Batumelebi | როგორ ეხმარებიან სტუდენტები და მოხალისეები მიუსაფარ ადამიანებს როგორ ეხმარებიან სტუდენტები და მოხალისეები მიუსაფარ ადამიანებს – Batumelebi
RU | GE  

როგორ ეხმარებიან სტუდენტები და მოხალისეები მიუსაფარ ადამიანებს

 

უსახლკარო და მიუსაფარი ადამიანებისთვის ბათუმელმა სტუდენტებმა თბილი ტანსაცმლისა და ფეხსაცმლის შეგროვება დაიწყეს. საქველმოქმედო აქცია “ხელი ხელს” სტუდენტური ორგანიზაცია “Sunshine”-ის და  დოროთეა პარკელის საქველმოქმედო ფონდის მიერ არის ორგანიზებული. შეგროვებული ნივთების დახარისხება სტუდენტებმა და მოხალისეებმა უნივერსიტეტის სპორტულ დარბაზში დღეს, 24 დეკემბერს დაიწყეს. როგორც სტუდენტები ამბობენ, მოსახლეობის აქტიურობამ მათ მოლოდინს გადააჭარბა, შემოსული ნივთები ასობით მიუსაფარ ადამიანს დაურიგდება.

სტუდენტი ედო მჟავანაძე უკვე სამი წელია საქველმოქმედო აქციებს აწყობს. მის ამ წამოწყებას მალევე სხვებიც შეუერთდნენ, ედოს ორგანიზაციაში სულ შვიდი მუდმივი წევრია, თუმცა საქველმოქმედო აქციებში მონაწილეობას ათობით მოხალისე იღებს:

 

ლელა ცინარიძე და ედო მჟავანაძე
ლელა ცინარიძე და ედო მჟავანაძე

“ქობულეთში მოხუც ქალს ვერ დავეხმარე, ის გაიყინა ცივ ზამთარში. მაშინ ვთქვი, რომ ჩემს ქვეყანაში ადამიანები არ უნდა იყინებოდნენ. გაზეთი “ბათუმელებმა” მომცა შესაძლებლობა მოსაზრება გამომექვეყნებინა, რის შემდეგაც დავგეგმეთ აქცია. პირველ აქციას ისეთი გამოხმაურება მოყვა, გადავწყვიტეთ ყოველ წელს მოგვეწყო ეს აქციები.” – ამბობს ედო მჟავანაძე.

 ორგანიზაციის წევრები ამბობენ, რომ უფრო მეტი მეტი მოხალისე სჭირდებათ, რადგან საქმე ძალიან ბევრია: “წელს ყველაზე მეტმა ადამიანმა გამოთქვა დახმარების სურვილი. ისეთ წვიმიან ამინდს დაემთხვა ტანსაცმლის შეგროვების დღე, რომ ვფიქრობდით არავინ არ მოვიდოდა, მაგრამ იმ დღეს ყველაზე მეტი ნივთი მივიღეთ, კიდევ ველოდებით ნივთებს. ტანსაცმელს ახლა დავახარისხებთ, მერიაში განცხადება დავწერეთ, ველოდებით, რომ მანქანას გამოგვიყოფენ, რათა ბენეფიციარებს თავად მივუტანოთ ნივთები სახლში.” – ამბობს ედო მჟავანაძე.

აქციის მონაწილეები ტანსაცმელს სამი დღის განმავლობაში ერას მოედანზე აგროვებდნენ, აქვე  აკითხავდნენ მონაწილეებს ბენეფიციარები: “როცა ვინმე შორიახლო იდგა დამორცხვებით, ვხვდებოდი, რომ საჭიროებდა დახმარებას. იყვნენ ისეთებიც, რომლებიც მოდიოდნენ და პირდაპირ ნივთების წაღებას ცდილობნენ. ჩვენ ყველა მათგანის საკონტაქტო მონაცემი ჩავიწერეთ, სპეციალურად ყველა მათგანისთვის შევქმნით ფუთას, იმის მიხედვით თუ რა სჭირდება ამა თუ იმ ბენეფიციარს. მოქალაქეებს აქ მოჰქონდათ სათამაშოები, ჩანთები, ბავშვის საწოვარა, მივიღეთ წერილებიც, ძალიან ბედნიერი ვარ, რომ ამ აქციაში ვღებულობ მონაწილეობას, გასულ წელს მხოლოდ ტანსაცმელი მივიტანე, წელს მოხალისე ვარ” – ამბობს ლელა ცინარიძე.

აქციის ორგანიზატორები ბათუმის უნივერსიტეტის სპორტდარბაზში 28 დეკემბრამდე შეაგროვებენ ნივთებს, 28-29 დეკემბრიდან კი ბენეფიციარებს დაურიგებენ.

ნეტგაზეთის მასალების სხვა გამოცემებში გადაბეჭდვის წესი
ქეთი ლაბაძე