Batumelebi

„აღარ არსებობს ზღვარი, რასაც „ოცნება“ არ იკადრებს. რომელიმე პარლამენტარი როგორ შეიძლება აი, პენსიონერს დაელაპარაკოს, თვალებში ჩახედოს, რამე საკითხზე დაელაპარაკოს, როცა იცის, რომ თავისი ანაზღაურება არის 12 800, გაისად გახდება 13 880, ამ დროს კი, პენსიონერს 20 ლარი დაუმატე?“ – ამბობს გოტა ჭანტურია „ბათუმელებთან“.

მას „ოცნების“ თანამდებობის პირებისთვის ხელფასების ზრდის ახალ მაჩვენებელზე ვესაუბრეთ: მაშინ, როცა ჩინოვნიკების ხელფასები ათასობით ლარი იზრდება, პენსიონერს 20-60 ლარს უმატებენ.

„საზოგადოება კარგად ხედავს, ამ დაუფარავად აგდებულ დამოკიდებულებას… მივდივართ სოციალურ კოლაფსამდე, როდესაც საზოგადოების უდიდესი ნაწილი ღარიბდება და ძალიან მცირე ჯგუფი ფაქტობრივად აკონტროლებს, დომინირებს საზოგადოების უდიდეს უმრავლესობაზე. ამ დროს მარტივდება უმრავლესობის დაქვემდებარება, უფრო მარტივი ხდება მანიპულირება სოციალური საკითხებით,“ – ამბობს გოტა ჭანტურია.

„ბათუმელებმა“ გოტა ჭანტურიასთან ინტერვიუ ჩაწერა. იგი მოძრაობის „სოციალური დემოკრატიისთვის“ ერთ-ერთი ლიდერია.

• ბატონო გოტა, ისევ ათასებით იზრდება თანამდებობის პირების ხელფასები, პენსიონერების კი, 20-60 ლარით. ეს არის მხოლოდ სოციალური უთანასწორობის გაღრმავება, თუ სხვა რამ? 

ჩემი აზრით, სოციალურ უთანასწორობამდე, პირდაპირ რომ ვთქვათ, ეს არის დაცინვა საზოგადოების და ამ შემთხვევაში პენსიონერების. ისინი ისედაც უკვე ელიტურ ჯგუფებს განეკუთვნებიან – საქართველოს მოსახლეობის 5-10%-ში შედიან, რომლებსაც 10 000 ლარზე მეტი აქვთ ანაზღაურება და ამ დროს მათ ემატებათ ისევ ხელფასი, მაგალითად, 1350 ლარით გაიზრდება პრეზიდენტის, თუ პრემიერის ხელფასი და ექნებათ 16 000 ლარის ნაცვლად 17 350 ლარი.

ეს ყველაფერი ანომალიაა. ეს აჩვენებს იმას, თუ რა არის პრიორიტეტი „ოცნების“ მთავრობისთვის. ეს აჩვენებს იმას, რომ ისინი არ არიან დაინტერესებული არც სოციალური უთანასწორობის შემცირებით, არც საზოგადოების რეალური პრობლემების გადაჭრით. პირიქით, მათი მიზანია რეპრესიული მანქანის გაძლიერება და რეჟიმის გამყარება.

ეს გადაწყვეტილებაც ამ მიზანს ემსახურება – არსებობდეს ფინანსური მოტივაცია თავიანთი დაჯგუფებისთვის.

• ოფიციალურად ვისმენთ „ოცნების“ მთავრობის არგუმენტს, რომ თუ გვინდა ეფექტური მთავრობა, მაქსიმალურად უნდა გამოირიცხოს კორუფციის რისკები. ეს განცხადებები როგორ ჟღერს დღეს? 

შეუძლებელია ამხელა განსხვავება, ასიმეტრია არსებობდეს თანამდებობის პირსა და, მაგალითად, მასწავლებელს შორის, ხომ? მასწავლებლის ანაზღაურება თუ საშუალოდ 1000 ლარია, რა გამოდის, რომ მისი შრომა ნაკლებად პრიორიტეტულია, ნაკლებად მნიშვნელოვან საქმეს აკეთებს, ვიდრე მთავრობის რომელიმე წევრი, ან პარლამენტარი?

ჩვენს ქვეყანაში მინიმალური ხელფასიც კი არაა განსაზღვრული. ამაზე ლაპარაკობენ, მაგრამ ამ მიმართულებით რეალურად არაფერი კეთდება. ახლახან გვქონდა პროტესტი საზოგადოებრივ მაუწყებელთან და, მათ შორის, მენეჯმენტთან გვქონდა დასმული ეს საკითხი: მიუხედავად ამ ვერდიქტისა, სხვათა შორის, პარლამენტის თავმჯდომარის თუ პრემიერ-მინისტრს მაინც ნაკლები ხელფასი აქვთ, ვიდრე, მაგალითად, თინათინ ბერძენიშვილს.

ამ მასშტაბის ასიმეტრიას ვუყურებთ და ამ დროს ათასობით ადამიანია სოცდაუცველთა სიაში, კიდევ მეტი ელოდება ამ დახმარებას. იმდენად მძიმეა ჩვენი სოციალური ფონი, რომ მიჭირს კიდეც ამაზე სერიოზული კომენტარის გაკეთება. მიჭირს, რადგან საზოგადოება კარგად ხედავს, ამ დაუფარავად აგდებულ დამოკიდებულებას.

• შესაძლებელია იგივე პენსია მინიმუმ 100 ლარით მაინც გაიზარდოს, როცა ყოველწლიურად ამ მასშტაბით იზრდება თანამდებობის პირების ხელფასები? 

ეს არის პრიორიტეტების საკითხი. რა თქმა უნდა, შესაძლებელია, თუ პრიორიტეტი იქნება სოციალური დაცვა. დანარჩენი ყველაფერი არის მანიპულაცია, რომ თითქოს პენსიის 100 ლარით გაზრდა შეუძლებელია.

ამიტომაც ვიბრძვით ევროპული ღირებულებებისთვის, რომ ეს ნიშნავს სხვა სიკეთეებთან ერთად ღირსეულ შრომით პირობებს, გარემოს, სადაც ამხელა ასიმეტრია არ არსებობს. მაგალითად, ექთანი, რომელიც ადამიანის გადარჩენისთვის იბრძვის, ნაკლებად მნიშვნელოვან საქმეს აკეთებს, ვიდრე დეპუტატი? ამ დროს მისი ანაზღაურება დაახლოებით 300-400 ლარია ჩვენს ქვეყანაში.

• ექთნებს რამდენიმე ადგილზე ერთდროულად მუშაობაც უწევთ – დეფიციტის აღმოსაფხვრელად კი, ნაბიჯები არ იდგმება

რა თქმა უნდა, დეფიციტის აღმოფხვრას და სიტუაციის გაუმჯობესებას აქ არავინ ცდილობს. ჩვენ ვხედავთ, რომ თანამდებობის პირები მხოლოდ პირადი და მერკანტილური ინტერესების დაკმაყოფილებაზე არიან გადასული. ამ დროს ირაკლი კობახიძემ, მაგალითად, თქვა, რომ თითქოს ტერიტორიული პრინციპით შეარჩია მისი შვილისთვის კერძო სკოლა, მაგრამ კერძო სკოლაში დაჰყავს შვილი, იქ ხარჯავს ასეულობით ათას ლარს.

სამედიცინო სფეროშიც ვხედავთ, რომ ეს მაღალბიუჯეტიანი თანამდებობის პირები დასავლეთში მიდიან სამკურნალოდ, იქ მშობიარობენ კიდეც…

სამწუხაროდ, შრომითი პირობების გაუმჯობესება ამ ქვეყანაში არასდროს იყო პრიორიტეტი. 30 წელია ვუყურებთ, როდის დაარეგულირებს ბაზარი რაღაცას. ამასობაში, მივიღეთ სოციალური უთანასწორობის ისეთი მასშტაბი, რაც მგონი არასდროს არ გვქონია.

• სტატისტიკის ეროვნული სამსახურის ბოლო მონაცემებით, 2026 წლის მეორე კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 8%-ით გაიზარდა, რაც 1377.3 ლარია, ხოლო საშუალო ხელფასი გახდა 2389 ლარი. ეს მაჩვენებელი რამდენად რეალურია? 

ესეც არის მანიპულაცია, რადგან ასე საშუალოს დათვლა არ ხდება: თუ ერთ ადამიანს არაფერი არ აქვს და მეორეს აქვს 10 000 ლარი, საშუალო 5 000 ლარი გამოდის ხელფასი. მედიანურის შემთხვევაში გაცილებით დაბალია ეს ციფრი და უფრო ახლოსაა რეალობასთან.

რომც დავუჯეროთ ამ მაჩვენებელს, რამდენით იმატებს პარალელურად ინფლაცია? როგორ ძვირდება ჩვენი ცხოვრება, საკვები პროდუქტები, კომუნალური ხარჯები, ყოველდღიურობა?

• რას ნიშნავს ეს პოლიტიკურად, თქვენი დაკვირვებით, როცა მმართველი პოლიტიკური გუნდი არ ერიდება უთანასწორობის კიდევ უფრო გაზრდას – საკუთარ ჯამაგირს ათასებით ზრდის, პენსიონერს კი, 20-60 ლარს უმატებს?

მგონი, თქვენ რაც თქვით, ზუსტად მაგას ნიშნავს – აღარაფერს აღარ ერიდება. მისთვის უკვე აღარ არსებობს რაღაც ბარიერი, რომელსაც არ გადალახავს. ის გველაპარაკება პრიმიტიული პროპაგანდით, რომ თითქოს ამ დროს ეკონომიკა იზრდება, ხელფასები იზრდება და კარგად ვცხოვრობთ. ეს არის ის, რაც ხდება ზოგადად ავტორიტარულ ქვეყნებში.

აღარ არსებობს ზღვარი, რასაც „ოცნება“ არ იკადრებს. მაგალითად, რომელიმე პარლამენტარი როგორ შეიძლება აი, პენსიონერს დაელაპარაკოს, თვალებში ჩახედოს, რამე საკითხზე დაელაპარაკოს, როცა იცის, რომ თავისი ანაზღაურება არის 12 800. გაისად გახდება 13 880, ამ დროს კი პენსიონერს 20 ლარი დაუმატე?

• რა რისკებს შეიცავს უთანასწორობის ამ მასშტაბით გაზრდა, რას გამოიწვევს ეს?

მივდივართ სოციალურ კოლაფსამდე, როდესაც საზოგადოების უდიდესი ნაწილი ღარიბდება და ძალიან მცირე ჯგუფი აკონტროლებს, დომინირებს საზოგადოების უდიდეს უმრავლესობაზე. ამ დროს მარტივდება უმრავლესობის დაქვემდებარება, უფრო მარტივი ხდება მანიპულირება სოციალური საკითხებით.

უმთავრესი რისკი ეს არის, რომ ტოტალურ, სოციალურ კოლაფსამდე მივდივართ, როდესაც უთანასწორობის ასეთი მაჩვენებელი გვაქვს. ამ დროს ახალგაზრდა თაობა ფიქრობს, რომ აქ პერსპექტივა აღარაა და მიდის ემიგრაციაში. რისკი მატულობს ამ კუთხითაც, რომ ემიგრანტების რაოდენობა კიდევ უფრო გაიზრდება.

როცა დემოკრატიულ ქვეყნებში თანამდებობის პირების ხელფასი იზრდება, თანაც ამ მასშტაბით, ეს აუცილებლად ხდება საყოველთაო განხილვის საგანი, რადგან ეს უნდა დაასაბუთონ: რამდენად არის ეს აუცილებელი? ხომ არ აჯობებს ეს ფინანსური რესურსი სხვა პრობლემის გადასაჭრელად გამოვიყენოთ? ნიუ-იორკის მერს, ზოჰრან მამდანს ჰკითხეს, ხელფასის ზრდაზე რატომ ამბობთ უარსო, მან უპასუხა: არაერთი ნიუ-იორკელის კარზე დავაკაკუნე და არავის უთქვამს, რომ ეს აწუხებთ ჩემი ხელფასის ოდენობაო, არავისთვის წუხილი ეს არ იყოო.

ჰოდა, იგივე ამბავია: ვინ შეწუხდა ამ ქვეყანაში, მაგალითად, იმაზე, რომ თურმე ყაველაშვილს დაბალი ხელფასი ჰქონია და უნდა გავუზარდოთ? მოსახლეობაში არავინ გამოთქვამს ამაზე წუხილს, როცა ამდენი პრობლემაა ჯანდაცვაში, განათლებაში, ყველა მიმართულებით უმწვავესი პრობლემებია. ამ დროს მთავრობა გვთავაზობს იმას, რომ საკუთარ ხელფასებს გაზრდის თანაც წელიწადში ორჯერ. რეფერენდუმზეც რომ გავიტანოთ ეს საკითხი, დარწმუნებული ვარ, მოსახლეობა მინიმუმ გაანახევრებს მათ ხელფასებს, რადგან ზუსტად ესაა ადეკვატური. ახლა რაც აქვთ ანომალიაა და ზრდა საერთოდ.

ეს არის საზოგადოების ღიად შეურაცხყოფა და თანაც, რომ თურმე ყველაფერი კანონიერად ხდება.

სასკოლო კვებაც კი ვერ გახდა პრიორიტეტი, თურმე თანხა საკმარისი არ გვქონია. ამ დროს მინისტრების და პარლამენტარების ხელფასების გაზრდისთვის გვაქვს თანხები.

___

ამ თემაზე:

„გენიტალიაზე შეხება არამც და არამც არ ხდება, მაქსიმუმი ბუქნების გაკეთებაა. ან სად გინახავთ ჩხრეკა იმ პოზით კეფაზე დადებული ხელებისა და მოხრილ მდგომარეობაში ყოფნის ფონზე?“ – კითხულობს სინდისის პატიმარი, რეზო კიკნაძე. იგი ციხიდან ეხმაურება პატიმარ გიორგი დავითაძის მიმართ ჩადენილ სავარაუდო სექსუალური ძალადობას.

გიორგი დავითაძის ოჯახის ცნობით, 2025 წლის 21 დეკემბერს პატიმარი პენიტენციური დაწესებულების თანამშრომლების მხრიდან გაუპატიურების მსხვერპლი გახდა. სპეციალურმა პენიტენციურმა სამსახურმა კი, ვიდეო ჩანაწერი გაასაჯაროვა და განმარტა, რომ დეესკალაციის საკანში გადაყვანისას მსჯავრდებულს ჩაუტარდა შემოწმება-დათვალიერება,

სინდისის პატიმარი რეზო კიკნაძე საკუთარ ფეისბუქგვერდზე გამოქვეყნებულ აუდიოგზავნილში განმარტავს, რატომაა მისთვის დამაჯერებელი ის, რასაც პატიმარი ჰყვება:

„შემძრა პატიმარზე აშკარა ძალადობის საზარელმა კადრებმა. ყველა ნორმალური ადამიანის რეაქცია ეს უნდა იყოს ალბათ. მე ვეცდები ვითომ ჩხრეკის ზღაპარი პაციენტის გადმოსახედიდან ჩამოვშალო:

უმრავი შეუსაბამობა რომ არის პენიტენციურის საცოდავ თვითმართლებასა და ვიდეოს შორის, მაგას ბრმაც კი მარტივად შეამჩნევს.
[…] მეც მომიწია ყოფნა ერთხელ. მიზეზი დღემდე არ ვიცი და ჩხრეკაც არაერთხელ გამომივლია. ჯერ ერთი, პატიმრის სხეულის შემოწმება არასდროს ხდება საკანში ან ჩვეულებრივ სამყოფელში, მით უმეტეს კამერების თვალწინ. ამისთვის სპეციალური ოთახი აქვთ, სადაც ან ფარდაა ჩამოფარებული ან რაღაც შირმის მსგავსია ბარიერად და გამოწმებს ერთი ადამიანი ნაცვლად მხეცთა ხროვისა.

ამ პროცესს არაფერი ახლავს თან ისეთი, რომ ბევრს მოუნდეს მოსვლა და ყურება.

არც მეტალოდეტექტორს იყენებენ აქ, სპეციალური აპარატია ისედაც აქვთ რენტგენის. კაბინაში შედიხარ და ისედაც ხედავენ ყველაფერს.

რაც ყველაზე მთავარია: დეესლაკაციის ოთახში შეყვანამდე ისედაც გავლილი ექნებოდა ეს შემოწმება იმ რენტგენის აპარატით, ანუ ეს ადამიანი უკვე იყო შემოწმებული და სუფთა. შესაბამისად, არანაირი საჭიროება არ იქნებოდა ხელების ყოფის ქოცების ფორმის ადგილებში. ან საპყრობილეში თვეების მყოფს რა უნდა ჰქონდეს აკრძალული სხეულში, როცა ისედაც მრავალგზის გაჩხრეკის შემდეგ ხარ იქ გამოკეტილი? საკანში კი შენ ვერაფერს გააჩენ, თუნდაც დევიდ კოპერფილდი იყო.

ან ექიმი რა მიზეზით უნდა ესწრებოდეს ჩხრეკას, თუ ეს მართლა ჩხრეკაა და არა ძალადობა პატიმარზე?

თავად მათივე დადებული ვიდეო გვარწმუნებს და ადასტურებს, რომ 100%-ით სიმართლე იყო პატიმრების გაუპატიურებასთან დაკავშირებით. შეუიარაღებელი თვალითაც კარგად ჩანს, თუნდაც უხმო ვიდეოში, საგინებლად რომ ხრიან თავს პატიმრის სახესთან მოძალადე ბადრაგები და ზოგადად, არც ჩხრეკის შემდეგ ცოფდება გაჩხრეკილი ობიექტი ისე, რომ ხელების ქნევასა და გინებას იწყებს, თუ ეს მართლა არის ჩხრეკა.

დიდი კონსილიუმი არ სჭირდება იმას, რომ სისხლიანი 14 წელი 9-ზე მეტია. ხალხო, დროზე გაახილეთ თვალი ხალხო, სანამ ყველას გაგაუპატიურებენ და მერე ამას პრევენციად მონათლავენ“ – ამბობს რეზო კიკნაძე.

მიმდინარე წლის პირველი ოქტომბრიდან ძალაში შევიდა საგადასახადო კოდექსში შეტანილი ცვლილება, რომელიც ვრცელდება იმ ქონების გადასახადზე, რომლის დეკლარირებაც 2026 წელს უნდა განხორციელდეს. ამ ცვლილებით ფიზიკური პირებისთვის ქონების გადასახადის შეღავათის ზღვარი 40 ათასი ლარიდან 100 ათას ლარამდე გაიზარდა.

ანუ, დეკლარაციის წარდგენა ევალება პირს, რომლის [მისი ან/და მისი ოჯახის წევრების] შემოსავალი 2025 წელს ჯამში აღემატებოდა 100 ათას ლარს.

„აღნიშნული ქონების გადასახადის დეკლარირების ვადა მიმდინარე წლის 2 ნოემბრის ჩათვლით არის შესაძლებელი [ვინაიდან 1 ნოებერი არასამუშაო დღეა]… ახალი ცვლილებით დაახლოებით 81 ათასი ოჯახი, რომელთა წლიური შემოსავალი 100 ათას ლარს არ აღემატება, ქონების გადასახადს [გარდა მიწისა] აღარ გადაიხდის.

იმ ფიზიკურ პირებს, რომელთა ოჯახის მიერ მიღებული შემოსავალი 2025 წლის განმავლობაში არ აღემატებოდა 100 000 ლარს დასაბეგრ ქონებაზე [გარდა მიწისა], საგადასახადო ორგანოში დეკლარირების/შესაბამისად ქონების გადასახადის გადახდის ვალდებულება აღარ წარმოეშობათ.

ამასთან, ფიზიკურ პირს უფლება აქვს 2026 წელს აღარ წარმოადგინოს ე.წ. „ნულოვანი დეკლარაცია“ [გარდა მიწისა] თუ მისი და მისი ოჯახის მიერ მიღებული შემოსავალი წინა საანგარიშო წლის მიხედვით 40 000-დან 100 000 ლარამდე იყო“, – აცხადებს შემოსავლების სამსახური.

ის, ვისაც გააჩნია დასაბეგრი მიწა, დეკლარაცია მაინც უნდა წარადგინოს, წლიური შემოსავლის ოდენობის მიუხედავად.

თუმცა, ამავე სამსახურის განმარტებით, „თუ ფიზიკურ პირს წარდგენილი ჰქონდა ფიზიკური პირის ქონების გადასახადის 2025 წლის დეკლარაცია და მის მიერ არ იცვლება დეკლარირებული მონაცემები, ამ შემთხვევაში საგადასახადო ორგანო პროგრამულად დაარიცხავს მიმდინარე 2026 წლის ქონების გადასახადს. გადასახადის გადამხდელს ევალება კუთვნილი გადასახადის გადახდა არაუგვიანეს 16 ნოემბრისა [ვინაიდან 15 ნოემბერი არასამუშაო დღეა] წინა საანგარიშო წლის მონაცემების მიხედვით.“

საქართველოს საგადასახადო კოდექსში ცვლილების შეტანის შესახებ კანონი 2026 წლის 30 სექტემბერს გამოქვეყნდა და შევიდა ძალაში.

ამ თემაზე:

„ჩემთვის ცოტა უცნაურია ის, რომ თუ დააკვირდებით, ეს 9-10 კაცი ერთდროულად შედის და კონკრეტულად დეტექტორიანი ადამიანი, რომელიც იქ პირველი უნდა ყოფილიყო და შეემოწმებინა, არ ჩანს მაინცდამაინც ახლოს პატიმართან. ვხედავთ, რომ ის ხელთათმანებიანი ადამიანი უფროა ჩართული მოქმედებებში,“ – გვიყვება ყოფილი სახალხო დამცველი, უჩა ნანუაშვილი.

მას იმ პატიმრის შესახებ ვესაუბრეთ, რომელიც ამბობს, რომ ციხეში ადმინისტრაციის თანამშრომლებმა გააუპატიურეს.

კიდევ რა გამოჩნდა კადრებით, რაც დღეს, 2 ოქტომბერს თავად პენიტენციურმა სამსახურმა გაავრცელა? რა კითხვები არსებობს გამოძიების მისამართით, რომელიც 2025 წლის დეკემბერში დაიწყო და ამ დრომდე არავინ დაუსჯიათ?

„ბათუმელებმა“ უჩა ნანუაშვილთან ინტერვიუ ჩაწერა. იგი საქართველოს ყოფილი სახალხო დამცველია და „ადამიანის უფლებათა ცენტრის“ დამფუძნებელი.

• ბატონო უჩა, პატიმრის საქმეზე მინდა გკითხოთ, რომელიც ამბობს, რომ ციხეში გააუპატიურეს. პოლიტიკურმა პარტიებმა დღეს, 2 ოქტომბერს ამ საქმის დამოუკიდებელი გამოძიება მოითხოვეს და ფიგურანტი პირებისთვის უფლებამოსილების შეჩერება. თქვენი აზრით, რის გაკეთებაა საჭირო ამ ეტაპზე, პირველ რიგში? 

რა თქმა უნდა, იმედი არ მაქვს, რომ დროული და ეფექტური გამოძიება ჩატარდება. საგამოძიებო ორგანოებმა უნდა გვაჩვენონ, რომ ისინი რეალურად არიან დაინტერესებული ამ საქმის გამოძიებით ახლა მაინც.

თუ ამ საქმის გამოძიება სურთ, პირველ რიგში, ის პირები უნდა ჩამოშორდნენ თანამდებობებს – დროებით მაინც უნდა შეუწყდეთ უფლებამოსილება, ვისზეც პატიმრის ოჯახის წევრები საუბრობენ, რომ მონაწილეობდნენ ამ ძალადობაში და ჰქონდათ გარკვეული ინსტრუქცია.

მთავარი ის არის, რომ როცა მსგავსი ფაქტი ხდება – შესაძლო წამების, ან ძალადობის, აუცილებელია, რომ პატიმარი გადაიყვანონ სხვა დაწესებულებაში, სადაც ის თუნდაც ფსიქოლოგიურად ზეწოლის ქვეშ არ იქნება. ამ შემთხვევაში ეს არ მოხდა. ძალიან მნიშვნელოვანია, რომ პატიმარმა იგრძნოს თავი უსაფრთხოდ, ისევე, როგორც მისი ოჯახის წევრებმა და ადვოკატმა, რადგან რეალურად ისინიც არიან საფრთხის ქვეშ.

როცა ასეთ თემაზე ხმამაღლა საუბრობენ, მით უმეტეს საქართველოში, უბრალოდ დავფიქრდეთ და ვიგრძნობთ, რომ ასე მარტივი არ არის ამის გასაჯაროება.

მით უმეტეს, ეს პატიმარი მე-6 დაწესებულებაში იმყოფებოდა. მე-6 დაწესებულება არის ერთ-ერთი ყველაზე მკაცრი რეჟიმის დაწესებულება, სადაც ადამიანები იხდიან სასჯელს, მაგალითად, კრიმინალური სამყაროს წევრობაზე, ან რთული კატეგორიის დანაშაულებზე…

• ამით იმის ხაზგასმა გსურთ, რომ კიდევ უფრო მკაცრია ამ დაწესებულებაში კონტროლი და 1 პატიმრის შემოწმებისთვის, როგორც ეს პენიტენციურმა სამსახურმა განმარტა, 9 პირის საკანში შესვლა არ დასჭირვებოდა? 

დიახ. იმის თქმაც მინდოდა, რომ მსგავსი განცხადება ასეთ მკაცრ დაწესებულებაში მყოფი პატიმრის მხრიდან კიდევ უფრო მეტად დასაფასებელია.

• რა გამოჩნდა თქვენთვის იმ ვიდეო ჩანაწერით, რაც პენიტენციურმა სამსახურმა გაავრცელა? 

მათ ამით პირდაპირ გვითხრეს, რომ უკვე ყველაფერი გამოძიებულია – შეაფასეს, ასე გამოდის, მაგრამ ამ დროს გამოჩნდა, რომ არაფერი გაუკეთებიათ. ამ კადრებით ჩანს, რომ რეალურად ბევრი საკითხია გაურკვეველი, ამ კადრებით კიდევ უფრო მეტი კითხვის ნიშანი ჩნდება.

კადრები ვნახე და ასევე მოვისმინე სახალხო დამცველის განცხადება: ამ კადრებით თითქოსდა არ დასტურდება ძალადობაო. ცალსახაა, კადრებით არ ჩანს, რომ ძალადობას ადგილი არ ჰქონდა. ალბათობა იმისა, რომ ძალადობა მოხდა, პირიქით, უფრო მეტად ჩანს და რატომ? მაგალითად, არ მომისმენია, რა ინფორმაცია უძღოდა წინ დეესკალაციის ოთახში პატიმრის გადაყვანას? რატომ გახდა საჭირო პატიმრის დეესკალაციის ოთახში გადაყვანა?

• რატომ დასჭირდა ამ 1 პატიმრის დეესკალაციის ოთახში შემოწმებას ციხის მინიმუმ 9 თანამშრომელი?

დიახ, დეესკალაციის ოთახში გადაყვანას სჭირდება საფუძველი და ეგ გაწერილია კანონში ძალიან კარგად. რატომ იყო საჭირო ეს 9 თუ 10 ბადრაგი მაინცდამაინც? პატიმარი რამეს ამტვრევდა, ან ცეცხლს აჩენდა? რაღაც უნდა ყოფილიყო ისეთი, რომ ყოფილიყო პროპორციული ასეთი ღონისძიება. ამ კადრში, რაც გვაჩვენეს, არაფერი ჩანს პატიმრის მხრიდან. ხოლო თუ მან სიტყვიერად რაღაც თქვა, ეს მეტად მეტყველებს იმაზე, რომ ნამდვილად ძალადობას ჰქონდა ადგილი.

ოჯახი საუბრობს, რომ რამდენიმეა ასეთი ჩანაწერი და რამდენჯერმე გადაიყვანეს დეესკალაციის ოთახში.

• ერთ-ერთ თანამშრომელს ამ კადრში უკეთია რეზინის ხელთათმანი. არსებობს ეს პრაქტიკა, თუ იცით, პატიმრის შემოწმება-დათვალიერების დროს? 

არ ვიცი, მე არ მახსოვს, რომ ინსტრუქციაში მსგავსი რამ ჰქონდეთ. ეს 10 ადამიანი ერთმანეთს ეფარება, რომ არ გამოჩნდეს რეალურად კამერაში, რა ხდება.

ჩემთვის ცოტა უცნაურია ის, რომ თუ დააკვირდებით, ეს 9-10 კაცი ერთდროულად შედის და კონკრეტულად დეტექტორიანი ადამიანი, რომელიც იქ პირველი უნდა ყოფილიყო და შეემოწმებინა, არ ჩანს მაინცდამაინც ახლოს პატიმართან. ვხედავთ, რომ ის ხელთათმანებიანი ადამიანი უფროა ჩართული მოქმედებებში.

კიდევ ერთი დეტალია: ვინ მიიღო ეს გადაწყვეტილება, მსგავსი ღონისძიება გამოეყენებინათ?

ამიტომაც, მგონია, რომ რასაც პატიმარი ამბობს, ეს უნდა იყოს აღქმული სერიოზულად. საგანგაშოა უკვე ის ფაქტი, რომ ამ დრომდე ამ ფაქტს – საუბარია 2025 წლის 21 დეკემბრის შემთხვევაზე – ამ დრომდე შესაბამისი სამართლებრივი რეაგირება არ მოჰყოლია სახელმწიფო ინსტიტუტების მხრიდან. სახელმწიფომ არაფერი გააკეთა იმისთვის, რომ ჩატარებულიყო დამოუკიდებელი და ობიექტური გამოძიება – თუნდაც უფლებამოსილება შესჩერებოდათ იმ პირებს, რომლებსაც ამ პროცესში რაღაც გავლენა ჰქონდათ გამოძიებაზე.

• გარდა იმისა, რომ არ ვიცით, რა საგამოძიებო მოქმედებები ჩატარდა, პროკურატურა არ ამბობს, რა მუხლით იძიებს ამ საქმეს – პატიმრის ადვოკატმა გასული წლის ბოლოს მიმართ სახალხო დამცველს და მას მოუყვა სექსუალური ძალადობის შესახებ, რომელიც შემდეგ დაუკავშირდა პროკურატურას…

ჩვენ ვერ ვნახეთ, ამის გამოძიების ინტერესი. დღეს პატიმრის ოჯახი საუბრობს იმაზე, რაც სასამართლოში თქვა მსჯავრდებულმა. როგორც ჩანს, მხოლოდ ფორმალურად ჩატარდა გამოძიება და დაარქივდა მასალები.

მართლაც არ მაქვს ინფორმაცია, რა მუხლით მიმდინარეობდა გამოძიება, ვინ იქნა დაკითხული, დაკითხეს თუ არა ეს 9 პირი, რომელიც ამ კადრებში ჩანს? ჩატარდა სასამართლო-სამედიცინო ექსპერტიზა? გამოძიებას ეს უნდა მოეთხოვა, რომ დარწმუნებულიყო, ეს განცხადება ტყუილია თუ სინამდვილე. უნდა ჩასტარებოდა ექსპერტიზა თავად ამ კადრების, რამე ხომ არაა ამოჭრილი და ასე შემდეგ.

კადრებში ჩანს, რომ ერთმანეთს ეფარებიან და იქ რა ხდება, გაურკვეველია. გამოძიებას პატიმრის უსაფრთხოებაზეც არ უზრუნია, მაგალითად, რომ მოეთხოვათ მისი გადაეყვანა სხვა დაწესებულებაში, რის შესაძლებლობაც პენიტენციურ სისტემას ნამდვილად ჰქონდა. ეს არის საერთაშორისო სტანდარტით დადგენილი ნორმა, რომ მსგავს ვითარებაში პატიმარი გადაიყვანონ სხვა დაწესებულებაში. ამ შემთხვევაში, როცა მსჯავრდებული იგივე დაწესებულებაში რჩება, მსგავსი ძალადობის განმეორების რისკის პირისპირ დატოვეს პატიმარი. განგრძობითია უკვე ეს და წამებამდე მიდის საქმე.

• „ოცნების“ მთავრობამ გვაჩვენა კადრები, არ დასტურდება ძალადობაო… რა უნდა გააკეთოს სისტემამ, რომ დამაჯერებელი გახდეს პატიმრის სავარაუდო გაუპატიურების ობიექტური გამოძიების სურვილი? 

სისტემამ, პირველ რიგში, ეს ადამიანები, დაწესებულების ხელმძღვანელი პირები აუცილებლად უნდა გადააყენოს, შეუწყვიტოს მათ უფლებამოსილება. თუ ირკვევა, რომ არ ჩატარებულა შესაბამისი ექსპერტიზა და სხვა საგამოძიებო მოქმედებები, გამოძიება უნდა დაიწყოს იმ პირების მიმართ, ვისაც ამის გამოძიება ევალებოდა ამდენი თვის განმავლობაში – 2025 წლის დეკემბრიდან დღემდე. მნიშვნელოვანია ოჯახის წევრების უსაფრთხოების დაცვა.

ასეთ დროს ძალიან მნიშვნელოვანია სახალხო დამცველის როლი, მაგრამ ვხედავთ, რომ პრაქტიკულად მისი როლი მინიმალურია.

• მინიმალურია, თუ მხოლოდ „ოცნების“ პოზიციის ხელშემწყობი, როცა იოსელიანმა თქვა, რომ „დათვალიერებული კადრების შედეგად, პატიმრის მიერ მონათხრობი მძიმე ძალადობის დეტალები არ დადასტურდა“.

თუ გამოძიება არ არის დასრულებული, რატომ ვისმენთ შეფასებას, რომ არ იყო ძალადობა? რამდენად მოითხოვა სახალხო დამცველმა იმ ღონისძიებების განხორციელება, რაც მე ჩამოვთვალე და რამდენად მიეწოდა შემდეგ ინფორმაცია საზოგადოებას იმაზე, თუ რა გაკეთდა? ეს განცხადება საკმაოდ უსუსურია და სახალხო დამცველის ინსტიტუტის ნდობის მაჩვენებელზე უარყოფითად იმოქმედებს.

მით უმეტეს სახალხო დამცველი არის ინსტიტუცია, რომელსაც შეუძლია ამ დახურულ დაწესებულებაშიც რეგულარულად შესვლა.

14 არასამთავრობო ორგანიზაცია ითხოვს დაუყოვნებლივ იქნას გამოძიებული შესაძლო სექსუალური ძალადობა პატიმარ გიორგი დავითაძეზე.

„ჩვენ, ქვემორე ხელისმომწერი ორგანიზაციები, მოვითხოვთ ხელისუფლებისგან დაუყოვნებლივ, ეფექტიან და სრულყოფილ რეაგირებას რუსთავის №6 პენიტენციურ დაწესებულებაში მყოფი მსჯავრდებულის, გიორგი დავითაძის, და მისი ოჯახის წევრების მიერ გავრცელებულ მძიმე განცხადებებზე, რომელთა თანახმადაც, 2025 წლის 21 დეკემბერს გიორგი დავითაძე პენიტენციური დაწესებულების თანამშრომლების მხრიდან სექსუალური ძალადობის, მათ შორის გაუპატიურების, მსხვერპლი გახდა.

სპეციალური პენიტენციური სამსახურის მიერ დღეს გავრცელებული ვიდეოკადრები და განმარტება, რომ გიორგი დავითაძის დეესკალაციის საკანში გადაყვანისას მას ჩაუტარდა შემოწმება-დათვალიერება, ვერ ჩაითვლება ამ მძიმე ბრალდებებზე სათანადო პასუხად.

პირიქით, გავრცელებული მასალა კიდევ უფრო მკაფიოდ აჩენს კითხვას იმის შესახებ, თუ რა მოხდა დეესკალაციის საკანში და რა მოქმედებები განახორციელეს იქ მყოფმა პენიტენციურმა თანამშრომლებმა“ – ნათქვამია განცხადებაში. 

ორგანიზაციები მიიჩნევენ, რომ პენიტენციური სამსახურის მიერ გავრცელებული ინფორმაცია არ პასუხობს არაერთ არსებით კითხვას. ეს კითხვებია:

რა კონკრეტული საფუძვლით გახდა საჭირო გიორგი დავითაძის დეესკალაციის საკანში გადაყვანა;

რა კონკრეტული ქმედება უძღოდა წინ მის გადაყვანას;

იყო თუ არა მისი დეესკალაციის საკანში მოთავსება აუცილებელი და პროპორციული ღონისძიება;

რატომ გახდა საჭირო მის საკანში დაახლოებით ათი თანამშრომლის შესვლა;

ვინ იყვნენ აღნიშნული თანამშრომლები და რა მოქმედებები განახორციელა თითოეულმა მათგანმა;

წარმოადგენს თუ არა გავრცელებული ვიდეო 2025 წლის 21 დეკემბრის შესაბამისი ეპიზოდის/ეპიზოდების სრულ და უწყვეტ ჩანაწერს;

დაცულია თუ არა ჩანაწერის ორიგინალი და შესაძლებელია თუ არა მისი ავთენტურობისა და უწყვეტობის დამოუკიდებლად შემოწმება;

არსებობს თუ არა სხვა კამერების ჩანაწერები, რომლებიც სრულად ასახავს გიორგი დავითაძის გადაადგილებასა და მასთან მოპყრობას აღნიშნულ პერიოდში.

„განსაკუთრებით მნიშვნელოვანია აღინიშნოს, რომ პენიტენციური სამსახურის მიერ გავრცელებული ვიდეომასალა ვერ ჩაანაცვლებს დამოუკიდებელ და ეფექტიან გამოძიებას.

ადამიანის უფლებათა ევროპული სასამართლოს პრაქტიკის თანახმად, როდესაც არსებობს სერიოზული და დასაბუთებადი ბრალდება წამების ან სხვა მძიმე არასათანადო მოპყრობის შესახებ, სახელმწიფოს ეკისრება სწრაფი და ეფექტიანი გამოძიების ჩატარების ვალდებულება. ასეთ დროს ხელისუფლებამ უნდა მიიღოს ყველა გონივრული ზომა შესაბამისი მტკიცებულებების მოსაპოვებლად და არ უნდა დაეყრდნოს ნაჩქარევ ან უსაფუძვლო დასკვნებს. სექსუალური ძალადობისა და გაუპატიურების შესახებ ბრალდებების შემთხვევაში ეს მოთხოვნები განსაკუთრებულ მნიშვნელობას იძენს.

ამ საქმეში დამატებით უნდა აღინიშნოს ისიც, რომ გიორგი დავითაძისა და მისი ოჯახის წევრების განცხადებები მიუთითებს პენიტენციური სამსახურის კონკრეტულ თანამშრომლებზე, მათ შორის, კონკრეტულ თანამდებობის პირებზე, რომლებმაც, მათი მტკიცებით, შესაძლოა გასცეს ან შეასრულეს ძალადობასთან დაკავშირებული ბრძანებები. ამ ბრალდებების დადასტურება ან უარყოფა შესაძლებელია მხოლოდ სრულყოფილი, დამოუკიდებელი და მტკიცებულებებზე დაფუძნებული გამოძიების შედეგად.

თუ გიორგი დავითაძის მიმართ აღწერილი ქმედებები დადასტურდა, საქმე განხილულ უნდა იქნას, არა მხოლოდ, სექსუალური ხასიათის მძიმე დანაშაულის კვალიფიკაციის ქვეშ, არამედ, ეს იმთავითვე უტოლდება წამების აკრძალვის საწინააღმდეგო მოპყრობას სახელმწიფოს ეფექტიანი კონტროლის ქვეშ მყოფი პირის, პატიმრის, მიმართ,რაც საქართველოს კონსტიტუციითა და ადამიანის უფლებათა საერთაშორისო სამართლის აქტებით აბსოლუტურად აკრძალული ქმედებაა.

ამასთან, დაუშვებელია გამოძიების დასრულებამდე სახელმწიფოს რომელიმე ორგანომ თავად გადაწყვიტოს, რომ ბრალდებები „სრული სიცრუეა“. სწორედ ეფექტიანი გამოძიების მიზანია იმის დადგენა, რა მოხდა სინამდვილეში“ – ნათქვამია განცხადებაში.

ორგანიზაციები მოითხოვენ:

დაუყოვნებლივ ჩატარდეს გიორგი დავითაძის მიმართ სავარაუდო სექსუალური ძალადობისა და სხვა არასათანადო მოპყრობის ფაქტების სრულყოფილი, დამოუკიდებელი, მიუკერძოებელი და ეფექტიანი გამოძიება;

სრულად იქნეს დაცული და გამოძიებისთვის, აგრეთვე გიორგი დავითაძის დამცველებისთვის, ხელმისაწვდომი გახდეს 2025 წლის 21 დეკემბრის ყველა ვიდეოჩანაწერი, მათ შორის, კამერების ორიგინალი და უწყვეტი ჩანაწერები, აგრეთვე მათი ავთენტურობისა და მთლიანობის დამადასტურებელი ტექნიკური მონაცემები;

დადგინდეს ყველა იმ თანამშრომლის ვინაობა, რომლებიც მონაწილეობდნენ გიორგი დავითაძის დეესკალაციის საკანში გადაყვანასა და იქ მის მიმართ განხორციელებულ მოქმედებებში, და გამოიკითხონ ისინი ერთმანეთისგან დამოუკიდებლად;

უზრუნველყოფილ იქნეს გიორგი დავითაძის სრული სამედიცინო და სასამართლო-სამედიცინო შემოწმება დამოუკიდებელი სპეციალისტების მიერ და დაცული იქნეს ყველა შესაბამისი სამედიცინო, ექსპერტიზის, ვიდეო და სხვა მტკიცებულება;

უზრუნველყოფილ იქნეს გიორგი დავითაძის, მისი ოჯახის წევრებისა და შესაძლო მოწმეების დაცვა ნებისმიერი ზეწოლის, დაშინების ან შურისძიებისგან;

გამოძიების ინტერესებიდან გამომდინარე, გამოირიცხოს სავარაუდო ძალადობაში შესაძლო მონაწილე პირთა მიერ მტკიცებულებებზე ზემოქმედების ან გამოძიების მიმდინარეობაზე გავლენის შესაძლებლობა;

დადგინდეს არა მხოლოდ უშუალო შემსრულებელთა, არამედ იმ თანამდებობის პირთა პასუხისმგებლობის საკითხიც, რომლებმაც შესაძლოა გასცეს შესაბამისი ბრძანება, იცოდნენ სავარაუდო ძალადობის შესახებ ან სათანადოდ ვერ უზრუნველყვეს მისი პრევენცია და გამოძიება.

„პატიმრის მიმართ წამება, სექსუალური ძალადობა ან ნებისმიერი სხვა ფორმის არასათანადო მოპყრობა, მისი დადასტურების შემთხვევაში, ვერ იქნება გამართლებული დისციპლინური დარღვევით, თანამშრომლების შეურაცხყოფით, დაუმორჩილებლობით ან სხვა გარემოებით.

თუ გამოძიებით დადასტურდება გიორგი დავითაძის მიმართ მძიმე ძალადობის ფაქტი ან პენიტენციური სისტემის წარმომადგენელთა მიერ უფლებამოსილების ბოროტად გამოყენება, უნდა დადგეს როგორც სამართლებრივი, ისე შესაბამისი პოლიტიკური პასუხისმგებლობის საკითხი, მათ შორის პენიტენციური სისტემის ხელმძღვანელობისა და იუსტიციის მინისტრის პასუხისმგებლობის ჩათვლით“ – ნათქვამია განცხადებაში.

განცხადებას ხელს აწერენ ორგანიზაციები: საერთაშორისო გამჭვირვალობა – საქართველო; საქართველოს ახალგაზრდა იურისტთა ასოციაცია; დემოკრატიის მცველები; საქართველოს მომავლის აკადემია; პრევენცია პროგრესისთვის; ევროპულ-ქართული ინსტიტუტი (EGI); საქართველოს ევროპული ორბიტა; დემოკრატიის კვლევის ინსტიტუტი (DRI); საფარი; სამოქალაქო საზოგადოების ფონდი; სოციალური სამართლიანობის ცენტრი; სამართლიანი არჩევნებისა და დემოკრატიის საერთაშორისო საზოგადოება; ინფორმაციის თავისუფლების განვითარების ინსტიტუტი (IDFI) და ეკონომიკური პოლიტიკის კვლევის ცენტრი.

• რა ხდება?

პატიმარი გიორგი დავითაძე აცხადებს, რომ ციხეში ბადრაგებმა გააუპატიურეს.

დავითაძის მიერ სააპელაციო სასამართლოში მიცემული ჩვენების აუდიოჩანაწერი „ტვ პირველმა“ ტელეგრამ არხებზე მითითებით გაავრცელა.

„ჩამიყვანეს დეესკალაციაში და გამაუპატიურეს — თითით, ხელით. ვამბობ აქედან, ოჯახის თანდასწრებით. ბატონო მოსამართლე, ჩანს, როგორ აკეთებს ამ მოძრაობას ჩემს საჯდომთან. ამ დროს მატყუებს, რომ თითქოს აქვს შარვალი ჩახდილი, მაგრამ თითი აქვს შეყოფილი. ამაზე მეტი კაცს რა უნდა გაგიკეთონ. გამაუპატიურა 10-მა კაცმა, ბადრაგი ესწრება და ჩანს კამერაში ყველაფერი. კამერების ქვეშ აკეთებენ ყველაფერს, ისე დგანან, რომ არ გამოჩნდეს, მაგრამ ვერ ფარავენ მაინც“, — ამბობს დავითაძე.

მისი თქმით, ექსპერტიზების მოთხოვნის შემდეგ, მასზე წარმოუდგენელი ზეწოლა დაიწყო. პატიმარი ამბობს, რომ სუიციდის მცდელობა ჰქონდა, რის შემდეგაც მასთან სახალხო დამცველის აპარატის წარმომადგენელი შევიდა.

„კაცს ვუყვები, გამაუპატიურეს-მეთქი. თავს ხრის სახალხო დამცველის აპარატის წარმომადგენელი, პირში მეუბნება, დააპაუზეთ კადრები… რატომ არ ირთვება დეესკალაციაში ხმა — „მოტყ…ლს“, „ქათამს“, „დღეიდან ნახმარი ხარ“ რომ მეძახიან. სუიციდის მცდელობა მქონდა, იმიტომ, რომ როგორია, ისევ იმ ბადრაგებს უყურო, რომლებმაც გაგაუპატიურეს“, — ამბობს პატიმარი სასამართლოზე.

მსჯავრდადებულმა მოსამართლეებს უთხრა, რომ დაიწყებს შიმშილობას, თუ შესაბამისი ბადრაგები პასუხისგებაში არ იქნებიან მიცემული. მოსამართლეებმა შესაბამისი უწყების წარმომადგენლებს მიმართეს და ჰკითხეს, დაწყებულია თუ არა გამოძიება აღნიშნულ ფაქტზე. პროკურატურამ მოსამართლეებს დაუდასტურა, რომ ფაქტზე გამოძიება დაწყებულია.~

გიორგი დავითაძე თბილისის საკრებულოს ყოფილი დეპუტატის, ავთანდილ დავითაძის შვილია. ავთანდილ დავითაძე 2014 წელს თბილისის საკრებულოში “კოალიცია “ქართული ოცნების” სიით შევიდა და იქ ფრაქცია „ქართული ოცნება – ეროვნული ფორუმის“ წევრი იყო.

ამავე თემაზე: 

„ოცნების“ ხელისუფლების წარმომადგენლები 2027 წლის იანვრიდან კვლავ გაზრდილ ხელფასებს მიიღებენ.

მაგალითად, „ოცნების“ პრეზიდენტის, პარლამენტის თავმჯდომარის და პრემიერ-მინისტრის ხელფასი [თანამდებობრივი სარგო] 2027 წლიდან 17 350 ლარი იქნება დღეს არსებული 16 000 ლარის ნაცვლად [იზრდება 1350 ლარით].

1 147,5 ლარით გაიზრდება აჭარის უმაღლესი საბჭოს თავმჯდომარისა და აჭარის მთავრობის თავმჯდომარის ხელფასებიც და დღეს არსებული 13 600 ლარის ნაცვლად 14 747,5 ლარი იქნება.

810 ლარით გაიზრდება მუნიციპალიტეტების მერების და საკრებულოს თავმჯდომარეების ხელფასებიც. შესაბამისად, მაგალითად, ბათუმის მერის და საკრებულოს თავმჯდომარის ხელფასი, დღეს არსებული 9 600 ლარის ნაცვლად, 2027 წლის იანვრიდან 10 410 ლარი იქნება.

და ეს მაშინ, როცა პენსია 2027 წლისთვის მხოლოდ 20-60 ლარით იზრდება.

ამ თემაზე: პენსია 20-60 ლარით იზრდება, დეპუტატებისა და მინისტრების ხელფასი კი 1080-1350 ლარით

საქმე ისაა, რომ საქართველოს 2027 წლის სახელმწიფო ბიუჯეტის პროექტის მიხედვით, გაიზარდა საბაზო თანამდებობრივი სარგო და შეადგენს 1 735 ლარს. 2026 წელს ეს სარგო 1 600 ლარი იყო.

საბაზო თანამდებობრივი სარგოს ოდენობა კი პირდაპირ კავშირშია თანამდებობის პირების ხელფასებთან, რადგან, „საჯარო დაწესებულებაში შრომის ანაზღაურების შესახებ“ საქართველოს კანონით, „პოლიტიკური თანამდებობის პირის თანამდებობრივი სარგო დგინდება ამავე კანონით დადგენილი შესაბამისი კოეფიციენტის საბაზო თანამდებობრივ სარგოზე ნამრავლით“:

სხვა მუნიციპალიტეტებისგან განსხვავებულია თანამდებობრივი სარგოები თბილისის მერიასა და საკრებულოში, სადაც მერის და საკრებულოს თავმჯდომარის შემთხვევაში თანამდებობრივი სარგოს ზედა ზღვრის კოეფიციენტი არის არა 6, არამედ – 8,5.

2027 წლიდან ნებისმიერი საჯარო მოსამსახურის ხელფასი გაიზრდება, მათ შორის მუნიციპალიტეტების დონეზეც.

მართალია, „საჯარო დაწესებულებაში შრომის ანაზღაურების შესახებ“ კანონი მუნიციპალიტეტების შემთხვევაში თანამდებობრივი სარგოს კოეფიციენტის ზედა ზღვარს ადგენს, თუმცა საკრებულოები, როგორც წესი, ამტკიცებენ ადგილობრივ ბიუჯეტებს, სადაც სწორედ ეს ზედა ზღვარია გათვალისწინებული ხელფასის ოდენობის დადგენისას.

საქართველოს 2027 წლის სახელმწიფო ბიუჯეტის პროექტი პარლამენტში ამ ეტაპზე პირველი მოსმენისთვისაა წარდგენილი.

ექიმი ვახტანგ კალოიანი ბათუმის რესპუბლიკური საავადმყოფოს ექიმის, ჯუმბერ ბოლქვაძის მიმართ „ოცნების“ ჯანდაცვის მინისტრის, მიხეილ სარჯველაძის კომენტარს ფეისბუქზე ეხმიანება.

დღეს, 2 ოქტომბერს, მიხეილ სარჯველაძემ ბათუმის რესპუბლიკურ საავადმყოფოში მიმდინარე პროტესტზე განაცხადა, რომ ექიმმა კლინიკაში პაციენტის მიღებაზე უარი თქვა, რაზეც „აუცილებლად იქნება სამართლებრივი რეაგირება“.

ექიმი ვახტანგ კალოიანი წერს, რომ გადაცდომა მართლაც თუ დაფიქსირდა, რატომ არ განიხილავს ამ ფაქტს პროფესიული საბჭო და რატომ მოსთხოვა ექიმს სამინისტრომ სამსახურიდან წასვლა.

„ვენდოთ ჯანდაცვის სამინისტროს და დავუშვათ, ეს სიმართლეა. ჯანდაცვის ბრძნული პოლიტიკის შედეგად ნაოპერაციები პაციენტის რეჰოსპიტალიზაცია ვერ ხდება სახელმწიფო კლინიკაში მაღალი თანამდებობის პირების ჩარევის გარეშე [ვისაც სახელმწიფო კლინიკების იმედი გაქვთ, თბილისის რესპუბლიკურ საავადმყოფოს შეხედეთ და ბათუმის რესპუბლიკურის აღორძინების საგა გაიხსენეთ].

არ დაგავიწყდეთ, ეს არის ხელისუფლება, რომელმაც გააპარტახა კრიტიკული მედიცინა.

ბათუმის რესპუბლიკური საავადმყოფოს გადაუდებელი დახმარების განყოფილების უფროსი, ექიმი ჯუმბერ ბოლქვაძე ამბობს, რომ „ოცნების“ ჯანდაცვის მინისტრი, მიხეილ სარჯველაძე მას თანამდებობის დატოვებას სთხოვს. სარჯველაძემ დღეს, 2 ოქტომბერს, ეს უარყო და თქვა, რომ ჯუმბერ ბოლქვაძეს თავად სურდა სამსახურის დატოვება სექტემბერში. 

2026 წლის სექტემბრის ბოლოს მუსიკოსი ალექსანდრე კორძაია, იგივე კორძი (KORDZ) პროპაგანდის კამპანიური თავდასხმისა და აგრესიის ობიექტი გახდა.

მასზე საუბარსა და ცილისმწამებლურ განცხადებებს დიდ დროს უთმობენ პროსახელისუფლებო ტელეკომპანიები, ფეისბუქგვერდები და თავად „ქართული ოცნების“ ლიდერები. მათ შორისაა ირაკლი კობახიძე, რომელმაც მუსიკოსის შესახებ ისაუბრა აშშ-ში, გაეროს გენერალურ ასამბლეაზე ყოფნისას 25 სექტემბერს. კობახიძემ კორძი ფაშიზმის წახალისებაში დაადანაშაულა. კობახიძის განცხადების შემდეგ ეს რიტორიკა სხვადასხვა ფორმულირებით ითარგმნა სოციალურ ქსელებში, მმართველი პარტიის მხარდამჭერი გვერდებისა და პროფილების მხრიდან.

