Batumelebi

„მთავრობის სხდომა, როგორც წესი, დახურულია. კანონით გათვა­ლის­წი­ნებულ შემთხვევაში, აგრეთვე მთავრობის გადაწყვეტილებით, სხდომა შეიძ­ლე­ბა გამოცხადდეს საჯაროდ“, – ეს არის აჭარის მთავრობის ყოფილი თავმჯდომარის, ლევან ვარშალომიძის მიერ ხელმოწერილი დადგენილება, რომელიც ვარშალომიძის შემდგომ  მთავრობის არც ერთ თავმჯდომარეს [არჩილ ხაბაძე, ზურაბ პატარაძე], ფაქტობრივად, აღარ გამოუყენებია.

აჭარის მთავრობის ახალი თავმჯდომარის, თორნიკე რიჟვაძის განმარტებით, რომელიც მან ჟურნალისტებთან მთავრობის დახურული სხდომის დასრულების შემდეგ გააკეთა, სხდომების პირველი ნაწილი იქნება ღია. მხოლოდ ოპერატორებს შეუშვებენ კადრების გადასაღებად თუ ჟურნალისტებსაც მიეცემათ სხდომაზე დასწრების საშუალება, ეს მას არ დაუკონკრეტებია.

„მთავრობის რეგლამენტი პირდაპირ განსაზღვრავს მთავრობის სხდომის საჯაროობის ნაწილს, ეს ერთი და მეორე – რაც შეეხება მთავრობის სხდომების ფორმატს,  პირველ რიგში, ჩვენ ვაპირებთ, რომ ინტენსიურად გვქონდეს მთავრობის სხდომები და თვეში მინიმუმ ერთხელ მაინც ჩატარდეს. როგორც დღის წესრიგი, ასევე სხვა დღის წესრიგთან დაკავშირებული საკითხები იქნება საჯარო და ეს როგორც მთავრობის ვებგვერდზე და ასევე მთავრობის სხვა პორტალებზე იქნება ატვირთული,“  – ამბობს აჭარის მთავრობის თავმჯდომარე.

დადგენილება, რომელზეც თორნიკე რიჟვაძე საუბრობდა, აჭარის მთავრობის ყოფილი თავმჯდომარის, ლევან ვარშალომიძის მიერ 2008 წელსაა გამოცემული.  აჭარის მთავრობის იურიდიული  დეპარტამენტის ხელმძღვანელმა ოთარ დიასამიძემ  სწორედ 2008 წელს გამოცემული დადგენილება მოიშველია ჟურნალისტებთან და თქვა, რომ ასე გაგრძელდება მომავალშიც და სხდომის დახურვის ან ნაწილობრივ დახურვის გადაწყვეტილებას მთავრობა მიიღებს:

„… თითოეული მთავრობის სხდომის წინ მიღებული იქნება გადაწყვეტილება, თუ რა ფორმატში იმუშავებს მთავრობის სხდომა და რამდენი წუთი იქნება ღია ჟურნალისტებისთვის. მთავრობაა უფლებამოსილი, გადაწყვიტოს დახურული იქნება სხდომა თუ საჯარო.“

სხდომის დახურვის გადაწყვეტილება დღეს ჟურნალისტებმა გააპროტესტეს. მათი თქმით, ასეთ ფორმატში მუშაობა მიუღებელია:

„ძალიან სამწუხაროა, რომ განახლებული მთავრობის პირველივე სხდომაზე ჟურნალისტებმა ვერ მოვისმინეთ იმ საკითხების განხილვა, რასაც დღეს განიხილავენ. რატომ დაიხურა სხდომა, ჩვენთვის უცნობია,“ – ამბობს მარი კეკელიძე, „ინტერპრესნიუსის“ ჟურნალისტი.

აჭარის მთავრობის იურიდიული დეპარტამენტის ხელმძღვანელის  თქმით, გადაწყვეტილება, რომ დღეს მედიასაშუალებები სხდომაზე მხოლოდ ათი წუთით შეეშვათ, მთავრობის სხდომაზე მიიღეს, ოღონდ ამ ათი წუთითაც კი სხდომაზე მხოლოდ ოპერატორები შეუშვეს კადრების გადასაღებად, ათი წუთის შემდეგ კი მათ სხდომათა დარბაზი დაატოვებინეს.

