Batumelebi

3-8 სექტემბერს აჭარა გადამფრენ მტაცებელ ფრინველებზე დაკვირვების საერთაშორისო ფესტივალს უმასპინძლებს. ფესტივალის ფარგლებში ადგილობრივების გარდა რეგიონს ორნითოლოგები და მოხალისეები მსოფლიოს სხვადასხვა ქვეყნიდანაც ეწვევიან.

ყოველდღიურად ფესტივალის სტუმრებისთვის პროფესიონალი ექსპერტებისა  და გიდების თანხლებით მოეწყობა შემეცნებით-გასართობი ექსკურსიები ფრინველებზე დაკვირვებისთვის მნიშვნელოვან ტერიტორიებზე: ჭოროხის დელტა, სოფელი ჩაისუბანი, სოფელი სახალვაშო, ბათუმის ზღვისპირა პარკი, ნავსადგური და კოლხეთის ეროვნული პარკი. ასევე, გაიმართება ლექციები და პრეზენტაციები, რომლებზეც დასწრება, ისევე როგორც ექსკურსიებში მონაწილეობა, ნებისმიერ მსურველს შეეძლება.

სპეციალისტების თქმით, შავი ზღვის სანაპირო, კერძოდ, ბათუმის შემოგარენი, “აღმოსავლეთ შავი ზღვის სამიგრაციო დერეფნის” სახელითაა ცნობილი, სადაც ყოველწლიურად 1 000 000-ზე მეტი გადამფრენი მტაცებელი ფრინველი აღირიცხება. შედეგად, აჭარა მსოფლიოში მტაცებელ ფრინველთა მიგრაციის ერთ-ერთ უდიდეს კორიდორად მიიჩნევა და ის მსოფლიოში მესამე ადგილზეა.

ფესტივალი რეგიონში 2012 წლიდან ტარდება. ფრინველებზე დაკვირვების სეზონი აჭარაში 15 აგვისტოს გაიხსნება და 16 ოქტომბრამდე გაგრძელდება.

______________________

მთავარ ფოტოზე მტაცებელი ფრინველების ნაკადი. წყარო batumiraptorcount.org

დღეს, 30 ივლისს, გრიგოლეთში ზღვამ მამაკაცის ცხედარი გამორიყა.  გარდაცვლილი სავარაუდოდ, აჭარაში, მდინარე ჭოროხში დაკარგული მამაკაცია, რომელსაც მაშველები ოთხი დღის განმავლობაში ეძებდნენ.

51 წლის მამაკაცი 27 ივლისს სოფელ შარაბიძეების მიმდებარედ მდინარე ჭოროხის ნაპირას მეგობრებთან ერთად იმყოფებოდა და საბანაოდ შესვლა გადაწყვიტა მდინარეში. წინასწარი ინფორმაციით, იგი ალკოჰოლის ზემოქმედების ქვეშ იყო. მეგობრებმა მისი მდინარიდან გამოყვანა ვერ მოახერხეს და სამაშველო სამსახურს დაუკავშირდნენ.

საქართველოს თავდაცვის სამინისტრო აქტიური რეზერვის საპილოტე პროგრამის განხორციელებას იწყებს. პირველი აგვისტოდან  საქართველოს სამ რეგიონში – კახეთში, აჭარასა და გურიაში  მცხოვრებ 18-დან 50 წლამდე ასაკის პირებს შეეძლებათ მონაწილეობა მიიღონ საპილოტე პროგრამაში.

“ტერიტორიული რეზერვის საპილოტე პროგრამაში ჩარიცხვის შემთხვევაში რეზერვისტს სამუშაო ადგილი შეუნარჩუნდება და სამსახურის პერიოდი შრომის საერთო სტაჟში ჩაეთვლება. რეზერვში ჩარიცხულ მოქალაქეებს 5-წლიანი კონტრაქტი გაუფორმდებათ და მათი შრომის ანაზღაურება ყოველთვიურად წოდებრივი სარგოს 20%-ს შეადგენს. სამხედრო სარეზერვო სამსახურის გავლის პერიოდში კი, რეზერვისტები შრომის ანაზღაურების სრულ ოდენობას მიიღებენ. საერთო ჯამში, რიგითი რეზერვისტის საშუალო ანაზღაურება წლიურად ხელზე ასაღები 2760 ლარია. საბრძოლო მომზადება წლის განმავლობაში 45 დღეზეა გათვლილი, რომელიც 12 თვეზე ნაწილდება,” – ნათქვამია თავდაცვის სამინისტროს მიერ გავრცელებულ განცხადებაში.

ამასთან საპილოტე რეგიონებში მცხოვრებ 18-დან 22 წლამდე ასაკის სტუდენტებს, რომლებიც სარეზერვო სამსახურის ერთი კონტრაქტის ვადას დაასრულებენ,  სავალდებულო სამსახური მოხდილად ჩაეთვლებათ.

პირი, რომელიც რეზერვში ჩაირიცხება, სარეზერვო სამსახურს თავისივე რეგიონში გაივლის.

ტერიტორიული რეზერვის საპილოტე პროგრამაში ჩარიცხვის მსურველთა საბუთების მიიღება პირველი აგვისტოდან 7 სექტემბრამდე გაგრძელდება.  აჭარა-გურიის რეგიონში მცხოვრებლებმა საბუთები ბათუმში, ადლიის ქუჩა N76-ში უნდა მიიტანონ, ეროვნული გვარდიის მე-10 კადრირებულ ბრიგადაში. კახეთში მცხოვრებლებმა კი – თელავში თამარ მეფის ქუჩა N36-ში, ეროვნული გვარდიის მე-20 კადრირებულ ბრიგადაში;  სპეციალისტთა რეზერვისთვის – თავდაცვის სამინისტრო, კვინიტაძის 20.

განცხადების ჩაბარებისას მოქალაქემ თან უნდა იქონიოს პირადობის მოწმობა, 1  ფოტოსურათი 3/4, ჯანმრთელობის ცნობა და  სამხედრო ბილეთის ან მიწერის მოწმობის ასლი.

ყოფილ პატიმრებს, პატიმართა ოჯახის წევრებსა და პრობაციონერებს „დემოკრატიის ინსტიტუტი“ გარდა დასაქმების, სამედიცინო და სხვა სახის მხარდაჭერისა, მცირე ბიზნესის განვითარებაშიც ეხმარება. ყოფილი პატიმრების გაძლიერების პროექტი 2017 წლის თებერვლიდან ევროკავშირის ფინანსური მხარდაჭერით ხორციელდება ოთხ რეგიონში: აჭარაში, იმერეთში, სამეგრელო – ზემო სვანეთსა და გურიაში.

პროექტის წელიწადზე მეტხნიანი მოქმედების პერიოდში რამდენიმე ათეული ბიზნეს იდეა დაფინანსდა. მცირე ტიპის საცხობები, სუვენირებისა და ავეჯის სახელოსნოები, მეფუტკრეობა, მანქანების სახელოსნოები, ხელსაქმე და ა.შ.

მერაბ მიქელაძეც „დემოკრატიის ინსტიტუტის“ ერთ-ერთი ბენეფიციარია, სახლის სარდაფში მოწყობილ სახელოსნოში ამზადებს ბამბუკისა და ნიჟარებისგან სუვენირებს. ადრე მძღოლი იყო, ახლა ხელსაქმითაა დაკავებული. ნივთების დამზადებასა და შეღებვაში მეუღლე და შვილიც ეხმარება. მერაბმა ბიზნესის მართვის ტრენინგი გაიარა და საოჯახო სასტუმროს გასაძლიერებლად გრანტიც მიიღო. სასტუმროს მოწყობას შინ, ციხისძირში აპირებს, სადაც მუდმივადაა ტურისტების ნაკადი.

39 წლის არჩილ ქაქუთია კი მეფუტკრეა. სამეგრელოს სოფელ ყულეშკარში 20 ოჯახი ფუტკარს უვლის. საპატიმროში 6 წელი გაატარა, ჯანმრთელობის გართულებული პრობლემები გადაიტანა, მაგრამ საქმემ ყველაფერი დააძლევინა. „დემოკრატიის ინსტიტუტის“ პარტნიორმა ორგანიზაციამ, ფონდმა „თანაზიარმა“ მას მეფუტკრეობისთვის საჭირო ინვენტარი შეაძენინა. მეუღლისა და ორი მცირეწლოვანი შვილის შესანახად მეფუტკრეობას ნორმალურ, შემოსავლიან საქმედ მიიჩნევს.

გოგი გელაძე (ყოფილი პატიმრის სურვილისამებრ სახელი და გვარი შეცვლილია) ძირითადად თურქეთში მუშაობდა ზაფხულობით და თხილს კრეფდა. ეს მათი ოჯახის შემოსავლის ერთ-ერთი ძირითადი წყარო იყო, თუმცა მას შემდეგ, რაც პირობით მსჯავრი აქვს, ქვეყნის საზღვრებს ვერ ტოვებს. გოგიმ მანქანების სახელოსნო მოაწყო შინ – აჭარის ერთ-ერთ სოფელში, რაშიც „დემოკრატიის ინსტიტუტი“ დაეხმარა. საკმაოდ ბევრი მომხმარებელი ჰყავს და იმასაც ამბობს, რომ სხვაგან მუშაობას ისევ ასე შრომა სჯობს.

პატიმრის დედას, 70 წლის ლარისა თორიას სკოლის ბუფეტი აქვს. ორგანიზაცია „თანაზიარის“ მეშვეობით „ყოფილი პატიმრების, პატიმართა ოჯახებისა და პრობაციონერების  მხარდაჭერის პროგრამაში“, პროექტების წერა ისწავლა. საქმეში ნათესავი დაიხმარა და ღუმელი, ჭურჭელი, სკოლის ბუფეტისთვის აუცილებელი ინვენტარი შეიძინა, მცირე ბიზნესი გააუმჯობესა. სამომავლოდ ბიზნესის გაფართოებაზე ფიქრობს, ისე, რომ სკოლის გარდა სოფლის მოსახლეობისთვის მომსახურებაც შეძლოს.

32 წლის გიორგი უნგიაძე ჩოხატაურის რაიონის სოფელ ჯვარცხმაში ცხოვრობს. პატიმრობიდან გათავისუფლების შემდეგ გადაწყვიტა ამერიკული კაკლის, ჩანდლერის ნერგები გაეშენებინა, რაშიც მას ყოფილი პატიმრების გაძლიერების პროექტი დაეხმარა. ჩანდლერის ნერგები საკმაოდ ძვირი ღირს და გიორგი აღნიშნავს, რომ მხოლოდ საკუთარი სახსრებით ამას ვერ შეძლებდა. ყოფილი პატიმარი ამბობს, რომ ჩანდლერის ბაღის გარდა მამისეული სოფლის სახლის საოჯახო სასტუმროდ გადაკეთებასაც აპირებს, რის შემდეგაც არ იქნება დამოკიდებული არცერთ სამსახურზე და საკუთარი ბიზნესის განვითარებაზე იზრუნებს.

დემოკრატიის ინსტიტუტი „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამას” პარტნიორ ორგანიზაციებთან ერთად ახორციელებს.

ყოფილი პატიმრების გაძლიერების პროექტში ჩართვის მსურველებმა უნდა მიმართონ:

აჭარაში – დემოკრატიის ინსტიტუტს – ქ.ბათუმი ჭავჭავაძის ქ. №107, ტელ: (0422) 27 57 44

იმერეთში – აფხაზინტერკონტს / ქ.ქუთაისი ნინოშვილის ქ. №27, ტელ: (0431) 26 48 61

გურიაში – გურიის ახალგაზრდულ რესურსცენტრს /ოზურგეთი, რუსთაველის ქ. №4, ტელ: (0496) 27 41 26

სამეგრელოში – ფონდ თანაზიარს – რუსთაველის ქ. №88 /ტელ: (0415) 22 10 78

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

სახანძრო-სამაშველო სამსახურის ინფორმაციით, „ოცნების ქალაქში“ ხანძარი სრულად ლოკალიზებულია. დაიწვა ერთი სახლის მეორე სართული, დაახლოებით 60 კვადრატული მეტრი, რომელიც ხისგან იყო აშენებული: „პირველი სართული გადარჩა“.

ხანძრის შედეგად არავინ დაშავებულა.

ხანძრის გამომწვევი მიზეზი ამ დროისთვის დადგენილი არ არის.

„ოცნების ქალაქში“ კაკაბაძეების 6-სულიანი ოჯახის საცხოვრებელი  იწვის. ადგილზე უკვე იმყოფება სახანძრო-სამაშველო სამსახურის ერთი ჯგუფი.

„ოცნების ქალაქში“ მცხოვრები პირის თქმით, ადამიანებმა მოახერხეს გარეთ უვნებლად გამოღწევა. მისივე თქმით, ხანძარი მოულოდნელად გაჩნდა და გაჩენის მიზეზი უცნობია.

