Batumelebi

აჭარის მთავრობამ შპს „ბათუმის რესპუბლიკური ფსიქონევროლოგიური საავადმყოფოს“ გასხვისებისთვის 16 დეკემბერს გამოცხადებული აუქციონის პირობები შეცვალა. მყიდველი 10 წლის ნაცვლად, ვალდებული იქნება, 50 წლით შეინარჩუნოს ფსიქიატრიული სააავადმყოფოს პროფილი. რამაზ ბოლქვაძე, აჭარის ფინანსთა და ეკონომიკის მინისტრი ამბობს, რომ მან ამ სფეროში მომუშავე ხუთი არასამთავრობო ორგანიზაციის რეკომენდაცია გაითვალისწინა, თუმცა მესამე სექტორის შენიშვნას „უსაფუძვლო შიშსა და ეჭვებს“ უწოდებს.

„რამდენიმე დღის წინ აჭარის მთავრობას წერილობით ფსიქიკური ჯანმრთელობის სფეროში მომუშავე ხუთმა არასამთავრობო ორგანიზაციამ აუქციონის შეჩერების თხოვნით მომართა. როგორც ჩანს, არასწორად იქნა აღქმული ელექტრონული აუქციონის ერთ-ერთი პირობა, არსებული სამედიცინო პროფილის 10 წლით შენარჩუნებასთან დაკავშირებით და გაჩნდა უსაფუძვლო ეჭვი, რომ შესაძლოა 10 წლის შემდეგ რეგიონს აღარ ჰქონოდა ფსიქო-ნევროლოგიური საავადმყოფო. გამომდინარე იქედან, რომ გვსურს პროცესის აბსოლუტური გამჭვირვალობა უზრუნველვყოთ და გავფანტოთ უსაფუძვლო შიში 10 წლის შემდეგ კლინიკის პროფილის შეცვლის თაობაზე, აჭარის მთავრობამ მიიღო გადაწყვეტილება, სამედიცინო დაწესებულების მიმდინარე ელექტრონულ აუქციონში ცვლილებების შეტანის თაობაზე, რომლის ერთ-ერთ მთავარ პირობად სამედიცინო პროფილის არანაკლებ 50 წლის ვადით შენარჩუნება განისაზღვრა“ – ნათქვამია აჭარის ფინანსთა და ეკონომიკის სამინისტროს მიერ გავრცელებულ განცხადებაში.

სამინსიტრო ასევე აღნიშნავს, რომ  ქონების შეძენით დაინტერსებული პირებისთვის თანაბარი პირობების უზრუნველყოფის მიზნით, ელექტრონული აუქციონის დასრულების არსებულ ვადას (30 დეკემბერი) 2 კვირა დაემატა.

27 დეკემბერს რამაზ ბოლქვაძემ „ბათუმელებთან“ თქვა, რომ მან კანონით განსაზღვრული მაქსიმალური ვადა გამოიყენა, როცა პროფილის ვადათ 10 წელი განსაზღვრა. დღეს, აჭარის ფინანსთა და ეკონომიკის მინისტრმა გვითხრა: „აღარ მახსოვს, ზუსტად როგორ ვთქვი… მე ვიგულისხმე პრაქტიკა, რომელიც ამ კუთხით არსებობდა. 10 წელი იყო მაქსიმალური ვადა, რაც გამოგვიყენებია და მაშინაც ვთქვი, რომ თუკი ინვესტორი ამ ხნის განმავლობაში ინვეტიციას ჩადებს, 10 წლის შემდეგაც აღარ იქნებოდა იმის საფრთხე, რომ საავადმყოფო დაეხურა“.

ფინანსთა და ეკონომიკის სამინისტრო შპს „რესპუბლიკური კლინიკური ფსიქონევროლოგიური საავადმყოფოს“ აჭარის ავტონომიური რესპუბლიკის საკუთრებაში არსებულ 100%-იან წილს პირობებიან, ელექტრონულ აუქციონზე ყიდის. საწყისი ფასი 100 ათასი ლარია. ინვესტორმა საავადმყოფოში მილიონი ლარის ინვესტიცია უნდა ჩადოს.

აჭარის გაანთლების, კულტურის და სპორტის ახალ მინისტრის, ინგა შამილიშვილის მოადგილეები მთავრობის თავმჯდომარემ მინისტრის წარდგინებით დღეს დანიშნა.

პირველ მოადგილედ ისევ სულიკო თებიძე იმუშავებს. ის 2012 წლიდან განათლების მინისტრის მოადგილეა და საგანმანათლებლო მიმართულებას ხელმძღვანელობს.

სამინისტროს კულტურის დეპარტამენტის უკვე ყოფილი უფროსი, თეონა ბერიძე  იქნება ინგა შამილიშვილის კიდევ ერთი მოადგილე. თეონა სამინისტროში 2014 წლიდან მუშაობს.

მოადგილეებს შორის ახალი სახე მირიან ქათამაძე იქნება. იგი სახელმწიფო შესწყიდვებსა და სამართლებრივი უზრუნველყოფის კუთხით იმუშავებს. მირიან ქათამაძე სამართლის დოქტორია და ბოლო წლებში ადვოკატად მუშაობდა.

აჭარის განათლების სამინსიტროში ამჟამად ერთი მოადგილის სავარძელია თავისუფალი. ამ ვაკანსიაზე დანიშნულმა პირმა სპორტის მიმართულებით უნდა იმუშაოს.

ბათუმის სოციალური სერვისების სააგენტო 6 სასადილოს ამუშავებს, სადაც სოციალურად დაუცველებს დღეში ერთხელ, უფასო სადილით უმასპინძლდებიან. „უფასო სასადილოთი“ მოსარგებლეთა უმრავლესობას  კუთვნილი ულუფა ძირითადად შინ მიაქვს, ზოგიერთი კი სადილს სასადილოში მიირთმევს.

ბათუმის სოციალური სერვისების სააგენტოს დირექტორის, ბადრი გოგიძის ინფორმაციით, აღნიშნული სასადილოებით ბათუმის მუნიციპალიტეტში მცხოვრები 4 042 ადამიანი  სარგებლობს. ბენეფიციართა ყოველდღიურად ერთჯერადი კვებისთვის კი ქალაქის ბიუჯეტიდან წლის განმავლობაში 2,5 მილიონ ლარამდე იხარჯება.

„ჩვენ ასევე წინსაახალწლოდ გადავეცით საჩუქრები ჩვენს ბენეფიციარებს, რაშიც დაიხარჯა 57 ათასი ლარი. გავაკეთეთ 15-ლარიანი სასაჩუქრე პაკეტები და გადავეცით თითოეულ ბენეფიციარს“ – ამბობს ბადრი გოგაძე.

როინ გუნდაძის ფოტორეპორტაჟი ტაბიძის 2-ში მდებარე მუნიციპალურ სასადილოდან, რომელიც 880 ადამიანს ემსახურება:

სასჯელაღსრულების და პრობაციის სამინისტრომ ბათუმის ციხეში უკანონო სამედიცინო საქმიანობის შემთხვევაზე მოგვწერა. საუბარია მსჯავრდებულ კახა მეცხვარიშვილზე, რომელიც წლის განმავლობაში ათეულობით წერილის წერით აპროტესტებდა მის მიმართ გაწეული სამედიცინო მომსახურების ხარისხს. ამავე პატიმრის წერილის საფუძველზე და სახალხო დამცველის თხოვნით, სამედიცინო რეგულირების სააგენტომ ბათუმის ციხეში ერთ-ერთი ექიმის, თამილა ვარშალომიძის მიმართ უკანონო სამედიცინო საქმიანობის ფაქტი დაადგინა. რამდენიმე ექიმის საქმიანობაში ასევე დაფიქსირდა სხვადასხვა სახის ხარვეზი.

სასჯელაღსრულების სამინისტრო ადასტურებს უკანონო სამედიცინო საქმინობის ფაქტს. უწყებიდან მიღებული წერილის მიხედვით, კონკრეტული ექიმი [ვინაობას სამინისტრო არ ამხელს], ვის მიმართაც დარღვევა დადგინდა, მიმდინარე წლის 11 აპრილიდან აღარ მუშაობს ბათუმის მე-3 დაწესებულებაში, ანუ მან მანამდე დატოვა თანამდებობა, ვიდრე სამედიცინო რეგულირების სააგენტო მის მიმართ დარღვევას დაადგენდა.

სამინისტროდან მიღებულ წერილში ვკითხულობთ: „მსჯავრდებული კ.მ. ისევე, როგორც ყველა სხვა მსჯავრდებული, უზრუნველყოფილია სრული სამედიცინო სერვისით.“

ანალოგიური შინაარსის წერილი მივიღეთ ჩვენ მარტშიც იგივე სასჯელაღსრულების სამინისტროსგან, როცა კახა მეცხვარიშვილი სამედიცინო მომსახურების ხარისხს აპროტესტებდა. მაშინ სამინისტროს წერილში არ აღუნიშნავს, რომ მსჯავრდებულის წერილის საფუძველზე მიმდინარეობდა მოკვლევა, ან რომელიმე სხვა უწყება შეისწავლიდა ბათუმის ციხეში გაწეულ სამედიცინო მომსახურებას. „ბათუმელების“ ხელთ ასებული ინფორმაციის მიხედვით, ის, რასაც პატიმარი აპროტესტებდა, ნაწილობრივ დაადასტურა სამედიცინო რეგულირების სახელმწიფო სააგენტომ მხოლოდ სახალხო დამცველის მიმართვის შემდეგ.

სასჯელაღსრულების სამინისტროს მიერ დღეს, 28 დეკემბერს მოწერილი წერილიდან არ ირკვევა, ექიმმა, ვისაც სერთიფიკატი ერთი თვით შეუჩერეს, თავისი ნებით დატოვა თანამდებობა, თუ გაათავისუფლეს: „აღნიშნულ ექიმს N3 დაწესებულების საექიმო-სამედიცინო პუნქტის ექიმის თანამდებობა მიმდინარე წლის 11 აპრილიდან აღარ უკავია.  საბჭოს მიერ  დაწესებულების სხვა ექიმების მიმართ პროფესიული პასუხისმგებლობის საკითხი არ დასმულა“, – ვკითხულობთ წერილში.

მსჯავრდებულ კახა მეცხვარიშვილის მიერ სამოქალაქო სექტორის კლინიკაში ვიზიტს ადასტურებს სასჯელაღსრულების სამინისტრო: „მსჯავრდებულ კ.მ.-ს სამოქალაქო სექტორის კლინიკაში  კონსულტაციის შედეგად ექიმის მიერ დაენიშნა მედიკამენტები, რომლებიც არ შედის ბაზისური მედიკამენტების ნუსხაში. აღნიშნული მედიკამენტების შეძენის მიზნით, მთავარი ექიმის მიერ შესაბამისი მოთხოვნა უკვე გაგზავნილია.“

სამინისტროს მიერ მოწერილ წერილში არაფერია ნათქვამი, იყო თუ არა გადაყვანილი კახა მეცხვარიშვილი სამარტოო საკანში და მოექცა თუ არა მას აგრესიულად ციხის ადმინისტრაცია, რასაც მსჯავრდებული ამჟამად აპროტესტებს და წერს, რომ ამის გამო შიმშილობას აპირებს. სასჯელაღსრულების სამინისტრო წერილში მხოლოდ ამას აღნიშნავს: „მსჯავრდებული შიმშილობდა 16-17 დეკემბერს და 19-22 დეკემბერს.  კ.მ.-ს ჯანმრთელობის მდგომარეობას მუდმივად აკონტროლებს დაწესებულების სამედიცინო პერსონალი.“

კახა მეცხვარიშვილისგან ბოლო წერილი „ბათუმელებმა“ 26 დეკემბერს, ორშაბათს მიიღო. იმავე დღეს ჩვენ სასჯელაღსრულების სამინისტროს დავუკავშირდით. ამ უწყებისგან წერილობითი პასუხი დღეს, 28 დეკემბრის საღამოს მივიღეთ, მას შემდეგ, როცა ბათუმის ციხეში დაფიქსირებულ დარღვევებზე ინფორმაცია უკვე გავრცელებული გვქონდა.

„კონსტიტუციური ნორმებით განმტკიცებული ადამიანის ძირითად უფლებებში ჩარევისათვის აუცილებელია არსებობდეს აუცილებელი წინაპირობა, ლეგიტიმური მიზანი, ხოლო უფლების დაცულ სფეროში ჩარევას უნდა ჰქონდეს დასაშვები, შესაბამისი და პროპორციული ხასიათი“, – ეს თბილისის საქალაქო სასამართლოს გადაწყვეტილებაში წერია. სასამართლომ სამართალდარღვევის ფაქტის არარსებობის გამო შეწყვიტა საქმის განხილვა მოქალაქე ირაკლი კიკილაშვილის მიმართ, რომელსაც გამოძიება პოლიციელის კანონიერი მოთხოვნისადმი დაუმორჩიულებლობას ედავებოდა.

ირაკლი კიკილაშვილი მიმდინარე წლის 5 ნოემბერს საპატრულო პოლიციის თანამშრომლებმა ზედაპირული დათვალიერების მიზნით გააჩერეს. მოქალაქე პოლიციელს სთხოვდა, განემარტათ ზედაპირული დათვალიერების საფუძველი, თუმცა პოლიციელებმა მას განმარტება არ მისცეს.

სასამართლოს გადაწყვეტილებაში ასევე ვკითხულობთ: „ზედაპირული დათვალიერების წინაპირობას წარმოადგენს ,,საკმარისი საფუძველი ვარაუდისთვის”, რომ პირს თან აქვს ნივთი, რომლის გადატანა შეზღუდულია, ან რომელიც საფრთხეს უქმნის მის ან სხვის სიცოცხლესა და ჯანმრთელობას. აღნიშნული კი, სასამართლოს მოსაზრებით, გულისხმობს იმას, რომ პოლიციელი უნდა მოქმედებდეს ობიექტურად შეცნობადი და არა სუბიექტურად აღქმული გარემოებების მიხედვით. სასამართლოს მიაჩნია, რომ სწორედ ასეთ შემთხვევაშია შესაძლებელი პოლიციელის მოთხოვნა, მის მიერ ჩატარებული ზედაპირული დათვალიერება იყოს კანონიერი.“

ირაკლი კიკილაშვილის ინტერესებს „ახალგაზრდა იურისტთა ასოციაცია“ იცავდა. იურისტი ნონა ქურდოვანიძე მიიჩნევს, რომ სასამართლოს ეს გადაწყვეტილება სხვა მსგავს შემთხვევებზეც მოახდენს გავლენას: „მოქალაქეებს შეუძლიათ შეახსენონ პოლიციელებს სასამართლოს ეს გადაწყვეტილება. ყველა შემთხვევა შეიძლება იყოს ინდივიდუალური, მაგრამ პოლიციელს უნდა ჰქონდეს განმარტება, სამართლებრივი საფუძველი, თუ რის გამო მოითხოვს პირის ზედაპირულ დათვალიერებას. დათვალიერება გულიხმობს ადამიანის ხელით ან რაიმე მოწყობილობით შემოწმებას“.

მიმდინარე წლის ივლისში ჩვენ ვწერდით შემთხვევებზე, როცა მოქალაქეებს ღამით პოლიციელები ფოტოებსაც უღებდნენ. „ახალგაზრდა იურისტთა ასოციაციის“ იურისტი, პაატა დიასამიძე ერთ-ერთი იყო მათ შორის, ვისაც პოლიციელმა ღამით ფოტოს გადაღება დაუპირა. პაატას შეფასებით, ფოტოს გადაღების უფლება პოლიციელებს მხოლოდ იმ შემთხვევაში აქვთ, თუკი პირი ვინაობის გამხელაზე უარს ამბობს, ან მისი იდენტიფიცირება ვერ დგინდება. „ბათუმელების“ ინფორმაციით, სამართალდამცველები ისევ აჩერებენ ადამიანებს ქუჩებში და ფოტოებს უღებენ. იურისტების განმარტებით, სამართდამცველს უნდა შეეძლოს შემოწმების დასაბუთება, მაგალითად, თუკი პირი ატარებს კანონით აკრძალულ ნივთს და ასე შემდეგ.

საიას იურისტი, ნონა ქურდოვანიძე მოქალაქეებს ურჩევს ყველა მსგავს მსგავს სიტუაციაში, როცა პოლიციელი დასაბუთების გარეშე მოქმედებს, მიმართონ შსს-ს გენერალურ ინსპექციას, ან კონკრეტული სამართალდამცველის ზემდგომს.

კახა მეცხვარიშვილი ბათუმის ციხიდან წლის განმავლობაში აგზავნის წერილებს. „ბათუმელებისთვის“ და სხვადასხვა სამთავრობო თუ არასამთავრობო უწყებებისთვის მიწერილ წერილებში ის სამედიცინო მომსახურების ხარისხს უჩიოდა და დახმარებას ითხოვდა. მისი ერთ-ერთი წერილის საფუძველზე შემოწმება ბათუმის სასჯელაღსრულების მე-3 დაწესებულებაში სამედიცინო რეგულირების სააგენტომ ჩაატარა და სხვადასხვა ხარვეზთან ერთად, უკანონო სამედიცინო საქმიანობის შემთხვევაც დაადგინა.

მარტში, როცა „ბათუმელებმა“ კახა მეცხვარიშვილის შესახებ ინფორმაცია გამოაქვეყნა, გვქონდა სასჯელაღსრულების და პრობაციის სამინისტრო ეს კომენტარიც: „მსჯავრდებული კ.მ, რომელიც სასჯელს N3 პენიტენციურ დაწესებულებაში იხდის, ყველა საჭირო სამედიცინო სერვისით უზრუნველყოფილია. მას უტარდება ყველა საჭირო სამედიცინო გამოკვლევა და მედიკამენტები ექიმის დანიშნულებისამებრ მიეწოდება. ამასთან, აღსანიშნავია, რომ ცოტა ხნის წინ, მსჯავრდებულმა კ.მ-მ სასჯელაღსრულებისა და პრობაციის სამინისტროს მადლობის წერილით მომართა, რომელშიც იგი აღნიშნავს, რომ N3 დაწესებულებაში პროფესიონალი ექიმები არიან დასაქმებული, მადლობას უხდის მათ და სასჯელაღსრულებისა და პრობაციის სამინისტროს სამედიცინო დეპარტამენტს“.

რამდენიმე დღის წინ კახა მეცხვარიშვილმა კიდევ ერთი წერილი გამოგვიგზავნა, სადაც პატიმარი წერს, რომ პრეტენზია, რომელსაც სასჯელაღსრულების სამინისტრო კატეგორიულად უარყოფდა, სამედიცინო რეგულირების სააგენტომ დასკვნით დაადასტურა.

ბათუმის ციხეში აღმოჩენილ დარღვევებზე ინფორმაცია დაგვიდასტურეს სამედიცინო რეგულირების სახელმწიფო სააგენტოში. ამ უწყებას შემოწმება სახალხო დამცველის თხვნის საფუძველზე ჩაუტარებია. სააგენტომ უკანონო სამედიცინო საქმიანობა სასჯელაღსრულების მე-3 დაწესებულების ექიმის, თამილა ვარშალომიძის მიმართ დაადგინა.

„საკითხი განიხილა პროფესიული განვითარების საბჭომ და მას ერთი თვით შეუჩერდა სახელმწიფო სერთიფიკატი. მას აქვს სერთიფიკატი ანესთეზიოლიოგიაში და ამ მსჯავრდებულის დაავადებებზე მას არ შეეძლო სამედიცინო მომსახურების გაწევა. ამ დროისთვის, ჩვენი ინფორმაციით, ეს ექიმი სასჯელაღსრულების დაწესებულებაში აღარ მუშაობს“, – გვითხრა სამედიცინო რეგულირების სააგენტოს კონტროლის დეპარტამენტის უფროსმა, ინგა პაიჭაძემ.

სააგენტოს წარმომადგენელმა ასევე დაგვიდასტურა ხარვეზების დაფიქსირება სხვა ექიმების მიერ გაწეულ სამედიცინო საქმიანობაში, მაგალითად, ზურაბ ორაგველიძის, ვის შესახებაც მსჯავრდებული კახა მეცხვარიშვილი წლის განმავლობაში ხშირად წერდა.

„ამ ხარვეზებზე გავუგზავნეთ წერილი სასჯელაღსრულების სამინისტროს სამედიცინო დეპარტამენტს. ჩვენ არ გვაქვს ინფორმაცია, განხორციელდა თუ არა რაიმე ზომები ამ კუთხით. რიგ შემთხვევაში, სამინისტრო გვაწვდის პასუხებს, მაგრამ ამ კონკრეტულ შემთხვევაში, სასჯელაღსრულების სამინისტროს ჩვენთვის ინფორმაცია არ მოუწოდებია, რა რეაგირება მოყვა დაფიქსირებულ დარღვევებს“, – ამბობს ინგა პაიჭაძე.

სასჯელაღსრულების და პრობაციის სამინისტრომ ამ დრომდე არ მოგვაწოდა ინფორმაცია რეაგირების შესახებ, რაც დაფიქისირებულ დარღვევებს წესით უნდა მოჰყოლოდა. სამინისტროს „ბათუმელებმა“ ორშაბათს, 26 დეკემბერს მიმართა.

სამინისტრომ არ უპასუხა ასევე კითხვას, შიმშილობს თუ არა ამჟამად კახა მეცხვარიშვილი. ბათუმის ციხიდან გამოგზავნილ წერილში, პატიმარი წერს იმასაც, რომ 22 დეკემბრიდან პროტესტის უკიდურეს ზომას მიმართავს.

მსჯავრდებული ამჯერად სამარტოო საკანში უსაფუძვლოდ გადაყვნას და ციხის ადმინისტრაციის მხრიდან აგრესიას აპროტესტებს. მისი თქმით, 16 დეკემბერს ბათუმის რესპუბლიკურ საავადმყოფოში ალერგოლოგს შეახვედრეს, რომელმაც კონკრეტული მედიკამენტების მიღება ურჩია. იმის გამო, რომ ციხეში კონკრეტული მედიკამენტი არ ჰქონდათ, პატიმარს ოჯახთან დაკავშირება უთხოვია ტელეფონით. ამონარიდი პატიმრის წერილიდან:

„ეს გავაპროტესტე, რადგან კანონებში ვერ ერკვევიან… შემომიცვივდნენ საკანში 5-6 თანამშრომელი და მითხრეს, ადექი, სამარტოვო საკანში გადადიხარო. რატომ მეთქი და მოვითხოვე ოქმი. ყველაზე აგრესიულად გამოირჩეოდა კორპუსის უფროსი, ირაკლი, რას ალაპარაკებთო, ამოუტრიალეთ ხელები და წამოათრიერთო და სადაც გინდა, იქ წერეო. კორპუსის კალიდორში დედაზე შემაგინა, ჩამიყვანა კარცერში, როცა ჩხრეკას მიტარებდნენ, ინსტიქტურად მომიხდა წყლის შლანგზე და საცვალი და მაისური, მთლიანად სველი ვიყავი, არც გამომაცვლევინეს, დამადეს ხელბორკილი და ორი საათი ვიყავი სველ სვიტერში. შემდეგ დღენახევარი სიცივეში გამატარებინეს უსაფრთხო საკანში… ადმინისტრაცია იმუქრება დასჯებით, მაგრამ მე მუქარის არ მეშინია“.

„მაგთიკომის“ ინტერნეტი დღეს დილიდან ბათუმში არ მუშაობს. კომპანიას არც წინასწარ და არც ამ დრომდე მომხმარებლისთვის ამის შესახებ ინფორმაცია არ მიუწოდებია.

„ეს არის ტექნიკური ხარვეზი. უკვე მუშაობს ტექნიკური ჯგუფი. არ ვიცით, ზუსტი დრო, როდის აღდგება, დღის ბოლომდე ველოდებით ჩართვას“, – გვიპასუხა „,მაგთიკომის“ ოპერატორმა. მისი თქმით, მომხმარებელი წინასწარ ვერ გააფრთხილეს, რადგან ხარვეზი მოულოდნელად გაჩნდა და ეს არ იყო წინასწარ დაგეგმილი პროფილაქტიკური სამუშაო.

კითხვაზე, რატომ არ ჩათვალა „მაგთიკომმა“ წარმოშობილი ხარვეზის გამო მომხმარებლისთვის მიეწოდებია ინფორმაცია, „მაგთიკომს“ ასეთი პასუხი აქვს: „მსგავსი სერვისი არ გვაქვს… შეტყობინება ეგზავნება მომხმარებელს იმ შემთხვევაში, როცა ჩვენი მხრიდან ხორციელდება რაიმე სახის ტექნიკური სამუშაოები. ასეა ხელშეკრულებით გათვალისწინებული“. „მაგთიკომის“ ოპერატორმა არ დაგვაკავშირა კომპანიის რომელიმე პასუხისმგებელ პირს, რომელიც გვეტყოდა, რატომ არ მიიჩნევს საჭიროდ „მაგთიკომი“ მომხმარებლის ინფორმირებას, რაც სერვისთან დაკავშირებულ პრობლემას უკავშირდება.

შპს „მაგთიკომმა“ საოპერაციო აქტივები შპს „კავკასუს ონლაინისგან“ 2016 წლის გაზაფხულზე შეიძინა. 

აჭარის ჯანმრთელობის და სოციალური დაცვის მინისტრის სამი მოადგილე უკვე დანიშნულია. მეოთხე მოადგილის სავარძელი ამ დროისთვის ვაკანტური რჩება. მინისტრის წარდგინებით მოადგილეებს აჭარის მთავრობის თავმჯდომარე ნიშნავს.

მინისტრის პირველი მოადგილე ამავე უწყების სოციალური დაცვის დეპარტამენტის უფროსი, ლელა სურმანიძე იქნება ის პროფესიით ექიმია და აჭარის ჯანდაცვის სამინისტროში მუშაობს 2007 წლიდან.

საკადრო ცვლილება არ შეხებია მინისტრის ორ მოადგილეს: ნონა გალოგრეს და რამაზ ჯინჭარაძეს. ნონა გალოგრე აჭარის ჯანმრთელობისა და სოციალური დაცვის მინისტრის მოადგილედ 2008 წლიდან მუშაობს, მას სახელმწიფო და კერძო სექტორში საქმიანობის 31-წლიანი გამოცდილება აქვს. რამაზ ჯინჭარაძე კი უწყებაში 2004 წელს დასაქმდა. მინისტრის მოადგილის თანამდებობაზე ის პირველად 2009 წელს დაინიშნა და მას შემდეგ თანამდებობა არ შეუცვლია.

„როგორ წარმოგიდგენიათ ახლა, 10 წლის განმავლობაში განვითარდეს საავადმყოფო, ჩაიდოს ინვესტიცია და მერე შეიცვალოს პროფილი?“,  – გვითხრა აჭარის ფინანსთა და ეკონომიკის მინისტრმა, რამაზ ბოლქვაძემ. მინისტრი დარწმუნებულია, რომ ბათუმის ფსიქიატრიული საავადმყოფოს გასხვისებით მისი პროფილი არ შეიცვლება, თუმცა აუქციონის პირობებში მას არ ჩაუდია პირობა, რომლის მიხედვითაც 10 წლის შემდეგ კერძო მესაკუთრისთვის რაიმე პირობის წაყენების უფლება ექნება.

აჭარის ფინანსთა და ეკონომიკის სამინისტრო შპს „რესპუბლიკური კლინიკური ფსიქონევროლოგიური საავადმყოფოს“ აჭარის ავტონომიური რესპუბლიკის საკუთრებაში არსებულ 100%-იან წილს პირობებიან, ელექტრონულ აუქციონზე ყიდის. საწყისი ფასი 100 ათასი ლარია. აუქციონის პირობების მიხედვით, მყიდველმა მხოლოდ 10 წლის განმავლობაში უნდა შეინაჩუნოს საავადმყოფოს პროფილი.

„ეს არის მაქსიმალური ვადა, რაც შეიძლებოდა ჩაგვედო პირობად. აქამდე პრაქტიკაში ხშირად 5, ან უფრო ნაკლებ ვადას ვიყენებდით. კანონის შესაბამისად მოხდა ამის განსაზღვრა“, – ირწმუნება რამაზ ბოლქვაძე. კითხვაზე, კანონი უკრძალავდა თუ არა სამინისტროს პროფილის შესანარჩუნებლად უფრო ხანგრძლივი პერიოდის დაწესებას, მინისტრმა გვიპასუხა, რომ უკრძალავდა და მან კანონით განსაზღვრული მაქსიმალური ვადა გამოიყენა: „ჩვენ ავიღეთ კანონით განსაზღვრული 10 წელი, ეს მაქსიმუმია“.

„ამ კუთხით შეზღუდვა არ არსებობს. არსებული საკანონმდებლო ნორმატიული ბაზის საფუძველზე, აჭარის ფინანსთა და ეკონომიკის სამინისტრო უფლებამოსილია ქონების განკარგვა მოახდინოს იმ პირობებით და ვადით, რასაც ის ჩათვლის მიზანშეწონილად,“ – ამბობს გიორგი ხიმშიაშვილი, „ახალგაზრდა იურისტთა ასოციაციის“ აჭარის ორგანიზაციის თავმჯდომარე. მისი შეფასებით, რეალურია საფრთხე, რომ 10 წლის შემდეგ რეგიონში ფსიქიატრიული საავადმყოფო აღარ გვქონდეს: „ეკონომიკის სამინისტრო უნდა აკეთებდეს გრძელვადიან პროგნოზს საზოგადოებრივი საჭიროებიდან გამომდინარე. ამ უწყებას უფრო მეტი დაცვის მექანიზმი უნდა შეემუშავებია. იგივე პროფილის შესანარჩუნებლად ვადები უნდა ყოფილიყო უფრო მეტი“.

რა მოხდება იმ შემთხვევაში, თუკი ინვესტორი 10 წლის შემდეგ ფსიქიატრიული საავადმყოფოს პროფილის შენარჩუნებაზე უარს იტყვის? – კითხვაზე კონრკეტული პასუხი 10 წლის შემდეგ ექნება აჭარის ჯანმრთელობის და სოციალური დაცვის მინისტრს, ზაალ მიქელაძეს. ეს მინისტრიც ადასტურებს, რომ ინვესტორს შეუძლია საავადმყოფო დახუროს, თუმცა დარწმუნებულია, რომ ამას სამედიცინო ბიზნესში შემოსული პირი არ გააკეთებს.

