ზაფხულის ჩავლილი სიცხე და სასიამოვნო, გრილი ამინდი – შემოდგომა საუკეთესო დროა მოგზაურობისთვის. თუ გეზი ევროპისკენ გაქვთ და უკვე მოინიშნეთ აუცილებლად მოსანახულებელი ადგილები, გირჩევთ, სიას ქვემოთ მოცემული გამოფენებიც დაამატოთ, რომლებიც ევროპის სხვადასხვა ქვეყანაში შემოდგომაზე გაიმართება.
ბილ ვიოლა, რეტროსპექტივა – Guggenheim Museum, ბილბაო
შემოდგომაზე თუ ბასკეთში აღმოჩნდებით, შეგიძლიათ გუგენჰეიმის მუზეუმს ესტუმროთ, სადაც ვიდეოარტის პიონერის, ბილ ვიოლას რეტროსპექტივა იქნება წარმოდგენილი, 70-იანი წლების პირველი, ექსპერიმენტული ნამუშევრებიდან დღემდე შექმნილი ვიდეოარტები, რომელშიც ბილ ვიოლამ თანამედროვეობის უახლესი ტექნოლოგიები გამოიყენა.
გამოფენა გრძელდება 9 ნოემბრამდე.
Biennale Arte 2017 – ვენეციის 57-ე ბიენალე
ერთ საუკუნეზე მეტია, რაც ვენეცია მსოფლიო ხელოვნების ყველაზე დიდ გამოფენას მასპინძლობს ყოველწლიურად. ვენეციის ბიენალეზე ყველაფრის დასათვალიერებლად შეიძლება რამდენიმე დღეც კი არ გეყოთ. ეს გამოფენა თანამედროვე ხელოვნებით დაინტერესებული უამრავი ადამიანის თავშეყრის ადგილია.
ბიენალეზე ყოველ წელს 50 მეტი ქვეყნის პავილიონია განთავსებული.
გამოფენა გაგრძელდება 26 ნოემბრამდე
ხელოვანები თავიანთ დროში – Istambul Modern, სტამბოლი
სტამბულის თანამედროვე ხელოვნების მუზეუმი ბოსფორის სანაპიროზე მდებარეობს. სხვადასხვა პერიოდის 100-ზე მეტი მხატვრის ტილოს აერთიანებს კოლექტიური გამოფენა, რომელიც კონცეპტუალურ ველს ქმნის და გვაჩვენებს, როგორ აღიქვამენ სხვადასხვა პერიოდის მხატვრები დროს. გამოფენა განსხვავებულ თურქეთს წარმოაჩენს, ქვეყნის აქამდე უცნობ მხარეს, რომლებსაც მხოლოდ მხატვრები ამჩნევენ.
გამოფენა გაგრძელდება 31 დეკემბრამდე
ერის სული – შავკანიანთა ხელოვნების ძალა – Tate Modern, ლონდონი
გამოფენა ლონდონში ტარდება და საზოგადოებრივ-კულტურული მოძრაობა Black Power-ის ოცწლიან აქტივიზმს ასახავს, რომელიც 60 დან 80-იან წლებამდე იყო აქტუალური. გამოფენის არსი ამ პერიოდის ამერიკის უკეთ გაცნობა და შავკანიანთა ხელოვნების ფუკუსში მოქცევაა.
გამოფენა გრძელდება 22 ოქტომბრამდე
ჩინეთი და ეგვიპტე, მსოფლიოს აკვანი – Neues Museum, ბერლინი
ბერლინის ამ გამოფენას არ გამოტოვებენ ძველი, ათასწლოვანი კულტურით დაინტერესებული ადამიანები. გამოფენაზე „ჩინეთი და ეგვიპტე, მსოფლიოს აკვანი“ ძველეგვიპტური ხელოვნების ნიმუშები, სკულპტურები და ნივთებია წარმოდგენილი ასევე ძველი ჩინური ხელოვნების იმ ნუმუშებთან ერთად, რომელიც ევროპაში არასოდეს გამოფენილა. ერთი შეხედვით ორ, სრულიად განსხვავებულ და თვითმყოფად ძველ კულტურას შორის დაინახავთ უამრავ მსგავსებას, რომელიც აქამდე არ შეგინიშნავთ.
გამოფენა გაგრძელდება 3 დეკემბრამდე.
მთავარ ფოტოზე: კადრი ბილ ვიოლას ვიდეოარტიდან.
