უმაღლესი საბჭოს თანამშრომლის მიერ ადმინისტრაციული რესურსის გამოყენება


ადმინისტრაციული რესურსის გამოყენებისთვის მოსამართლე ლაშა თავართქილაძემ უმაღლესი საბჭოს თანამშრომელს – გოგიტა გოგიტიძეს შენიშვნა მისცა.

გოგიტა გოგიტიძემ „ქართული ოცნების“ კანდიდატების წარდგენის ამსახველი ფოტოები უმაღლესი საბჭოს ოფიციალურ ფეისბუქგვერდზე განათავსა. ამ შემთხვევაზე ადმინისტრაციული სამართალდარღვევის ოქმი ბათუმის საოლქო საარჩევნო კომისიამ შეადგინა. ოლქი სამართალდამრევის 2 ათასი ლარით დაჯარიმებას ითხოვდა.

ბათუმის საქალაქო სასამართლომ ადმინისტრაციული სამართალდარღვევა დაადგინა თამარ დიასამიძის შემთხვევაშიც. თამარ დიასამიძე აჭარის ფინანსთა და ეკონომიკის სამინისტროს თანამშრომელია და მან სამინისტრო ოფიციალურ ფეისბუქგვერდზე „ქართული ოცნების“ წარდგენის ამსახველი ფოტო და ვიდეო მასალა გამოაქვეყნა. მოსამართლე ჯუმბერ ბეჟანიძემ თამარ დიასამიძეს მხოლოდ შენიშვნა მისცა და მის დაჯარიმებაზე უარი თქვა.

„ეს გადაწყვეტილება სამომავალოდ წაახალისებს ადმინისტრაციული რესურსის გამოყენებას,“ – მიიჩნევს მადონა ბერიძე, „სამართლიანი არჩევნების“ აჭარა-გურიის კოორდინატორი. მისი აზრით, სასამართლოს შეეძლო ჯარიმის გამოყენება, როცა დარღვევა აშკარაა, ხოლო სარჩელი – მტკიცებულებებით გამყარებული.

ამას გარდა, მადონა ბერიძე სასამართლოს მხრიდან ერთი და იგივე ტიპის დარღვევის მიმართ განსხვავებულ დამოკიდებულებაზეც საუბრობს. ის  სხეფის პედაგოგის – მარინა დარჩიძის საქმეს იხსენებს, რომელმაც პირველკლასელებთან გადაღებული ფოტო გამოქვეყნა „ქართული ოცნების“ დროშებით. მარინა დარჩიძე სასამართლომ 1000 ლარით დააჯარიმა.

 

ნეტგაზეთის მასალების სხვა გამოცემებში გადაბეჭდვის წესი
ავტორი