეხვედრაზე პროექტის დაჩქარების გადაწყვეტილება მიიღეს.

რა ეტაპზეა ამ დროისთვის პროექტი და დაიწყო თუ არა თანხის ათვისება? – ამ კითხვაზე „ბათუმელებმა“ ფინანსთა და ეკონომიკის სამინისტროში ამომწურავი პასუხი ვერ მიიღო. უწყების პრესსამსახურის ინფორმაციით, „პროექტი ნაგავსაყარის ადგილის მონაცვლეობის გამო იყო შეჩერებული და ბოლო ერთი წლის მანძილზე პროექტში ჩართულ ყველა მხარესთან აქტიური კომუნიკაციის შემდეგ განახლდა.“

კითხვაზე, დაიწყო თუ არა ნაგავსაყარის მშენებლობისთვის გამოყოფილი სესხის ათვისება, პასუხი არც პრესსამსახურს და არც ფინანსთა და ეკონომიკის მინისტრის მოადგილეს, ბესო ბოლქვაძეს აქვს.

„პროექტი გაჩერებული არ არის. ეს ძალიან დიდი პროექტია, ზეპირად პასუხს ვერ გაგცემთ. წერილობით სჯობს, ასეთია მინისტრის პოზიცია,“ – უთხრა მინისტრის მოადგილემ „ბათუმელებს“ სატელეფონო საუბარში.

პროექტის გაჭიანურების მიზეზად ნაგავსაყარის მშენებლობისთვის შერჩეული ადგილის მონაცვლეობა სახელდება. თავდაპირველად ნაგავსაყარის მშენებლობას აჭარის მთავრობა ჩაქვის მუნიციპალიტეტის ტერიტორიაზე გეგმავდა, რასაც ადგილობრივი მოსახლეობა შეეწინააღმდეგა.

აჭარის გარემოს დაცვის სამმართველოს სპეციალისტის, ნოდარ კონცელიძის ინფორმაციით, ამჟამად საპროექტო სამუშაოები მიმდინარეობს: „საკონსულტაციო კომპანია „სვეკო“ მუშაობს პროექტირებაზე, დოკუმენტაცია მზად უნდა იყოს 2014 წლის აგვისტოში. შემდეგ კომპანიის შესარჩევად გამოცხადდება ტენდერი. სატენდერო პერიოდის გასვლის შემდეგ კი დაიწყება მშენებლობა. პროექტის გაჭიანურება ადგილის შეცვლის საჭიროებამ გამოიწვია.“

აჭარის გარემოს დაცვისა და ბუნებრივი რესურსების სამმართველოს ოფიციალურ საიტზე, ქობულეთის მუნიციპალიტეტის სოფელ ცეცხლაურში ნაგავსაყარის მშენებლობის დაწყების თარიღად 2014 წლის ივლისია მითითებული.  

პროექტი ,,ჩემი ქუჩა – საქართველო” მოქალაქეებს ბათუმში ინფრასტრუქტურისა და სერვისის სფეროში არსებული პრობლემების ვებგერდზე დაფიქსირების საშუალებას აძლევს. 

პროექტის მუშაობის პრინციპი ასეთია: მოქალაქის მიერ ვებგვერდზე განთავსებულ ინფორმაციას ავტომატურად მიიღებს ბათუმის მერიის ადმინისტრაცია. პროექტზე პასუხისმგებელი პირი – მერიის თანამშრომელი პრობლემას შეატყობინებს შესაბამის სამსახურს. პრობლემის მოგვარების შემდეგ, პასუხისმგებელი პირი ინფორმაციას განათავსებს ვებგვერდზე, სადაც წითლად მონიშნული პუნქტი მწვანე ფერით შეიცვლება.

თუკი პრობლემის აღმოფხვრა დროულად ვერ ხერხდება, ვებგვერდზე აიტვირთება ინფორმაცია მოგვარების ვადების შესახებ და პუნქტი ყვითელი ფერით მოინიშნება.

პროექტის მიზანია ხელი შეუწყოს ქალაქში არსებული პრობლემების ოპერატიულად მოგვარებასა და მოსახლეობის მაქსიმალურ ინფორმირებას.

 ვებგვერდის მისამართი  – www.chemikucha.ge

აჭარის ჯანდაცვის მინისტრის მოადგილე, ლევან გორგილაძე ამბობს, რომ სამედიცინო დოკუმენტაციის სამინისტროს მიერ შეძენა მნიშვნელოვანი დანახარჯებისგან გაათავისუფლებს სოფლის ექიმებს: „ეს ნიშნავს, რომ მათ აღარ მოუწევთ იმ დოკუმენტაციის შესყიდვა, რისი შეძენაც აქამდე თავიანთი ხარჯით უწევდათ, იქნება ეს „ფორმა ასი,“ ამბულატორიული ბარათი, საკანცელარიო საქონელი თუ სხვა რამ.“

სახელმწიფო კომუნალურ გადასახადებს მუნიციპალიტეტების მხოლოდ პირველადი ჯანდაცვის ცენტრებისთვის დაფარავს, რომლებიც რამდენიმე სოფელს ემსახურებიან. თემის სამედიცინო პუნქტები კი კომუნალურ ხარჯებს ძველებურად, თავიანთი ხარჯით გადაიხდიან.

აჭარის ჯანდაცვის მინისტრის მოადგილის თქმით, აჭარის სოფლის 170 ექიმი და 111 ექთანი, გარდა ხელფასის 30 პროცენტით გაზრდისა, მიმდინარე წლის განმავლობაში ყოველთვიურად სახელფასო დანამატსაც მიიღებს, მთაში მომუშავე ექიმები – 300 ლარს, ბარში მომუშავე ექიმები კი – 150 ლარს.

პირველი მაისიდან საქართველოს ჯანდაცვის სამინისტრო ასევე უზრუნველყოფს ექიმის ჩანთის ცენტრალიზებულ შესყიდვას, რაც სოფლის ექიმის მიერ ჩანთაზე გასაწევ ხარჯს 50 პროცენტით შეამცირებს. `მათ ერთჯერადად გადაეცემათ მედიკამენტების ჩანთა, შემდეგ კი დახარჯული მედიკამენტების შესავსებად მუნიციპალიტეტი ყოველთვიურად გამოყოფს საჭირო თანხას,“  – განაცხადა ლევან გორგილაძემ.

წელს აჭარის ჯანდაცვის სამინისტრო მაღალმთიანი მუნიციპალიტეტების მედპუნქტებისთვის 21 მაღალი გამტარობის ავტომობილის შეძენასაც გეგმავს. ამ ეტაპზე აჭარის ჯანდაცვის სამინისტრომ გარკვეულ შეთანხმებას მიაღწია გაეროს განვითარების ფონდთან, რომელიც ავტომობილების შესაძენად საჭირო თანხის 60 პროცენტს დააფინანსებს.

ლევან გორგილაძის თქმით, თემის სამედიცინო პუნქტის ექთნებისთვის წელს გადამზადების კურსებიც იგეგმება.

სოფლის ექიმებს ხელფასს აქამდე სახელმწიფო და სადაზღვევო კომპანიები უხდიდნენ. მინისტრის მოადგილის თქმით, ახლა სადაზღვევო კომპანიები გადიან ამ საქმიანობიდან და სოფლის ექიმებს მთლიანად სახელმწიფო დააფინანსებს.

სატენდერო დოკუმენტაციის მიხედვით გამარჯვებულმა კომპანიამ 9 მაისისადმი მიძღვნილი საზეიმო ბანკეტის „მაღალ დონეზე ორგანიზება მუსიკალური გაფორმებით“ უნდა უზრუნველყოს.  საბანკეტო სუფრა კი 80 ადამიანზე უნდა იყოს გათვალისწინებული.

სატენდერო დოკუმეტაციითაა განსაზღვრული საზეიმო ვახშმის მენიუც.

9 მაისს ყოფილი საბჭოთა კავშირის ქვეყნები 1941-1945 წლებში სამამულო ომში ნაცისტურ გერმანიაზე გამარჯვებას აღნიშნავენ. შესაბამისად, 9 მაისი დასვენების დღედ არის გამოცხადებული – საქართველოში, აზერბაიჯანში, სომხეთში, ბელორუსში, ყაზახეთში, ყირგიზეთში, მოლდავეთში, რუსეთში, ტაჯიკეთში, ტურქმენეთში, უზბეკეთსა და უკრაინაში. 

ამ დღის ფართოდ აღნიშვნა საბჭოთა კავშირში სამამულო ომიდან 20 წლის შემდეგ, ბრეჟნევის ხელმძღვანელობის დროს დაიწყეს. ამავე 1965 საიუბილეო წელს გამარჯვების დღე არასამუშაო დღედ გამოცხადდა.

260-გვერდიანი სახელმძღვანელო წინადადებები სისხლის სამართლის სასამართლო პრაქტიკის პრობლემატურ საკითხებზე, 2007 წელს უზენაესი სასამართლოს თავმჯდომარის კოტე კუბლაშვილის ბრძანებით გამოიცა. რეკომენდაციები სისხლის სამართლის კოდექსით გათვალისწინებულ მხოლოდ იმ დანაშაულზეა, რომელიც სტატისტიკურად ყველაზე ხშირად ხდება: ქურდობა, ძარცვა, ყაჩაღობა, თაღლითობა, გამოძალვა, მითვისება ან გაფლანგვა. ცეცხლსასროლი იარაღის, საბრძოლო მასალის, ფეთქებადი ნივთიერებების ან ასაფეთქებელი მოწყობილობის შეძენა, შენახვა… ხულიგნობა, ნარკოტიკული ნივთიერების გამოყენება… სამსახურებრივი გულგრილობა, სიყალბე, ქრთამის აღება ან მიცემა, სამსახურებრივი უფლებამოსილების გადამეტება ან ბოროტად გამოყენება…  

აი, რას წერს კოტე კუბლაშვილი მოსამართლეებს წიგნის შესავალში: „ძვირფასო მოსამართლეებო, სასამართლო რეფორმის ერთ-ერთი უმთავრესი მიზანია  ერთგვაროვანი სასამართლო პრაქტიკის ჩამოყალიბება… 

დემოკრატიულ სახელმწიფოებს ამ მხრივ ჩვენთან შედარებით უდიდესი  უპირატესობა აქვთ: ეს არის რამდენიმეწლიანი გამოცდილება და ამ ათწლეულების განმავლობაში ჩამოყალიბებული და მუდმივად განვითარებული სასამართლო პრაქტიკა, რომელიც ქვეყნდება კრებულის სახით… რეკომენდაციები კიდევ უფრო უწყობენ ხელს  ნორმათა ერთგვაროვანი პრაქტიკის დამკვიდრებას და, შესაბამისად, მართლმსაჯულების სწრაფად განხორციელების საფუძველს ქმნის… ამასთან, ეს პრაქტიკა თანმიმდევრულად გამოყენებული იქნება საერთო სასამართლოების მოსამართლეების მიერ, არამედ ფაქტობრივად ასევე გაზიარებული უნდა იქნას  პროკურორების მიერ“.

ნინო გვენეტაძე  ქართულ-ამერიკული უნივერსიტეტის პროფესორია. 2006 წლამდე ის უზენაესი სასამართლოს წევრი იყო. მრავალი სამეცნიერო ნაშრომის ავტორი „ბათუმელებთან“ ამბობს, რომ ამ სახელმძღვანელოთი მოსამართლეები გააფრთხილეს  ეხელმძღვანელათ „გაიდლაინით“. მისი მოსაზრებით, „მოსამართლე, რომელიც სისტემური მორჩილების რეჟიმში მუშაობდა, იძულებული გახდა უპირატესი ძალა მიენიჭებინა  გაიდლაინებისთვის“.

გვენეტაძე ამბობს, რომ რეკომენდაციების გადმოღება ამერიკული მოდელიდან არაკონსტიტუციური არ არის, მაგრამ პრობლემად საქართველოში ის იქცა, რომ გაიდლაინები სარეკომენდაციო სახის კი არა, სავალდებულოდ შესასრულებელი გახდა: „პირდაპირ დაავალეს მოსამართლეებს ამ რეკომენდაციების შესრულება, ვეწინააღმდეგებოდი მის სავალდებულო ძალას და დღესაც ვფიქრობ, რომ ეს აზიანებს სასამართლოს დამოუკიდებლობას. იმედი მაქვს, მოსამართლეთა დამოუკიდებლობის ხარისხი თანდათან იზრდება. თუ მოსამართლე ეთიკური ნორმების დამცველია, ის არ გაიზიარებს ამ გაიდლაინს. ეს იყო ერთ-ერთი ხერხი, რომელიც დევნის ორგანოს პროგნოზირებად სასჯელს სთავაზობდა. პოზიტივი ამ გაიდლაინებით საზოგადოებამ ვერ ნახა, ნეგატივი კი ის იყო, რომ მოსამართლემ დაკარგა დამოუკიდებლობა.