აჭარის ფინანსთა და ეკონომიკის მინისტრის, რამაზ ბოლქვაძის განმარტებით, დღეს ბათუმის ფსიქიატრიული საავადმყოფო კრიტიკულ მდგომარეობაშია და სამინისტრომ ელექტრონული, პირობიანი ტენდერისთვის მინიმალური საწყის ფასად მხოლოდ 100 ათასი ლარი განსაზღვრა. აჭარის მთავრობა ამ ფასის გამო „ნაციონალურმა მოძრაობამ“ გააკრიტიკა. პარტიის წევრის, მიხეილ ბოლქვაძის თქმით, ტერიტორია, სადაც ფსიქიატრიული მდებარეობს, მიწის ნორმატიული ფასი 65 ლარია, სამინისტრო კი მას დაახლოებით 3 ლარად ყიდის.

„ეს არის მინიმალური ფასი და იგი გაიზრდება ვაჭრობის შედეგად. ეს არის ელექტრონული აუქციონი, სადაც მონაწილეობა ნებისმიერ პირს შეუძლია“, – ამბობს რამაზ ბოლქვაძე. მინისტრი არ აკეთებს დაშვებას, რომ ფსიქიატრიულ საავადმყოფოზე შესაძლოა ვაჭრობა არ შედგეს და 65 ლარად შეფასებული მიწის ნაკვეთი 3 ლარად გაიყიდოს.

აუქციონი შპს „რესპუბლიკური კლინიკური ფსიქონევროლოგიური საავადმყოფოზე“ 30 დეკემბერს დასრულდება.

დღეს, 27 დეკემბერს, ქედის მუნიციპალიტეტის საკრებულომ  რიგგარეშე სხდომაზე 2017 წლის ადგილობრივი ბიუჯეტი 17 ხმით სამის წინააღმდეგ დაამტკიცა. მუნიციპალიტეტის მომავალი წლის ბიუჯეტი  8 მილიონ 157 700 ლარით განისაზღვრა. ბიუჯეტს მხარი არ დაუჭირა საკრებულოს ოპოზიციამ, არგუმენტად ოპოზიცია იმ შენიშვნებს ასახელებს, რაც გამგებამ არ გაითვალისწინა.

„არასამეწარმეო იურიდიულ პირებში დასაქმებულ თანამშრომლებს მწირი ანაზღაურება აქვთ, მოვითხოვეთ მათი ხელფასები 30%-ით გაზრდილიყო, ასევე ვითხოვდით ადგილობრივი ბიუჯეტიდან 5 000 ლარი ქედის მუზეუმს გამოჰყოფოდა ექსპონატების შესასყიდად, გარემოს დაცვითი ღონისძიებებისა და სარეზერვო ფონდის დაფინასება  60 000 ლარამდე გაზრდილიყო, თუმცა ჩვენი არცერთი მოთხოვნა გამგეობამ არ გაითვალისწინა და წარმოდგენილ ბიუჯეტს მხარი არ დავუჭირეთ“, – ამბობს საკრებულოს ფრაქცია „გაერთიანებული დემოკრატიული მოძრაობის“ თავმჯდომარე, მურმან დავითაძე.

ოპოზიციის შენიშვნას უსაფუძვლოდ მიიჩნევს საკრებულოს თავმჯდომარე, ამირან  ცინცაძე:„ბიუჯეტი რაც დავამტკიცეთ, მოსახლეობის საჭიროებაზეა გათვლილი. რაც შეეხება ოპოზიციის მოთხოვნას, აიპ-ების თანამშრომლების ხელფასების მატებასთან დაკავშირებით, ამ ეტაპზე მუნიციპალიტეტეს არ აქვს შესაძლებლობა ხელფასები გავზარდოთ“

დამტკიცებული ბიუჯეტით ქედის მუნიციპალიტეტის წარმომადგენლობითი და აღმასრულებელი ორგანოებისთვის მილიონ 608 000 ლარი, თავდაცვაზე – 76 000, ინფრაქტრუქტურული პროექტების განსახორციელებლად – 3 მილიონ 902 000, განათლებაზე მილიონ 219 000, კულტურა, რელიგიასა და სპორტული ღონისძიებებისთვის 960 000, ხოლო ჯანდაცვისთვის 390 000 ლარია გამოყოფილი.

„2017 წლის ბიუჯეტში პრიორიტეტულია ინფრაქტრუქტურის მოწესრიგება, აწჰესის ტერიტორიის მოწესრიგებისთვის 700 000, ხოლო დაბა ქედის კეთილმოწყობისთვის 740 000 ლარი გაიწერა. მნიშვნელოვანია ისიც, რომ,მუნიციპალიტეტში ყველა ადმიანისტრაციულ თემში 340 000 ლარის კეთილმოწყობითი ღონისძიებები გატარდება 2017 წელს“, – ამბობს ქედის მუნიციპალიტეტის გამგეობის ბიუჯეტის დაგეგმარებისა და ფორმირების განყოფილების უფროსი, გიორგი სურმანიძე.

მიუხედავად იმისა, რომ ქედის მუნიციპალიტეტში მცხოვრები მოსახლეობის მთავარი შემოსავალი სოფლის მეურნეობაზე მოდის, სოფლის მეურნეობის განვითარებისთვის ქედის ბიუჯეტში ერთი თეთრიც კი არ არის გამოყოფილი. საკრებულოს თავმჯდომარე ამბობს, რომ სოფლის მეურნეობის განვითარებისთვის პროგრამებს აჭარისა და ცენტრალური ბიუჯეტი აფინასებს.

ქედის მუნიციპალიტეტი 3 მილიონ ლარს აჭარის რესპუბლიკური ბიუჯეტიდან, ხოლო 4 მილიონ 142 200 ლარს ცენტრალური ბიუჯეტიდან მიიღებს.

30 დეკემბერს ელექტრონული აუქციონის წესით ბათუმის ფსიქიატრიული საავადმყოფოს ახალი მესაკუთრის ვინაობას გავიგებთ. აჭარის ფინანსთა და ეკონომიკის სამინისტრო შპს „რესპუბლიკური კლინიკური ფსიქონევროლოგიური საავადმყოფოს“ აჭარის ავტონომიური რესპუბლიკის საკუთრებაში არსებულ 100%-იან წილს პირობებიან, ელექტრონულ აუქციონზე ყიდის.

აუქციონის პირობების თანახმად, მყიდველმა ხელშეკრულების გაფორმებიდან 8 თვეში უნდა უზრუნველყოს შენობისათვის საჭირო სარემონტო/სარეკონსტრუქციო სამუშაოების დაწყება, რაც არაუგვიანეს 36 თვეში დასრულდება. აუქციონის ერთ-ერთი პირობაა – 10 წლის განმავლობაში სამედიცინო პროფილის უწყვეტად შენარჩუნება.

რა მოხდება 10 წლის შემდეგ, თუკი სამედიცინო დაწესებულების მესაკუთრე პროფილს შეცვლის და აჭარას ფსიქიატრიული საავადმყოფო აღარ ექნება? – კითხვას აჭარის ჯანმრთელობის და სოციალური დაცვის მინისტრმა, ზაალ მიქელაძემ ასე უპასუხა: „10 წლის შემდეგ გიპასუხებთ კონკრეტულად, როცა დაგარწმუნებთ, რომ ამ სფეროში შემოსული ადამიანი ნაკლებად ფიქრობს პროფილის შეცვლას“.

აჭარის ჯანდაცვის მინისტრი დარწმუნებულია, რომ მესაკუთრე ფსიქიატრიულ დაწესებულებას პროფილს არ შეუცვლის, თუმცა არ აქვს პასუხი კითხვაზე: რატომ არის მითითებული აუქციონის პირობაში პროფილის შენარჩუნება მხოლოდ 10 წელი. მას ამ თემაზე ეკონომიკის სამინისტროსთან არ უსაუბრია. ზაალ მიქელაძე ბათუმის ონკოლგიური საავადმყოფოს გასხვისებას იხსენებს: „მაშინაც იყო ხმაური, მაგრამ დავინახეთ, რომ არათუ პროფილი შეინარჩუნა, პირიქით, გაფართოვდა კიდეც, მძლავრ ცენტრად ჩამოყალიბდა და ახალ კორპუსებს აშენებს. ჩვენი სახელმწიფო პროგრამები კიდევ უფრო ადაპტირებული ხდება ფსიქიკური ჯანმრთელობის მიმართულებით და დაფინანსება ყოველწლიურად იზრდება. ეს უქმნის მეტ მოტივაციას მყიდველს. არა მგონია, ფსიქიატრიულის შემთხვევაშიც ტერიტორიის გამო ჰქონდეს ინტერესი მყიდველს, ქალაქში ისედავ ბევრი საკურორტო დაწესებულებაა”

ჯანდაცვის მინისტრს შევახსენეთ, რომ ფსიქიატრიული საავადმყოფო ქალაქის ტერიტორიაზეა, ზღვასთან ახლოს, ხოლო ბათუმის მერმა რამდენიმე დღის წინ ისაუბრა სასტუმროების სიმწირეზე, როცა „ორბი ჯგუფს“ კონკრეტული პირობებით მიწის ნაკვეთები გადასცა.

„მესმის, შეიძლება ასეცაა. მე არასდროს მიმუშავია ბიზნესში, მაგრამ დღეს ბიზნესია უკვე იქ მოზიდული კონკრეტული პროგრამები,” – გვიპასუხა ზაალ მიქელაძემ, აჭარის ჯანმრთელობის და სოციალური დაცვის მინისტრმა.

ბათუმში, კახაბრის ქუჩა N36-ში მდებარე ფსიქიატრიული საავადმყოფოს შენობების საერთო ფართობი 25459 კვ/მ, ხოლო მასზე მიმაგრებული მიწის ნაკვეთის ფართობია 5232 კვ/მ. ამასთან „რესპუბლიკური კლინიკური ფსიქონევროლოგიური საავადმყოფოს“ გააჩნია კრედიტორული [105 727 ლარი] და დებიტორული [398 394 ლარი] დავალიანება .აღნიშნულ პროექტში ხელშეკრულების გაფორმებიდან 36 თვის განმავლობაში მყიდველმა არანაკლებ 1 მილიონი ლარის ინვესტიცია უნდა განახორციელოს. აუქციონის საწყისი ფასი 100 ათასი ლარია.

ბათუმის „ფსიქიატრიული საავადმყოფოს“ გასხვისება დღეს „ნაციონალურმა მოძრაობამ“ გააპროტესტა. აქ მიიჩნევენ, რომ მთავრობა მოგების მომტან საწარმოს არ უნდა ყიდდეს. ასევე გაურკვეველია, როგორ განისაზღვრა აუქციონის საწყისი ფასი.

„გაურვეველია, რატომ ყიდის აჭარის მთავრობა კლინიკას, სადაც ყოველთვიური მოგება 20-30 ათასს ლარს შეადგენს. რატომ ყიდის აჭარის მთავრობა კვადარტულ მეტრს დაახლოებით 3 ლარად, როცა ფსიქიატრიული საავადმყოფოს ტერიტორიაზე ბათუმის საკრებულოს მიერ დადგენილი ფასი – 65 ლარია. გარდა ამისა, აუქციონის პირობა მხოლოდ შენობის რემონტს ითვალისწინებს, ამაში ჩაიდება ინვესტიცია და არავინ იცის, რაში გამოიყენებს ინვესტორი ამ საავადმყოფოზე მიმაგრებულ მიწის ნაკვეთს“, – აცხადებს მიხეილ ბოლქვაძე, ხელვაჩაურის საკრებულოს წევრი „ერთიანი ნაციონალური მოძრაობიდან“.

როგორ განისაზღვრა ფსიქიატრიული საავადმყოფოს აუქციონზე გასატანი საწყისი ფასი – აჭარის ფინანსთა და ეკონომიკის სამინისტროში ამ დრომდე კომენტარს არ აკეთებენ.

შსს-ს ინფორმაციით, აჭარის პოლიციის დეპარტამენტის ბათუმის საქალაქო სამმართველოს თანამშრომლებმა, ოპერატიული ინფორმაციის საფუძველზე ჩატარებული საგამოძიებო მოქმედებების შედეგად, 1976 წელს დაბადებული ი.პ. განსაკუთრებით დიდი ოდენობით და დიდი ოდენობით ნარკოტიკული საშუალებების უკანონო შეძენა-შენახვის ბრალდებით, ხოლო 1975 წელს დაბადებული რ.ბ.  ნარკოტიკული საშუალების უკანონო შეძენა-შენახვის ბრალდებით, ბათუმში დააკავეს.