აჭარის მთავრობის თავმჯდომარის განცხადებით, აჭარას სამიზნე ქვეყნებში ტურიზმის ელჩები ეყოლება. შესაბამის კონცეფციაზე კი მუშაობა დაწყებულია და პროექტის პრეზენტაცია უახლოეს პერიოდში გაიმართება. აჭარის მთავრობის სხდომა დღეს, 31 ივლისს გაიმართა. სხდომაზე ჟურნალისტები არ შეუშვეს.

„ჩვენ სამიზნე ქვეყნებში გვეყოლება ტურიზმის ელჩები, რომლებიც დაგვეხმარებიან მარკეტინგული თუ სხვა ტიპის აქტივობების განხორციელებაში, რადგან მეტ ადამიანს ჰქონდეს ინფორმაცია ჩვენ შესახებ. უახლოეს პერიოდში გვექნება პრეზენტაცია აღნიშნული პროექტის. ეს ასევე იქნება სახელმწიფოსა და კერძო სექტორს შორის თანამშრომლობის მოდელი, რომელიც საბოლოო ჯამში გამოიწვევს ტურიზმის სექტორის კიდევ უფრო განვითარებას და მოიზიდავს კიდევ უფრო მეტ ტურისტს აჭარაში,“ – განაცხადა თორნიკე რიჟვაძემ.

აჭარის მთავრობის პრესსამსახურის ინფორმაციით, თორნიკე რიჟვაძემ აჭარაში ტურიტული სეზონის შესახებ განცხადება დღეს, მთავრობის  სხდომაზე გააკეთა. მთავრობის თავმჯდომარის თქმით, ორი კვარტალის მაჩვენებლით აჭარაში საერთაშორისო მოგზაურების ვიზიტების 23%-იანი მატებაა, ბათუმის აეროპორტში კი – 46%-იანი ზრდა.

მთავარი ფოტო: თორნიკე რიჟვაძე / ფოტო: აჭარის მთავრობა

აჭარის მთავრობის მიერ შექმნილი ზოგიერთი საჯარო სამართლის იურიდიული პირის ხელმძღვანელის თანამდებობაზე დასანიშნი კანდიდატურის შესარჩევად გამარტივებული საჯარო კონკურსი საჯარო სამსახურის ბიუროს ვებგვერდზე გამოცხადდება – ამის შესახებ განკარგულება აჭარის მთავრობამ დღეს, 31 ივლისს, გამართულ სხდომაზე მიიღო.

მთავრობის პრესსამსახურის ინფორმაციით, კონკურსი გამოცხადდება შემდეგ თანამდებობზე:

• აჭარის დასაქმების სააგენტოს უფროსი
• საზოგადოებრივი ჯანდაცვის ცენტრის დირექტორი
• ლაბორატორიული კვლევითი ცენტრის უფროსი
• ბათუმის ბულვარის დირექტორი
• ტექნიკური და სამშენებლო ლაბორატორიის უფროსი
• აჭარის სატყეო სააგენტოს უფროსი

აჭარის მთავრობის განკარგულებით, ვაკანტურ თანამდებობებზე შესაბამისი კონკურსის გამოცხადება და ჩატარება უნდა უზრუნველყოს იმ ორგანომ, რომელიც ახორციელებს შესაბამისი საჯარო სამართლის იურიდიული პირის სახელმწიფო კონტროლს.

აჭარის მთავრობის დღევანდელ სხდომაზე გაუქმდა საინფორმაციო-ტექნოლოგიების სამსახური, რომელიც ზურაბ პატარაძის მთავრობამ შექმნა.

აჭარის მთავრობის სხდომა დღეს, 31 ივლისს, დაახლოებით 11 საათზე დაიწყო. სხდომაზე ჟურნალისტები არ შეუშვეს.

აჭარის მთავრობამ დადგენილება „ინფორმაციული ტექნოლოგიების სამსახურის შექმნისა და დებულების დამტკიცების შესახებ“ ძალადაკარგულად გამოაცხადა.

ამ სამსახურის შექმნა ზურაბ პატარაძის მთავრობის თამჯდომარეობის დროს გადაწყდა, გამოცხადდა კონკურსი და უკვე შერჩეული იყო  სამსახურის უფროსიც – ოლეგ ბოლქვაძე.

აჭარის ახალმა მთავრობამ საჯარო სამართლის იურიდიული პირის – ინფორმაციული ტექნოლოგიების სამსახურის რეალურად ამოქმედება ამ ეტაპზე მიზანშეწონილად არ მიიჩნია.

„როგორც დაწესებულების შენახვისათვის საჭირო საბიუჯეტო ხარჯების დამატებითმა გათვლებმა ცხადყო, მოცემულ ეტაპზე მსგავსი ტიპის დაწესებულების უპირობოდ შექმნისა და ფუნქციონირების არანაირი აუცილებლობა არ არსებობს,“ – აღნიშნულია აჭარის მთავრობის მიერ გავრცელებულ ინფორმაციაში.

გადაწყვეტილება აჭარის ახალმა მთავრობამ დღეს, 31 ივლისს, მთავრობის სხდომაზე მიიღო, რომლის გასაშუქებლადაც ჟურნალისტები არ შეუშვეს.  

აჭარის მთავრობის სხდომაზე, რომელიც დღეს, 31 ივლისს, დაახლოებით 11 საათზე დაიწყო, ჟურნალისტებს არ უშვებენ. ბოლო წლების განმავლობაში ეს იქნება პირველი შემთხვევა, როდესაც ჟურნალისტებს სხდომის გაშუქებისა და კითხვების დასმის შესაძლებლობა არ მიეცემათ.

აჭარის მთავრობის პრესსამსახურის ზეპირი განმარტებით, რეგლამენტის თანახმად, აჭარის მთავრობას აქვს უფლება სხდომა დახუროს. ჟურნალისტების სხდომაზე არ დაშვების მიზეზად პრესცენტრმა ასევე სხდომათა დარბაზში უადგილობა დაასახელა.

პრესსამსახურის თქმით, განმარტებას, თუ რატომ გადაწყვიტა მთავრობამ სხდომის დახურვა, მთავრობის იურიდიული დეპარტამენტის ხელმძღვანელი ოთარ დიასამიძე მოგვიანებით გააკეთებს, რადგან ახლა მას არ სცალია – ის სხდომის მომხსენებელია.

აჭარის მთავრობის სხდომაზე დღეს მხოლოდ ოპერატორები დაუშვეს – ისიც 10 წუთით, რათა მათ კადრები გადაეღოთ.

მთავრობის პრესსამსახურის თქმით, მთავრობა განმარტებას, თუ რა საკითხები განიხილეს სხდომაზე, სხდომის დასრულების შემდეგ გააკეთებს.

ეს არის პირველი სხდომა, რაც თორნიკე რიჟვაძის ხელმძღვანელობით ტარდება.

მთავარი ფოტო: ჟურნალისტები აჭარის მთავრობის ადმინისტრაციულ შენობაში

„ახალი მეჩეთის მშენებლობა ჯერ არ იგეგმება“ – თორნიკე რიჟვაძე“, – ამ სათაურით სიუჟეტი აჭარის ტელევიზიამ 28 ივლისს გამოაქვეყნა, რამაც მუსლიმი საზოგადოების ერთ ნაწილში მღელვარება გამოიწვია. საპასუხოდ ქართველ მუსლიმთა კავშირის თავმჯდომარემ, ტარიელ ნაკაიძემ ფეისბუქში დაწერა, რომ „მისი [მეჩეთის] მშენებლობა მალე დაიწყება“. აჭარის მთავრობაში კი აცხადებენ, რომ აჭარის ტელევიზიამ ინტერვიუ არასწორი ინტერპრეტაციით გააშუქა.

„ბათუმელებმა“ სცადა აჭარის მთავრობის პრესსამსახურთან დაეზუსტებინა, რას ნიშნავს „მეჩეთი ჯერ არ აშენდება“, რაზედაც გვითხრეს, რომ „მეჩეთის თემის გააქტიურება ერთი კვირაა მიზანმიმართულად ხდება“, რომ „თორნიკე რიჟვაძეს მსგავსი ფრაზა გადაცემაში არ უთქვამს“ და უკვე მეორე შემთხვევაა, როცა ამ თემაზე „მთავრობის თავმჯდომარის ნათქვამი არასწორი ინტერპრეტაციით გაშუქდა აჭარის საზოგადოებრივი მაუწყებლის მიერ”.

