შუახევის #82 საოლქო-საარჩევნო კომისიამ სოფელ სხეფის სკოლის პედაგოგი – მარინა დარჩიძე, რომელმაც „ქართული ოცნების“ დროშებით ხელში პირველკლასელების ფოტო სოციალურ ქსელში გაავრცელა, სამართალდამრღვევად ცნო.
კომისიამ პედაგოგის მიერ სასწავლო პროცესის დროს „ოცნების დროშებიანი“ ფოტოს გავრცელება პოლიტიკურ აგიტაციად და რესურსის გამოყენებად შეაფასა.
„საერთაშორისო გამჭვირვალობა საქართველოს“ იურისტის, ანა ბერძენიშვილის ინფორმაციით, საქმის მასალები გადაიგზავნება სასამართლოში, შესაბამისი გადაწყვეტილების სასამართლოში დადასტურების შემდეგ კი, პედაგოგი 1000 ლარით დაჯარიმდება.
ანა ბერძენიშვილი მიიჩნევს, რომ შუახევის საოლქო-საარჩევნო კომისიამ სამართლიანი გადაწყვეტილება მიიღო: „ეს არის მსგავსი სახის ქმედებების პრევენცია. სასწავლო დაწესებულებაში, რომელიც დაფინანსებულია სახელმწიფო ბიუჯეტიდან და რომლის ცალსახა მიზანი არის დემოკრატიული, ლიბერალური ღირებულებების მქონე ახალგაზრდების აღზრდა, არ უნდა ხდებოდეს მსგავსი ფაქტები. არა აქვს მნიშვნელობა, რომელი პოლიტიკური სუბიექტის ან კანდიდატის სასარგებლოდ იქნება ეს გამოყენებული, კომისიამ ცალსახად სწორი და ადეკვატური გადაწყვეტილება მიიღო,“ – ამბობს ანა ბერძენიშვილი.
