Batumelebi

ხე-ტყის უკანონო ტრანსპორტირებისთვის  2014 წელს 39 პირი დაჯარიმდა, სამართალდარღვევა ადმინისტრაციული კანონით ისჯება  და 1000 ლარიან ჯარიმას ითვალისწინებს. მათგან აჭარის გარემოსდაცვითი ზედამხედველობის სამსახურმა ზოგიერთი დააჯარიმა, ზოგს კი გაფრთხილება მისცა.

ხე-ტყის პირველადი გადამამუშავებელი სახერხი საამქროს ტექნიკური რეგლამენტის მოთხოვნების დარღვევისათვის 76 პირი დაჯარიმდა, ამ შემთხვევაში კოდექსი 2000 ლარით დაჯარიმებას ითვალისწინებს.  დაჯარიმებული პირი თუ ტექნიკური რეგლამელამენტის მოთხოვნებს ისევ დაარღვევს, ჯარიმა გაუორმაგდება. გასულ წელს მსგავსი შემთხვევა, ანუ განმეორებითი დარღვევა გარემოსდაცვითი ზედამხედველობის სამსახურის ინპექტორებმა ცხრაჯერ დააფიქსირეს.

სამშენებლო და საყოფაცხოვრებო ნარჩენების დაყრის, ნარჩენებისა და ნაგვის გატანის, გატანა-გადაზიდვისა და დასუფთავების წესების დარღვევა სხვადასხვა შემთხვევაში 200 დან 1000 ლარამდე დაჯარიმებას ითვალისწინებს, გასულ წელს  ამ მიზეზის გამო  ჯარიმა თერთმეტჯერ გამოწერეს.

სასარგებლო წიაღისეულის უკანონოდ, ლიცენზიის გარეშე მოპოვების ფაქტი მიმდინარე წელს 204 – ჯერ დაფიქსირდა, დარღვევა 1000-დან 1500 ლარამდე ჯარიმებას ითვალისწინებს. ხოლო ლიცენზიის პირობების დარღვევისთვის მიმდინარე წელს ჯარიმა ოცდასამჯერ გამოწერეს. ამ შემთხვევაში დამრღვევი 500 ლარით ჯარიმდება.

სატრანსპორტო საშუალების გარეცხვა ზღვაში, ტბაში ან წყალსაცავში ორმოცდაათ ლარიან ჯარიმას ითვალისწინებს, ამ წესის დარღვევისთვის გასულ წელს თორმეტი პირი დაჯარიმდა.

„მეგობრებო, მინდა კომენტარი გავაკეთო ბათუმის ახალ ლოგოსთან დაკავშირებით. ყველა ვხვდებით, რომ გარემოებები საკმაოდ კომიკურად განვითარდა (ჩემი კოლეგებიც, არაკოლეგებიც და ა.შ.). უპირველეს ყოვლისა, მოგახსენებთ: ჩემი ლოგოს გამარჯვების ფაქტი არ დამიშვია – გავაკეთე არა პირველობის მიზნით, არამედ საკუთარი დიზაინერული „ვალი“ მოვიხადე ქალაქ ბათუმის წინაშე და კონკურსში გელა გელაშვილის სახელით მივიღე მონაწილეობა. რა თქმა უნდა, არც მიაქტიურია საკუთარი ლოგოს გა-PR-ების მიზნით და არც არავისთვის მითქვამს, რომ ლოგოს ავტორი მე ვარ. გავაკეთე – ავტვირთე – შევეშვი. ჩემს და გასაოცრად და თურმე სავალალოდაც, ლოგომ გაიმარჯვა და მეტიც – პლაგიატიც აღმოჩნდა. არ დაგიმალავთ, მსგავსი იდენტურობისას, ნებისმიერს რომ ეთქვა დამთხვევააო, რთულად დასაჯერებელი იქნებოდა. თუმცა არაერთი ჩვენგანი (დიზაინერებს ვგულისხმობ) აღმოჩენილა მსგავს უხერხულ ვითარებაში. იმასაც დავძენ, რომ ლოგოს „დაპლაგიატების“ ფაქტი ჩემთვის პირველია და ყოველთვის, მხოლოდ მივესალმები სიახლეებს – კარგია რომ განვიცადე ეს ზეციური ნეტარება.  როგორც წესი, აქამდე თქვენთვის კარგად ნაცნობ ჩემს ნამუშევრებს აპლაგიატებდნენ, რასაც ვებრძვი მთელი ჩემი შეგნებული პროფესიონალური მოღვაწეობის მანძილზე. ალბათ მართლაც რთულად დასაჯერებელია, მაგრამ იმედია ვაცნობიერებთ, რომ ჩემს კარიერას სასწორზე არ დავდებდი არცერთი კონკურსის და არა კონკურსის გამო. ძირითადი სათქმელი ვთქვი და აქვე დავძენ, რადგან მოხდა მსგავსი დამთხვევა, არ აქვს მნიშვნელობა ეს ბათუმის ლოგოა თუ რომელიმე ახლადშობილი პატარა კომპანიის – ვხსნი ჩემს კანდიდატურას კონკურსიდან და წარმატებებს ვუსურვებ მეორე ადგილზე გასულ კანდიდატს! გემშვიდობებით და გთხოვთ, ასე ძალიანაც ნუ მლანძღავთ,“ – წერს ანუკა მაღალაშვილი ფეისბუქზე.

სპეციალური კომისია ბათუმის ახალი ლოგოს შესარჩევად ბათუმის მერიაში დღეს საღამოს 7 საათზე შეიკრიბება.  

კომისიის ერთ-ერთი წევრი, ნათია აფხაზავა დღეს საღამოს გასამართ სხდომაზე კომპანია „ეისითისთან“ კონტრაქტის გაწყვეტის საკითხის დაყენებას აპირებს.

„არასერიოზული პროცესები მიმდინარეობს ბათუმის ლოგოს ირგვლივ. მე ვფიქრობ, რომ უნდა დასრულდეს ეს პროცესი. კომპანია „ეისითი“  ვერ ახერხებს ამ პროცესების მართვას და ეფექტურად წარმართვას.  თავიდანვე ჩემი მოთხოვნაც იყო, რომ კონტრაქტი შეჩერებულიყო და ამ საკითხის დასმას ვაპირებ კომისიაზე და არა ისე, რომ მეორე ადგილას გასული ლოგო გახდეს ბათუმის ლოგო.

უკვე ვფიქრობ, რომ  მუნიციპალიტეტის იმიჯისთვის და ზოგადად ამ პროცესებში საზოგადოების  მონაწილეობის კომპონენტის გათვალისწინებითაც  არამიზნობრივია იმ ლოგოს მიღება, რომელიც მეორე ადგილას გავიდა,“- ამბობს ნათია აფხაზავა.

ბათუმის ახალი ლოგოს შესარჩევად სხდომა დღეს, 24 დეკემბერს საღამოს 7 საათზე გაიმართება. მეორე ადგილზე გასული ლოგო გელა წულაძის „ყირამალაა.“

სასამართლოს გადაწყვეტილებით, პირს, რომელსაც სასამართლო გამამართლებელ განაჩენს გამოუტანს, შეეძლება მისი საქმე ზემდგომ ინსტანციაში გაასაჩივროს. სისხლის სამართლის კოდექსი აქამდე პირს ამის უფლებას უზღუდავდა.

2014 წლის 13 ივნისს საქართველოს უზენაესი სასამართლოს სისხლის სამართლის საქმეთა პალატამ შეაჩერა ბ. ი-ს საკასაციო საჩივრის განხილვა. საქმის მიხედვით, ბ. ი. გამართლებულია მისთვის წარდგენილ ბრალდებაში, თუმცა იგი სააპელაციო სასამართლოს გადაწყვეტილებას ასაჩივრებს მის მიერ გირაოს სახით შეტანილი თანხის სახელმწიფო ბიუჯეტში გადარიცხვის ნაწილში.

საქართველოს კონსტიტუციის 42-ე მუხლის პირველი პუნქტის შესაბამისად, ყოველ ადამიანს უფლება აქვს, თავის უფლებათა და თავისუფლებათა დასაცავად მიმართოს სასამართლოს. აღნიშნული კონსტიტუციური ნორმის საწინააღმდეგოდ, საქართველოს სისხლის სამართლის საპროცესო კოდექსის (1998 წლის 20 თებერვლის კანონი) შესაბამისი ნორმები გამორიცხავენ გამართლებული პირის მიერ საკასაციო (ისევე როგორც სააპელაციო) საჩივრის შეტანის უფლებას, კერძოდ, ამავე კოდექსის 546-ე მუხლის თანახმად, საკასაციო გასაჩივრების სუბიექტები არიან  518-ე მუხლში მითითებული პირები, ხოლო სსსკ-ის 518-ე მუხლის 1-ლი ნაწილის შესაბამისად, სააპელაციო საჩივრის შეტანის უფლება აქვთ სახელმწიფო ბრალმდებელს, ზემდგომ პროკურორს, დაზარალებულს, მსჯავრდებულს, დამცველს, მსჯავრდებულისა და დაზარალებულის კანონიერ წარმომადგენლებს.

იოსებ კევლიშვილი აჭარის გარემოს დაცვითი ზედამხემხედველობის სამსახურის ხელმძღვანელად დანიშვნამდე გაერთიანებული წყალმომარაგების კომპანიაში კახეთის რეგიონის ორგანიზაციას ხელმძღვანელიბდა, მანამდე კი  საქართველოს სოფლის მეურნეობის მელიორაციის სამსახურში მუშაობდა. იგი პროფესიით ინჟინერ-მშენებელია.

იოსებ კევლიშვილის განმარტებით გარემოსდაცვითი ზედამხედველობის სამსახური მომავალ წელს მუშაობას ხე-ტყის მასალის უკანონო მოპოვებისა და ლიცენზიების მოპოვების კანონიერების კონტროლის მიმართულებით გააგრძელებს, ხოლო რეაგირება ქუჩაში ნარჩენების დატოვების ფაქტებზე გამკაცრდება.    

ნაძვის მოჭრა კანონით დასჯადია და პირს, რომელიც ნაძვს უკანონოდ მოჭრის,  ჯარიმა დაეკისრება. კერძოდ, სახელმწიფო ტყის ფონდის ტერიტორიაზე ხე-ბუჩქნარისა და ტყის კულტურების მოსპობა და დაზიანება გამოიწვევს დაჯარიმებას 200-დან 400 ლარამდე. თუ ნაძვს დაცულ ტერიტორიებზე მოჭრით, ჯარიმის ოდენობა 400-დან 500 ლარამდე იქნება, ასევე კანონდარღვევა ეროვნული პარკის, ბუნების ძეგლის, საერთაშორისო მნიშვნელობის ჭარბტენიან ტერიტორიაზე ან საქართველოს „წითელ ნუსხაში“ შეტანილი სახეობების მიმართ, გამოიწვევს დაჯარიმებას 500-დან 600 ლარამდე.

გარემოსა და ბუნებრივი რესურსების დაცვის სამინისტროს ინფორმაციით, გარდა ადმინისტრაციული პასუხისმგებლობისა, სამართალდამრღვევს დაეკისრება გარემოსთვის მიყენებული ზიანის ანაზღაურებაც. თუ ზიანის თანხა შეადგენს ან აღემატება 1000 ლარს, დგება პირის სამართლებრივი პასუხისმგებლობა.

ნაძვის ხეების რეალიზაცია ერთადერთ შემთხვევაშია დასაშვები – თუ იგი მოპოვებულია სანერგეებში, პლანტაციებში, საკარმიდამო ნაკვეთში ან იმპორტირებულია. ასეთ შემთხვევაში აუცილებელია რეალიზატორმა წარმოადგინოს სათანადო დოკუმენტები, ხოლო საკარმიდამო ნაკვეთში მოპოვების შემთხვევაში – ცნობა, რომელსაც გასცემს ადგილობრივი მუნიციპალიტეტი.

გარემოსდაცვითი ზედამხედველობის დეპარტამენტის თანამშრომლები პრევენციულ ღონისძიებებს ე.წ. ცხელ წერტილებში – სახელმწიფო ტყის ფონდის მიმდებარე ტერიტორიებსა და მისასვლელ გზებზე, ქალაქის შემოსასვლელებთან და დასახლებულ პუნქტებში, ასევე საავტომობილო გზებზე განახორციელებენ.

 სამმართველომ სპაციალურად წინასაახალწლო დღეებში საზოგადოებაში  გარემოსდაცვითი ცნობიერების ამაღლების მიზნით ვიდეო რგოლი მოამზადა. 

ბათუმელი გიორგი თბილისში სწავლობს, ჯავახიშვილის უნივერსიტეტის სტუდენტია. გიორგიმ  დღეს მოსამართლეებს უთხრა, რომ კაცებს, ქალებისგან განსხვავებით, კონსტიტუციით გარანტირებული თანასწორობის უფლებაც ერღვევათ. მისი შეფასებით, სამხედრო-სააღრიცხვო სპეციალობის არმქონე მამაკაცებისთვის სამხედრო აღრიცხვაზე ყოფნის ვალდებულება დისკრიმინაციულია. 

გიორგი კეკენაძე სადავო ნორმის დისკრიმინაციულ ხასიათზე საუბრისას აღნიშნავს, რომ არის სტუდენტი, უნივერსიტეტის დასრულების შემდეგ ეწურება სამხედრო სამსახურის გადავადების ვადა და ექვემდებარება სამხედრო სამსახურში გაწვევას. ამიტომაც განსხვავებით ქალებისაგან, როგორც მოსარჩელე, ისე, ზოგადად, ამავე კატეგორიის მამაკაცები, ერთი წლის განმავლობაში მოკლებულნი იქნებიან პროფესიული კვალიფიკაციის ამაღლებისა და კარიერული წინსვლის შესაძლებლობას. 

სასამართლო პროცესზე საქართველოს პარლამენტის წარმომადგენელმა განაცხადა, რომ საქართველოს პარლამენტი ისევე როგორც იუსტიციისა და თავდაცვის სამინისტროები არ იზიარებენ მოსარჩელის პოზიციას. ამიტომაც მისი შეფასებით სადავო ნორმები არაკონსტიტუციურად სასამართლომ არ უნდა ცნოს.

პარლამენტის წარმომადგენელმა სასამართლოში დღეს შუამდგომლობაც დააყენა. ის ითხოვს თავდაცვის სამინისტროს თანამშრომლის [ექსპერტის] დაკითხვას სადავო ნორმებზე.ხოლო იუსტიციის სამინისტროს ოფიციალური წერილობითი პოზიცია მოსამართლეებს დღეს გააცნო. 

„ეს არ არის პლაგიატი“ – ამბობს კომპანია „ეისითის“ კონსალტინგის დირექტორი ირინა დუმბაძე. ეს კომპანია უზრუნველყოფდა ბათუმის ლოგოს შესარჩევი კონკურსის ჩატარებას.

„რაც დაიდო სოციალურ ქსელებში, ეს არის „shutterstock“-ზე, საიტზე, საიდანაც დიზაინერები ყიდულობენ სიმბოლოებს, რომ ინტეგრირება მოახდინონ თავიანთ ნამუშევრებში, ზოგი რაღაც დეტალს იყენებს და ასე შემდეგ. „shutterstock“-ზე დადებული სიმბოლო ნიშნავს იმას, რომ თქვენც შეგიძლიათ იყიდოთ და გამოიყენოთ და ეს არ არის პლაგიატი. პლაგიატი სხვა რამეა, ესაა როცა კომპანიას აქვს თავისი ლოგო და შენ გადმოიღებ პირდაპირ“ – ამბობს ირინა დუმბაძე, რომელიც ფიქრობს, რომ ლოგოტიპი თავისი ვიზუალით შეესაბამება ბათუმს. 

„ბათუმელებმა“ ლოგოს ავტორთან დაკავშირება სცადა, თუმცა მისი ტელეფონი ამ დროისთვის გამორთულია.  

გამარჯვებული ლოგოტიპის საპრიზო პრემიაა 1200 ლარი. „ეისითი“ ბათუმის მერიის მიერ 2014 წლის შვიდ მაისს, ბათუმის ბრენდკონცეფციაზე გამოცხადებულ ტენდერში გამარჯვებული კომპანიაა, რომელმაც სამუშაო 32 ათას ლარად შეასრულა. ბათუმის ლოგო ინტერნეტში ხმის მიცემის საშუალებით კომპანიამ 8 ივნისს გამოავლინა, თუმცა საზოგადოებამ ლოგო ბათუმისთვის შეუფერებლად მიიჩნია და პეტიციაც კი შედგა ლოგოს შეცვლის მოთხოვნით, ამიტომ კომპანიამ ბათუმის ლოგოს კონკურსი ხელახლა გამოაცხადა, ლოგოს შესარჩევად კომისიამ იმუშავა და შედეგები 23 დეკემბერს გახდა ცნობილი.   

„გამომდინარე იქიდან, რომ საქართველოში ერთადერთი ოლიმპიური სტანდარტის მოედანი, რომელიც შეესაბამება საერთაშოსო სტანდარტებს, არის ბათუმში, მიზანშეწონილად მიგვაჩნია, რომ ოპტიმალურად იყოს გამოყენებული ყინულის მოედნის შესაძლებლობები. ანუ სპორტის ის სახეობები, რომელიც თამაშდება  ყინულზე, მაქსიმალურად გვქონდეს ათვისებული. ამავდროულად ძირითადი მიზეზი, რატომაც დაიწყო ლაპარაკი იმაზე, რომ ჰოკეის გუნდი შეიქმნას, არის ის, რომ კლუბი გათავისუფლებული იქნება ადმინისტრაციის ხარჯებისგან, განსხვავებით სხვა კლუბებისგან, რომლებიც საჭიროებენ ადმინისტრაციულ ხარჯებს, ისეთს, როგორიცაა, მაგალითად კლუბის დირექტორის დანიშვნა, ბუღალტერიის წარმოებისათვის სხვა ახალი რესურსების მოზიდვა და ა.შ. ეს კლუბი იქნება სპორტულ ახალგაზრდული კლუბის ბაზაზე და ამ კლუბის ბიუჯეტი მოხმარდება მხოლოდ კლუბის სპორტულ განვითარებას და არაფერს სხვას,“- აცხადებს ირაკლი ბერიძე, ბათუმის სპორტულ-ახალგაზრდული ცენტრის დირექტორი. 

მისივე თქმით ბათუმში ჰოკეის გუნდის ჩამოყალიბების იდეას ძალიან დიდი მხარდაჭერა აქვს საქართველოს ჰოკეის ფედერაციის მიერ, რომელსაც სპორტისა და ახალგაზრდულ საქმეთა სამინისტრო აფინანსებს.  

„საქართველოს ყინულის ჰოკეის ფედერაციისგან გვაქვს მიღებული დასტური იმასთან დაკავშირებით, რომ ისინი ინვენტარის გარკვეულ ნაწილს საჩუქრად გადმოსცემენ ბათუმის კლუბს, თუ ეს კლუბი შეიქმნება. ამავდროულად ისინი  გვპირდებიან და ეს დოკუმენტურადაც არის დადასტურებული,  ბათუმელ ახალგაზრდებს, მათ ვინც იქნებიან ასისტენტები ჰოკეის მთავარი მწვრთნელის, ზაფხულში, 2015 წლიდან გაუშვებენ ფინეთში გადამზადებაზე და მოამზადებენ თავიანთი ხარჯებით,“ – ამბობს ირაკლი ბერიძე.  

ირაკლი ბერიძის თქმით ამ დროისათვის ბათუმის სპორტულ-ახალგაზრდულ ცენტრში მხოლოდ ფიგურულ ციგურაობაზე 500 აღსაზრდელი ჰყავთ.  

„ყინულის ჰოკეი იქნება კიდევ ერთი დამატებითი სპორტის სახეობა, რომელიც ყინულის მოედანზე ბავშვს მოიყვანს. ვთვლით, რომ ეს იქნება ბათუმელი მშობლებისათვის და  ბავშვებისათვის სტიმული, რომ ყინულზე სასრიალოდ მოვიდნენ. ძალიან კარგად გვაქვს გათავისებული ის პასუხისმგებლობა, რაც უკავშირდება არაპროფესიული სპორტის სახეობისთვის ბათუმში ადგილის დათმობას, მაგრამ ვთვლით, რომ საპილოტე ვერსია ამ კლუბის მუშაობისა 2015 წელს უნდა დაიწყოს და ჩვენ უნდა გამოვაცხადოთ მიღება ჰოკეის კლუბში. ეს იქნება კარგი საშუალება, რომ ბავშვი სპორტით დაკავდეს და თან ჯანსაღი სპორტით, ისეთით, როგორიც არის ჰოკეი,“- აცხადებს ირაკლი ბერიძე.

საქართველოში ყინულის ჰოკეის ეროვნული ფედერაცია 2004 წლის ოქტომბერში შეიქმნა.  საქართველოს პირველი ეროვნული ჩემპიონატი 2008 წელს ჩატარდა, რომელშიც მონაწილეობა ოთხმა გუნდმა მიიღო. დღეისათვის ყინულის ჰოკეის მოთამაშეთა ოდენობა ქვეყნის მასშტაბით 270 მოთამაშეს აჭარბებს, აქედან 170-ზე მეტი მოზარდია. დღეისათვის საქართველოში ორი სტანდარტული და ორი მომცრო ზომის მოედანი ფუნქციონირებს. ირაკლი ბერიძის თქმით, ბაკურიანის და ბათუმის ყინულის მოედნებზე საერთაშორისო ტურნირების ჩატარებაა შესაძლებელი. 

მოსწავლეებს სამუშაო ჯგუფის წევრები: შსს-ს აჭარის მთავარი სამმართველოს უფროსის მოადგილე გიგლა მოსიძე, შსს-ს აჭარის მთავარი სამმართველოს ბათუმის საქალაქო სამმართველოს უბნის ინსპექტორ-გამომძიებელი ნანა ხალითბა, განათლებისა და მეცნიერების სამინისტროს ადმინისტრაციის მოადგილე ეკატერინე კენჭაძე, ამავე სამინისტროს მულტიდისციპლინური გუნდის წევრი ინგა ზარანდია, მანდატურის სამსახურთან არსებული ფსიქოლოგიური ცენტრის წარმომადგენლები თეონა შანთაძე და მარიამ სტეფნაძე, “ძალადობისაგან დაცვის ეროვნული ქსელი” -ს იურისტი ნანა ბერიძე ესაუბრნენ. 

სამუშაო ჯგუფის წევრებმა ბათუმის სკოლის მოსწავლეებს ოჯახში ძალადობის წინააღმდეგ ბრძოლის სოციალური კამპანიის მიზანი და მნიშვნელობა გააცნეს და შინაგან საქმეთა სამინისტროს ინიციატივით კანონში შესული ცვლილებების შესახებ ისაუბრეს. 2013 წლიდან საქართველოს სისხლის სამართლის კოდექსში შევიდა ცვლილებები, რომელთა მიხედვითაც მოხდა ოჯახში ძალადობის კრიმინალიზაცია. კანონში შესული ცვლილებების მიხედვით, ოჯახში ძალადობა 1 წლამდე თავისუფლების აღკვეთით ისჯება. 

შეხვედრაზე კამპანიის ფარგლებში შექმნილი მუსიკალური კლიპის და სოციალური რგოლების ჩვენება გაიმართა, რომელთა მიზანია საზოგადოებისთვის ინფორმაციის მიწოდება იმის შესახებ, რომ ოჯახში ძალადობის ფაქტების შემთხვევაში უნდა დარეკონ ცხელ ხაზზე: „112“ ან მიმართონ უბნის ინსპექტორს, მოძალადეებმა კი მიიღონ გაფრთხილება, რომ ოჯახში ძალადობა თავისუფლების აღკვეთით ისჯება. 

შინაგან საქმეთა სამინისტრომ, სხვა სახელმწიფო უწყებებთან ერთად, აშშ-ს საელჩოს მხარდაჭერით, ოჯახში ძალადობის წინააღმდეგ ბრძოლის სოციალური კამპანია „არა ძალადობას!“ 25 ნოემბერს დაიწყო. კამპანიის მიზანია საზოგადოების ცნობიერების ამაღლება ოჯახში ძალადობის შესახებ და ამ პრობლემის დასაძლევად საზოგადოების ჩართულობის აუცილებლობის ხაზგასმა. კამპანიის ფარგლებში დაგეგმილი სხვადასხვა ღონისძიების მეშვეობით მოხდება საზოგადოების ინფორმირება იმის შესახებ, რომ ოჯახში ძალადობის მსხვერპლს კანონი იცავს, ხოლო მოძალადეები კანონით ისჯებიან.

„სანდასუფთავების“ ხელმძღვანელის ინფორმაციით ნაგავდამჭერი ხაფანგები მდინარეში ზღვის შენაკადებთან ახლოს უნდა დამონტაჟდეს, ეს ზღვას მდინარისგან  ჩამოტანილი ნარჩენებისგან დაიცავს.

„ეს არის მარტივი კონსტრუქცია და მის შესაძენად არც თუ ისე დიდი თანხაა საჭირო“ – განაცხადა დავით ასამბაძემ. 

გუშინ თბილისში გამართულ გამგეობის სხდომაზე საქართველოს ახალგაზრდა იურისტთა ასოციაციის თავმჯდომარედ ორგანიზაციის იურისტი, ანა ნაცვლიშვილი აირჩიეს, ხოლო მის მოადგილედ – ნათია კაციტაძე.

საკრებულოს წევრები ორგანიზაციაში დასაქმებული მძღოლების შრომითი პირობებით დაინტერესდნენ. შპს „ავტოტრანსპორტის“ ხელმძღვანელის ინფორმაციით ამ დროისათვის ორგანიზაციაში 220 მძღოლია დასაქმებული, რომელთა ანაზღაურებაც ცოტა ხნის წინ გაიზარდა და  საათში 4 ლარსა და 20 თეთრს შეადგენს. მძღოლს შეუძლია კვირაში ერთი დღე დაისვენოს. ამ დროისათვის არსებული მონაცემებით თითოეული მძღოლი საშუალო დატვირთვით თვეში 60 ლარიდან 800 ლარამდე ანაზღაურებას გამოიმუშავებს.  პერიოდულად მოწმდება მათი ჯანმრთელობის მდგომარეობა და ორგანიზაციაში მათი ჯანმრთელობის დაზღვევის საკითხიც განიხილება.

პაატა დუმბაძის ინფორმაციით ამ დროისათვის ყველა მძღოლთან გაფორმებულია შრომითი ხელშეკრულება:  „ეს საკითხიც პროფესიულ კავშირებთან ერთად გავიართ.“

საკრებულოს წევრები დაინტერესდნენ, ხორციელდება თუ არა ყოველ დილით მძღოლის როგორც ალკოტესტზე შემოქმება, ასევე წნევის გასინჯვა, რაზეც პაატა დუმბაძემ უპასუხა, რომ ალკოტესტზე შემოწმება ეტაპობრივად ხორციელდება, რადგან „ყოველდღე ეს შეუძლებელია“.

საკრებულოს წევრის ირაკლი ჩავლეიშვილის რეკომენდაციით შპს „ავტოტრანსპორტმა“ მძღოლები როგორც ალკოტესზე უნდა შეამოწმოს ყოველი სამუშაო დღის წინ, მათ წნევაც უნდა უკონტროლონ:

 „არსებობს ელეტროხელსაწყო რომელიც წნევას სინჯავს ძალიან მცირე დროში და ამაში რთული არაფერია.“

საკრებულოს წევრი კობა ჩხეიძე დაინტერესდა, თუ რამდენია ე.წ „მინის მოსაცდელების“ დამონტაჟებისა და მისი შენახვის ხარჯი, ასევე რამდენია რეკლამიდან შემოსული შემოსავალი, რაზეც პაატა დუმბაძემ უპასუხა რომ ამ ინფორმაციის გასაცემად ის მზად არ იყო.

ორგანიზაციის ხელმძღვანელის ინფორმაციით 2015-2018 წლებში  განსახორციელებელ პროექტებში მუნიციპალური ტრანსპორტის მგზავრთა ნაკადის მთვლელი სისტემით აღჭურვა, მოსაცდელების მოწესრიგება, ტერმინალების მოწყობა, ბუნებრივ აირზე მომუშავე ავტობუსების შეძენა  დაასახელა, მისივე ინფორმაციით:  „ამ პროექტების განხორციელებას მთლიანობაში დაახლოებით ათი მილიონი ლარი დასჭირდება.“

მოვალი წლის ბათუმის ბიუჯეტის პროექტში, რომელიც საკრებულოს ჯერ არ დაუმტიკებია შპს „ ბათუმის ავტოტრანსპორტის“ დაფინანსება 3 300 000 ლარია, გარდა ამისა მერიამ პედაგოგებისა და მოსწავლეების უფასოდ მგზავრობის დასაფინანსებლად ბიუჯეტში მილიონ 300 000 ლარი გაითვალიწინა – პაატა დუმბაძის მიხედვით ეს თანხა შესაძლებელია ორგანიზაციამ მთლიანდა არ აითვისოს: „ ჩვენ ვაკეთებთ იმ მომსახურების რაპორტს, რაც გავწიეთ, შესაბამისად გვირიცხავს მერია თანხას“.

საკრებულოს „ქართული ოცნების“ ფრაქციის თავმჯდომარემ შპს „ბათუმის ავტოტრანსპორტის“ ხელმძღვანელს ურჩია ავტობუსების გამართულობა – გაახლებისა და კომფორტულად მგზავრობის საკითხზეც იზრუნოს: „მე კონკრეტული მიზნით ვმგზავრობ ავტობუსით და იქ რომ ვზივარ თავი აკვანში მგონია“ – განაცხადა თამაზ თურმანიძემ შეხვედრაზე.  ის აიპების მიერ საკრებულოს წევრებისთვის ანგარიშის ჩაბარებისა და განვითარების სტრატეგიის გასაცნობად სამუშაო შეხვედრის ინიციატორი და ორგანიზატორი იყო.

მოდელირების დასაწყისში დელეგატებმა წარმოადგინეს თავიანთი ქვეყნების პოციზია თემასთან დაკავშირებით, რის შემდეგაც დებატების რეჟიმში იმსჯელეს და განიხილეს არსებული პრობლემები. ფორმალური და არაფორმალური მოლაპარაკების შემდეგ მოკავშირეების მიერ წარმოდგენილი რეზოლუციებიდან კენჭისყრის შედეგად მიღებული იქნა ერთი, როგორც მოდელირების საბოლოო შედეგი. 

მოდელირების ბოლოს გამოვლინდნენ საუკეთესო დელეგატები: ანი დოლიძე, ლიკა ფირცხალაიშვილი, მარიტა გორგილაძე და მზიკო ფარტენაძე, რომლებიც მონაწილეობას მიიღებენ შემაჯამებელ მოდელირებაში ქალაქ თბილისში.

გაეროს მოდელირების კონფერენცია ჩატარდა პროექტის ფარგლებში “ეროვნული ინტეგრაციის გაძლიერება საქართველოში” (ANI), რომელსაც ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით.