როგორც აჭარის ტელევიზიის, ისე აჭარის რადიოს სიუჟეტის სრულად ნახვის შემდეგ აღმოჩნდა, რომ თორნიკე რიჟვაძეს მსგავსი ფრაზა მართლაც არ უთქვამს. მან თქვა: „ყველა სახელმწიფოებრივად და ასევე პრაგმატულად მოაზროვნე ადამიანი, ვთვლი, რომ ბოლომდე გაერკვეოდა ჩემი განცხადების შინაარსსა და მიზანში.

რაც შეეხება გადაწყვეტილებას, ეს გადაწყვეტილება უნდა იქნას მიღებული საერთო საზოგადოებრივი კონსენსუსის საფუძველზე. შესაბამისად, ჯერ გადაწყვეტილების ნაწილში უნდა იქნას კონსენსუსი მიღწეული, ხოლო რაც შეეხება კონკრეტულ ფორმას, ეს უკვე არის შემდგომი მსჯელობის საგანი“.

გადაცემის წამყვანს აღარ უკითხავს, თუ როგორ წარმოუდგენია აჭარის ხელისუფლების პირველ პირს ამ თემაზე კონსენსუსის მიღწევა. შესაბამისად, ჩვენ ვცადეთ გაგვერკვია აჭარის მთავრობაში, რას ნიშნავს „საზოგადოებრივი კონსენსუსი“, რამდენად შესაძლებელია მეჩეთის თემაზე კონსენსუსის მიღწევა და იმ შემთხვევაში, თუ კონსენსუსი არ მიიღწევა, თუ აშენდება მეჩეთი. მთავრობის პიარში გვითხრეს, რომ ამ კითხვებზე პასუხის გაცემის უფლებამოსილება მათ არ აქვთ და უმჯობესია ეს აჭარის მთავრობის თავმჯდომარეს პირადად ვკითხოთ.

აჭარის ტელევიზიის საინფორმაციო სამსახურის უფროსი შორენა ღლონტი კი თვლის, რომ სიუჟეტი სრულ შესაბამისობაშია მთავრობის თავმჯდომარის მიერ გაკეთებულ კომენტართან.

„არასწორი ინტერპრეტაცია არცერთ შემთხვევაში ჩვენ არ გაგვიკეთებია. არც ბატონი თორნიკეს შემთხვევაში და არც სხვა შემთხვევაში. მან ისაუბრა ამის შესახებ ვრცლად ჩვენთან „კომპეტენტურ პასუხში“ და რეპორტიორმა, რაც იყო ამ ინტერვიუდან მთავარი გზავნილი მიაწოდა მაყურებელს. მან ხაზგასმით და მკაფიოდ აღნიშნა, რომ გადაწყვეტილება მიღებული არაა, გადაწყვეტილება მიიღება კონსენსუსის გზით და საზოგადოების ჩართულობით. ჩვენც ვთქვით ასეთი რამ, რომ ამ ეტაპზე არ იგეგმება ახალი მეჩეთის აშენება. ზუსტად ამას ნიშნავს. ვინ რაში გვადანაშაულებს გაუგებარია,“ – ამბობს შორენა ღლონტი.

აჭარის ტელევიზიით გასულ სიუჟეტს სოციალურ ქსელში მუსლიმი საზოგადოების მკვეთრი რეაქცია მოჰყვა. ინფორმაციის გავრცელების შემდეგ, ქართველ მუსლიმთა კავშირის ხელმძღვანელმა  ტარიელ ნაკაიძემ ფეისბუქზე კატეგორიული პოსტი გამოაქვეყნა, სადაც წერდა, რომ ბათუმში ახალი მეჩეთი ისედაც გახსნილია, „მალე დაიწყება მისი მშენებლობა და ამას ხელს ვერავინ შეუშლის“.

