Batumelebi

ბათუმში ანიმაციური ფილმების მეცხრე საერთაშორისო ფესტივალი „თოფუზი” მიმდინარეობს.  ფესტივალი 2 ოქტომბერს დაიწყო ხულოში, ქედასა და ქობულეთში ფილმების ჩვენებით, 5 ოქტომბერს კი ბათუმში გადმოინაცვლა. „ბათუმელები“ გთავაზობთ 6-7 ოქტომბრის საფესტივალო პროგრამას. ანიმაციური ფილმების ჩვენებაზე დასწრება უფასოა.

6 ოქტომბერი, პარასკევი

ბათუმის თოჯინების თეატრი, 12 საათზე:

საუკეთესო საბავშვო ფილმი; ჰელუ ბერლუ; სახე; ქარი ჩალებში; ნეგატიური სივრცე; თხები; კავშირი; წარმოსახვა; ღილაკი.

ბათუმის თოჯინების თეატრი, 14 საათზე:

საუკეთესო საბავშვო ფილმი; კურდღლები 10. ვინ მოიპარა ჩიტის სახლი; მთვარის გოგონა; პატარა არსება; მიწა ბოროტების გარეშე; ახალი ჩანაწერი; ცდა და შეცდომა; ბებია; მარტორქა; ეთნოფობია.

ბათუმის თოჯინების თეატრი, 16 საათზე:

საუკეთესო საბავშვო ფილმი; ჰელუ ბერლუ; სახე; ქარი ჩალებში; ნეგატიური სივრცე; თხები; კავშირი; წარმოსახვა; ღილაკი.

ბათუმის ხელოვნების უნივერსიტეტი, 17:00 საათზე:

საუკეთესო სტუდენტური ფილმი; აპრიორი; დატოვე ანაბეჭდი; პენელოპა; დამბლა; ცეცხლის დღესასწაული; სახლში აღზრდილი; ოჰ, დედა!; ღამე მშვიდობისა ყველას!; ცა ჩვენს შორის; ყუთი.

ბათუმის ხელოვნების უნივერსიტეტი, 19 საათზე:

საუკეთესო სტუდენტური ფილმი; წინააღმდეგობის გადალახვა; 0 გრადუსზე ქვევით; გზიდან აცდენილი; წვერი; როგორც პატარა ჩიტი, მე…; მექანიკური; ცისფერი ნოტა; მე მინდა…; მუკო; ბაოზა; შერლოტი; მგზავრი.

7 ოქტომბერი, შაბათი 

ბათუმის თოჯინების თეატრი, 10 საათზე

ექო თოფუზის ვორქშოფზე შექმნილი ფილმები.

ბათუმის ხელოვნების უნივერსიტეტი, 10 საათზე

ბავშვების მიერ შექმნილი ფილმები; საუკეთესო საბავშვო ფილმი.

ფილმების ჩვენების გარდა ფესტივალის ფარგლებში ბათუმში არაერთი ვორქშოპი გაიმართება. „თოფუზი“ 7 ოქტომბერს, ბათუმის თოჯინების და მოზარდმაყურებელთა თეატრში 20 საათზე დაიხურება.

ფესტივალის მიზანია ქართული ანიმაციური ფილმწარმოების განვითარებაა საქართველოში და შემდეგ მისი ინტეგრაცია მსოფლიოში.

საკონკურსო კატეგორიაში გასულ ფილმებს ორი ჟიური ექვს კატეგორიაში შეაფასებს: საბავშვო ჟიური გამოავლენს გამარჯვებულს ნომინაციაში „საუკეთესო საბავშვო ფილმი”, საერთაშორისო ჟიური კი დაასახელებს გრანპრის მფლობელსა და გამარჯვებულებს ნომინაციებში: „საუკეთესო ფილმი უფროსებისთვის”, „საუკეთესო სტუდენტური ფილმი”, „ბავშვების მიერ შექმნილი საუკეთესო ფილმი”, „საუკეთესო დებიუტი” და „საუკეთესი ტელესერიალი”. გარდა ამისა, გამოვლინდებიან საუკეთესო რეჟისორი, საუკეთესო სცენარისტი, საუკეთესო მუსიკის ავტორი და საუკეთესო ტექნიკით შესრულებული ფილმი.

ანიმაციური ფილმების საერთაშორისო ფესტივალ „თოფუზის” ორგანიზატორია ანიმაციის განვითარების ფონდი. ფესტივალი იმართება საქართველოს კულტურისა და ძეგლთა დაცვის სამინისტროს, აჭარის ავტონომიური რესპუბლიკის განათლების, კულტურისა და სპორტის სამინისტროს, ქალაქ ბათუმის მერიის, კინემატოგრაფიის ეროვნული ცენტრის, შპს „მიფასის“ მხარდაჭერით.

„ნაციონალური მოძრაობის“ ორად გაყოფის შემდეგ პეტრე ზამბახიძე პარტიიდან წასულებს, უგულავა-ბოკერიას ფლანგს შეუერთდა. მათ საკუთარი პარტია – „ევროპული საქართველო“ შექმნეს.

პარტია, რომელთანაც წლების მანძილზე ურთიერთობა აკავშირებდა, მისივე განმარტებით,  რიგ საკითხებთან მიმართებაში „განსხვავებული პოზიციების გამო“ დატოვა. 2012 წლამდე პეტრე ზამბახიძე „ნაციონალური მოძრაობის“ კვოტით სამი მოწვევის უმაღლესი წევრი იყო. ბოლო მოწვევის უმაღლეს საბჭოშიც ის ამ პარტიის კვოტით მოხვდა. 2017 წლის 21 ოქტომბრის თვითმმართველობის არჩევნებზე  პეტრე ზამბახიძე „ევროპული საქართველოს“  ბათუმის მერობის კანდიდატია, ყოფილი თავისი პარტიიდან მას ლევან ანთაძე  უწევს კონკურენციას.

ბატონო პეტრე, რატომ უნდა ავირჩიოთ ევროპული საქართველო, ამ პარტიის ლიდერებმა ხომ იგივე გზა გაიარეს, რაც „ნაციონალური მოძრაობის“ ლიდერებმა?

ჩვენი გაერთიანება ევროპული ღირებულებების პოლიტიკური გაერთიანებაა, რომლის ძირითადი მიზანია პროფესიონალები მოვიდნენ თვითმმართველობაში მაღალ თანამდებობებზე. მათ შორის აღმასრულებელ ხელისუფლებაში უნდა მოვიდნენ ადამიანები, რომლებსაც აქვთ  პატიოსანი ადამიანის რეპუტაცია. ჩვენი მთავარი მესიჯია აღმოვფხვრათ კორუფცია ბათუმის მერიაში და პროფესიონალებს მიეცეთ საქმის კეთების საშუალება. ჩვენი გეგმა და შეთავაზება არის რეალისტური და არასდროს  დავემსგავსებით დღევანდელ ხელისუფლებას, რომელმაც უამრავი დაპირება მისცა საზოგადოებას, მაგრამ ძირითადი მათგანი არ შეასრულა.

თქვენი მთავარი დაპირება რა არის?

