მწვანე კონცხის პლაჟის გასხვისებაზე ბათუმის საკრებულოს მიერ 29 სექტემბერს მიღებული განკარგულების ბათილად ცნობას „ერთიანი ნაციონალური მოძრაობა“ ითხოვს. პარტიამ შესაბამისი სარჩელით დღეს, 2 ოქტომბერს მიმართა ბათუმის საქალაქო სასამართლოს. ამავდროულად „ნაციონალურმა მოძრაობამ“ საჯარო რეესტრში შეიტანა განცხადება – სასამართლოს გადაწყვეტილების მიღებამდე საქმისწარმოების შესაჩერებლად.
მირდატ ქამადაძე, „ერთიანი ნაციონალური მოძრაობის“ ბათუმის საარჩევნო სიის პირველი ნომერი მიიჩნევს, რომ საკრებულომ პლაჟის გასხვისებით კანონი დაარღვია, რადგან პლაჟი კანონმდებლობით „განუსხვისებელ ტერიტორიას“ განეკუთვნება, თუმცა კანონი უშვებს გამონაკლისს.
„ამ შემთხვევაში, საკრებულოს პლაჟის, ანუ განუსხვისებელი ტერიტორიის გასასხვისებელად სჭირდებოდა სიითი შემადგენლობის ორი მესამედის თანხმობა, ანუ 17 ხმა. 29 სექტმბრის სხდომაზე მხოლოდ 11-მა დაუჭირა მხარი ამ საკითხს 6 წევრის წინააღმდეგ, ანუ სიითი შემადგენლობის უმრავლესობასაც არ დაუჭერია მხარი ორ მესამედზე რომ არაფერი ვთქვათ. მარტივად რომ ვთქვათ, ეს გადაწყვეტილება არის უკანონო,“ – ამბობს მირდატ ქამადაძე.
„პლაჟი საერთოდ არ წერია იმ განკარგულებაში, რომელიც საკრებულომ მიიღო,“ – გვითხრა პაატა შარაძემ, ბათუმის საკრებულოს იურისტმა. იგი განმარტავს, რომ განკარგულების მიხედვით, არასასოფლო-სამეურნეო მიწა გადაეცა მთავრობას.
„გასაგებია, რომ ეს ტერიტორია მოიცავს ფაქტობრივად პლაჟს, მაგრამ საკრებულოს არ გადაუცია ქონება კონკრეტული პირისთვის. საკრებულომ ქონება მთავრობას გადასცა… ჩვენთვისაც საინტერესოა სასამართლოს მსჯელობა ამ საკითხზე,“ – დასძენს პაატა შარაძე.
მწვანე კონცხის პლაჟის ნაწილი 49 წლის ვადით უსასყიდლოდ გადაეცემა „ბიზნეს დეველოპმენტს“, რომელიც მიმდებარე ტერიტორიაზე კიდევ რამდენიმე ნაკვეთისა და ერთი შენობის პირდაპირი წესით შეძენას გეგმავს. „ბიზნეს დეველოპმენტი“, სავარაუდოდ, ბიძინა ივანიშვილთან დაკავშირებული კომპანიაა.