რატომ გახდა კორძი თავდასხმის სამიზნე?

ამჯერად ეს რეაქცია მოჰყვა 26 სექტემბერს გორში, ფესტივალ „კამარას“ ფარგლებში დაგეგმილ კონცერტს. მუსიკოსზე თავდასხმები, მისი „რადიკალიზმსა“ და „სიძულვილის ენის“ გავრცელებაში დადანაშაულება დაიწყო კონცერტამდე რამდენიმე დღით ადრე და თანდათან გამძაფრდა. საბოლოოდ, ღონისძიების ორგანიზატორმა, „დანიის კულტურის ინსტიტუტმა“ კონცერტის გაუქმების გადაწყვეტილება მიიღო, მიზეზად კი „უსაფრთხოების რისკები“ დაასახელა.

ეს პირველი შემთხვევა არ არის, როცა კორძი აგრესიის სამიზნე ხდება.

2025 წლის ივლისში მუსიკოსს ფიზიკურად დაესხა თავს 4 ადამიანი. როგორც მაშინ კორძმა დაწერა, ტაქსიდან გადმოსვლის შემდეგ მას „მობანდიტო ტიპები“ მიუახლოვდნენ, აგინეს და გაეკიდნენ. მუსიკოსი მათ გაექცა და როგორც წერს, ახლომდებარე მაღაზიას შეაფარა თავი, სადაც კარი ჩაკეტეს და ასე დაიცვეს თავი თავდამსხმელებისგან. მაშინ ეს თავდასხმა დაუკავშირდა კორძის მიერ შესრულებულ სიმღერას „ოლე, ოლას“, რომელიც ხშირად ისმის „ქართული ოცნების“ წინააღმდეგ გამართულ, პროევროპულ აქციებზე. ასევე 2025 წელს, კორძზე თავდასხმამდე რამდენიმე დღით ადრე, იმავე საფუძვლით, თავს დაესხნენ მსახიობს, ჯგუფ „გამოუვალი მდგომარეობის“ სოლისტს ვანიკო თარხნიშვილს, რამდენიმე თვით ადრე კი – ამავე ჯგუფის წევრ დავით გაბუნიას.

„ოლე, ოლა“ არის სიმღერა, რომელიც ხშირად ისმის 2024 წლის ნოემბერში დაწყებულ უწყვეტ პროევროპულ აქციებზე. სიმღერის ტექსტი შეიცავს „ქართული ოცნების“ გინებას. ეს სიმღერა სხვადასხვა დროს შეუსრულებიათ როგორც კორძს, ისე “გამოუვალ მდგომარეობას”. თავად კორძმა სიმღერის შესახებ ისაუბრა 2025 წლის აპრილში, ციურიხში, ერთ-ერთ კლუბში დაკვრისას. მან თქვა, რომ სიმღერის ტექსტი მოისმინა შემთხვევით, ქუჩაში, ადამიანებისგან, რომლებმაც ცნობილი მელოდიის ტექსტი „ქართული ოცნების“ მმართველობას დაუპირისპირეს. უცნობია, ვის ეკუთვნის ტექსტი, რომელიც ხშირად ისმის ანტისამთავრობო აქციებზე და რომელზეც ასე მწვავედ რეაგირებენ „ქართული ოცნების” წევრები.

კამპანიურ თავდასხმებს გამოეხმაურა კორძის დედა, მუსიკოსი თამრიკო კორძაია. მისი შეფასებით „ქართულმა ოცნებამ“ მისი შვილი „ამოირჩია“ საერთაშორისო პარტნიორების წინააღმდეგ ბრძოლის მექანიზმად. სწორედ ევროკავშირია პროექტ „კრეატიული კომპასი საქართველოს“ ფინანსური მხარდამჭერი, რომლის ფარგლებშიც იმართება ფესტივალი „კამარა“.

„ეს ყველაფერი გადავიდა ტერორის, მობინგის, ადამიანის განადგურების სრულად ახალ ხარისხში”, – ამბობს კორძის დედა, თამრიკო კორძაია ვიდეომიმართვაში, რომელიც მან სოციალურ ქსელში გაავრცელა.

რატომ „ამოირჩია“ „ქართულმა ოცნებამ“ მუსიკოსი კორძი? რატომ ხდება ხოლმე ერთი ადამიანი, ხშირად – ხელოვანი, პოლიტიკური, პროპაგანდისტული თავდასხმების ობიექტი?

ამ საკითხზე “ბათუმელები” ესაუბრა მთარგმნელს, საქართველოს პენ-ცენტრის წევრს, ნინო ბექიშვილსა და ფილოსოფოსს, ილიას სახელმწიფო უნივერსიტეტის პროფესორს, გიორგი მაისურაძეს.

ისინი მიიჩნევენ, რომ კორძის ირგვლივ განვითარებული მოვლენები არის „ტიპური სცენარი“ კრიტიკულად განწყობილი, სოციალურად აქტიური ადამიანების წინააღმდეგ იმგვარი მმართველობის პირობებში, როგორიც „ქართულმა ოცნებამ“ შექმნა.

„იმ ტიპის ავტორიტარიზმში, როგორშიც ჩვენ ვცხოვრობთ, ვხედავთ, რომ ადამიანების დასასჯელად ხელისუფლება იყენებს ერთი მხრივ პოლიციას, მეორე მხრივ კი „ქართულ ოცნებასთან“ დაკავშირებულ ადამიანებს, ე.წ. ტროლებს და, ასევე, მედიას.

ის, რაც კორძს თავს ხდება, არის „ქართული ოცნების“ მმართველობის ერთ-ერთი შედეგი.

წინა ხელისუფლების დროსაც ყოფილა ამგვარი შემთხვევები, როცა რაღაცნაირად, მთელი პროპაგანდისტული მედია დარაზმულან კონკრეტული ადამიანის წინააღმდეგ, მაგრამ მაშინ ეს გაცილებით უფრო მსუბუქად იყო.

ადამიანების ამოჩემება, ტროლ-ბოტების მიქსევა და არა მხოლოდ ფიზიკური ანგარიშსწორება, “ქართული ოცნების” ჩვეულებრივი მართვის სტილია. ეს მათ ეხმარება, რომ შეინარჩუნონ საკუთარი ძალაუფლება. ასევე, მოსახლეობის გარკვეულ ფენებში ქმნიან შთაბეჭდილებას, რომ ებრძვიან ადამიანებს, რომლებიც ეროვნულ ღირებულებებს ეწინააღმდეგებიან. მოკლედ, რასაც 10 წლის წინ აკეთებდა [„მართლმადიდებელ მშობელთა კავშირი“], დღეს ამას აკეთებს ხელისუფლება, ხელისუფლების მიერ წახალისებული მედია და ტროლ-ბოტები, რომლებიც ამაში ფულს იღებენ”, – ამბობს ნინო ბექიშვილი.

„უმაღლესი თანამდებობის პირები ცილს სწამებენ, შეურაცხყოფას აყენებენ, საშინელ იარლიყებს აკერებენ ხელოვანს და ამის ერთადერთი მიზეზი ის არის, რომ ხელოვანი მათდამი კრიტიკულად არის განწყობილი, არ ეთანხმება და ემიჯნება მათ პოლიტიკას. პრემიერ-მინისტრი პარლამენტის თავმჯდომარე… უმაღლეს დონეზე ხდება მანიფესტაცია იმისა, რომ ეს არის ბინძური ცილისწამების კამპანია და ადამიანის სტიგმატიზაცია.

ტიპური სცენარია, რომლის სამიზნე შეიძლება გახდეს ნებისმიერი ადამიანი, მით უმეტეს ცნობილი სახე, ხელოვანი. იმიტომ, რომ ხელოვანები, განსაკუთრებით მუსიკალური სცენის წარმომადგენლები, რომლებიც მასობრივ პუბლიკაზე გადიან, მათთვის წარმოადგენენ საფრთხეს.

უკვე მიგვაჩვიეს იმას, რომ მაღალი თანამდებობის პირების ძირითადი საქმიანობაა ცილისწამება, სიმართლის და სინამდვილის დამახინჯება, ადამიანების შეურაცხყოფის მიყენება უკიდურესი ფორმებითაც კი.

რა სიტყვებით, რა ფორმებითაც მათ ალექსანდრე კორძაიას [კორძი] ცილი დასწამეს და შეურაცხყოფა მიაყენეს – ფაშისტი უწოდეს… წარმოგიდგენიათ, როგორ გააუფასურეს ასეთი სიტყვები?! რა მიზნით? – იმის გამო, რომ ადამიანის დისკრედიტაცია მოახერხონ. მერე, ამას მოჰყვება მათი ბოტების შემოსევა სოციალურ ქსელებში. აი, ეს არის მათი ხელწერა”, – ამბობს ფილოსოფოსი გიორგი მაისურაძე. 

მან გაიხსენა „ქართული ოცნების“ პოლიტიკა კულტურის სფეროს კრიტიკულად განწყობილი წარმომადგენლების მიმართ და განმარტა, რატომ ხდებიან მსგავსი თავდასხმების ობიექტები ხშირად სწორედ ხელოვანი ადამიანები:

„ამ ქვეყნის მოსპობა დაიწყო სწორედ კულტურის სფეროს მოსპობიდან, არა?!

მერე მიადგნენ განათლების სფეროს. წარმატებით ანგრევენ განათლების სისტემას, როგორც კულტურის სისტემის დიდი ნაწილი სრულად გაანადგურეს და გააპარტახეს.

მათი სამიზნე განსაკუთრებით არიან კულტურის სფეროს წარმომადგენლები, საგანმანათლებლო სფეროს წარმომადგენლები და ა.შ., რადგან ეს ადამიანები თავიანთი საქმიანობით განასახიერებენ და ქმნიან ამ ქვეყნის კულტურას, მათ აქვთ შესაბამისი ინტელექტუალური რესურსები, ამათი [„ოცნების“] პოლიტიკა კი არის ყველანაირი კულტურის, განათლების, ინტელექტუალური სფეროს განადგურებისკენ მიმართული, იქეთკენ, რომ წაართვან ყველანაირი ავტორიტეტი ასეთ ხალხს და ქვეყანა აქციონ ბარბაროსულ, უკულტურო გარემოდ.

ვხედავთ, რომ წარმატებულად ახორციელებენ ამას.

შესაბამისად, ყველა ადამიანი, რომელსაც აქვს ინტელექტი, თავისუფალი აზროვნება, სინდისის განცდა და მორალური შემაკავებლები აქვს, მათთვის პირდაპირ აღიქმება მტრად.

კორძის შემთხვევა არც პირველია და სანამ ეს სისტემა არსებობს, არც უკანასკნელი იქნება. აბა, მათ სხვა რა უნდა აკეთონ?! რა, საერთაშორისო დონეზე ვინმე სერიოზულად ელაპარაკება?! რამე პოზიტიურს აკეთებენ?! გაფუჭების, დანგრევის, მოსპობის, ქვეყნის იზოლაციაში მოქცევის გარდა. ეს პოლიტიკოსები იმისთვის არსებობენ, რომ ცილი სწამონ ხალხს და ტყუილები ავრცელონ”, – ამბობს გიორგი მაისურაძე.

ნინო ბექიშვილი კიდევ ერთ გარემოებაზე ამახვილებს ყურადღებას. მისი თქმით, საზოგადოებისთვის უფრო ცნობილ ადამიანებზე თავდასხმებით სისტემა ცდილობს თვითცენზურის გაჩენას რიგით მოქალაქეებს შორის.

„გავიხსენოთ, არჩევნების წინ რა გაუკეთეს პოლიტიკოსებს, ჟურნალისტებს … როგორი სიძულვილის კამპანია ააგორეს. არჩევნების შემდეგაც რამდენიმე შემთხვევა იყო. კორძი მარტო არ არის ამ ამბავში. ცოტა ხნის წინ იყო ონისე ოქრიაშვილის ამბავი, როცა მას ფიზიკურად გაუსწორდნენ.

იცით, „ქართული ოცნების“ ხელისუფლება ძალიან გაიძვერაა. თითქოს ებრძვის „ელიტას“. პროპაგანდა ქმნის ისეთ სურათს, რომ ეს ტერორი ჩვეულებრივ ხალხზე არ ვრცელდება, რაც ნამდვილად არ არის ასე.

ჯერ ერთი, რიგითი მოქალაქეების ამბავი ჩვენამდე არ აღწევს. ჩვენ ხომ არ ვიცით, რა ძალადობას განიცდიან ის თინეიჯერები, რომლებიც სხვანაირად ფიქრობენ, სხვანაირად აცვიათ და ა.შ., სახელმწიფოს მიერ წახალისებულ ძალადობას ძალიან ბევრი ქვედინება აქვს. რაღაცები, დროთა განმავლობაში, ამოდის ზედაპირზე, როგორც არაერთხელ გვინახავს.

გარდა ამისა, ზუსტად ასე იქმნება ავტოკრატიებში თვითცენზურა.

ზოგადად, რეგიონებში გაცილებით უფრო მძიმე სიტუაციაა, ვიდრე დედაქალაქში და დიდ ქალაქებში. აქ კიდევ მოიძებნება სივრცეები თავისუფალი სიტყვისთვის, თავისუფალი მუსიკისთვის, მხატვრობისთვის და ა.შ. ეს საკუთარ თავზე მაქვს გამოცდილი, როგორც საქართველოს პენ-ცენტრის თანამშრომელს. ჩვენ სულ დავდიოდით რეგიონებში, გვქონდა პროექტები. არჩევნებამდეც ჭირდა – ყველა არც მაშინ გვიშვებდა, მაგრამ დღეს უკვე თითქმის ყველა კარი დაკეტილია. ეს კარგა ხნის ამბავია, გუშინ არ დაწყებულა”, – ამბობს ნინო ბექიშვილი.

