Batumelebi

ხელვაჩაურში, მდინარე ჭარნალზე, უკანონო თევზჭერის  ფაქტი აღკვეთეს. სამართალდამრღვევი გარემოსდაცვითი ზედამხედველობის დეპარტამენტის აჭარისა და გურიის რეგიონული სამმართველოს თანამშრომლებმა, სასაზღვრო პოლიციის თანამშრომლებთან ერთად, გამოავლინეს.

მეთევზე მდინარე ჭარნალის კალაპოტში თევზაობდა. მას  მდინარის 18 კალმახი (salmo fario) ჰყავდა დაჭერილი, რომელიც წითელ ნუსხაშია შეტანილი.

კანონდამრღვევი ადმინისტრაციულ სამართალდარღვევათა კოდექსის 86-ე მუხლის მე-9 ნაწილით დაჯარიმდება სამი ათასამდე ლარით. საქმე შემდგომი რეაგირებისთვის სასამართლოს გადაეგზავნება.

 

რა ქონებას მიიღებს ქალი, თუკი მამაკაცმა თანაცხოვრების პერიოდში, მაგრამ მემკვიდრეობით მიიღო ქონება? ითვალისწინებს თუ არა სამართალი ფაქტობრივ თანაცხოვრებას და რა შემთხვევაში აქვს სასამართლოში დავის დაწყებას აზრი? – ამ კითხვებით ერთ-ერთმა მოქალაქემ მოგვმართა, რომელიც, როგორც თავად ამბობს, განქორწინებას აპირებს. წყვილს საერთო შვილი ჰყავს.

განქორწინების პრაქტიკაზე „ბათუმელები“ ანნა მდინარაძეს ესაუბრა, „ახალგაზრდა იურისტთა ასოციაციის“ აჭარის ფილიალის ხელმძღვანელს.

კონკრეტულ შემთხვევაზე რომ გვითხრათ, რამდენად აქვს ქალს განქორწინების შემდეგ სასამართლოში დავის მოგების შანსი, თუკი თანაცხოვრების პერიოდში მისმა მეუღლემ მემკვიდრეობით მიიღო საცხოვრებელი ბინა? 

მოქმედი კანონმდებლობის შესაბამისად არსებობს ასეთი დათქმა, რომ მეუღლეთა ინდივიდუალური საკუთრება არ ექვემდებარება გაყოფას. ქონება, რომელიც მიიღო მეუღლემ მემკვიდრეობით, არ ექვემდებარება გაყოფას. შესაბამისად, დავის პერსპექტიულობის გათვალისწინებით, სამართლებრივი დავა არ იქნება ამ ქალბატონისთვის შედეგის მომტანი.

ქონების რა ნაწილი ექვემდებარება გაყოფას განქორწინების დროს?  

თანაბრად იყოფა ქონება, რომელიც მეუღლეებმა შეიძინეს თანაცხოვრების დროს. გამონაკლისს წარმოადგენს ის ქონება, რომელიც  დაქორწინებამდე ეკუთვნოდა ამა თუ იმ მეუღლეს და ქონება, რომელიც მიღებულია მემკვიდრეობის ან ჩუქების გზით. ასევე ქონების გაყოფის წესი არ ვრცელდება პროფესიული საჭიროებისთვის შეძენილ ნივთებზე მიუხედავად იმისა, რომ შესაძლოა, ეს ქონება თანაცხოვრების დროს იყოს შეძენილი. კანონი ითვალისწინებს ფულად კომპენსაციას, თუ ეს პროფესიული საჭიროებისთვის შეძენილი ნივთი ერთ-ერთი მეუღლის ქონების წილს აღემატება. მაგალითად, ქმარმა შეიძინა სტომატოლოგიური კაბინეტი. მან სასამართლოს მიერ განსაზღვრული ფულადი კომპენსაცია უნდა გადაუხადოს ყოფილ ცოლს.

როგორ დასტურდება რომელი ქონება როდის არის შეძენილი? 

ეს არის ძალიან რთულად დასადასტურებელი. მხარეებმა სასამართლოს უნდა წარუდგინონ მტკიცებულებები, რომ ესა თუ ის ქონება ნამდვილად თანაცხოვრების დროსაა შეძენილი, მაგალითად, ქვითრები… შესაძლებელია ექსპერტიზაც ჩატარდეს. თუ მხარე მტკიცებულებებით ვერ შეძლებს იმის დადასტურებას, რომ ქონება თანაცხოვრების დროს, საერთო სახსრებით არის შეძენილი, სასამართლო უარს იტყვის მოთხოვნის დაკმაყოფილებაზე.

რას მიიჩნევს სასამართლო „საერთო სახსრებად“? 

პირდაპირ დათქმა არის კანონში, რომ საერთო სახსრები არის ფული, რომლითაც თანაცხოვრების დროს შეიძინეს ქონება მიუხედავად იმისა, რომ შესაძლებელია ერთ-ერთი მეუღლე საერთოდ არ მუშაობდა და მას სტაბილური შემოსავალი ამ პერიოდში არ ჰქონია. ხშირია შემთხვევები, როცა მამაკაცი თანაცხოვრების პერიოდში თავის საკუთრებად ირეგისტრირებს უძრავ ან მოძრავ ქონებას, მაგალითად, საცხოვრებელ ბინას, ავტომანქანას. განქორწინების დროს ცოლს შეუძლია მოითხოვოს ამ ქონების თანაბრად გაყოფა იმის მიუხედავად, რომ რეესტრის ჩანაწერებით მესაკუთრე მისი ყოფილი ქმარია და თვითონ უმუშევარი იყო იმ დროს, როცა ეს ქონება შეიძინეს.

რა მიიჩნევა თანაცხოვრებად? აუცილებელია თუ არა სამოქალაქო ქორწინება იმისთვის, რომ ქონების მოთხოვნის უფლება კანონიერი იყოს? 

აუცილებელია. სამოქალაქო კანონმდებლობა მეუღლეებს შორის ქონებრივ უფლებებს და მოვალეობებს წარმოშობს მხოლოდ კანონმდებლობით დადგენილი წესით ქორწინების შემთხვევაში. ჯვრისწერაც კი არ წარმოშობს ქონებრივ უფლებებს.

კიდევ ერთი აქტუალური საკითხი განქორწინების დროს – ალიმენტი. რის მიხედვით განისაზღვრება ალიმენტის ოდენობა? 

თითოეულ შემთხვევას ინდივიდუალურად აფასებს მოსამართლე. სასამართლო ითვალისწინებს ორ სტანდარტს. პირველი არის ბავშვის საჭიროება და მეორეა მშობლის მატერიალური შემოსავლები. რამდენი პროცენტი უნდა დაიქვითოს ხელფასიდან, რა ოდენობა, კანონში ეს განსაზღვრული არ არის. მოსამართლემ უნდა განსაზღვროს ალიმენტის ოდენობა.

პრაქტიკაში ხშირია სასამართლო დავა ალიმენტის გადახდაზე, როცა ყოფილი მეუღლე ალიმენტის გადახდას მიზანმიმართულად თავს არიდებს. 

ამის აღსრულება ძალიან რთულია, რადგან თუკი პირს, ვისაც ალიმენტის გადახდა დააკისრეს, არ უფიქსირდება შემოსავლები, თუ მას არ აქვს უძრავ-მოძრავი ქონება, პრაქტიკულად რეალურ შედეგს მხარე ვერ იღებს ამ სასამართლო დავიდან. ერთადერთი, რაც შესაძლებელია მოხდეს, არის მოვალეთა რეესტრში დაფიქსირება და პირს, ვისაც ალიმენტის გადახდა ევალება, როცა გაუჩნდება შემოსავლები, დააკისრებენ მის გადახდას, ასევე იმ ჯარიმის გადახდას, რასაც მას აღმასრულებელი დაარიცხავს.

სისხლის სამართლის კოდექსი ითვალისწინებს შემთხვევას, როცა პირი განზრახ არიდებს თავს ალიმენტის გადახდას, მაგრამ ამის დადასტურება პრაქტიკაში სირთულეს წარმოადგენს. მხარემ უნდა დაადასტუროს, რომ პირი განზრახ არიდებს თავს ალიმენტის გადახდას. ჩვენ მიგვიმართავს პროკურატურისთვის, მაგრამ არც ერთ შემთხვევაში სისხლის სამართლებრივი დევნა არ დაწყებულა. პროკურატურა ძირითადად გამოძიებას იწყებს, მაგრამ შემდეგ იგი წყდება.

განქორწინების დროს როგორ განსაზღვრავს სასამართლო, ვისთან უნდა დარჩეს ბავშვი – დედასთან თუ მამასთან? 

თუ მეუღლეები ვერ თანხმდებიან, სასამართლომ უნდა მიიღოს გადაწყვეტილება. ხშირად მამები მოგვმართავენ, რომ მათ მატერიალური მდგომარეობა უკეთესი აქვთ და უკეთეს პირობას შეუქმნიან ბავშვს. აქ მნიშვნელოვანია სოციალური სააგენტოს დასკვნა, ამ დროს საქმეში ერთვება ექსპერტი, რომელიც მხოლოდ მშობლის მატერიალურ მდგომარეობას არ აფასებს. გააჩნია, მიჯაჭვულობის ხარისხი ვისზე აქვს ბავშვს, ამის დადგენა ხდება. თუ ბავშვი 10 წელზე მეტისაა, სასამართლო ვალდებულია, გაითვალისწინოს ბავშვის აზრი, ვისთან უნდა ბავშვს ცხოვრება.

დავის საგანია ასევე ხშირად დღეების განსაზღვრა, როდის შეუძლია ნახოს მშობელმა ბავშვი. ბავშვს აქვს უფლება, ორივე მშობელთან ჰქონდეს ურთიერთობა და ამ კუთხითაც მოსამართლე იღებს გადაწყვეტილებას. ბავშვის ნახვის უფლება ასევე აქვს ბებიას და ბაბუას. გვქონია ასეთი შემთხვევაც, როცა ბებიამ და ბაბუამ იდავეს შვილიშვილის ნახვის დღეების განსაზღვრაზე.

ხშირია ასევე დავა ბავშვისთვის გვარის შეცვლაზე, როცა დედას სურს შვილს მისი გვარი ჰქონდეს. ამ დროს მნიშვნელოვანია დასაბუთება, რის გამო სურს მშობელს შვილისთვის გვარის შეცვლა და რატომ იქნება ეს ბავშვისთვის უკეთესი. მხოლოდ ის, რომ მშობლები ერთმანეთს გაუნაწყენდნენ, ეს არაა საკმარისი საფუძველი ბავშვისთვის გვარის შესაცვლელად.

ბაღის მობილური შემასხურებელი [შესაწამლი] 1 113 აპარატის შესაძენად აჭარის ბიუჯეტიდან ამჯერად 989 457 ლარია გამოყოფილი. აპარატებს აგროპროექტების მართვის ცენტრი ელექტრონული ტენდერით შეიძენს, რომელიც უკვე გამოცხადებულია და ის 18 ივნისს დასრულდება.

აპარატები ტენდერში გამარჯვებულმა უნდა მიაწოდოს ეტაპობრივად:

[checklist]

• I ეტაპზე – 400 ერთეული – ხელშეკრულების გაფორმებიდან არაუმეტეს 20 (ოცი) კალენდარულ დღეში;
• II ეტაპზე – 713 ერთეული – ხელშეკრულების გაფორმებიდან არაუმეტეს 40 (ორმოცი) კალენდარულ დღეში;

[/checklist]

თუმცა, მიმწოდებელს უფლება აქვს, ეტაპებს შორის განახორციელოს დაგეგმილზე უფრო მეტი საქონლის მიწოდება [თუნდაც, მაგალითად, პირველი ეტაპის დასრულებამდე მთლიანი რაოდენობის ერთობლივად].

აპარატები აჭარაში ფერმერებს თანადაფინანსებით დაურიგდებათ. შესაწამლი აპარატის ღირებულების 80% ფინანსდება აჭარის ბიუჯეტიდან, ხოლო 20%-ს იხდის ფერმერი. ერთი მობილური აპარატის ღირებულება კი ტენდერის დასრულების შემდეგ დადგინდება.

აჭარის სოფლის მეურნეობის სამინისტროს ინფორმაციით, მიმდინარე წელს უკვე შეიძინეს და დარიგდა 2 044 ცალი შესაწამლი აპარატი. სამინისტროში აცხადებენ, რომ ერთ აპარატში ფერმერმა, თანადაფინანსებით, მხოლოდ 180 ლარი გადაიხადა.

 

 

არ არსებობს ზუსტი სტატისტიკა,  საქართველოს რამდენი მოქალაქე მიმართავს ყოველწლიურად საფრანგეთს თავშესაფრის მოთხოვნით. ასოციაციის – „ქართველები საფრანგეთში“ ფეისბუქჯგუფში, საშუალოდ დღეში ერთი ადამიანი მაინც სვამს კითხვას, თუ როგორ უნდა ჩაბარდეს საფრანგეთში ლტოლვილად და რა პროცედურების გავლა მოუწევს მას თავშესაფარში მოსახვედრად.

მიზეზი, რის გამოც ქართველებს საფრანგეთში სურთ თავშესაფრის მიღება, ბევრია. სოციალურ-ეკონომიკური მდგომარეობის გამოსწორება და მძიმე დაავადება, რომლის მკურნალობა საქართველოში ძვირი ჯდება – ამ მიზეზებს შორის ყველაზე პოპულარულია.

ლტოლვილის სტატუსი, შენაცვლებითი (სუბსიდიალური) მფარველობა და მოქალაქეობის არმქონე პირის (აპატრიდის) სტატუსი – ეს არის ის სტატუსები, რომლებიც შეიძლება თავშესაფრის მაძიებელმა მიიღოს.

ლტოლვილის სტატუსის მიღება მაშინ შეუძლია ადამიანს, თუ ის არის დევნის მსხვერპლი რასის, რელიგიის, აღმსარებლობის, ეროვნების, გარკვეული სოციალური ჯგუფისადმი კუთვნილების ან პოლიტიკური მრწამსის გამო.

სტატუსის მიღება ასევე შეუძლია პირს, რომელიც თავისუფლებისთვის საქმიანობის საფუძველზე გახდა დევნის მსხვერპლი.

საფრანგეთში ლტოლვილის სტატუსს და შენაცვლებით მფარველობის მისაღებად საფრანგეთის ლტოლვილთა და მოქალაქეობის არმქონე პირთა მფარველობის ოფისს (OFPRA) უნდა მიმართოთ ან ლტოლვილთა ეროვნულ სასამართლოს (CNDA).

„ყველას, ნებისმიერ ადამიანს, აქვს თავშესაფრის მოთხოვნის უფლება. სპეციალური დაწესებულებებია, სადაც მიდიხართ, აბარებთ საბუთებს და შემდეგ ელოდებით ინტერვიუს. ვადებია, რა დროშიც გიბარებენ ინტერვიუზე. ამ ინტერვიუს დროს თქვენ უნდა უპასუხოთ კითხვებს, თუ რატომ ვერ ბრუნდებით საქართველოში, რატომ გინდათ საფრანგეთში ცხოვრება და რა საფრთხე გემუქრებათ. თქვენ უნდა დაამტკიცოთ, რომ თქვენს სიცოცხლეს ნამდვილად ემუქრება საფრთხე.

აუცილებელია  დოკუმენტაცია.

მაგალითად, ყოფილა შემთხვევა, როცა სექსუალური უმცირესობის წარმომადგენელმა წარმოადგინა კონკრეტული დოკუმენტაცია, თუ როგორ სცემეს. დოკუმენტაციაში ითვლება – მუქარის წერილებიც. საფრანგეთს იმის უფლებამოსილებაც კი აქვს, რომ მოიძიოს დეტალურად, რამდენად მართალია ინფორმაცია, რომელსაც თავშესაფრის მაძიებელი აწვდის. საფუძვლიანი გადამოწმების შემდეგ აძლევენ უკვე თავშესაფარს,“ – ამბობს სალომე საძაგლიშვილი. ის სამი წელია, რაც საფრანგეთის მიგრაციის და ინტეგრაციის დეპარტამენტის OFII -ის თანამშრომელია.

სალომე ამბობს, რომ ნებისმიერი მიგრანტი, რომელიც დადებით პასუხს მიიღებს ლტოლვილის სტატუსზე, ვალდებულია გაიაროს ტრენინგკურსი, სადაც მას აცნობენ ინფორმაციას მათი უფლებების და ვალდებულებების შესახებ საფრანგეთში.

სალომე იმ მიგრანტებს ხვდება, ვისაც თავშესაფრის მინიჭებაზე საფრანგეთმა დადებითი პასუხი მისცა და მათ საფრანგეთის კონსტიტუციას, ღირებულებებს და მთავარ პრინციპებს აცნობს.

„ნებისმიერი მიგრანტი, რომელსაც საფრანგეთი თავშესაფარს აძლევს, აწერს კონტრაქტს ხელს საფრანგეთთან, რომ იღებს ვალდებულებას პატივი სცეს საფრანგეთის ყველა ღირებულებას და ყველა კანონს. ჩვენ ვუხსნით მათ ამ კანონს. ტრენინგის შემდეგ უტარდებათ გამოცდა, შემდეგ იღებენ  სერტიფიკატს. ამ სერტიფიკატის საფუძველზე მათ აქვთ საფრანგეთში ცხოვრების უფლება. ყოველ წელს დაახლოებით 200 ათას მიგრანტს აძლევს საფრანგეთი ცხოვრების უფლებას“.

სალომეს თქმით, იმ სამი წლის მანძილზე, რაც ის OFII-ის თანამშრომელია, დაახლოებით 40 ათას მიგრანტს შეხვდა. მათ შორის იყვნენ ქართველებიც. მისი თქმით, ქართველებს ძალიან უჭირთ საბუთის აღება.

სალომეს თქმით, ვიზალიბერალიზაციის და ასოცირების ხელშეკრულების ხელმოწერის შემდეგ ძალიან გაიზარდა საფრანგეთში თავშესაფრის მთხოვნელთა რიცხვი. საქართველოს მოქალაქეები საფრანგეთში ტურისტად ჩადიან, შემდეგ ბარდებიან და ითხოვენ თავშესაფარს. იმის გამო, რომ საფრანგეთმა საქართველო უსაფრთხო ქვეყნების რიცხვში შეიყვანა, თითოეული საქმეს დაჩქარებული წესით სწავლობენ.

„ქართველების მიერ თავშესაფრის მოთხოვნაზე, ფაქტობრივად, არ არის დადებითი პასუხი. ჯერ ერთი ძალიან სწრაფად ხდება განხილვა, შესაბამისად ნაკლებად იკვლევენ, მალევე არის უარყოფითი პასუხი და მალევე გთხოვენ ქვეყნის დატოვებას. თუ ეწინააღმდეგები, შემდეგ მალევეა დეპორტი. რა თქმა უნდა, გამონაკლისი ყოველთვის არის, მაგრამ ძალიან იშვიათი,“ – ამბობს სალომე.

ცალკეული შემთხვევები, როდესაც საქართველოს მოქალაქეებმა საფრანგეთში თავშესაფარი მიიღეს, სექსუალურ უმცირესობებს უკავშირდება.

„საქართველო პოლიტიკური თვალსაზრისით არ განიხილება, როგორც ლგბტ თემის მიმართ განსაკუთრებით აგრესიული ქვეყანა. ის აგრესიული ფაქტები, რომელიც შეიძლება ხდებოდეს საქართველოს რომელიმე ქალაქში ან სოფელში, ჩვენ რომ გვგონია, რომ არ გადის ქვეყნებს გარეთ, ასე არ არის. რეალურად გადის და ძალიან ცუდად მოქმედებს ჩვენს რეპუტაციაზე. ამ ფაქტების შემდეგ ცნობილია, რომ  რეალური საფრთხე არსებობს, შესაბამისად, ჩემი აზრით, და გამოცდილებიდან გამომდინარე, უფრო მარტივია სექსუალური უმცირესობების წარმომადგენლებისთვის თავშესაფრის მიღება, პოლიტიკური თავშესაფრის მიღებაზე მარტივი. ყველაზე ნაკლებად შევხვედრივარ პოლიტიკური ნიშნით საბუთაღებულ ადამიანს, უფრო ხშირად არის, რომ ავადმყოფობის მხრივ აძლევს საფრანგეთი საბუთს. თუმცა ესეც გართულებულია. ადამიანმა უნდა დაამტკიცოს, რომ მისი დაავადების მკურნალობა გამორიცხულია მის ქვეყანაში და მხოლოდ ამის შემდეგ  მიიღებს თავშესაფარს,“ – ამბობს სალომე საძაგლიშვილი.

საფრანგეთის მიგრაციის და ინტეგრაციის დეპარტამენტის OFII -ის თანამშრომელი სალომე საძაგლიშვილი მიიჩნევს, რომ საფრანგეთში საქართველოს საელჩო უფრო აქტიურად უნდა ერთვებოდეს იმ პრობლემების მოგვარებაში, რომლებიც საქართველოს მოქალაქეებს ეხება. პირველ რიგში, რაც მოქალაქეებს აკლიათ, არის სწორი, ზუსტი ინფორმაცია იმის შესახებ, თუ რა ელით მათ, როდესაც საფრანგეთში ჩავლენ. სწორედ ამ მიზნით შექმნეს ასოციაცია „ქართველები საფრანგეთში“, მოგვიანებით კი გახსნეს ამავე სახელწოდების ფეისბუქჯგუფი, რომელმაც საინფორმაციო ცენტრის ფუნქციაც შეითავსა.

„ამ ჯგუფის წყალობით არაერთმა ადამიანმა გადაიფიქრა საფრანგეთში ჩამოსვლა. რეალური ისტორიების მოსმენით მიხვდნენ, რომ მოუწევდათ საშინელი გზის გავლა ამ ქვეყანაში თავშესაფრის მისაღებად. როდესაც ჩამოდიხარ, თუ არ გყავს არავინ, რომ შეგიფაროს, რჩები ქუჩაში. და არაერთი ქართველი ოჯახი ვიცი, რომელსაც ქუჩაში სძინავს. ქუჩაში ნიშნავს ხიდზე ცხოვრებას, ან ხიდქვეშ ცხოვრებას, ან ნიშნავს მანქანაში ცხოვრებას. მანქანაში სძინავთ ოჯახებს, დედას, მამას და მათ ოთხ შვილს.

როდესაც ჩამოდიხარ, სანამ პასუხი გექნება საფრანგეთის მხრიდან, იქამდე შენით უნდა მიხედო თავს. მაგალითად პარიზში, ყველაზე იაფ უბანში, ერთი ღამე რომ გაათიო, მინიმუმ უნდა გაითვალისწინო 30 ევრო. 30 ევრო არის 90 ლარი. ადამიანს იმის საშუალება თუ აქვს, რომ თვეობით 90 ლარი იხადოს ერთ ღამეში, საფრანგეთში ჩამოსვლაც არ მოუნდება. ფული რადგან არ აქვთ, ეს ხალხი რჩება ქუჩაში. მე, პირადად, წამომიყვანია ჩემთან სახლში ქალი, რომელიც ქუჩაში რჩებოდა.

