დღეს, 25 ოქტომბერს, თბილისის სპორტის სასახლეში პრეზიდენტობის კანდიდატ სალომე ზურაბიშვილის ამომრჩეველთან დასკვნით შეხვედრაზე აჭარის ტელევიზიის წამყვანმა, სოფო ხალვაშმაც იმღერა. სწორედ ამის გამო ტელევიზიამ მომღერლის მიმართ დისციპლინური წარმოება დაიწყო და წამყვანი ორი დღით – შაბათ-კვირას ეთერიდან მოიხსნა.
საზოგადოებრივი მაუწყებლის აჭარის ტელევიზიის დირექტორი ნათია კაპანაძე ამბობს, რომ მსგავს აქტივობაში ტელეწამყვანის მონაწილეობა მიკერძოებად მიიჩნევა.
„ეს ეხება საარჩევნო პროცესს – ჩვენ [სოფო ხალვაშთან] მიმოწერა გვქონდა ამ საკითხზე. სოფომ იცოდა, რომ მიკერძოებად ითვლება მსგავს აქტივობებში მონაწილეობა. ჩვენ შაბათ-კვირას ვგეგმავთ საარჩევნო თემატიკის გაშუქებას, კვირას ეთერში იქნება არჩევნების პროცედურებისა თუ სხვა საარჩევნო თემატიკის განხილვა. შესაბამისად, ეს გადაკვეთა [სოფო ხალვაშის სტუდიაში მუშაობა] ეთერში ვერ მოხვდება ვერც ერთ შემთხვევაში. შემდეგ, დისციპლინური წარმოების ფარგლებში შეგროვებულ მასალებზე დაყრდნობით მივიღებთ გადაწყვეტილებას. ეს ეხება, ჯერჯერობით, ორ გადაცემას – წინასაარჩევნო და არჩევნების დღის პერიოდს“, – აცხადებს ნათია კაპანაძე.
აჭარის ტელევიზიის დირექტორის თქმით, ამ ფაქტთან დაკავშირებულ მასალებს შემდეგში შეისწავლიან და „ამ მოცემულობის შემდეგ მიიღებენ საბოლოო გადაწყვეტილებას“.
შემეცნებით-გასართობი პროგრამა „დილის ტალღა“, რომელსაც სოფო ხალვაში სხვა თანაწამყვანებთან ერთად უძღვება, აჭარის ტელევიზიის ეთერში გადის ყოველ შაბათ-კვირას, შესაბამისად, გავა 28 ოქტომბერს, ანუ საპრეზიდენტო არჩევნების დღესაც.
მთავარი ფოტო: აჭარის ტელევიზია