ნინო ბექიშვილი პარალელს ავლებს რუსეთში განვითარებულ მსგავს მოვლენებთანაც. მისი თქმით, საზოგადოებისთვის ცნობადი და კრიტიკული ადამიანების მიმართ მსგავსი ორგანიზებული თავდასხმები – როგორც ფიზიკური, ისე სოციალური ქსელების საშუალებით, ხშირად გამოიყენება პოსტსაბჭოთა ქვეყნების რეჟიმების მიერ.

„ეს ძალიან გამოცდილი მეთოდია რუსეთში, ბელარუსში და ა.შ.

პუტინმა მთელი პარადიგმა შეცვალა. მიუხედავად იმისა, რომ მისი მმართველობის ადრეულ ეტაპზე მოსკოვის, პეტერბურგის და დიდი ქალაქების მოსახლეობა შედარებით თავისუფალი იყო, მერე ნელ-ნელა მოუჭირა, კანონებით და იმავე მეთოდებით.

მაგალითად, 70 წლის იყო არაჩვეულებრივი რუსი მწერალი, ლუდმილა ულიცკაია, როცა დახვდნენ და ბრილიანტის მწვანით შეუღებეს სახე.

იმავენაირად მოქმედებს ლუკაშენკოც. ყველა პოსტსაბჭოთა ავტორიტარი დიქტატორი მიმართავს ამ მეთოდს. იგივე ხდება ზუსტად საქართველოშიც. ამათ ახალი არაფერი მოუგონიათ”, – ამბობს ნინო ბექიშვილი.

გიორგი მაისურაძე ამბობს, რომ მსგავსი თავდასხმების კამპანიური ხასიათის მიუხედავად, ეს ქცევა, შესაძლოა, ვერ იყოს მხარდაჭერილი და მოწონებული თავად „ქართული ოცნების“ ამომრჩევლებს შორისაც.

„როგორც ჩანს, ეს გათვლილია ადამიანთა იმ კატეგორიაზე, რომლებსაც ასეთი სიბინძურეების მოსმენა და ადამიანების ფეხქვეშ გათელვა, შეურაცხყოფა, ცილისწამება სიამოვნებს, აღაგზნებს და ბედნიერს ხდის. 

მე მაინც მგონია, რომ ბევრი არ არის ამ კატეგორიის ადამიანი.

შალვა პაპუაშვილიც და ირაკლი კობახიძეც სანიმუშოები არიან ცილისწამებაში. მხოლოდ და მხოლოდ ღვარძლი და ბოროტება მოდის მათგან, მათი პირიდან და ხელიდან.  მე ძალიან მეეჭვება, რომ თვითონ „ქართულ ოცნებასთან“ დაკავშირებული ადამიანებისთვის – ანგარებით თუ უანგაროდ – ეს პიროვნებები რამე ავტორიტეტს წარმოადგენდნენ, ან მათი აზრი საინტერესო იყოს”, – ამბობს გიორგი მაისურაძე.

ამავე თემაზე:

• EU სინანულს გამოთქვამს, რომ ორგანიზატორებს მოუწიათ გორში დაგეგმილი ფესტივალის გადადება

დღეს, პირველ ოქტომბერს მკითხველმა „ბათუმელებს“ გამოუგზავნა ფოტო, რომელზეც ბათუმში მგზავრობის გაძვირების შესახებ განცხადებაა აღბეჭდილი და ინფორმაციის გადამოწმება გვთხოვა.

ბათუმის ტერიტორიაზე მგზავრთა გადაყვანასთან დაკავშირებული ლიცენზიის მფლობელი კომპანიების შპს „ჯორჯია ტრანსისა“ და „სონაგოს“ წარმომადგენელი „ბათუმელებთან“ საუბარში ადასტურებს, რომ კომპანიამ მგზავრობის ფასი ერთ ლარამდე გააძვირა. მიზეზად მან საწვავის ფასის გაზრდა დაგვისახელა. 

„დიახ, დღეიდან გაძვირდა, კომპანიები ვადგენთ ფასს.

ადრე მერია არეგულირებდა, მაგრამ ორი წელია უკვე მერია და საკრებულო ამ საკითხს აღარ წყვეტენ. ფასებს არეგულირებს ბაზარი. რა თქმა უნდა, საწვავის გაძვირებას უკავშირდება ფასის გაძვირებაა“ – გვითხრა ნუგზარ ფარტენაძემ. 

ბათუმის მერია „ბათუმელებთან“ ინფორმაციას ადასტურებს.

„2025 წლის აპრილიდან მ2 კატეგორიის ავტობუსებით [ სამარშრუტო ტაქსი] მგზავრთა გადაყვანა აღარ არის ეკონომიკური საქმიანობის სფეროდ განსაზღვრული, ამიტომ ფასს მერია არ ადგენს“ – განგვიმარტეს ბათუმის მერიაში.

ბათუმში საზოგადოებრივი ტრანსპორტით მგზავრობა 2026 წელს მნიშვნელოვნად გაძვირდა. წლის დასაწყისში მუნიციპალური ავტობუსით მგზავრობის ფასი 30 თეთრიდან 70 თეთრამდე გაიზარდა, რასაც მალევე მოჰყვა სამარშრუტო ტაქსებით მგზავრობის ფასის გაძვირება 80 თეთრამდე.

ბათუმის რესპუბლიკური საავადმყოფოს გადაუდებელი დახმარების განყოფილების უფროსი, ექიმი ჯუმბერ ბოლქვაძე ამბობს, რომ ჯანდაცვის მინისტრი, მიხეილ სარჯველაძე თანამდებობის დატოვებას სთხოვს.

დღეს, პირველ ოქტომბერს, ბათუმის რესპუბლიკურ საავადმყოფოსთან საპროტესტო აქცია გამართეს ექიმებმა.

როგორც საპროტესტო აქციაზე მყოფი ექიმები ჰყვებიან „ბათუმელებთან“, ეს ამბავი 2026 წლის ივნისში მოხდა – კლინიკაში უნდა შემოეყვანათ მძიმე პაციენტი, თუმცა საავადმყოფოს „ემერჯენის“ განყოფილებაში საკმარისი ადგილი არ ჰქონდა. უფრო მეტიც, როგორც ჯუმბერ ბოლქვაძემ თქვა, მათ ათვისებული ჰქონდათ განყოფილების სარეზერვო ინვენტარიც.

ექიმების თქმით, გადაუდებელი დახმარების ცენტრის ოპერატორი დაჟინებით მოითხოვდა პაციენტის მიღებას.

ჯუმბერ ბოლქვაძე ამბობს, რომ ფორსმაჟორულ მდგომარეობაში იყო და სატელეფონო საუბრისას გადაუდებელი დახმარების ცენტრის ოპერატორს არაერთხელ განუმარტა, რომ პაციენტის მიღება არ შეეძლო. ოპერატორმა მას მინისტრის შესაბამის ბრძანებაზე მიუთითა, ჯუმბერ ბოლქვაძემ კი ოპერატორს უთხრა, რომ რადგან ასეთია მინისტრის ბრძანება – „წაიყვანეთ მინისტრთან“.

ექიმები ამბობენ, რომ 2026 წლის აგვისტოში მინისტრმა მიხეილ სარჯველაძემ ჯუმბერ ბოლქვაძეს თანამდებობის დატოვება უშუალოდ მოსთხოვა. მინისტრს ეს მოთხოვნა შეხვედრაზე გაუჟღერებია, სადაც ის გადაუდებელი დახმარების ცენტრის [ჯანდაცვის სამინისტროს სსიპ] ფარული ჩანაწერით მისულა, რომელშიც ისმის, რომ მძიმე მდგომარეობაში მყოფი პაციენტის მიღებაზე „ემერჯენსის“ უფროსი, ჯუმბერ ბოლქვაძე უარს ამბობს და ოპერატორის შეკითხვაზე, თუ სად შეიძლება გადაიყვანონ პაციენტი, ჯუმბერ ბოლქვაძე პასუხობს: „წაიყვანეთ მინისტრთან“.

„მსჯიან ამ ფრაზის გამო, რომელიც კრიმინალს არ შეიცავს, მგონია. მე პაციენტი განსაცდელში არ მიმიტოვებია“, – ამბობს ჯუმბერ ბოლქვაძე „ბათუმელებთან“ და განმარტავს, რომ იმავე დღეს პაციენტი სტაციონარში მიიღეს და შემდეგ გადაიყვანეს რეანიმაციაში.

„მას რომ დასჭირვებოდა, მაგალითად, ხელოვნური სუნთქვის აპარატი, მისი სიცოცხლე განწირული იყო,“ – ამბობს ჯუმბერ ბოლქვაძე.

ჯუმბერ ბოლქვაძე და სამედიცინო პერსონალი ადასტურებს იმას, რომ რესპუბლიკურში მისული მინისტრი არ დაინტერესებულა, რეალურად რატომ ვერ იღებენ პაციენტებს რეანიმაციებში, რჩებიან თუ არა პაციენტები სასწრაფო სამედიცინო სამსახურის მანქანებში და ექმნებათ თუ არა საფრთხე პაციენტების სიცოცხლეს.

ამავე დროს, ჯუმბერ ბოლქვაძის თქმით, დაახლოებით 2 თვეა მინისტრი მიხეილ სარჯველაძე სხვადასხვა ფორმის კომუნიკაციით – პირადი შეხვედრით, ტელეფონით, შუამავლების დახმარებით აიძულებს, დაწეროს განცხადება სამსახურიდან წასვლის შესახებ. უფრო მეტიც, დღეს, 1-ელ ოქტომბერს, კლინიკაში იმყოფებოდა აჭარის ჯანდაცვის მინისტრი, ნინო ნიჟარაძე, რომელიც პირადად შეხვდა ჯუმბერ ბოლქვაძეს. „ემერჯენსის“ ხელმძღვანელი ამბობს, რომ მინისტრმა სთხოვა „არ გამოიწვიოს ზედმეტი ხმაური“ და დატოვოს თანამდებობა.

სწორედ ამ ვიზიტის შემდეგ რესპუბლიკური საავადმყოფოს ექიმებმა აქციის გამართვა გადაწყვიტეს.

ექიმები მხარს უჭერენ ჯუმბერ ბოლქვაძეს და ითხოვენ განმარტებას სამინისტროსგან, რა საფუძვლით აიძულებენ ექიმს თანამდებობის დატოვებას.

ჯუმბერ ბოლქვაძე ამბობს, რომ ის მზად იყო დაეტოვებინა გადაუდებელი სამედიცინო დახმარების განყოფილება, მაგრამ სარჯველაძემ მისგან კლინიკის დატოვებას მოითხოვა.

ჯუმბერ ბოლქვაძისვე თქმით, რომ მისი ნათქვამი ფრაზა არაეთიკური იყო და ამის გამო არაერთხელ მოიხადა ბოდიში, თუმცა, მიხეილ სარჯველაძემ მას უთხრა, რომ ბოდიში არ იყო საკმარისი.

„ბათუმელებთან“ საუბრისას ექიმმა ასევე თქვა, რომ მინისტრთან საუბარი „არ იყო სასიამოვნო“ და სარჯველაძე იყო „აგრესიული და ხმამაღალი“.

ექიმები, რომლებიც დღეს ჯუმბერ ბოლქვაძეს მხარდასაჭერად შეიკრიბნენ, აცხადებენ, რომ თუ ჯუმბერ ბოლქვაძეს აიძულებენ კლინიკიდან წასვლას, საავადმყოფოს ისინიც დატოვებენ.

„იურიდიული საფუძვლის გარეშე რომ მომთხოვონ სამსახურის დატოვება, ამის უფლება მგონი არავის აქვს,“- ამბობს ექიმი ჯუმბერ ბოლქვაძე.

დაინტერესდა თუ არა მინისტრი, რეალურად რატომ ვერ იღებდა პაციენტს კლინიკა? – ვკითხეთ აქციაზე გამოსულ სამედიცინო პერსონალს.

„არავის აინტერესებს პაციენტის ბედი, ზედა ეშელონებში ეს არავის არ აინტერესებს… არც პერსონალის ბედი არ აინტერესებს. რატომ თქვა ეს ექიმმა? ამით არავინ დაინტერესდა“ – გვითხრა ციცინო მამულაძემ.

„ბათუმელები“ დაუკავშირდა ბათუმის რესპუბლიკურ საავადმყოფოს ადმინისტრაციას, ასევე საქართველოს ჯანდაცვის სამინისტროს. კომენტარის მიღების შემთხვევაში, ინფორმაცია განახლდება.

რაც შეეხება აჭარის ჯანდაცვის სამინისტროს, უწყების პრესცენტრში გვითხრეს, რომ ამ თემაზე კომენტარს არ გააკეთებენ.

ნახეთ საპროტესტო აქციის ვიდეოჩანაწერი: 

თოთხმეტი წლის ასაკს მიუღწეველი ორი არასრულწლოვანის მიმართ ჩადენილი გარყვნილი ქმედების, სექსუალური ხასიათის ქმედების იძულების და პირადი ცხოვრების საიდუმლოს ხელყოფის ფაქტებზე ერთ პირს ბრალდება დაუსწრებლად წარუდგინეს.

ინფორმაციას პროკურატურა ავრცელებს.

უწყების ცნობით, გამოძიებით დადგინდა, რომ ბრალდებულს სოციალური ქსელის – „TikTok“-ის ყალბი ანგარიშების და „whatsapp”-ის აპლიკაციით, 8 და 11 წლის მოზარდებთან, ნდობის მოპოვების შემდეგ, სექსუალური შინაარსის კომუნიკაცია ჰქონდა.

„დაზარალებულების ასაკის გამოყენებით და სახელის გამტეხი ინფორმაციის გავრცელების მუქარით, აიძულებდა მათ ინტიმური შინაარსის, მათ შორის, სექსუალური ხასიათის ქმედებების ამსახველი ფოტო-ვიდეოს გადაღებას და გაგზავნას და ერთ-ერთ დაზარალებულს თავადაც უგზავნიდა სექსუალური შინაარსის ვიდეოებს.

ასევე, ბრალდებულმა დაზარალებულისგან უკანონოდ მოპოვებული ინტიმური შინაარსის ფოტოსურათები გაუგზავნა მის დედას“ – წერს პროკურატურა.

პირს ბრალდება დაუსწრებლად, საქართველოს სისხლის სამართლის კოდექსის 157-ე პრიმა მუხლის პირველი ნაწილით (პირადი ცხოვრების საიდუმლოს უკანონო მოპოვება, გამოყენება და გავრცელება), 141-ე მუხლის მე-2 ნაწილის „ვ“ ქვეპუნქტით (წინასწარი შეცნობით თოთხმეტი წლის ასაკს მიუღწეველი პირის მიმართ გარყვნილი ქმედება) და 139-ე მუხლის მე-4 ნაწილის ,,ბ’’ ქვეპუნქტით (არასრულწლოვანის მიმართ სექსუალური ხასიათის ქმედების იძულება) წარედგინა, რაც 15 წლამდე თავისუფლების აღკვეთას ითვალისწინებს.

ბრალდებულს, სხვა სისხლის სამართლის საქმეზე, აღკვეთის ღონისძიების სახით დაუსწრებლად შეფარდებული აქვს პატიმრობა და მის მიმართ გამოცხადებულია ძებნა.

გონიო-კრწანისის დაცვის საორგანიზაციო ჯგუფი აცხადებს, რომ გასაიდუმლოებული ხელშეკრულების საფუძველზე კრწანისსა და გონიოში მიწის დიდი ფართობების არაბულ კომპანია Eagle Hills-ისთვის გადაცემა ფართო საზოგადოებრივი პროტესტის საგანია.

„საქართველოს მოქალაქეების ინტერესი, იცოდეს და შეაფასოს ფასეული სახალხო საკუთრების გასხვისების/სარგებლობაში გადაცემის დეტალები, ბევრად აღემატება კომპანიის კომერციულ ინტერესებს“ – აცხადებენ საორგანიზაციო ჯგუფში.

„ოცნების“ ხელისუფლებას კრწანისსა და გონიოში არაბული Eagle Hills-ის მიერ 6,6 მილიარდი აშშ დოლარის ინვესტიციის განხორციელება აქვს დაანონსებული. „იგლ-ჰილსთან“ გაფორმებული ხელშეკრულებები კი გასაიდუმლოებულია.

საინიციატივო ჯგუფმა კრწანისის პარკის ტერიტორიის განაშენიანების გეგმის კონცეფციასთან და სკოპინგის ანგარიშთან დაკავშირებით საკუთარი შენიშვნები გარემოს ეროვნულ სააგენტოს და დაავადებათა კონტროლისა და საზოგადოებრივი ჯანმრთელობის ეროვნულ ცენტრს [NCDC] უკვე გადაუგზავნა. სტრატეგიული გარემოსდაცვითი შეფასების [სგშ-ს] შემთხვევაში სწორედ ეს ორი უწყებაა პასუხისმგებელი.

სივრცითი და ქალაქთმშენებლობითი განვითარების სააგენტომ შპს „იგლ ჰილს საქართველოს“ მიერ შემუშავებული განაშენიანების გეგმის კონცეფცია, ამ კონცეფციის სტრატეგიული გარემოსდაცვითი შეფასების [სგშ] სკოპინგის ანგარიში და სხვა დოკუმენტაცია, რომელიც კრწანისის პარკს [თბილისისა და გარდაბნის მუნიციპალიტეტების ტერიტორიების ნაწილს] მოიცავს, გარემოს ეროვნულ სააგენტოში 2026 წლის 27 აგვისტოს წარადგინა.

დაინტერესებული პირების მიერ წერილობითი შენიშვნებისა და მოსაზრებების წარდგენის ბოლო ვადა 2026 წლის 21 სექტემბერი იყო.

გონიო-კრწანისის დაცვის საინიციატივო ჯგუფის შენიშვნებში აღნიშნულია, რომ „განსახილველად წარმოდგენილი განაშენიანების გეგმის შემუშავების და სგშ-ს პროცესი მიღებული გადაწყვეტილებების პოსტ-ფაქტუმ ლეგიტიმაციის ინსტრუმენტად რომ არ იქცეს, აუცილებელია:

• გამოქვეყნდეს პროექტთან დაკავშირებული, საზოგადოებისთვის ცნობილი თუ უცნობი, მხარეთა შორის დადებული შეთანხმებები და სახელმწიფო ორგანოების მიერ მიღებული გადაწყვეტილებები, საქართველოს კანონმდებლობით დადგენილი კომერციული ინფორმაციის [თუკი ასეთი არსებობს] გამოცალკევების მოთხოვნების დაცვით.
• სკოპინგის დასკვნაში პირობად უნდა განისაზღვროს ყველა იმ შესწავლისა და შეფასების ანგარიშების წარმოდგენა/გამოქვეყნება, რომლებიც საფუძვლად დაედო კომპანია Eagle Hills-ის მიერ საპროექტო არეალის შერჩევას.
• სკოპინგის დასკვნაში პირობად უნდა განისაზღვროს „ნულოვანი ალტერნატივის“ განსაზღვრა, არა როგორც არსებული მდგომარეობის გაგრძელება, არამედ როგორც სახელმწიფო პოლიტიკისა და დაგეგმილი განვითარების – კრწანისის ტყე-პარკის აღდგენის – განხორციელება… აღდგენის გეგმა მხოლოდ დეკლარაცია არ იყო, მას ფინანსური ვალდებულებაც ახლდა“.

„ანგარიში ვერ პასუხობს იმ კომპლექსურ ამოცანას, რასაც კრწანისის ჭალების ფაუნისტური კვლევა უნდა მოიცავდეს. კვლევა მთლიანად ეყრდნობა ლიტერატურულ წყაროებს [თანაც მოძველებულს]. შერჩეული მეთოდები ვერ პასუხობს თანამედროვე მეთოდიკას ველური ბუნების კვლევაში. განსაკუთრებით საყურადღებოა, რომ კვლევაში არ არის გამოყენებული არცერთი თანამედროვე, მონაცემებზე დაფუძნებული და სტატისტიკურად გამართლებული მეთოდი.

მიღებული შედეგები ზედაპირულია და ააშკარავებს კვლევის არასრულყოფილად ჩატარებას, ნებისმიერ ტაქსონომიურ ჯგუფში. გვხვდება მცდარი და მკითხველის მოტყუებაზე გათვლილი ინფორმაცია ისეთ მნიშვნელოვან საკითხზე, როგორიცაა მაგალითად, სამიგრაციო დერეფნები კრწანისის ჭალის კონტექსტში“, – აღნიშნულია ჯგუფის შენიშვნებში.

„იგლ ჰილსის“ პროექტი უნდა განხორციელდეს გონიოშიც, ყოფილი სამხედრო პოლიგონის ტერიტორიაზე. შესაბამისი სგშ-ს პროცედურის გავლა ამ შემთხვევაშიც აუცილებელი იქნება, თუმცა საჭირო გახდება დამატებითი პროცედურებიც, რადგან გონიოს საინვესტიციო ტერიტორია მთლიანად მოქცეულია „ზურმუხტის ქსელის“ საზღვრებში და ის საერთაშორისო დონეზე დაცული ტერიტორიაა.

საინიციატივო ჯგუფის შეფასებით, „სგშ-ს მთელი არსი იმაშია, რომ გარემოსდაცვითი და სოციალური [მათ შორის, ჯანმრთელობის დაცვის] მოსაზრებები გათვალისწინებული იყოს გადაწყვეტილების მიღების ადრეულ ეტაპზე, მაშინ, როდესაც ვარიანტები [ალტერნატივები] ჯერ კიდევ ღიაა. სკოპინგი კი, სგშ-ს სწორედ ის ეტაპია, სადაც უნდა განისაზღვროს, რომელი ალტერნატივები შეფასდება.

[კრწანისთან დაკავშირებით] კომპანია Eagle Hills-ის მიერ შემუშავებულ ურბანულ პროექტში კი, რომელიც სრულიად ახალი ურბანული სივრცის შექმნას გულისხმობს, ალტერნატივების საკითხი განსაკუთრებით მწვავეა შემდეგი ორი გარემოების გამო:

• გადაწყვეტილებები, რომლებიც ალტერნატივების შეფასებისა და შედარების საფუძველზე უნდა მიღებულიყო, უკვე მიღებულია და გეგმის კონცეფციასა და სკოპინგის განცხადებაში ალტერნატივების შეფასების წინაპირობად არის წარმოჩენილი;
• შედეგად, ალტერნატივების შესწავლა დაყვანილია ვიწრო, ქვედა დონის ალტერნატივებამდე: იმის დადგენამდე, თუ „როგორ განაშენიანდეს ტერიტორია“ და არა – „უნდა განაშენიანდეს, თუ არა და სად“.

„ამ მიწების მაღალი ფასეულობა განპირობებულია ეკონომიკური, სოციალური, გარემოსდაცვითი და რეკრეაციული, დემოგრაფიული, სულიერი და წინაპრების ხსოვნასთან მჭიდრო კავშირის ქონით. ასევე, მაღალია რისკები, რაც უკავშირდება გარემოს დაზიანებას, კორუფციას, უკანონო შემოსავლების ლეგალიზებას და საზოგადოების პოლარიზაციის გაძლიერებას, მათ შორის, სახალხო საკუთრების მითვისების და დემოგრაფიული წონასწორობის გაუარესების რეალური შესაძლებლობის, ან თუნდაც აღქმის გამო“, – აცხადებს საორგანიზაციო ჯგუფი.

ჯგუფის განცხადებით, „დაინტერესებულ მხარეთა ანალიზი უნდა მოიცავდეს ყველა პოზიციას, მათ შორის, პროექტის უარყოფას, როგორც ლეგიტიმურ პოზიციას. ანგარიში, რომელიც „დაინტერესებულ მხარეებში“ მხოლოდ სახელმწიფო უწყებებს, კომუნალურ კომპანიებს და რამდენიმე სოფლის წარმომადგენლებს მოიაზრებს, ხოლო ათასობით მოქალაქის ორგანიზებულ პროტესტს არ ახსენებს, არასრულია და მიკერძოებულია.

ჩვენი მოთხოვნაა, განაშენიანების გეგმის მომზადებისა და დამტკიცების, ასევე, სგშ-ისა და რეკომენდაციების გაცემის პროცესში საზოგადოებრივი ინიციატივების სხვადასხვა ფორმით გამოხატული პოზიციები აღიარებულ იქნეს დაინტერესებულ მხარეთა პოზიციებად და დოკუმენტირდეს განაშენიანების გეგმისა და სგშ-ის პროცესის კვლევებსა და ანგარიშებში, რათა ისინიც გათვალისწინებულ იქნეს უფლებამოსილი ორგანოების მიერ გადაწყვეტილებების მიღებისას.

საზოგადოებრივი ჯგუფები, რომლებიც უარყოფენ პროექტს, სხვა ჯგუფებთან ერთად, თანასწორად უნდა იქნენ ჩართული კონსულტაციების პროცესებში“ – აცხადებს გონიო-კრწანისის დაცვის საორგანიზაციო ჯგუფი.

გონიო-კრწანისის დაცვის საორგანიზაციო ჯგუფის შენიშვნების სრულად სანახავად გადადით ბმულზე

ამავე თემაზე:

დღეს, 30 სექტემბერს, ვარშავაში, მზია ამაღლობელს გადასცეს პოლონეთის მთავრობის დაარსებული ლეხ ვალენსას „სოლიდარობის პრიზი“.

დაჯილდოების ცერემონიას ესწრებოდა პოლონეთის საგარეო საქმეთა მინისტრი, რადოსლავ სიკორსკი და თავად ლეხ ვალენსა, პოლონეთის ყოფილი პრეზიდენტი, ცნობილი პოლონური მოძრაობა „სოლიდარობის“ ლიდერი.

მზია ამაღლობელის სახელით, პოლონეთის ვიცე-პრემიერისა და საგარეო საქმეთა მინისტრ რადოსლავ სიკორსკისგან ჯილდო „ბათუმელების“ წარმომადგენელმა ირმა დიმიტრაძემ მიიღო.

„წელს ლეხ ვალენსას სახელობის სოლიდარობის ჯილდო გადაეცა მზია ამაღლობელს, ქართველ ჟურნალისტს, სიტყვის თავისუფლებისთვის დაუღალავი ბრძოლისთვის. სამწუხაროდ, მან ჯილდო პირადად ვერ მიიღო, რადგან 2025 წლიდან პატიმრობაში იმყოფება.

თავისუფლება და დემოკრატია არასოდეს გვეძლევა ერთხელ და სამუდამოდ. მზიამ ეს ძალიან კარგად იცის“ – დაწერა პოლონეთის საგარეო საქმეთა მინისტრმა პლატფორმა X-ზე დაჯილდოების ცერემონიის შემდეგ.

მზია ამაღლობელის დაჯილდოებას სოციალურ ქსელში ასევე გამოეხმაურა ლეხ ვალენსა.

„ახლა საქართველოს დახმარების ჯერია.

ლეხ ვალენსას სახელობის სოლიდარობის ჯილდო – მზია ამაღლობელს.

