მთავარი,სიახლეები

უცნობი ნივთიერებით სავსე ბიდონი შავ ზღვაში – დაწყებულია გამოძიება

27.08.2018 • 5247
უცნობი ნივთიერებით სავსე ბიდონი შავ ზღვაში – დაწყებულია გამოძიება

26 აგვისტოს, საღამოს, შეკვეთილში „ნეტგაზეთის“ რედაქტორმა, თაზო კუპრეიშვილმა ზღვაში მოტივტივე ლურჯი ფერის ბიდონი შენიშნა და ნაპირზე გამოიტანა.

„ბიდონი სავსე იყო და მასზე ეწერა, რომ მასში იყო ჟანგის მოსაშორებელი, საშიში სითხე. მეგობარმა, რომელიც მახლდა, თქვა, რომ ეს იყო ტოქსიკური სითხე, რომელსაც გემზე იყენებენ სპეცაღჭურვილობით, რადგან მისი შეყნოსვა და კანზე მოხვედრა არ შეიძლება. 112-ს დავუკავშირდით,“ – ყვება თაზო კუპრეიშვილი. მისივე თქმით, ადგილზე მყოფმა სამართალდამცავებმა ბიდონს თავი მოხსნეს, იგი სპეციალური საფარით დალუქული არ ყოფილა.

ფოტო: თაზო კუპრეიშვილი

სამართალდამცავებმა ოქმი შეადგინეს და მოწმეები დაკითხეს. ბიდონი ექსპერტმა დალუქა.

შს სამინისტროს ინფორმაციით, გამოძიება სისხლის სამართლის კოდექსის 288-ე მუხლით დაიწყო – გარემოსათვის საშიში ნივთიერებისადმი ან ნარჩენისადმი მოპყრობის წესის დარღვევა. ბიდონში არსებულ სითხეს ექსპერტიზა ჩაუტარდება.

ბიდონზე აღნიშნულია გემის სახელიც –  AZOV CONFIDENCE. ესაა მალტის დროშის ქვეშ მცურავი გემი, რომელიც ახლა საბერძნეთის ტერიტორიულ წყლებში იმყოფება.

AZOV CONFIDENCE. ფოტო: marinetraffic.com

„ბათუმელები“ გარემოს დაცვის ინსპექციასაც დაუკავშირდა. აქ გვითხრეს, რომ ფაქტის შესახებ ინფორმირებულნი არ არიან.

გადაბეჭდვის წესი


ასევე: