Batumelebi | სასამართლო პროცესი დაიწყო-სტუდენტი პარლამენტის წინააღმდეგ სასამართლო პროცესი დაიწყო-სტუდენტი პარლამენტის წინააღმდეგ – Batumelebi
RU | GE  

სასამართლო პროცესი დაიწყო-სტუდენტი პარლამენტის წინააღმდეგ

 

“საქართველოს მოქალაქე გიორგი კეკენაძე საქართველოს პარლამენტის წინააღმდეგ“-ამ საქმის განხილვა საკონსტიტუციო სასამართლომ დღეს, 24 დეკემბერს  დაიწყო. 

 

საკონსტიტუციო სასამართლო

ბათუმელი გიორგი თბილისში სწავლობს, ჯავახიშვილის უნივერსიტეტის სტუდენტია. გიორგიმ  დღეს მოსამართლეებს უთხრა, რომ კაცებს, ქალებისგან განსხვავებით, კონსტიტუციით გარანტირებული თანასწორობის უფლებაც ერღვევათ. მისი შეფასებით, სამხედრო-სააღრიცხვო სპეციალობის არმქონე მამაკაცებისთვის სამხედრო აღრიცხვაზე ყოფნის ვალდებულება დისკრიმინაციულია. 

 

მოსარჩელე გიორგი კეკენაძე

 

გიორგი კეკენაძე სადავო ნორმის დისკრიმინაციულ ხასიათზე საუბრისას აღნიშნავს, რომ არის სტუდენტი, უნივერსიტეტის დასრულების შემდეგ ეწურება სამხედრო სამსახურის გადავადების ვადა და ექვემდებარება სამხედრო სამსახურში გაწვევას. ამიტომაც განსხვავებით ქალებისაგან, როგორც მოსარჩელე, ისე, ზოგადად, ამავე კატეგორიის მამაკაცები, ერთი წლის განმავლობაში მოკლებულნი იქნებიან პროფესიული კვალიფიკაციის ამაღლებისა და კარიერული წინსვლის შესაძლებლობას. 

 

საქმეს საკონსტიტუციო სასამართლოს პირველი კოლეგია განიხილავს

სასამართლო პროცესზე საქართველოს პარლამენტის წარმომადგენელმა განაცხადა, რომ საქართველოს პარლამენტი ისევე როგორც იუსტიციისა და თავდაცვის სამინისტროები არ იზიარებენ მოსარჩელის პოზიციას. ამიტომაც მისი შეფასებით სადავო ნორმები არაკონსტიტუციურად სასამართლომ არ უნდა ცნოს.

პარლამენტის წარმომადგენელმა სასამართლოში დღეს შუამდგომლობაც დააყენა. ის ითხოვს თავდაცვის სამინისტროს თანამშრომლის [ექსპერტის] დაკითხვას სადავო ნორმებზე.ხოლო იუსტიციის სამინისტროს ოფიციალური წერილობითი პოზიცია მოსამართლეებს დღეს გააცნო. 

ნეტგაზეთის მასალების სხვა გამოცემებში გადაბეჭდვის წესი
ნაათია როყვა