ის არის კორუფციასთან მებრძოლი ქართველი ჟურნალისტი, ორი დამოუკიდებელი ქართული მედიასაშუალების დამფუძნებელი. 2025 წელს მას პოლიტიკური მოტივით 2 წლით თავისუფლების აღკვეთა მიესაჯა ბათუმის პოლიციის უფროსისთვის სილის გაწვნის გამო, რითაც იგი დამოუკიდებელ საქართველოში პირველი ქალი პოლიტპატიმარი გახდა“, — დაწერა ლეხ ვალენსამ სოციალურ ქსელში.

ცნობილი პოლონელი პოლიტიკოსის, ნობელის პრემიის ლაურეატის, ლეხ ვალენსას „სოლიდარობის ჯილდო“ პოლონეთის საგარეო საქმეთა სამინისტროს ინიციატივით 2014 წელს დაარსდა.

ჯილდო გადაეცემათ იმ პირებს ან ორგანიზაციებს, რომლებსაც განსაკუთრებული წვლილი შეაქვთ დემოკრატიისა და სამოქალაქო თავისუფლებების ხელშეწყობასა და დაცვაში და რომლებიც საერთაშორისო სოლიდარობის სულისკვეთებით მოქმედებენ დემოკრატიისა და თავისუფლების გასაძლიერებლად მთელ მსოფლიოში.

პრემიის ლაურეატებს შორის არიან: ყირიმელი თათრების ლიდერი მუსტაფა ჯემილევი (2014); რუსეთში მოკლული პოლიტიკოსის, ბორის ნემცოვის შვილი, ჟურნალისტი და სამოქალაქო აქტივისტი ჟანა ნემცოვა (2015); ბელარუსი დისიდენტი პაველ ლატუშკო (2024) და კუბელი დისიდენტი, მოძრაობა – „ქალები თეთრებში“ ლიდერი, ბერტა სოლერ ფერნანდესი (2025).~

მთავარ ფოტოზე: ლეხ ვალენსა და რადოსლავ სიკორსკი. 

ამავე თემაზე: 

30 სექტემბერს, პოლონეთში, „ბათუმელების“ და „ნეტგაზეთის“ დამფუძნებელს, მზია ამაღლობელს პოლონეთის საგარეო საქმეთა სამინისტრომ გადასცა ლეხ ვალენსას სახელობის სოლიდარობის ჯილდო.

დაჯილდოების ცერემონია ვარშავაში გაიმართა, დაჯილდოებას ესწრებოდა პოლონეთის ვიცე-პრემიერი და საგარეო საქმეთა მინისტრი რადოსლავ სიკორსკი.

მზია ამაღლობელს ლეხ ვალენსას სოლიდარობის ჯილდო გადაეცა დემოკრატიული ღირებულებების ხელშეწყობისა და მხარდაჭერის აღიარების ნიშნად.

დაჯილდოების ცერემონიას ესწრებოდა თავად ლეხ ვალენსა.

მზია ამაღლობელის ჯილდო პოლონეთის საგარეო საქმეთა მინისტრმა, რადოსლავ სიკორსკიმ „ბათუმელების“ წარმომადგენელს, ირმა დიმიტრაძეს გადასცა.

ცნობილი პოლონელი პოლიტიკოსის, ნობელის პრემიის ლაურეატის, ლეხ ვალენსას „სოლიდარობის ჯილდო“ პოლონეთის საგარეო საქმეთა სამინისტროს ინიციატივით დაარსდა 2014 წელს.

ჯილდო გადაეცემათ იმ პირებს ან ორგანიზაციებს, რომლებსაც განსაკუთრებული წვლილი შეაქვთ დემოკრატიისა და სამოქალაქო თავისუფლებების ხელშეწყობასა და დაცვაში და რომლებიც საერთაშორისო სოლიდარობის სულისკვეთებით მოქმედებენ დემოკრატიისა და თავისუფლების გასაძლიერებლად მთელ მსოფლიოში.

პრემიის ლაურეატებს შორის არიან: ყირიმელი თათრების ლიდერი მუსტაფა ჯემილევი (2014); რუსეთში მოკლული პოლიტიკოსის, ბორის ნემცოვის შვილი, ჟურნალისტი და სამოქალაქო აქტივისტი ჟანა ნემცოვა (2015); ბელარუსი დისიდენტი პაველ ლატუშკო (2024) და კუბელი დისიდენტი, მოძრაობა – „ქალები თეთრებში“ ლიდერი, ბერტა სოლერ ფერნანდესი (2025).

ლეხ ვალენსა პოლონეთის ცნობილი მოძრაობა „სოლიდარობის“ ლიდერი და პოლონეთის ყოფილი პრეზიდენტია. მას 1983 წელს ნობელის პრემია გადაეცა მშვიდობის დარგში.

მზია ამაღლობელი წელიწადი და 8 თვეა პატიმრობაში. მას 2-წლიანი პატიმრობა აქვს მისჯილი სისხლის სამართლის კოდექსის 353-ე მუხლის პირველი ნაწილით – პოლიციელისთვის წინააღმდეგობის გაწევა.

მზია ამაღლობელი 2025 წლის 12 იანვარს დააკავეს, ჯერ ადმინისტრაციული, შემდეგ კი სისხლის სამართლის წესით. დაკავების შემდეგ იგი არაადამიანური მოპყრობის მსხვერპლი გახდა, თუმცა პროკურატურას ეს საქმე არ გამოუძიებია.

მზია ამაღლობელის საქმის განხილვა 8 თვის განმავლობაში მიმდინარეობდა ბათუმის საქალაქო სასამართლოში პოლიციელი ცრუმოწმეების, „ოცნების“ ლიდერების თავდასხმების, ბრალდებების, მის მიმართ უდანაშაულობის პრეზუმფციის დარღვევის და პროპაგანდის შეტევის ფონზე.

პატიმრობაში ყოფნისას მზია ამაღლობელს მკვეთრად დაუქვეითდა მხედველობა.

მზია ამაღლობელის საქმის გარშემო გაერთიანდნენ პრესის თავისუფლების საკითხებზე მომუშავე წამყვანი გლობალური ორგანიზაციები და დასავლური ქვეყნების საელჩოები. მზია ამაღლობელის „დაუყოვნებლივი და უპირობო გათავისუფლებისა და მის წინააღმდეგ პოლიტიკურად მოტივირებული ყველა ბრალდების მოხსნის“ შესახებ, ჩანაწერი გაკეთდა ასევე ევროპარლამენტის რეზოლუციაში.

პატიმრობაში ყოფნისას მზია ამაღლობელმა არაერთი პრესტიჟული ჯილდო მიიღო, ხოლო 2025 წლის 16 დეკემბერს მას ევროპარლამენტში, ევროკავშირის ადამიანის უფლებათა უმაღლესი ჯილდო, სახაროვის პრემია გადასცეს.

„ამ ჯილდოს ვიღებ ყველა იმ პოლიტპატიმრის სახელით, რომლებიც უსამართლოდ იხდიან სასჯელს ციხეებში და „ეჭვმიტანილები“ არიან საქართველოს ევროპული მომავლისათვის ბრძოლაში“ – ასე მიმართა მზია ამაღლობელმა ევროპარლამენტს რუსთავის ქალთა კოლონიიდან გაგზავნილი წერილით.

მზია ამაღლობელის ადმინისტრაციული საქმის განხილვა უკვე დაიწყო სტრასბურგის სასამართლომ, სადაც მის ინტერესებს საქართველოს ახალგაზრდა იურისტთა ასოციაცია იცავს.

ბათუმის ავტოტრანსპორტის ცნობით, №9 სამარშრუტო ხაზზე სატრანსპორტო საშუალებების როტაცია განხორციელდება.

კერძოდ, 1-ელი ოქტომბრიდან №9 სამარშრუტო ხაზზე მოძრავი Isuzu Ataman-ის მარკის 8-მეტრიანი ავტობუსები Isuzu City Bus-ის მარკის 10-მეტრიანი ავტობუსებით ჩანაცვლდება.

№9 სამარშრუტო ხაზი იმოძრავებს შემდეგი მიმართულებით:

ქათამაძის ქ. – ნონეშვილის ქ. – ბაქოს ქ. – ბარათაშვილის ქ. – გორგილაძის ქ. – გრიბოედოვის ქ. – ბაგრატიონის ქ. – აეროპორტის გზატკეცილი – მაჭავარიანის ქ. – ი. ჯავახიშვილის ქ. – მესხის ქ.

უკუმიმართულება:

მესხის ქ. – მაჭავარიანის ქ. – აეროპორტის გზატკეცილი – ბაგრატიონის ქ. – გრიბოედოვის ქ. – გორგილაძის ქ. – ბარათაშვილის ქ. – ბაქოს ქ. – ქათამაძის ქ.

„აღნიშნული ცვლილება სატრანსპორტო საშუალებების ხაზებს შორის ოპტიმალური გადანაწილებისა და არსებული რესურსების ეფექტიანად გამოყენების მიზნით ხორციელდება“ – წერს „ავტოტრანსპორტი“ ფეისბუქზე და დასძენს, რომ როტაციის ფარგლებში, Isuzu Ataman-ის მარკის 8-მეტრიანი ავტობუსების ჩანაცვლება უკვე განხორციელდა №7 და №7ა სამარშრუტო ხაზებზეც, სადაც მომსახურებას Isuzu City Bus-ის მარკის 10-მეტრიანი ავტობუსები ახორციელებენ.

„ეს ყველაფერი არის თავის შედარება ირაკლი კობახიძესთან, რომლის პრემიერობის პირობებშიც ქვეყანა იზოლაციაშია, ფაქტობრივად. ყველა კარგად ხვდება, რომ კობახიძე ძალიან არაპოპულარულია, არავინ არ მიიჩნევს მას გადაწყვეტილების მიმღებად და აი, ამ სიტუაციაში ის პარალელებს ავლებს კობახიძის მმართველობასთან, რომ მის დროს იყო დალაგებული, ამერიკასთან ურთიერთობები ჰქონდა, წარმატებული 25 ვიზიტი და ასე შემდეგ“ – ანალიტიკოსი ირაკლი მელაშვილი მიიჩნევს, რომ ციხეში მყოფი „ოცნების“ ყოფილი პრემიერი ირაკლი ღარიბაშვილი ახალი წერილით „კობახიძეს ესპარინგება“.

ირაკლი ღარიბაშვილმა მორიგი წერილი ციხიდან 29 სექტემბერს გაავრცელა, სადაც საზოგადოებას „შეახსენა“, რა ვითარებაში დაიკავა თანამდებობა მეორედ, 2021 წლის თებერვალში. ღარიბაშვილი წერს, რომ მაშინ ქვეყანაში მწვავე პოლიტიკური კრიზისი, პანდემია და ვაქცინების დეფიციტი იყო, საუბრობს ჩაკეტილ ქვეყანასა და ეკონომიკაზე, ბიუჯეტის დეფიციტსა და ლარის კურსზე. მისი მტკიცებით, 2021 წელს „ჩამოშლილი ხელისუფლება“ ჩაიბარა და მალევე „დაასტაბილურა“ ვითარება.

„ჩემი აზრით, ეს წერილი იყო მიმართული საზოგადოებისადმი და პირადი პოლიტიკური კამპანიის დაწყებას ჰგავს, როდესაც ადამიანი თვითონ აქებს საკუთარ თავს და საზოგადოებას ახსენებს თავის დამსახურებას.

ზუსტად საპირისპირო შინაარსის წერილის დაწერა შეიძლება ღარიბაშვილზე. რა გაფუჭდა მის დროს — ასეთი წერილის დაწერაც შეიძლება.

ეს პოლიტიკური კამპანია არ ვიცი ვის მიმართ არის მიმართული. არა მგონია, ბიძინა ივანიშვილს ახსენებდეს თავს, რომ რა კარგი პრემიერი ჰყავდა და რა ცუდია ახლანდელი. უბრალოდ, ვფიქრობ, რომ „ოცნების“ მხარდამჭერებში აწარმოებს თავის კამპანიას.

ის, ისევე როგორც ყველა, ყველა კარგად ხვდება, რომ კობახიძე ძალიან არაპოპულარულია, ამჟამად არავინ მიიჩნევს მას გადაწყვეტილების მიმღებად და ამ სიტუაციაში ღარიბაშვილი პარალელებს ავლებს კობახიძის მმართველობასთან, რომ მის დროს დალაგებული იყო და ამერიკასთან ურთიერთობები ჰქონდა, წარმატებული 25 ვიზიტი… ანუ, ეს ყველაფერი არის, სინამდვილეში, თავის შედარება კობახიძესთან, რომლის პრემიერობის პირობებშიც ქვეყანა არის იზოლაციაში, ფაქტობრივად.

აი, ამით ცდილობს ღარიბაშვილი „ოცნების“ ამომრჩევლისთვის იმის თქმას, რომ ის იყო „ოცნების“ ყველაზე კარგი პრემიერ-მინისტრი.

გახარია მოღალატე იყოო, წერს მაგასაც, კობახიძემ აი, ასეთ დღეში ჩაგვაგდოო. ბოლოში ხომ კითხვით ამთავრებს, კმაყოფილი ხართ, ახლა რაც ხდება? – ანუ კობახიძეს ესპარინგება ის და არა ივანიშვილს ან სხვა ადამიანებს, რომლებმაც მის დაჭერაზე გადაწყვეტილება მიიღეს. პირადად კობახიძესთან აქვს სპარინგი ამ წერილით გამართული.

ამ წერილის შინაარსიც არის ეს.

საინტერესო იქნება ახლა კობახიძე რას უპასუხებს ამ წერილზე“.

ამავე თემაზე: