ვაჟა-ფშაველას ქუჩაზე კერძო სახლების მესაკუთრეებს ტროტუარები აქვთ მიტაცებული. ასეთი დაახლოებით შვიდი ოჯახია, ერთ-ერთი მათგანი კი, როგორც იქ მცხოვრებლებმა გვითხრეს, მშენებელი დავიდოვია, რომელიც ბათუმში კომპანია DS ჯგუფით ოპერირებს. ამ ბიზნესმენის სამსართულიანი სახლი ვაჟა-ფშაველას ქუჩაზე 117 ნომერში დგას. საჯარო რეესტრის მონაცემებით, სახლი მარინა დავიდოვას საკუთრებაა.
სერგეი დავიდოვისთვის გვინდოდა გვეკითხა, გავლენიან ბიზნესმენს მაინცა და მაინც ქალაქის 30 კვადრატული მეტრის მიტაცება რაში დასჭირდა. დავიდოვისთვის ამ კითხვის დასმა ვერ მოვახერხეთ.
როგორ ვერ შენიშნა ბათუმის მერიამ მსგავსი თვითნებობა და როგორ ვერ აღკვეთა ის? – ამ კითხვით ბათუმის მერიას მივმართეთ. ჯერჯერობით მერიისგან პასუხს ველოდებით. უწყებას ასევე ვთხოვეთ განმარტოს, თუ აპირებენ დაუბრუნონ ქალაქს მიტაცებული ტროტუარები? – ცხადია, მათ განმარტებას ამ საკითხზეც დაუყოვნებლივ შემოგთავაზებთ.