„სამართალდამცველებმა, ი.პ.-ს პირადი ჩხრეკისას, 20 აბი ,,სუბოქსინი“, 17 აბი „მეტადონი“ და ერთ შეკვრად დაფასოებული ნარკოტიკული საშუალება ჰეროინი ამოიღეს. რ.ბ.-ს პირადი ჩხრეკისას, პოლიციამ ერთ შეკვრად დაფასოებული ნარკოტიკული საშუალება ჰეროინი და აბი ,,სუბოქსინი“ ამოიღო„.

შსს ინფორმაციით, გამოძიება ნარკოტიკული საშუალების უკანონო შეძენა-შენახვის, დიდი ოდენობით და განსაკუთრებით დიდი ოდენობით ნარკოტიკული საშუალებების უკანონო შეძენა-შენახვის ფაქტებზე მიმდინარეობს (საქართველოს სსკ-ის 260-ე მუხლის 1-ლი ნაწილით, მე-3 ნაწილის „ა“ ქვეპუნქტით და მე-6 ნაწილის „ა“ ქვეპუნქტით).

ბათუმი-ახალციხის საავტომობილო მაგისტრალი დღეს დილიდან ჩაკეტილია. მეწყერი დაახლოებით დილის 6 საათზე, ქედაში, სოფელ პირველ მაისთან ჩამოწვა. გზების დეპარტამენტის მონაცემით, მოძრაობა მაგისტრალზე დაახლოებით ნახევარ საათში აღდგება.

„გზების დეპარტამენტი დილიდან მუშაობს გზის გაწმენდაზე. დაახლოებით ნახევარ საათში ცალმხრივად აღდგება გზა. დღის განმავლობაში გაგრძელდება მუშაობა და რამდენიმე საათში სრულად გაიწმინდება მაგისტრალის მონაკვეთი, სადაც მეწყერი ჩამოწვა,“ – უთხრა „ბათუმელებს“ საქართველოს საგზაო დეპარტამენტის აჭარის დირექციის დირექტორმა, ზურაბ სიხარულიძემ. მისი ინფორმაციით, მეწყრის შედეგად არავინ დაშავებულა.

ქედის მუნიციპალიტეტის გამგეობის პრესსამსახურის ინფორმაციით, მეწყერი ისევ აქტიურია და ამ ეტაპზე ისინი მხოლოდ გზების დეპარტამენტის მონაცემებს ეყრდნობიან.

ბათუმი-ახალციხის მაგისტრალის მონაკვეთი კურორტ გოდერძიდან  ახალციხის მიმართულებით დიდთოვლობის გამო გაზაფხულამდე ჩაკეტილია. 

„2016 წლის საპარლამენტო არჩევნების გენდერული ანალიზი, ძირითადი მიგნებები და გამოწვევები“- შუალედური კვლევის შედეგები ამ თემაზე „ახალგაზრდა იურიტთა ასოციაციამ“ წარმოადგინა. შედეგების გაცნობის პარალალურად მესამე სექტორის და პოლიტიკური პარტიების წარმომადგენლებმა დისკუსიაში მიიღეს მონაწილეობა – ქალთა ჩართულობა პოლიტიკურ პროცესში.

„ბათუმში გამართული ამ დისკუსიიდანაც გამოიკვეთა, რომ სავალდებულო კვოტირება უნდა დაწესდეს და განხორციელდეს ცვლილებები პარტიების ფინანსურად წამახალისებელ ფორმებში,“ -გვიყვება ირმა პავლიაშვილი, „ახალგაზრდა იურისტთა ასოციაციის“ საარჩევნო პროექტების მენეჯერი.

ირმა პავლიაშვილი ამბობს, რომ რეგიონებში გამართულ დისკუსიებზე ისმენს ქალთა ჩართულობის გაზრდაზე დაკვეთას, ამაზე საუბრობენ პოლიტიკური პარტიებიც, თუმცა საკანონმდებლო ნორმებიც კი ვერ უზრუნველყოფს მეტ წარმომადგენლობას პოზიციებზე, სადაც გადაწყვეტილებებს ქალები მიიღებენ: „ხშირ შემთხვევაში ჩანს, რომ არსებული ნორმები ვერ უზრუნველყოფს მეტი ქალის ჩართვას პოლიტიკურ პროცესში, ასევე არ ხდება მონიტორინგი, თუ რაში დახარჯა პარტიამ ამ კუთხით მიღებული თანხა, რამდენად მოხმარდა იგი ქალთა პოლიტიკური აქტივობების გაძლიერებას იგივე შიდაპარტიულ სიტუაციაში”.

საიას შუალედური კვლევის შედეგად სამი მიმართულებით გამოიკვეთა გამოწვევა. პირველი არის საკანონმდელო დონეზე მისაღები ცვლილებები, რადგან საარჩევნო სისტემა ვერ უზრუნველყოფს ქალთა წარმომადგენლობას არჩევით ორგანოებში. „ახალგაზრდა იურისტთა ასოციაცია“ მეორე გამოწვევად შიდაპარტიული დემოკრატიის გაძლიერებას ასახელებს და მესამე: მუშაობა საზოგადოების ცნობიერების გაზრდის კუთხით იმ სტერეოტიპების დასამსხვრევად, რასაც პატრიარქალური საზოგადოება გვთავაზობს.

ამავე კვლევის მიხედვით, დღეს, საქართველოში, ადგილობრივი წარმომადგენლობით ორგანოებში ჯამში მხოლოდ 15,46 % ქალია, ხოლო 10 გუბერნატორიდან არცერთი არაა ქალი.

ხელისუფლების განშტოებებს შორის გენდერული ბალანსი მხოლოდ სასამართლოშია დაცული. აქ 238 მოსამართლიდან 128 ქალია. აღმასრულებელ ხელისუფლებაში ამ დროისთვის 19 მინისტრიდან 2 ქალია, ხოლო პარლამენტში 150 დეპუტატიდან 24 ქალია, რაც მთლიანი შემადგენლობის 16%-ს შეადგენს.