ხომ არ ნიშნავს ეს იმას, რომ მუსლიმები წყვეტენ ხელისუფლებასთან ორი წლის წინ დაწყებულ კონსულტაციებს მეჩეთის მშენებლობის საკითხზე. ტარიელ ნაკაიძემ, რომელიც ამავდროულად მეჩეთის მშენებლობის საინიციატივო ჯგუფის ხელმძღვანელია, „ბათუმელებს“ უთხრა:

“როგორც თავიდან გვაქვს გაცხადებული, ჩვენ ამ თემას მივიყვანთ ბოლომდე სამართლებრივად, რის უფლებასაც საქართველოს კონსტიტუცია და კანონი გვაძლევს. რა თქმა უნდა, ჩვენ ამ გზას ვაგრძელებთ, მაგრამ თუ ხელისუფლება დაიწყებს რაღაც კონსენსუსზე საუბარს, რომ უნდა გაითვალისწინოს „ქართული მარშის“ და ვიღაცეების აზრი, ჩვენ ამ თამაშში ვერ შევალთ და განვახორციელებთ იმ უფლებას, რაც გვაქვს. ჩვენ მზაობას ყოველთვის გამოვხატავთ, რომ ეს თემა ხელისუფლებასთან ერთად, სამართლებრივ ჩარჩოებში გადაწყდეს და სამართალი აღადგინოს ხელისუფლებამ ქართველ მუსლიმებთან მიმართებით, რადგან ეს არის დისკრიმინაციული მიდგომა“.

ტარიელ ნაკაიძე თვლის, რომ მსგავსი ურთიერთსაპირისპირო განცხადების გაკეთების უფლება ხელისუფალს არ აქვს: „ის [თორნიკე რიჟვაძე] დღეს იძახის, რომ მეჩეთი უნდა აშენდეს, ხვალ იძახის, რომ შემდგომში უნდა აშენდეს, მერე ვიღაცებთან შეთანხმებაზე საუბრობს და გულისხმობს იმ ჯგუფებს, რომლებიც სოციალურ ქსელებში აქტიურობენ – ეს არასწორი მიდგომაა. თუ ასე გააგრძელებს თავის დამოკიდებულებას ხელისუფალი, ჩვენ ავაშენებთ მეჩეთს იმ წესით, რის უფლებასაც გვაძლევს კანონმდებლობა, ისე, როგორც ააშენეს ბათუმში 25 ეკლესია. ჩვენ მაქსიმალურად ვცდილობთ დავიცვათ კანონი და ხელისუფლებამ შეიგნოს, რომ დაიცვას მუსლიმისა თუ არამუსლიმის უფლებები თანაბრად“.

ტარიელ ნაკაიძის თქმით, მსგავსი განცხადებები, „მუსლიმების ფსიქიკაზე ზედმეტი თამაშებია“, რაც დაუშვებელია: „გასცემს ნებართვას? – უნდა თქვას, რომ მე ვარ ხელისუფალი და დავიცავ ადამიანების უფლებას. ვერ აკეთებს და არ ეკუთვნის მუსლიმ თემს ეს უფლება, მაშინ თქვას, რომ არ აქვს მუსლიმ თემს ამის უფლება. შუალედური დამოკიდებულება იწვევს ვითარების დაძაბვას. ჩვენ ვიცავთ კანონს და თუ კანონს არ დაიცავს ხელისუფალი, მაშინ ჩვენ ვაიძულებთ მას ამ კანონის დაცვას”.

აჭარის მთავრობის ახალმა თავმჯდომარემ თავის პირველ კომენტარში თქვა, რომ „ბათუმში მეჩეთი ქართული ფულით უნდა აშენდეს“, რის შემდეგაც სოციალურ ქსელებში მის მიმართ აგრესიული კამპანია დაიწყო.

თორნიკე რიჟვაძემ მეჩეთის მშენებლობაზე ფაქტობრივად იგივე თქვა, რაც მისმა წინამორბედმა ზურაბ პატარაძემ სულ რაღაც 40 დღის წინ. ზურაბ პატარაძე მსგავს განცხადებებს, რომ „მეჩეთის მშენებლობის საკითხი გადაწყვეტილია“ და მხოლოდ „ტექნიკური დეტალების დაზუსტებაზე მუშაობენ“, ორი წლის განმავლობაში რეგულარულად აკეთებდა. თუმცა, მაშინ ამისთვის არც მედიას და არც ფეისბუქსაზოგადოებას დიდი ყურადღება არ მიუქცევია.