ხშირად ხდება ისე, ქართველი აქ ჩამოდის, წლების განმავლობაში ბოლოს როგორც იქნება ამოისუნთქავს. მერე ეუბნებიან ნათესავებს: „ჩამოდი აქ ძალიან მაგარია, ჩამოდი, ჩამოდი… რეალურად ისე ხდება, რომ შემდეგ ეს ხალხი ქუჩაში რჩება. იყო ასეთი შემთხვევებიც – „ჩამოდი, ჩამოდი ბიჭო, მე მოგხედავ და შემდგომ ტელეფონიც აღარ აიღო“.

მე მესმის საქართველოში საშინელი ეკონომიკური მდგომარეობაა, მაგრამ უნდა დაფიქრდნენ, სანამ წამოვლენ, სანამ გადაწყვეტილებას მიიღებენ. ხშირ შემთხვევაში, მათი აქ ჩამოსვლა მთავრდება უარყოფითი პასუხით – „დატოვე ქვეყანა“, – ამბობს სალომე საძაგლიშვილი.

თუ თქვენ მაინც გადაწყვეტთ საფრანგეთში წასვლა და თავშესაფრის მოთხოვნას, მნიშვნელოვანია იცოდეთ თქვენი უფლებები.

არ აქვს მნიშვნელობა, ლეგალურად იმყოფებით თუ არალეგალურად საფრანგეთის ტერიტორიაზე, თავშესაფრის მოთხოვნა ორივე შემთხვევაში შეგიძლიათ.

სანამ ლტოლვილთა და მოქალაქეობის არმქონე პირთა მფარველობის ოფისში (OFPRA-ში) მოთხოვნას გააგზავნით, აუცილებელია დარეგისტრირდეთ ერთიან მიმღებ პუნქტში. საფრანგეთის ტერიტორიაზე სულ 34  ერთიანი მიმღები პუნქტია. იმისთვის, რომ მიმღებ პუნქტში სრულყოფილი ანკეტა შეავსოთ, საჭიროა მიმართოთ რომელიმე დამაკვალიანებელ ასოციაციას, სწორედ მათ ევალებათ თავშესაფრის მაძიებლებს ადმინისტრაციულ საქმეებში დაეხმარონ. ამგვარი ორგანიზაციების შესახებ ინფორმაციას ერთიან მიმღებ პუნქტში მოგაწვდიან.

დამხმარე ორგანიზაცია შეგავსებინებთ ელექტრონულ ანკეტას ფრანგულ ენაზე და დაგინიშნავთ ერთიან მიმღებ პუნქტში შეხვედრის თარიღს. მნიშვნელოვანია, რომ შეხვედრაზე არ დააგვიანოთ, ამ შემთხვევაში  შეხვედრა გაუქმდება.

გასაუბრება იმ ენაზე წარიმართება, რა ენაც მიუთითეთ ანკეტაში. მაგალითად, თუ აირჩევთ ქართულს, გასაუბრება ქართულ ენაზე ჩაგიტარდებათ.

მიმღებ პუნქტში დარეგისტრირების შემდეგ, პირველ ეტაპზე, აგიღებენ ანაბეჭდებს, დაადგენენ პასუხისმგებელ ქვეყანას და თქვენს საქმეს OFPRA დაჩქარებული წესით, 15 დღეში განიხილავს. დაჩქარებული წესით განაცხადების განხილვა ვიზალიბერალიზაციის შემდეგ ხდება, რადგან საფრანგეთმა საქართველო უსაფრთხო ქვეყნების სიაში შეიყვანა.

სწორედ იმის გამო, რომ საქართველო უსაფრთხო ქვეყნების სიაშია, საქართველოს მოქალაქეები, უმრავლეს შემთხვევაში მომდევნო ეტაპზე ვერ გადადიან. ანკეტის დაჩქარებული წესით განხილვის შემდეგ, OFPRA უარს ეუბნება ლტოლვილის სტატუსის მინიჭებაზე, მათ უწერენ ბრძანებას, რომლის მიხედვითაც განსაზღვრულ ვადაში უნდა დატოვონ საფრანგეთი (დაახლოებით ერთ თვეში).

თუ ისე მოხდა, რომ ლტოლვილის სტატუსის მიღების კრიტერიუმს აკმაყოფილებთ, აგენტი იწყებს თქვენ შესახებ დეტალური ინფორმაციის მოძიებას და გადამოწმებას, იკვლევს იმ მიზეზებს, რამაც საქართველოს დატოვება გაიძულათ. ასევე ეძებს თავშესაფარს თქვენთვის. მეორე ეტაპზე გადასულ თავშესაფრის მაძიებლებს ენიშნებათ ფულადი დახმარება. ფულადი დახმარება მას შემდეგ გენიშნებათ, რაც OFPRA თქვენს თავშესაფრის მოთხოვნას მიიღებს, ანუ რეგისტრაციიდან 21 დღის შემდეგ.

თუ OFPRA-მ უარი გითხრათ თავშესაფრის მოცემაზე, შეგიძლიათ ეს გადაწყვეტილება ლტოლვილთა ეროვნულ სასამართლოში – CNDA გაასაჩივროთ.

გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტისა და ეროვნული სატყეო სააგენტოს თანამშრომლებმა მაისის თვეში ხე-ტყის უკანონო მოპოვებისა და ტრანსპორტირების 332 ფაქტი გამოავლინეს, მათ შორის 51 ფაქტი სისხლის სამართლის დანაშაულების ნიშნებს შეიცავს.

უწყების ინფორმაციით, ხე-ტყის უკანონო მოპოვებისა და ტრანსპორტირების ყველაზე მეტი – 57 ფაქტი გამოვლინდა კახეთის რეგიონული სამმართველოს სამოქმედო ტერიტორიაზე, აჭარის რეგიონული სამმართველოს მასშტაბით 15 ფაქტი დაფიქსირდა, იმერეთში – 47, გურიაში – 4, ხოლო რაჭა-ლეჩხუმი ქვემო სვანეთში – 30, სამეგრელო-ზემო სვანეთის რეგიონული სამმართველოს სამოქმედო ტერიტორიაზე – 49, მცხეთა-მთიანეთში – 16, შიდა ქართლში – 45, ქვემო ქართლის მასშტაბით – 16, ხოლო სამცხე-ჯავახეთის რეგიონული სამმართველოს სამოქმედო ტერიტორიაზე – 50, თბილისის მასშტაბით 4 ფაქტი დაფიქსირდა.

ჯამში, ამოღებულია უკანონოდ მოპოვებული 461 მ3-მდე ხე-ტყე.

ამავე პერიოდში დაფიქსირდა სახერხი საამქროს რეგლამენტის დარღვევის 38 ფაქტი და ამოღებულია 27 ერთეული დაურეგისტრირებელი სახერხი დანადგარი.

მასალები შემდგომი რეაგირებისთვის შესაბამის უწყებებშია გადაგზავნილი.

ბათუმში, მუსხელიშვილის ქუჩაზე მცხოვრები ათამდე ოჯახი აცხადებს, რომ მათ საკარმიდამო ნაკვეთებში, საცხოვრებელი სახლებიდან 2-5 მეტრში, ისე გაჰყავთ ახალი გზა, რომ არანაირ კომპენსაციას არ უხდიან. ეს ოჯახები ამბობენ, რომ დაახლოებით ორი წლის წინ განსასახლებელთა სიაში იყვნენ. დღეს, როცა სამუშაოები ფაქტობრივად მათ ეზოებშია დაწყებული, ეუბნებიან, რომ არც განსახლების სიაში არიან და არც კომპენსაციას სთავაზობენ.

„შეიცვალა გზის მიმართულებაო, თუმცა სახლებთან ახლოს დააყენეს ნიშნულები, თხრიან ხეებს, მუშაობს მძიმე ტექნიკა და კედლები იბზარება, ჭაღიც კი ჩამოვარდა. ყურადღებას არავინ გვაქცევს. ჩვენ რაც გავიგეთ, სავარაუდოდ, აქ მიწა უნდა მოიზვინოს, გაკეთდეს ბურჯები და ასევე ახალი გზისთვის ხიდი გაკეთდეს. გამოდის, რომ ჩემი სახლის პირველი სართული და შესაძლოა მეორე სართულის ნახევარიც, ამ მიწაყრილის ქვემოთ აღმოჩნდეს. ჩემი და ჩემი მეზობლის სახლების თავზე კი ჩქაროსნული მაგისტრალი გაკეთდება. ამაზე პასუხი ვინ უნდა აგოს, ვერ გავიგეთ,“ – ამბობს ვახტანგ სურმანიძე.

ვახტანგ სურმანიძის, მანანა აბაშიძის, თეიმურაზ მამუჭაძის, ლუიზა ნებაძის, ამირან მერკულაძის ოჯახების წარმომადგენლები ამბობენ, რომ თუ მათი ცხოვრებისა და საკუთრების უფლება დაცული არ იქნება, სამუშაოების ჩატარების უფლებას არავის მისცემენ და პროტესტის ნიშნად შესაძლოა ბათუმი-ახალციხის ავტომაგისტრალიც გადაკეტონ.

ეს ოჯახები, რომლებიც თავს დაზარალებულად მიიჩნევენ, ბათუმს შემოერთებულ ტერიტორიაზე [მახვილაურის დასახლებაში], მუსხელიშვილის ქუჩაზე ცხოვრობენ.

არსებული პროექტის მიხედვით, აღნიშნულ ტერიტორიაზე ბათუმის შემოვლითი გზა უნდა აშენდეს.

საქართველოს საავტომობილო გზების დეპარტამენტის აჭარის საავტომობილო გზების სამსახურის უფროსი ირაკლი მაჩალაძე „ბათუმელებთან“ სატელეფონო საუბარში ამბობს: „თუ არ არიან სიაში, ესე იგი არ არიან, მაგრამ ბევრი არასწორ ინფორმაციას ავრცელებს… როცა დაიწყება გზის, ხიდის მშენებლობა თუ ასასვლელების გაკეთება, ვინმეს კერძო ნაკვეთში თუ მოხვდება ნებისმიერი სახის ზემოქმედება, ან ვთქვათ, მექანიზმი გაივლის, ტრაქტორი და ა.შ. შეუძლიათ მოვიდნენ, დაწერონ განცხადება და საზედამხედველო ორგანო განიხილავს მათ საკითხს. აუცილებლად მოხდება რეაგირება – ან აღიკვეთება მსგავსი ქმედება და არ მოხდება მის ნაკვეთში არანაირი მოქმედებების განხორციელება, ან მოხდება ანაზღაურება, თუ იქნება ამა თუ იმ ნაკვეთის გამოსყიდვის აუცილებლობა“.

რამდენ მეტრში შეიძლება საავტომობილო ხიდისგან იდგეს საცხოვრებელი სახლი? – ამ კითხვაზე აჭარის გზების დირექციაში აცხადებენ, რომ არსებობს გზის ბუფერული ზონა, არსებობს წესები, სტანდარტები და შესაბამისი დეტალები თბილისიდან იმართება.

„ვისაც აინტერესებს კონკრეტული საკითხები, მოვიდნენ ჩვენთან. აქ მოვლენილია სპეციალისტი, რომელიც აზიის განვითარების ბანკის თანამშრომელია, არის იურისტ-კონსულტანტი მაგ საკითხებზე და შევუთანხმებთ და შევახვედრებთ. გაესაუბრონ, არ არის პრობლემა. თუ რაიმე ზემოქმედება ხდება კერძო საკუთრებაზე, ეს უყურადღებოდ არ დარჩება. შევისწავლით, მივავლენთ ვინმეს ადგილზე, რომ შეისწავლოს არსებული სიტუაცია,“ – ამბობს ირაკლი მაჩალაძე.

 

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 4-5 ივნისს, ბათუმში საკმაოდ გრილი, ღრუბლიანი ამინდია მოსალოდნელი. საღამოს და ღამით, შესაძლოა ხანმოკლე წვიმა.

იქროლებს ცვალებადი მიმართულების ქარი 10-15 მეტრი წამში.

ჰაერის ტემპერატურა სანაპირო რაიონებში იქნება:

• დღისით: 20  – 25  გრადუსი  
• ღამით: 13 – 18 გრადუსი 

მთაში მოსალოდნელია:

• დღისით: 16 – 21  გრადუსი 
• ღამით: 5 – 10 გრადუსი 

ზღვის წყლის ტემპერატურა 20 გრადუსია.

მომდევნო ორ დღეს ძირითადად მოსალოდნელია უნალექო ამინდი – დღისით – ღრუბელი, ღამით კი – ხანმოკლე წვიმა.

ბათუმში, კვარიათის პლაჟზე, მოქალაქე ბუნგალოს აშენებს. მას ადგილზე უკვე განთავსებული აქვს რკინის კონსტრუქცია. მშენებლობის ადგილზე ხელოსნები დაგვხვდნენ, რომლებმაც გვითხრეს, რომ აქ გასულ წელს ბუნგალო „ტორნადო“ ფუნქციონირებდა და „წელსაც იგივე იქნება, ოღონდ განახლებული“. მათივე თქმით, მეპატრონეს ადგილი აუქციონზე, იჯარის წესით აქვს აღებული და მშენებლობის ნებართვაც მიიღო.

ხელოსნებმა არ მოგვცეს მეპატრონის საკონტაქტო ინფორმაცია და გვითხრეს, რომ ის „ბათუმელებს“ თავად დაუკავშირდებოდა, თუმცა მეპატრონე რედაქციას არ დაკავშირებია.

ბათუმის მერიის საპროექტო-სამშენებლო ზედამხედველობის სამსახურის ინფორმაციით კი, მერიას კვარიათის სანაპიროზე, იმ კონკრეტულ ადგილზე, სადაც ბუნგალო „ტორნადოს“ მშენებლობა მიმდინარეობს, ნებართვა გაცემული არ აქვს.

„ამიტომაც მივმართავთ შესაბამის ზომებს,“ – განაცხადა ბათუმის მერიის საპროექტო-სამშენებლო ზედამხედველობის განყოფილების უფროსმა, ირაკლი მოქიამ.

უკანონო მშენებლობის შემთხვევაში ზედამხედველობის სამსახური ჯერ მოქალაქეს აფრთხილებს და ტერიტორიის პირვანდელ მდგომარეობაში მოყვანას სთხოვს, წინააღმდეგ შემთხვევაში კი, აჯარიმებს.

ამავე თემაზე: 

მერია: თუ მოქალაქე კვარიათის პლაჟზე დაყრილ მიწას არ გაიტანს, სასამართლოს მივმართავთ

See more

 

ხორავას ქუჩაზე მოკლული არასრულწლოვანების საქმის არაობიექტურად გამოძიებას საზოგადოებაში დიდი პროტესტი მოჰყვა. რამდენიმე დღეა თბილისში და საქართველოს სხვა ქალაქებში ხალხი სამართლიანი გამოძიების მოთხოვნით ქუჩაში დგას. მოკლული დავით სარალიძის მამა, ზაზა სარალიძე თავდაპირველად ხელისუფლებას მისი შვილის მკვლელების დასჯას სთხოვდა, თუმცა პროცესებმა ბოლო პერიოდში სხვა მიმართულება მიიღო. ხელისუფლება სამოქალაქო პროტესტის დემონიზებას, „ნაციონალური მოძრაობა“ კი ამ პროცესების ხელში აღებას ცდილობს. როგორ შეიძლება განვითარდეს მოვლენები რუსთაველზე და რა აჩვენა ამ დღეების სამოქალაქო აქტივიზმმა? ამ თემაზე „ბათუმელებთან“ ისტორიკოსი გრიგოლ გეგელია საუბრობს.

გრიგოლ, ვის აძლევს ხელს ის მოცემულობა, რაც შეიქმნა რუსთაველზე ზაზა სარალიძის და მისი მხარდამჭერების ირგვლივ. ვინ ცდილობს სამოქალაქო პროტესტის დემონიზირებას?

ზოგადად, ქვეყანაში გვაქვს საშინელი მოცემულობა ყველა გაგებით, მაგრამ პოლიტიკურ ვითარებას თუ შევაფასებთ, ვხედავთ, რომ პოლიტიკური პარტიების მიმართ ხალხის ნდობა არის ძალიან დაბალი, პრეზიდენტის მიმართაც ნდობა არის დაბალი, რადგან თვითონ პრეზიდენტი არის ინერტული – სწორედ ის უნდა ყოფილიყო ასეთ დროს მორალური ავტორიტეტი პოლიტიკური გაგებით, რადგან პარტიული კრიზისი ცალსახაა.

მთავრობა თავისთავად არის ძალიან დისკრედიტირებული და რეალურად, არცერთი პოლიტიკური ინსტიტუცია არ იმსახურებს ხალხის ნდობას.

დღეს ხელისუფლება ცდილობს ყურადღება გადაიტანოს „მარტივ -მარტივ“ გნიასზე. მე არ ვამბობ, რომ სარალიძის საქმეა მარტივი, უდიდესი ტრაგედიაა ეს, მაგრამ თვითონ პარადიგმა, რითიც „ქართული ოცნება“ ქვეყნის მართვას ცდილობს, ეს არის მარტივი გნიასების პარადიგმა, ამაში კი მას ხელს უწყობს „ნაციონალური მოძრაობა“.

თუ დავაკვირდებით, ეს ორი ძალა რეალურად ძალიან შეხმატკბილებულია, რადგან მათ ერთმანეთი სჭირდებათ, ერთი მეორეს აძლევს ხელს. ისინი ორივე არიან ამ კრიზისული ვითარებების შემქმნელები და ორივე ამითი იწერს ქულას. მაგრამ შედეგად ის ხდება, რომ ყველაზე არსებითიდან გადადის ყურადღება, მათ შორის სოციალური პრობლემებიდან, ეროვნული უსაფრთხოებიდან და სხვა უამრავი მწვავე პრობლემებიდან, რომელიც ქვეყნის წინაშე დგას.

თქვენ ამბობთ, რომ დღეს არსებული პოლიტიკური კრიზისი სჭირდება ორივე მხარეს – „ქართულ ოცნებას“ და „ნაციონალურ მოძრაობას“. ანუ დღეს არსებული ვითარება ამ ხელისუფლებისთვის საფრთხის შემცველი არ არის?  

ახლა „ქართული ოცნება“ საქმეს ისე წარმოაჩენს, თითქოს პატრიოტი, ეროვნული ხელისუფლებაა და ყველაფერს აკეთებს სამართლიანობის აღსადგენად, იძიებს სარალიძის საქმეს და ა.შ. თითქოს არავითარ გადაცდომას არ აქვს ადგილი და ეს აჟიოტაჟი „ნაციონალების“ მიერ არის გამოწვეული.

„ნაციონალები“ კი თავის პოლიტიკურ ქულებს იწერენ და აჩვენებენ, რომ აი ნახეთ, ასეთი უსამართლობა ხდება „ქართული ოცნების“ დროს.  სწორედ ამიტომ ვამბობ, რომ ისინი ერთმანეთს აძლიერებენ, ერთმანეთი ჰყავთ, რადგან არ არის მესამე ძალა, რომელიც მათ ეტყვის, თუ რამდენად სამარცხვინოდ იქცევიან ამ პროცესში.

ეს ნიშნავს იმას, რომ არც „ქართულ ოცნებას“ და არც „ნაციონალურ მოძრაობას“ რეალურად სარალიძის საქმეზე სიმართლის დადგენა, ადამიანის უფლება არ აინტერსებთ?  

რა თქმა უნდა, მათ აინტერესებთ ძალაუფლების შენარჩუნება, არსებული მდგომარეობის შენარჩუნება, რომელშიც ერთი მეორეს ხელს უწყობს. თუ დააკვირდებით ამ ორ პოლიტიკურ ძალას ყველა მიმართულებით განაწილებული აქვთ სფეროები. იქნება ეს ბიზნეს ინტერესები თუ პოლიტიკური ძალაუფლება.

რა როლი ჰქონდათ ამ პროცესებში დესტრუქციულ ძალებს, – მმკ-ს და ფაშისტურ დაჯგუფებებს, ვის მოთამაშეები არიან ისინი?

ამ პატარა და ექსტრემისტულ ჯგუფებს ხელისუფლება იყენებდა სათავისოდ და ახლა კიდევ უფრო გამოიკვეთა ეს თანმიმდევრული თარგი. განსაკუთრებით ეს ეხება ქართულ მარშს, რომელიც ყოველთვის შავბნელ პოლიტიკას უჭერს მხარს – ანტიქართულ, ანტიქრისტიანულ და ძირითადად პრორუსულს. ამას ვამბობს სრული პასუხისმგებლობით, რადგან მე ვიკვლევ პოპულიზმს ევროპაში და შემიძლია ვთქვა, რომ ეს მარში ერთი ერთში იმეორებს ნარატივს, რომელიც აქვთ ნეონაცისტურ ჯგუფებს რუსეთში.

ეს ჯგუფები ხელისუფლებას ირიბად აძლიერებს, ამით აჩვენებენ ზომიერ კონსერვატორ ამომრჩეველს, რომ მე თუ არა, მაშინ ისინი. მეორეს მხრივ კი, მათი პირით აჟღერებენ ისეთ რამეს, რაც ხელისუფლებას აწყობს.

რელიგიური ექსტრემისტული ჯგუფის მმკ-ს გამოჩენას ამ პროცესში იყო თუ არა პირდაპირ კავშირში სარალიძის შვილის მკვლელების დაფარვასთან? რადგან ჩანაწერები, რომელიც რუსთავი 2-მა გაავრცელა, აჩვენებდა ამ დაჯგუფების ერთ-ერთი  სასულიეროს პირის შვილის თანამონაწილეობას ამ ამბავში.

თუ ეს ყველაფერი დადასტურდება, მაშინ ახალი ვარიანტი ჩნდება, რომ ქრისტეს სახელით მოსაუბრე ადამიანები სინამდვილეში ხელს აფარებენ დანაშაულში შესაძლო მონაწილეს და თუ ეს ასეა, არის ორმაგი სირცხვილი მმკ-ს ანგარიშზე, რომელიც ისედაც შერცხვენილია და ისედაც პერმანენტულად იცავს ანტიქრისტიანულ პოზიციებს. თუ დამნაშავესაც აფარებენ ხელს, მგონი დროა ვერდიქტი გამოიტანოს აბსოლუტურად ყველა ჩვენგანმა იმაზე, თუ რა არის ე.წ. მართლმადიდებლური კავშირი.

საპატრიარქოს პოზიცია იყოს საკმაოდ ნეიტრალური საპროტესტო აქციების მიმართ – ამ სასულიერო პირის გამო ხომ არა. როგორ ფიქრობთ, შესაძლოა სცოდნოდათ საპატრიარქოში ეს ამბავი?

საპატრიარქო ისტორიულად ყოველთვის იკავებს ზომიერ პოზიციებს და ყოველთვის ელოდება მოვლენების განვითარებას. ახლაც მან დაიჭირა ზოგადი პოზიცია, ტიპიურად ასე ხდება ხოლმე თუ საპატრიარქო, მოცემულ კონკრეტულ მომენტში არ აპირებს, რომ ხელისუფლებას წყალი შეუყენოს.

საპატრიარქოში მმკ-ს ჰყავს თავისი დასაყრდენი, რიგი იერარქების სახით, თუმცა, ამავე დროს ჰყავს მტრებიც. საპატრიარქოც არ არის ერთგვაროვანი და სხვადასხვა ტიპის იერარქები სხვადასხვა მომავლისთვის იბრძვიან.

მეორეს მხრივ, შესაძლებელია, რომ სცოდნოდა ეს ამბავი საპატრიარქოს, მით უმეტეს, როცა რუსთავი 2-იდან გვესმის, რომ ორი თვეა მათ იციან ამის შესახებ, რომ დეკანოზის შვილი მონაწილეობდა სისხლიან გარჩევაში. თუ იმასაც გავითვალისწინებთ, რომ რუსთავი 2-ის დირექტორი იყო პატრიარქთან შეხვედრაზე, მაშინ მარტივი დასაშვებია ვივარაუდოთ, რომ რაღაც იცოდა საპატრიარქომ.

ამ ძალებს – მმკ-სა და ნეოფაშისტებს კიდევ სხვა დატვირთვაც ჰქონდათ. როგორ ფიქრობთ, რატომ იყვნენ ისინი ამ აქციებიდან თითქმის ორი დღე ჩუმად?

სამართლიანობის მხარეს ან დგახარ ან არა. ხელისუფლებამ ჯერ თქვა, რომ საპროტესტო მუხტი „ნაციონალების“ აგორებულია, შემდეგ კი ეს დაჯგუფებები გამოჩნდნენ და ცდილობენ, რომ პროტესტის მუხტი გაწყდეს.

როგორ შეიძლება განვითარდეს პროცესები, რამდენად პროგნოზირებადია ის სიტუაცია, რაც გვაქვს დღეს?

აქ რამდენიმე სცენარია: პირველი ის, რომ ამ საქმეს გადაჭრიან ისე, როგორც საჭიროა და დააპატიმრებენ, ვინც დასაპატიმრებელია. ჩემი რჩევა იქნებოდა, რომ გადადოს გვერდზე „ქართულმა ოცნებამ“ თავისი მერკანტილური მოტივები და გახსნა სარალიძის საქმე. მეორე, ეს აჩვენებს, რომ აქამდე გამოძიების პროცესი იყო პოლიტიკურად მართული, რაც გამოიწვევს საპროტესტო მუხტის აწევას.

ამას დაემატება სხვა ტიპის ოპოზიციური არგუმენტები და ეს პროცესი გაგრძელდება. შესაძლებელია ამან ბევრად შეუქცევადი სახეც მიიღოს.

გვახსოვს, როგორ დაასრულა სააკაშვილმა, რომელიც ბევრად უფრო ძლიერი იყო პოლიტიკურად, „ქართული ოცნება“ კი უფრო უარესად დაასრულებს თუ არ მიჰყვება სამართლებრივ გზას.

და კიდევ ერთი, ქართველი ხალხი აღარ იღებს ამ რაღაცეებს მარტივად, აღარ ტყუვდება.  ჩვენ გავიზარდეთ როგორც ჩანს, ამაზე მეტყველებს ამდენი ადამიანის ქუჩაში გამოსვლა და აშკარაა, რომ ხალხი ახალ პოლიტიკას ემხრობა.

 

 

დღეს, 3 ივნისს ბათუმში საზღვაო სეზონი ოფიციალურად გაიხსნა. სანაპიროზე, ანბანის კოშკის მიმდებარე ტერიტორიაზე ამ წუთებშიც მიმდინარეობს სხვადასხვა სახის გასართობი ღონისძიებები. პლაჟზე მისულ ბავშვებს სხვადასხვა გასართობი  დახვდებათ. დამონტაჟებულია სცენა, სადაც მთელი დღის მანძილზე დიჯეები დაუკრავენ.

შეგეძლებათ მოუსმინოთ ქართველ  დიჯეებს: ლაშა გურული, „Chiki“, გაბუნია, Vako T. ასევე გამოვლენ ბენდები: bedford falls-ი და Groove Phoenix-ი.

საღამოს 21:00 საათზე კი გერმანული საცეკვაო დასი „Friedrichstadt Ballett”-ი გამართავს საკარნავალე შოუს.

 

მაღალი სიჩქარით მოძრავი BMW-ს ტიპის ავტომანქანა თბილისი-ბათუმის მაგისტრალის სოფელ ბუკნარის მონაკვეთზე შეეჯახა ჟიგულის ტიპის ავტომანქანას, რომელშიც საშუალო ასაკის ქალი და კაცი ისხდნენ. დაღუპულია ჟიგულში მყოფი ორივე პირი.

გარდაცვლილების ოჯახის წევრები, რომლებიც ამ წუთებში იმყოფებიან სამხარაულის ექსპერტიზის ბიუროსთან, შიშობენ, რომ ავტომანქანაში შესაძლებელია მჯდარიყო მცირეწლოვანი ბავშვიც.

„ბათუმელებმა“ ინფორმირებულ წყაროსთან გაარკვია – დაღუპულებს შორის არ არის მცირეწლოვანი ბავშვი.

თვითმხილველების თქმით, ავტოავარიის მონაწილე BMW-ს მძღოლი „ძალიან მთვრალი“ იყო და ავარიის შემდეგაც კი ვერ აცნობიერებდა, რაც მოხდა.

ქალი და კაცი, თვითმხილველების თქმით, ადგილზევე გარდაიცვალნენ. იმავე ადამიანის თქმით, BMW-ს მძღოლი, სავარაუდოდ, მიიმალა.

შს სამინისტროსთვის გვინდოდა გვეკითხა, ნამდვილად მიიმალა თუ არა ავტოავარიის გამომწვევი მძღოლი. უწყებაში სატელეფონო ზარებს არ უპასუხეს.

„სოკარ ჯორჯია გაზი აჭარას“ ხელმძღვანელის დავით ლეკიშვილის განცხადებით, ბუნებრივი აირის მიწოდება აჭარას აღარ შეუწყდება.

„მომაწოდეს ინფორმაცია, რომ  აღდენითი სამუშაოები დროულად ჩატარდა მთავარ მილსადენზე და აღდგა დაზიანებული გაზსადენი. შესაბამისად, გაზის მოწოდებაზე  შეფერხება აღარ იქნება“-ამბობს „ბათუმელებთან“ საუბარში ლეკიშვილი.

დღეს, 2 ივნისს, „სოკარის“ ინფორმაციით, ავარია მოხდა მთავარ გაზსადენზე, გვარა-ოჩხამურის ტერიტორიაზე, საიდანაც მარაგდება აჭარა ბუნებრივი აირით.

„სოკარში“ ამბობდნენ  რომ თუკი დაზიანებული მილის აღდგენა დროულად არ მოხდებოდა, საღამოს ათი საათიდან ბუნებრივი აირის მიწოდება აჭარას შეუწყდებოდა.

 

დღეს, „ევროპულმა საქართველომ“ მთავარი პროკურატურის პოსტზე მმართველ პარტიას შალვა შავგულიძის კანდიდატურა შესთავაზა. შალვა შავგულიძე „ბათუმელებთან“ ამბობს, რომ ის მზად არის გახდეს მთავარი პროკურორი, თუკი მმართველი გუნდი მის კანდიდატურას დაუჭერს მხარს. შალვა შავგულიძეს ვკითხეთ, იმ ფონზე, როცა ზაზა სარალიძე აცხადებს, რომ გამოძიებამ განზრახ გაანადგურა ყველა მტკიცებულება, რითაც დადგინდებოდა ვინ მოკლა მისი შვილი, რა შეუძლია ახალ მთავარ პროკურორს გააკეთოს?

შალვა შავგულიძის აზრით, „თუ აღმოჩნდება, რომ მტკიცებულებები სრულად არის განადგურებული და იმდენად არის განადგურებული და დაზიანებული, რომ არავითარი შესაძლებლობა არ არის ობიექტური და სრულყოფილი გამოძიების ჩასატარებლად, მაშინ წესიერი და კვალიფიციური პროკურორი დაწერ დასკვნას, რომ მტკიცებულებები ნამდვილად არის განადგურებული.

გარდა ამისა, დაიდება დასკვნა, თუ სად და ვის მიერ განადგურდა მტკიცებულებები. ამით დააყენებ იმ ადამიანების, იმ თანამდებობის პირების, იმ სამართალწარმოების თუ ექსპერტის და ა.შ. პასუხისმგებლობის საკითხს, ვინც გაანადგურა მტკიცებულებები და ამ მდგომარეობამდე მიიყვანა სიტუაცია“.

რაც შეეხება სისტემის შეცვლას, შალვა შავგულიძის აზრით, ამას მხოლოდ პროკურატურა ვერ შეცვლის: „ეს უნდა შეცვალოს ხელისუფლებამ. სისტემის სიცუდე კი იმაში მდგომარეობს, რომ მმართველ პოლიტიკურ ძალას ეძლევა აბსოლუტური გავლენა პროკურატურის სისტემაზე, ეს გავლენა იმაში მდგომარეობს, რომ მმართველი პოლიტიკური ძალის ხელშია მთავარი პროკურორის დანიშვნის და მისი გათავისუფლების საკითხიც.

მთავარი პროკურორი კი ნიშნავს ქვეყანაში სხვა პროკურორებს, გამომძიებლებს, სტაჟიორებს და ათავისუფლებს მათ.

ინსტიტუციურად, პროკურატურის სისტემა მთლიანად დაქვემდებარებულია მმართველ პოლიტიკურ ძალაზე. თუმცა, ერთ კონკრეტულ საქმეზე, როცა არის საზოგადოების ამხელა ზეწოლა, როდესაც ხელისუფლება იძულებულია პროკურორი გადააყენოს, როცა იძულებულია საგამოძიებო კომისია შექმნას და იქ უმცირესობას შესთავაზოს უმრავლესობა, ამ სიტუაციაში ახალი პროკურორი, დროის გარკვეულ მონაკვეთში, კონკრეტულად ერთ თუ რამდენიმე საქმეზე, რა თქმა უნდა, შეძლებს სამართლიანი გამოძიების ჩატარებას.  რა თქმა უნდა, ეს პროკურორი დიდხანს ვერ დარჩება თანამდებობაზე, რადგან ეს ძალა გაუშვებს“.

შალვა შავგულიძის თქმით, დღევანდელ სიტუაციაში პასუხისმგებლობის აღება ძალიან რთულია, „მაგრამ როცა ასე მწვავედ დგას საკითხი და როცა საზოგადოების ნაწილი მოგმართავს და სჯერა, რომ შენ ხარ ის კანდიდატი, ის იურისტი, რომელიც ხარ იმ კვალიფიკაციის და იმ პრინციპულობის, რომ ამ სიტუაციაში სამართლიანობის აღდგენისთვის შეგიძლია დადებითი ფუნქცია შეასრულო, როგორ უნდა გაექცე ამ პასუხისმგებლობას და რატომ უნდა თქვა უარი?

სამწუხაროდ, „ქართული ოცნება“ დაადგა „ნაციონალური მოძრაობის“ გზას და გადაწყვიტა, რომ მართვადი პროკურატურა, მართვადი სასამართლო კარგია. სწორედ ამიტომ დავტოვე უმრავლესობა და ამიტომ ვოპონირებდი, მაგრამ დღეს იმიტომ დავთანხმდები მთავარ პროკურორობაზე შემოთავაზებას, რომ ასეთი ცუდი მდგომარეობაა პროკურატურაში“.

შალვა შავგულიძე დარწმუნებულია, რომ „ქართული ოცნება“ მის კანდიდატურას მთავარი პროკურორის თანამდებობაზე მხარს არ დაუჭერს.

 

როგორც „სოკარ ჯორჯია გაზი აჭარას“ ხელმძღვანელი დავით ლეკიშვილი „ბათუმელებთან“ ამბობს, ცოტა ხნის წინ, მაგისტრალზე, საიდანაც აჭარას ბუნებრივი აირის მარაგი მიეწოდება, ავარია მოხდა. ავარიის ეპიცენტრია გვარა-ოჩხამურის ტერიტორია, საიდანაც მარაგდება აჭარა ბუნებრივი აირით.

„ამ ტერიტორიაზე სამუშაოებს აწარმოებს საქართველოს გაზის ტრანსპორტირების კომპანია, სადაც ახალი გაზსადენის მშენებლობა მიმდინარეობს და შესაძლებელია მძიმე ტექნიკამ დააზიანა გაზსადენი. ავარიის გამომწვევი მიზეზის შესახებ ზუსტი ინფორმაცია არ გვაქვს.

ამ ეტაპისთვის მოსახლეობას ბუნებრივი აირი ჩვენი მარაგიდან მიეწოდება, რომელიც დაახლოებით დღეს, 22:00 საათამდე იქნება საკმარისი. შემდეგ კი შესაძლებელია მოსახლეობას ბუნებრივი აირის მიწოდება შეუწყდეს“, – ამბობს დავით ლეკიშვილი.

როგორც ლეკიშვილი ამბობს, ავარიის ადგილზე აღდგენითი სამუშაოები მიმდინარეობს, „თუმცა სამუშაოს სირთულიდან გამომდინარე სწრაფად ვერ მოხერხდება გაზსადენის აღდგება, ამიტომ, ბუნებრივი აირის მიწოდება  დილიდან აღდგება“, – ამბობს ლეკიშვილი.

 

 

 

ზაზა სარალიძე მოქალაქეებს მოუწოდებს, რომ დღეს 18:00 საათზე ისევ მივიდნენ აქციაზე. აქცია თბილისში უკვე მესამე დღეა იმართება.

„შოთაძე ციდან არ ჩამოვარდნილა ის ამ მთავრობამ დანიშნა ამ დეპუტატებმა ამ მინისტრებმა ამ გულგრილმა ჩინოვნიკებმა. მე მათ არ ვენდობი. მათ დანიშნულ არც ერთ პროკურორს აქ რუსთაველზე მოსული ხალხი არ გამოუცხადებს ნდობას.
დღეს საღამოს 6 საათზე, გელოდებით ყველას“, – ეს პოსტი თავის ფეისბუქგვერდზე ახლახანს გამოაქვეყნა ზაზა სარალიძემ.

საქართველოს მართლმადიდებელი ეკლესიის პატრიარქი ილია მეორე დღეს 2 ივნისს 4 საათზე ზაზა სარალიძეს საპატრიარქოში შეხვდება. ამის შესახებ ნეტგაზეთს პატრიარქის მდივანმა მიქაელ ბოტკოველმა განუცხადა.

---

საპროტესტო აქციები 6 თვის წინ ხორავას ქუჩაზე მომხდარ ტრაგედიას უკავშირდება, რომლის დროსაც ორი არასრულწლოვანი დაიღუპა.

თბილისში, ხორავას ქუჩაზე მოკლული ლევან დადუნაშვილის მკვლელობის საქმეზე თბილისის საქალაქო სასამართლომ 31 მაისს გამამტყუნებელი განაჩენი გამოიტანა. რაც შეეხება იმავე ჩხუბის დროს მოკლულ დავით სარალიძეს, მისი მკვლელობის საქმეზე მოსამართლემ ბრალი მკვლელობიდან მკვლელობის მცდელობაზე გადააკვალიფიცირა. შესაბამისად, ამ დროისათვის უცნობია, ვინ მოკლა არასრულწლოვანი დავით სარალიძე.

სასამართლოს გადაწყვეტილების გამოცხადების შემდეგ, მოკლულის მამა ზაზა სარალიძე და მისი მხარდამჭერები პროკურატურასთან მივიდნენ და საპროტესტო აქცია გამართეს. დავით სარალიძის მამა აცხადებს, რომ სანამ მისი შვილის მკვლელებს არ დააკავებენ და არ დაისჯება ყველა დამნაშავე, მათ შორის, პროკურორები, აქციებს არ შეწყვეტს. სარალიძე გამოძიების ხელახლა ჩატარებას ითხოვს.

მთავარი პროკურორი ირაკლი შოთაძე 31 მაისს, გადადგა. მის გადადგომა წინ უძღოდა სარალიძის ოჯახისა და მისი მხარდამჭერების აქცია, რომელმაც პროკურორის გადადგომის შემდეგ პარლამენტის შენობასთან გადაინაცვლა.