ქუჩების რეაბილიტაცია, საგზაო ინფრასტრუქტურისა და კომუნალური სისტემის გაუმჯობესება ბათუმისთვის ისევ მთავარი პრიორიტეტი იქნება, როგორც გასულ წლებში. მომავალი წლის ბიუჯეტიდანაც ყველაზე მეტი თანხა ამ პროქტებზე დაიხარჯება. საკრებულომ პროექტის პირველადი ვარიანტი უკვე განიხილა და შენიშვნებით უკან გადაუგზავნა მერიას. ახალ ვარიანტს საფინანსო სამსახური საკრებულოს დეკემბრის პირველივე კვირაში წარუდგენს.
2017 წლის ბიუჯეტის პროექტის განმარტებით ბარათში პრიორიტეტულ სფეროებად მოხსენიებულია ასევე განათლება და ჯანდაცვა, თუმცა ამ მიმართულებით ახალი პროგრამები დაგეგმილი არ არის.
პროექტის მიხედვით, მომავალ წელს სატრანსპორტო ინფრასტრუქტურის განვითარებისთვის მერია 6 მილიონი ლარის დახარჯვას გეგმავს. ეს თანხა, ძირითადად, საგზაო მოძრაობის ორგანიზებისთვის საჭირო ინვენტარისა და ტექნიკური საშუალებების მოვლა-შენახვას, შემანელებელი ბარდიურების მოწყობას, პარკირების სისტემის გამართული ფუნქციონირების უზრუნველყოფას უნდა მოხმარდეს. ახალი მუნიციპალური ტრანსპორტის შესყიდვა არ იგეგმება.
ეკოლოგიური მდგომარეობის გაუმჯობესებისა და სარეკრეაციო ინფრასტრუქტურის განვითარებისთვის 8 მილიონამდე ლარი გაითვალისწინეს. ამ თანხაში შედის ქალაქის დასუფთავების, ბათუმის ბულვარისა და ბოტანიკური ბაღის მოვლის სამუშაოები, ასევე ქალაქის გამწვანების ღონისძიებებიც.
მომავალ წელს მილიონი ლარი გაითვალისწინეს მუნიციპალური სასაფლაოს მოვლა-პატრონობისთვის.
ქალაქის დაგეგმარებისთვის საჭირო სამუშაოებზე მომავალი წლის ბიუჯეტში მერიამ 600 000-მდე ლარი გაითვალისწინა. ბიუჯეტის პროექტის მიხედვით, ამ თანხით მერია საპროექტო-სახარჯთაღრიცხვო დოკუმენტაციის შედგენას, ქალაქის ქონების ინვენტარიზაციას, ბათუმის ტერიტორიის აეროფოტოგადაღებასა და ციფრული სამგანზომილებიანი მოდელის შექმნას გეგმავს. ამ თანხიდან იგეგმება ასევე იმ მოქალაქეების საკომპენსაციო თანხით უზრუნველყოფაც, რომლებსაც სახელმწიფო პროექტებისთვის საკუთარი ქონების დათმობა მოუწევთ.
ქალაქის გენერალური გეგმის შემუშავება ბათუმის არჩეული მერის, გიორგი ერმაკოვის წინასაარჩევნო დაპირება იყო. თუმცა როგორც მერიის 2017-2020 წლების პრიორიტეტების დოკუმენტით ირკვევა, 2017 წლის თვითმმართველობის არჩევნებამდე ანუ თავის ვადის ამოწურვამდე გიორგი ერმაკოვი ამ დაპირებას ვერ შეასრულებს.
ბინათმესაკუთრეთა ამხანაგობების განვითარებისთვის 6 მილიონი ლარი დაიხარჯება.
რაც შეეხება განათლების პროგრამებს – სკოლამდელი აღზრდა მომავალ წელს თითქმის 14 მილიონი ლარით უნდა დაფინანსდეს. ამ თანხაში შედის ერთი ახალი ბაღის მშენებლობისა და რამდენიმე ახალი ბაღის სარეაბილიტაციო სამუშაოების დაფინანსება. პროფესიული განათლების ხელშეწყობის მიზნით, მომავალ წელს მერია 160 000 ლარს დახარჯავს. სპორტი 6 მილიონი ლარით, ხოლო კულტურის განვითარების ხელშეწყობის პროგრამა ხუთ მილიონამდე ლარით დაფინანსდება.
ჯანმრთელობის დაცვა და შესაბამისი პროგრამები მომავალი წლის ბიუჯეტის პროექტის მიხედვით 3 მილიონი ლარით დაფინანსდება.
მას შემდეგ, რაც მერია საკრებულოს შენიშვნებს განიხილავს, შესაძლოა ბიუჯეტის ეს პარამეტრები ნაწილობრივ შეიცვალოს.
![კიდევ ორი ცათამბჯენი – როგორ შეიცვლება ბათუმის ცენტრალური პარკის მიმდებარე ტერიტორია [ფოტო]](https://batumelebi.netgazeti.ge/wp-content/uploads/2024/03/orbi-rustavelis-kucha.jpg)
