Batumelebi | ლაშა სირაბიძე საკრებულოს თავმჯდომარედ აირჩიეს ლაშა სირაბიძე საკრებულოს თავმჯდომარედ აირჩიეს – Batumelebi
RU | GE  

ლაშა სირაბიძე საკრებულოს თავმჯდომარედ აირჩიეს

დღეს 26 დეკემბერს, ბათუმის საკრებულოს რიგგარეშე სხდომა გაიმართა. სხდომაზე რამდენიმე საკითხია წარმოდგენილი განსახილველად. პირველ საკითხად საკრებულოს თავმჯდომარის მოვალეობის შემსრულებლის ლაშა სირაბიძის თავმჯდომარედ არჩევის საკითხი განიხილეს.

საკრებულოს თავმჯდომარის პოსტზე ლაშა სირაბიძის კანდიდატურა, საკრებულოს იურიდიულ და საპროცედურო საკითხთა კომისიის თავმჯდომარემ, ლევან კინწურაშვილმა დააყენა. სხვა კანდიდატურა არ დასახელებულა.

კენჭისყრაში მონაწილეობა არ მიიღეს „ნაციონალური მოძრაობის“ წარმომადგენლებმა საკრებულოში გიორგი კირთაძემ, ნოდარ დუმბაძემ და ჯუმბერ კახიძემ. გიორგი კირთაძის განცხადებით, რადგან უმრავლესობაში „ქართული ოცნებაა“, ისინი არ დააყენებენ თავიანთ კანდიდატურას, „არც კენჭისყრაში მივიღებთ მონაწილეობას და შესაბამისად, არც ლაშა სირაბიძის საქმიანობაზე ვიქნებით პასუხისმგებელი“- განაცხადა მან სხდომაზე.

საკრებულოს სხდომას არ ესწრებოდა „თავისუფალი დემოკრატების“ წარმომადგენელი კობა ჩხეიძე.

ლაშა სირაბიძე 21 ხმით, საკრებულოს თავმჯომარე გახდა.

„არ მოველოდი ამ შედეგს და მადლობა ნდობისთვის. მე ყოველთვის ვიქნები ჩემი კოლეგების და ჩემი ქალაქის გვერდით“- განაცხადა ლაშა სირაბიძემ.

„აქტიურად ვითანამშრომლებთ, გილოცავთ და წარმატებას გისურვებთ“- განაცხადა ქალაქის მერმა, გიორგი ერმაკოვმა.

ლაშა სირაბიძე, საკრებულოს თავმჯდომარის მოადგილედ მუშაობდა,  ის თავმჯდომარის მოვალეობის შემსრულებლად 2016 წლის 9 სექტემბერს დაინიშნა, ანუ მას შემდეგ, რაც ყოფილი თავმჯდომარე ირაკლი ჭეიშვილი აჭარის უმაღლესი საბჭოს არჩევნებში ჩაერთო.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com