ნინო გვენეტაძე ამის დასტურად კონკრეტულ მაგალითს ასახელებს: „მაგალითად, კოდექსში წერია, რომ ქურდობა ისჯება თავისუფლების აღკვეთით ვადით 3-დან 5 წლამდე. ეს კანონი მოსამართლეს აძლევს დისკრეციულ უფლებას თვითონ გადაწყვიტოს მიუსაჯოს 3 წელი, 5 თუ 3 წელი და 6 თვე. მაგრამ რეკომენდაციის შედეგად კოდექსით მინიჭებული უფლება მოსამართლეებს შეეზღუდათ. მაამებელი პოლიტიკიდან გამომდინარე იყო მოსამართლეთა კატეგორია, რომლებიც ამყარებდნენ არასწორ დამოკიდებულებას და სასამართლო დარბაზში ისე განმარტავდნენ ამ რეკომენდაციებს, როგორც სავალდებულოს“.

არასამთავრობო ორგანიზაცია „ახალგაზრდა იურისტთა ასოციაციის” იურისტს, გიორგი ხიმშიაშვილს სისხლის სამართლის სფეროში გაიდლაინების შექნა   დაუშვებლად მიაჩნია: „ეს არის სენსიტიური თემა, უფრო მეტ სიღრმისეულ მიდგომას მოითხოვს, რადგან საქმე გვაქვს ადამიანის უფლებებთან და თავისუფლებებთან. მართალია, გაიდლაინი არ არის იურიდიული ძალის მქონე დოკუმენტი, თუმცა მან მიიღო კანონის სტატუსი, მოსამართლეები გადაწყვეტილებას გაიდლაინებზე დაყრდნობით იღებდნენ.“

ხიმშიაშვილის დაკვირვებით, ეს რეკომენდაციები მოსამართლეებს ვიწრო წრეში აქცევს: „გაიდლაინებმა ყველა დანაშაული, სიმძიმის მახასიათებლის გაუთვალისწინებლობით, ჭადრაკის ერთ დაფაში მოაქცია და თქვა, რომ ყველა უნდა დაისაჯოს. იშვიათად გვყავდა მოსამართლეები, რომლებიც გაიდლაინებით არ სარგებლობდნენ. სამოსამართლეო საქმიანობის ძალიან ვიწრო ჩარჩოებში მოაქციეს მოსამართლეები. გაიდლაინების გამოყენების აუცილებლობა იყო ზემდგომი მოსამართლეებისა და უზენაესი სასამართლოს „თხოვნა“, ვითომ ერთიანი პრაქტიკის დამკვიდრებისთვის. საბოლოო ჯამში მოსამართლე არ ასრულებდა იმ როლს, რაც ჰქონდა დაკისრებული სისხლის სამართლის კოდექსით -მოსამართლეს უნდა გამოერკვია ქურდობის ჩამდენი პირის ნიუანსები, მიზანი, გარემოება. მოსამართლეები კი ამას არ იკვლევდნენ, რადგან გაიდლაინებით ხელმძღვანელობდნენ“. 

აკაკი თოიძე დღეს ადვოკატად მუშაობს, 10 წლის განმავლობაში ის მოსამართლე იყო.  მისი აზრით, გაიდლაინებით მოსამართლეები „ჩარჩოში მოაქციეს“, `ხელისუფლებამ მოსამართლეები შებოჭა“ და კონტროლის მექანიზმი გააძლიერა: „კოტე კუბლაშვილი, ვინც ეს რეკომენდაცია შეადგინა, დღეს ისევ მართლმსაჯულების სათავეშია, ამიტომ, ვფიქრობ, სასამართლოში დღესაც არაფერი შეცვლილა – მოსამართლეების 90 პროცენტი ისევ ტყვეობაშია“.

გაიდლაინით ანუ მოსამართლის სახელმძღვანელოთი მიღებული გადაწყვეტილებით ამერიკის მოქალაქეებიც უკმაყოფილოები იყვნენ. ამიტომაც მოქალაქეებმა ამ რეკომენდაციებით მოსამართლის მიერ მიღებული გადაწყვეტილება უზენაეს სასამართლოში გაასაჩივრეს. ამერიკის უზენაესმა სასამართლომ საკითხის განხილვის დროს თქვა, რომ ეს არის რეკომენდაცია და არ შეიძლება ის სავალდებულოდ შესთავაზოს სასამართლომ პროცესის მონაწილეებს. უზენაესმა სასამართლომ კი ჩათვალა, რომ რეკომენდაციას აქვს არსებობის უფლება.

„Black Sea Cruises Line“ -ზე 100 უცხოელი ტურისტი იმყოფება, რომლებსაც სხვადასხვა საექსკურსიო პროგრამით მომსახურებას გაუწევს ადგილობრივი ტურისტული კომპანია „Ajara Tour“.

აჭარის კურორტებისა და ტურიზმის დეპარტამენტის პრესსამსახურის ინფორმაციით საკრუიზო ტურიზმის სტატისტიკის მიმართულებით დადებითი ტენდენცია შეინიშნება.

 2012 წელს 10-მდე საკრუიზო ხომალდის სტუმრობდა რეგიონს, 2013 წელს მისი რიცხვი 16-მდე გაიზარდა, 2014 წელს კი 26 საკრუიზო გემის შემოსვლაა დაგეგმილი.

როგორია ბათუმის ავტოტრანსპორტის მუშაობის გრაფიკი დღეს?

გასვლა  დილის   06: 15 წუთზე იწყება, ღამის 10 საათისთვის  ასრულებენ მუშაობას, ეს გაზაფხულის გრაფიკია. როცა ზაფხულის სეზონზე გადავალთ გრაფიკებიც გაიზრდება, დაახლოებით ერთი ან საათ ნახევრით გვიან დაასრულებს მუნიციპალური ტრანსპორტი მუშაობას.

ხომ არ არის განსხვავებული გრაფიკი შემოერთებულ ტერიტორიებზე?

როგორც ვიცი საღამოს იქ უფრო  ადრე  ამთავრებენ მუშაობას, რადგან არ დგას საჭიროება. მაგრამ ზაფხულში სავარუდოდ ეს ვადები გაიზრდება. გრაფიკები ჩვენ გადმოცემული გვაქვს საკრებულოდან და იმ გრაფიკებითა და ინტერვალებით ვხელმძღვანელობთ.

თქვენ ამბობთ , რომ არ დგას ამის საჭიროება,  კვლევა ჩაატარეთ თუ როგორ განსაზღვრეთ, რომ საჭიროება არ დგას?

მარკეტინგის სამსახური გვაქვს ცალკე, რომელიც ყოველთვის ამოწმებს მგზავრთა ნაკადს, დილიდან საღამომდე აღიწერება მგზავრთა ნაკადი, ასე რომ ზაპირად არაფერს ვამბობ.  