ქალაქისთვის მნიშვნელოვანია ინფრასტრუქტურის მოწესრიგება იმ ნაწილში, სადაც არც ერთ დროს არ მომხდარა განვითარება და გზების კეთილმოწყობა, ისევე როგორც ქუჩების და ეზოების მოწყობა და რეაბილიტაცია. ჩვენი მნიშვნელოვანი გადაწყვეტილებაა ასევე, გამარჯვების შემთხვევაში, ადგილობრივი ბიუჯეტიდან გაკეთდეს გონიოსთან დამაკავშირებელი ხიდი, რომელიც მნიშვნელოვან წვლილს შეიტანს ჩვენი ქალაქის საინვესტიციო პოტენციალის ზრდაში, ისევე როგორც ახალი სამუშაო ადგილების შექმნაში. ბულვარის გაგრძელებამ თავის დროზე საზოგადოებას დაანახა, რომ ტურისტების რაოდენობა გაიზარდა. ამ მზარდი პოტენციალის გამოყენება იქნება  ბულვარის გაგრძელება კვარიათამდე, გონიოს ყოფილი პოლიგონის გამოყენებას ვგეგმავთ საინვესტიციოდ. თვითმმართველობის ბიუჯეტი მოიზიდავს ინვესტიციებს, შექმნის სამუშაო ადგილებს და ცოტათი მაინც გააუმჯობესებს პირობებს იქ დასაქმებული ადამიანებისთვის.

მეორე მნიშვნელოვანი პროექტი არის სპორტული მოედნებისა და სტადიონების რეაბილიტაცია. ასევე, მთავარი დაპირება, რაც ჩვენ გვაქვს, არის ზრუნვა იმ ადამიანებზე, რომლებიც  გაუსაძლის პირობებში, ე.წ „მუყაოს ქალაქში“ ცხოვრობენ.  ჩვენ მათ შევთავაზებთ დახმარებას ბიუჯეტიდან. ბიუჯეტი  ბათუმის მუნიციპალიტეტში არის ძალიან მაღალი, უბრალოდ ეფექტურად არ იხარჯება და, ძირითადად, ფუფუნებისთვის, ცალკეული ისეთი ღონისძიებების მოწყობაზეა მიმართული, რაც სიცილსაც კი იწვევდა. პირველ ეტაპზე  ავაშენებთ სოციალურ სახლებს  იმ ადამიანებისთვის, რომლებსაც უმძიმესი პირობები აქვთ. გარდა ამისა, არიან ადამიანები, რომლებსაც საკუთრება გაფორმებული არა აქვთ და ბევრი სხვა პრობლემაა. ძალიან მნიშვნელოვანია ასევე ცვლილება საპენსიო ზრდის თვალსაზრისით.  ჩვენ ბიუჯეტიდან შევძლებთ ბათუმში, ისევე როგორც სხვა მუნიციპალიტეტებში, დავაწესოთ პენსიაზე თვითმმართველობის დანამატი.

მაინც რა ოდენობის დანამატზე საუბრობთ?

50 ლარის დანამატზე ბათუმში მცხოვრები პენსიონერებისთვის,  ეს არის აუცილებლად გასაკეთებელი.

დათვლილი გაქვთ ამ ყველაფერს რა თანხა სჭირდება და რამდენად რეალურია ეს?

ჩვენ ზუსტად ვიცით ის პროგრამები და ყველა პარამეტრი, რაც აუცილებელია ასეთი ტიპის ხარჯების დაფინანსებისთვის.  სამწუხაროდ, ამას არ ანგარიშობს და არ ითვლის არც ერთი სხვა პოლიტიკური გაერთიანება, მით უმეტეს ხელისუფლება. შემიძლია ცალსახად გითხრათ, რომ დღეს აჭარაში და ბათუმში დარჩენილი ბიუჯეტის ძირითადი ნაწილის მიზნობრივად და ეფექტურად გამოყენება შესაძლებელია და ეს ხარჯები იქნება დაფინანსებადი.

მაგალითისთვის შემიძლია გითხრათ, რომ ბათუმის ბიუჯეტის სამოცდაათი პროცენტი ნაშთის სახით რჩება აჭარის ბიუჯეტში. ყველა ამ კომპონენტის გათვალისწინებით აბსოლუტურად შესაძლებელია იმ პრობლემების მოგვარება, რაც მოსახლეობას აქვს. ვგეგმავთ ხელფასების ზრდას იმ ადამიანებისთვის, რომლებიც მუშაობენ თვითმმართველობის დაბალ საფეხურზე, რომლებიც დასაქმებულები არიან განათლების, ხელოვნებისა და ასეთი ტიპის დაწესებულებებში. ესენი არიან ბაღის მასწავლებლები და შემოქმედებითი მუშაკები, სპორტის მესვეურები და ავტობუსების გამცილებლები, მეეზოვეები… მეეზოვეებს უწევთ უმძიმეს პირობებში მუშაობა – სიცხეში და სიცივეში, მაგრამ მათი ანაზღაურება მერყეობს 250-ლარიდან 500 ლარამდე. ამ ადამიანების მხარდაჭერა არის უპირველესი საზრუნავი თვითმმართველობისთვის. გამარჯვების შემთხვევაში ჩვენ საზოგადოების ჩართულობითა და არასამთავრობო ორგანიზაციებთან კომუნიკაციით შევძლებთ ასეთი ტიპის პრობლემების უფრო მეტად გამოკვეთას, მიზნობრივ ჯგუფებამდე მიტანას და მათი პირობების გაუმჯობესებას.

ასევე მნიშვნელოვანია ღია მმართველობა, რასაც ჩვენ ვპირდებით მოსახლეობას. ქალაქის მერი არ იქნება კაბინეტში ჩაკეტილი და არც მხოლოდ ძვირადღირებული ღონისძიებების სტუმარ-მასპინძელი. ქალაქის მერი იქნება თითოეულ  უბანში, ქუჩაში და ყოველდღიურად. ქალაქის მერის მობილურის ნომერი ექნება ყველას.

ანუ მერობის შემთხვევაში ყველა ზარს უპასუხებთ, ამას ჰპირდებით ამომრჩეველს?

რა თქმა უნდა, თორმეტი წელია ეს ნომერი მაქვს, თუმცა ხანდახან ტელეფონი ითიშება. მინდა გითხრათ ასევე, რომ ჩვენ გვაქვს ძალიან ბევრი ახალგაზრდული პროექტი, რომელიც ჩვენს ქალაქს, ჩვენს თვითმმართველობას აუცილებლად სჭირდება. ჩვენს მიზნებშია ასევე გარემოს ადაპტირება და უსინათლოების უფლებების დაცვა.

კიდევ ერთი ძალიან მნიშვნელოვანი პროექტი, რაც ჩვენ გვაქვს, არის ის, რომ განვითარების პირობებში საჭიროა როგორც სასწრაფო დახმარების, ასევე სახანძროს ახალი კერები. ამ თვალსაზრისით ჩვენ ვფიქრობთ გავიზიაროთ ის პრაქტიკა, რაც არის ევროპის ქვეყნებში. მუნიციპალური ბიუჯეტიდან შევისყიდით სატრანსპორტო საშუალებებს, პირველ რიგში საჭიროა კიბე, რომელიც მრავალსართულიანი მშენებლობის პირობებში ქალაქს უნდა გააჩნდეს. საჭიროა ხანძრის ჩაქრობის ეფექტური საშუალებები. სამწუხაროდ, ეს პარკი არ არის განახლებული, ისევე როგორც ძალიან მნიშვნელოვანია ავტობუსების პარკის განახლება. ამ ყველაფერს  მოქმედი ხელისუფლებაც დაჰპირდა მოსახლეობას, მაგრამ არ შეუსრულა.

და თქვნ შეასრულეთ, როცა ხელისუფლებაში იყავით?

მანამდე? – არასწორია. ეს არის ოთხწლიანი გეგმა. თუ თქვენ რეალურად გადაავლებთ თვალს, რაც გაკეთდა, შეგიძლიათ შეადაროთ იმ განვითარებას, ან შეჩერებას, რაც ამ ბოლო  სამი წლის განმავლობაში იყო. ნებისმიერი სამი წელი შეადარეთ მანამდელ სამ წელს. რაც ადრე არ გაკეთდა, რა თქმა უნდა, ცუდია, მაგრამ მე გეუბნებით რეალურ ოთხწლიან გეგმაზე, მაგრამ ოთხი წლის განმავლობაშიც შეიძლება ყველაფერი ვერ გაკეთდეს. ერთხელ გაკეთდეს და დამთავრდეს – ასეთი რამე არ ხდება, ქალაქი ცოცხალი მექანიზმია.

ქალაქში მნიშვნელოვან პრობლემაა დაუგეგმავი მშენებლობა და კულტურული მემკვიდრეობის დაცვა, ამ მხრივ მაშინაც იყო პრობლემები, როცა თქვენ  მმართველ პარტიაში იყავით… 

მომეცით უფლება ვთქვა, რომ ამ პერიოდში თუნდაც ორ და სამსართულიან ძველ სახლებს ზემოდან აშენებენ, ამორტიზებულ სახლებს თუნდაც გამაგრების პირობებში. ეს არის  მიუღებელი. ეს ცვლის გარემოს და პარკირების პრობლემა ასეთ დროს კიდევ უფრო მწვავე ხდება. ჩვენ გეგმაში გვაქვს ქალაქის განვითარების გეგმის მომზადება და მისი დამტკიცება. ოღონდ k2 კოეფიციენტის ცვლილება მეგობრობით და ნაცნობობით არ უნდა ხდებოდეს, არამედ საერთოდ არ უნდა ხდებოდეს. უნდა იყოს ერთიანი წესი ყველასთვის.  მათ შორის იმ ადამიანების ინტერესებიც უნდა გავითვალისწინოთ, რომლებიც ინვესტორის მოლოდინში არიან, მაგრამ ქალაქის განვითარება, ინვესტორები და გაუსაძლის პირობებში მცხოვრები ადამიანები – ეს კომპონენტები ერთიანობაში უნდა განვიხილოთ. ცალსახად შემიძლია ვთქვა, რომ ძველ ბათუმში მაღალსართულიანი სახლები არ უნდა შენდებოდეს.

იმ ძეგლებზე რას იტყვით, რომელებიც არ არის სახელმწიფოს საკუთრებაში და დანგრევის პირასაა?

მათზე უნდა იზრუნოს სახელმწიფომ – თვითმმართველობამ სხვადასხვა პროექტით უნდა მოაწესრიგოს ისე, რომ ეს სახლები საცხოვრებლად იყოს ნორმალური. ეს იმ შემთხვევაში, როცა იქ ინვესტორის ინტერესი ნაკლებია.

თუ შეიძლება დააზუსტეთ – ამ დრომდე და წინა ხელისუფლებაშიც ინვესტიციის შემოსვლა კულტურული მემკვიდრეობის ხარჯზე არასწორი იყო? 

რა თქმა უნდა. ამას ადრეც ვამბობდი, არ მომწონდა. ვფიქრობ, ჩვენ ინვესტიციების შემოსვლასაც ხელს შევუწყობთ და განვავითარებთ ბათუმს იმ ნაწილში, სადაც მართლა საჭიროებს განვითარებას.

მშენებლობები ისევ ისე უნდა გაგრძელდეს ქალაქში, თუ შეცვლით რამეს?

ქალაქი უნდა განვითარდეს, მაგრამ ამ განვითარებამ არ უნდა შექმნას განუვითარებლობის შთაბეჭდილება. არ უნდა შეიქმნას ქალაქში ჰაერისა და მზის სხივების მოძრაობის პრობლემა.

სანამ „ქართული ოცნება“ შუახევის 2017 წლის თვითმმართველობის არჩევნებზე მერობის კანდიდატად წარადგენდა, ფრიდონ ფუტკარაძე შს სამინისტროს აჭარის პოლიციის დეპარტამენტის დირექტორის მოადგილედ მუშაობდა. ძალოვან უწყებაში  ფრიდონ ფუტკარაძე 2004 წლიდან მუშაობს. რას ჰპირდება ყოფილი პოლიციელი შუახეველ ამომრჩეველს და რატომ გადაწყვიტა შსს-დან თვითმმართველობაში გადანაცვლება? მერობის კანდიდატი „ბათუმელების“ კითხვებს პასუხობს.

ბატონო ფრიდონ, 14 წელია პოლიციაში მუშაობთ და რატომ გადაწყვიტეთ თვითმმართველობაში გადასვლა. რატომ გახდა მერის თანამდებობა თქვენთვის საინტერესო?

სანამ პოლიციაში დავიწყებდი მუშაობას, მანამდე ვიყავი პედაგოგი, შემდეგ კი მუნიციპალიტეტის გამგეობაში 7 წელი იურიდიული სამსახურის უფროსი. იქედან პროკურატურაში გადავედი, სადაც განხორციელდა რეფორმა და პროკურატურის რაღაც ნაწილი შეუერთდა შსს-ს. ასე მოვხვდი შსს-ში. იურისტი ვარ პროფესიით და შსს და პროკურატურაც ერთ-ერთი მიმართულებაა  სამართლის დარგის. მანამდე მოსამართლის თანაშემწეს გამოცდები მაქვს ჩაბარებული, ადვიკატურის… მე კომფორტულად ვგრძნობდი ყველგან თავს.

და რომელია რეალურად თქვენი სფერო, პოლიცია თუ თვითმმართველობა?

თვითმმართველობაშიც მაქვს გამოცდილება.

ძალოვანი უწყება სხვა სისტემაა, ვერტიკალური მმართველობა ახასიათებს, თვითმმართველობა სულ სხვაა და რატომ გაგიჩნდათ სფეროს შეცვლის სურვილი?

მე მქონდა შემოთავაზება პოლიტიკური გუნდის მიერ და ჩავთვალე საჭიროდ, რომ ჩემი მუნიციპალიტეტისთვის და ხალხისთვის ამ პოზიციიდან უფრო მეტს გავაკეთებდი.

დღეს ძალიან ბევრი კრიტიკა ისმის იმაზე, რომ მმართველმა პარტიამ კი არ გააძლიერა თვითმმართველობა, არამედ, პირიქით, დაასუსტა. ამის მაგალითია თუნდაც  საკრებულოს გადაწყვეტილებები, რომელიც აღმასრულებელი ხელისუფლების კარნახით ხდება. თქვენ რამდენად იქნებით დამოუკიდებელი მერი და არ იქნებით გავლენიანი ჩინოვნიკების მითითებების შემსრულებელი?

არ ვიქნები, რადგან მე ვიქნები დავალებების შემსრულებელი იმ ადამიანების, ვისაც ვხვდები და ვისთან ერთადაც უნდა გავიარო თითოეული პრობლემა თუ საკითხი. კი არის პოლიცია და თვითმმართველობა განსხვავებული სფეროები, მაგრამ მე ყველაფერზე მაქვს ჩემი შეხედულება. მყავს მეგობრები, რომლებიც ძალიან კარგი სპეციალისტები არიან… კონკრეტულ სოფელში თუკი რაიმე პრობლემა არის გადასაჭრელი, იქ მაცხოვრებლებზე უკეთ არავინ იცის, ამიტომ მათი დავალებების შემსრულებელი გამოვალ.

რაიმე კონკრეტული პროექტები თუ გაქვთ და  როგორ უნდა განავითაროთ, ამაზე შეგიძლიათ ისაუბროთ?

ჩემი პრიორიტეტი იქნება სოფლის მეურნეობის დარგების განვითარება, ტურიზმის, ინფრასტრუქტურის და განათლების, კულტურის განვითარება.

