Batumelebi | შუახევის სოფლებში მაწანწალა ძაღლების გაყვანას ითხოვენ შუახევის სოფლებში მაწანწალა ძაღლების გაყვანას ითხოვენ – Batumelebi

შუახევის სოფლებში მაწანწალა ძაღლების გაყვანას ითხოვენ

შუახევში მოსახლეობა მაწანწალა ძაღლების უსაფრთხო ადგილზე გადაყვანას ითხოვს.

შუახევის მუნიციპალიტეტის გამგეობა უპატრონო, მაწანწალა ცხოველების ბათუმის ცხოველთა თავშესაფარში გადაყვანის პროგრამას ახორციელებს, თუმცა პროგრამა მხოლოდ დაბა შუახევსა და ხიჭაურის ტერიტორიაზე მყოფი მაწანწალა ძაღლების ბათუმის თავშესაფარში გადაყვანაა გაწერილი.

შუახევის მუნიციპალიტეტის გამგეობის ინფრასტრუქტურის სამსახურის უფროსი ედნარ შარაშიძე ამბობს, რომ აღნიშნული პროგრამის ბიუჯეტის 3 000 ლარამდე გაზრდა აქვთ დაგეგმილი, გაზრდილი თანხა კი სოფლებიდან ძაღლების უსაფრთხო ადგილზე გადაყვანას მოხმარდება.

„პროგრამის განსახორციელებლად წელს  5 000 ლარი გავითვალისწინეთ, ტენდერი დაბა შუახევსა და  ხიჭაურიდან 88 მაწანწალა ძაღლის გადაყვანაზე გამოვაცხადეთ, თუმცა აღნიშნულ ადგილებში მაწანწალა ძაღლების რაოდენობა გაცილებით მეტია,  150 – მდე აღწევს, რადგან სოფლებიდან ჩამოჰყავთ მაწანწალა ძაღლები და დაბებში ტოვებენ.   სოფლებიდან – ნაღვარევიდან, ბრილიდან, ხაბელაშვილებიდან, ქიძინიძეებიდან, ოლადაურიდან, მახალაკიძეებიდან და ცინარეთიდან მოსახლეობამ თხოვნით მოგვმართა  მაწანწალა ძაღლები გავიყვანოთ სოფლებიდან“ – ამბობს ედნარ შარაშიძე.

ჯერჯერობით გაურკვეველია ვინ გადაიყვანს შუახევიდან უპატრონო ცხოველებს ბათუმში. ტენდერი არ შედგა, რადგან მასში მონაწილეობა არც ერთმა კომპანიამ არ მიიღო.

ედნარ შარაშიძე ამბობს, რომ ტენდერს განმეორებით გამოაცხადებენ, ხოლო სოფლებიდან ძაღლებს მას შემდეგ გაიყვანენ, როცა საკრებულოსგან პროგრამის – „უპატრონო, მაწანწალა ძაღლების თავშესაფარში გადაყვანის“ დაფინასების გაზრდის თანხმობას მიიღებენ.

 

ნეტგაზეთის მასალების სხვა გამოცემებში გადაბეჭდვის წესი
ავტორი