დაახლოებით რა ვადაში გეგმავთ ზაფხულის დროზე გადასვლას?

 სავარუდოდ მაისის შუა რიცხვებიდან , ან შეიძლება 1 მაისიდანაც გადაიხედოს გრაფიკები, ჯერ არ დგას ამის საჭიროება და ზაფხულში უკვე, როცა სეზონი დაიწყება, ტურისტების ჩამოსვლის შემდეგ  გრაფიკებიც გადაიხედება.

ზაფხულში  რომელ საათამდე გადაიწევა დრო?

ეხლა მაგასაც შევისწავლით, შეიძლება 12- მდე.

თქვენ , როგორც ახალი ხელმზღვანელი რის შეცვლას გეგმავთ?

– მაისის შუა რიცხვებში ელექტრონულ ბარათებზე გადავალთ   , ბარათებს ლიბერთი ბანკი დაარიგებს.  იგეგემება ასევე მგზავრთა აღწერის ავტომატური სისტემის დანერგვა, ყველა ავტობუსში იქნება დანადგარი, რომელიც დაითვლის მგზავრთა ნაკადს.

აქვს თუ არა ავტოტრანსპორტს ავტობუსების საკამრისი რაოდენობა, თუ კიდევ არის  დამატების საჭიროება?

არ არსებობს პარკი, რომელიც არ საჭიროებს განახლებას.

ეგრეთ წოდებული ყვითელი ავტობუსების გამონაბოლქვი სერიოზულად აზიანებს გარემოს , ამბობენ, რომ სპეციალური ფილტრის დაამონტაჟების შემთხვევაში ზიანი სერიოზულად შემცირდება, აპირებთ ამის გაკეთაბას?

ეგ კითხვა  უპასუხოდ დავტოვოთ, ვმუშაობთ ჯერ და რა ზომებს მივიღებთ, რა შედეგამდე მივალთ მაგას წინასწარ ვერ გეტყვით. ვსწავლობთ ამ საკითხს სრული დატვირთვით.

„გადავწყვიტეთ გავმართოთ აქცია ბათუმის შოთა რუსთვალის სახელწიფო უნივერსიტეტის კიბეებთან, აქციაზე გავაჟღერებთ ჩვენს მოთხოვნებს:

ჩვენ ვითხოვთ 1 მაისის, როგორც შრომის საერთაშორისო დღის უქმე დღედ გამოცხადებას, შრომითი ურთიერთობების რეგულირებისთვის სახელმწიფო მაკონტროლებელი ორგანოს შექმნას, რეალური საარსებო მინიმუმის და გაწეული შრომის მიხედვით სამართლიან ანაზღაურებას.

აქციის ორგანიზატორების მიზანი „საზოგადოების გამოცოცხლებაა.“

„ მათ უნდა იბრძოლონ თავისი უფლებებისათვის, რომ არ მოხდეს ინვესტორების მხრიდან ექსპლუატაცია“ – ამბობს აქციის ერთ-ერთი ორგანიზატორი გიორგი ბაგრატიონი.

აქციის ორგანიზატორებს მიაჩნიათ , რომ დღეს საქართველოში ძალიან მძიმე სურათი დგას შრომითი უფლებების დაცვის კუთხით , განსაკუთრებით კი ყურადღებას აჭარის რეგიონზე ამახვილებენ.

გიორგი ბაგრატიონის თქმით ის ფაქტი, რომ ჩვენს ქვეყანაში ხშირად ფიქსირდება მუშათა გარდაცვალების ფაქტები, მიუთიეთებს თუ რამდენად ხშიარდ ირღვევა საქართველოში დასაქმებულთა უფლებები.

 „ალტერნატივას “ წარმომადგენელი ზურა მელიქაძე ამბობს, რომ აპირებენ მიმართონ ბათუმის სახელმწიფო უნივერსიტეტის სტუდენტურ თვითმმართველობას – „მათი ჩართულობა ვფიქრობ ძალიან მნიშვნელოვანი და აუციელებლია. იმედი გვაქვს შემოგვიერთდებიან.“

1 მაისი შრომის საერთაშორიოს დღეა. დღე,  რომელიც მშრომელთა უფლებების დაცვის ბრძლოლის დღედ არის გამოცხადებული სათავეს მე-19 საუკუნის 80 იანი წლებიდან იღებს, როდესაც მუშებმა საპროტეტსო აქციების გამართვა დაიწყეს, მათი მთავარი მოთხოვნა სამუშაო დროის შემცირება 8 საათამდე იყო, რომელიც 10 , 12 ხშირად კი 15 საათსაც კი გრძელდებოდა. 1886 წლის 1 მაისს ამერიკაში ყველაზე ფართომაშტაბიანი აქცია გაიმართა,

რომელიც მოგვიანებით 1890 წელს   მშრომელთა უფლებების დაცვის ეროვნულ დღედ გამოცხადდა.

– ბატონო დავით, რა შეიცვალა ახალ კოდექსში თუნდაც უფლებამოსილების გადანაწილების კუთხით?

– უფლებამოსილების გადანაწილება მნიშვნელოვნად არ იცვლება, რამდენიმე ახალი უფლებამოსილება დაემატა მუნიციპალიტეტებს. აქცენტი გაკეთებულია იმაზე, რომ მათ უფლებამოსილების შესაბამისი რესურსებიც ჰქონდეთ. შეიძლება მე მქონდეს უფლებები, მაგრამ არ მქონდეს მისი განხორციელების ფინანსები, საშუალება და ქონება, ან ბევრად ნაკლები უფლებამოსილება მქონდეს ქაღალდზე, მაგრამ ამისთვის მქონდეს ფინანსები და შესაძლებლობები. ამ მიმართულებით არის ნაბიჯები გადადგმული.

პირველ სექტემბრამდე მთავრობა პარლამენტს გადასცემს საშემოსავლო გადასახადის ახალ წესებს თვითმმართველობებში. დაიხვეწება გათანაბრებითი ტრანსფერის გამოთვლის პრინციპები. ეს ყოველივე საშუალებას მისცემს მუნიციპალიტეტს, გაზარდოს შემოსავლები. გარდა ამისა, კოდექსით იგეგმება თვითმმართველობებში არსებული იმ ქონების სრული ინვენტარიზაცია, რომელიც არ სჭირდება სახელმწიფოს. ეს ქონება უნდა გადაეცეს თვითმმართველობას. ეს საკმაოდ დიდ მატერიალურ და ქონებრივ ბაზას შეუქმნის თვითმმართველ ორგანოებს იმისათვის, რომ თავიანთი ფუნქციები განახორციელონ.

