ბათუმში, აეროპორტის გზატკეცილზე ახალი მუზეუმი გაიხსნა. ბილალ სემიჰ ბოზდემირის სახელობის მინერალური ქვების მუზეუმის გახსნაზე საზეიმო ლენტის გაჭრა ლევან ანთაძეს მოუწია – „ერთიანი ნაციონალური მოძრაობის“ ბათუმის მერობის კანდიდატს.
„მუზეუმის გახსნაში მივიღე მონაწილეობა, აბა, მთავრობა მოწვეული იყო და არ მოვიდა, როგორც ვიცი,“ – ამბობს ლევან ანთაძე. მისი თქმით, ეს მუზეუმი თურქეთის მოქალაქემ, ბილალ ბოზდემირმა გახსნა, რომელიც გეოგრაფი და გეოლოგია, ხოლო ამჟამად ბათუმის სახელმწიფო უნივერსიტეტში სწავლობს სამედიცინო ფაკულტეტზე.
„მან დააგროვა მინერალური ქვების კოლექცია და კერძო ინვესტიციით გახსნა მუზეუმი, სახელმწიფო არ დახმარებია. მე პირადად, ამ პირმა, ვინც მუზეუმი გახსნა, ფეისბუქის საშუალებით მიმიწვია მუზეუმის გახსნაზე“, – დასძენს ლევან ანთაძე.
რატომ არ დაესწრნენ ახალი მუზეუმის გახსნას მთავრობის წარმომადგენლები? – აჭარის მთავრობის პრესსამსახურში გვითხრეს, რომ ახალი მუზეუმის გახსნის შესახებ შესაბამისად ინფორმირებული არ იყვნენ. მთავრობის პრესსამსახურის უფროსი, სოფო გუჯაბიძე განმარტავს, რომ მას ახალი მუზეუმის შესახებ ორგანიზატორებმა ტელეფონით დაურეკეს, მაგრამ შემდეგ არ გაუგზავნიათ მოსაწვევი მთავრობისთვის და არც დეტალური ინფორმაცია მუზეუმის შესახებ.
მოსაწვევის მიუღებლობა დაგვისახელეს მუზეუმის გახსნაზე დაუსწრებლობის მიზეზად აჭარის განათლების, კულტურის და სპორტის სამინისტროში. სამინისტროს პრესსამსახურში ადასტურებენ, რომ ინფორმაცია ახალი მუზეუმის გახსნის შესახებ ჰქონდათ.
აჭარის განათლების, კულტურის და სპორტის სამინისტროში არ ფლობენ ინფორმაციას, გაიარა თუ არა კანონით სავალდებულო პროცედურები ახალმა მუზეუმმა. სამინისტროს პრესსამსახურის განმარტებით, მუზეუმის გახსნას აჭარის განათლების, კულტურისა და სპორტის სამინისტროს ნებართვა არ სჭირდება.
მინერალური ქვების მუზეუმი ბათუმში
