ხულოს რამდენიმე სოფელში გათოვდა. თხილვანის თემში თოვა ამ დილით დაიწყო. სინოპტიკოსების ცნობით, დღის განმავლობაში კიდევ უფრო აცივდება და თოვაც ხვალ შუადღემდე გაგრძელდება. ხვალ დღის მეორე ნახევრიდან აჭარის მთასა და ბარში გამოიდარებს.
აჭარის რეგიონალური ჰიდრომეტეოროლოგიური ობსერვატორიის მონაცემებით, აჭარის მთაში დღეს 0-5 გრადუსი სითბოა, ღამით კი ტემპერატურა – 2 გრადუსამდე დაიკლებს. ხვალ, 27 ოქტომბერს, მთაში ჰაერის ტემპერატურა 5-დან 10 გრადუსამდე გათბება, ღამით კი ისევ ყინვა იქნება.
აჭარის სანაპირო ზოლში დღეს, 26 ოქტომბერს, ჰაერის ტემპერატურა +10 – +12 გრადუსია. ხვალიდან ჰაერი 13-დან 18 გრადუსამდე გათბება, ღამით კი, 5-10 გრადუსი სითბო იქნება.
„ხვალ გამოიდარებს დღის მეორე ნახევრიდან. მომდევნო სამი დღის განმავლობაში ტემპერატურა თანდათან მოიმატებს,“ – გვითხრეს სინოპტიკოსებმა.
დღეს და ხვალ შტორმი იქნება ზღვაზეც – დაახლოებით 4 – 5 ბალი.