– რაც ჩამოთვალეთ საკმარისი იქნება იმისთვის, რომ საკრებულომ ცენტრიდან მოსულ დირექტივას (ვთქვათ, ეს მოხდა) გვერდი აუაროს?

-პირველი, რაც უნდა აღვნიშნო, ეს არის გამოხატული პოლიტიკური ნება. თუმცა პოლიტიკური ნების იმედად საზოგადოება ვერ დარჩება. პირველი, რაზეც ეს იქნება დამოკიდებული, არის ისევ საზოგადოება. თუ საზოგადოებამ თავი დაღუნა და არ გამოიყენა ის მექანიზმები, რომლებიც მას აქვს, ასე ვთქვათ, შეარჩინა დანაშაული, რასაც ხელისუფლება სჩადის, მაშინ, ბუნებრივია, ამას არავითარი შედეგი არ მოჰყვება.

პოლიტიკური პარტიების გაძლიერება და პოლიტიკური სპექტრის გამრავალფეროვნება რომაა საჭირო, მე მგონი, ამაზე, გარდა რადიკალი რეაქციონერებისა, აღარავინ დაობს. უნდა არსებობდეს პოლიტიკური პლურალიზმი და პოლიტიკური ბაზარი, სადაც პარტნიორები თავის ხედვას შესთავაზებენ საზოგადოებას და დააბალანსებენ ერთმანეთის ძალაუფლებას. ამისთვის თვითმმართველობის არჩევნები ერთ-ერთი ყველაზე კარგი საშუალებაა. მაგრამ მხოლოდ და მხოლოდ პოლიტიკურ პარტიებზე ამ ტვირთის გადატანა არ იქნებოდა მართებული, სწორედ ამიტომ ჩაიწერა საარჩევნო კოდექსში, რომ მოქალაქეთა საინიციატივო ჯგუფებს შეუძლიათ საკრებულოს წევრებად დაასახელონ არაპარტიული პირები, ის ადამიანები, რომლებსაც დიდი ავტორიტეტი აქვთ იმ უბანში, რომელშიც ისინი ცხოვრობენ ან საქმიანობენ. თუ საზოგადოება ამ მექანიზმს გამოიყენებს, კარგი იქნება. სამწუხაროდ, ამ ეტაპზე ვერ მოხერხდა ის, რომ დამოუკიდებელი პირების დასახელების შესაძლებლობა იყოს მერების ან გამგებლების კანდიდატებად. თუმცა, აღმასრულებელი ერთეული ხელმძღვანელის პირდაპირი არჩევითობა უკეთესი შეთავაზებაა.

– სხვა რაიმე მექანიზმი არსებობს საზოგადოების ჩართულობის უზრუნველსაყოფად?

– წელს, შემოდგომაზე, საქართველოს პარლამენტმა უნდა მიიღოს კანონი საზოგადოებრივი საბჭოების შესახებ, რაც იმას ნიშნავს, რომ მოქალაქეებს კიდევ უფრო გაეზრდებათ საშუალება გავლენა მოახდინონ თვითმმართველი ორგანოების გადაწყვეტილებაზე, განახორციელონ მეტი კონტროლი და ლობირება. ამის გარდა, არსებობენ საკონსულტაციო ორგანოები, რომლებმაც უნდა იფიქრონ მხარის, რეგიონის ეკონომიკური პროგრამების განვითარებასა და ერთიანი ხედვების ჩამოყალიბებაზე. საქართველოს მთავრობამ უნდა მიიღოს შესაბამისი დადგენილებები.

რამდენიმე მიმართულებით მიდის მუშაობა უშუალოდ თვითმმართველობის უფლებამოსილების გაზრდის სფეროში, ანუ მათ მიერ ექსკლუზიური და დელეგირებული უფლებამოსილების განხორციელების სფეროში.

გარდა ამისა, ცალკე მუშავდება პროგრამა საჯარო სამსახურის მოხელეებისა და საჯარო სამსახურის შემდგომი რეფორმისთვის, რათა, ერთი მხრივ, გაიზარდოს ადგილობრივ მოხელეთა კომპეტენციები და მათი უნარები, მეორე მხრივ, გაიზარდოს მათი მოტივაცია იმისათვის, რომ მათ მიიღონ სტაბილური გარემო და განვითარდნენ.

– თქვენი დაკვირვებით, რას მოგვიტანს მომავალი არჩევნები. შენარჩუნდება ტენდენცია, რომლის მიხედვითაც უმრავლესობით საკრებულოში მოდის მმართველი პარტია და ოპოზიციიდან  სამი ან ოთხი ადამიანი ახერხებს შესვლას საკრებულოში, თუ სხვა რამეც შეიძლება მოხდეს?

– საუბარი იმაზე, რომ ამ არჩევნების შემდეგ ყველაფერი იდეალურად იქნება, მგონი, გულუბრყვილობაა. ვშიშობ, რომ ტრადიცია გაგრძელდება _ მმართველი პარტიის დომინანტობა მეტ-ნაკლებად შენარჩუნებული იქნება. თუმცა ის მექანიზმები, რომლებიც კოდექსშია ჩადებული, უკვე იძლევა საშუალებას, რომ მთელ რიგ შემთხვევებში გარღვევაც კი მოხდეს.

აქცია სახელწოდებით „მწვანე ქალაქი, ცელოფნების და პლასტმასის ბოთლების გარეშე“   დღის 12 საათზე ჟორდანიას ქუჩაზე დაიწყება.

ორგანიზატოები აქციას  იმ ადგილზე მართავენ სადაც გასულ წლებში ბათუმის მერიის გადაწყვეტილებით მრავალწლოვანი ნარგავები გაჩეხეს.

აქციის მონაწილეები შექმნიან იმიტირებულ ბაღს, პოლიეთილენის პარკებითა და ე.წ პლასტმასის ბოთლებით.

დაგეგმილია ასევე აქციის მონაწილეებისთვის ნაჭრისა და მუყაოს ჩანთების დარიგებაც, რითაც ორგანიზატორები მოსახლეობას  პოლიეთილენის პარკების ჩანაცვლებისკენ მოუწოდებენ.

აქციის ორგანიზატორთა განმარტებით „პოლიეთილენიწლების განმავლობაში არ იხრწნება და ბუნებას დიდ ზიანს აყენებს.“  

სტატისტიკის მიხედვით, ბათუმის მერიის მიერ გამოცხადებული 262 ტენდერიდან 154 ტენდერი ან არ შედგა, ან არაკონკურენტულ გარემოში ჩატარდა, რაც თავისთავად აკნინებს ტენდერს, როგორც ეფექტურ სახელმწიფო მექანიზმს. ამის ერთ-ერთი კონკრეტული მაგალითია გასული წლის ნოემბერში ბათუმის მერიის მიერ გოგებაშვილის ქუჩის შენობების ფასადების განათების მიზნით გამოცხადებული ელექტრონული ტენდერი. სატენდერო დოკუმენტაციაში დეტალურად იყო აღწერილი შემსყიდველის მოთხოვნები და ინფორმაცია სანქციების შესახებ.

