Batumelebi

აჭარის მთავრობა მწვანე კონცხზე ყოფილი აგრარული უნივერსიტეტის ორ შენობას [3239,62 კვ.მ და 4912,07 კვ.მ] და მათზე დამაგრებულ ფართობს [ჯამში 13 640 კვ.მ] პირობადებული აუქციონით ყიდის. ამ შენობებიდან ერთი ბათუმის შოთა რუსთაველის სახელმწიფო უნივერსიტეტის სასწავლო კორპუსია [თუმცა, სასწავლო პროცესი აქ აღარ მიმდინარეობს], მეორე კი ამავე უნივერსიტეტის საერთო საცხოვრებელი.

აჭარის მთავრობის გადაწყვეტილებით, ქონების საწყისი ფასი 4 მილიონ 500 ათასი ლარია. შესაბამისად, საწყისი ფასის მიხედვით, ინვესტორს 1 კვ/მეტრ მიწის ნაკვეთში 330 ლარის გადახდა მოუწევს. მაშინ, როდესაც ზღვისპირა ზოლში მიწის საბაზრო ფასი გაცილებით მაღალია.

რაც შეეხება პირობებს, ამჯერად სამინისტრო ქონების საფასურის ნაწილის ჩარიცხვას [სამი მილიონი ლარი] ბათუმის სახელმწიფო უნივერსიტეტის ბიუჯეტში ითხოვს. დარჩენილი თანხა კი მყიდველმა აჭარის ბიუჯეტში უნდა შეიტანოს. გარდა ამისა, მყიდველმა უნდა აიღოს ვალდებულება, რომ ხელშეკრულების გაფორმებიდან ხუთი წლის ვადაში, საკუთრებაში გადაცემულ ქონებაზე არანაკლებ ხუთი მილიონი ლარის ინვესტიციას განახორციელებს.

მწვანე კონცხზე საქართველოს ყოფილი პრემიერის – ბიძინა ივანიშვილის პროექტის ე.წ. „პანორმა ბათუმის“ შესაძლო განხორციელებაზე არაოფიციალურად საუბრობენ. ერთ-ერთი ინფორმირებული პირი, რომელიც საჯაროდ თავისი ვინაობის დასახელების წინააღმდეგია, ამბობს, რომ ტერიტორიის ყიდვას სწორედ ბიძინა ივანიშვილი აპირებს. ივანიშვილის მწვანე კონცხთან დაკავშირებული გეგმების შესახებ “ბათუმელები” აქამდეც წერდა.

ყოფილი სასოფლო-სამეურნეო ინსტიტუტის შესასვლელ ჭიშკარზე ადრე პატარა დაფა იყო გამოკრული წარწერით: „მწვანე კონცხი, ბოტანიკური ბაღის ზედა შესასვლელის მიმდებარედ სასტუმრო კომპლექსი 300-320 ნომერზე“. აქ მშენებლობა უკვე დაწყებულია და დაფაც შეცვლილია. ახალი საინფორმაციო დაფა გვაუწყებს, რომ აქ „Magnolia – Resort & SPA“ შენდება.

აგრარული უნივერსიტეტის შენობასა და მის მიმდებარე ტერიტორიაზე ტურისტული ინფრასტრუქტურის შექმნის პროექტზე პირველად აჭარის მთავრობის ყოფილმა თავმჯდომარემ გაახმოვანა. არჩილ ხაბაძე ამბობდა, რომ სანაცვლოდ უნივერსიტეტი მიიღებდა ჩაქვში მდებარე უმაღლესი საბჭოს შენობას, უმაღლესი საბჭო კი სამუშაოდ ბათუმში დაბრუნდებოდა.

აუქციონის ბიჯი არის 100 ათასი ლარი. აუქციონი 3 თებერვალს, 17:00 საათზე დასრულდება.

დღეს, საღამოს 5:30 საათზე, ბათუმში, იუსტიციის სახლთან, უკრაინაში დაკავებული გიორგი ცერცვაძის მხარდასაჭერი აქცია გაიმართება.

გიორგი ცერცვაძე 2017 წლის 15 იანვარს საქართველოდან უკრაინაში გამგზავრების შემდეგ კიევის აეროპორტში დააკავეს. 17 იანვარს კი კიევის სასამართლომ  მას 40 დღით წინასწარი პატიმრობა შეუფარდა.

აქციის ორგანიზატორი „ნაციონალური მოძრაობის“ ბათუმის ორგანიზაციაა. აქცია დღეს პარტიის ბათუმის ორგანიზაციის ხელმძღვანელმა გიორგი კირთაძემ დააანონსა:

„თბილისის პარალელურად დღეს ბათუმშიც გაიმართება აქცია იმ აღმაშფოთებელი ფაქტის საწინააღმდეგოდ, რაც გააკეთა ქართულმა ხელისუფლებამ, როცა ითანამშრომლა რუს ოკუპანტთან, თავისი გმირი ადამიანის საწინააღმდეგოდ, რომელიც რუსეთის აგრესიისგან იცავდა საქართველოს და ახლა იცავს უკრაინას. ამაზე უფრო მძიმე დანაშაული არ ვიცი რა შეიძლება ჩაიდინოს ქართულმა სახელმწიფომ, ნაცვლად იმისა, რომ გმირებს პატივს ვცემდეთ და მათ ღვაწლს ვაფასებდეთ… ხალხის ვალდებულებაა ამოიღოს ხმა, გამოთქვას ხმამაღალი პროტესტი და აიძულოს ხელისუფლება, რომ არ ჩაიდინოს მსგავსი დანაშაული.“

როგორც საპარლამენტო უმცირესობის წევრი ოთარ კახიძე „ნეტგაზეთთან“ საუბარში ყვება, წარმოშობით სოხუმელი გიორგი ცერცვაძე საქართველოს შსს-ის სპეცდანიშნულების რაზმის უფროსის მოადგილე იყო შიდა ქართლში. იგი მონაწილეობდა ქართული მხარის პრაქტიკულად ყველა ბრძოლაში ქვეყნის დამოუკიდებლობის მოპოვების შემდეგ, მათ შორის, 2008 წლის აგვისტოს ომშიც და დაჯილდოებულია სამხედრო მამაცობისთვის.

მისივე ინფორმაციით, გიორგი ცერცვაძე 2014-2015 წლებში მოხალისეობრივად იცავდა უკრაინის სახელმწიფოს სუვერენიტეტსა და ტერიტორიულ მთლიანობას უკრაინის ერთ-ერთ ბატალიონში.

თავდაცვის სამინისტროს ცნობით, მართალია, გიორგი ცერცვაძე ამჟამად არ ირიცხება თავდაცვის სამინისტროს შეიარაღებულ ძალებში, თუმცა გასულ წლებში ნამდვილად მსახურობდა შინაგან საქმეთა სამინისტროს სპეცდანიშნულების რაზმში.

2016 წლის ბოლოს ცერცვაძე „საქართველოში იყო ჩამოსული ოჯახთან, სადაც გაატარა, ასე ვთქვათ, საახალწლო არდადეგები. ერთი კვირის წინ ბრუნდებოდა კიევში, სადაც დააკავეს“, – განაცხადა კახიძემ.

აჭარის დასაქმების სააგენტოს ხელმძღვანელი თემურ კახიძე, გია აბულაძის კრიტიკას გამოეხმაურა და განაცხადა, რომ გადამზადების პროგრამების განხორციელების უფლებას მათ დებულება აძლევს.

„თუ გადახედავთ ევროპულ გამოცდილებასაც, ვნახავთ როგორ მუშაობს იქ  დასაქმების ცენტრები. მათი ერთ-ერთი ფუნქციაა იზრუნონ კვალიფიკაციის ამაღლებაზე, რათა სამუშაოს მაძიებლების დასაქმების შესაძლებლობა გაიზარდოს. ყველა კვლევა ცხადყოფს, რომ უმუშევრობის ერთ-ერთი განმაპირობებელი ფაქტორი არის ის, რომ ადამიანები ნაკლებად კონკურენტუნარიანი არიან შრომის ბაზარზე  და კვალიფიკაციის დონე არის დაბალი“.

„ბათუმელების“ კითხვაზე, თუ ვის გადამზადებას აპირებს დასაქმების სააგენტო ტენდერით, რომლის მომსახურების შესყიდვის სავარაუდო ღირებულებაა 140 ათასი ლარია, თემურ კახიძე ამბობს, რომ ეყოლებათ პრიორიტეტული ჯგუფები: „უპირატესი მონაწილეობის უფლება აქვთ რამდენიმე მოწყვლად ჯგუფს, ესენი არიან: სოციალური შემწეობის მიმღები ჯგუფი, იძულებით გადაადგილებული პირები, ეკომიგრანტები, შშმ პირები, მათი მეურვეები და ოჯახის წევრები. გასაუბრების დროს თანაბარი ქულების შემთხვევაში პრიორიტეტი მიენიჭება ამ ჯგუფების წარმომადგენლებს.

