“ვახშამი ბიუჯეტიდან არ დაგვიფინანსებია” – ქობულეთის მერის განმარტება


“ეს არ იყო არც ერთ შემთხვევაში მუნიციპალური ღონისძიება და არც ერთი თეთრი, სრული პასუხისმგებლობით ვამბობ, ამ ღონისძიებაზე არ გახარჯულა საბიუჯეტო სახსრებიდან. ამის გადამოწმება ძალიან მარტივად  შეუძლია ნებისმიერ დაინტერესებულ პირს იმ გზით, რომ გამოითხოვოს საჯარო ინფორმაცია, თუ რა თქმა უნდა, ჩემი არ გჯერათ,” – უთხრა “ბათუმელებს” ქობულეთის მერმა, მირიან ქათამაძემ.

ქობულეთის მერს რესტორან „ხალაგრანდში“ გამართულ ვახშამთან დაკავშირებით დავუსვით კითხვები. მირიან ქათამაძე ამბობს, რომ რესტორანში ვახშამი საპატიო ქობულეთელებისთვის მოაწყვეს და მასზე ხალხი პარტიული ნიშნით არ მიუწვევიათ.

“ჩვენ წარმატებულ ქობულეთელებს და საზოგადოების წარმომადგენლებს ვხვდებით ხშირად. ასეთ შეკრებებში საკრებულოს უმრავლესობის დეპუტატებიც მონაწილეობენ და მონაწილეობენ ასევე ჩვენი გუნდის წევრებიც. განსაკუთრებული ამაში არაფერი არაა. ის, რომ ეს ღონისძიება თითქოსდა საბიუჯეტო სახსრებით დაფინანსდა, ტყუილია,” – ამბობს მირიან ქათამაძე.

“ბათუმელების” კითხვაზე, ვინ დაფარა რესტორანში გამართული 140-კაციანი  სუფრის ხარჯი, რომელიც 6300 ლარი დაჯდა, მირიან ქათამაძე პასუხობს:

“ჩვენი პირადი სახსრებით გადავიხადეთ. როგორც მეგობრები იკრიბებიან ხოლმე. ყოველ შემთხვევაში, ეს საბიუჯეტო სახსრებით დაფინანსებული არაა. ეს არის პირადი სახსრებით გამართული ღონისძიება”.

ვახშამი რესტორან “ხალაგრანდში” 22 ოქტომბერს გაიმართა. ვახშამს ქობულეთელები, ქობულეთის საკრებულოს უმრავლესობის დეპუტატები, საქართველოს პარლამენტის წევრები – ფატი ხალვაში, მუხრან ვახტანგაძე, კობა ნაკაიძე და აჭარის მთავრობის თავმჯდომარე, თორნიკე რიჟვაძე ესწრებოდნენ.

 

ამავე თემაზე:

„რჩეული ქობულეთელები იყვნენ სუფრაზე“ – დეპუტატი არჩევნებამდე 5 დღით ადრე გამართულ ვახშამზე

ნეტგაზეთის მასალების სხვა გამოცემებში გადაბეჭდვის წესი
ავტორი