უნდა შევისწავლით განათლების და კულტურის სფერო და ჩვენი გეგმის ნაწილია ის, რომ რაც შეიძლება განათლების და კულტურის მეტი კერა იყოს თითოეულ სოფელში. თუ რომელიმე სოფელში, მაგალითად, ვინმე კარგად ქარგავს, ან მღერის ოჯახის 2-3 წევრი, ჩვენი მიზანია, რომ მათ მიეცეთ წახალისება, თუნდაც ფინანსური ან ჩართვა სხვადასხვა პროგრამაში, რომ ამ ადამიანებმა თავი იგრძნონ შუახევის კულტურულ ველში.

სოფლის მეურნეობის განვითარება როგორ წარმოგიდგენიათ?

მთის კანონის ამოქმედება გვაძლევს საშუალებას, რომ მცირე და საშუალო ბიზნესის გადასახადების კუთხით შეღავათები გვქონდეს. უნდა მოვიძიოთ მეტი ინვესტორი, რომ აქ შეიძლება ფულის დაბანდება და იმაშიც ჩავახედოთ, რომ ამ მხრივ მთის კანონიც უწყობს ხელს.

„ქართული ოცნება“ მეხუთე წელია ხელისუფლებაშია. როგორ ფიქრობთ, აქამდე რატომ ვერ დაარწმუნეთ ინვესტორები ან რატომ ვერ მოიძიეთ რესურსები?

აქამდე კეთდებოდა ინფრასტრუქტურული ნაწილი, 36 ათასი მეტრი ასფალტია დაგებული სოფლებში, გზის და წყლის პრობლემები არის შეუქცევადი და უნდა დასრულდეს. სოფლებში არ უნდა დარჩეს მიწა დაუმუშავებელი. არის ასეთი მიწები და მოსახლეობას შეუძლია იქ თხილი, კაკალი ჩარგოს და ამ კუთხით იგეგმება სანერგე მეურნეობებთან მუშაობა.

სოფლებიდან იზრდება მიგრაცია, როგორ ფიქრობთ, რამ უნდა შეაჩეროს ეს პროცესი?

დასაქმების ადგილები რომ გაჩნდება, მოსახლეობა აღარ წავა სოფლიდან არც ქალაქში და არც თურქეთში სამუშაოდ. მაგალითად ჭალა, წყაროთაში [სოფლები] რომ გაიხსნება საბავშვო ბაღი, 14 ადამიანი დასაქმდება. ეს ხომ არის იმის საფუძველი, რომ ამდენი ადამიანი აღარ წავიდეს სხვაგან. ანუ ეს არის მიმდინარე პროცესი და ნაბიჯ-ნაბიჯ უნდა გამოვხშიროთ უმუშევართა რიგებიდან ეს ადამიანები.

მსგავსი ტიპის დაპირებები აქვს თითქმის ყველა კანდიდატს?  

მე მაქვს არგუმენტები. ის, რომ მუნიციპალიტეტის ბიუჯეტი იზრდება, ახლა არის 16 მილიონი ლარი. აქედან ათი მილიონი ინფრასტრუქტურაზე იხარჯება, გარდა ამისა, „გომარდულის“ ამოქმედება იგეგმება წელს და მოიხსნა ყადაღის პრობლემა და ასეთი არგუმენტები მომყავს დამაჯერებლობისთვის. გარდა ამისა, მინდა, რომ მუნიციპალიტეტში მოწესრიგდეს სივრცითი მოწყობის საკითხები, უფრო მეტი ტურისტის მოსაზიდად.

ავტორი: შოთა გუჯაბიძე

ზუსტად კი არ მახსოვს თორმეტი თუ იყვნენ.

იქნებ თერთმეტი იყვნენ, ან ცამეტნი?

ოთხი წლისწინანდელი ამბავია.

ახალი მერი უნდა ავირჩიოთ ქალაქმა დღე-დღეზე, პირველი არჩეული მერი უნდა ჰყავდეს ბათუმს ქალაქად არსებობის 126 წლის განმავლობაში.

პატარა ამბავი არაა ამხელა ქალაქის პირველი პირი, თან იმ ფონზე, როცა ძველი ბათუმი თვალდახელშუა ინგრევა.

დიდი შორსმჭვრეტელობა არ სჭირდებოდა იმის შეტყობას, რომ ნებისმიერი გამარჯვებული მერი ისეთივე რუდუნებით გააგრძელებდა ძველი ბათუმის ნგრევას, როგორითაც წინა და მომავალი.

ვიცოდით, რომ რაც უნდა პირობა დაგვეტყუებინა კანდიდატისთვის, მაინც არაფერს შეასრულებდა. კანდიდატი დაგპირდება იმაზე მეტს, რაც გინდა და უფრო ბევრს, რასაც მისი ფანტაზია სწვდება. ეს მხოლოდ კანდიდატს შეუძლია.

ვიცოდით-ში საზოგადოება „ბათომს“ ვგულისხმობ, ვინც ყველაზე ხმამაღლა მოვთქვამთ ძველ ბათუმზე.

დავაფიცოთო.

ამ აზრმა ვერ ჰპოვა აღფრთოვანება, თითებს გადააჯვარედინებდა ბოლო-ბოლო. მითუმეტეს, რომ ცოცხალი მაგალითი გვყავდა წინა პრეზიდენტის სახით, რომელმაც ყველა ქვასა და ბუჩქზე დაიფიცა, რაც კი გზად შეხვდა.
დავუგინოთო, თქვა ვიღაცამ.

ამ დროს სარეკლამო კომპანიასაც წარმოვადგენ, „იალონი სტუდიოს“, რომელსაც რამდენიმე კანდიდატმა წინასაარჩევნო რეკლამა შეგვიკვეთა. თვალებში ეტყობოდა უკლებლივ ყველას, ნდობა რომ არ შეიძლებოდა და ყველამ გადაგვაგდო ჰონორარის ამბავში, მიუხედავად იმისა, რომ ქვას გააპობდა გვეგონა, ისეთი ხელშეკრულებები დავუდეთ.

შევთანხმდით რამდენიმე ბათუმური თუ საერთაშორისო არასამთავრობო ორგანიზაცია, მგონი სულაც ყველა, შევადგინეთ დაგინების ტექსტი და შევყარეთ ათორმეტი რჩეული მოყმე ხელოვნების უნივერსიტეტის საკონფერენციო დარბაზში.

ოღონდ გინებას უფრო დემოკრატიული სახელი მოვუძებნეთ და მემორანდუმი დავარქვით.

იმდენი ხანი და იმდენი ხალხი ვმუშაობდით მემორანდუმის ტექსტზე, რომ მხოლოდ ლია ლიქოკელის ლექსებს ჩამოუვარდებოდა სრულყოფილებით.

სულ კაი რაღაცეები ეწერა მემორანდუმში, მე ესა და ესო, არ დავანგრევ ქალაქსო, მიწათსარგებლობის და განაშენიანების რეგულირების გენერალურ გეგმებს დავამტკიცებო, დანგრევას ჯვარი წერია, იქით მოვუვლი და დავიცავო, განსაკუთრებით რაც ღირებულია და ჩვენმა წინაპრებმა სისხლი ჩააქციეს მის შექმნა-შენარჩუნებაშიო, ძირსნაყარს არაფერს შევჭამო.

ეს ბოლო ახლა დავამატე, რაღათქმაუნდა.

ზოგი ვერც ხვდებოდა, რა იყო ეს მიწათსარგებლობა და განაშენიანების რეგულირება, მაგალითად მე, მაგრამ მოსწონდათ თავი ამ ყოფაში. ერთი ხმა მომცენ და მერე რაცხა იქნებაო.

ისე კაი დაგემართოთ, როგორც ჩვენი წინათგრძნობა ახდა.

კინაღამ ოთხი წელი გავიდა და მემორანდუმის არცერთი პუნქტი არ შესრულებულა.

შესრულებულა არა, კვატი.

ძველი ბათუმის ნგრევა კი ახალ მასშტაბებს იძენს სწორედ ჩვენი არჩეული მერის ხელმოწერით.

ჩადენილია არაერთი სისხლის სამართლის დანაშაული.

გამოძიებულია ნული.

დასჯილია ნული.

მთავარ ფოტოზე: შოთა გუჯაბიძე. იური მეჩითოვის ფოტო. 

ფოტოები გადაღებულია 2014 წლის 10 ივნისს, არასამთავრობო ორგანიზაციების მიერ ბათუმის მერობის კანდიდატებთან მემორანდუმის გაფორმების დროს. 

როცა ელექტრონული წიგნები არ არსებობდა, ლიტერატურა წიგნის მაღაზიებს და ბიბლიოთეკებს ე.წ. „ბუქმობილით“ მიჰქონდათ სოფლებსა და გარეუბნებში მცხოვრებთათვის.

პირველი ასეთი ბიბლიოთეკა, როგორც ცნობილია, 1850 წლის ბოლოს გამოჩნდა ინგლისის ქალაქ უორინგტონში. ცხენებშებმული ურიკით, პირველივე წლის განმავლობაში 12 000 წიგნი მიიტანეს მკითხველამდე. მოძრავი ბიბლიოთეკები მოგვიანებით ავტომანქანებში მოეწყო. წიგნების სახლამდე მიტანა განსაკუთრებით პოპულარული მეოცე საუკუნის შუა წლებში გახდა და ამერიკული ცხოვრების განუყოფელ ნაწილად იქცა.

ამერიკისა და ინგლისის ბიბლიოთეკებში დღემდე ინახება მეცხრამეტე, მეოცე საუკუნეების მოძრავი ბიბლიოთეკების – „ბუქმობილების“ ფოტოები, კადრებში ჩანს, როგორ ელიან წიგნებით სავსე მანქანებს მკითხველები.

გრინსბორო, ჩრდილოეთ კაროლინა, 1936 წელი

„ბუქმობილი“, 1960 წელი

„ბუქმობილი“ კოლუმბიის პარკში, 1940 წელი

ღია „ბუქმობილი“, 1921 წელი

„ბუქმობილი“ ინდონეზიაში, მეოცე საუკუნის დასაწყისი

ამერიკა, ორეგონის „ბუქმობილი“, 1920 წელი

„ბუქმობილის“ სამი თანამშრომელი, 1930

მოძრავი ბიბლიოთეკა ირანში, 1970 წელი

რიგი „ბუქმობილთან“, ნიდერლანდები

ბიბლიოთეკის „ბუქმობილი“ კამპტონ როუდზე, 1933 წელი

საქართველოს ეროვნული ბანკის საბჭოს 4 ოქტომბრის დადგენილებით, ეროვნული ბანკის მიერ 1995 წელს მიმოქცევაში გაშვებული 50 თეთრის ნომინალის მონეტების მიმოქცევის ვადა დარჩა 2017 წლის ბოლომდე [ანუ, 2018 წლის 1 იანვრიდან, სავაჭრო და ნაღდი ფულით მომსახურების ობიექტებს აღარ ექნებათ ანგარიშსწორების მიზნით აღნიშნული მონეტების მიღების ვალდებულება], თუმცა, 2018 წლის ბოლომდე მათი გამოცვლა განხორციელდება როგორც ეროვნული ბანკის, ასევე კომერციული ბანკების მეშვეობით.

ადრინდელი დადგენილებით, აღნიშნული მონეტების გამოცვლა 2018 წელს მხოლოდ ეროვნული ბანკის მეშვეობით უნდა განხორციელებულიყო. ახალი დადგენილებით მონეტების გამოცვლა 2019 წლიდან განხორციელდება მხოლოდ საქართველოს ეროვნული ბანკის მეშვეობით.

ეროვნულმა ბანკმა ცვლილება შეიტანა „ეროვნული ვალუტის 50 და 100 ლარის ღირებულების 2004 წლის გამოშვების მოდიფიცირებული ბანკნოტების მიმოქცევაში გაშვების შესახებ“ 2004 წლის დადგენილებაშიც. ახალი რედაქციით, 1995 და 1999 წლების გამოშვების ლარის ყველა ნომინალის ბანკნოტის მიმოქცევის ვადა გაგრძელდა 2021 წლის ბოლომდე. შემდგომში მათი გამოცვლა განხორციელდება საქართველოს ეროვნული ბანკის მეშვეობით.

გასულ წელს ე.წ. ყვითელი 50-თეთრიანი მონეტების ყიდვა-გაყიდვაზე სოციალურ ქსელებში დაწყებულმა აჟიოტაჟმა მოსახლეობაშიც გადაინაცვლა. ამ ინფორმაციების მიხედვით, თითქოს ერთ მონეტაში 10 ლარიდან 100 დოლარამდეც კი იხდიდნენ. მაშინ ყველაზე უფრო გავრცელებული ვერსიით, მონეტა შეიცავს ღირებულ ლითონს და ის გასაყიდად საქართველოდან თურქეთში გააქვთ.

საქართველოს ეროვნული ბანკის ინფორმაციით, აღნიშნული მონეტები მოჭრილია 1993 წელს, მიმოქცევაშია 1995 წლიდან, წონა – 2,5 გრ, დიამეტრი – 19 მმ, სისქე 1,4 მმ. მონეტის შემადგენლობა – სპილენძის შენადნობი ოქროსფერი და ის სხვა რაიმე ღირებულ ლითონს არ შეიცავს.

ბათუმის ოლქმა რამდენიმე დღის წინ დამოუკიდებელ წარმომადგენლად არჩეული დავით ქარცივაძე მოხსნა. დამოუკიდებელ წარმომადგენლებს ნებისმიერ საუბნო კომისიაში დაუბრკოლებლად შესვლის და ოლქისთვის ინფორმაციის მიწოდების უფლება აქვთ. კანონის მიხედვით, ასეთი წარმომადგენელი პოლიტიკურად ნეიტრალური უნდა იყოს, დავით ქარცივაძე კი წლების განმავლობაში „ქართული ოცნებას“ წარმოადგენდა საარჩევნო კომისიებში. ამჟამად იგი „პატრიოტთა ალიანსის“ უმაღლესი საბჭოს საარჩევნო სიის წევრია.

ოლქის გადაწყვეტილებით, დავით ქარცივაძე დამოუკიდებელი წარმომადგენელი საუბნო კომისიებში აღარ იქნება. აქამდე ოლქი ამტკიცებდა, რომ კანონი არ დაურღვევია, რადგან ოფიციალურად დავით ქარცივაძე არც ერთი პოლიტიკური პარტიის წევრი არ არის, ხოლო „პოლიტიკური ნეიტრალურობა“ სუბიექტური შეფასების საკითხია.

„არაფერი არ იყო დარღვეული, მაგრამ მაინც ასე გადაწყვიტა ოლქმა, რომ ეს პოლიტიკური სპეკულაციების საგანი არ გამხდარიყო,“ – გვითხრა სულიკო შვენთიძემ, ბათუმის საოლქო კომისიის იურისტმა.

ბათუმის საარჩევნო ოლქს უბნებში სულ 9 დამოუკიდებელი წარმომადგენელი ეყოლება. ბათუმის ოლქის ინფორმაციით, 5 ახალი წევრი დღევანდელ სხდომაზე შეარჩიეს: თედო დუმბაძე, ხათუნა ბერაძე, ირაკლი გვილავა, თორნიკე მეგრელიშვილი და დალი მამულაძე.

