აჭარის მაღალმთიანი მუნიციპალიტეტების რამდენიმე საჯარო სკოლაში ახალი სასწავლო წელი პირველკლასელების გარეშე, ზოგიერთ სკოლაში კი, ერთი პირველკლასელით დაიწყება.
შესაბამისი რესურსცენტრებიდან „ბათუმელებისთვის“ მოწოდებული ინფორმაციებით, პირველკლასელი 2018-2019 სასწავლო წლის დასაწყისში არ ეყოლება ხულოს ორ საჯარო სკოლას, შუახევის ხუთ და ქედის ერთ საჯარო სკოლას.
თითო პირველკლასელს მიიღებს ხულოს ხუთი და შუახევის ათი საჯარო სკოლა.
მაღალმთიან მუნიციპალიტეტებში ასევე არის სკოლები, სადაც ახალ სასწავლო წელს სწავლას ორი, სამი, ოთხი პირველკლასელი დაიწყებს.
ქედის მუნიციპალიტეტის წონიარისის საჯარო სკოლის სოფელ კანტაურის კლასები კი, კონტინგენტის არარსებობის გამო, დაიხურა. „წელს წონიარისის Iა კლასში მოვიდა მოსწავლე, მაგრამ წონიარისის Iბ [კანტაურის] კლასში არ მოვიდა. ეს კლასი გაუქმდა და არა ვთქვათ, კანტაურის სკოლა. ვინაიდან ეს დასახლება წონიარისის საჯარო სკოლიდან შორსაა, იქ ცალკე კლასებია, ცალკე შენობაში. ანუ კანტაურში არის წონიარისის სკოლის I-IV კლასები. ახალი სასწავლო წლიდან კი აქ არც ერთ კლასში არ იქნება მოსწავლე“, – განმარტავენ ქედის რესურსცენტრში.
კერძო და საჯარო სკოლებში ამ დროისთვის ხულოში, მთლიანობაში, 264 პირველკლასელი ირიცხება, შუახევში – 131, ქედაში – 172.
კერძო სკოლა არ არის ქედაში. ხულოსა და შუახევში კი თითო კერძო სკოლა ფუნქციონირებს.