რა მოხდა თორნიკე რიჟვაძის შემთხვევაში და მისი ურთიერთგამომრიცხავი განცხადებები ხომ არ ნიშნავს, რომ ხელისუფლებამ უკან დაიხია და საბოლოოდ უარს აცხადებს მეჩეთის მშენებლობის უფლების გაცემაზე? – ვითარების შესაფასებლად „ბათუმელებმა“ ადამიანის უფლებების სწავლებისა და მონიტორინგის ცენტრის” (EMC) ხელმძღვანელს, თამთა მიქელაძეს მიმართა. სწორედ ეს ორგანიზაცია იცავს მუსლიმი თემის ინტერესებს სასამართლოში.

თამთა მიქელაძე:

ბათუმში ახალი მეჩეთის მშენებლობის საკითხი ნამდვილად გახდა პოლიტიკური თამაშის ნაწილი და გარკვეული სპეციალური დაძაბულობის საფუძველი სწორედ იმიტომ, რომ მთავრობას არ ეყო გამბედაობა და გონიერება თავის დროზე მიეღო ეს გადაწყვეტილება, რელიგიის თავისუფლებასთან დაკავშირებული უმნიშვნელოვანესი და ძალიან მარტივი საკითხი – სალოცავის გახსნა. ჩვენ ვხედავთ, რომ აჭარის მთავრობის ხელმძღვანელები ყველა ჯერზე სხვადასხვა არგუმენტით სპეკულირებენ და მუდმივად ხდება ბათუმში ახალი მეჩეთის მშენებლობის საკითხის გადავადება, გაჭიანურება. ვფიქრობ, ბოლო განცხადებები, რომელიც ახალმა ხელმძღვანელმა გააკეთა იყო წინააღმდეგობრივი – ჯერ საუბრობდა, რომ მეჩეთი აშენდება, ამას მოჰყვა წინააღმდეგობა, შემდგომში აღმაშენებლის ძეგლის მშენებლობით დაბალანსდა და ბოლოს ერთ-ერთ რადიოში თქვა, რომ ეს საზოგადოების კონსენსუსის საკითხი უნდა გახდეს და ამ ეტაპზე მშენებლობის გეგმა არ არსებობს.

საინტერესოა რა ტიპის კონსენსუსზე საუბრობს. თუ საუბარია ადგილობრივ ქრისტიანულ ჯგუფებს შორის კონსენსუსზე (რომლებიც წინააღმდეგი არიან მეჩეთის მშენებლობის), კონკრეტულ პოლიტიკური ჯგუფებზე, ცხადია, ასეთი კონსენსუსი შეუძლებელი იქნება. მაგრამ მე ვიცი, რომ ბათუმში, აჭარაში არის ძალიან ბევრი სამართლიანი ადამიანი, რომელიც თავს ქრისტიანად მონიშნავს და რომელიც ფიქრობს, რომ მუსლიმ თემს აქვს ახალი მეჩეთის მშენებლობის უფლება. შესაბამისად, საზოგადოებაში არსებული ეს პოზიტიური განწყობა მთავრობამ უნდა გამოიყენოს საზოგადოებრივი აზრის შესაქმნელად. ამდენად კონსენსუსი შედგება ამის უკან ძალიან დიდი პოლიტიკური ინტერესი რომ არ არსებობდეს ან არასწორი წარმოდგენები სამართლებრივი და სეკულარული სახელმწიფოსი.

მეორეს მხრივ, თუ საზოგადოებრივ კონსენსუსში იგულისხმება მუსლიმი თემის შიგნით მთავრობის მიერ ხელოვნურად შექმნილი ორი მხარე, რომელიც რეალურად არ არსებობს – სამმართველო, რომელიც, სამწუხაროდ, არის ინსტრუმენტალიზებული მთავრობის მხრიდან და მეორე – თვითორგანიზებული ჯგუფი, რომელიც ახალ მეჩეთს აშენებს, თუ მათ შორის კონსენსუსზეა საუბარი, ესეც უსამართლო დალაგებაა აქტორების, რადგან სამუფთო სამმართველო დღეს მთლიანად სახელმწიფო ნებაზეა მიბმული. თუმცა სამუფთო სამმართველო ვერ ახერხებს თქვას უარი იმაზე, რომ ბათუმში ახალი მეჩეთის საჭიროება არსებობს.