„ნაციონალურმა მოძრაობამ“ მმართველი პოლიტიკური ძალის კანდიდატების შეხვედრების ამსახველი ფოტო მასალა წარმოადგინა. „ნაციონალურ მოძრაობაში“ ამტკიცებენ, რომ „ქართული ოცნება“ ადმინისტრაციულ რესურსს იყენებს.

„ამ კადრებში ჩანს, რომ წინასაარჩევნო აგიტაციაში არიან ჩართულები საარჩევნო ოლქის წევრები, გამგეობის სამსახურის უფროსები, სკოლის დირექტორები და ასე შემდეგ. ნაცვლად იმისა, რომ ისინი აკეთებდნენ მათზე დაკისრებულ მოვალეობას, რაშიც ხელფასს იღებენ, მონაწილეობენ „ქართული ოცნების“ კანდიდატის აგიტაციაში. ეს ფოტოები დღისით, სამუშაო საათებშია გადაღებული,“ – ამბობს მირდატ ქამადაძე, „ერთიანი ნაციონალური მოძრაობის“ ბათუმის საარჩევნო სიის პირველი ნომერი.

ფოტოების ნაწილი „ქართული ოცნების“ ქობულეთის მერობის კანდიდატს – მირიან ქათამაძეს ეხება. ამ კანდიდატს თავის ფეისბუქ გვერდზე გამოქვეყნებული აქვს ფოტოები, საიდანაც ჩანს, რომ ქობულეთში, სტიქიისგან დაზარალებულ მოსახლეობას მერობის კანდიდატი ქობულეთის მოქმედ გამგებელთან და მთავრობის სხვა წარმომადგენლებთან ერთად ხვდება.

„ეს არის ადმინისტრაციული რესურსის გამოყენება. მირიან ქათამაძის იქ მისვლის მიზანი იყო ის, რომ ხალხისთვის ეთქვა, პრობლემას ჩვენ გიგვარებთო. სხვა პარტიის კანდიდატის მიმართ ხომ ასეთი მიმღებლობა არ ექნებოდა იგივე მეწყრის გამო შექმნილ საგანგებო შტაბს,“ – აღნიშნავენ „ნაციონალურ მოძრაობაში“.

სცადა თუ არა სხვა პარტიის წარმომადგენელმა მისულიყო დატბორილ ადგილებში სამთავრობო შტაბთან ერთად? – მირდატ ქამადაძის თქმით, „ნაციონალური მოძრაობის“ მერობის კანდიდატს ეს არ უცდია.

მირიან ქათამაძე ამ დრომდე ადმინისტრაციული რესურსის შესაძლო გამოყენების შემთხვევას არ გამოხმაურებია.

„ნაციონალური მოძრაობის“ მიერ წარმოდგენილი ფოტოების მიხედვით, „ქართული ოცნების“ მერობის კანდიდატების წინაასაარჩევნო შეხვედრებს ესწრებოდნენ, მაგალითად, შუახევში ზაზა ზოიძე – გამგეობის ჯანდაცვის სამსახურის უფროსი, ასევე ფრიდონ დავითაძე – გამგეობის განათლების სამსახურის უფროსი, მამუდ მიქელაძე – ხიჭაურის სკოლის დირექტორი, დავით ქათამაძე – ბარათაულის სკოლის დირექტორი…

ჰქონდათ თუ არა ამ პირებს აღებული შვებულება – „ნაციონალურ მოძრაობაში“ გვითხრეს, რომ მათ ამის შესახებ ინფორმაცია არ აქვთ. მირდატ ქამადაძის თქმით, მათ ფოტოები სოციალური ქსელი „ფეისბუქიდან“ მოაგროვეს. „დავამუშავებთ ამ მასალას და შემდეგ მივმართავთ უწყებათშორის კომისიას, ასევე ცენტრალურ საარჩევნო კომისიას. ჩვენ დღეს გავასაჯაროვეთ ეს ფაქტები და არასამთავრობო ორგანიზაციები მოვიწვიეთ,“ – დასძენს მირდატ ქამადაძე.

„ნაციონალურ მოძრაობაში“ გამართულ ბრიფინგს ესწრებოდნენ ამერიკის ეროვნულ-დემოკრატიული ინსტიტუტის წარმომადგენლები, ასევე „ახალგაზრდა იურისტთა ასოციაცია“ და „საერთაშორისო გამჭვირვალობა საქართველო“.

„ჩვენ შევისწავლით ყველა ამ ფაქტს. საინტერესოა, რა პერიოდშია ეს შეხვედრები გამართული, ჰქონდათ თუ არა შვებულება აღებული საჯარო მოხელეებს და ასე შემდეგ. გასაკუთრებით საინტერესოა ქობულეთის შემთხვევა. თუ ეს ფაქტები დადასტურდება, ეს იქნება წინასაარჩევნო გარემოსთვის ძალიან დამაზარალებელი,“ – ამბობს მალხაზ ჭკადუა, „საერთაშორისო გამჭვირვალობა საქართველოს“ რეგიონული ოფისების მენეჯერი.

მთავარ ფოტოზე: „ქართული ოცნების“ მერობის კანდიდატი მირიან ქათამაძე სტიქიის ზონაში ადგილობრივი ხელისუფლების წარმომადგენლებთან ერთად

საქართველოს სურსათის ეროვნული სააგენტოს [სეს] ინფორმაციით, აზიური ფაროსანა ტემპერატურის კლებისას, გამოსაზამთრებლად საცხოვრებელ სახლებსა და დახურულ შენობებში ინაცვლებს. ამ დროს მასთან ბრძოლის ეფექტური საშუალება კი მისი მექანიკურად განადგურებაა.

სეს-ის განცხადებით ერთ-ერთი მარტივი მეთოდი, რომელიც აქტიურად გამოიყენება აშშ-ში, მარტივი კონსტრუქციის მუყაოს ან სხვა მასალის თავშესაფრების დამზადებაა, რომელშიც მჭიდროდ თავსდება კვერცხის ჩასაწყობი ფირფიტები ან მსგავსი მასალა. თავშესაფარში გამოსაზამთრებლად შესული ფაროსანა უნდა შეგროვდეს და მექანიკურად განადგურდეს.

ფაროსანასთან ბრძოლის სხვა ეფექტური მეთოდების შესახებ ინფორმაცია, შეგიძლიათ ნახოთ საინფორმაციო ბროშურაში –https://bit.ly/2xPme0t

ჟურნალ „ბათუმელების“ სექტემბრის ნომრის დარიგება იწყება. ასევე, ჟურნალი იყიდება „ბიბლუსის“ წიგნის მაღაზიათა ქსელში, საგაზეთო ჯიხურებსა და სტელაჟებზე. ამ თვიდან „ბათუმელები“ თავად უზრუნველჰყოფს ჟურნალის მიტანას ხელმომწერებთან თბილისში.

ფოკუსი თემაზე: არჩევნები, სოროსი და საქართველო
ავტორი: დათო ქოქოშვილი

პოლიტიკა: „ოცნების“ ნაბიჯი წინ და ნაბიჯი უკან 
ავტორი: ცაგო კახაბერიძე

ეკონომიკა: ვემსახურები ბანკს
ავტორი: თედო ჯორბენაძე

განათლება: რას შეცვლის პროფესიული განათლების რეფორმა
ავტორი: ლელა დუმბაძე

ჯანმრთელობა: საჭიროზე მეტი ექიმი 
ავტორი: ნანა კვაჭაძე

უცხოეთი: ახალი ბირთვული საფრთხე 
ავტორი: იოშკა ფიშერი

კავკასია: ჩემი არაოფიციალური შინაპატიმრობა ახალგორში
ავტორი: თამარ მეარაყიშვილი

მოგზაურობა: განთიადი ზღვაზე
ავტორი: მანანა ქველიაშვილი

საზოგადოება: ყრუდ და მდუმარედ
ავტორი: ია ფრანგიშვილი

ტექნოლოგიები: ქართველები ცერნში
ავტორი: ჯაბა ანანიძე

ფოტოპროექტი: გადამზიდავები
ავტორი: მანანა ქველიაშვილი

მუსიკა: გია ყანჩელი პაუზებს შორის
ავტორი: ჯაბა ანანიძე

კინო: „ნუ დაკარგავთ დროს უნივერსიტეტში, დააგროვეთ ტკივილი“
ავტორი: თამარ ნერგაძე

ისტორია: ქართველი ებრაელები დაბა კულაში
ავტორი: ირინე ბერიძე

ლიტერატურა: მიწას ეფინება და არ დნება
ავტორი: ლია ლიქოკელი

კულინარია: უწყვეტი მესხური ძაფები
ავტორი: თამარა მირიანაშვილი

„აქამდე ეგონათ, რომ ბიძინა ივანიშვილი ანგელოზი იყო და მიხეილ სააკაშვილი კაციჭამია. ახლა პირიქით ფიქრობენ,“ – ასე ხედავს ამომრჩევლის განწყობას „ნაციონალური მოძრაობის“ საარჩევნო სიის პირველი ნომერი – მიხეილ ბოლქვაძე. ამავე პარტიის მერობის კანდიდატისგან განსხვავებით, იგი ხელვაჩაურში პრემიების გაუქმებას არ აპირებს და ამბობს, რომ პრემიას მხოლოდ წამახალისებელი ფუნქცია ექნება. მიხეილ ბოლქვაძე ბოლო ორი მოწვევის ხელვაჩაურის საკრებულოს წევრია. წინასაარჩევნო გზავნილებზე საუბრის დროს ძირითადად მართველ პოლიტიკურ გუნდზე აკეთებს აქცენტს, მათ შორის, მოქმედ გამგებელზე – ნადიმ ვარშანიძეზე, რომელიც, მისი თქმით, 2012 წლამდე „ნაციონალური მოძრაობის“ მხარდამჭერი იყო.

ბატონო მიხეილ, რას შეცვლით ხელვაჩაურის საკრებულოში უმრავლესობით მოსვლის შემთხვევაში?

ძალიან ბევრი პრობლემაა მოსაგვარებელი. პროგრამების დიდი ნაწილი, რაც ჩვენი მმართველობის დროს დაიწყო, შეჩერებულია. დღეს სოფლის რწმუნებულებს ბეჭედიც კი არ აქვთ და სოფელში მცხოვრებ ადამიანებს ხანგრძლივი ლოდინი უწევთ ხელვაჩაურის გამგეობასთან… დავასახელებ იგივე სოფლის მხარდაჭერის პროგრამას. ამ პროგრამის ფარგლებში ძალიან ბევრი საქმე გაკეთდა, გზები იქნება ეს, გაზიფიცირება, წყლის სისტემები, თუ მოსაცდელები. ეს პროგრამა წელს გაუქმდა. მთლიანობაში, თუკი 2012 წლამდე მუნიციპალიტეტში ხორციელდებოდა დაახლოებით 30 ინფრასტრუქტურული პროექტი, ამჟამად ხორციელდება დაახლოებით 11. სამაგიეროდ, გაიზარდა გამგეობის სახელფასო ფონდი. 2012 წელთან შედარებით დაახლოებით 200 ათასი ლარით. იცით ალბათ, რომ ყველაზე წარმატებული გამგებელი ნადიმ ვარშანიძე აღმოჩნდა. მან აჭარაში ყველაზე დიდი ოდენობის პრემია და დანამატი აიღო. გარდა ამისა, 2017 წელს ბიუჯეტიდან ერთი მანქანის რემონტისთვის 46 ათასი ლარი გამოყო. ეს მანქანა ნადიმ ვარშანიძეს ემსახურება. ჩვენ გვქონდა ინიაციატივა, ოპოზიციაში ყოფნის დროს, რომ იგივე არასამეწარმეო იურიდიულ პირებში, მაგალითად, კულტურის მიმართულებით ვინც მუშაობს, გაზრდილიყო ხელფასები, მაგრამ ამაზე უარი გვითხრეს. 160 ლარი აქვთ დაახლოებით ხელფასი იმ ადამიანებს, ვინც ააიპ-ებში მუშაობს. უარი გვითხრეს პროგრამაზეც, რომლითაც სოციალურად დაუცველი ადამიანებისთვის სახურავების შეძენა იქნებოდა შესაძლებელი. უმრავლესობის პასუხი არის ხშირად ის, რომ საკმარისი თანხა არ აქვთ, თუმცა გასული წლის ბიუჯეტში მილიონ 600 ათასი ლარი გაუხარჯავი დარჩა.

კონკრეტულად რომ გვითხრათ, რას განახორციელებთ და სად ნახავთ ამისთვის ფინანსურ რესურსს?

იგივე გაზიფიცირება, რაც ჩვენს დროს დაიწყო… ჩვენ მივედით მახოს ხიდამდე და გეგმა გვქონდა, რომ ავიდოდით ბეშუმამდე. ბეშუმი კი არა, ახლა თხილნარშიც ვერ შეიყვანეს გაზი. ახალშენში შეიყვანეს მხოლოდ წინასაარჩევნოდ. იქ მე ვცხოვრობ და ვფიქრობ, რომ სპეციალურად გააკეთეს, მაგრამ მაინც მოვიგე არჩევნები და საკრებულოში შევედი. ჩვენ შევამცირებთ პრემიებს და დანამატებს და ამის ხარჯზე იქნება შესაძლებელი იგივე გაზიფიცირებისთვის თანხის გამოძებნა.

თქვენმა მერობის კანდიდატმა, თეიმურაზ დუმბაძემ გვითხრა, რომ პრემიებს და დანამატებს გააუქმებს. თქვენ ახსენეთ – შემცირება. რომელს უნდა დაუჯეროს ამომრჩეველმა?

პრემია უნდა იყოს მხოლოდ წამახალისებელი, მაგალითად, ვინც 6 საათზე ვერ გადის სამსახურიდან და ღამის 12-მდე მოუწია მუშაობა, მას ერგება პრემია. დანამატი საერთოდ გაუქმდება, ვისაც დაბალი ხელფასი აქვს, მას უნდა მოემატოს შრომის ანაზღაურება. ამ გზით ჩვენ ხელვაჩაურის ბიუჯეტში დაახლოებით 400 ათას ლარს დავზოგავთ. იგივე წყლის პრობლემა – ხელვაჩაურის სოფლების თითქმის ნახევარს ისევ წყლის პრობლემა აქვს.

სად ნახავთ წყლის სისტემისთვის ფულს, ასევე გაზიფიცირებისთვის?

გაზიფიცირება როცა ხდებოდა, ჩვენი მმართველობის დროს, სოფლის მხარდაჭერის პროგრამის ფარგლებში ვყიდულობდით მილებს და დანარჩენს „სოკარი“ აკეთებდა. ახლა ეს პროგრამაც გაუქმებულია და ბიუჯეტში უმრავლესობამ ამისთვის საკმარისი თანხა ვერ იპოვა. კოორდინებული მუშაობის შემთხვევაში, შესაძლებელია ფინანსური რესურსის გამონახვა. ახლა ხელვაჩაურის გამგებელს ერთი კვირა სჭირდება, რომ აჭარის მთავრობის თავმჯდომარეს შეხვდეს. მე და თემურ დუმბაძეს სანიმუშო ურთიერთობა გვექნება, თუ აგვირჩევენ და კოორდინაციის პრობლემა აღარ იარსებებს. ჩვენ გვაძლევდა ფულს, როგორც აჭარის, ისე საქართველოს მთავრობა. ახლა ტრანსფერების რაოდენობა ძალიან შემცირებულია. წელს 4 მილიონი უნდა მოეცა საქართველოს მთავრობას და მოგვცა მხოლოდ ორნახევარი მილიონი. ჩვენს დროს დაახლოებით 14 მილიონ ტრანსფერ ვიღებდით. ამჯერადაც მოლოდინი მაქვს, რომ ინფრასტრუქტურულ პროექტებზე მივიღებთ დაფინანსებას ცენტრალური ბიუჯეტიდან.

რატომ გაქვთ ამის მოლოდინი, ამ არჩევნებით ხომ ცენტრალური ხელისუფლება არ იცვლება?

არაა ასე. თუკი თვითმმართველობებში ჩვენ აგვირჩევენ, აუცილებლად შეიცვლება მთავრობაც. მათ აუცილებლად მოუწევთ გაითვალისწინონ თვითმმართველობის ინტერესები. ხელვაჩაურის ადგილობრივი ბიუჯეტი დაახლოებით 16 მილიონი ლარია. ამასაც სწორად გადანაწილება უნდა.

როგორ წარმოგიდგენიათ ადგილობრივი ბიუჯეტის გადანაწილება?

მაგალითად, ჯანდაცვის პროგრამები, რაც ჩვენს დროს იყო, იგივეა, არაფერი შეცვლილა და გაჩნდა ახალი საჭიროებები. მედიკამენტების პაკეტს გარკვეულწილად შეიძლება ფარავდეს ადგილობრივი ბიუჯეტი. ასევე შესაძლებელია პროგრამა შშმ პირებისთვის, მრავალშვილიანი ოჯახებისთვის. აუცილებელია იგივე ტურიზმის განვითარებაზე მუშაობა. მაჭახლის ხეობას მივანიჭეთ დაცული ტერიტორიის სტატუსი, მაგრამ ამის შემდეგ იქ არაფერი შეცვლილა. როცა ჩვენ მოვედით ხელისუფლებაში, ხელვაჩაურში არც ერთი სკოლა და საბავშვო ბაღი არ იყო გარემონტებული. 4 სკოლა დაგვრჩა გასარემონტებელი და ისიც ვერ გაარემონტეს. გარდა ამისა, არაერთი გზა დაიგო, განათება…

თქვენ წააგეთ არჩევნები. ახლა რის გამო მოინდომებს ამომრჩეველი თქვენს დაბრუნებას?

წავაგეთ, მაგრამ 2016 წელს არჩევნებში ავიღეთ დაახლოებით 30 პროცენტი. მთავარი ისაა, რომ ჩვენი ელექტორატი არის მზარდი. თუკი თავიდან ბიძინა ივანიშვილი ეგონათ ანგელოზი და მიხეილ სააკაშვილი კაციჭამია, ახლა პირიქით ფიქრობენ…

ფიქრობთ, რომ „ოცნებაზე“ განაწყენებული ადამიანები თქვენი ამომრჩევლები გახდებიან?

შესაძლოა, ასეც მოხდეს. ჩვენი ამომრჩევლის რაოდენობა გაიზრდება ძირითადად იმით, რომ აქამდე ნეიტრალური პოზიციის მქონე ადამიანები დაგვიჭერენ მხარს… „ქართული ოცნების“ ძირითადი პრობლემა არის ის, ვინც ამ პოლიტიკურ ძალას უჭერდა მხარს, ისინი ჩრდილში აღმოჩნდნენ. იგივე ნადიმ ვარშანიძე ჩვენი გუნდის აქტიური მხარდამჭერი იყო და შემდეგ უცებ გახდა მეოცნებე. ჩვენი ხელისუფლებაში ყოფნის დროს ნადიმ ვარშანიძე საზღვაო აკადემიის რექტორი იყო და „ნაციონალური მოძრაობის“ საარჩევნო შტაბს ხელმძღვანელობდა ურეხში 2010 წლის არჩევნებზე.

ანუ საზღვაო აკადემიის რექტორობაც პოლიტიზებული იყო „ნაციონალური მოძრაობის“ ხელისუფლებაში ყოფნის დროს?

არა, მე შტაბის უფროსობა ვიგულისხმე. ის საარჩევნო შტაბში მუშაობდა 2012 წელსაც.

თქვენი გუნდის წევრები ვინ არიან, კიდევ ვინ შევა საკრებულოში, თუკი ხელვაჩაურში ამომრჩეველი „ნაციონალურ მოძრაობას“ აირჩევს?

ესენი არიან ცნობილი სახეები ხელვაჩაურის მოსახლეობისთვის, მათ შორის, გვყავს ქალი კანდიდატი შორენა ცინცაძე. ასევე არიან: ქენან კახიძე, მერაბ ვარშალომიძე, ზურაბ გვიანიძე…

მთავარ ფოტოზე: მიხეილ ბოლქვაძე ამომრჩეველთან შეხვედრის დროს

„ერთიანი ნაციონალური მოძრაობის“ მერობის კანდიდატმა ლევან ანთაძემ ბათუმის დემოკრატიული ჩართულობის ცენტრში ქალაქის ურბანულ განვითარებაზე ისაუბრა, რის შემდეგაც მან აუდიტორიის კითხვებსაც უპასუხა, მათ შორის შეკითხვას ბათუმში მეჩეთის მშენებლობასთან დაკავშირებით.

„ … როდის შეიქმნა ზოგადად საქართველოში ეს პრობლემა? საქართველო ყოველთვის იყო ტოლერანტული ქვეყანა, მათ შორის ბათუმი.  ეს თემა წამოვიდა 2012 წლიდან, რატომ?  იმიტომ, რომ მოხდა მისი [თემის] პოლიტიზირება. მე ვფიქრობ, ამ თემას პირველ რიგში უნდა ჩამოშორდეს პოლიტიკური ნაწილი.  რა თქმა უნდა, ადამიანებს უნდა ჰქონდეთ რელიგიური გრძნობების გამოხატვის საშუალება, თუ მათ სურვილი აქვთ. მაგრამ ეს უნდა იყოს პირველ რიგში ქართული თემა. თავის დროზე უნდა მიღებულიყო გადაწყვეტილება და აუცილებლად ქართული ფულით, თუნდაც ბიუჯეტის ფულით გაკეთებულიყო. ჩემი შეხედულება ეს არის. “ – განაცხადა ლევან ანთაძემ შეხვედრაზე.

შეხვედრა მერობის კანდიდატთან ბათუმის დემოკრატიული ჩართულობის ცენტრში საარჩევნო მედია ცენტრის პროექტის ფარგლებში გაიმართა. დისკუსიის მიზანი იყო ბათუმის ურბანული და გარემოსდაცვითი პრობლემების: მწვანე საფარი, ჰაერის დაბინძურება, ტრანსპორტი, პარკირება, ქალაქის იერსახე და სხვა გადაწყვეტის გზებზე მერობის კანდიდატის ხედვების მოსმენა.

ადგილობრივი თვითმმართველობის არჩევნები 2017 წლის 21 ოქტომბერს გაიმართება.

ინტერვიუ მერობის კანდიდატთან: ლევან ანთაძე: თანამდებობა არ უნდა იყოს კომფორტი