პროგრამა ითვალისწინებს პროფესიული და პიროვნული უნარების განვითარებას, გადამზადება ხორციელდება იმ პროფესიებში, რომელზეც მოთხოვნაა  ბაზრის კვლევის მიხედვით. გარდა ამისა, გავაკეთეთ ანალიზი გასული წლის მანძილზე ჩვენთან შემოსული მოთხოვნების საფუძველზე და პოტენციურ დამსაქმებლებთან ჩავატარეთ გამოკვლევა“.

თემურ კახიძის თქმით, გადამზადების პროგრამა ითვალისწინებს უცხო ენის შესწავლას და გარანტირებული სამუშაო გამოცდილების მიღების მიზნით გარანტირებულ საწარმოო პრაქტიკას: „უცხო ენაში გადამზადებას დაეთმობა 120 საათი, ამდენივე საათი არის დათმობილი საწარმოო პრაქტიკაზე. 300 საათი აქვს დათმობილი სასწავლო კურსს, რომელიც შეიცავს სასწავლო თეორიას და სასწავლო პრაქტიკას.  ამ პროგრამას იმიტომ ვახორციელებთ, რომ არც ერთ პროფესიულ სასწავლებელს არ გააჩნია მოკლევადიანი გადამზადების პროგრამა, რომელიც იქნება უფასო.“

„ბათუმელების“ კითხვაზე, რამდენი ადამიანის დასაქმებას ვარაუდობს ამ პროგრამის დასრულების შემდეგ? – თემურ კახიძე ამბობს, რომ  ყველა დასაქმდება, ვინც პროგრამას სწორად აითვისებს: „ევროკავშირის სტანდარტი არის 30%, თუმცა შარშან ანალოგიური პროგრამის განხორციელების შემდეგ 57% იყო დასაქმებული“.

„ბათუმელების“ კითხვაზე, არის თუ არა  ეს პროგრამა იმ პროგრამის ანალოგი, რასაც ტურიზმის დეპარტამენტი ახორციელებს? – თემურ კახიძემ გვითხრა, რომ – „არა“: „ეს პროგრამა უმაღლეს საბჭოში ბიუჯეტის განხილვის დროს იყო წარდგენილი და თუ არ ეთანხმებოდნენ  და ეს პოლიტიკური დივიდენდების მიღების საფუძველი არაა, მაშინ უნდა მოეხდინათ რეაგირება“.

აჭარის ტურიზმის დეპარტამენტის ხელმძღვანელი სულხან ღლონტი, უმაღლესი საბჭოს წევრის, გია აბულაძის განცხადებას გამოეხმაურა. დეპუტატი აცხადებდა, რომ ტურიზმის დეპარტამენტი და დასაქმების სააგენტო დუბლირებულ პროგრამებში არაეფექტურად ხარჯავენ თანხას. სულხან ღლონტს მიაჩნია, რომ  ამ ტიპის განცხადებები უფრო გააზრებულად უნდა გაკეთდეს.

„ტურიზმის სკოლის ძირითადი პრიორიტეტი არის ტურიზმის განვითარება მაღალმთიან აჭარაში.  იქ არსებობს  საოჯახო ტიპის სასტუმროები, რომლებსაც შეუძლიათ ავთენტურ გარემოში აჩვენონ მაღალმთიანი რეგიონის კულტურა და ამაზე არის მოთხოვნა ტურისტების მხრიდან.  ყველა კვლევა აჩვენებს, რომ ადამიანებს აინტერესებთ ძველი სოფლების ნახვა. ჩვენ ამ ბიზნესის მფლობელებს ვთავაზობთ გადამზადებას, მაგალითად, თანამედროვე ტექნოლოგიებში –  ინტერნეტში ინფორმაციის განთავსება რომ  შეძლონ ტურისტების მოსაზიდად. ასევე, პრობლემაა სტანდარტიზაციის საკითხები,  სწორედ  ამისთვის გახდა აუცილებელი სკოლის გაკეთება“- ამბობს სულხან ღლონტი.

დეპარტამენტის ხელმძღვანელის განცხადებით, ევროპის ქვეყნები ძალიან დიდ თანხას ხარჯავენ მაღალმთიანი კურორტების განვითარებაზე: „ჩვენ საქმე არ გვაქვს დაწყებული და შედეგს ითხოვენ. ვერც გია აბულაძე და ვერც სხვა ვინმე ამის შედეგს ვერ განსაზღვრავს, ამის განსაზღვრა შეუძლიათ  მხოლოდ იმ ადამიანებს, რომლებიც მიიღებენ  უფრო მეტ ტურისტს; განსაზღვრავს სარეკლამო ბაზარი და სტატისტიკური მონაცემები – მაღალმთიან რეგიონში ავიდა თუ არა უფრო მეტი ტურისტი. ახლა მივდივარ მაჭახლის ხეობაში სასტუმროს მეპატრონეებთან შესახვედრად, უნდა ავუხსნათ ამ ადამიანებს რა გვინდა. მათთვის ეს რესუსრი უფასოდ იქნება ხელმისაწვდომი“.

სულხან ღლონტის განცხადებით, ტურიზმის სკოლის პროექტი არსებული ფინანსური რესურსებით განხორციელდება და ისინი დამატებითი თანხის მოთხოვნას აჭარის ბიუჯეტიდან არ აპირებენ.

შპს „სტადიონს“ ახალი დირექტორი ეყოლება. ამ პოსტზე გიორგი ზირაქაშვილს სულხან ხალვაში შეცვლის. სულხან ხალვაში აჭარის ფინანსთა და ეკონომიკის სამინისტროში, ბოლო 5 თვის განმავლობაში, მინისტრის მოადგილედ მუშაობდა.

გიორგი ზირაქაშვილმა „ბათუმელებთან“ განაცხადა, რომ ის ახალ შეთავაზებას ელოდება.

მინისტრის მოადგილედ შესაძლო დანიშვნას არ ადასტურებს ჯემალ ბოლქვაძე, შპს „გოდერდზირესორტსის“ დირექტორი. „საუბრის დონეზეც კი არ ყოფილა მაგ თანამდებობის შემოთავაზება“ – განაცხადა ჯემალ ბოლქვაძემ „ბათუმელებთან“.

შპს „სტადიონისა“ და შპს „გოდერდზირესორტსის“ 100%-იანი წილის მფლობელი აჭარის ავტონომიური რესპუბლიკაა.

შპს „სტადიონი“ აჭარის ფინანსთა და ეკონომიკის სამინისტრომ ბათუმში სტადიონისა და საავადმყოფოს მშენებლობის მიზნით შექმნა. სტადიონის მშენებლობაზე დღემდე ტენდერიც კი არ გამოცხადებულა.

ამ წუთებში მემედ აბაშიძის 25 ნომერში [მ. აბაშიძის და კ. გამსახურდიას ქუჩების კვეთა] ტრანსფორმატორი იწვის. სახანძრო სამსახურის ინფორმაციით,  სახანძრო ჯგუფი გასულია ადგილზე. ხანძრის გაჩენის მიზეზი ჯერჯერობით უცნობია.

აჭარის უმაღლესი საბჭოს წევრის „ნაციონალური მოძრაობიდან“, გია აბულაძის განცხადებით, აჭარის ტურიზმის დეპარტამენტი საბიუჯეტო თანხას არაეფექტურად, დუბლირებულ პროგრამებში ხარჯავს.

„ტურიზმის დეპარტამენტის ახალმა ხელმძღვანელმა გამართა პრეზენტაცია, რომ უნდა გახსნას ტურიზმის სწავლების სკოლა, რაც არასწორია, რადგან პირველ რიგში,  საგანმანათლებლო პროექტების განხორციელება განათლების სამინისტროს პრეროგატივაა.  რაც შეეხება სპეციალობებს, აჭარაში არსებობს  ტურიზმის მიმართულების პროფესიული სასწავლებლები ბათუმსა და ქობულეთში, რომლებიც ცენტრალური ბიუჯეტიდან ფინანსდება  და ნებისმიერ პირს  უფლება აქვს მიმართოს ამ სასწავლებელს და მიიღოს პროფესია.

ამ შემთხვევაში გამოდის, რომ  ტურიზმის დეპარტამენტი განათლების სამინისტროს კომპეტენციაში ერევა.  ბიუჯეტიდან დაიხარჯება თანხა, წლის ბოლოს ტურიზმის დეპარტამენტი გააკეთებს ანგარიშს,  რომ თითქოს რაღაც გააკეთა, მაგრამ სამწუხაროდ  კვალიფიციურ კადრებს ვერ მივიღებთ. ამას დაემატა ისიც,  რომ დასაქმების სააგენტომ გამოაცხადა 140 000 ლარზე ტენდერი, რომლითაც უნდა შეისყიდოს ისევ საგანმანათლებლო მომსახურება, ანუ ტურიზმის სფეროში კადრების მომზადება.

დასაქმების სააგენტოს ტენდერი გარკვეულ ეჭვებს ბადებს, რადგან მათ უნდა მოამზადონ  სასტუმრო საქმის სპეციალისტები, ამაზე სახელმწიფოს მიერ არის დამტკიცებული სტანდარტი, რომ  სტუდენტმა უნდა გაიაროს 60 კრედიტი ანუ 1 500 საათი, სწავლება ხორციელდება ათ თვეს და ბიუჯეტიდან  950 ლარით ფინანსდება ერთი სტუდენტი. სააგენტოს ტენდერის მიხედვით კი, იგივე სპეციალისტები უნდა მოამზადონ 30 კრედიტით ანუ 540 საათით და ერთ მსმენელზე დაიხარჯება 1 400 ლარი.

ეს ნიშნავს იმას, რომ ისევ წყალში გადაიყრება თანხები, თვის ბოლოს კი მივიღებთ სტატისტიკას, რომ გადაამზადეს ადამიანები, მაგრამ ვერ მივიღებთ იმის სტატისტიკას, დასაქმდნენ თუ არა ეს ადამიანები“.

როგორც გია აბულაძე ამბობს, საბიუჯეტო განხილვების დროს უმაღლეს საბჭოში „ნაციონალური მოძრაობის“ წარმომადგენლებმა ამ საკითხთან დაკავშირებით განაცხადეს, რომ ხდებოდა საბიუჯეტო პროგრამების დუბლირება, რაც არ იყო შედეგებზე ორიენტირებული.

„ჩვენი წინადადებაა,  დაუყოვნებლივ შეწყდეს ქაოტურად საბიუჯეტო თანხების ხარჯვა და არაეფექტური პროგრამების განხორციელება.  გარდა ამისა, არაეფექტური იქნება ტურიზმის განვითარების სკოლაც, რომელსაც აანონსებს ტურიზმის დეპარტამენტი და მოვუწოდებთ, ეს თანხები მიმართული  იყოს  პროფესიული სასწავლებლების  როგორც პროფესიულ, ასევე ინფრასტრუქტურულ განვითარებაზე, რაც უფრო ეფექტური  იქნება და უფრო კვალიფიციურ კადრებსაც მოვამზადებთ“.

გია აბულაძის თქმით, დასაქმების სააგენტოს პრეროგატივაა არა ტურიზმის სფეროს კადრების გადამზადება, არამედ დასაქმების ბაზრის კვლევა, – მან უნდა მიაწოდოს განათლების სამინისტროსა და პროფესიულ სასწავლებლებს მოთხოვნადი პროფესიები, რომ  შემდეგ  უზრუნველყონ ამ კადრების მომზადება.  „გარდა იმისა, რომ ეს არის არაეფექტური პროგრამები, ზოგიერთი სახელმწიფო დაწესებულება იჭრება მეორე დაწესებულების ფუნქციაში და საბიუჯეტო ქაოსთან ერთად ინსტიტუციური ქაოსიც იქმნება“.

ჟურნალისტმა ირინა ყურუამ „ტელეარხი 25“ დატოვა. ის საინფორმაციო გამოშვება „მაცნეს“ მთავარ რედაქტორად და გადაცემა „დიალოგის“ წამყვანად მუშაობდა. ირინა ყურუა არხიდან წამოსვლის მიზეზად ტელევიზიის დირექტორის მხრიდან შეთავაზებულ მოდელს ასახელებს, რაც, მაგალითად, საინფორმაციო სამსახურში რეპორტიორების შემცირებას ითვალისწინებს.

მისი თქმით, ტელევიზიას ფინანსური რესურსის პრობლემა ნამდვილად აქვს, თუმცა მენეჯმენტის მიერ მიღებულ გადაწყვეტილებას არ ეთანხმება. ის მიიჩნევს, რომ ახალმა მოდელმა, რაც გასართობი გადაცემების გააქტიურებას გულისხმობს, საინფორმაციო სამსახურის რესურსის ხარჯზე, შესაძლოა საინფორმაციო გამოშვება არასფრისმთქმელი გახადოს.

„არ მინდოდა, სხვადასხვა გამართლებული ან გაუმართლებელი მიზეზით ავტორი ვყოფილიყავი ამ პროცესის, მიგვეღო არაფრისმთქმელი საინფორმაციო გამოშვება, ან შემცირებულიყო გამოშვებების რაოდენობა, შაბათ-კვირის საინფორმაციო გაუქმებულიყო. ეს რისკები დავინახე ახალ მოდელში… გარდა ამისა, ახალი წლიდან ეთერში არ გასულა გადაცემა „დიალოგი“. გვითხრეს, რომ ფინანსები არის პრობლემა, არ ვიცით, როდიდან გავალთ ეთერშიო. მე სხვა არჩევანი არ მქონდა… “, – გვითხრა ირინა ყურუამ.

ყოფილი მთავარი რედაქტორი მიიჩნევს, რომ საინფორმაციო სამსახურის რესურსის შემცირება ან გადაცემა „დიალოგის“ შეჩერება არხის სარედაქციო დამოუკიდებლობის თემას არ უკავშირდება. ამბობს, რომ არხს ნამდვილად აქვს ფინანსური პრობლემა, მაგრამ პრობლემის გადაჭრა მენეჯმენტმა არასწორი გზით დაინახა.

„თვეზე მეტია ტელევიზიის დირექტორთან [მურთაზ ფრანგულაშვილი-ავტ.] დაპირისპირების რეჟიმში მიწევდა მუშაობა. მათ უნდათ მოდელის შეცვლა და 5 ადამიანით კარგი საინფორმაციო გამოშვების კეთება, რაც წარმოუდგენელია. შემოთავაზებული პროექტის მიხედვით, ოპერატორები და მემონტაჟეებიც პარალელურად დასაქმდებიან სხვა პროექტებზე, რომლებიც იქნება გასართობი ხასიათის. მენეჯმენტის აზრით, ეს ფულს შემოიტანს. მე წარმატებას ვუსურვებ ამ არხს, მაგრამ ვფიქრობ, რომ არასტაბილური ვითარება შეიქმნება და კონკურენტუნარიანი კადრები ტელევიზიას დატოვებენ“, – ამბობს ირინა ყურუა.

„ბათუმელების“ სატელეფონო ზარებს არ უპასუხა „ტვ 25“-ის დირექტორმა, მურთაზ ფრანგულაშვილმა.

„ტვ 25“-ის საინფორმაციო სამსახურის ყოფილი უფროსის თქმით, მას ამ დრომდე რომელიმე მედიასაშუალებიდან შეთავაზება არ მიუღია. „აჭარის ტელევიზიის“ ადამიანური რესურსების მართვის სამსახურის უფროსი, გია ქარცივაძე ირინა ყურუას კონკურსში მონაწილეობას სთავაზობს, რომელიც ტელევიზიაში მალე გამოცხადდება.

ირინა ყურუა „ტელეარხ 25“-ის თანამშრომელი 2016 წლის დასაწყისში გახდა, როცა არხიდან ოთხი ჟურნალისტი მენეჯმენტმა უკანონოდ გაათავისუფლა. სასამართლოს მოთხოვნის შემდეგ, ტელევიზიამ ოთხივე მათგანი გასული წლის დეკემბრის დასაწყისში აღადგინა. „ტვ 25“-ზე დაბრუნების სურვილი მხოლოდ გადაცემა „დიალოგის“ პროდუსერმა, ირმა ზოიძემ გამოთქვა, თუმცა ეს გადაცემა ეთერში ამ ეტაპზე არ გადის.

„ენერგო-პრო ჯორჯიას“ მიერ გამოქვეყნებული ელექტროენერგიის შეზღუდვების გრაფიკის მიხედვით, 23-26 იანვარს ელექტროენერგიის მიწოდება დროებით შეუწყდება ბათუმში, ქობულეთში, ხულოში, ხელვაჩაურსა და ქედაში სულ 3572 აბონენტს. აქედან,

23 იანვარს

• ბათუმში 650 აბონენტს, 11-დან 16 საათამდე;
• ქობულეთში, გელაურის დასახლებაში 464 აბონენტს, 11-დან 13 საათამდე;
• ხულოში 438 აბონენტს, 11-დან 14 საათამდე;
• ხელვაჩაურში 356 აბონენტს, 11-დან 17 საათამდე;

24 იანვარს

• ბათუმში 340 აბონენტს, 11-დან 14 საათამდე;

25 იანვარს

• ქედაში 376 აბონენტს, 11-დან 13 საათამდე;
• ქობულეთში 559 აბონენტს, 11-დან 13 საათამდე;

26 იანვარს

• ხულოში 389 აბონენტს, 11-დან 15 საათამდე.

