ბათუმის „სანდასუფთავება“ ბულვარში სწრაფი რეაგირებისთვის მოტოსკუტერებს ყიდულობს


ბათუმის მუნიციპალური შპს „სანდასუფთავება“ სამბორბლიანი, ორადგილიანი ელექტროსკუტერების შეძენას გეგმავს. კომპანიას ორი ერთეული ელექტროსკუტერის შესაძენად 5 000 ლარი აქვს გათვალისწინებული.

„სანდასუფთავების“ პრესსამსახურში გვითხრეს, რომ ელექტრომოტოსკუტერები კომპანიას ბათუმის ბულვარში სწრაფი რეაგირებისა და მონიტორინგისთვის სჭირდება.

სკუტერების შესყიდვაზე ტენდერი გამოცხადებულია, სადაც წინადადებების მიღება მიმდინარე წლის 2 სექტემბერს დაიწყება და 4 სექტემბერს დამთავრდება.

მიახლოებითი სტილი – ესკიზი / სატენდერო დოკუმენტებიდან: შესაძენი ელექტროსკუტერის ტექნიკური პარამეტრები – ახალი, ექსპლოატაციაში არ მყოფი; ძრავი – არანაკლებ 1000 W (DC); მაქს. სიჩქარე (კმ / სთ) – არანაკლებ 25; მუხრუჭი ხელით; ბორბლების რაოდენობა – 3; ტვირთამწეობა – არანაკლებ 130 კგ.; სრული დატენვის დრო – არაუმეტეს 8 საათი; დიაპაზონი (კმ) – არანაკლებ 35 კმ.; მოხმარება: ≤1.20 kw/h; განათების მაშუქები წინ და უკან; ტალახდამცავი ფრთა; ორი დამოუკიდებელი სავარძელი; სავარძლის სახელურები; უკანა ხედვის სარკეები; ქარხნული აკუმულატორები; დამტენი; მასა – არაუმეტეს 150 კგ.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com