6 სექტემბერს ბათუმში KID Jesus-ი და სიმებიანი კვარტეტი კლასიკური მუსიკის სინთეზით ექსპერიმენტულ ინდი როკ კონცერტს გამართავენ.
“ინდი როკის შესრულება კლასიკური მუსიკის აკომპანირებით ქმნის განსაკუთრებულ და სპეციფიკურ ჟღერადობას, რის გამოც გადაწყდა ამ ექსპერიმენტის ჩატარება. ასევე, KID Jesus-ი შეასრულებს რამდენიმე კომპოზიციას ახალი ალბომიდან, რომელიც სამომავლოდ ვინილის სახით გამოვა,” – ნათქვამია პროექტის ორგანიზატორის, “EREDELI-ს” მიერ გავრცელებულ რელიზში. პროექტის მხარდამჭერი აჭარის განათლების, კულტურისა და სპორტის სამინისტროა.
KID Jesus-ი თბილისში 2012 წელს ჩამოაყალიბეს ლევან შანშიაშვილმა (გიტარა, ვოკალი), ცოტნე ჩიქობავამ (ბასი) და არჩილ შიოშვილმა (დრამი), რათა შეექმნათ საუკეთესო ინდი-ჯიზაზ-როკ მუსიკა. მუსიკოსები პირველად „აივანი Season 2“-ზე წარსდგნენ, „თბილისი ივენთ ჰოლში“. 2012 წელს KID Jesus-ი გახდა გამარჯვებული ისეთი მასშტაბური პროექტისა, როგორიცაა Tbilisi Newcomers-ი. 2013 წელს KID Jesus-ი პირველი ქართული ბენდი იყო Tbilisi Open Air-ზე, რომელმაც დაუკრა ისეთი მუსიკოსების გვერდით, როგორებიც არიან: The Subways-ი, Modeselektor-ი და Tricky.
