ბათუმის საქალაქო სასამართლომ განზრახ მკვლელობის მცდელობაში ბრალდებულ ი.ა.-ს წინასწარი პატიმრობა შეუფარდა. საუბარია მიმდინარე წლის 17 ივლისს თხილნარის ერთ-ერთ რესტორანში ახალგაზრდა მამაკაცის დაჭრაზე, რომლის მდგომარეობაც ამ დრომდე მძიმეა.
ბრალდებული, ვისაც დღეს მოსამართლე გიორგი გრატიაშვილმა წინასწარი პატიმრობა შეუფარდა, პოლიციამ მეორე დღესვე დააკავა. დღეს, 19 ივლისს პოლიციაში სხვა ახალგაზრდა გამოცხადდა, ვინც თქვა, რომ დანაშაული მან ჩაიდინა და თავად უნდა აგოს პასუხი. მიუხედავად იმისა, რომ სასამართლოს, ადვოკატმა ზვიად მარკოიძემ ამ პირის გამოკითხვის ოქმი წარუდგინა, მოსამართლე გიორგი გრატიაშვილი მაინც ამოცნობის ოქმს დაეყრდნო, სადაც ბრალდებულს დაადეს ხელი.
„ამ შემთხვევაში სასამართლოს შეეძლო მინიმუმ გირაო შეეფარდებია აღმკვეთის ღონისძიებად, რადგან სხვა პირი ამბობს, დანაშაული მე ჩავიდინეო. შემთხვევა დაახლოებით საღამოს 11 საათზე მოხდა ცეკვის დროს და დაჭრას 20-მდე თვითმხილველი ჰყავს. ისინი დაუდასტურებენ სასამართლოს, რომ ბრალდებული უდანაშაულოა“, – უთხრა ადვოკატმა ზვიად მარკოიძემ „ბათუმელებს“.