მერიამ სამუშაოების დასრულების ვადად 2013 წლის 25 დეკემბერი მიუთითა, რაც იმას ნიშნავს, რომ ტენდერში გამარჯვებულ კომპანიას სამუშაოები ერთი თვის ვადაში უნდა დაესრულებინა. სატენდერო პირობებში მითითებულია, რომ ხელშეკრულებით ნაკისრი ვალდებულების დაგვიანებით შესრულების შემთხვევაში მერია კომპანიას პირგასამტეხლოს სახით ყოველი დაგვიანებული დღისთვის ხელშეკრულების ფასის 0,5%-ს დააკისრებდა. იმ შემთხვევაში კი, თუ პირგასამტეხლოს სახით გადახდილი თანხა ხელშეკრულების ღირებულების 5%-ს მიაღწევდა, მერია იტოვებდა ხელშეკრულების ერთპიროვნულად შეწყვეტის უფლებას.

ელექტრონულ ვაჭრობაში მონაწილეობა მიიღო კომპანიამ „ეიდიელ ენდ ტექნიკსმა“ – მან ტენდერით გათვალისწინებული სამუშაოს შესრულება მერიას 119 178 ლარად შესთავაზა. 

კომპანიამ 25 დეკემბერს მერიას წერილობით მიმართა და სამუშაოზე ვადის გაგრძელება ითხოვა შემდეგი მიზეზით: „აჭარის რეგიონული ჰიდრომეტეოროლოგიური ობსერვატორიის მონაცემებით, ბათუმში 2013 წლის 8 დეკემბრიდან 12 დეკემბრის ჩათვლით აღინიშნებოდა ნალექი თოვლის საფარის სახით. რის გამოც „ეიდელ ენდ ტექნიკსის“ მიერ ვერ განხორციელდა სამუშაოების დასრულება.“

მერიამ არგუმენტი „საპატიო მიზეზად“ მიიჩნია და კომპანიას სამუშაოების შესრულების ვადები ერთი თვით გაუგრძელა.

ჯანსაღი კონკურენტული პირობების შექმნა შესყიდვების ელექტრონული ტენდერით განხორციელების ერთ-ერთი მთავარი მიზანია. სახელმწიფო უწყება უფლებამოსილია კონკრეტული სამუშაოების შესყიდვისას პრიორიტეტი იმ კომპანიას მიანიჭოს, რომელიც ელექტრონულ ვაჭრობაზე წინასწარ განსაზღვრული სამუშაოების შედარებით ნაკლებ ფასად შეასრულებს. ასევე მნიშვნელოვანია შესრულებული სამუშაოს ხარისხი და ვადები.

„აბსურდული პირობების გამო, ტენდერში ხშირად მხოლოდ ორი ან ერთი კომპანია მონაწილეობს. გამარჯვებული წინასწარ გამოცხადებული პირობების გათვალისწინებით იღებს ვალდებულებას. შემდეგ იცვლება ეს პირობები, გრძელდება ვადები და არის ხელშეკრულების ღირებულების გაზრდის შემთხვევებიც. შეცვლილი პირობების შემთხვევაში იქნებ სხვა კომპანიაც მოახერხებდა ტენდერის მოგებას? ჩნდება ეჭვი, რომ მოკლე ვადაში სამუშაოს შესრულებაზე თანხმდება ის, ვისაც აქვს იმედი, რომ ვადებს გაუგრძელებენ.“ – ამბობს გიორგი ჭანტურია „საერთაშორისო გამჭვირვალობა საქართველოს“ წარმომადგენელი.

შესყიდვების სააგენტოს ვებგვერდზე გამოქვეყნებული სატენდერო დოკუმენტებიდან ჩანს, რომ კონკრეტული კომპანია ამა თუ იმ ტენდერის შეკვეთის ხელში ჩაგდების მიზნით ფასს მაქსიმალურად აკლებს, შემდეგ კი, აჭიანურებს სამუშაოს შესრულების ვადას. მაგალითად, ბათუმის მერიის მიერ ჟილინის არხის მოწყობის სამუშაოებს ტენდერში მონაწილე კომპანია `tek-ev insaat dekorasyon iç ve diş ticarett ltd.sti~- შესრულების ღირებულება ექვსიდან სამ მილიონამდე დაწია. სამუშაოს შესრულების პროცესში კი მერიას ხელშეკრულებაში ცვლილების შეტანის მოთხოვნით რვაჯერ მიმართა და რვაჯერვე დადებითი პასუხი მიიღო, თუმცა დაკისრებულ მოვალეობას თავი მაინც ვერ გაართვა.

ბათუმის მერიის ზედამხედველობის სამსახურის უფროსის ავთანდილ ბურკაძის ინფორმაციით, კომპანიების მხრიდან პირობების დარღვევის

შემთხვევა ხშირია.

„თუ საპატიო მიზეზებია, ვპატიობთ, თუ არა  მაშინ ხელშეკრულებით გათვალისწინებულ სანქციას ავამოქმედებთ.“

„საპატიო მიზეზი“ სატენდერო დოკუმენტაციებში ცვლილების სახით აისახება. დოკუმენტების შესწავლით დგინდება, რომ ასეთი მიზეზი შეიძლება ზოგიერთ შემთხვევაში წვიმაც კი გახდეს. ზოგიერთ შემთხვევაში ბათუმის მერია მიმწოდებელს იმ დოკუმენტის წარმოუდგენლობის გამო აძლევს დისკვალიფიკაციას, რომლის წარდგენასაც  ფიზიკურ პირს კანონი არ ავალდებულებს.

რა კრიტერიუმებით ფასდება კონკრეტული ტენდერის დარღვევა საპატიოდ ან არასაპატიოდ? – ამ კითხვაზე „ბათუმელებმა“ მერიაში პასუხი ვერ მიიღო. მერის მოადგილემ დავით ლეკვეიშვილმა, რომელიც მშენებლობის მიმართულებით სატენდერო კომისიის თავმჯდომარის მოვალეობასაც ასრულებს, საზოგადოებისათვის განმარტების გაკეთებაზე უარი თქვა.

საბიუჯეტო სახსრების კიდევ ერთი მაკონტროლებელი ბათუმის საკრებულოა. „შესყიდვებს ახორციელებს მერია და მერიის კონკრეტული სამსახურები, ამიტომ შესყიდვებთან დაკავშირებული კითხვებით ამ სამსახურებს უნდა მიმართოთ,“  – განმარტა საკრებულოს საფინანსო-საბიუჯეტო კომისიის ხელმძღვანელმა დავით კასრაძემ „ბათუმელებთან.“

სახელმწიფო შესყიდვების შესახებ კანონის მიზანი სახელმწიფო შესყიდვებისთვის განკუთვნილი ფულადი სახსრების რაციონალური ხარჯვის უზრუნველყოფა, სახელმწიფო საჭიროებისთვის აუცილებელი საქონლის წარმოების, მომსახურების გაწევისა და სამშენებლო სამუშაოს შესრულების სფეროში ჯანსაღი კონკურენციის განვითარება, სახელმწიფო შესყიდვების განხორციელებისას შესყიდვების მონაწილეთა მიმართ სამართლიანი და არადისკრიმინაციული მიდგომის უზრუნველყოფა და სახელმწიფო შესყიდვების საჯაროობის უზრუნველყოფაა.

 
„სააპელაციო სასამართლოს მართავს ნაციონალური მოძრაობა, რაიონული სასამართლოდან ამიტომაც გადმოიყვანეს სააპელაციო სასამართლოში მოსამართლე გიორგი მიროტაძე. წინასაარჩევნო პერიოდში უნდათ, რომ უდანაშაულო ადამიანებს შეუქმნან უსამართლობის განცდა. ცალსახად ვაცხადებ, რომ ნაციონალურმა მოძრაობამ სასამართლო ჩართო წინასაარჩევნო მარათონში და შეგნებულად იღებენ ასეთ გადაწყვეტილებებს მოსამართლეები, ამიტომაც ვთხოვ საქართველოს პარლამენტს მოგვისმინონ, რომ ჩვენი არგუმენტები და მტკიცებულებები წარვადგინოთ პარლამენტში“ – ამბობს „ბათუმელებთან“ საუბარში ირაკლი შავაძე. 

პროკურატურა შვიდი ამზომველისთვის აღკვეთის ღონისძიების სახით 10 000 ლარის შეფარდებას თბილისის საქალაქო სასამართლოში ითხოვდა, თუმცა საქალაქო სასამართლომ ეს შუამდგომლობა არ დააკმაყოფილა და ბრალდებულები დარბაზიდან გირაოს გარეშე გაათავისუფლა, ეს გადაწყვეტილება კი პროკურატურამ სასამართლოს ზემდგომ ინსტანციაში გაასაჩივრა. 

ქვეყნდება ნფორმაცია საარჩევნო უბნების საზღვრების შესახებ. საოლქო საარჩევნო კომისია ადგილობრივი თვითმმართველობის ორგანოთა მონაცემების საფუძველზე ადგენს და აზუსტებს საარჩევნო უბანში შემავალი ყველა საცხოვრებელი შენობა-ნაგებობის ნუსხას და მისამართებს, აგრეთვე იმ შენობა-ნაგებობათა ნუსხასა და მისამართებს, რომლებიც საქართველოს საარჩევნო ადმინისტრაციამ შეიძლება გამოიყენოს საარჩევნო მიზნებისთვის. 

საქართველოს ფინანსთა სამინისტრო საქართველოს სახელმწიფო ბიუჯეტიდან არჩევნებისთვის გამოყოფილ ფულად სახსრებს ცესკოს ანგარიშზე ჩარიცხავს.

ის პარტიები, რომელთაც არ ჰყავთ საქართველოს პარლამენტში, ამ პარტიის ან საარჩევნო ბლოკის წარდგენით არჩეული წარმომადგენელი, ან რომელთა წარმომადგენლებიც არ იყვნენ რეგისტრირებული ბოლო საპარლამენტო არჩევნებისას, ან არ ჰყავთ კვალიფიციური საარჩევნო სუბიექტი – ხვალ ცესკოს წარუდგენენ ადგილობრივი თვითმმართველობის ორგანოთა არჩევნებში პარტიის მონაწილეობის მხარდამჭერ ამომრჩევლების სიას. მხარდამჭერთა სიას ცესკოს სათანადო სამსახური ამოწმებს მისი წარდგენიდან 2 დღის ვადაში და დასკვნას ცესკოს თავმჯდომარეს წარუდგენს. იმ შემთხვევაში თუ მხარდამჭერთა სიები აკმაყოფილებს საარჩევნო კოდექსის მოთხოვნებს, ცესკოს თავმჯდომარე მეორე დღესვე გაატარებს საარჩევნო რეგისტრაციაში პარტიასა და მის წარმომადგენელს.  წინააღმდეგ შემთხვევაში, იგი იმავე ვადაში გამოსცემს განკარგულებას საარჩევნო რეგისტრაციაზე უარის თქმის შესახებ, რომელიც პარტიის წარმომადგენელს დაუყოვნებლივ ეცნობება და მოთხოვნისთანავე გადაეცემა.

ხვალიდან სამაუწყებლო ლიცენზიის მფლობელები, საზოგადოებრივი მაუწყებელი და საზოგადოებრივი მაუწყებლის აჭარის ტელევიზია და რადიო ვალდებულნი არიან კენჭისყრის დღემდე  მაუწყებლობის მიერ წინასაარჩევნო აგიტაციისა და პოლიტიკური რეკლამისთვის საეთერო დროის გამოყოფის შემთხვევაში საჯაროდ გამოაცხადონ და  საქართველოს კომუნიკაციების ეროვნულ კომისიას ყოველკვირეულად გადასცენ ინფორმაცია: რომელი რიცხვიდან რომელ რიცხვამდე და რა პერიოდულობით არის გამოყოფილი საეთერო დრო, 1 დღის განმავლობაში გამოყოფილი დროის ხანგრძლივობა და გრაფიკი, საეთერო დროის ტარიფი, გაწეული მომსახურება. 

ხვალიდან საოლქო საარჩევნო კომისია საუბნო საარჩევნო კომისიის 6 წევრს აირჩევს. საარჩევნო კოდექსის მიხედვით საუბნო საარჩევნო კომისიის წევრების არჩევა, არჩევნების დღემდე არა უადრეს 50-ე და არა უგვიანეს 46-ე დღეს უნდა მოხდეს.

უფლებამოსილი პარტიები შესაბამის საოლქო საარჩევნო კომისიას წარუდგენენ საუბნო საარჩევნო კომისიის წევრის დანიშვნის შესახებ გადაწყვეტილებას.

საარჩევნო ღონისძიებათა სრული გრაფიკი იხილეთ აქ.

ცესკოს ინფორმაციით დაინტერესებულმა მხარეებმა რეგისტრაცია შესაბამის საარჩევნო ადმინისტრაციაში (ცენტრალური საარჩევნო კომისია ან საოლქო საარჩევნო კომისიები)  უნდა გაიარონ.

ადგილობრივი თვითმმართველობის წარმომადგენლობითი და აღმასრულებელი ორგანოების არჩევნები 15 ივნისს ჩატარდება.

მედიაორგანიზაციებმა ცესკოში ან საოლქო საარჩევნო კომისიებში უნდა წარადგინონ რეგისტრაციის მოთხოვნის განცხადება (შესაბამისი საარჩევნო ადმინისტრაციის მდივნის სახელზე), ასევე აკრედიტაციის მსურველი ჟურნალისტების სია და მათი პირადობის მოწმობების ასლები. განცხადება აკრედიტაციის შესახებ წარედგინება შესაბამის საარჩევნო კომისიას კენჭისყრის დღემდე არა უგვიანეს მე-3 დღისა (12 ივნისი, 18:00 სთ).

არჩევნების პროცესში, მედიასთან დაკავშირებულ საკთხებს ჟურნალისტები გაეცნობიან ამ ბმულზე.

დეტალური ინფორმაციისთვის რეგისტრაციისა და აკრედიტაციის შესახებ იხილეთ შემდგი ბმულები:

ადგილობრივი სადამკვირვებლო ორგანიზაციები

საერთაშორისო სადამკვირვებლო ორგანიზაციები

ტბის მოვლა-პატრონობა „შავი ზღვის ფლორისა და ფაუნის შემსწავლელი  სამეცნიერო-კვლევითი ცენტრის“ პრეროგატივაა. შესაბამისი კვლევა ცენტრმა გასულ წელს ჩაატარა. მაშინ „ბათუმელებთან“  საუბარში ცენტრის ხელმძღვანელი ნატალია ზოიძე ამბობდა, რომ პრობლემა ტბაში ბალახისმჭამელი თევზების გაშვებით მოგვარდებოდა.

„ბათუმელები“ დაინტერესდა, რა მდგომარეობაა ერთი წლის შემდეგ და შეჩერდა თუ არა ტბის დაჭაობების პროცესი. აღმოჩნდა, რომ შესაბამისი ღონისძიებები ჯერ არ გატარებულა.

„ტბაში ბალახისმჭამელი თევზების გაშვება იყო გეგმაში, მაგრამ არამიზნობრივ ხარჯად ჩავთვალეთ მანამ, სანამ გარკვეული საკითხები არ მოგვარდება.  კონკრეტულად ეს ყველაფერი მაინც მიბმულია სანიაღვრე არხის პრობლემასთან. როდესაც სანიაღვრე არხი გაკეთდება, მერე უკვე ტბის პრობლემაც მოგვარდება,“ – ამბობს ნატალია ზოიძე.

სანიაღვრე არხის მოწესრიგება, რომელიც ხელშემშლელ ფაქტორად დაასახელა კვლევითი ცენტრის ხელმძღვანელმა, ბათუმის მერიის პრეროგატივაა. მერიის კეთილმოწყობის სამსახურის უფროსის მოვალეობის შემსრულებელი ავთანდილ ბურკაძე ამბობს, რომ ნინოშვილის ქუჩაზე უკვე კეთდება ახალი კოლექტორი, ტენდერი გამოცხადებულია და სამუშაოები ორ თვეში დასრულდება.

ნატალია ზოიძის განცხადებით, მანამდე, სანამ სანიაღვრე არხის პრობლემა მოგვარდება, ტბის მექანიკური გაწმენდა ჩვეულ რეჟიმში გრძელდება. მისივე თქმით, მას შემდეგ, რაც ტბაში თევზებს გაუშვებენ, ტბაზე დროებით თევზჭერა უნდა აიკრძალოს.

„ბათუმელები შეჩვეულები არიან იმას, რომ ყოველთვის თავისუფალი იყო თევზჭერა. მას შემდეგ, რაც თევზებს გავუშვებთ, უნდა გამოვაცხადოთ მორატორიუმი ტბაზე თევზჭერის, თუნდაც ორი წლით აკრძალვაზე,“ – აცხადებს ნატალია ზოიძე.

მისივე თქმით, ამ თემას ცალკე პროპაგანდა სჭირდება და სასურველია ბათუმში მცხოვრებლები   თვითონ მივიდნენ ამ გადაწყვეტილებამდე.

ფესტივალი წელს პირველად გაიმართება და მასში მონაწილეობას  ქართველი შემსრულებლები მიიღებენ.

ფესტივალი ორ სეგმენტად იყოფა: საგანმანათლებლო (ვორქშოპები, ლექციები) და მუსიკალური ნაწილი (მუსიკალურიპერფორმანსები); როგორც ვორკშოფები, ისემუსიკალური წარმოდგენები სამივე დღეს ჩატარდება.

ფესტივალის პროგრამა:

25 აპრილი

ლექცია: 17:30სთ (რეზო კიკნაძე)
თემა: „კომპროვიზაცია”: იმპროვიზაცია კომპოზიციაში და კომპოზიცია იმპროვიზაციაში. იმროვიზაციის ტიპების მიმოხილვა სხვადასხვა მუსიკალურ კულტურასა და ეპოქაში. თანამედროვე მუსიკის როგორც იმროვიზაციული, ისე საკომპოზიციო ასპექტები, თუ როგორ უთიერთქმედებს ეს ორი საწყისი და გადის თუ არა სადმე ზღვარი მათ შორის.
კონცერტი: 19:30სთ –(Giorgi Samsonia, TeTe Noise, Kuji Davituliani, KIDAGE GROUP)

26 აპრილი

ლექცია: 17:30სთ (გია ხადური)
თემა: ექსპერიმენტული მუსიკის მნიშვნელობა და საქართველოს კონტექსტში მისი განუვითარებლობის მიზეზები.
კონცერტი: 19:30სთ (Levan Maisuradze, Jorjick, OID (Andrei Antonets)

27 აპრილი

ლექცია: 17:30სთ (ნიკო ნერგაძე )
თემა: ექსპერიმენტული მუსიკა და მეინსტრიმი – რა დამოკიდებულებაა მათ შორის, როგორ გადაიქცევა ერთი მეორედ და რა ახდენს ამაზე გავლენას.
კონცერტი: 19:30სთ (Irakli Abramishvili, sikha, Gogi Dzodzuashvili, Vincent Volt)
Video Design: Giorgi Mozgovoi