„ბათუმელების“ ინფორმაციით, რამდენიმე წუთის წინ ქუთაისი-ბათუმის მიმართულებით მოძრავი საგარეუბნო მატარებელი ურეკში მამაკაცს დაეჯახა. მგზავრებით სავსე მატარებელი ამ დრომდე გაჩერებულია სადგურ „ურეკის“ მიმდებარედ.
შემთხვევის ადგილზე გაჩერებული სამგზავრო მატარებელი
ერთ-ერთი მგზავრის თქმით, ადგილზე იმყოფებოდნენ სასწრაფო და საპატრულო პოლიციის ბრიგადები: „აქ ამბობენ, რომ მამაკაცი, რომელსაც მატარებელი დაეჯახა 60-65 წლის იქნებოდა და სავარაუდოდ, გარდაიცვალა… მგზავრებს ჯერ გვითხრეს, რომ მატარებელი ნახევარი საათის შემდეგ დაიძვრება ადგილიდან, ახლა ამბობენ, რომ რაღაც საგამოძიებო ღონისძიება მიმდინარეობს და შესაძლოა საათნახევარი ან ორი საათი ვერ გავიდეთ ამ ადგილიდან“.
„ბათუმელები“ „საქართველოს რკინიგზას“ დაუკავშირდა. პრესსამსახურში გვითხრეს, რომ ინფორმაციას დააზუსტებენ და დაგვიკავშირდებიან.
„საქართველოს რკინიგზის“ კომენტარს მოგვიანებით მოგაწვდით.
შინაგან საქმეთა სამინისტროში კი ფაქტი დაგვიდასტურეს. „შემთხვევის შედეგად გარდაცვლილია ასაკოვანი მამაკაცი. გამოძიება დაწყებულია სს კოდექსის 275-ე მუხლის პირველი ნაწილით, რაც რკინიგზის უსაფრთხოების ან ექსპლუატაციის წესების დარღვევას გულისხმობს, რამაც ადამიანის სიცოცხლის მოსპობა გამოიწვია“ – გვითხრეს შს სამინისტროს პრესსამსახურში.