სწორედ იმის გამო, რომ ახლა წინასაარჩევნო პერიოდია, ცალკეული პოლიტიკური ჯგუფი ამ საკითხის გარშემო მოძლიერდება და მთავრობას უნდა ეყოს კეთილი ნება, ისეთი პოზიციონირება გააკეთოს, რომ ანტიისლამური განწყობები კიდევ უფრო არ გაძლიერდეს და თვითონ არ გახდეს ამის ხელშემწყობი.

თუმცა ამ პოლიტიკური გონიერების ნიშნებს მე ამ მთავრობაში ვერ ვხედავ, რადგან უკვე ბევრი შეცდომა დაუშვეს.

მუსლიმი თემი 2014 წლიდან ელოდებოდა „ქართული ოცნების“ დაპირების შესრულებას – რომ მეჩეთს ააშენებდნენ. 2015-16 წლებში თემმა ისევ მისცა სახელმწიფოს შესაძლებლობა, რომ აეშენებინა მეჩეთი, მაგრამ მათ პასუხიც კი არ გასცეს. საბოლოოდ, თემმა თანხა შეაგროვა და მიწის ნაკვეთი შეიძინა, მაგრამ მთავრობამ ამჯერადაც არ მისცა აშენების ნებართვა. ანუ მუსლიმმა თემმა ყველაფერი გააკეთა, რომ ეს საკითხი არ გამხდარიყო პოლარიზების საფუძველი ჯგუფებს შორის.

ამის შემდეგ ჩვენ მივმართეთ სასამართლოს. შემდეგი ეტაპი იყო მოლაპარაკების პროცესი მერიასთან, მაგრამ ის განცხადება, რაც მერმა გააკეთა, იყო პრობლემური. მან თქვა, რომ მეჩეთის მშენებლობა შესაძლებელი გახდებოდა მხოლოდ იმ შემთხვევაში, თუ სრულიად საქართველოს მუსლიმთა სამმართველოს გადაეცემოდა მრევლის მიერ შეძენილი მიწის ნაკვეთი. ეს თემისთვის პრინციპულად მიუღებელია. ცხადია, ისინი ამას არ დასთანხმდნენ…

ჩვენ სასამართლოს მივუბრუნდით და ვთხოვეთ, რომ პროცესი გაგრძელდეს, რადგან მოლაპარაკებებმა სამართლიანად არ ჩაიარა. ახალი მთავრობის პირობებში რაიმე შეიცვლება თუ არ ეს ჩვენთვის უცნობია, თუმცა ამას არც აქვს მნიშვნელობა, რადგან მოპასუხე მხარე სასამართლოში ბათუმის მერიაა.

ჩვენ ვხედავთ, რომ მუსლიმი თემის ყველა ნაბიჯი იმისკენ იყო მიმართული, რომ მეჩეთის მშენებლობა არ გამხდარიყო დაპირისპირების მიზეზი. ისინი იბრძვიან საკუთარი უფლებებისთვის, კარდაკარ შეაგროვეს თანხა საჭირო ნაკვეთის შესაძენად. ეს ახალგაზრდები საკუთარი ხელით ასრულებენ მეჩეთში სამუშაოებს, ამდენად მათ უფრო ძლიერი ემოციური კავშირები აქვთ ამ მეჩეთთან, ვიდრე, ვთქვათ, სხვა შემთხვევაში ექნებოდათ.

პრინციპში ისინი ბოლო განცხადებებით არც აღელვებულები არიან და არც განსაკუთრებული მოლოდინები აქვთ მთავრობების მიმართ. მათი განცდა ასეთია – მუსლიმი თემი აპირებს სამართლებრივი დავის გაგრძელებას.

მთავარი ფოტო:  ახალი მეჩეთი ბათუმის გარეუბანში – ფიცრული, სადაც მუსლიმები ბოლო ერთი წელია ლოცულობენ