„მე მაგი ბოროტება არასდროს მქონია“ – ანზორ ბოლქვაძე ხულოს მერის გადადგომასა და არჩევნებზე


„ჩემი სურვილით გავხდი ხულოს შტაბის უფროსი,“ – გვითხრა პარლამენტის წევრმა, ანზორ ბოლქვაძემ. იგი „ქართული ოცნების“ საარჩევნო შტაბს მას შემდეგ ხელმძღვანელობს, რაც გაურკვეველ ვითარებაში ხულოს არჩეული მერი და მისი მოადგილე სამსახურიდან წავიდნენ. გოჩა მელაძე მერობის პარალელურად საარჩევნო შტაბსაც ხელმძღვანელობდა. ხულოს, შუახევისა და ქედის მაჟორიტარ დეპუტატს, ანზორ ბოლქვაძეს ვკითხეთ, თავად გაუჩნდა შტაბის ხელმძღვანელობის სურვილი, თუ შესთავაზეს.

„სულ თავიდან მე ვიყავი შტაბის უფროსი, მერე მერებს ჩააბარეს შტაბები. გოჩა თავისი სურვილით წავიდა შტაბიდანაც და ისევ მე გავხდი… შტაბის ხელმძღვანელობა რა არის, ზედმეტი ბრძოლა, ხალხთან ურთიერთობა, ხელფასს ვიღებ ამაში, დანამატს თუ რას? რაც არის ჩემი ენერგია, უნდა ჩავდო ამაში,“ – აღნიშნა ანზორ ბოლქვაძემ.

რატომ გაგიჩნდათ ისევ შტაბის უფროსობის სურვილი? – დეპუტატმა ანზორ ბოლქვაძემ კითხვითვე გვიპასუხა: „საიდან მომეყვანა აბა? ჩემი რაიონია, ქედიდან მომეყვანა? ბათუმიდან?“

პარლამენტარი გამორიცხავს გავლენებს ხულოში და იმას, რომ მისი გავლენის გამო დატოვა გოჩა მელაძემ თანამდებობა.

„არასწორი ინფორმაციაა. რა გავლენა მაქვს მე? ამდენია წელია ვარ, ვინ გავუშვი? მე მაგი ბოროტება არასდროს მქონია. მე არ ვიცი, რატომ წავიდა გოჩა მელაძე, მას ჰკითხეთ, ჩემგან მხარდაჭერა და მეგობრობა არასდროს არ ეკლო. მე ვარ ხალხის დაქირავებული კადრი, რა მაქვს გასაყოფი: ოდესმე გამგებლობა მინდოდა თუ რა. სხვა გამგებლებიც არიან, ჰკითხეთ ოდესმე რამე დაპირისპირება თუ მქონია მათთან. მე ყველასთან კარგად ვარ. თქვენ არ მიცნობთ? როდის ვერ გამონახეთ საერთო ენა ჩემთან?“ – ამბობს ანზორ ბოლქვაძე.

ხულოს შტაბის უფროსს ასევე ვკითხეთ კოორდინატორების შესახებ. ანზორ ბოლქვაძემ პარტია „ქართული ოცნების“ ოფიციალური პოზიციისგან განსხვავებით დაგვიდასტურა, რომ კოორდინატორები იმდენივეა, რამდენიც გასულ არჩევნებზე ჰყავდა პარტიას.

„ქართულ ოცნებაში“ „ბათუმელებს“ 23 ოქტომბერს უთხრეს, რომ ცალკე კოორდინატორები პარტიას არ ჰყავს, რადგან ის დამოუკიდებელ კანდიდატს მხოლოდ პოლიტიკურ მხარდაჭერას უცხადებს.

„კოორდინატორები იმავე რაოდენობით გვყავს, კი… რამდენია ახლა არ ვიცი, ეს პარტიის გენერალურ მდივანს დაურეკეთ და ის გეტყვით, ვინ ფასიანია და ვინ – უფასო, იმან იცის, მე არ მაქვს ინფორმაცია,“ – გვითხრა ანზორ ბოლქვაძემ.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი