დღეს ბათუმში ზაზა სარალიძის მხარდამჭერი აქცია გაიმართება

დღეს, 27 ოქტომბერს, 19 საათზე, ბათუმში, ევროპის მოედანზე, ზაზა სარალიძის მხარდამჭერი აქცია გაიმართება.

“მთავრობამ დაიჭირა შვილმკვდარი მამა ზაზა სარალიძე. ჩემი აზრით მთავრობისა და სამართალდამცავების დამოკიდებულება ამ ადამიანის მიმართ არის არაადამიანური.  ჩვენი მოქალაქეობრივი შეგნებიდან გამომდინარე გადავწყვიტეთ ჩვენი პოზიცია დაგვეფიქსირებინა საჯაროდ ერას მოედანზე ჩვენი ქალაქის სახელით,” – ნათქვამია ორგანიზატორების მიერ გავრცელებულ ფეისბუქ ივენთის ტექსტში.

ორგანიზატორების თქმით,  აქციაში მონაწილეობა  ნებისმიერ მოქალაქეს შეეძლება. ევროპის მოედანზე მისულ მოქალაქეებს ორგანიზატორები სპეციალურ წებოვან ფურცლებს დაახვედრებენ, რომელზეც მათ თავიანთი მოსაზრებების დაწერა შეეძლებათ. ეს ფურცლები საინფორმაციო დაფაზე გაიკვრება.

“პროტესტის ფორმას ორი მიზანი აქვს: ზაზა სარალიძის მხარდაჭერა და ხელისუფლების ქმედების შეფასება. არ მივცეთ მათ იმით აპელირების საშუალება რომ თითქოს ზაზა სარალიძეს მხარს მხოლოდ ერთი კონკრეტული პოლიტიკური პარტიის წარმომადგენლები უჭერენ,” – ამბობენ ორგანიზატორები.

მთავარი ფოტო: 26 ოქტომბერს თბილისში გამართული სოლიდარობის აქციიდან