რამდენიმე წუთის წინ პრემიერ-მინისტრმა ირაკლი ღარიბაშვილმა კოალიცია „ქართული ოცნების“ ბათუმის მერობის კანდიდატად ბათუმის მერის მოვალეობის შემსრულებელი გიორგი ერმაკოვი წარადგინა.
გიორგი ერმაკოვი ბათუმის მერის მოვალეობას 2013 წლის თებერვლიდან ასრულებს, მის მოადგილედ დანიშვნას ყოფილმა მერმა ჯემალ ანანიძემ თავად მოაწერა ხელი. ერმაკოვის დანიშვნიდან მოკლე დროში კი მან თანამდებობა დატოვა. მანამდე ცოტა ხნით ადრე ვრცელდებოდა ინფორმაცია, რომ გიორგი ერმაკოვის ბათუმის მერად დანიშვნის დირექტივა საკრებულომ პრემიერ ირაკლი ღარიბაშვილისგან მიიღო.
მერიაში დანიშვნამდე გიორგი ერმაკოვი შპს ,,თეგეტამოტორსის“ ბათუმის ფილიალის დირექტორად მუშაობდა.
მანამდე კი ის სხვადასხვა დროს საქართველოს ფინანსთა სამინისტროს შემოსავლების სამსახურის უფროსის აპარატის რეგიონული კოორდინატორი, გარემოს დაცვისა და ბუნებრივი რესურსების სამინისტროს გარემოს დაცვის ინსპექციის აჭარის ბიუროს უფროსი, შსს დაცვის პოლიციის დეპარტამენტის აჭარის სამმართველოს უფროსის მოადგილე, სამმართველოს უფროსი, შსს აჭარის კორუფციის წინააღმდეგ ბრძოლის სამსახურის უფროსი და შსს კორუფციის წინააღმდეგ ბრძოლის მთავარი სამმართველოს – განყოფილების უფროსი იყო.
დამთავრებული აქვს თბილისის ივანე ჯავახიშვილის სახელობის სახელმწიფო უნივერსიტეტის იურიდიული ფაკულტეტი.
ჰყავს მეუღლე და ერთი შვილი.