კონკრეტული ქუჩები [უბნები] – თუ რომელ დასახლებაში, რომელ მისამართზე შეეზღუდებათ ელექტროენერგიის მიწოდება მომხმარებლებს – „ენერგო-პრო ჯორჯიას“ გრაფიკში მითითებული არ აქვს. რაც მითითებული აქვს ისაა, რომ ელექტროენერგიის მიწოდება აბონენტებს გეგმიური სარეაბილიტაციო სამუშაოების გამო შეეზღუდებათ.

ენერგოკომპანია ვალდებულია გააფრთხილოს აბონენტები მოსალოდნელი შეზღუდვების შესახებ. „ბათუმელები“ შეეცადა „ენერგო-პრო ჯორჯიაში“ გაერკვია,  კონკრეტულად რომელ ქუჩებზეა დაგეგმილი გეგმიური გათიშვები აჭარის ქალაქებსა და დაბებში, თუმცა კომპანიის ცხელ ხაზზე გვიპასუხეს, რომ ამ ინფორმაციის მისაღებად სამუშაო დღეს და სამუშაო საათებში ადგილობრივ სერვისცენტრში მივიდეთ, ან კომპანიას წერილობით მივმართოთ.

2017 წლის ადგილობრივი თვითმმართველობის არჩევნებისთვის სახელმწიფოს მიერ გამოყოფილი თანხის განაწილებისა და გამოყენების წესი ცენტრალურმა საარჩევნო კომისიამ ორი დღის წინ განსაზღვრა.

ადგილობრივი არჩევნების ჩატარებისსთვის სახელმწიფო ბიუჯეტიდან ცესკოს 39 მილიონ 11 ათას 899 ლარი აქვს გამოყოფილი.

ცესკოს დადგენილებით, აქედან 17 მილიონზე მეტი [ანუ მთლიანი თანხის თითქმის ნახევარი – 44,8%], საარჩევნო ადმინისტრაციაში დასაქმებულთა ხელფასებში დაიხარჯება, დანარჩენი კი სხვა ხარჯებია.

ერთ მილიონზე მეტი დაიხარჯება არჩევნებისთვის მოხელეთა მომზადება-გადამზადებაში, 2,2 მილიონ ლარზე მეტი საარჩევნო სუბიექტების სატელევიზიო რეკლამის განთავსებისთვის, ხოლო 7,6 მილიონზე მეტი – საარჩევნო სუბიექტის წარმომადგენელთა დასაფინასებლად.

2017 წლის ადგილობრივი თვითმმართველობის არჩევნებისთვის სახელმწიფოს მიერ გამოყოფილი თანხის განაწილებისა და გამოყენების ცესკოს მიერ დადგენილი წესი [ხარჯთაღრიცხვა]:

საქართველოს 2017 წლის სახელმწიფო ბიუჯეტში, საქართველოს ცენტრალური საარჩევნო კომისიისთვის, მთლიანობაში [არჩევნებისთვის განკუთვნილი თანსხის ჩათვლით] 60,5 მილიონი ლარია გაწერილი. თვითმმართველობის არჩევნები მიმდინარე წლის შემოდგომაზე უნდა ჩატარდეს.

ამავე თემაზე:

2016 წლის 8 ოქტომბრის საპარლამენტო არჩევნების უზრუნველსაყოფად ცესკომ სახელმწიფოსგან 30 მილიონ 888 ათას 46 ლარი მიიღო, საიდანაც 20 მილიონ 707 ათას 739 ლარი საარჩევნო მოხელეების ხელფასებისთვის გაითვალისწინეს.

ცესკო – არჩევნები 76 მილიონად და დაბალი კვალიფიკაციით

„მოვრიგდით, შედეგი უკვე გვაქვს. ნებისმიერ დროს, როცა ოჯახები თანხმობას განაცხადებენ, ჩვენ მზად ვართ მათი ტრანსპორტირება მოვახდინოთ“, – უთხრა „ბათუმელებს“ რამაზ ჯინჭარაძემ, აჭარის ჯანდაცვის მინისტრის მოადგილემ. სოფელ თხილვანაში მეწყერი 10 იანვარს გააქტიურდა. გეოლოგიური დასკვნის მიხედვით, აქ მცხოვრები 62 ოჯახის განსახლება აუცილებელია, რადგან მათ მეწყრისგან საფრთხე ემუქრებათ.

რამაზ ჯინჭარაძემ ვერ დაგვიკონკრეტა, რამდენმა ოჯახმა განუცხადა თანხმობა ქირით გასვლაზე სამთავრობო კომისიას. მისი თქმით, ოჯახების ერთი ნაწილი ეჭვობს, რომ სამი თვის შემდეგ, როცა მთავრობა ქირის ფულს აღარ გადაიხდის, ისინი ისევ ღია ცის ქვეშ დარჩებიან. მთავრობა თხილვანას მოსახლეობას სოციალურ სახლში შესახლებას ჰპირდება, რომელიც ხულოს მუნიციპალიტეტის ცენტრში მდებარეობს და მიწის ნაკვეთი არ ახლავს.

„მიწის ნაკვეთი არაა, მაგრამ ქალაქში რომ უნდათ, იყო ამაზეც საუბარი, იქაც ხომ არ ექნებათ მიწა და ვერ წაიყვანენ საქონელს?… ქალაქში მათი დაკმაყოფილება ვერ მოხერხდება ამ ეტაპზე. ეს კარგი შეთავაზებაა. შეუძლიათ საკუთარი მიწები ისევ დაამუშაონ“, – ამბობს რამაზ ჯინჭარაძე. კითხვაზე, როგორ სთავაზობთ სამუშაოდ მეწყერსაშიშ ადგილებს ადამიანებს, გვპასუხობს: „ეს საფრთხე იქ არსებობს 1984 წლიდან. ღმერთმა დაგვიფაროს, რამე რომ მოხდეს…“.

აჭარის ჯანდაცვის მინისტრის მოადგილის თქმით, ჯერ გადაწყვეტილი არ არის, რას შესთავაზებენ კონკრეტულ ოჯახებს, რადგან საფრთხის ქვეშ მყოფი ოჯახების ნაწილს მიღებული აქვთ სარგებელი წინა წლებში, როგორც ეკომიგრანტებს.

„მე არ დავეთანხმე ქირით გადასვლას,“ – გვითხრა თხილვანაში მცხოვრებმა ნათელა შაინიძემ. ამბობს, რომ მისი მიწის ნაკვეთი სრულად წაიღო მეწყერმა. ხულოს ცენტრში მდებარე სოციალურ სახლში გადასვლა მისთვის კატეგორიულად მიუღებელია: „იქ რა ვჭამო მერე?… მიწა რომც მქონდეს, რაფერ უნდა ვიარო იქიდან აქ? დილის რვაზე რომ წამოხვიდე იქიდან, 12-ზე თუ აქ იქნები, კაია. მერე საღამოს ვეღარ წახვალ. შენი მანქანა უნდა გყავდეს მაშინ. მირჩევნია, ფული მომცენ და მივხედავ ჩემს თავს, მიწის ნაკვეთს ვიყიდი სადმე, კიტრის დავრგავ, ლობიოს მოვიყვან…”

ნათელა შაინიძემ თავისი პირობა უკვე უთხრა სამთავრობო კომისიის წევრებს. ქირით გადასვლაზე ამ კომისიისგან პასუხის მიღებამდე ამბობს უარს.

აჭარაში მყოფმა საქართველოს განათლების მინისტრმა, ალექსანდრე ჯეჯელავამ ამჯერად ბათუმში გახსნილ თურქული სკოლის სტატუსის შესახებ გააკეთა განმარტება.

ალექსანდრე ჯეჯელავას თქმით, „მიმდინარეობს პროცედურები, ეს სკოლა გაივლის აკრედიტაციას ჩვეულებრივი წესით. ახლა ისინი მხოლოდ თურქულ ატესტატს გასცემენ, დიპლომს გასცემენ… მას შემდეგ, რაც ჩვენი კანონმდებლობით გაივლიან აკრედიტაციას, ექნებათ ქართული ატესტატის გაცემის საშუალება“.

გასული წლის სექტემბერში ბათუმში თურქული სკოლის გახსნის საკითხს საზოგადოებაში დიდი ვნებათაღელვა მოჰყვა. მაშინ საქართველოს განათლების სამინისტროში თქვეს, რომ მათთვის უცნობი იყო, რა ტიპის თურქული სკოლის გახსნის შესახებ გაავრცელა განცხადება თურქეთის საკონსულომ ბათუმში.

19 იანვარს გავრცელებულ ინფორმაციას იმის შესახებ, რომ მანდატურმა არასრულწლოვან მოსწავლესთან, სავარაუდოდ, სქესობრივი კავშირი დაამყარა, საქართველოს განათლების მინისტრი გამოეხმაურა. მინისტრს ჟურნალისტებმა ჰკითხეს, რამდენად იქნება გამოსავალი, თუ ბრალდებული მამაკაცი იქორწინებს 15 წლის მოზარდთან.

ალექსანდრე ჯეჯელავას თქმით, “დასჯა აუცილებლად მოხდება. სისხლის სამართლის კოდექსს არ აინტერესებს ცოლად მოყვანა და არ მოყვანა. სისხლის სამართლებრივი დევნა გაგრძელდება”.

განათლების მინისტრმა ასევე წუხილი გამოთქვა იმასთან დაკავშირებით, რომ მსგავს შემთხვევებში საზოგადოება ემხრობა ნაადრევ ქორწინებას: “ძალიან სამწუხაროა, რომ ჩვენი საზოგადოების დამოკიდებულება ასეთ ადრეულ ასაკში ქორწინების მიმართ მაინც რჩება ტოლერანტული. ეს კარგი არ არის. ჩვენ უნდა შევეცადოთ განათლებით, ოჯახებთან მუშაობით და საზოგადოებასთან მუშაობით დავანახოთ, რომ მიუღებელია ასეთ ადრეულ ასაკში ქორწინება, მისი ხელშეწყობა თუნდაც ოჯახის მხრიდან. მარწმუნებენ, რომ ყველა ბედნიერია  ამ კონკრეტულ შემთხვევაში, თუმცა ჩვენ ნამდვილად არ ვართ ბედნიერი და გვინდა აღვკვეთოთ მსგავსი შემთხვევები”.

განათლების მინისტრის თქმით, მიუხედავად იმისა, რომ საქმე გვაქვს მანდატურის მხრიდან 15 წლის მოზარდთან სავარაუდო სექსუალურ კავშირთან, “ერთეული ცუდი შემთხვევების გამო პროფესიის მიმართ ნდობა არ უნდა შეილახოს”:

“მინდა გითხრათ, რომ მანდატურის სამსახურმა ძალიან ბევრი უბედურება აგვაშორა თავიდან – ძალადობა სკოლებში შემცირებულია რადიკალურად, თვითდაზიანებისა და დაზიანების შემთხვევები შემცირებულია რადიკალურად. ასე რომ ეს არის საამაყო სამსახური. ცალკეული შემთხვევები ნებისმიერ სისტემაშია – პოლიციაშიც ხდება ცუდი რაღაცეები, ჟურნალისტებშიც ხდება ცუდი რაღაცეები და ყველგან ხდება. ამის გამო პროფესიის მიმართ ნდობა არ უნდა შეილახოს. ეს არის ძალიან ღირსეული სამსახური, ღირსეული ადამიანები მუშაობენ. მე ძალიან ვწუხვარ ამ შემთხვევასთან დაკავშირებით, რაც მოხდა, თუმცა აღარ მუშაობს ეს ადამიანი ჩვენს სამსახურში და მის მიმართ სისხლის სამართლებრივი დევნა არის დაწყებული. ამის გამო ჩვენ მანდატურის გუნდს ჩრდილი არ უნდა მივაყენოთ”.

უკანონო გაფიცვას „საქართველოს ფოსტა“ ლელა რაზმაძეს ედავება. ლელა ფოსტის ყოფილი თანამშრომელია და ისიც სასამართლოში უჩივის ყოფილ დამსაქმებელს. საქმეს ხელვაჩაურის სასამართლოში მოსამართლე ნუგზარ მგელაძე განიხილავს.

ლელა რაზმაძემ ერთხელ უკვე მოუგო სასამართლოს სამივე ინსტანცია „საქართველოს ფოსტას“, თუმცა იგი ბათუმის ნაცვლად, ხულოში აღადგინეს. სამსახურში აღდგენილ თანამშრომელს „ფოსტასთან“ ხელშეკრულება აღარ გაუფორმებია. აცნობა, რომ ამ მანძილზე [ბათუმიდან ხულოში] სამსახურში სიარული შეუძლებელი იყო და ხელახლა მიმართა სასამართლოს – ტოლფასი თანამდებობის მიღების მოთხოვნით. ხელახლა დაწყებულ სასამართლო დავაზე „საქართველოს ფოსტის“ რეაქცია შეგებებული სარჩელით გამოიხატა, სადაც ჩაიწერა, რომ ლელა რაზმაძის სამსახურში გამოუცხდებლობა უკანონო გაფიცვაა.

„შრომის კოდექსით გათვალისწინებული ერთადერთი შემთხვევა, როდესაც დამსაქმებელს აქვს უფლება, უარი განაცხადოს სამუშაოს შესრულებაზე არის გაფიცვა. გაფიცვის დაწყებისას დასაქმებული ვალდებულია დაიცვას შრომის კოდექსით დადგენილი პროცედურები“, – ვკითხულობთ „საქართველოს ფოსტის“ სარჩელში.

„სასამართლოს მიერ სამსახურში აღდგენა არ წარმოშობს შრომით ურთიერთობას. ლელა რაზმაძეს არ ჰქონდა შრომითი ვალდებულება დამსაქმებელთან“, – ამბობს ნიკა დუმბაძე, „ახალგაზრდა იურისტთა ასოციაციის“ იურისტი. მისი განმარტებით, მას შემდეგ, როცა სასამართლომ უკანონოდ მიიჩნია ლელა რაზმაძის გათავისუფლება სამსახურიდან და ის აღადგინეს, მხარეები უნდა შეთანხმებულიყვნენ მისაღებ პირობებზე: „სამსახურში აღდგენის შესახებ ბრძანება არ ნიშნავს ავტომატურად შრომითი ურთიერთობის წარმოშობას. ამის საფუძველია შრომითი ხელშეკრულება, რომელიც მხარეებს შორის უნდა გაფორმდეს“.

ლელა რაზმაძე „საქართველოს ფოსტის“ ბათუმის სერვისცენტრში 2004 წლიდან მუშაობდა. 2013 წელს რეორგანიზაციის გამო, დამსაქმებელმა მასთან ვადიანი ხელშეკრულება გააფორმა. 2013 წელს ჩატარებულ ტესტირებაში მაქსიმალური 250 ქულიდან ლელა რაზმაძემ 237 აიღო. 2014 წელს „ფოსტამ“ ლელასთან გაფორმებული ვადიანი ხელშეკრულება შეწყვიტა, თუმცა ამის მიზეზი არ განუმარტავს. სასამართლოს სამივე ინსტანცია „საქართველოს ფოსტამ“ წააგო, თუმცა აღდგენის დროს „ფოსტამ“ განმარტა, რომ თანამდებობდა, სადაც ლელა რაზმაძე მუშაობდა, აღარ ჰქონდა. დამსაქმებლის მხრიდან სასამართლოს გადაწყვეტილების აღსრულება ბათუმში მცხოვრები თანამშრომლის ხულოს სერვისცენტრში დასაქმებით გამოიხატა.

ლელა რაზმაძე გასული წლის პირველ ივლისს აღადგინეს ხულოს სერვისცენტრში. 29 ივლისს ის სამსახურიდან ხელახლა გათავისუფლდა – სამსახურში გამოუცხადებლობის გამო. მის ინტერესებს სასამართლოში პროფკავშირი იცავს.

„სასამართლო პროცესზე ფოსტის იურისტებმა მორიგება შემოგვთავაზეს. მითხრეს, რომ 6 თვის განაცთურს გადამიხდიდნენ, თუკი სამსახურში აღდგენაზე უარს ვიტყოდი. ამ პირობას არ დავთანხმდი. მირჩევნია, ან სრულად მოვიგო, ან წავაგო“, – ამბობს ლელა რაზმაძე „ბათუმელებთან“.

„საქართველოს ფოსტა“ სასამართლოში იმაზე აქცენტირებს, რომ სამსახურში აღდგენილი თანამშრომელი თბილისში, სათაო ოფისში არ გამოცხადდა, სადაც ისინი ბათუმიდან ხულოში სიარულის გამო თანამშრომელს დამატებით ანაზღაურებას მისცემდნენ.

საქმის მასალებში დევს დოკუმენტი, რომლის მიხედვითაც ბათუმიდან ხულოსკენ მიმავალი ტრანსპორტი დილით, ყველაზე ადრე – 8 საათზე გადის. ლელა რაზმაძე სამსახურში 9-ზე უნდა ყოფილიყო. ბათუმიდან ხულომდე კი მიკროავტობუსს გზაში მინიმუმ 2 საათი სჭირდება. გარდა ამისა, კანონმდებლობის მიხედვით, სამსახურში ორივე მიმართულებით მგზავრობის დრო 3 საათს არ უნდა აღემატებოდეს.

ლელა რაზმაძე არაა ერთადერთი, ვინც „საქართველოს ფოსტას“ სასამართლოში უჩივის. ბათუმიდან კიდევ 9 თანამშრომელი ხელახლა ედავება „ფოსტის“ ხელმძღვანელობას და ტოლფასს თანამდებობაზე აღდგენას მოითხოვს. ზოგიერთი მათგანი ფოსტამ შუახევში აღადგინა, ზოგი – ქობულეთში, ზოგიც – ოზურგეთში. ამ თანამშრომლების ინტერესებს „ახალგაზრდა იურისტთა ასოციაცია“ იცავს, რომლის შეფასებითაც „საქართველოს ფოსტამ“ ყოფილი თანამშრომლების სხვა მუნიციპალიტეტში აღგენით თავი აარიდა სასამართლოს გადაწყვეტილების შესრულებას და დასაქმებულები არაადამიანურ პირობებში ჩააყენა. 

2013 წელს „საქართველოს ფოსტამ“ რეორგანიზაციის მიზეზით 130 თანამშრომელი დაითხოვა. გათავისუფლებულთა ერთმა ნაწილმა სასამართლოს მიმართა. პროფესიული კავშირების ინფორმაციით, „ფოსტას“ უკანონო გადაწყვეტილებების გამო, დაახლოებით ნახევარ მილიონზე მეტი აქვს გადასახდელი განაცთურისთვის.

„საქართველოს ფოსტის“ წილის 100% სახელმწიფოს ეკუთვნის. ამ დრომდე ხელისუფლებას არ აქვს არანაირი რეაქცია იმ უკანონო გადაწყვეტილებაზე, რასაც ფოსტის ხელმძღვანელობა იღებს.

„კომენტარს ვერ გავაკეთებთ, ვიდრე სასამართლო პროცესი არ დასრულდება“, – უთხრეს „ბათუმელებს“ „საქართველოს ფოსტის“ პრესსამსახურში.

საქართველოს განათლებისა და მეცნიერების მინისტრი ალექსანდრე ჯეჯელავა დღეს, 21 იანვარს, ბათუმში საჯარო სკოლის პედაგოგებს შეხვდა. შეხვედრა ბათუმის მე-3 საჯარო სკოლაში ცოტა ხნის წინ დასრულდა.

განათლების მინისტრი პედაგოგებს განვითარების სქემაში შეტანილ ცვლილებებსა და იმ სიახლეებზე ესაუბრა, რომელიც ახალი წლიდან დაინერგება.

„ყველა ცვლილება, რომელიც განათლების სისტემაში შევა, იქნება პედაგოგზე და მოსწავლეზე ორიენტირებული“ – განაცხადა ალექსანდრე ჯეჯელავამ. მინისტრის მონოლოგის შემდეგ, პედაგოგების მხრიდან მხოლოდ ერთი შეკითხვა დაისვა.

მე-14 საჯარო სკოლის ქართული ენისა და ლიტერატურის მასწავლებელმა მინისტრს ჰკითხა: „თქვენ ამბობთ, რომ ყველა მასწავლებელი, ვინც მშობელს და მოსწავლეს არ მოსწონს, სკოლიდან უნდა წავიდეს. ჩემი მოსწავლეებიდან ნაწილს არ მოვწონვარ, იმიტომ, რომ მეტს ვითხოვ, ამის გამო ღიზიანდება მოსწავლე და არ ვუნდივარ, ამიტომ სკოლიდან უნდა წავიდე?“.

განათლების მინიტრმა მასწავლებელს უპასუხა: „თუ მოსწავლეებს არ უყვარხართ, მაშინ კი“, –  რასაც პედაგოგების აპლოდისმენტები მოჰყვა, – „ზედმეტი სიმკაცრე, მოთხოვნა აჯავრებს მოსწავლეს სწავლას. როგორც ჩანს, არ მიიღეთ ეს მოსაზრება, თუმცა, აუცილებლად წავალთ ამ მიმართულებით.  ბავშვს თუ მასწავლებელი არ უყვარს, შანსი არ არის. ძალიან მომთხოვნი მასწავლებლები ვიცი, ტყავს რომ აძრობენ მოსწავლეებს, მაგრამ 35-ივე ამბობს, რომ უყვარს და მოსწონს ეს მასწავლებელი. ამიტომ თქვენი ამოცანაა რომ ეს პრობლემა მოაგვაროთ“- განაცხადა მინისტრმა.

მინისტრის განცხადებით, სიმკაცრით ამ საუკუნეში არაფერი არ გამოვა: „ჩვენ გვჭირდება ისეთი პედაგოგები, რომლებიც სიმკაცრის და დაძალების გარეშე შეძლებენ, რომ ბავშვებმა ისწავლონ. მე თუ არ ვეყვარები ბავშვებს და მშობლებს, აღარ ვიქნები ამ თანამდებობაზე და თუ არც თქვენ ეყვარებით მოსწავლეებს, აღარ იქნებით ამ თანამდებობაზე“.

შეხვედრის შემდეგ პედაგოგებმა მინისტრთან ფოტოები გადაიღეს.

დღეს, 20 იანვარს შედგა შეხვედრა საზოგადოება „ბათომის“ წევრებსა და აჭარის მთავრობის თავმჯდომარეს, ზურაბ პატარაძეს შორის. დახურული შეხვედრის დასრულების შემდეგ „ბათუმელები“ შოთა გუჯაბიძეს ესაუბრა, საზოგადოება „ბათომის“ დამფუძნებელს.

შოთა, რაზე იყო შეხვედრაზე საუბარი?

შეხვედრა ძირითადად იყო გაცნობითი ხასიათის. ბატონმა ზურაბმა აღნიშნა, რომ ჩვენ ვართ ერთი მხარე და მოწინააღმდეგედ არ უნდა განვიხილოთ ხელისუფლება. ბოლო წლებში ბევრი მაგალითი გვქონდა, როცა ხელისუფლებისგან ვცდილობდით დაგვეცვა ძველი ბათუმი და მან აღნიშნა, რომ ეს ასე არ უნდა იყოს და ჩვენ ერთად უნდა ვიფიქროთ ამ თემაზე.

საუბრის ძირითადი ნაწილი მაინც ძველ ბათუმზე საუბარს და კამათს დაეთმო. მან თავადაც აღნიშნა, რომ ძველი ბათუმი ის აღარ არის.

იყო თუ არა საუბარი აჭარის კულტურული მემკვიდრეობის დაცვის სააგენტოს ხელმძღვანელის კანდიდატურაზე?

მან თქვა, რომ ინტენსიურად ეძებს, განიხილავს ვარიანტებს და დაახლოებით ერთ კვირაში დასახელდება სააგენტოს ხელმძღვანელი. მას კონკრეტული სახელი და გვარი არ დაუსახელებია.

თუ ისაუბრეთ  კონკრეტულ პრობლემებზე, მაგალითად, ვაჟა-ფშაველას 13 ნომერზე და სხვა, გახმაურებულ შემთხვევებზე?

მაგალითები ბევრი მოვიყვანეთ, რომ ზოგადი სურათი შეგვექმნა. ბარათაშვილის #26 ვახსენეთ ყველაზე ხშირად, რომელიც ახალი შემთხვევაა. ბევრჯერ ვახსენეთ ბათუმის ბულვარის საკითხი. საუბარი საკმაოდ მშვიდი იყო, ზრდილობიანი კამათის ფარგლებს არ გაშორებია. ბატონმა ზურაბმა გვითხრა, რომ მსგავსი შეხვედრები იქნება სისტემატიური და „ბათომის“ აზრს გაითვალისწინებს.

ამ შეხვედრამდე ათი დღით ადრე საზოგადოება „ბათომმა“ ზურაბ პატარაძეს ღია წერილით მიმართა და ბათუმის კულტურული მემკვიდრეობის დაცვასთან დაკავშირებულ პრობლემებზე შეხვედრა სთხოვა.

აჭარის უმაღლესი საბჭოს წევრის ამპლუა გასული ოთხი წლის განმავლობაში სვეტლანა კუდბას მთავარი მიზნის მიღწევაში ვერ დაეხმარა. მან ბათუმში ვერ გახსნა დღის თავშესაფარი უსალკაროებისთვის. ამის მისაღწევად ის წლების განმავლობაში იბრძოდა. ახლა საქართველოს პარლამენტისა და მმართველი გუნდის ფრაქციის წევრია. აპირებს თუ არა ისევ თავშესაფრის პროექტის ლობირებას პარლამენტში და რა გეგმები აქვს მომავალში?- ამ და სხვა თემებზე მან „ბათუმელების“ კითხვებს უპასუხა.

ქალბატონო სვეტლანა, რა მიმართულებით იმუშავებთ საქართველოს პარლამენტში?

მე ვარ ჯანდაცვისა და სოციალური საკითხების, ასევე დიასპორისა და კავკასიური საკითხების კომიტეტის წევრი. როცა უმაღლესი საბჭოს დეპუტატი ვიყავი მქონდა კანონპროექტი, რაც ზოგად ადმინისტრაციულ კანონში ცვლილებას ითვალისწინებს. ამ საკითხს დავუბრუნდი და იურისტებთან გავდივარ კონსულტაციას. კოდექსის 177-ე მუხლის მეორე პუნქტი ითვალისწინებს, რომ როდესაც განცხადება შედის ადმინისტრაციაში, თქვენ თუ არ მიიღეთ ერთი თვის ვადაში პასუხი, ეს ნიშნავს არას, უარს. მოსახლეობამ ეს არ იცის, ელოდება პასუხის და ამ ლოდინში გასაჩივრების ვადაც გადის, ვერც უჩივლებ. ვფიქრობ, ადმინისტრაციული ორგანო ვალდებულია მოქალაქეს გასცეს პასუხი, ამიტომ ვითხოვ გაუქმდეს ეს პუნქტი. ადმინისტრაციულმა ორგანომ გასცეს პასუხი, გადაამისამართოს ან მოქალაქემ იცოდეს, რომ აქვს ვადა და ამ ვადის განმავლობაში მას შეუძლია მიმართოს იმ სტრუქტურებს, რომელებიც დაეხმარება მას.

თქვენ უმაღლეს საბჭოში მუშაობისას ამბობდით, რომ არ გაკმაყოფილებდათ მოქალაქეებისთვის სტრუქტურების მიერ გაცემული პასუხების შინაარსიც.

დიახ, მართალია, როცა პასუხები მომდიოდა დავინახე, რომ ეს პასუხები იყო სტანდარტული, უმეტესობა ერთი და იმავე შინაარს შეიცავდა, იცვლებოდა მხოლოდ გვარი და თარიღი. ეს მე არ მაკმაყოფილებდა და თვითონ დავიწყე მოქალაქეებთან მისვლა. მართალი აღმოვჩნდი, რადგან, იმის გარდა, რომ გადაამისამართო ეს განცხადება, უშუალო კონტაქტის შემდეგ აღმოჩნდება, რომ გაცილებით მეტია პრობლემა, ვიდრე განცხადებაში წერია. ზოგჯერ აღმოჩნდება, რომ სულ სხვა პრობლემა აქვს და ვერ გამოხატა.

აპირებთ მოძებნოთ გზები, რომ ასეთი მიდგომა მოქალაქეების პრობლემების მიმართ შეცვალოთ?

რა თქმა უნდა ვაპირებ. ერთი განცხადებაა უკვე პარლამენტში ჩემს სახელზე შემოსული აჭარიდან. აუცილებლად გავაგრძელებ ამ საკითხებზე მუშაობას.

თქვენ დიდხანს ითხოვდით ბათუმში თავშესაფრის გახსნას, ამ საკითხის ლობრებას პარლამენტიდან შეეცდებით?

გავაგრძელებ ბრძოლას, მე ფარხმალს არ ვყრი. უბრალოდ ჯერ პირველი თვეებია, ჩემთვის პარლამენტის წევრობა არ არის იოლი, უნდა გავერკვიო სტრუქტურებში, რომ ცოტა გავძლიერდე. ფარხმალი არ დავყარე და არ ვარ თვითკმაყოფილი, რადგანაც მე პარლამენტის წევრი ვარ. სამწუხაროდ, უმაღლეს საბჭოში მუშაობის ოთხი წელი ისე გავიდა, რომ ვერ მივაღწიე თავშესაფრის გახსნას, მაგრამ კიდევ ოთხი წელი მაქვს და მე მგონია, რომ მივაღწევ. გარდა ამისა, მინდა აფხაზური კულტურისა და ფოლკლორის სახლის გახსნა აჭარაში.

დღეს, 20 იანვარს ბათუმში რამდენიმე ქუჩაზე აბონენტებს გაზის მიწოდება შეუწყდათ. „სოკარში“ ამის მიზეზად ქალაქში გზების შეკეთებისას დაზიანებულ მილს ასახელებენ.

„საგზაო კომპანიის მიერ, გზის შეკეთებისას დაზიანდა მილი და დღის ბოლომდე, თანდათან აღდგება გაზის მიწოდება“ – აცხადებენ „სოკარში“.

ხვალ, 21 იანვარს, 13:00 საათზე, ბათუმის შოთა რუსთაველის სახელმწიფო უნივერსიტეტში, აუდიტორია #21-ში, ლურჯი ფარის საქართველოს ეროვნული კომიტეტი პროექტის „კულტურული მემკვიდრეობა საფრთხის ქვეშ – სამოქალაქო საზოგადოებისა და მედიის ჩართვა“ ფარგლებში, ორგანიზაცია „ბათომთან“ ერთად საჯარო ლექციას ჩაატარებს. პროექტი დაფინანსებულია შვედეთის ინსტიტუტის მიერ.

რესტორნები და კაფეები ბათუმში საკუთარ კლიენტებს უთვალთვალებენ. ვიდეოკამერები ამ ტიპის დაწესებულების შიგნით იმდენია და ისეთ ადგილებში განთავსებული, რომ თავისუფლად შეიძლება ნებისმიერ კლიენტზე ინფორმაციის მიღება: ვის შეხვდით, ვის ესაუბრებოდით, რა მიირთვით, რა დროს… კაფე-რესტორნების მენეჯერები არ მალავენ, რომ საჭიროების შემთხვევაში ინფორმაციას ვიდეოჩანაწერების შესახებ სამართალდამცველებს აწვდიან.

„ჩვენ ყოველთვის ვეხმარებით ჩვენს პოლიციას, კანონმორჩილი ხალხი ვართ“, – გვითხრა „გარდენსის“ მენეჯერმა, დავით აბგარიანმა. ვიდეოთვალთვალის მიზეზად ის მხოლოდ უსაფრთხოების ფაქტორს ასახელებს და მიიჩნევს, რომ ამ ფორმით თავისი მომხმარებლების პირად სივრცეში კი არ იჭრება, პირიქით, მათ დაცულობაზე ზრუნავს.

„თავისთავად უსაფრთხოება არის პირველი ამოცანა, მაგალითად, თქვენ თუ სალათს მიირთმევთ, ეს არავის აინტერესებს. მაგრამ, ვთქვათ,  დაკარგეთ მობილური ტელეფონი… ყოფილა ასეთი შემთხვევა, როცა ადამიანი მოვიდა და გვითხრა, მობილური თქვენთან დამრჩაო. ვნახეთ ჩანაწერები და იქ აშკარად ჩანდა, რომ ეს ადამიანი ჯიბეში იდებს ტელეფონს და ისე გადის. დარწმუნდა, რომ ჩვენთან არ დაუკარგავს ტელეფონი…“, – გვიყვება დავით აბგარიანი.

„გარდენსის“ მენეჯერი სხვა შემთხვევასაც იხსნებს, როცა პოლიციელებს აჩვენა სათვალთვალო კამერის ჩანაწერი: „გარეთ მოხდა რაღაც ზაფხულში და პოლიციელები დაინტერესდნენ ჩანაწერით. მოგვმართეს შესაბამისი ფორმით და ვაჩვენეთ“.

რას ამბობს კანონი – „პერსონალურ მონაცემთა შესახებ საქართველოს კანონის თანხმად, ვიდეოთვალთვალი უსაფრთხოებისა და საკუთრების დაცვის მიზნით დასაშვებია, თუმცა იმ პირობით, რომ ვიდეოთვალის შესახებ გამაფრთხილებელი ნიშანი თვალსაჩინო ადგილას უნდა იყოს განთავსებული… თუ გამაფრთხილებელი ნიშანი თვალსაჩინო ადგილას არ არის განთავსებული, შესაძლოა, საქმე გვქონდეს სამართალდარღვევასთან. ვიდეოთვალთვალის კანონით დადგენილი წესების დარღვევა იწვევს გაფრთხილებას ან ფულად ჯარიმას“, – უთხრეს „ბათუმელებს“ პერსონალურ მონაცემთა დაცვის ინსპექტორის აპარატში. ინსპექტორი მსგავს სავარაუდო დარღვევებს მიმართვის შემთხვევაში სწავლობს.

„გარდენსში“ ვიდეოთვალთვალის შესახებ ინფორმაცია მხოლოდ შესასვლელ კარებთანაა განთავსებული. მენეჯერი მიიჩნევს, რომ უმჯობესია ამ ფორმით იყოს მინიშნება, რომ მოქალაქეებმა დისკომფორტი არ იგრძნონ: „ადამიანი, როცა შემოდის, ჩანს… ყველა მაგიდასთან რომ იყოს მინიშნება, ან დარბაზში, თქვენ ეს გესიამოვნებათ?… მესმის, რაც გაინტერესებთ, მაგრამ თუ რამეს ვარღვევ, ეს უნდა მითხრას სახელმწიფომ და არა ჟურნალისტმა. ტურიზმის დეპარტამენტმა კი, გასულ წელს საუკეთესო მომსახურების ხარისხის გამო სპეციალური სიგელი მოგვანიჭა“.

მინიშნება საერთოდ არ აქვს და მთელ დარბაზს აკონტროლებს BK-ში განთავსებული ვიდეოკამერები. აქაც ვიდეოთვალთვალის მიზეზად უსაფრთხოება დაგვისახელეს და გვითხრეს, რომ მინიშნება საჭირო არ არის, რადგან კამერები ყველგან გვიღებენ.

„ისედაც ჩანს, რომ კამერები გვაქვს და ყველა ადამიანმა იცის, რომ ასეთ დაწესებულებებში არსებობს ვიდეოთვალთვალი. შესაძლოა, იყოს მითითებული, ამის წინააღმდეგიც არ ვარ და შევთავაზებ ამ წინადადებას მესაკუთრეს,“ – გვითხრა ია დუმბაძემ, BK-ის მენეჯერმა.

კითხვაზე, რა გამორიცხავს ადამიანების ფარულ კონტროლს, როცა ვიდეოსათვალთვალო კამერები აფიქსირებენ ყველაფერს და  ჩანაწერებზე წვდომა აქვთ სამართალდამცველებსაც? – ია დუმბაძემ რისკის გამომრიცხავი ფაქტორი ვერ დაგვისახელა. გვითხრა, რომ სამართალდამცველები ვიდეოჩანაწერზე წვდომის უფლებას მხოლოდ სპეციალური მიმართვის შემთხვევაში მოიპოვებენ, სხვა ადამიანებს კი, ჩანაწერზე წვდომის უფლება არ აქვთ.

ვიდეოსათვალთვალო კამერები დააფიქსირებენ თქვენს ნებისმიერ მოქმედებას რესტორან „ასკანელში“. აქაც ვიდეოკონტროლის მიზნად უსაფრთხოება დაგვისახელეს და მაგალითიც იგივე მოგვიყვანეს – „იქნებ მობილური ტელეფონი გაგვებნას“.

„ყოფილა ასეთი შემთხვევა, როცა კლიენტი ვეღარ პოულობდა მობილურს. გადავახვიეთ ჩანაწერი და ვნახეთ, სად დადო ტელეფონი. კამერები კარგია ასევე სამზარეულოს კონტროლისთვის, ვთქვათ, თქვენს მაგიდასთან არ მოვიდა რომელიმე კერძი, ან გაქრა მაგიდიდან რაღაც… კლიენტებს პირიქით უხარიათ, რომ გვაქვს ვიდეოთვალი და დაცულია უსაფრთხოების ნორმები,“ – გვითხრა ია ღაღაიშვილმა, „ასკანელის“ მენეჯერმა.

მოქალაქეთა ინფორმირებულობის პრობლემას ხედავს ფონდი „ღია საზოგადოება საქართველოს“ იურისტი გიორგი ჩიტიძე. იგი მიიჩნევს, რომ საკანონმდებლო მექანიზმი უკვე არსებობს იმისთვის, რომ პირადი სივრცე დაცული იყოს. მთავარია, მომხმარებელმა პერსონალურ მონაცემთა დაცვის ინსპექტორს მიმართოს, თუკი კაფეში, ან რესტორანში დააფიქსირებს, რომ უღებენ და ამის შესახებ მან არ იცოდა:

„საქმე გვაქვს უფრო კერძო მესაკუთრეების მხრიდან პრაქტიკის გაუთვალისწინებლობასთან და კანონის სავარაუდო დარღვევასთან. თუკი მომხმარებლები მიმართავენ მონაცემთა დაცვის ინსპექტორს, ამ შემთხვევაში აუცილებლად შეისწავლიან თითოეული ობიექტის ვითარებას და დაჯარიმდება მესაკუთრე, თუკი მას მკაფიოდ არ აქვს მინიშნებული ვიდეო კონტროლის შესახებ. აუცილებელია, მინიშნება იყო თვალსაჩინო ადგილას გამოკრული და მკაფიო“.

„არ ვიცოდი, თუ ვიდეო კონტროლი არსებობდა რომელიმე კაფეში, არასდროს შემიმჩნევია“, – გვითხრა ტურიზმის სპეციალისტმა, ზვიად ელიზიანმა. იგი ამბობს, რომ ადამიანებს უნდა შეეძლოთ თვალთვალის გარეშე კაფეში შეხვედრა. მისი აზრით, კაფეების მენეჯერები არასდროს არ გამოაკრავენ მკაფიო მინიშნებას ამის შესახებ, თუკი კანონის მოთხოვნა მკაცრი არ იქნება:

„მენეჯერებს, რა თქმა უნდა, ეს არ აწყობთ. არავის სიამოვნებს, როცა ეუბნები, რომ ვიდეოთი გაფიქსირებენ. ფაქტია, რომ ეს ბევრ კლიენტს დააფრთხობს, მაგრამ მოქალაქეებს აქვთ უფლება იცოდნენ, თუნდაც ის, რომ უსაფრთხოების მიზნებიდან გამომდინარე, ამა თუ იმ დარბაზში გვაფიქსირებს ვიდეოკამერა“.

მიიღეთ მონაწილეობა „ბათუმელების“ გამოკითხვაში. 

იცით თუ არა, რომ ზოგიერთ კაფეში ვიდეოკონტროლია?
მისაღებია თუ არა თქვენთვის კაფეში ვიდეოკონტროლი?

შეხვალთ თუ არა კაფეში, სადაც იცით, რომ გითვალთვალებენ?

ბათუმის, ხელვაჩაურისა და ქობულეთის მუნიციპალიტეტების საბავშვო ბაღებში აღმზრდელობითი პროცესი ორშაბათს, 23 იანვარს, განახლდება.

როგორც „ბათუმელებს“ მუნიციპალიტეტების ბაღების გაერთიანებაში უთხრეს, სასწავლო-აღმზრდელობითი პროცესი ყველა მუნიციპალურ საბავშვო ბაღში დაიწყება. ბათუმში სულ 30 ბაღია, ხელვაჩაურში – 13, ქობულეთში კი – 22.

სასწავლო პროცესი 23 იანვარს განახლდება მაღალმთიანი აჭარის  ორ მუნიციპალიტეტში, შუახევისა და ხულოს საბავშო ბაღებში,  ხოლო ქედაში ჯერ კიდევ არ იციან როდის შეძლებენ ბავშვების მიღებას, რადგან საკვებ პროდუქტზე გამოცხადებული ტენდერი ჩავარდა.

ქედის ბაგა-ბაღების გაერთიანების დირექტორის აიშე თებიძის ინფორმაციით, თუ შესყიდვების სააგენტო ბაღების გაერთიანებას უფლებას დართავს პურ-ფუნთუშეული გამარტივებული წესით, ერთ პირთან მოლაპარაკებით შეისყიდოს, მაშინ  ბაღები მუშაობას ქედაშიც 23 იანვარს დაიწყებენ.

„საკვებ პროდუქტზე გამოცხადებული ტენდერი ჩავარდა, შესყიდვების სააგენტოს მივმართეთ წერილობით, რომ ერთ პირთან მოლაპარაკებით, დაგვრთოს საკვების შეძენის უფლება.  სააგენტოდან პასუხს დღის მეორე ნახევარში მივიღებთ. თუ დაგვთანხმდებიან, სასწავლო პროცესს 23 იანვარს განვაახლებთ, წინააღმდეგ შემთხვევაში ერთი კვირით გადაიდება,“ – ამბობს აიშე თებიძე.

ქედის ბაგა-ბაღების გაერთიანების მიერ გამოცხადებულ ორ ტენდერში მონაწილეობის სურვილი არც ერთმა კომპანიამ არ გამოთქვა. 10 იანვარს გამოცხადებული ტენდერის სავარაუდო ღირებულება 16 600 ლარი იყო, ამ თანხით გაერთიანებას მაკარონი, შაქარი, პურ-ფუნთუშეული და სხვა საკვები პროდუქტები უნდა შეეძინა.  ჩავარდა ქათმის კვერცხზე გამოცხადებული ელექტრონული ტენდერიც, რომლის ღირებულება 3 680 ლარი იყო.

ქედაში სულ 15 ბაღია, შუახევში – 6, ხულოში კი – 13.