დღეს, 28 ივლისს, ბათუმში ფრანების ფესტივალი დაიწყო. ფესტივალი წელს პირველად ტარდება და ორ დღეს გასტანს. დღეს, საღამოს 6 საათამდე, ნებისმიერ მსურველს შეუძლია პლაჟზე, ბათუმის შოთა რუსთაველის სახელმწიფო უნივერსიტეტის მოპირდაპირე მხარეს, მივიდეს და ფესტივალში მიიღოს მონაწილეობა.

29 ივლისს ფრანების ფესტივალი დღის 12 საათზე განახლდება და საღამომდე გაგრძელდება.

ფესტივალის ორგანიზატორი Kitedreams Georgia -ა, გენერალური სპონსორი კი – აჭარის განათლების, კულტურისა და სპორტის სამინისტრო.

მთავარი ფოტო: Kitedreams Georgia-ს ფეისბუქგვერდიდან

დღეს, 28 ივლისს, ბათუმის სახელმწიფო მუსიკალურ ცენტრში ამსტერდამის სახელმწიფო უნივერსიტეტის სველინკს ორკესტრი ვაგნერის “ნიბელუნგების ბეჭედი სიტყვების გარეშე” დაუკრავს.

დირიჟორი: კონრადინ ჰერცოგი.

დასწრება თავისუფალია.

დასაწყისი: 19 საათზე.

სველინკს ორკესტრი 1878 წელსაა დაფუძნებული იგი ნიდერლანდებში ერთ-ერთ უძველეს ორკესტრად მიიჩნევა.

საქართველოში „იუნისეფი“ სექტემბერში იწყებს 2-იდან 10 წლამდე ბავშვების გამოკვლევას სისხლში ტყვიის შემცველობაზე, რომლის შედეგებიც მომავალი წლის პირველ კვარტალში იქნება ცნობილი. რა ხდება იმ შემთხვევაში, თუ ადამიანის სისხლში ტყვიის მაღალი შემცველობა ფიქსირდება და რა ზომებს უნდა მიმართოს პაციენტმა მკურნალობისთვის? „ბათუმელები“ ამ თემაზე პედიატრ თემურ მიქელაძეს ესაუბრა.

• ბატონო თემურ, როგორი მკურნალობა ენიშნებათ იმ პაციენტებს, რომლებსაც სისხლში ტყვიის მაღალი შემცველობა აქვთ?

ტყვიით ინტოქსიკაციის დროს ინიშნება გამომძევებელი თერაპია, ოღონდ იმ შემთხვევაში, თუკი ძალიან მაღალია მისი შემცველობა და აშკარად გამოხატულია სიმპტომები. გამომძევებელი თერაპია ყოველთვის არ სჭირდება პაციენტს, მხოლოდ იმ შემთხვევაშია საჭირო, თუ არის  მძიმე მოწამვლა. ეს საკითხი ტოქსიკოლოგთან ერთად უნდა გადაწყდეს და მხოლოდ ამ შემთხვევაში ვატარებთ ტყვიაზე მკურნალობას.

• მკურნალობა მხოლოდ სტაციონარულად ხდება, თუ სახლის პირობებშიც შესაძლებელია? 

სპეციალური ნივთიერებებია, რომლებსაც პაციენტი იღებს. პირველად ეს უნდა მოხდეს კლინიკაში, შემდეგ შეუძლია სახლშიც გააგრძელოს მკურნალობა. ინდივიდუალურად განისაზღვრება მკურნალობა.

• რა რაოდენობის ტყვიის შემცველობა მიიჩნევა ჯანმრთელობისთვის საზიანოდ?

მძიმე მოწამვლად მიიჩნევა დაახლოებით 50-დან 150 მიკროგრამი დეცილიტრზე. მაგრამ აქ საუბარია იმ შემთხვევაზე, როცა კლინიკური გამოვლინებებია. ანუ პაციენტი მივარდნილია, ადინამიური, არის რეანიმაციაში. თუმცა მე პრაქტიკაში არ მქონია ასეთი შემთხვევა, რადგან  ასეთი მკურნალობა არ სჭირდებათ პაციენტებს. საერთოდ ორგანიზმიდან ტყვიის გამომძეველი თერაპია უფრო ცუდია, ვიდრე მისი მაღალი შემცველობა სისხლში. უმჯობესია ეს პროცესი კვებით დავარეგულიროთ.

ტყვიის განსაზღვრის მიზანია, რომ აღმოაჩინო ტყვიით ინტოქსიკაციის წყარო, თუ საიდან ხდება მისი ქრონიკული მოწოდება. კვლევა იმიტომ კეთდება, რომ სახელმწიფომ მიიღოს შესაბამისი ზომები ტყვიის შემცველი პროდუქტების რეალიზაციაზე და აღარ მოხდეს ტყვიით დაბინძურებული მასალების იმპორტი ქვეყანაში. ტყვიაზე კვლევას მაშინ აქვს აზრი, თუ ტოქსიკაციის წყარო აღმოიფხვრება.

• თქვენ ამბობთ, რომ მკურნალობა მხოლოდ უკიდურეს შემთხვევებში ინიშნება. გარდა ტოქსიკური წყაროს აღმოფხვრისა, რა ზომები უნდა მიიღოს კიდევ ადამიანმა, რომ ორგანიზმში შემცირდეს ტყვიის შემცველობა?

თუ პაციენტის ორგანიზმში ნორმის ფარგლებშია რკინა და კალიუმი, მაშინ ტყვია აღარ შეიწოვება. ამიტომ ბავშვის და თუნდაც მოზრდილის ორგანიზმში ამ მიკროელემენტების შემცველობას უნდა მიექცეს ყურადღება. განსაკუთრებით ბავშვებში, რადგან ბავშვის ორგანიზმი უფრო ლაბილურია და უფრო ადვილად ზიანდება ნერვული სისტემა.

ტყვია არის მსოფლიოს პრობლემა. აშშ-ში, 80-იან წლებში როცა ჩატარდა კვლევები, მოსახლეობის 88 პროცენტს ტყვიის მაღალი შემცველობა აღმოაჩნდა, თუმცა 2010 წელს ჩატარებულმა კვლევებმა 0,88 პროცენტი აჩვენა იგმავე პაციენტებში. ეს იმიტომ, რომ აშშ-ის მთავრობამ შეამცირა ტყვიის შემცველი ნაწარმის რეალიზება, სამშენებლო მტვერი, მასალები, საღებავები, ბენზინი ნორმალური შეიტანა, ძველი ავტომანქანები  შემცირდა, რაც აისახა კიდეც შედეგზე. იგივე უნდა მოიმოქმედოს ჩვენმა ქვეყანამაც.

ამ ნივთიერების არსებობა აუცილებელია როგორც სამედიცინო, ასევე სხვა სამრეწველო საქმიანობაში, მაგრამ აქ საუბარია მის სწორად მოხმარებაზე. მთავარია, ადამიანის ორგანიზმში არ უნდა მოხდეს მისი მაღალი შემცველობა.

ამავე თემაზე: 

https://netgazeti.ge/news/294273/

საქართველოს სამოქალაქო ავიაციის სააგენტო მოქალაქის საპროტესტო აქციას ეხმაურება, რომელმაც აჭარის მთავრობის სახლთან ხეზე მიიჭედა ხელი – ვასიკო ტაკიძემ ასე გააპროტესტა გადაწყვეტილება, რომლის თანახმადაც მას დელტაპლანის გაქირავების ნებართვას არ აძლევენ.

„საქართველოს სამოქალაქო ავიაციის სააგენტოს მიერ, მოტოდელტაპლანების ოპერატორების საყურადღებოდ 10 ივლისს გაკეთებულ უსაფრთხოების მითითებას ზოგიერთი ოპერატორის მხრიდან გაღიზიანება მოყვა. ერთ-ერთმა მათგანმა, სამწუხაროდ, პროტესტის მძიმე ფორმას მიმართა.

ოპერატორებს უმოკლეს ვადებში უნდა განეხორციელებინათ სატრანსპორტო საშუალებების რეგისტრაცია საქართველოს სამოქალაქო საჰაერო ხომალდების სახელმწიფო რეესტრში. ბოლო 2 წლის განმავლობაში, აღნიშნული სატრანსპორტო საშუალებების მფლობელებთან გაიმართა არაერთი შეხვედრა, სადაც არაერთხელ განემარტათ კანონმდებლობით გათვალისწინებული მოთხოვნები, გაეწიათ შესაბამისი კონსულტაცია და მიეცათ გაფრთხილება კანონის მოთხოვნების დაცვის შესახებ.

სამოქალაქო საჰაერო ხომალდების სახელმწიფო რეესტრში მოტოდელტაპლანების რეგისტრაციის მოთხოვნის აუცილებლობა გამოიწვია იმ გარემოებამ, რომ აჭარის რეგიონის სანაპირო ზოლში ფუნქციონიერებენ არარეგისტრირებული მოტოდელტაპლანები, რომლებიც რისკის ქვეშ აყენებენ ფრენების უსაფრთხოებას და საფრთხეს უქმნიან ადამიანების სიცოცხლეს და ჯანმრთელობას.

მეტიც, როგორც სააგენტოს მიერ განხორციელებული მოკვლევიდან ირკვევა, აღნიშნული საჰაერო ხომალდები არ არის წარმოებული ქარხნულად, არის ხელნაკეთი (კუსტარულად დამზადებული) და შესაბამისად, მწარმოებელი ვერ უზრუნველყოფდა გაურკვეველ პირობებში და გაურკვეველი კომპონენტებით დამზადებული აპარატების ტექნიკური მდგომარეობის შეფასებას, ასევე უსაფრთხოების ნორმებთან მისი შესაბამისობის დადგენას.

ვინაიდან მოტოდელტაპლანების მფლობელებმა სააგენტოში ვერ წარმოადგინეს ქარხანა-დამამზადებლის მიერ გაცემული საფრენად ვარგისობის დამადასტურებელი დოკუმენტაცია, სააგენტო მოკლებულია შესაძლებლობას მოახდინოს მათი კანონმდებლობით და საერთაშორისო სტანდარტებით გათვალისწინებული რეგისტრაცია.

შესაბამისად, სამოქალაქო ავიაციის სააგენტო მიიჩნევს, რომ აღნიშნული სატრანსპორტო საშუალებების ექსპლუატაცია საფრთხის შემცველია როგორც ოპერირების ზონაში სხვა საჰაერო ხომალდების ფრენების უსაფრთხოებისთვის, ისე მოქალაქეთა სიცოცხლისა და ჯანმრთელობისთვის” – აღნიშნულია სამოქალაქო ავიაციის სააგენტოს მიერ გავრცელებულ განცხადებაში.

ნანა ფარჩუკაშვილი ყოფილი პატიმარია, რომლის სარჩელიც საკონსტიტუციო სასამართლომ ნაწილობრივ დააკმაყოფილა და სასჯელაღსრულებისა და პრობაციის მინისტრის #200 ბრძანება არაკონსტიტუციურად სცნო.

ამ ბრძანების მიხედვით, ციხის ადმინისტრაციას უფლება ჰქონდა პატიმრისთვის, შემოწმების მიზნით გაშიშვლება და ბუქნების გაკეთება იმდენჯერ მოეთხოვა, რამდენჯერაც თავად ჩათვლიდა საჭიროდ. ნანა ფარჩუკაშვილი გაშიშვლების მეთოდის საერთოდ გაუქმებას და სკანერით ჩანაცვლებას მოითხოვდა. საკონსტიტუციო სასამართლომ ეს მოთხოვნა არ დააკმაყოფილა.

საპატიმრო დაწესებულებიდან გათავისუფლების შემდეგ ნანა ფარჩუკაშვილი საადვოკატო საქმიანობას ეწევა და აქტიურად მუშაობს პატიმრების უფლებების დაცვაზე.

ნანა, რა შეიცვლება საკონსტიტუციო სასამართლოს გადაწყვეტილებით, რას შეცვლის ეს შედეგი საპატიმროებში?

სასჯელაღსრულების დეპარტამენტმა ქალთა მეხუთე დაწესებულებაში შემოწმების პრაქტიკა უკვე შეცვალა…

არაადამიანური მოპყრობის თითოეულმა მსხვერპლმა უნდა მოითხოვოს მორალური ზიანის ანაზღაურება. ჩემთვის ძალიან უმნიშვნელოა თანხა, რასაც შეიძლება მორალური ზიანის გამო გიხდიდეს სახელმწიფო. ჩემთვის მთავარია, სასამართლოს ამ გადაწყვეტილებით კიდევ ერთხელ ვუთხრათ სისტემას, რომ პატიმრებს, ისევე როგორც ამ ქვეყნის თავისუფალ მოქალაქეებს, აქვთ პატივი და ღირსება, რომლის შელახვაც დასჯადია.

ჩემი პატიმრობისას ყოფილა შემთხვევები დაწესებულებებში მსჯავრდებულთა გაშიშვლების, მერე კი მათი დაცინვის. ახლა მე თვითონ ვიცავ  სხვების უფლებებს და ყველას უფასოდ ვთავაზობ იურიდიულ დახმარებას, ვინც ყოფილა მსხვერპლი ციხეში არაკონსტიტუციური, უკანონო და არაადამიანური მოპყრობისა.

სოციალური ქსელებით, პირადი კონტაქტებით, ყველა საშუალებით ვაპირებ მივაწვდინო ხმა პატიმრებს, რომლებსაც მსგავსი შემთხვევები ჰქონიათ.

ჩვენ ყველას, ერთად შეგვიძლია ვუთხრათ სახელმწიფოს – „შენ მე მაყენებდი მორალურ ზიანს“. ეს ზიანი, ვფიქრობ ბოდიშის მოხდით მაინც უნდა ანაზღაურდეს, თუ მატერიალური საზღაურით არა“.

ხომ არ ფიქრობთ, რომ საკონსტიტუციო სასამართლოში საქმის მოგება განაპირობა თქვენმა იურიდიულმა განათლებამ და დაინტერესებამ – დაგეცვათ საკუთარი უფლებები ბოლომდე?

ცხადია, ბევრს ნიშნავს ინფორმირებულობა, საკუთარი უფლებებისა და კანონების ცოდნა, მაგრამ ნებისმიერ ადამიანს, ვინც გრძნობს, რომ მისი ღირსება ილახება, იურიდიული განათლების გარეშეც შეუძლია მიაღწიოს მიზანს: მთავარია, არავის მივცეთ უფლება შეილახოს ჩვენი ღირსება არსად, მათ შორის საპატიმროშიც.

ასეთ შემთხვევებში აუცილებლად გამოჩნდებიან ადამიანები, ორგანიზაციები, რომლებიც დაგეხმარებიან.

ნანა ფარჩუკაშვილი „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამის“ ბენეფიციარია. პროექტს „დემოკრატიის ინსტიტუტი“ ახორციელებს პარტნიორ ორგანიზაციებთან ერთად საქართველოს ოთხ რეგიონში: აჭარაში, გურიაში, იმერეთსა და სამეგრელო – ზემო სვანეთში. პროექტის ფინანსური მხარდამჭერი ევროკავშირია.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ. მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

შარაბიძეებში, ბათუმს შემოერთებულ ტერიტორიაზე მაშველები მდინარე ჭოროხში მამაკაცს ეძებენ.

„ბათუმელების“ ინფორმაციით, დაახლოებით 50 წლის მამაკაცი ადგილობრივი მცხოვრები იყო, იგი ჭოროხის ნაპირას მეგობრებთან ერთად იმყოფებოდა და საბანაოდ შესვლა გადაწყვიტა მდინარეში. სავარაუდოდ, იგი ალკოჰოლის ზემოქმედების ქვეშ იყო. მეგობრებმა მისი მდინარიდან გამოყვანა ვერ მოახერხეს და სამაშველო სამსახურს დაუკავშირდნენ.

„ბათუმელებს“ საგანგებო სიტუაციების მართვის სამსახურში უთხრეს, რომ ადგილზე ამჟამად 15-მდე მაშველი მუშაობს, მათ შორის არიან მყვინთავებიც.

„მოპასუხე შპს „ჩემი სახლი”-ს აეკრძალოს ქ. ბათუმში, ს. ხიმშიაშვილის ქ. N20-ის მიმდებარედ არსებულ უძრავ ქონებაზე… IV კლასს მიკუთვნებული საცხოვრებელი კორპუსის მშენებლობის გაგრძელება ერთი თვის ვადით“, – ეს განჩინება მოსამართლე სალიხ შაინიძემ 25 ივნისს გამოსცა. კომპანიას სასამართლოში მშენებლობის გვერდით მცხოვრებმა ორმა პირმა უჩივლა.

სამშენებლო კომპანია „ჩემი სახლი” 50%-ი დეპუტატ ხვიჩა შარაშიძეს ეკუთვნის. იმაზე, რომ სასამართლომ შეაჩერა მშენებლობა, ხვიჩა შარაშიძე ინფორმაციას არ ფლობს. „არ გაქვთ სწორი ინფორმაცია, ვიცი, რომ მასეთი რაღაც არ არსებობს“, – უთხრა დეპუტატმა „ბათუმელებს“.

საქმე იმაშია, რომ აჭარის უმაღლესი საბჭოს წევრის სამშენებლო  კომპანიამ ცოტა ხნის წინ მისი სამშენებლო ტერიტორიის მეზობლად სამსართულიან სახლზე სახანძრო კიბე მოჭრა და ფანჯრებთან კედელი ამოაშენა. ახლა კი  მეზობელი სახლის სახურავის სივრცეც აითვისა, ისე რომ „აქ მაცხოვრებლებს მომავალში ამ სივრცის გამოყენების შესაძლებლობა წაართვა“.

შპს „ჩემი სახლი“ ტერიტორიაზე მრავალბინიან საცხოვრებელ სახლს აშენებს.

ხვიჩა შარაშიძემ გვირჩია საკითხზე ზუსტი ინფორმაციის მისაღებად სხვა პირებისთვის მიგვემართა: „კომპანიას ჰყავს დირექტორი, იურისტი – გააჩნია რა საკითხთან დაკავშირებით რეკავთ მითხარით და გადაგამისამართებთ.“

კითხვაზე – ის, რომ კომპანიამ აქამდე არ შეასრულა ბათუმის მერიის დადგენილებები, შესაბამისად, დაარღვია კანონი, მას როგორც მესაკუთრესა და კანონმდებელს ხომ არ უქმნის უხერხულობას?  – დეპუტატმა თქვა:

„თუ რამეს არღვევს მე შემიძლია ჩავერთო. მე, ფაქტობრივად, მართვაში არ ვერევი. ჩემი ინფორმაციით იქ არანაირი კანონდარღვევა არ არის. როგორც ვიცი, მიდის რაღაც სასამართლო დავა, მეზობელმა უჩივლა მე მგონი კომპანიას. სასამართლო წესით გადაწყდება და როგორც კანონი, რიგი და წესია ისე იქნება ყველაფერი. არ შეიძლება, რომ კანონი დაარღვიოს კომპანიამ, ამაში გეთანხმებით სრულიად“.

ბათუმის მერიის მშენებლობაზე ზედამხედველობის განყოფილების მიერ გამოცემული დადგენილებები კი ნამდვილად ადასტურებს, რომ „ჩემი სახლი“ მშენებლობას სანებართვო პირობების დარღვევით აგრძელებს, რაზეც  ჯერ მითითება  შემდეგ კი გაფრთხილება მიიღო მშენებლობის შეჩერების მოთხოვნით. თუმცა უშედეგოდ, მშენებლობა გრძელდება.

სასამართლომ მშენებლობა ერთი თვით იმ მოტივით შეაჩერა, რომ მოსარჩელემ ექსპერტიზის ჩატარება შეძლოს და გაირკვეს აითვისა თუ არა სამეზობლო სივრცე კომპანიამ, რადგან კომპანია ამას უარყოფს.

სასამართლოს მშენებლობის მომიჯნავედ არსებული სახლის მესაკუთრეებმა – გიზო ჩერგეიშვილმა და მაია ბაკურიძემ მიმართეს. ისინი მიიჩნევენ, რომ მშენებლობის პროცესი უშუალო ზიანს აყენებს მათ საკუთრებას:

„რადგან კომპანიამ დაარღვია სამეზობლო მიჯნა და მშენებარე კორპუსის ნულოვანი ნიშნულის შემდგომ თითოეული სართულის იატაკი იჭრება ამხანაგობა „თანადგომის“ საკუთრებაში არსებულ მიწის ნაკვეთში და ზემოდან ედგმის მათ საცხოვრებელ ფართებს.“

იმ შემთხვევაში კი, თუ  ამხანაგობა “თანადგომა” ან თავად მესაკუთრეები გადაწყვეტენ თავიანთ საცხოვრებელ ფართობს დააშენონ სართული, მათ ამის შესაძლებლობა არ ექნებათ, ამიტომაც ამტკიცებენ, რომ კომპანიამ მათ საკუთრების უფლება ხელყო.

ამასთან დაკავშირებით „თანადგომის“ წევრებმა წერილობითი კომპანიასაც მიმართეს, მაგრამ მოპასუხის მხრიდან მათ მოთხოვნას ამ დრომდე რეაგირება არ მოჰყოლია, მშენებლობა გრძელდება.

მესაკუთრეების ინტერესებს იურისტი გიორგი ხიმშიაშვილი იცავს. მისი განმარტებით, მოსარჩელეებმა მიმართეს სამხარაულის ექსპერტიზის ბიუროს, პროექტისა და მიმდინარე მშენებლობის კანონიერების შესწავლის მიზნით. ბიურომ განმცხადებლებისგან მოითხოვა გარკვეული ინფორმაცია, რომელსაც მხოლოდ კომპანია ფლობს. ადვოკატის თქმით, კომპანია  ამ ინფორმაციის გაცემაზე კატეგორიულ უარს აცხადებს:

„კომპანიამ სამშენებლო მოედანზე არ შეუშვა ბიუროს ექსპერტი შესაბამისი კვლევის ჩასატარებლად და ამის პარალელურად ცდილობს მაქსიმალურად სწრაფ რეჟიმში დაასრულოს მშენებლობა. რადგან მისთვის ცნობილია, რომ მრავალსართულიანი კორპუსის დანგრევის არც ტექნიკური და არც ფინანსური შესაძლებლობა არცერთ მხარეს არ ექნება. “

კომპანიის იურისტი ამირან ცეცხლაძე ამტკიცებს, რომ კომპანია სამეზობლო სივრცეში არ შეჭრილა და დავა უსაფუძვლოა: „ამიტომაც ჩვენ თვითონ მოვითხოვეთ ექსპერტიზა, მივმართეთ სამხარაულის ექპერტიზის ბიუროს და კვლევის შედეგი დაახლოებით ერთ კვირაში ხელთ გვექნება, რაშიც ეჭვს ვერავინ შეიტანს. რაც შეეხება იმას, თუ რატომ არ შევუშვით მოსარჩელე მხარის ექსპერტი – ის მშენებლობის მიმდინარეობის პროცესის დროს მოგვადგა და უსაფრთხოების წესებიდან გამომდინარე არ შევუშვით. შესაბამისი დროც  ვერ შევთავაზეთ, რადგან ერთხელ მოვიდა და მეტჯერ არ მოუმართავს.“

კომპანიის იურისტს არ აქვს ინფორმაცია იმის შესახებ, რომ სასამართლომ მშენებლობა შეაჩერა. მან ამის შესახებ „ბათუმელებისგან“ გაიგო:

„ერთი თვით შეაჩერა? – ასეთ რაიმეს კანონმდებლობა არ ცნობს. ასეთი გადაწვეტილება არ ჩაგვბარებია“.

განჩინება მხრეს დღეს, 27 ივლისს ჩაბარდა.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 27-28 ივლისს ბათუმში მოსალოდნელია ცვალებადი მოღრუბლულობა, უმეტესად უნალექოდ. იქროლებს ცვალებადი მიმართულების ქარი 10-15 მეტრი წამში.

ჰაერის ტემპერატურა სანაპირო რაიონებში იქნება:

• დღისით: 27  – 32  გრადუსი  
• ღამით: 17 – 22 გრადუსი 

მთაში მოსალოდნელია:

• დღისით: 25 – 30  გრადუსი 
• ღამით: 13 – 18 გრადუსი 

ტალღის სიმაღლე 5-10 დმ – 2-3 ბალი. ზღვის წყლის ტემპერატურა 27 გრადუსია.

სინოპტიკოსების ცნობით, ივლისის ბოლო დღეებში მოსალოდნელია საღამოს და ღამის საათებში ზოგან ელჭექის ხასიათის ხანმოკლე წვიმა, დღისით კი უმეტესად უნალექო ამინდი.

__________________

მარიამ ქველიაშვილის ფოტო 

კარვით ბუნებაში დასვენებას სხვადასხვა მხარე აქვს: თუ კოღოებთან ბრძოლა და მიწაზე თხელი პარალონით ძილი ვერ წარმოგიდგენიათ, კარვის იდეა თავიდანვე უნდა უარყოთ და სასტუმროების ძებნა დაიწყოთ, მაგრამ თუ კომფორტის არარსებობა და ბონუსად ღია ცის ქვეშ: ტყეში, ან ზღვასთან ახლოს ძილი მოგწონთ, მაშინ ეს ინფორმაცია აუცილებლად გამოგადგებათ.

ბათუმსა და ქობულეთში კარვებისთვის ადგილი ოფიციალურად გამოყოფილი არ არის. ბათუმისა და ქობულეთის მერიაში გვითხრეს, რომ აკრძალულია კარვის გაშლა ბულვარის ტერიტორიაზე, ზღვასთან ახლოს და ასევე, პარკებსა და სკვერებში, თუმცა აჭარაში არის ადგილები, სადაც ზღვასთან ახლოს კარვების გაშლა დაშვებულია.

ბათუმის ბოტანიკური ბაღი

ბათუმის ბოტანიკური ბაღის ტერიტორიაზე კარვით ერთი ღამის გათევა ღირს:

[checklist]

• საქართველოს მოქალაქეებისთვის 15 ლარი
• უცხოელებისთვის 20 ლარი
• საფასურში ბოტანიკური ბაღის დათვალიერებაც შედის

[/checklist]

საკემპინგე ტერიტორია, ბოტანიკური ბაღის მწვანე ტყეშია მოწყობილი, საიდანაც ზღვის სანაპირომდე სულ რაღაც 100 მეტრია. ადგილზე გამართულია საკემპინგე ინფრასტრუქტურა: ახლომდებარე კაფე-ბარში შესაძლებელია კერძების შეკვეთა, ადგილზე არის მაყალი – ბოსტნეულისა და ხორცის შესაწვავად, იქვეა შშმ პირებისთვის ადაპტირებული საპირფარეშოც, თუმცა არ არის საშხაპე. ტერიტორია დაცულია და დაცვა მთელი ღამე მორიგეობს.

გაითვალისწინეთ, რომ ბოტანიკური ბაღის ტერიტორიაზე კარავი, პარალონი და საძილე ტომრები არ ქირავდება. ამიტომ თუ ასე დასვენება გსურთ, საკუთარი აღჭურვილობით უნდა ეწვიოთ ბოტანიკურ ბაღს.

მტირალას ეროვნული პარკი

მტირალას ეროვნულ პარკში ბევრნაირადაა შესაძლებელი ღამისთევა: ვიზიტორთა ცენტრის სასტუმროში, საოჯახო სასტუმროებსა და ხის ქოხში – ტურისტულ თავშესაფარში. პარკის ტერიტორიაზე მოწყობილია საკემპინგე – საკარვე ადგილებიც. თუ აღჭურვილობა არ გაქვთ პარკის ვიზიტორთა ცენტრში შეგიძლიათ იქირავოთ:

[checklist]

• ორადგილიანი კარავი ერთი ღამით – 10 ლარად
• პარალონი – 5 ლარი
• ზურგჩანთა – 5 ლარი
• საკარვე ადგილი – 5 ლარი

[/checklist]

თუ საკუთარი კარვითა და აღჭურვილობით ეწვევით დაცულ ტერიტორიას, მხოლოდ საკარვე ადგილის საფასურის გადახდა მოგიწევთ. საკემპინგე ტერიტორიებზე მაგიდები და ცეცხლის დასანთები ადგილებია გამოყოფილი. კარვის გასაშლელი ყველა გამოყოფილი ადგილი  მტირალას პარკის ტურისტულ რუკებზეცაა დატანილი.

                  მაჭახელას ეროვნული პარკი

მაჭახელას ეროვნულ პარკში სრულიად უფასოდ შეგიძლიათ კარვების გაშლა. საკემპინგე ინფრასტრუქტურა ჯერ აქ მოწყობილი არ არის და არც კარვები ქირავდება, მაგრამ საკუთარი აღჭურვილობით შეგიძლიათ ნებისმიერ ადგილზე დაბანაკდეთ უფასოდ. როგორც პარკის ადმინისტრაციაში აცხადებენ, ბილიკები და საკემპინგე ინფრასტრუქტურა მაჭახელას ეროვნულ პარკში ზაფხულის ბოლომდე მოეწყობა და ზაფხულის შემდეგ სეზონზე შესაძლებელი იქნება საკემპინგე აღჭურვილობის ადგილზე დაქირავებაც, თუმცა დაცულ ტერიტორიაზე კარვით დარჩენაც შესაბამისად, ფასიანი გახდება.

კინტრიშის ნაკრძალი

კინტრიშის ნაკრძალში მოწყობილია როგორც ტურისტული ბილიკები, ასევე საკემპინგე ინფრასტრუქტურაც. აქ ბზის კორომებისა და თამარის თაღოვანი ხიდის ტურები მთელი წლის განმავლობაში ხორციელდება. ვიზიტორთა ცენტრში იქირავებთ კარავსა და აღჭურვილობას იმ შემთხვევაში, თუ საკუთარი კარავი არ გაქვთ:

[checklist]

• კარვის დაქირავება დღეში – 10 ლარი
• საძილე ტომარა – 5 ლარი
• პარალონი – 3 ლარი
• ზურგჩანთა – 5 ლარი
• საკარვე ადგილი, ერთი ადამიანი – 5 ლარი

[/checklist]

დღეს, 27  ივლისს, ბათუმში „დემოკრატიული ჩართულობის ცენტრში“ სოციალურად დაუცველი  ჯგუფები შეიკრიბნენ და აჭარის მთავრობას ულტიმატუმი წაუყენეს. მათი განცხადებით, თუკი ხელისუფლება „ოცნების ქალაქის“ პრობლემას საბოლოოდ არ მოაგვარებს, ისინი საპროტესტო აქციებს დაიწყებენ. ხელისუფლებას გარკვეულ მოთხოვნებს უყენებენ იპოთეკით დაზარალებული პირებიც.

კახა ხიმშიაშვილი, „ოცნების ქალაქიდან“:  „წლები გადის და ყველა ხელისუფლება გვპირდება „ოცნების ქალაქის“ პრობლემის მოგვარებას, მაგრამ გადაწყვეტილებას არავინ არ იღებს. დავიღალეთ. ჩვენ ვითხოვთ აჭარის ახალი მთავრობისგან, რომ ერთხელ და საბოლოოდ მიიღონ გადაწყვეტილება, რომ ვიცოდეთ რა გველოდება“.

თამილა დუმბაძე, „ოცნების ქალაქი“:  „ჩვენ, მოვითხოვთ რომ დროულად დაიწყოს კორპუსების მშენებლობა, რადგან იმ პირობებში ცხოვრება შეუძლებელია. წინააღმდეგ შემთხვევაში, ცოცხალი თავით არ დავთმობთ იქაურობას“.

„დემოკრატიული ჩართულობის ცენტრში“ იმყოფებოდნენ იპოთეკური სესხებით დაზარალებული ოჯახებიც.

„როცა ბახტაძე ფინანსთა მინისტრი იყო, თქვა, რომ მზადდებოდა საკანონმდებლო ცვლილებები. ჩვენ ვიყავით 28 ივნისს ჩასული პარლამენტში და მოვიკითხეთ ამ კანონპროექტის ბედი. ამ ცვლილებებით უნდა დარეგულირებულიყო პროცენტების საკითხი, საუბარი იყოს შავი სიების გაუქმებაზე და მევახშეობის საქმიანობის აკრძალვაზე იმ პირებისთვის, ვისაც არ ექნებოდა ეროვნული ბანკის ლიცენზია და არ გადაიხდიდა ბიუჯეტში თანხას.

ჯერ-ჯერობით ეს ცვლილებები არ განხორციელებულა. ამიტომ, თუ პირველ სექტემბრამდე არ მიიღებენ გადაწყვეტილებას, საპროტესტო აქციები დაიწყება პარლამენტთან და აჭარაშიც“-ამბობს საბანკო და სამევახშეო სისტემის მარეგულირებელი კომისიის თავმჯდომარე ლალი ზაქარეიშვილი.

შეხვედრას ესწრებოდა სოფელ ჩანჩხალოს მკვიდრო გოდერძი მახარაძეც. მისი თქმით, ჰესების მშენებლობამ სოფლის გზა დააზიანა, რის გამოც, სოფელი ერთ წელზე მეტია ვერ სარგებლობდა გზით.

„იყო საუბარი, რომ გზა აღარ გაკეთდებოდა, რადგან გეოლოგიური დასკვნის მიხედვით, მეწყრული პროცესები იყო ნიადაგში განვითარებული. სოფელი ამჟამად შემოვლითი გზით სარგებლობს. ჰესების მშენებელმა კომპანიამ უარი თქვა შემოვლითი გზის გაკეთებაზე, რადგან ძალიან ძვირი ჯდებაო და ახლა დაიწყეს ისევ სოფლის ძველი გზის მშენებლობა.  გავამაგრებთ, ჩამოვასხამთო – გვეუბნებიან. თუ დასკვნა ამბობს, რომ გზა ვეღარ გაკეთდება და სახიფათოა, ახლა როგორ აკეთებენ?!“ – ამბობს გოდერძი მახარაძე.

ის ამბობს, რომ სოფლის მოსახლეობა ხელისუფლებას სთხოვს პასუხისმგებლობა აიღონ მოსახლეობის უსაფრთხოებაზე.

შეხვედრას ესწრებოდა არასამთავრობო ორგანიზაცია „ჩვენი უფლებებისთვის“ ხელმძღვანელი თამაზ ბაკურიძე. მისი თქმით, ხელისუფლება ვალდებულია ყურად იღოს მოქალაქეების მოთხოვნები და ყველა წარმოდგენილი ჯგუფის პრობლემებზე მოახდინოს დროული და ეფექტური რეაგირება.

აჭარის ჯანდაცვის მინისტრის, ზაალ მიქელაძის პირველი მოადგილე ნინო ნიჟარაძე იქნება, რომელიც აქამდე აჭარის საზოგადოებრივი ჯანდაცვის ცენტრს ხელმძღვანელობდა. მანამდე ამ თანამდებობაზე რუსუდან შავიშვილი მუშაობდა.

აჭარის ჯანდაცვის სამინისტროს ცნობით, ნინო ნიჟარაძეს აღნიშნულ უწყებაში საქმიანობის 19 წლიანი გამოცდილება აქვს. 2012 წელს დაინიშნა აჭარის საზოგადოებრივი ჯანდაცვის ცენტრის დირექტორის მოადგილედ, მანამდე იყო დირექტორის მოადგილე სამკურნალო დარგში, ეპიდემიოლოგი არაინფექციურ დაავადებათა მართვის საკითხებში, ასევე, მთავარი სპეციალისტი პროგრამების მართვის მიმართულებით. 2008-2010 წლებში მუშაობდა სამედიცინო მომსახურების საერთაშორისო კორპორაციაში, პროექტის ,,ტუბერკულოზის მართვა და კოორდინაცია“ კოორდინატორად.

რაც შეეხება აჭარის ჯანმრთელობისა და სოციალური დაცვის მინისტრის სხვა მოადგილეებს, მათ საკადრო ცვლილებები არ შეხებიათ.

ზურაბ თენიეშვილი აჭარის ჯანდაცვის სამინისტროში კვლავ სოციალურ მიმართულებას უხელმძღვანელებს, ის მინისტრის მოადგილედ 2014 წელს დაინიშნა.

მინისტრის მოადგილის თანამდებობაზე რჩება ნონა გალოგრე – მას ჯანდაცვის სამინისტროს ინფორმაციით, საჯარო და კერძო სექტორში საქმიანობის 31 წლიანი გამოცდილება აქვს და აჭარის ჯანმრთელობისა და სოციალური დაცვის სამინისტროში მინისტრის მოადგილის პოზიციაზე 2008 წლიდან მუშაობს.

პოსტს ინარჩუნებს რამაზ ჯინჭარაძეც, რომელიც უწყებაში 2004 წელს დასაქმდა, მუშაობდა სხვადასხვა პოზიციაზე, ხოლო მინისტრის მოადგილედ 2009 წელს დაინიშნა და მას შემდეგ თანამდებობა არ შეუცვლია.

აჭარის ავტონომიური რესპუბლიკის ჯანმრთელობისა და სოციალური დაცვის მინისტრს სულ ოთხი მოადგილე ჰყავს.

აჭარის სოფლის მეურნეობის მინისტრმა, ტიტე აროშიძემ თანამშრომლებს მოადგილეები წარუდგინა.

მინისტრის პირველი მოადგილის თანამდებობა მამუკა თურმანიძემ დაიკავა. იგი 2017 წლის მარტიდან დღემდე აჭარის ავტონომიური რესპუბლიკის სოფლის მეურნეობის სამინისტროს აგრარული განვითარების დეპარტამენტის უფროსი იყო. მამუკა თურმანიძე სოფლის მეურენობის სამინისტროში 2013 წლიდან მუშაობს, იყო სოფლის მეურნეობის დარგობრივი განვითარების განყოფილების მთავარი სპეციალისტი შემდეგ კი სოფლის მეურნეობის დარგობრივი განვითარების განყოფილების უფროსი.