19 დეკემბერს ბათუმის შოთა რუსთაველის სახელობის უნივერსიტეტის საარჩევნო კომისიამ გადაწყვეტილება გამოაქვეყნა, რომლის თანახმადაც, სტუდენტ გიორგი ბოლქვაძის საჩივარი სოციალურ და პოლიტიკურ მეცნიერებათა ფაკულტეტის დეკანის არჩევნების შედეგების ბათილად ცნობის შესახებ დაკმაყოფილდა და ფაკულტეტზე დეკანის არჩევნების მე-2 ტური დაინიშნა, რომელიც 2014 წლის 22 დეკემბერს ჩატარდა, არჩევნების მეორე ტურში გამარჯვებული ქეთი ბერიძე გახდა.

სწორედ 19 დეკემბრის გადაწყვეტილების ბათილად ცნობას მოითხოვს დეკანობის მეორე კანდიდატი ირაკლი მანველიძე, მან საჩივარი სასამართლოში არჩევნების დღეს შეიტანა: „19 დეკემბერს საარჩევნო კომისიის მიერ მიღებული გადაწყვეტილება არის უკანონო, უსაფუძვლო და დაუსაბუთებელი. სამართლებრივი არგუმენტები არ იქნა წარმოდგენილი, საკითხის განხილვას ვესწრებოდი, სხდომაზევე გამოვლინდა ურთიერთსაწინააღმდეგო განცხადებები სტუდენტის მხრიდან. მაგალითად, ის ამბობს, რომ 13 და 14 დეკემბერს ჩემთან ჰქონდა ინტენსიური შეხვედრა, როდესაც განვახორციელე თითქოსდა მასზე ზეწოლა, თუმცა კომისიის დასმულ შეკითხვაზე, სად ხდებოდა ეს შეხვედრები, ვერ უპასუხა, ვერც დრო დაასახელა. შემდეგ აღმოჩნდა, რომ ეს სტუდენტი ამ რიცხვებში იყო ქობულეთში სემინარზე. ბრალდებებიც წინააღმდეგობრივია, როდესაც მის საჩივარში საუბარია  შანტაჟზე, ზეწოლაზე, ზემოქმედებაზე, მოსყიდვაზე და დახმარებაზე, თუ ერთგან ზეწოლას ვახდენდი, შემდგომ როგორ ვეხმარებოდი? თუ შანტაჟი იყო, მოსყიდვა რაღა საჭირო გახდებოდა?” 

სტუდენტი გიორგი ბოლქვაძე ამბობს, რომ შეხვედრა არა 13-14 დეკემბერს, არამედ 12 დეკემბერს შედგა. მისივე თქმით, ამის ვიდეო ჩანაწერიც არსებობს: “13-14 ბორჯომში ვიყავი, საჩივარში 12 რიცხვი მიწერია, დროც მითითებული მაქვს და ადგილიც, რადგან ეს შეხვედრა დააფიქსირა სათვალთვალო კამერებმა. თუ გამოძიების საჭიროება მოითხოვს, შეუძლიათ უნივერსიტეტის ვიდეოჩანაწერების ნახვა, ასევე, კომისიას წარვუდგინე სატელეფონო ამონაწერი, რამდენჯერ დარეკა, რა დროს დარეკა ყველაფერი დაფიქსირებულია. ეს ყველაფერი, ჩემი არგუმენტები და მოწმეები გახდა საფუძველი იმის, რომ გაბათილებულიყო არჩევნების შედეგები” – ამბობს გიორგი ბოლქვაძე.  

ირაკლი მანველიძემ სასამართლოს ცენტრალური საარჩევნო კომისიის გადაწყვეტილების ბათილად ცნობის თხოვნით მიმართა. მისი თქმით, მას შემდეგ რაც არჩევნები ორჯერ ჩაიშალა, უნივერსიტეტს არჩევნები ერთვიანი ვადის გასვლის შემდეგ უნდა დაენიშნა: “ამას მოითხოვს დებულება, არჩევნები თავიდან უნდა გამოეცხადებინათ. მეორე გარემოება – ერთი თვის განმავლობაში საქალაქო სასამართლოში გასაჩივრების შესაძლებლობა გვქონდა აღნიშნული გადაწყვეტილების, თუმცაღა ფაქტობრივად მეორე დღეს დანიშნეს არჩევნები. ეს ფაქტი უკანონოა, დალოდებოდნენ ამ ერთ თვეს, იქნებ სასამართლოში შევიდოდა სარჩელი, არ უფიქრიათ, რომ მათი გადაწყვეტილება შეიძლება კითხვითი ნიშნის ქვეშ დამდგარიყო. 19 დეკემბრის პარასკევს, ადმინისტრაციამ ღამის 10 საათზე დაასრულა მუშაობა, ორშაბათ კი არჩევნები უნდა ჩატარებულიყო.მე გუშინდლამდე ვერ მივმართავდი სასამართლოს, რადგან კომისიის გადაწყვეტილება სამუშაო დღემდე ვერ მომეწოდებოდა, მომეწოდა თუ არა, დღის პირველ საათზე შევიტანე სასამართლოში სარჩელი, არჩევნების შედეგები კი ხუთ საათზე გახდა ცნობილი” – აცხადებს ირაკლი მანველიძე.

უნივერსიტეტის იურისტი და საარჩევნო კომისიის თავმჯდომარე გიორგი დიასამიძე აცხადებს, რომ ყველა პროცედურა წესების დაცვით ჩატარდა. მისი თქმით უნივერსიტეტის დებულება, რომელიც რექტორის ბრძანებით 20 ივნისს იქნა მიღებული, პირველი ტურის შედეგების გაუქმების შემდეგ ითვალისწინებს მეორე ტურის დანიშვნას, კომისიის გადაწყვეტილებით კი მეორე ტურის შედეგები მთლიანად გაბათილდა და 22 დეკემბერს არჩევნების მეორე ტური ჩატარდა:

“საჩივრის საფუძველზე მეორე ტურის შედეგები ბათილად იქნა ცნობილი, ჩაითვალა, რომ 22 დეკემბერს კვლავ მეორე ტური გაიმართა, ამიტომაც ამ წესის დაცვა არ გვევალებოდა. თუმცა ეს მისი უფლებაა, შეუძლია მიმართოს სასამართლოს. უნივერსიტეტის დებულების თანახმად ვადლდებული ვიყავით არჩევნები ამ ვადებში ჩაგვეტარებინა. საარჩევნო კომისიაში არ შემოსულა საჩივარი, დღის ბოლოს იწურება ვადა, თუ არ შემოვა საჩივარი, დეკანის თანამდებობაზე დაინიშნება ქეთი ბერიძე, საქმეში არსებული მასალები სათანადო რეაგირებისთვის უნივერსიტეტის ეთიკის კომისიას და საგამოძიებო ორგანოებს გადაეგზავნათ” – აცხადებს გიორგი დიასამიძე. 

დეკანის არჩევნებში სასურველ კანდიდატს ხმას ფაკულტეტის აკადემიური პერსონალი და ფაკულტეტის საბჭოს წევრი სტუდენტები აძლევენ. ერთ-ერთი მათგანია სტუდენტი გიორგი ბოლქვაძე, რომელმაც არჩევნების დასრულების და ირაკლი მანველიძის გამარჯვების შემდეგ განაცხადა, რომ მის მიმართ არჩევნების პროცესში ზეწოლა განხორციელდა  ირაკლი მანველიძის მხრიდან და საარჩევნო ბიულეტენის გაუქმება მოითხოვა. 

ირაკლი მანველიძის თქმით სტუდენტის ყველა ბრალდება მის წინააღნმდეგ უსაფუძვლოა: “მე დარწმუნებული ვარ, რომ ეს განცხადება ამ სტუდენტის მიერ დაწერილი არ არის. ის ალბათ ადმინისტრაციის რომელიმე ოთახშია დაწერილი. როგორც ჩანს ამ ბავშვს აქვს შემორჩენილი წყენა, რადგან ერთ-ერთ სასწავლო კურსში ვერ მიიღო ნიშანი და ჩაიჭრა, ეს ნამდვილად არ არის ჩემი ბრალი, რადგან 30 საათიდან გაცდენილი აქვს 18 საათი, საერთოდ ეს სტუდენტი ლექციებზეც არ დადის, სხვა ლექტორებთან შეგიძლიათ მოიკითხოთ ეს.” – ამბობს ირაკლი მანველიძე, რომელიც გიორგი ბოლქვაძის საკონფერენფერენციო თემის მეცნიერ-ხელმძღვანელია: “მე ვალდებული ვარ სტუდენტს მსგავსი სამუშაოს შესრულებაში დავეხმარო, სტუდენტის აკადემიურ მოსწრებას ამ შემთხვევაში მნიშვნელობა არ აქვს” – ამბობს ის.  

გიორგი ბოლქვაძე ირწმუნება, რომ ადმინისტრაციის არც ერთი წარმომაგდენლი მას არ დახმარებია საჩივრის დაწერაში: „მე ვარ დამოუკიდებელი პიროვნება, არავის დაუწერია ჩემი საჩივარი. რაც შეეხება ჩარჩენილ საგანს, გამოცდაში მის მიერ ჩემთვის დაწერილი შეფასების გამო უნივერსიტეტის ხარისხის სამსახურიგან მას აქვს შენიშვნა მიღებული, შეგიძლიათ ეს დოკუმენტი ნახოთ კანცელარიაში. შენიშვნაში წერია, რომ მან სუბიექტურად შეაფასა ჩემი ნაშრომი, სილაბუსიდან გადახვევა ჰქონდა, დამინიშნეს განმეორებითი გამოცდა, თუმცა, რადგანაც ისევ ირაკლი მანველიძესთან უნდა ჩამებარებინა ეს გამოცდა, მე უარი ვთქვი. მინდა, რომ ეს საგანი სხვასთან გავიარო. მის ლექციაზე კი ჩვენი დაძაბული ურთიერთობის გამო არ დავდიოდი” – ამბობს გიორგი ბოლქვაძე. 

სახალხო დამცველის აპარატის მიერ გავრცელებულ ინფორმაციაში წერია, რომ საქართველოს სახალხო დამცველის აპარატს  მიმართავენ მამაკაცები, რომლებიც დაბრკოლებებს აწყდებიან დამსაქმებლებთან ურთიერთობისას საქართველოს შრომის კოდექსის 27–ე მუხლით გარანტირებული უფლების – ბავშვის მოვლის გამო შვებულებით სარგებლობის უფლების რეალიზაციასთან დაკავშირებით.

ამავე საკითხზე საქართველოს სახალხო დამცველმა მიმართა საქართველოს იუსტიციის მინისტრს ქალთა შრომითი უფლებების მე-2 ტალღის ცვლილებების განხილვისას გათვალისწინებული იქნას ხსენებული საკითხი და ცვლილებებზე მომუშავე ჯგუფმა განიხილოს შესაძლო გადაჭრის გზები.

საქართველოს შრომის, ჯანმრთელობისა და სოციალური დაცვის მინისტრის 2006 წლის 25 აგვისტოს ბრძანება გარკვეულ შეზღუდვებს უწესებს მამაკაცებს, ისარგებლონ ანაზღაურებადი შვებულებით ბავშვის მოვლის გამო. კერძოდ, ბრძანების მიხედვით, შვებულების თანმდევი კომპენსაციისათვის წარსადგენი დოკუმენტაცია გაიცემა მხოლოდ ქალზე და მხოლოდ მისი გარდაცვალების შემთხვევაში სხვა ოჯახის წევრზე. მაშინ როცა საქართველოს ორგანული კანონის შრომის კოდექსის მიხედვით გარანტირებულია აღნიშნული უფლებით სარგებლობა დასაქმებულთათვის მათი სქესის მიუხედავად.  

შპს „სანდასუფთავების“ დირექტორის დავით ასამბაძის ინფორმაციით მიწისქვეშა ნაგავშემკრები კონტეინერები, რომლებიც ანტისეპტიკური მასალითაა დამზადებული და გარემოს ზიანს არ მიაყენებს, ბათუმის გარეუბნებისა და შემოერთებული ტერიტორიებისთვის იქნება გამიზნული.

მიწისქვეშა ნაგავშემკრები კონტეინერების შესყვიდვა – დამონტაჟების იდეა დღეს შპს „სანდასუფთავების“ ხელმძღვანელმა საკრებულოს წევრებს გააცნო, მისივე ინფორმაციით ეს სისტემა ამიერკავკასიის ქვეყნებსა და თურქეთშია აპრობირებული და კარგად მუშაობს.

შპს „სანდასუფთავებამ“  სიახლის გამოცდის მიზნით 50 ერთეული მიწისქვეშა კონტეინერი უკვე შეისყიდა და მისი დამონტაჟების მიზნით შესაბამისი კომპანიის შესარჩევად  ელექტრონული ტენდერია გამოცხადებული.  ამ შესყიდვის საწყისი სატენდერო ღირებულება 65 000 ლარია, ხოლო ერთ ერთეულ კონტეინერის ფასი  9100  ლარია.

შპს „სანდასუფთავების“ თანამშრომლებმა განმარტეს, რომ ამ იდეის განხორციელების შემთხვევაში მათ აღარ ექნებათ კონფლიქტური სიტუაცია მოსახლეობასთან დასახლებულ უბნებში კონტეინეტების განთავსებასთან დაკავშირებით, რასაც მათი განმარტებით, „ამ დრომდე ხშირად აქვს ადგილი და მუდმივად საქმის გარჩევის საგანია“

საკრებულოს წევრებმა ორგანიზაციას იდეა მოუწონეს.

საკრებულოს წევრმა ირაკლი ჩავლეიშვილმა „სანდასუფთავების“ თანამშრომლებს მადლობა გადაუხადა „კარგად მუშაობისთვის და იმ ძალისხმევისთვის რასაც ისინი შტორმებისა და ცუდი ამინდებისას მოსახლეობის დასახმარებლად არ იშურებენ“

საკრებულოს წევრმა ჯაბა ბერიძემ კი ორგანიზაციას შენიშვნა მისცა იმასთან დაკავშირებით, რომ ე.წ.  ღია კონტეინერები ხშირად არ ირეცხება რაც ანტისანიტარიის წყაროა:  „სწორედ ამიტომ არ უნდა მოსახლეობას კონტეინერი მათი სახლების წინ დაიდგას.“

თემურ ყურაშვილის რეკომენდაციით კი შპს „სანდასუფთავებამ“  ე.წ ტრასის კონტეინერებიც უნდა განათავსოს, რომელსაც მძღოლები გამოიყენებენ. 

უმაღლესი საბჭო წინასაახალწლოდ ავტოპარკსაც განაახლებს. ერთი თვის წინ გაფორმებული ხელშეკრულებით „კია მოტორს ჯორჯიას“-გან საბჭო 2014 წელს გამოშვებულ, ექსპლუატაციაში არმყოფ მაღალი გამავლობის მსუბუქ „KIA SPORTAGE“-ს მარკის ავტომობილს და საგარანტიო პირობების ფარგლებში მის მომსახურებას 37 675 ლარად შეიძენს.

უმაღლესმა საკანონმდებლო ორგანომ, წინასაახალწლოდ,1600 ლარზე მეტი ღირებულების მისალოცი ბარათები, სუვენირები და ქოთნებიც შეიძინა. მათ შორის: 63 ლარიანი სასაჩუქრე სურათის ჩარჩო; აჭარის ავტონომიური რესპუბლიკის სამაგიდე დროშები (20 ცალი, თითო 6 ლარად); გრანიტში ნაწარმოები სუვენირი „აჭარული განდაგანა“ (20 ცალი, თითო 25 ლარად); ექვსი ცალი 25-ლარიანი საყვავილე ქოთანი; ექვსი ცალი სუვენირი „ძველი ბათუმი“ , ასევე ძველი ბათუმის ექვსი სურათი; 15 მაგნიტური ბარათი, ასი ცალი მისალოცი ბარათი და კონვერტები.

უმაღლესმა საბჭომ მთავარი „საახალწლო საჩუქარი“ რეგიონის მთავრობასაც გაუკეთა – 18 დეკემბერს აჭარის ბიუჯეტი დაამტკიცა. თუმცა, მომავალი წლის  ბიუჯეტის მიხედვით,  უმაღლეს საბჭოში ხელფასებისთვის განკუთვნილი თანხაც იზრდება –  მიმდინარე წელთან შედარებით 71 800 ლარით და ჯამში 3 468 900 ლარია. ახალი წლიდან უმაღლეს საბჭოში მომუშავეთა რიცხვიც 120-დან 125-მდე გაიზრდება.

2015 წელს უმაღლესი საბჭო, ხელფასების ჩათვლით, მთლიანობაში 4 958 800 ლარს დახარჯავს. 

სახალხო დამცველის პრევენციის და მონიტორინგის დეპარტამენტის ყოფილი უფროსი ნათია იმნაძე საქართველოს პარლამენტს  უჩივის. აღნიშნულ საქმეზე დავის საგანს წარმოადგენს „საჯარო სამსახურის შესახებ“ საქართველოს კანონის 79-ე მუხლის პირველი პუნქტის „ვ“ ქვეპუნქტის და ამავე კანონის 99-ე მუხლის კონსტიტუციურობა საქართველოს კონსტიტუციის 29-ე მუხლის პირველ და მე-2 პუნქტებთან და 42-ე მუხლის მე-3 პუნქტთან  მიმართებით.

 „საჯარო სამსახურის შესახებ“ საქართველოს კანონის 99-ე მუხლი განსაზღვრავს დისციპლინური გადაცდომისათვის საჯარო სამსახურიდან მოხელის გათავისუფლების წესს. ამავე კანონის 79-ე მუხლი ადგენს დისციპლინური პასუხისმგებლობის ზომებს, ხოლო მისი პირველი პუნქტის „ვ“ ქვეპუნქტის თანახმად, იმ თანამდებობის პირმა ან დაწესებულებამ, რომელსაც აქვს  საჯარო მოხელის თანამდებობაზე დანიშვნის უფლება, დისციპლინური გადაცდომის ჩადენის  შემთხვევაში, მის მიმართ შეიძლება გამოიყენოს სამსახურიდან განთავისუფლება ამ კანონის საფუძველზე.

მოსარჩელე მიიჩნევს, რომ სადავო ნორმიდან გამომდინარე, მის მიმართ დაწყებული დისციპლინური წარმოების დროს მას სათანადოდ არ ჰქონდა გარანტირებული ზეპირი მოსმენის უფლება. მოსარჩელის ადვოკატი, ახალგაზრდა იურისტთა ასოციაციის იურისტი გიორგი გოცირიძე „ბათუმელებთან“ საუბრისას განმარტავს, რომ ზეპირი მოსმენის უფლებით სარგებლობის შემთხვევაში (ზეპირი ახსნა-განმარტებით, მოწმეების დაკითხვით, მის წინააღმდეგ არსებული მტკიცებულებების სანდოობის შემოწმებით) პირს აქვს ეფექტური შესაძლებლობა ამტკიცოს, რომ მას არ ჰქონია დისციპლინური გადაცდომა.  

ასევე სადაო ნორმაა ის, რომ  სამსახურიდან გათავისუფლებულ პირს წინასწარ დეტალურად ეცნობოს მის მიმართ წარდგენილი ბრალდების არსი და ჰქონდეს მას გონივრული დრო დაცვის მოსამზადებლად.  ასეთი გარანტიების არარსებობის პირობებში საჯარო მოხელის თანამდებობიდან გათავისუფლება, მოსარჩელის აზრით, ეწინააღმდეგება კონსტიტუციის 42-ე მუხლის მე-3 პუნქტით გარანტირებულ დაცვის უფლებას და ასევე კონსტიტუციის 29-ე მუხლს, რომლის თანახმად საქართველოს ყოველ მოქალაქეს უფლება აქვს დაიკავოს ნებისმიერი სახელმწიფო თანამდებობა, თუ იგი აკმაყოფილებს კანონმდებლობით დადგენილ მოთხოვნებს;  საქმეს არსებითად განიხილავს საკონსტიტუციო სასამართლოს მეორე კოლეგია.

საქართველოს პარლამენტის წარმომადგენელი კომენტარს არ აკეთებს.

 ამის პარალელურად ნათია იმნაძე   საქალაქო სასამართლოშიც დაობს. ის სამსახურში აღგენას მოითხოვს. საქალაქო და სააპელაციო სასამართლოების გადაწყვეტილება ორივე მხარემ, ნათია იმნაძემ და სახალხო დამცველის აპარატმაც უზენაეს სასამართლოში გაასაჩივრეს.

„ბათუმელებთან“ საუბრისას ნათია იმნაძე ამბობს, რომ პირველმა და მეორე ინსტანციამ დაადგინა, რომ ბრძანება  მისი სამსახურიდან გათავისუფლების შესახებ იყო უკანონო, თუმცა საქალაქო და სააპელაციო სასამართლოებმა  ისევ სახალო დამცველის აპარატს დაავალა მსჯელობა სამსახურში გათავისუფლებული თანამშრომის აღდგენაზე, რაც მოსარჩელის აზრით  არალოგიკურია: „რომ არ აღგვადგინოს, და არც აღგვადგენს, ანუ თავიდან უნდა გავასაჩივროთ მაშინ და ასე უნდა ვიაროთ წრეზე, ამიტომ მიგვაჩნია, რომ არ არის საქალაქო და სააპელაციო სასამართლოების  გადაწყვეტილება ლოგიკური“.

„ორი წელი ვიყავი საიას აჭარის ორგანიზაციის თავმჯდომარე. ამ ხნის მანძილზე იყო რამდენიმე საქმე, სადაც დიდი წვლილი აქვს შეტანილი საიას. ზოგადად არ ყოფილა რეგიონში ისეთი თემა, რაზეც ჩვენ არ გვქონდა შემხებლობა სამართლებრივი კუთხით. ვცდილობდით ის სტრატეგია და ის ხედვები რაც საის აქვს, გაგვეტარებინა,“ – ამბობს გია ქარცივაძე.

საქართველოს ახალგაზრდა იურისტთა ასოციაცის ახალი თავმჯდომარის, ასევე აჭარისა და ქუთაისის ორგანიზაციის თავმჯდომარეების ვინაობა დღეს საღამოს გაირკვევა. 

არჩილ ხაბაძე

როგორ იმოქმედებს მთავრობა „ოცნების ქალაქში“ თვითნებურად შესახლებულებთან დაკავშირებით და რატომ ვერ მიიღო კონკრეტული გადაწყვეტილება აჭარის მთავრობამ ამ საკითხზე? – ეს შეკითხვა გასულ კვირას „ბათუმელებმა“ აჭარის მთავრობის თავმჯდომარეს, არჩილ ხაბაძეს დაუსვა. ხაბაძემ განაცხადა, რომ გარდა იმ ოჯახებისა, რომლებიც რეალურად საჭიროებენ დახმარებას, შესახლებულების მიმართ მთავრობა იქნება მკაცრი.

„რეალურად 70-73 ოჯახია გაჭირვებული. ჩვენ ყველა სტრუქტურა ჩავრთეთ საჯარო რეესტრის ჩათვლით და შევისწავლეთ ყველაფერი. სხვათა შორის, იქ ძვირადღირებული მანქანებიც დგას. ყველა დაჯარიმდება, თუ არ დაემორჩილება მითითებას, არც ერთი ეკომიგრანტი იქ არ იქნება, მათ ჩვენ ბინით ან კომპენსაციებით უზრუნველვყოფთ. ვისაც სახლი არ აქვს და ნაქირავებში ცხოვრობს, თქვენ როგორ წარმოგიდგენიათ ამ კატეგორიას როგორ უნდა დაეხმაროს სახელმწიფო? – სახელმწიფო ვალდებულია თავშესაფრით უზრუნველყოს ეკომიგრანტი, რომელსაც სტიქიამ დაუნგრია სახლი. იქ კი ამბობენ, რომ ორი ძმა ერთად ცხოვრობს სამ-სამი ბავშვით. სიდედრთან ან დედამთილთან არა აქვს კარგი ურთიერთობა, – ასეთი ძალიან ბევრია. ამ კატეგორიას როგორ დავეხმაროთ? – სოციალური სამსახური მათ ხომ ყოველთვიურად ეხმარება.

გამოვყოფთ ჯგუფს და დავადგენთ, ვისაც სახლი საერთოდ არ აქვს, ამ კატეგორიას დროებით თავშესაფარს მივცეთ და თუ იაფი სახლის პროექტით მივდივართ, იქ რიგში ჩადგებიან. ეს მაქსიმუმ თებერვალში უნდა მოგვარდეს. ძალაც რომ დაგვჭირდეს, გამოვიყენებთ.

მუნიციპალიტეტების ჩართვით ჩვენ ყველა ოჯახი შევისწავლეთ, თითოეულ ოჯახში მივიდნენ, დასურათებულია თუ ვინ სად ცხოვრობს და გვაქვს მეზობლების განცხადებებიც. მთავრობის ცვლილების დროს ხშირად ხდება თურმე, რომ ვიღაცას უნდა რაღაც მოიხვეჭოს, შეაცოდოს თავი. ჩემმა მეზობლებმაც იკითხეს, თუ იქ დავმაგრდებით, მართლა მოგვცემენ მიწასო? კიდევ ერთხელ ვაფიქსირებ, რომ ვერავინ მიიღებს ვერაფერს, ჩვენ არასამთავრობოებთან ერთად გავიარეთ ეს საკითხი და მე მზად ვარ, კიდევ ერთხელ შევისწავლოთ. ისინიც ამბობენ, რომ ასეთ გაუსაძლის სიტუაციაში არ უნდა იყოს ხალხი და მეც ვეთანხმები. იქ სამი დღის განმავლობაში ჯამში 1450 ჯიხური დავთვალეთ, შესწავლას და დანგრევას ერთად დავიწყებთ.“ – განაცხადა არჩილ ხაბაძემ „ბათუმელებთან“.

აჭარის მთავრობის თავმჯდომარესთან ვრცელი ინტერვიუ  გაზეთ „ბათუმელების“ #48 ნომერში გამოქვეყნდა.

აქცია ოცნების ქალაქში

შეგახსენებთ, რომ „ოცნების ქალაქში“ მცხოვრებლემბმა ახალი კომისიის შექმნა და აქ მცხოვრებთა მდგომარეობის ხელახლა  შესწავლა  ორი კვირის წინ გამართულ აქციაზე მოითხოვეს. თვითნებურად შესახლებულები ამბობენ, რომ აჭარის მთავრობის თავმჯდომარეს არასწორი ინფორმაცია აქვს იმის შესახებ, თუ რამდენ ადამიანს ესაჭიროება დახმარება „ოცნების ქალაქში“.

აჭარის  ჯანდაცვის სამინისტროს ინფორმაციით,  უფასო სამედიცინო აქცია ჩატარდება 25, 26 და 29 დეკემბრს.

ჩაწერა წარმოებს წინასწარ. საკონტაქტო პირი: ლელა ბიბილეიშვილი მობ: 577 14 34 99

მზევინარ იმედაშვილი ბათუმის #2 საჯარო სკოლაში 16 წელია მუშაობს, ის სკოლაში ინფორმატიკასა და ფიზიკას ასწავლის. მზევინარ იმედაშვილის მოსწავლე ოლიმპიადის შედეგებით საუკეთესო ათეულში მოხვდა.

„ინფორმატიკის ოლიმპიადაში საუკეთესო ათეულში მოსწავლის შესვლა ძალიან კარგი შედეგია, რადგან ამ მხრივ დიდია კონკურენცია. როცა გაკეთებულ საქმეს დაგიფასებენ, სასიამოვნოა. აქამდე მხოლოდ ბავშვები ჯილდოვდებოდნენ ოლიმპიადების შედეგებით, წელს არის პირველად, როცა მასწავლებელი დააჯილდოვეს. ეს, რა თქმა უნდა, წამახალისებელია, მასწავლებლები უფრო მეტს გააკეთებენ იმისთვის, რომ მათი მოსწავლეები იყვნენ საუკეთესოები. მატერიალური წახალისება კიდევ უფრო გაზრდის შედეგებს, თუმცა ვფიქრობ, მასწავლებლები ისედაც გულით ეკიდებიან თავის საქმეს. მე, მაგალითად, სულ არ ვიცოდი თუ წავხალისდებოდი, მაქსიმუმი გავაკეთე მაშინაც, მომავალშიც ასე გავაგრძელებ“, – ამბობს მზევინარ იმედაშვილი.

პრემია მოულოდნელი აღმოჩნდა #14 სკოლის რუსულის მასწავლებლისთვისაც. ინგა ჯაფარიძე #14 საჯარო სკოლაში უკვე 16 წელია ასწავლის. ინგა ჯაფარიძე: „წლების განმავლობაში აჩვენებენ ჩემი მოსწავლეები კარგ შედეგს ოლიმპიადაზე. პირველად მივიღეთ ამისთვის პრემია. წელს მესამე ტურში გადავიდა რამდენიმე მოსწავლე, ყველაზე კარგი შედეგი მესამე ტურში ჩემმა ერთმა მოსწავლემ, თამარ ქერქაძემ აჩვენა. მოტივაციას ზრდის მსგავსი წახალისება. მოგეხსენებათ მასწავლებლის ანაზღაურება რაც არის, სხვის დასანახავადაც ძალიან კარგია, მათ დაინახეს, რომ შრომა ფასდება. თავად მოსწავლემ 500-ლარიანი ვაუჩერი მიიღო კომპიუტერულ მაღაზიაში“.

2014 წელს აჭარის მოსახლეობის სამედიცინო მომსახურების საქმეში შეტანილი წვლილისათვის სიგელები და სიმბოლური საჩუქარები 13 ექიმს და სამინისტროს 6 თანამშრომელს გადაეცემა.   

ღონისძიების ფარგლებში დაგეგმილია პრეზენტაციები აჭარის ჯანდაცვის სამინისტროს 2014 წლის საქმიანობის, ქ. ბათუმის რესპუბლიკური საავადმყოფოს პერსპექტივების, ქ. ბათუმის რეფერალური საავადმყოფოს მიღწევების და სარეაბილიტაციო ცენტრ „თანას“ საქმიანობის შესახებ. 

სადღესასწაულო ღონისძიებას დაესწრებიან აჭარის ავტონომიური რესპუბლიკის მთავრობის თავმჯდომარე არჩილ ხაბაძე; უმაღლესი საბჭოს თავმჯდომარე ავთანდილ ბერიძე; უმაღლესი საბჭოს ჯანმრთელობისა და სოციალური დაცვის საკითხთა კომისიის თავმჯდომარე ჯემალ ფუტკარაძე; სამედიცინო დაწესებულებების ხელმძღვანელები და სამინისტროს წარმომადგენლები.

ღონისძიების ფარგლებში „აჭარის ექიმთა საზოგადოება“ სამედიცინო დაწესებულების 6 ხელმძღვანელს და ერთ ექიმს დააჯილდოებს.  

მედიცინის მუშაკის დღე აჭარაში 1996 წლის 23 დეკემბერიდან აღინიშნება. 

მათ შორის არ არიან ოპოზიციის წარმომადგენლები. ინტერფრაქციული შეხვედრა საკრებულოს ფრაქცია “ქართული ოცნების” ინიციატივით  მიმდინარეობს. შეხვედრები დღეს კულტურის ცენტრის წარმომადგენლების მოსმენით დაიწყო,  27 დეემბრამდე სხვა ფრაქციების მომავალი წლის გეგმებისა და მიმდინარე წლის ანგარიშის მოსმენები გაგრძელდება.